Penghidoepan Radja Belgie/Bab 7

by Tjoe Bou San

Satoe tjerita jang betoel
telah kadjadian di
Europa.

PENGHIDOEPAN RADJA BELGIE II.

Ditjeritaken
oleh:
TJOE BOU SAN.
_BATAVIA
DRUKKERIJ SIN PO
^1913.

Pembagian Buku Penghidoepan Radja Belgie Berdasarkan bab

Bab 1 | Bab 2 | Bab 3 | Bab 4 | Bab 5 | Bab 6 | Bab 7 | Bab 8 | Bab 9 | Bab 10 | Bab 11 | Bab 12 | Bab 13 | Bab 14 | Bab 15 | Bab 16 | Bab 17 | Bab 18 | Bab 19 | Bab 20 | Bab 21 | Bab 22 | Bab 23 | Bab 24 | Bab 25 | Bab 26 | Bab 27 | Bab 28 | Bab 29 | Bab 30

VII.

---

Samantara itoe di Brussel ada dateng berkoempoel orang-orang terpladjar dari berbagi-bagi negri, dan itoe, adalah atas oendangannja radja Belgie.

Perboeatan baginda dalem hal ini, tida salah kaloe di bilang, ada berhoeboeng

Barones Marie Vecsera.
(katja 88).

dengen ia poenja niat, mempoenjaken laen karadjahan di loear negrinja.

Ampir soeda saratoes tahon lamanja, di London ada terdiri satoe perkoempoelan bernama „The African Association”, jang berniat membri kasopanan pada si pendoedoek itam.

Bahoewa di blakang itoe topeng „Membri kasopanan”, ada tersimpan satoe niat bagi kaoentoengan negri sendiri, adalah satoe hal jang sembarang orang dengen gampang bisa mendoega. Tidakah di doenia ini bangsa koelit poeti sadja poenja bilangan jang mendjadi samingkin loewas?

Begitoe poen Baginda Leopold II, jang sanantiasa berdaja boeat dapeti kepingan tanah Afrika, merasa tida ada laen perboeatan jang lebi baek, dari menoeroeti tindakan itoe perkoempoelan di London. Dari ini djoega maka ia mengoendang pada itoe orang-orang jang paling ternama dari Frankrijk, Duitschland, Engeland, Oostenrijk, Rusland, Italië dan Belgie, aken bermoefakatan tentang perkoempoelan „Association Internationale Africaine”, jang ia hendak diriken.

Achir-achir baginda bisa dapet katentoean, jang boeat permoelahan, poelannja nanti bekerdja dari tepi laoet Zanzibar di moeara kali Congo. Di sitoe nanti dibikin perhoeboengan dengen orang-orang jang djadi kapala si koelit itam, atawa goenaken pengaroe oewang, boeat dapeti tanah jang di'inginken.

 Lebi djaoe, dalem itoe perhimpoenan ada ditetapken, membikin djalanan teroes ka dalem negri, menjegah perdagangan boedak, melarang rahajat di itoe negri ber­perang satoe sama laen, dan bikin dami pada saban-saban pertjidrahan, dengen tida berfihak kasana-kamari.

 Sabagimana bisa ternjata dari namanja, demikian poen itoe perkoempoelan ada dapet bantoehan dari koeliling negri. Terlebi poelah dari Oostenrijk dan Belgie, oewang ada saoepama ditoewang-toewang, boeat digoenaken membri kasopanan pada si itam, tapi sabenarnja, adalah terpakeh aken menjampehi niatnja radja Leopold: Diriken karadjahan baroe, dimana ia sen­diri nanti berkwasa.

 Aken tetapi, dengen sakoenjoeng-koenjoeng Portugal kasi oendjoek dirinja, dengen membilang, ia sendiri jang ada poenja hak paling banjak di Afrika-Barat.

 Negri itoe kamoedian tjari toendjangan pada pamarenta Prasman, dan koetika niatnja ini mendjadi sia-sia, laloe ia minta pertoeloengan karadjahan Inggris.

 Satelah hal ini dibitjaraken sakean lamanja, achir-achir Engeland maoe akoeh haknja Portugal, tapi dengen dapet gantinja satoe kaoentoengan besar.

 Tatkalah itoe, samoea negri di doenia pada lakoeken protest, hingga ampir sadja terbit satoe pertjidrahan jang haibat.

⁂

 Pada soeatoe malem dari boelan Septem­ber, dimana hawa oedara ada terasa sedikit panas, di nataran satoe roemah makan jang paling rameh, di djalanan Anspach, ada doedoek doewa orang, dengen giat bitjara satoe sama laen. Doewa gelas bier tinggal terisi penoeh diatas medja, kerna jang dibitjaraken oleh iaorang, ada hal jang begitoe penting, hingga membikin masing-masing djadi loepah sama itoe minoeman.

 Satoe antara marika ada anak moeda, sedeng jang laen soeda beroesia satengah toewa.

 „Dan akoe brani bilang padamoe, Fran­çois,” berkata jang lebi toewa, „bilah ini hal tida lekas dibikin beres, nistjaja Engeland nanti lakoeken dengen ia poenja kor­ban sabagimana jang ia ingin.”

 „Itoe tida nanti dengen gampang bisa terjadi. Dimana doewa andjing sedeng berklahi . . . dan boeat hal ini telah bertjidra lebi dari doewa.”

 „Memang, kaloe Engeland maoe dapeti apa-apa, sanantiasa ia berlakoe demikian. Dalem ini minggoe akoe soeda toelis pandjang-lebar tentang hal ini, tapi roepanja seperti tida ada orang jang perhatiken, atawa barangkali, itoe orang-orang jang misti ambil taoe akoe poenja toelisan, tida sekali ada dapet membatja.”

 „Itoe tida boleh djadi, Victor, kerna kita poenja radja salaloe ada perhatiken betoel, apa jang orang bitjaraken tentang Afrika, hingga tentoe kaoe poenja toelisan lebi siang djoega soeda dibatja olehnja.”

 „Aken tetapi, kaloe orang tida kasi padanja itoe soerat kabar? Inget, François, baginda tida nanti membatja samoea courant jang ada di doenia.”

 „Habis, kaoe maoe berboeat apa lagi?”

 „Jang akoe maoe berboeat? Tida laen, bri ia njata akoe poenja niat, jang bilah akoe tida kliroe, adalah jang paling baek boeat membikin beres ini perkara.”  „Hei, dengen begitoe kaoe nanti ditertawaken orang! Apatah barangkali kaoe kira niatmoe itoe belon pernah dipikiri oleh baginda?”

 „Tida, akoe rasa ia belon pernah dapet ingetan sabagimana akoe poenja niat. Dan kaoe, apatah kaoe taoe, siapa jang akoe hendak goenaken boeat ini hal?”

 „Kaloe kaoe tida tjeritaken, tentoeakoe tida bisa doega siapa adanja.”

 „Bismarck!”

 „Bismarck? Hei, bagimana kaoe boleh dapet pikiran begitoe?”

 „Ja, Bismarck, dan tida laen orang nanti bisa menoeloeng kita poenja perkara. Aken tetapi ini hal, akoe tida boleh tem­pati sadja didalem soerat kabar! Dari itoe poen maka akoe ingin sekali bisa dapet bitjara sendiri pada baginda.”

 „Aken tetapi apa jang kaoe ingini, boekan sekali ”da hal jang moestahil.”

 „Memang, kaloe akoe ada djadi kaoe, jang begitoe gampang bisa dapet pertoeloengannja Graaf du Mons! Tapi boeat ka'adahankoe seperti sekarang, soenggoe ada soesa sekali.”

 Sst!” kata François, „djangan begitoe njaring! Akoe ada pertjaja betoel padamoe, dan maoe djoega berboeat sedikit kabaekan goena kaoe. Iai malem djoega akoe nanti toelis soerat pada itoe graaf, minta ia poenja pertoeloengan, soepajakaoe bisa dapet bitjara pada Sri baginda.”

 „Broentoeng sekali boeat akoe! Habis, kapan akoe nanti bisa dapet bitjara?”

 „Djangan begitoe kaboeroe napsoe, sobat! Akoe poen tida bisa taoe tentoe. Tapi kaoe boleh berharep, dan esok tengari kaoe nanti dapet kapastiannja. Kerna toewan graaf tida soeka berkerdja lambat-lambatan.”

 „Kaloe sampe niatkoe terkaboel, sobat, boekan sadja kaoe membikin akoe sanget bertrima kasi, tapi kaoe ada berboedi djoega pada negri. Boleh djadi dalem hatimoe, kaoe ,ada tertawaken akoe poenja pikiran, tapi biar bagimana djoega, akoe tetap masi pertjaja, jang niatkoe nanti bergoena besar bagi kitaorang poenja radja. Kerna, soenggoe sajang sekali, bilah Belgie sampe misti hilang ia poenja peroentoengan jang be­gitoe bagoes. Akoe soeda lama berharepharep, aken ini karadjahan bisa mempoenjaken satoe djadjahan, dari itoe poen akoe tida bisa merasa senang, kaloe sampe di ini kali mendjadi gagal!”

 „Pertjaja padakoe, sobat!” kata poelah François, kamoedian sembari meliat horlodji, ia berseroe; „Hei, akoe tida njana sekali, sekarang ini soeda begitoe malem!”

 Satelah itoe laloe ia minoem itoe bier sampe habis satengah gelas, bertabean pada sobatnja, dan brangkat pergi.

 Victor Gantier, penoelis soerat kabar di Gent, dan bekas redacteur „l'Echo du Par­lement”, tinggal berdoedoek lagi samantara waktoe.

 „Kaloe sampe niatkoe kadjadian!” kata ia pada diri sendiri. Kamoedian moekanja lantas berseri lantaran girang. Kerna ia ada saorang jang sanget menjinta pada tanah aer, dan sadari masi beroemoer moeda sekali, ia sanantiasa ada berharepharep, aken dirinja satoe kali bisa berboeat hal jang bergoena bagi ia poenja negri. Tjoema sadja ia poenja kerdjahan jang rendah membikin ia tida bisa berboeat apa-apa!

 Aken tetapi sekarang, adalah François jang hendak membri pertoeloengan padanja, hingga bilah itoe orang pegang perdjandjian, nistjaja sampelah ia pada pengharepannja jang soeda begitoe lama berada dalem ia poenja pikiran.

⁂

 Pada esok malem djam delapan, Victor Gantier mengadap pada baginda poenja pengawal, dan membri njata maksoednja dateng di itoe astana.

 Permoelah, satelah mendenger lapoeran pengawalnja, radja Belgie djadi tertawa, dan berkata pada diri sendiri:

  „Hei, apatah ini waktoe journalist djoega bisa menjampoer tangan dalera perkara politiek? Dan apatah boleh djadi, itoe orang ketjil nanti bisa dapetken satoe daja, sedeng akoe, satoe pamarenta kawakan, soeda poeter otak dengen berachir siasia?”

 Samantara itoe baginda laloe berbangkit dari tempatnja berdoedoek, dan sembari berdjalan moendar-mandir, ia berpikir be­gini:

 „Aken tetapi siapa boleh taoe? Di ini doenia poen memang ada banjak sekali perkara jang tida bisa didoega, hingga djoega tida boleh dibilang, ada hal jang moestahil. Dari itoe biarlah akoe liat sadja, bagimana dengen itoe orang.”

 Kamoedian baginda lantas toeroeni prenta, aken minta Gantier masoek ka dalem.

 Di itoe masa tingka lakoe baginda ada manis sekali. Ia samboet dengen hormat koendjoengan itoe penoelis soerat kabar, hingga siapa jang kenal baek padanja, nistjaja nanti djadi tertjengang, meliat ia poenja klakoean. Kerna kaloe ditimbang dengen menoeroeti sadja kabiasahannja, siapa poen nanti brani menentoeken, toewan Gantier tida aken ditrima mengadap pada baginda. Djika sekarang baginda ada berlakoe laen, itoelah ada lantaran ia sedeng kapoetoesan asa, dalem waktoe jang samoea manoesia soeka sekali mendengar laen orang poenja pikiran.

 Satelah ada berhadepan dengen itoe penoelis soerat kabar, baginda laloe berkata:

 „Kaoe ini toewan Gantier, bekas redac­teur „l'Echo du Parlement”, boekan?”

 „Betoel, Sri baginda!”

 „Soenggoe kaoe membikin akoe girang sekali, bisa bertemoe moeka padamoe. Akoe ada hargaken besar atas kerdjahannja soerat-soerat kabar.”

 Mendenger itoe, toewan Gantier lantas merasa, jang baginda berkata-kata, tjoema sakedar boeat berlakoe manis, sebab radja Belgie soeda terkenal betoel, boekan ada saorang jang soeka pada soerat kabar atawa penoelisnja.

 Lantaran itoe poen maka ia sigra ber­kata:  „Apa jang akoe ingin bitjaraken pada Sri baginda di ini kali, boekan sekali ada berhoeboeng dengen akoe poenja perkerdjahan seperti penoelis soerat kabar.”

 „O, perkara laen!” kata baginda, „habis, tentang apnatah jang kaoe maoe tjeritaken padakoe?”

 „Biarlah akoe mengomong sadja dengen teroes terang, Sri baginda! Datengkoe kamari, adalah boeat membitjaraken pada baginda, hal perslesihan kita poenja negri lantaran oeroesan di Afrika. Kerna orang seperti akoe, jang sanget menjinta pada tanah aer sendiri, nanti merasa tida enak sekali, bilah misti meliat dengen kadoewa mata, Belgie poenja harepan jang begitoe besar mendjadi siasia. Akoe taoe kaoe poenja ichtiar, Sri baginda, jang soeda sakean lama dilakoeken boeat dapeti itoe kaoentoengan, hingga akoe tida nanti bisa mengawasi sadja dengen peloek tangan, djika sampe Portugal, terbantoe oleh Enge­land, djalani niatnja, merampas karadjahan Belgie poenja hak atas keping-kepingan tanah dari si pendoedoek koelit itam.”

 „Kaoe poenja pikiran ada menjasar djaoe sekali!” kata baginda. „Soenggoe, toewan Gantier, akoe tida merasa kwatir barang sedikit, jang itoe kerdjahan „membri kasopanan”, nanti terganggoe dari fihak mana djoega.”

 „Kaoe tida bitjara teroes terang padakoe, Sri baginda! Boekankah sasoeatoe orang, jang ada poenja sedikit sadja katjerdikan, nanti bisa merasaken, jang didalem itoe niat „membri kasopanan”, ada tersimpan Belgie poenja kainginan, mempoenjaken djadjaban? Bilang sadja, Sri baginda, tidakah benar begitoe, apa jang sakean lama kaoe ichtiarken?”

 Radja Belgie tinggal mengawasi tetamoenja sakean lama. Ia tida bri djawaban atas itoe pertanjahan, kerna ia merasa ada terlaloe berbahaja, aken kaloeari perkatahan betoel atawa tida.

 Memang djoega penoelis-penoelis soerat kabar tida sekali boleh dipertjaja. Satoe perkatahan sadja jang dioetjapi dengen koerang hati-hati, lantas dengen sakedjap antero doenia bisa mendapet taoe. Lan­taran itoe poen baginda boekannja menjaoet, hanja bales menanja:

 „Dan bagimana kaoe poenja pikiran, toewan Gantier?”

 „Menoeroet akoe, Sri baginda, baeklah kitaorang ambil bebrapa keping tanah, dan adaken satoe pamarentahan merdika di bawa perlindoengannja karadjahan Belgie.”

Baginda laloe tertawa bergelak-gelak, kamoedian menanja sembari bermesem:

„Dan bagimana kaoe hendak atoer itoe perkara, toewan Gantier?”

„Dengen goenaken pertoeloengannja Vorst Bismarck!”

„Goenaken Bismarck? Hei, itoelah ada satoe perboeatan jang orang biasa kasi nama, hadepken pepesan pada satoe koetjing jang sedeng lapar! Apatah kaoe barangkali kira, itoe binatang ada sampe baek, aken liati sadja dengen merem-melek itoe barang kadojanannja, toewan Gantier?”

Aer moeka si penoelis soerat kabar tida sedikit ada kaliatan berobah. Ia awasi pada baginda, kamoedian laloe berkata:

„Boeat itoe, adalah laen-laen karadjahan jang nanti mendjaga padanja!”

Baginda lantas berdiam dan berpikir. Hatinja berketak-ketik lantaran girang.

Permoelah ia tida sekali ada mendoega, itoe penoelis soerat kabar, jang belon per­nah tjampoer tangan dalem oeroesan poli­tiek, nanti bisa hadepken ia satoe pikiran jang bergoena. Tapi sekarang, sasoeda mendenger itoe orang poenja bitjara, sate­lah mengarti ia poenja niat, baroelah ia merasa, bahoewa Gantier jang berada di hadepannja, boekan ada saorang jang haroes dipandang rendah. Ia poenja akal, boekan sadja ada satoe hal jang gampang mendjadi, tapi djoega ada satoe atoeran jang tjerdik sekali, jang ia, sabagi pamarenta kawakan, belon pernah dapet pikiran samatjem itoe.

Kamoedian laloe baginda berkata:

„Baek, toewan Gantier, kaoe poenja bi­tjara akoe nanti timbang kombali. Kaloe kaoe poenja akal itoe kaliatannja bisa dilakoeken, tentoe pertama akoe nanti minta kaoe poenja bantoean boeat djalani ini per­kara, salaennja itoe akoe nanti hargaken tinggi kaoe poenja gandjaran ini.”

„Dengen begitoe Sri baginda nanti mem­bikin akoe djadi jang paling broentoeng antara manoesia-manoesia di doenia. Akoe poenja harepan jang paling besar poen malaenkan membri kaoentoengan pada tanah aer sendiri.”

Satelah itoe, Victor Gantier membri hor­mat pada bagiada, dan berlaloe, samantara radja Belgie, sasoeda meliat ia tjoema ada sendirian dalem itoe kamar, lantas menggosok-gosok kadoewa tangannja lantaran kagirangan.

„Sabenarnja djoega niat itoe penoelis soerat kabar ada terang sekali. Memang dengen tjara begitoe orang misti dapeti apa jang dimaksoedken. Akoe sigra nanti kirim padanja ka Berlijn, aken ia bitjaraken hal ini pada Vorst Bismarck, dan akoe pertjaja, ia nanti bisa lakoeken apa jang ia kata.”

Demikianlah baginda berkata-kata pada diri sendiri.

Pada esok hari, sabagimana djam biasa. Gantier boeroe-boeroe pergi ka itoe roemah makan di djalanan Anspach, aken bertemoe pada sobatnja.

Aer moekanja itoe penoelis soerat kabar ada berseri-seri lantaran girang, hingga pada pertama kali meliat, François lantas bisa mendoega, jang pembitjarahan sobatnja pada baginda, ada berachir baek.

Victor sigra mengamperi, dan sembari membri tabe, ia laloe berkata:

„Trima kasi, boeat kaoe poenja pertoeloengan, sobat! Samoea ada berachir lebi baek dari sabagimana jang akoe doega. Sri baginda nanti perhatiken akoe poenja pikiran. Boeat poetoesannja akoe tida me­rasa kwatir barang sedikit, kerna baginda ada sampe tjerdik, aken dengen sakedjap bisa dapet liat njata, jang sasoenggoenja memang kitaorang misti ambil ini djalanan, aken sampe pada niat kita. Dari itoe boleh sekali rahajat Belgie berharep, ini perkara nanti membawa kaoentoengan.”

Gantier poenja doegahan tida sedikit salah. Koetika ia poelang ka roemah, soeratnja baginda soeda menoenggoeken padanja, dimana ada tertoelis, jang baginda ingin bitjaraken itoe hal lagi sakali.

Poetoesannja itoe perdamian, jalah Gan­tier misti brangkiit salekas-lekasnja ka kota Berlijn.

________________