Penghidoepan Radja Belgie/Bab 11
Satoe tjerita jang betoel
telah kadjadian di
Europa.
PENGHIDOEPAN RADJA BELGIE II.
Ditjeritaken
oleh:
TJOE BOU SAN.
BATAVIA
DRUKKERIJ SIN PO
1913.
|
Pembagian Buku Penghidoepan Radja Belgie Berdasarkan bab
Bab 1 | Bab 2 | Bab 3 | Bab 4 | Bab 5 | Bab 6 | Bab 7 | Bab 8 | Bab 9 | Bab 10 | Bab 11 | Bab 12 | Bab 13 | Bab 14 | Bab 15 | Bab 16 | Bab 17 | Bab 18 | Bab 19 | Bab 20 | Bab 21 | Bab 22 | Bab 23 | Bab 24 | Bab 25 | Bab 26 | Bab 27 | Bab 28 | Bab 29 | Bab 30 |
XI.
Api penerangan ada berkilat-kilat, mementjarken tjahajanja dalem gedong pemboeroean di Meyerling. Sakalian tetamoe ada doedoek disakitar satoe medjapandjang, samantara botol terisi champagne bergantiganti djalan terpoeter, membikin penoeh masing-masing poenja gelas minoem.
„Apa jang kenah ditangkap olehmoe, Philip?” menanja Rudolf'sakoenjoeng-koenjoeng dengen mesem sindir. „Dapeti Clairette, boekan? Na, itoe masi sedikitnja boleh dibilang kaoe ada poenja perolehan, tapi akoe .....”
„Aartshertog," kata Vecsera, „lebi baek kitaorang troesa inget-inget lagi pada itoe pemboeroean! Laen kali kita nanti dapeti waktoe jang lebi broentoeng!”
„Bagoes sekali kaoe poenja bitjara, Vecsera! Kaloe orang soeda djadibegitoe tida broentoeng, troesa beringet-inget lagi! Dan djika orang telah mati? Apa djoega misti lantas diloepahken?”
„Aken tetapi, kaoe ada artiken perkatahannja Vecsera terlaloe djaoe, aartshertog!” kata Bombelles.
„Tida terlaloe djaoe, Bombelles! Malaenkan akoe tida soeka sekali, mendenger orang poenja bitjara, jang begitoe lekas maoe loepahken samoea perkara! Pemboeroean tjilaka di ini hari, misti diboeat peringetan saoemoer hidoep. Juno soeda hilang djiwanja, dan jang laen-laen lagi dapet loekah berat, hingga bilah ini perkara masi maoe diloepahken begitoe lekas, kenapa djoega orang tida nanti lantas loepah, djika akoe soeda mati?”
„Aken tetapi, kanapa kaoe boleh lantas bitjaraken perkara mati?” menanja Clairette, jang tida liat aartshertog lagi terganggoe pikiran.
„Sebab samoea orang kamoedian misti mati! Akoe, dan kaoe djoega, nona Clairette jang tjantik!”
Clairette berdiam. Prins van SaksenCoburg, laloe mengasi tanda dengen mata, aken nona itoe djangan samboengi omong lebi djaoe, kamoedian ia sendiri laloe berkata:
„Tjobalah tjeritaken padakoe, toewan roemah jang terhormat! apatah kitaorang berkoempoel di sini tjoema perloenja boeat bitjaraken perkara jang tida enak, atawa goena laen kaperloean?”
„Tentoe boeat senangken hati!” berseroe aartshertog, jang sanantiasa masi taro perindahan pada iparnja. „Tapi akoe soeda djadi melantoer, lantaran mendengar orang poenja bitjara jang koerang patoet. Akoe harep kaoe tida boeat ketjil hati atas ini sedikit kasalahan, iparkoe jang tertjinta!”
„Kaloe begitoe, biarlah kita minoem boeat membikin girang satoe sama laen,” kata poelah prins.
Koetika itoe aartshertog laloe berbangkit dari krosi, dan berkata pada orang banjak:
„Sekarang, sakalian njonja dan toewantoewan, akoe maoe minoem atas kaselamatannja akoe poenja istri jang baroe: Marie Vecsera!”
Samoea orang ikoet berdiri, katjoewali itoe barones sendiri, jang tinggal berdoedoek dengen rasa koerang senang.
Kamoedian gelas itoe laloe dibentoerken satoe pada laen, hingga ada djoega jang djadi somplak, dan petjahannja djato diatas medja. Soeara njanjian lantas terdenger dengen gemper sekali. Samoea orang pada tinggali ia poenja tempat doedoek, berdansa satoe sama laen dengen bergendeng tangan, dan masing-masing laloe minoem sampe kering itoe champagne jang terisi penoeh.
„Tapi, kanapa kaoe tida toeroet merajaken kaselamatan kitaorang?” berseroe Rudolf pada Marie Vecsera.
Philip van Saksen-Coburg lantas pergi dekati itoe barones, dan berkata dengen soeara berbisik:
„Iringi sadja ia poenja kahendak, kerna ia soeda djadi gila.”
„Kaoe taoe, jang akoe ada sanget bentji orang bertingka mabok-mabokan” kata Marie dengen soeara plahan, tapi ia laloe menoeroet sabagimana Philip poenjabitjara, dan angkat gelasnja seperti laen-Iaen tetamoe.
„Nah, kaoe sekarang ada mendjadi akoe poenja ipar!” berseroe poelah aartshertog pada Louis Vecsera. „Tapi maski poen begitoe, akoe toch tinggal bersobat pada Philip, kerna ia ada akoe poenja sobat jang paling tertjinta .....”
Kamoedian ia laloe berdoedook kombali.
{{Tab}{Djoega jang laen-laen lantas berdoedoek di masing-masing poenja krosi.
Matanja bakal Keizer Oostenrijk laloe tertoetoep, dan moekanja djadi poetjat sabagi satoe mait.
„Baek kitaorang toeloeng bikin sedar padanja,” kata Bombelles. „Ah, boekankah lebi baek kita bawah sadja ia ka randjang?” tanja Hoyos.
„Biari sadja!” kata Philip. „Pertjoema kita bawah ia ka tempat tidoer, kerna sigra djoega ia nanti dateng pada kitaorang di sini.”
Baroe habis prins berkata, aarhertog lantas soeda mendjadi sedar sendirihja.
„Akoe poenja gelas soeda kosong,” kata ia. „Terkoetoek betoel, siapatah jang diwadjibken toewang minoeman?”
„Akoe,” kata Clairette, jang niat membikin baek kasalahannja tadi, tapi Hoyos lantas sodorken padanja tempat aer, dan berkata dengen soeara plahan:
„Hajo, penoehken sadja ia poenja gelas!”
„Akoe soeda djadi males sekali,” kata Bombelles sembari mengoewap.
„Males? Males? Akoe tida idjinken orang djadi males di sini! Kaoe misti telah bikin kenjang kaoe poenja tidoer di hari kamaren!” berseroe Rudolf. „Akoe ingin sekali jang akoe poenja pertoendangan ini dirajaken dengen adaken pesta dansa. Hoyos, kaoe bisa sekali bersoewit! Hajo, soewiti satoe lagoe wals, akoe ... maoe berdansa. Akoe ..... bersama akoe poenja ..... istri ..... memboeka pesta ..... dansa boeat rajaken akoe poenja hari bertoendangan ... sama akoe poenja ... soedara, sama akoe poenja .....”
Habis kata begitoe ia laloe berbangkit dari krosi, dan sembari memegang medja, ia samperi pada Marie Vecsera.
„Soedara ... soedara!” berseroe ia poelah dengen soeara poetoes-poetoes. „Kita berdoewa sekarang ... bakal djadi ... laki-istri.”
Kamoedian ia sigra peloek pinggangnja itoe barones, dan tarik ka tengah-tengah kamar.
Si nona tida brani melawan: kakinja bertindak sadja kamana Rudolf tarik padanja, samantara ia poenja kapala mendjadi tèklok, seperti kembang jang soeda lajoeh bergantoeng di batangnja .....
Samoea orang meliat dengen penoeh kakwatiran, aken tetapi Bombelles laloe berkata:
„Berdansa tjara begitoe, adalah seperti danse macabre.”
(Danse macabre ada berasal dari pigoera-pigoera, jang terloekis oleh orang di djaman dahoeloe kalah, dan ada meroepahken, bebrapa banjak djasmani manoesia jang soeda mati, berdansa satoe sama laen. Maka dibilang Eudolf dan Marie ada seperti danse macabre, jaitoe oleh kerna marika berdoewa ada sama sabagi manoesia jang soeda tida berdjiwa).
Dengen mendadak aartshertog lantas diam berdiri, dengen menahanken diri pada si nona tjantik, soepaja tida mendjadi djato.
„Siapatah jang soeda kata seperti danse macabre?” tanja ia dengen soeara didalem tenggorokan.
Tida satoe orang ada bri djawaban.
„Apa barangkali kaoe pikir ..... jang orang nanti masi bisa berdansa, kaloe ia soeda mati? Apa kaoe kira ..... orang masi bisa berdansa pada ia poenja soedara ..... kaloe soedara itoe telah tida berdjiwa?”
Kamoedian ia tertawa begitoe seram sabagi iblis.
„Bilah kaoe berame masi djoega koerang pertjaja, akoe nanti bri kanjatahan .....”
Dan sabelon orang banjak bisa mendoega, apa jang hendak diperboeat olehnja, Rudolf soeda lebi doeloe kaloeari pistol. Satoe soeara tembakan berboenji. Marie Vecsera roeboeh dalem tangannja, dan tida bernapas lagi. „Hahaha!” tertawa itoe aartshertog kamoedian, salakoe orang gila. „Liatlah, sobat-sobat, sekarang akoe nanti dansa..... akoe nanti dansa!”
Aken tetapi itoe boenji pistol ada membikin samoea orang d jadi sedar dari rasa heran. Bagian laki-laki, laloe memboeroe pada Rudolf, samantara Clairette samboeti maitnja barones dalem tangannja.
Satoe sama laen djadi bergoelatan dengen haibat sekali. Rudolf maoe dapeti kombali ia poenja revolver jang terampas, dengen saboleh-boleh, tapi djari jang keras seperti besi ada mendjepit aartshertog itoe poenja kadoewa tangan.
Masing-masing poenja kapala, jang kenah pengaroenja alcohol, soeda tida mempoenjaken pikiran terang lagi, hingga soeara roesoeh ada terdenger riboet sekali, treakan mengoetoek dan djerit-djeritan ada sanget rioeh, sampe sakoenjoeng-koenjoeng samoea mendjadi diam.
Dara mengalir dari loekah di kapalanja Rudolf.
Prins van Saksen Coburg laloe melempar botol champagne jang ada di tangannja.
„Sekarang baeklah kitaorang bawah itoe kadoewa mait di sabelah ini,” kata ia.
XIX.
Astana radja di Spa, ada mendjadi lebi soenji dari jang doeloe-doeloe. Aken tetapi boekan kasoenjian jang bisa membikin hati mendjadi tedoeh dan diam, sabagimana ada di'ingini oleh permeisoeri, hanja ada kasoenjian, jang terdjadi lantaran samoea orang tinggal gagoe, dan menoenggoeken sadja ketak-ketiknja lontjeng dengen pengrasahan teramat kwatir. Saban minuut, saban sa'at, kasoenjian itoe bisa berobah djadi kasepian jang sedih sekali!
Permeisoeri Marie Henriette ada sakit, penghidoepannja ada bergantoeng dengen djaroem lontjeng, jang menoendjoek djalannja djam. Ia poenja toeboe, jang doeloe banjak simpan tenaga, anggotanja jang tegoeh, sekarang samingkin lama ada kaliatan mingkin djadi lajoeh dan lemah. Kakoeatan ampir tida ada lagi padanja; kadoekahan ada menimpah ia terlaloe haibat, aken ia bisa melawan dengen tida djadi roesak kasehatan dirinja.
Salaennja toewan toewan doktor, malaenkan ada Barones de Meaublanc dan Baron de Goffinet, jang menoenggoeken ia siang hari malem.
Toewan dan njonja baron ada kenal permeisoeri di masa ia oering-oeringan, koetika ia kadang-kadang soeka berlakoe bengis dan tida patoet, tapi iaorang ada kenal djoega permeisoeri poenja lemali-lemboet, tatkalah ia djadi malaikat penoeloeng, bagi samoea orang jang berada dalem kasoesahan.
Baron de Goffinet telah mengirim kabar kawat pada Sri baginda, membri warta jang si sakit poenja ka'adahan, ada teramat berbahaja, hingga saban djam boleh dianggap, bisa djadi jang penghabisan bagi la poenja djiwa.
Djoega pada permeisoeri poenja poetripoetri dikirimken ini kabaran.
Di itoe masa Baginda Leopold II ada di Bagnères de Bigorre, satoe tempat, jang boleh dibilang tida terpisah kllwat djaoe dari Spa, dimana permeisoeri ada rebah di pembaringan dengen menoenggoelten adjal.
Kendati begitoe, tida lalis baginda pergi boeroe-boeroe meliat ka'adahan istrinja, jang sedeng maoe brangkat meninggalken doenia. Apa jang mendjadi lantaran, tida saorang bisa membilang dengen tentoe. Ada jang kata, baginda poenja tida dateng, ada lantaran tida maoe membikin permeisoeri djadi terlebi koerang senang hati, tapi ada djoega jang bisik bisik: baginda ada inget ia poenja berbagi-bagi perboeatan kedji, hingga ia kwatir, nanti mendenger perkatahan mengoetoek dari moeloet istrinja, jang maoe brangkat mati.
Pada soeatoe hari, malaenkan terdjaga oleh Baron de Goffinet, Permeisoeri Marie Henriette tarik napasnja jang penghabisan.
Dalem tahon 1853 permeisoeri menikah pada Sri Maha Radja Leopold II, dan meninggalnja adalah djato di tahon 1902, djadi 49 tahon lamanja, ia terikat dengen tali kawin, jang sanantiasa membawah berbagi-bagi kadoekahan. Sataoe apa lagi mega mendoeng itoe nanti menerkam, aken djadiken korbannja! Tida berselang brapa djam sasoedapermeisoeri wafat, Prinses Stephanie, jang koetika itoe soeda mendjadi Gravin Lonyay, laloe dateng di astana Spa, dengen terbiritbirit, bersama ia poenja nonni ketjil.
Baron de Groffinet trima kadatengan poetri dengen goenaken bahasa manis.
Stephanie meliat koeliling, tapi menampak djendeiah samoea ada tertoetoep, dan liat saban-saban orang jang ia katemoe, ada tarik moeka sedih sekali ... iboenja soeda tida lagi di doenia, ia ada dateng terlaloe laat.
Dan dengen hati hantjoer peetri menangis, tatkalah orang anteri ia dalem kamar, dimana mait permeisoeri ada rebah diatas pembaringan.
„O, iboe, iboe jang tertjinta!” kata ia sasenggoekan, sembari berloetoet didekat mait permeisoeri. „Sekarang terlepaslah kaoe dari berbagi-bagi kadoekahan di doenia! Kaoe barangkali ada mara padakoe, lantaran akoe soeda paksa melemparken, itoe kawadjiban tjilaka, jang politiek dan peradatan kraton, telah tempatken atas akoe poenja kadoewa poendak. Aken tetapi, tjoba kaoe, di masa masi moeda, ada berboeat seperti akoe, boleh djadi kaoe troesa rasaken getirnja doenia sarape begini haibat!”
Kamoedian poetri bersama ia poenja nonni ketjil laloe bertempat boeat samantara waktoe dalem astana Avenue du Marteau. Ia ingin mempertoendjoeki boedi jang paling penghabisan pada iboenja jang ia sanget tjinta, aken kamoedian balik kombali pada graaf, jang soeda djadi ia poenja soeami, dari siapa jang paling pertama kali ia dapet rasaken broentoengnja doenia.
Di dalem astana, Stephanie berharep, nanti bisa berdiam dalem kasoenjian, aken lebi senang melajangken pikiran, boeat beringet-inget pada permeisoeri jang soeda mangkat. Aken tetapi, kasian! Dengen mendadak poetri poenja kainginan berbalik meroepaken satoe kadjadian jang laen sekali.
Sri Maha Radja Leopold II, berselang satoe hari, sakoenjoeng-koenjoeng dateng di Spa, dan lantas pergi ka astana, dimana mait permeisoeri ada menoenggoeken waktoe boeat dikoeboer.
Koetika itoe Toewan Baron de Goffinet ada menjamboet dengen hormat sekali, kamoedian laloe menanja: „Apatah Sri baginda tida ingin meliat lagi satoe kali pada permeisoeri?”
Atas ini pertanjahan Radja Leopold tida bri djawaban, hanja malaenkan berdoedoek bengong seperti orang mengimpi. Apa jang sasoenggoenja ada di pikirannja, tida saorang brani menebak dengen memastiken.
Dalem satoe kamar ketjil, sabelah men.jebelah dengen kamar mati, baginda ada mengambil tempat di satoe krosi, dan menghadepken medja, sembari membatja soeratsoerat, jang atas kainginan ia sendiri, Toewan Baron de Goffinet telah kasi padanja.
Samantara ia sedeng asik membatja, pintoe kamar terboekah dengen sanget plahan. Saorang pi'ampoean moeda laloe masoek ka dalem, sembari tangannja memegang bebrapa boengah mawar koening, jang di masa masi hidoep, teramat disoeka oleh Permeisoeri Marie Henriette.
Tatkalah matanja dapet meliat pada baginda, dengen mendadak ia lantas berdiri diam, sabagi kadoewa kakinja ada terpantek di boemi. Boengah jang dipegang, laloe djato di atas permadani, dan agaknja seperti ia tida mempoenjaken tenaga lagi, boeat poengoet kombali.
Sekali-kali ia tida mendoega, nanti bertemoe pada baginda dalem itôe kamar.
Djoega baginda mengangkat moeka. Pipinja kiri kanan, dengen mendadak mendjadi mera, saman tara ia poenja aer moeka lantas berobah. Kamoedian ia berbangkit, dan sembari mengisarken krosi ka blakang, ia berseroe:
„Akoe merasa heran sekali, dapet meliat kaoe di sini!”
„Papa!” kata poetri dengen soearasember. Lebi dari itoe ia tida bisa kaloeari laen perkatahan.
Sri Maha Radja tinggal berdiri seperti orang gagoe; matanja ada menjataken ia poenja koerang senang hati. Prinses Stephanie maoe bermoehoen sanget-sanget pada ajahnja, tapi ia poenja sasenggoekan, bersama lagi aer matanja jang toeroen sabagi oedjan, membikin ia tida bisa memboekah soeara.
Baginda menggojang lontjeng.
Baron de Goffinet terbirit-birit dateng mengamperi.
„Anteri poetri kaloear.”
Toewan Goffinet laloe adjak pada Stephanie sembari memboedjoek.
„Toewan jang amat berboedi,” kata poetri kamoedian dengen soeara didalem leher: „Lagi sakali akoe membilang banjak trima kasi, atas apa jang" kaoe telah berboeat pada permeisoeri. Kaoe soeda menoeloeng dan menghiboerken pada iboekoe dengen sagenap liati ! Itoe akoe tida nanti loepa sampe di achirnja djaman!”
Dengen sedih sekali poetri berpisah pada toewan baron, jang sakean lama telah tinggal satia mendjadi ia poenja sobat. Kerna ia tida di'idjinkeh tinggal lebi lama, aken liat lagi sakali iboenja poenja roepa.
Selang bebrapa hari permeisoeri dikoeboer. Aken tetapi, samantara orang lagi bikin sembajang dengen oepatjara dalem gredja St. Gudule, Sri Maha Radja Leopold II brangkat ka kota Paris.