Penghidoepan Radja Belgie/Bab 4

Dari Wikisumber bahasa Indonesia, perpustakaan bebas

Satoe tjerita jang betoel
telah kadjadian di
Europa.

PENGHIDOEPAN RADJA BELGIE I.



Ditjeritaken
oleh :
TJOE BOU SAN.
BATAVIA
DRUKKERIJ SIN PO
1913

Pembagian Buku Penghidoepan Radja Belgie Berdasarkan bab

Bab 1 | Bab 2 | Bab 3 | Bab 4 | Bab 5 | Bab 6 | Bab 7 | Bab 8 | Bab 9 | Bab 10 | Bab 11 | Bab 12 | Bab 13 | Bab 14 | Bab 15 | Bab 16 | Bab 17 | Bab 18 | Bab 19 | Bab 20 | Bab 21 | Bab 22 | Bab 23 | Bab 24 | Bab 25 | Bab 26 | Bab 27 | Bab 28 | Bab 29 | Bab 30

IV.


   „Iboe jang tertjinta!

Akoe sendiri tida bisa merasaken, apa dengen menoelis ini soerat, akoe tida berboeat satoe kasalahan. Benar, sariboe kali ada lebi baek, sasoeatoe kasoesahan orang tanggoeng sendiri, dari pada misti membagi pada laen orang. Tapi, iboe, aer mata tida salamanja bisa membikin anjoet orang poenja kasangsarahan hati, kerna bilah orang menangis sendirian sadja, ada­lah seperti tangisan salagi maoe poetoes djiwa, dan itoelah jang mendjadi sebab, hingga akoe menoelis ini sapoetjoek soerat, aken toempaken sakalian akoe poenja rasa hati.
 O, iboe, bagimana besar akoe poenja kainginan, aken berlari-lari, dateng di hadepanmoe, tapi orang sanantiasa menghalangken akoe poenja perdjalanan. Dari itoe, ada apatah lagi, salaen pertjajaken ini sahelai kertas, aken mendjadi akoe poenja wakil?
 Begitoe moeda seperti adanja akoe sekarang, iboe jang tertjinta, tida loepoet akoe soeda bisa hargaken, bagimana besar kaoe poenja kasedihan, kerna di ini waktoe, akoe poen ada teritoeng dalem golongan, orang jang seperti kaoe. Akoe sekarang bisa artiken, kaoe poenja aer moeka jang begitoe sedi, itoe awan kasangsarahan, jang sanantiasa berada di kaoe poenja djidat.  Kitaorang, iboe, ada takoet sekali melanggar kasoetjian roemah tangga. Tapi kaloe kaoe dateng padakoe di sini, nistjaja kaoe nanti merasaken sendiri, ka'adahan kitaorang ada se­dikit koeno, djika maoe dibandingken dengen waktoe sekarang.
 Di negri asing tempat kadiamankoe, iboe, akoe dapet denger banjak sekali dari hal ajah poenja klakoean, lebi dari apa jang akoe telah taoe, koetika masi ada di dampingmoe.
 Ia ada terkenal sabagi orang jang soeka berpoewas-poewasan, dan banjak sekali perkara kedji telah sampe di koepingkoe, jang menjeritaken prihal ajah bersama satoe prampoean. Dalem melakoeken ini hal, akoe poenja soeami dan kaponakan poen, ada sama seperti soedaranja.
 Kamaren malem kitaorang doedoek di kita poenja loge dalem roemah komedi. Samantara itoe akoe dapet liat di laen loge, jang berhadapan pada kita-orang, satoe prampoean moeda jang tjantik sekali, sembari matanja sanantiasa mengintjer padakoe.
 Waktoe pauze, salagi akoe memesan barang-barang boeat menjegerken ba­dan, dengen tida kataoehan lagi, Philip[1] soeda mengilang. Bebrapa sa'at kamoedian akoe mendapet liat ia ada di itoe loge terkoetoek, sembari bitjara dengen bersenjoem-senjoem pa­da itoe njonja moeda. O, iboe amat tertjinta, kataoehilah bagimana pengrasahan hatikoe di itoe masa!... Tapi akoe pertjaja, jang kaoe ada ke­nal itoe kasedihan, kaoe taoe itoe... hingga akoe merasa tida perloe, tjeritaken lebi djaoe.
 Di itoe malem kitaorang djadi satori. Tapi ia tida sedikit maoe ambil perdoeli, dan lantas memoekoel padakoe,sembari katanja: „Trimalah kaoe poenja bagian!" O, iboe jang tertjinta, apatah soenggoe ada dengen patoet, poekoelan itoe ditrimaken padakoe? Tidakah memang akoe ada poenja hak, aken ambil taoe ia poenja penghidoepan?
 Koetika itoe akoe lantas bitjara, aken poelang ka astana sendiri, boeat tida meliat lagi penhidoepan di itoe negri asing, tapi ia sama sekali tida bri djawaban, dan . . . tertawaken akoe dengen moeka begitoe dingin.
 Kadang-kadang sampe bebrapa minggoe lamanja, ia tinggali akoe sendirian. Akoe taoe betoel, iboe, dengen apa berhoeboengnja itoe samoewa klakoean. Tapi . . . ada apatah harganja dirikoe di ini masa?
 Permoelah ia poera-poera, sabagi itoe mengilang ada boeat oeroes pamarsntahan, tapi sakarang ia tida maoe tjapeken hati lagi, aken mengakal, boeat toetoep akoe poenja mata. Ia pergi sadja kamana ia soeka, dengen tida kaloearken satoe perkatahan!
 Iboe, liatlah bagimana akoe poenja ka'adahan di ini waktoe! Habis, ada apa nasehat jang baek, aken mengentengken sedikit penghidoepankoe jang penoe kamalaratan? Hajo, bilang sadja, bilang sadja teroes terang, bagimana adanja kaoe poenja pikiran! Pertjaja, iboe, malaenkan kaoe sendiri jang taoe habis akoe poenja pengrasahan hati, tjoema pada kaoe sadja, akoe bisa toempaken samoewa, apa adanja akoe poenja kadoekahan, dari itoe djanganlah loepoeti . . . kirimlah sedikit perkataban aken akoe djadiken sabagi penawar!

Dari anakmoe jang terboewang,

      Louise."

Satelah habis membatja boenjinja itoe soerat, permeisoeri poenja aer moeka ada kaliatan sedi sekali, dan sembari pegangi itoe sahelai kertas, ia tinggal berdoedoek dengen tida bergerak seperti patoeng.

Barones de Meaublanc waktoe itoe djoestroe masoek di itoe kamar. Ia liat itoe aer mata jang berlinang-linang di mata djoengdjoengannja, disertaken dengen aer moeka menjesel jang teramat sedi.

Ini hal ada membikin sanget terkedjoet pada barones, hingga dengen sedikit goegoep, ia berkata:

„Sri padoeka, apatah lagi jang mengganggoe kaoe poenja pikiran? Apa barang­ kali kasehatanmoe dengen mendadak kenah diserang penjakit? Tidakah lebi baek akoe lantas memanggil doktor . ."

Tapi permeisoeri laloe gojangken tangan, seraja berkata:

„Tida, tida satoe doktor nanti bisa membri obat padakoe. Tida saorang nanti bisa bri toeloengan, dan kaoe djoega, sobatkoe jang tertjinta, tida nanti bisa mengenteng ken akoe, biar poen bagimana sedikit. Kasoesahan jang dateng menimpah di ini hari, adalah sabagi goenoeng poen,ja besar, hingga misti dibilang teramat moestahil, jaag doenia kita ini niasi bisa adaken penawar.."
 Barones mengelah napas sedi sekali, kamoedian laloe berkata lagi :
 „Apatah sanget sekali, itoe hal jang bikin menjesel pada Sri padoeka?"
 „Tida, sobat, ini sakali boekan baginda."
 „Boekan dari ia? Habis dari siapatah lagi jang begitoe pandei datengken kasedihan?"
 „Ini," kata permeisoeri, sembari kasi soerat anaknja, „batjalah apa jang Louise telah toelis padakoe! O, sobat, sasoenggoenja mega mendoeng itoe soeda kasi liat lagi roepanja jang bengis!"
 Barones de Meaublanc ambil itoe soerat, pergi ka djendela, dan membatja.
 „Betoel terlaloe sekali !" kata ia kamoedian, seraja mengasi kombali itoe soerat pada permeisoeri. „Habis, bagimana Sri padoeka hendak bri djawaban padanja?"
 „Hajo, kasi sadja padakoe kertas dan pena! Kaoe nanti liat sendiri bagimana akoe djawab toelisannja."
 Tatkalah samoewa soeda sediah di medja, dengen tida terasa lagi, bebrapa ketel aer mata telah meleleh djato di kertas. Kamoedian permeisoeri laloe menoelis:

     Louise,

 Kaloe sasoenggoenja kaoe kenal kaadahan iboemoe, nistjaja kaoe bisa merasaken djoega, bagimana soeratmoe telah hantjoerken akoe poenjahati. Tapi bilah akoe balik memikiri laen-laen hal, adalah pengrasahankoe, seperti dengen sakoenjoeng-koenjoeng dirikoe soeda silam dari pergaoelan manoesia, dan berada diatas satoe goenoeng jang tinggi serta soenji.
 Manoesia di doenia, anak, soenggoe tida beda sebagi goenoeng dan laoetan ....... masing-masing poenja ka'adahan dan pikiran ada berbeda djaoe sekali satoe sama laen. Tapi kasoedahannja, ada apatah laen jang katinggalan boeat kita, djika boekan sakedar aken melangkapi hikajatnja djaman ?
 Kasenangan, kasoesahan,kagirangan,kakeselan, samoewa ada satoe roepa ...pintoe koeboer mendjadi watasnja! Manoesia jang tida kenal senang, tentoe tida taoe apa namanja kasoesahan, jang tida kenal soesa, tida taoe apa namanja kasenangan, itoe memang ada koentjinja penghidoepan jang tida bisa dirobah.
 Jang bersenang, adalah manoesia jang pernah ngalami kasoesahan, dari itoe, anak, mengapatah kita misti rasaken koerang broentoeng, kaloe kita bertreak soesa, lantaran doeloe soeda tjobaken manisnja kasenangan Boekankah ada benar sekali, djika dioepamaken, orang jang senang, sedeng mandjat aken mendapet taoe brapa tingginja goenoeng Tertawa, sebaliknja jang soesa, sasoeda taoe ka'adahannja, laloe kombali toeroen ka bawa?
 Louise amat tertjinta, siapa jang maoe tinggal tetap di poentjak goe­ noeng Tertawa, ia misti diriken satoe astana jang santausa. Dan boeat mem­ bikin itoe, tida nanti bisa, djika tida naek toeroen sampe bebrapa riboe kali, aken mengangkoet bata dan sebaginja. Habis, anak, tjara bagimana kaoe aken bisa diriken satoe goeboek jang paling ketjil, bilah boeat pertama kali toeroen ka bawa, kaoe soeda merasakeh begitoe lemas dan sedih ? Dari itoe, anakkoe jang tertjinia, kaoe misti djangan me­ rasa lemah ! Naek dengen gaga serta girang, kamoedian toeroen lagi dengen sabar dan berharep, naek dan toeroen poelah... sampe astana itoe djadi dalem ka'adabannja jang indah dan santausa !
 Kasedihan dan kasoesahan memang atjap kali menj erang penghidoepan manoesia. Siapa jang terlaloe lemah boeat trima kadatengannja, nistjaja ia nanti terdjebloes, dan djato dalem tjoeram tjilaka, dimana tida satoe penghiboer bisa sampe, aken membri toeloengan.
 Laoetan melimpasken aernja ka da­rat, goenoeng goegoeri tanahnja ka moeka boemi, itoe boekan sekali ada hal jang terlaloe djarang kadjadian. Siapa jang salaloe berkwatir dengen datengnja itoe bahaja, ia tida nanti bisa sampe di kakinja goenoeng Ter­tawa, atawa saksiken, bagimana roepanja tepi laoet Kagirangan.
 Perhatikenlah toelisan ini, anakkoe jang tertjinta, kamoedian kaoe nanti mendapet taoe, bagimana benar adanja akoe poenja pikiran.  Lebi banjak akoe tida bisa menoelis, kerna ka'adahankoe sekarang, adalah sabagi kaoe, sedeng misti melawan serangan dari berbagi-bagi fihak. Dan akoe tida bisa mendoega, siapa achirnja dapet dialaken . . . akoe atawa itoe mega mendoeng, jang sampe se­karang masi tinggal mengambang diatas akoe poenja kapala. Dari itoe biarlah kaoe berharep, anakkoe jang tertjinta !

     Dari iboemoe,

     Maria."

„Dengen sabegini, akoe kira adalah sampe tjoekoep, akoe melakoeken kawadjiban boeat hiboeri padanja," kata permeisoeri sembari mengelah napas.

Barones de Meaublanc, jang saman tara itoe ada meliati sadja djoengdjoengannja menoelis, laloe memanggoet, dan berkata :

„Sasoenggoenja djoega tida ada laen djalan lagi, aken Sri padoeka hiboeri padanja,laen perkara kaloe Sri baginda . . ."

„Baginda ?"

Permeisoeri laloe bersenjoem sedih sekali.

„Baginda ada terlaloe ripoe dengen laenlaen hal, aken bisa pikiri kasoesahan ia poenja anak-anak. Ingetannja soeda djadi penoe dengen niat diriken karadjahan baroe, jang djaoe letaknja dari sini. Salaennja kaoentoengan, kakwasahan dan kasenangan, tida ada lagi jang begitoe diper­hatikan olehnja."
  Omongan itoe dioetjapken dengen soeara sanget berdoeka, tapi kamoedian, sabagi menjesel dengen bitjaranja sendiri, permeisoeri laloe berkata poelah :
 „Ja, jang paling perloe memang misti paling diperhatiken. Kapentingan negri, sasoenggoenja ada melebiken laen-laen per­kara, dari itoe kita tida boleh terlaloe kasi salah pada baginda."
 „Memang, Sri padoeka, akoe poen harep sanget, kaoe laloeken sadja itoe pikiran jang doeka . . . . ."
 „Dan sekarang biarlah kaoe lekas oeroes itoe soerat; toelisken adres dan lantas kirim. Akoe ada merasa tjape sekali, dan ingin senangken diri."
 Barones sigra berlaloe dari itoe kamar, hingga tinggal permeisoeri sendirian.
 Samantara itoe, salagi permeisoeri melajangken pikirannja, pintoe kamar diboeka dengen sanget hati-hati, dan satoe anak prampoean laloe masoek ka dalem, sembari matanja meliat koeliling, aken me­nengok, apatah sasoenggoenja dalem kamar itoe tida ada orang, jang nanti menjegah kadatengannja.
 Tapi tida satoe orang ada kaliatan di sitoe, salaen iboenja, jang sedeng bengong hadepken djendelah, sembari memandang ka loear, dimana saldjoe ada toeroen sabagi kapas berlempeng-lempeng.
 Dengen entengken tindakan, nonaketjil itoe laloe dateng mengamperi.
 „Mama!" kata ia dengen koenjoeng-koenjoeng, kamoedian lantas memeloek lehernja permeisoeri dengen kadoewa tangan. „Mama, mengapa kaoe begitoe sedih ? Apa­ tah jang kaoe tangisi?"
 Permeisoeri sigra menjoesoet aer matanja, kamoedian laloe tjenderongken badannja, dan tjioem djidat anaknja, sembari berkata :
 „Menangis? Tida, anak lemmés! Tapi mengapa kaoe boleh kata begitoe?"

 „Ja, iboe, akoe denger kaoe sasenggoekan. . . . ." Dan ia tarik moeka per­meisoeri lebi dekat pada moekanja sendiri. . . . ." Kaoe poenja mata begitoe mera. . . . . o, mama, apatah jang mem­bikin kaoe begitoe sedih?"

Prinses Louise, poetri dari karadjahan
Belgie. (katja 54).

„Kaloe kaoe maoe taoe djoega, anak tjerewet, nanti mama tjeritaken . . . Akoe

meliat itoe saldjoe jang berlempeng-lempeng seperti kapas di moeka boemi, dan hawa oedara ada begitoe dingin, hingga akoe djadi menginget, bagimana mistinja malarat sekali, ka’adahan orang-orang miskin jang tinggal di kampoengan, bilah iaorang tida mempoenja roti, boeat samboet datengnja lapar, dan tida ada api di roemahnja, aken membikin anget badan.”

„Soenggoe, mama, penghidoepan orang-orang jang tinggal di kampoengan memang ada melarat sekali,” kata poetri Stephanie, tapi dengen merasa koerang pertjaja, ia tambaken poelah berkata: „Habis, kaoe menangis lantaran itoe, mama?”

„Ja, anak, kerna akoe merasa kasian sekali pada iaorang.”

„Dan papa, apatah ia djoega nanti bisa menangis boeat itoe kamalaratan ?”

„Orang lelaki ada lebi bisa menahan hatinja jang sedih.”

„Apa kaoe belon pernah liat papa menangis, mama?”

Permeisoeri berpikir sabentaran, kamoedian berkata dengen sanget berdoeka:

„Soeda, anak, satoe kali, koetika kaoe poenja adeh, Hertog van Brabant, meninggal doenia. Tapi sekarang, biarlah kaoce tinggali mama sendirian. Mama ada dapet sakit kapala. 'Tjoba tanja pada barones, apa ia tida loepa membagi derma pada orang-orang miskin, dan kaloe ia belon lakoeken itoe, soeroe ini sakali ia kasi sedikit lebi banjak, kerna dalem waktoe begini, mistinja derma kita ada banjak lebi perloe bagi itoe orang-orang dari jang soeda-soeda.”[2]

„Baek, mama!

Poetri itoe mengasi lagi satoe tjioem pada iboenja, kamoedian laloe berdjalan kaloear dengen berlompat-lompat.

Permeisoeri meliati anaknja sampe pintoe kamar tertoetoep kombali, satelah itoe laloe berkata dengen soeara sember:

„Apatah itoe mega mendoeng nanti menimpah djoega itoe anak, jang tida sekali berdosa?”


Catatan kaki[sunting]

  1. Prins van Saksen-Coburg.
  2. Kaloe ditilik bagimana permeisoeri berlakoe pada poetrinja jang masi ketjil, soenggoe haroes sekali ia dikasi nama, satoe iboe jang pandei dan berpikiran loewas. Tidalah seperti iboe-iboe kita-orang dalem kabiasahannja, jang atjap kali ada sanget gegabah kalceari perkatahan.