Penghidoepan Radja Belgie/Bab 10

←

Bab 9

Penghidoepan Radja Belgie oleh Tjoe Bou San
Bab X

Bab 11

→

Satoe tjerita jang betoel
telah kadjadian di
Europa.

PENGHIDOEPAN RADJA BELGIE II.

Ditjeritaken
oleh:
TJOE BOU SAN.
_BATAVIA
DRUKKERIJ SIN PO
^1913.

Pembagian Buku Penghidoepan Radja Belgie Berdasarkan bab

Bab 1 | Bab 2 | Bab 3 | Bab 4 | Bab 5 | Bab 6 | Bab 7 | Bab 8 | Bab 9 | Bab 10 | Bab 11 | Bab 12 | Bab 13 | Bab 14 | Bab 15 | Bab 16 | Bab 17 | Bab 18 | Bab 19 | Bab 20 | Bab 21 | Bab 22 | Bab 23 | Bab 24 | Bab 25 | Bab 26 | Bab 27 | Bab 28 | Bab 29 | Bab 30

X.
———

Nasibnja Prinses Louise, jang bernikah pada Prins van Saksen-Coburg, ada dikataoehi oleh banjak orang. Antaranja banjak djoega jang berkata, bahoewa masgoelnja permeisoeri Belgie, taroetama ada lantaran ini.

Ini tjerita haroeslah dikata, sabagian ada benar, kerna laen dari berdoekah lantaran mangkatnja poetra makota, memang djoega permeisoeri sanantiasa ada bersedih boeat nasibnja ia poenja poetri. Broentoeng masi bagi itoe njonja bangsawan, poetrinja jang kadoewa, sakean lama soeda menikah, belon perna mengasi denger kabar jang koerang baek.

Peroentoengannja Prinses Stephanie ada banjak lebi bagoes dari ia poenja soedara. Sebegitoe lama ia masi bisa merasaken Rudolf poenja tjinta padanja, dan kadang-kadang djoega dalem itoe kasenangan, ia ada beringet atas katjilakahan jang menimpah soedaranja. Dan saban-saban mendapet itoe ingetan, aartshertogin lantas merasa sanget kasian, kerna ia taoe, Louise sanantiasa tida diperdoeliken oleh prins jang mendjadi soeaminja.

Aken tetapi, bagimana besar djoega ia poenja kasian pada soedara sendiri, tida satoe apa ia bisa berboeat, aken toeloeng meringanken. Dari itoe poen mendjadi ia tinggal diam dengen tida berdaja, dan sering-sering djoega rasa kasian itoe terhilang dari pikirannja, lantaran teroeroek dengen ia sendiri poenja pengrasahan broentoeng.

Betoel, dalem tempo jang blakangan, Rudolf ada berlakoe sedikit dingin padanja, tapi ini tida membikin ia djadi tjemboeroean, hanja malaenkan merasa sedikit heran, dan doega sadja, jang itoe aartshertog ada banjak kerdjahan jang misti menggoenaken banjak pikiran. Kamoedian, dengen koenjoeng-koenjoeng ada dateng satoe kabar djelek padanja, jang mewartaken halnja ia poenja soeami.

Ini djoega Prinses Stephanie tida begitoe pertjaja, hingga dengen tida terganggoe

Prinses Stephanie, poetri dari karadjahan
Belgie. (katja 138).

pikiran ia bisa djalani hidoepnja dari sahari ka laen hari.

Demikianlah aartshertogin tinggal tida mendapet taoe, mega mendoeng jang soeda sakean lama ada berlajang-lajang diatas kapalanja, sampe pada soeatoe hari Aatshertog Rudolf, jang selang bebrapa hari, sanantiasa tida maoe bertemoe pada istrinja, dengen mendadak minta bitjara berdoewa-doewa.
Stephanie ada menerima ini warta dengen girang di hati, kerna dalem pikirannja ia ada kira, tentoe soeaminja maoe adjak berdami satoe hal penting.
Sasoeda berhadepan doedoek, Rudolf laloe berkata:
„Sekarang akoe hendak bitjaraken padamoe satoe perkara jang sanget penting. Barangkali djoega nanti membikin loekah sedikit kaoe poenja hati, tapi akoe merasa tida bisa tinggal gagoe boeat ini perkara, lebi lama lagi."
„Tjeritaken sadja," kata Stephanie, „kerna, bilah betoel itoe hal nanti meloekaken hati, biarlah kadoekahannja kitaorang pikoel berdoewa."
„Tida, tida berdoewa, tapi boleh djadi kaoe sendiri, jang nanti menerima doekah lantaran akoe poenja bitjara di ini kali..."
„Hal apa, soeamikoe, jang ada begitoe haibat boeat akoe poenja diri?"
„Hal apa? Itoelah jang memang akoe maoe tjeritaken padamoe!"
Rudolf berdiam sabentaran. Ia berdjalan moendar-mandir sabagi hendak koempoelken sakalian tenaga, kamoedian ia laloe berkata poelah:
„Stephanie, kataoehilah olehmoe, jang sabelonnja kitaorang berdoewa djadi laki istri, akoe soeda bikin perhoeboengan pada Barones Marie Vecsera. Tadinja akoe kira dengen gampang tali itoe bisa dibikin poetoes, tapi sekarang baroelah akoe merasa, jang sama sekali akoe tida bisa loepahken pada itoe nona. Maka itoe boeat kita, tida ada laen djalan dari lolosken borgol nikahan, jang mengikat kita poenja toeboe dan anggota, dan pertjajalah, Stephanie, jang ini samoea akoe ada berboeat dengen sanget terpaksa! Akoe tida maoe kaoe misti djadi koerang broentoeng, lantaran akoe poenja klakoean di loearan....."
Stephanie tinggal doedoek di krosi seperti terpantek. Moekanja djadi poetjat, matanja boetak sabagi mait. Sasa'at kamoedian kapalanja laloe terbanting di senderan krosi, kadoewa tangannja menoetoepi moekanja, samantara badannja bergerak-gerak salakoe orang maoe poetoes djiwa.
Kasian! Poetri itoe poenja ka'adahan ada lebi haibat dari orang katimpah goenoeng jang goegoer, kerna Stephanie, boekan lantas tiwas djiwanja, hanja misti merosot dari poentjak goenoeng Tertawa, aken sampe dalem tjoeram Tjilaka.
Ia tida oetjapi satoe perkatahan, sebab di masa itoe, adalah sabagi lidanja tida bisa kaloeari soeara. Tapi Rudolf roepanja tida maoe perdoeli itoe samoea perkara.
Dalem ka'adahan begitoe ia tinggali Stephanie sendirian, dan pergi ka tempat kadiaman ajahnja, kerna sekali-kali ia tida maoe berlambat lagi, boeat bikin selesi itoe oeroesan.
Bermoelah Sri Baginda Keizer dengen keras menolak permintahan anaknja, aken bertjerei pada Prinses Stephanie, aken tetapi oleh kerna Rudolf memaksa djoega, maka achir-achir hatinja mendjadi loemah dan idjinken kainginan ia poenja poetra makota.
Aken tetapi permoehoenan aartshertog jang kadoewa, aken bernikah pada Barones Marie Vecsera, dengen tetap ia tida maoe briken permisie.
Ini tampikan, ada banjak sekali orang jang tida mengarti, apa jang mendjadi sebab. Tapi, menoeroet katanja saorang bangsawan jang boleh dipertjaja, hal ini adalah bergantoeng dengen Baginda Keizer poenja pikiran terang, jang sanantiasa masi bisa beringet, asal-oesoelnja Barones Marie Vecsera.
Di sini baeklah kita tahan-tahan doeloe itoe hal-ichwal. Kaloe kamoedian soeda djadi kliwat perloe, dengen apa boleh boeat kita nanti berlakoe sedikit lebi lojar sama kita poenja tinta dan kertas.

⁂

Doenia ada terpoeter begitoe lekas, hingga ampir sampelah itoe waktoe, jang sakalian sobat misti berkoempoel di tempat pemboeroean Meyerling.
Keizer Oostenrijk ada berdjalan moendar-mandir dalem kamarnja dengen tida sabar.
Aartshertog Rudolf ada minta padanja, aken bitjara dengen ampat mata, dan boeat ini ia tida bisa poetoesken, apatah misti trima itoe permoehoenan, atawa menampik.
Ia taoe betoel, itoe hal jang hendak dibitjaraken oleh poetra makota, dan ia brani pastiken, kaloe sampe kadjadian bitjara, achir-achir misti satoe sama laen goenaken perkatahan keras.
Apatah Baginda Keizer tida boleh bitjara sadja teroes terang, hal apa jang mendjadi halangan? Dari satoe fihak boleh ditimbang, tida ada satoe sangkoetan, aken membri njata, apa sebabnja permoehoenan poetra makota misti ditampik. Tapi dari laen, fihak ada satoe pertanjahan: Apatah Baginda Keizer, jang begitoe menjinta ia poenja poetra makota, nanti bisa tjerita teroes terang, tentang satoe hal jang boleh membikin anaknja djadi sakit hati padanja sendiri, dalem saoemoer hidoep?
Samantara itoe Baginda Keizer lantas dapet pikiran, aken kasi taoe pada aartshertog, jang ia tida maoe bitjaraken lagi itoe perkara, tapi sigra ia balik menginget kombali, jang dengen menampik begitoe, nanti boleh menerbitken onar bagi anaknja, jang ada poenja tabiat begitoe lekas mara. Dari itoe poen mendjadi ia lantas tetapken, aken membri katrangan sadja dengen sabenarnja, biar apa djoega nanti djadi dengen dirinja sendiri.
Koetika soeda dateng waktoe aken bertemoe, Aartshertog Rudolf laloe disilahken masoek boeat bitjara pada Sri Baginda Keizer.
Samantara waktoe marika berdiri berhadepan dengen tida oetjapken satoe perkatahan. Poetra makota ada mengawasken ajahnja dengen mata soeram, dan paras moekanja, sabagi ada menjataken soeatoe katjilakahan.
Baginda Keizer djoega ada merasaken satoe pirasat jang koerang baek, hingga dengen tida berkesip, ia awasken pada anaknja.
„Apatah kaoe masi tetap sadja berpikir, sabagimana doeloe adanja kaoe poenja poetoesan, papa?" menanja Rudolf sakoenjoeng-koenjoeng, sabagi orang jang tida tahan sabar lebi lama lagi.
„Ja, anak, sebab akoe tida bisa berlakoe laen," kata Baginda Keizer dengen moeka berdoekah.
„Tida bisa berlakoe laen?" tanja poelah aartshertog dengen tertawa sedih. „Tida bisa berlakoe laen, tjoema lantaran Marie Vecsera nanti tida begitoe sembabat mendjadi keizerin seperti aartshertogin jang sekarang?"
Aartshertog berdiam sabentaran, dan sasa'at kamoedîan ia laloe berkata poelah dengen lebi sengit:
„Kaloe malaenkan lantaran begitoe, dengen segala senang hati Marie nanti lepas ia poenja hak atas itoe makota keizerin, sabagi djoega akoe nanti berboeat sama akoe poenja makota keizer. Kitaorang ada menjinta satoe sama laen, dan tentoe djoega nanti merasa broentoeng, maskipoen tida mempoenja gelaran."
„Biar poen bagimana, akoe tida nanti kasi permisi atas kaoe poenja nikahan ini."
„Habis, apatah jang papa inginken dari akoe poenja diri? Atawa barangkali papa ada berniat, aken akoe berlaloe dari ini negri, bersama itoe nona jang akoe tjinta dengen sagenap hati?"
„Anak," kata Baginda Keizer dengen hati tergerak, „beringetlah sedikit, jang kitaorang mendjelemah di doenia boekan seperti manoesia biasa. Dan djoestroe lantaran kita poenja tingkatan bangsawan ada begitoe tinggi, membikin kita djadi sanget terganggoe dalem perkara nikah. Bilah maoe dikata, memang ada benar sekali: Orang kampoengan boleh tjari pada siapa ia soeka. Tapi dalem ini hal kita poenja hak ada banjak lebi sedikit. Sadari mata kita terboeka boeat ka'adahan doenia, kita soeda dimistiken, aken lakoeken sadja pilihan dari bebrapa orang prampoean golongan kita, dan sering-sering djoega kita misti memaksa diri, aken anggap kita poenja istri ada prampoean jang sasoenggoenja kita ada tjinta dengen sagenap hati....."
„Papa, papa!" berseroe aartshertog dengen tida sabar, „djanganlah bitjara pandjang begitoe! Akoe tjoema minta kaoe poenja poetoesan jang penghabisan, boekan maoe mendenger kaoe poenja peroendingan!"
„Rudolf, akoe poen ada merasa lebi soeka liat kaoe djadi broentoeng seperti manoesia biasa, dari pada misti djadi satoe keizer jang tjilakah," kata lagi Baginda Keizer dengen poetoes harepan. „Pertjajalah, anak, akoe tentoe soeda lama kasi permisi aken kaoe bernikah pada Marie Vecsera, bilah tida satoe hal jang sanget berat mendjadi halangan."
„Tapi, papa, apa perkara jang ada begitoe berat? Itoe samoea moestahil, moestahil sekali!"
„Soenggoe, anak, dari doeloe akoe ada merasa sangsi boeat tjeritaken itoe padamoe, dan djoega sampe sekarang....."
„Kaoe tida boleh sangsi, papa, akoe poenja peroentoengan samoea ada bergantoeng di sitoe!"
„Dengerlah!" kata Baginda Keizer dengen soeara didalem leher. „Itoe Barones Vecsera jang toewa, pernah mendjadi akoe poenja sobat, dan akoe doeloe pernah bikin perhoeboengan rapet sekali padanja..."
„Boleh djadi apa dengen itoe perkara? Akoe poen sama sekali tida maoe ambil taoe si toewa itoe poenja oeroesan. Malaenkan Marie, papa, ia itoe akoe ada tjinta dengen segenap hati!"
„Kaoe tida mengarti akoe poenja bitjara, Rudolf! Kaoe begitoe sanget sekali ingin mendapet taoe dengen terang... Baeklah..... Marie Vecsera sabenarnja ada kaoe sendiri poenja soedara, anak!"
„Akoe poenja soedara? O, papa!... Alah!"
Sembari berkata begitoe, poetra makota toetoepi moeka dengen kadoewa tangan, salakoe orang jang soeda gila.
„O, papa!" berseroe ia poelah. Lebi dari sabagitoe, ia tida bisa kata apa-apa lagi. Ia berpaling, dan dengen tida membri hormat poelah, ia berdjalan kaloear. Pengawal astana, jang meliat ia berlari-lari seperti gila, tjoema tinggal awasken sadja, dengen rasa penoeh kwatir, nanti terbit satoe katjilakahan jang haibat. Aken tetapi boeat memboentoeti, tida satoe orang jang brani, kerna samoea taoe, siapa jang menghalangken, nanti dapet bagian mati. Iaorang kenal betoel adatnja poetra makota, jang di masa begitoe, nanti menjerang sembarangan sabagi banteng gila.
Dari djaoe ia soeda treaki orang jang mendjaga istal: „Lekas selahken akoe poenja koeda!"
Sigra djoega koeda itoe telali tersedia, hingga lantas poetra makota bisa menoenggang, dan lariken binatang itoe sakeras-kerasnja.

⁂

Banjak orang ada mengoendjoengi tempat pemboeroean di Meyerling. Di satoe tempat ada bebrapa orang lagi beromong-omong, sedeng di laen tempat ada sakoempoelan orang jang malaenkan berdiri diam, atawa berdjalan moendar-mandir. Masing-masing ada bersendjata sabagi orang maoe memboeroe.

Kaloe pembatja belon mendjadi loepah, nistjaja pembatja soeda taoe djoega, marika

Frans Jozef, Keizer dari Oostenrijk.
(katja 146).

itoe ada sobat-sobat kita, jang satoe minggoe Moe ada berkoempoel dalem satoe roemah makan di kota Paris.

laorang roepanja lagi sedeng menoenggoeken apa-apa, kerna dari gerak-gerakannja sadja soeda bisa dinjataken, jang masing-masing ada koerang sabar.
„Hei, kanapa sampe begini lama belon ada satoe apa jang kaliatan?” kata Vecsera.
„Akoe kira itoe binatang-binatang ada berlakoe sedikit males,” kata Bombelles.
„Terkoetoek betoel!” berseroe aartshertog sakoenjoeng-koenjoeng. „Akoe kira itoe andjing-andjing boekannja menggiring, tapi mengoesir itoe sakalian binatang pergi dari ini tempat pemboeroean!”
„Kaloe kita tida djoega bisa dapetken binatang kaki ampat,” kata poelah Bombelles, „biarlah kita poenja memboeroe ini dilakoeken sadja pada boeroeng-boeroeng gredja.”
„Hei, Vecsera! lekas minggir ka samping, atawa akoe kenah tembak padamoe!” berseroe lagi aartshertog dengen soeara sengit, dan koetika itoe djoega soeara senapan lantas berboenji.
Broentoeng Vecsera kaboeroe lompat hingga malaenkaii ramboetnja sadja, jang mendjadi angoes dengen peloeroenja Rudolf. Anak moeda itoe tida oetjapken satoe perkatahan, tapi mengawasken pada aartshertog dengen mata seperti hendak menanja, apa jang bikin poetra makota dengen mendadak telah djadi begitoe gila.
„Apa kaoe tembak?” tanja Bombelles dengen heran.
„Satoe laler! Tapi kamanatah perginja kitaorang poenja andjing samoea?”
Tatkalah itoe satoe andjing dari djaoe dateng mengamperi, dan Rudolf lantas berseroe lagi:
„Mari, Juno, tjari!”
Itoe andjing jang soeda dateng dekat, laloe merodjol kombali, mentjari koeliling, dan achir-achir berdiri dihadepan toewannja dengen sengal-sengal.
Aken tetapi Rudolf sigra angkat poelah ia poenja senapan, dan sabelonnja orang bisa mendoega, apa jang hendak diperboeat olehnja, soeara tembakan soeda berboenji kombali, samantara Juno mati menggletak diatas boemi.
„Hajo kitaorang berdjalan lebi djaoe, toewan-toewan!” berseroe aartshertog kamoedian. „Ikoetpadakoe! Kita nanti tembak satoe persatoe itoe andjing-andjing jang terkoetoek! Tjara begitoe, tidaoeroeng kita nanti dapet djoega binatang, aken dibawa poelang.”
Satelah kata demikian, laloe ia lariken koedanja sakentjeng-kentjengnja, masoek kadalem oetan.
Vecsera meliati pada Bombelles.
„Akoe heran sekali!” kata Bombelles. „Mengapa dengen mendadak Rudolf boleh djadi begitoe?”
„Akoe kira ia soeda djadi gila!” saoet Vecsera.
„Sekarang, biarlah kita ambil djalan ka laen tempat, sebab akoe tida ingin sekali, memboeroe sama-sama orang jang soeda djadi gila.”
{{Tab}{Satelah itoe marika masing-masing laloe baliki koedanja, dan lariken sakeras-kerasnja, menoedjoe ka laen djalanan, sampe iaorang merasa tentoe, aartshertog tida aken bisa mentjari lagi padanja.
Kamoedian iaorang tahan koedanja aken berdjalan lebi plahan dengen beroentoen, sampe marika katemoeken satoe djalanan, jang ada tjoekoep lebar boeat djalan berendeng.
„Apatah jang telah terdjadi padanja?” menanja poslah Vecsera. „Akoe belon pernah liat ia seperti tadi begitoe edan!”
„Akoe poen tida taoe, dan sabagimana kaoe kata tadi, itoe benar, akoe djoega balon pernah dapetken ia dengen klakoean begitoe!”
„Sakean lama akoe belon bitjara pada Marie, tapi akoe kira, tentoe ada hal jang koerang baek antara iaorang berdoewa. Boleh djadi Philip ada taoe lebi banjak tentang ini perkara, tapi ia sekarang tida kaliatan mata idoengnja.”
„Akoe dapet denger, ia nanti dateng sabentar malem. Tapi ..... hei, siapatah itoe jang mendatengi? Tjilaka, djangan itoe orang ada Rudolf jang mentjari kita!”
„Itoe tida boleh djadi! Ia toch tida bisa dateng dari fihak sitoe?”
„Benar kaoe poenja bitjara!”
Bombelles laloe meliat dengen ia poenja teropong, kamoedian berkata poelah:
„Jang dateng itoe ada Hoyos! Apatah ia maoe bikin di sini? Ia toch, akoe kira, ada toeroet laen kawanan, mendjaga dimana watas ini oetan.”
Samantara itoe Hoyos soeda dateng dekat pada iaorang, dan masing-masing laloe mengangkat topi. „Ada apa? Dari mana kaoe dateng? Koepanja kaoe ada bingoeng sekali!” kata Vecsera.
„Diam-diam!” kata Hoyos, sembari lantas menahan kendali koedanja, djangan tanjaken akoe banjak-banjak! Biarlah akoe bernapas sabentaran! Apatah ini ada djalanan boeat pergi ka doesoen?”
„Ja, kaloe kaoe balik, tapi bilah kaoe berdjalan teroes, ni&tjaja kaoe nanti berlaloe samingkin djaoe dari kampoeng!” kata Bombelles dengen tertawa.
Hoyos lantas baliki koedanja, dan djalan berendeng dengen itoe kadoewa sobat.
„Dengen tida terkira sekali,” kata ia, „Rudolf soeda mendjadi gila, akoe rasa.” „Kitaorang poen kira begitoe,” saoet Vecsera.
„Apa? Pada kaoe djoega ia .....”
„Pada kitaorang ia telah menembak laler, dan tatkalah andjing tida bisa dapetken, ia laloe tembak pada Juno, satoe andjing memboeroe jang soesa didapetken kadoewanja.”
„Pada kitaorang ia berboeat lebi gila lagi. Dengen sengit ia telah menembak doewa andjing, samantara satoe andjing laen soeda dapet bagian sama ia poenja gagang senapan. Sekarang binatang-binatang itoe hendak dibawah salekas-lekasnja pergi ka kampoeng. Barangkali djoega djiwanja masi bisa ditoeloeng!”
„Tjoba Philip ada bersama-sama!” kata Vecsera dengen soeara menjeselken.
„Kanapa Philip?”
„Rudolf ada indahken padanja. Sama kitaorang sama sekali itoe si edan tida maoe ambil perdoeli; malahan kaloe kita kata apa-apa, ia djadi samingkin mara, bedah dengen Philip poenja perkatahan, jang salaloe bisa dapet memboedjoek padanja.”
„Philip baroe nanti dateng sabentar malem”
„Dan itoe sakalian njonja-njonja?” tanja Bombelles.
„Njonja-njonja? Iaorang djoega tentoe tida nanti dateng lebi siang.”
„Habis, bagimana dengen kita?” tanja Vecsera. „Akoe ampir tida ingin lagi, bertemoe moeka kombali pada itoe orang gila!”
„Ikoet sadja pada kitaorang pergi ka kampoeng!” kataHoyos. „Sabentarmalem kita nanti pergi bersama-sama ka gedong pemboeroean. Itoe waktoe, barangkali djoega samoea soeda djadi baek lagi.”