M O H A M E D A L I P A C H A[sunting]

SATOE TJERITA JANG BETOEL SOEDA

KEDJADIAN DI NEGRI TOERKI

JANG SANGET MENARIK HATI.

(DJILID KA 4)

XXVIII

SASOEDNJA BRENTI PRANG.

Bagian Kadoea

Bebrapa boelan sasoedanja Mohammed Ali pacha dilepas dari ia poenja pangkat panglima prang, Toerki telah dikalaken oleh orang Rus jang soeda bisa madjoeken angkatan prangjnja sampe deket kota Konstanstinopel. Inilah tiada membikin heran bagi siapa-siapa jang dapet taoe begimana pembesar-pembesar di Stamboel kebanjakan ada hati dengki dan temaha boeat keoentoengan sendiri, tiasa ambil poesing pada kaperloean negri, hingga satoe kepala prang jang tjakep selaloe diganggoe dalem pakerdja'annja dan kamoedian diganti oleh satoe generaal jang tiada ada ketjakepannja boeat dijadi panglima prang.

Banjak provincie dan tempat-tempat dati karadja'an Toerki moesti disraken pas Rusland dan pada beberapa bangsa di Balkan jang bersariket sama orang Rus aken melabrak pada negri Toerki. Di sana sini rahajat Christen jang lebi doeloe taloek pada Toerki telah berontak dan bikin hoeroe hara. Djoega ada banjak orang Moslim maoeoesir kaoem karadja'an dan angkat Sultan laen, soepaja ini Radja baroe nanti bisa bales sakitnja bangsa Toerki jang soeda dapet soesa serta nista'an besar dalem prang jang terkoetoek.

Poen rahajat Skipi di Albanie soeda djadi mara pada Sultan Abdoel Hamid jang ditoedoe soeda djoeal negri pada moesoe, pada orang Christen. Iaorang sanget penasaran Toerki moesti kala prang dalem keada'an begitoe hina. Iaorang bilang, kaloe satoe Sultan jang gaga doedoek ditachta karadja'an di Konstantinopel, nistjaja Toerki tiada nanti bisa kala prang, kendati kawanan moesoenja ada doea kali lebi besar dari jang sebagimana soeda masoek di Toerki.

Hal Toerki kala prang soeda membikin mara djoega pada orang-orang Moslim di Bosnië dan Herzegowina, jang dikapalaken oleh Hadji Lojah. Sasoedanja ini kapala pembrontak djato di tangannja orang Oostenrijk baroelah itoe doea provincie taloek kombali pada Toerki.

Rahajat Skipi di Albanie soeda djadi mara djoega,sebab Sultan Toerki tiada maoe bantoe rahajat Moslim berprang pada Oostenrijk dan biarken laen orang tjampoer tangan dalem itoe perkara prang. Sekarang rahajat Skipi djadi tjoeriga hati dan kwatir Sultan Toerki nanti djoeal djoega negrinja pada Oostenrijk, seperti bebrapa banjak tempat dari tana Toerki soeda didjoeal pada orang Rus, sebagimana pikirannja orang Albanie. Lantaran begitoe iaorang lengkepken kawan-kawannja dengen segala alat sendjata dan melawan pada pembesar-pembesar Toerki. laorang siarkan tjerita, maoe diriken satoe karadja'an sendiri di Albanie dengen tinggal merdika dan tiada taloek pada Toerki atawa pada negri jang mana djoega. Iaorang nanti lawan prang, baek pada Toerki, baek pada Oostenrijk, djika ia orang di ganggoe dalem kamerdika'annja.

Begitoelah pelahan-pelahan pendoedoek di Albanie, baek kaoem Mesehi, baek kaoem Islam, soeda djadi satoe hati dan berkoempoel aken bikin hoeroe hara. Sedeng pendoedoek kaoem Islam di Albanie tiada maoe taloek pada satoe Radja kaoem Christen, orang-orang Mesehi di itoe tempat poen tiada maoe taloek pad aKeizer Oostenrijk, jang dislempang nanti ambil sekalian iaorang poenja hak jang didapet dari djeman doelo ekala.

Di waktoe soesa begini ada berdjalan doea orang lelaki di tana pegoenoengan antara Prisrend dan Djakowa. Lantarant jape, sebab soeda berdjaland jaoe, itoe doea orang doedoek di satoe batang kajoe di bawa poehoen-poehoen djati.

Jang paling toea di antara ini doea orang adalah imam Reschid, moesoe besar dari Mohamed Ali pacha. Ini imam jang memang koeroes sekarang soeda djadi seminkin koeroes lagi. Dengen pake satoe kaftan petja dan satoe sortan besar, penoe dengen aboe, matjemnja itoe imam seperti satoe hadji jang baroe balik dari Mekka. Kawannja jang banjak lebi moeda ada pake uniform barisan Circassie, jang soeda rombeng, lebi djaoe satoe pistool dan satoe pedan gschaska. Inioran gmoeda boekan laen daripada Chefket effendi,anaknja Soleiman pacha; ia soeda bisa dapet pangkat officier pada angkatan prang Toerki, tetapi kamoedian ia diboeang dari Konstantinopel, dengen tiada poenja oewang dan tiada poanja roema boeat tinggal, hingga ia kepaksa toeroet pada ia poenja paman besar, kendatipoen sabenernja ia sanget bentji pada ini imam jang hatinja sanget kedjem. Imam Reschid soeda adjak Chefket naek goenoeng toeroen goenoeng dengen mengasoet orang-orang Skipi, aken bikin peroesoehan.

Sasoenggoenja djoega Chefket ada sanget soesa serta melarat, sebab nama toeroenannja soeda djato sama sekali, iapoenja ajah, Soleiman pacha, jang djadi panglima prang mengganti Mohamed Ali pacha, boekan sadja tiada mampoe kalaken angkatan prang Rus jang mendesak di Toerki, malahan ia soeda sia siaken beriboe djiwanja tentara Toerki dan sasoedanja orang Rus dapet reboet kota Plewna, sebab Osman pacha tiada bisa tahan lama membela itoe kota dari kepoenga norang Rus jang kawanannja lebi besar, sedeng itoe pacha jang kosen dan gaga tiada bisa dapet bantoean tjoekoep, —angkatan prangnja Soleiman pacha soeda dioesir oleh moesoenja, sabagian mati dalem berklaian jang tiada sebanding dan sabagian lagi soeda lari tjere bere. Soleiman pacha soeda lari ka Konstantinopel dan pangkatnja diganti oleh Mouktar pacha. Baginda Sultan soeda djadi amat mara pada Soleiman pacha jang dilepas dari pangkat dan gelarannja serta dirampas semoea harta bandanja, sedeng Soleiman sendiri diboeang ka Bagdad, seperti hoekoeman, sebab ia sia-siaken angkatan prang Toerki. Chefket ditoedoe berboeat berbagi-bagi kadosa'an dan didjatoken hoekoeman mati padanja, tetapi ia bisa lari dan toeroet pada imam Reschid jang merasa senang, kerna soeda dapet satoe orang berdosa, tjoetjoe kaponakannja jang nanti toeroet segala apa jang ia prenta.

,,Kit aorang soeda lakoeken betoel pakerdja'an kita," kata imam Reschid. „Akoe soeda dapet boedjoek antero pendoedoek di Fristend, jang tjoema toenggoe satoe tanda boeat geraken pembrontakan. Sekarang ada temponja aken kita orang sirem ini minjak peroesoehan di Djakowa, tetapi Chefket, perkara apakah jang kau pikir?"

„Saja sedeng piki rkasoekeran diri saja," menjaoet itoe orang moeda dengen soesa hati. „Sekarang saja ampir mati kelaparan dan ketjapean. Doeloe saja idoep senang di Stamboel, di mana saja sring dateng di gedong oetoesan Inggris dan blakangan saja kapalaken barisan bashi bozouk. Tapi sekarang, och Allah!" —„Angkau telah dapet koetoek dari Allah, sebab doeloe kau soeda langgar titanja Nabi dan idoep sebagi kaoem giaoer. Seandenja doeloe kau bawa pengidoepan baek dengen toeroet titanja Nabi, tiada minoem anggoer, tiada maen top dan berboeat laen-laen kadosa'an, tentoelah ini hari kau masi idoep senang, tiada dapet soesa seperti ajah kau. Tapi angkau selaloe tiada soeka toeroet adjaran dan nasehat baek jang akoe briken dan sekarang kau moesti rasa sendiri bagian dari dosa kau."

—,,Tapi paman sendiri soeda adjar saja berboeat dosa. Siapakah soeda prenta boenoe nona Mrika jang tiada berdosa satoe apa? Tjoema ajahnja ada sala soeda bawa lari anak ka udan soeda menika zonder idzin kau. Toch ini kesalahan tiada bisa dianggep sebagi dos abesar sampe moesti dibikin pembalesan toeroen-moenoeroen."

,,Diam,binatang!" menjentak imam Reschid dengen mara. „Dalem itoe hal kau soeda tipoe pada akoe dan haroes kau dapet hoekoeman djoega. Angkau tiada boenoe itoe anak haram, hanja kau boeka itoe resia pad aitoe orang kafir jang soeda boenoe akoe poenja anak, hingga ampir akoe djadi binasa di tangannja ito ekafir, djika akoe tiada lekas singkirken diri koe."

„Binatang?" menanja Chefket.„Saja ingin taoe, siapa diantara kita berdoea ada lebi djahat: saja jang rampasharta bandanja orang-orang raja atawa angkau jang soeroe saja pergi merampok dan ambil semoea itoe barang rampasan, dengen membilang, itoe milik maoe digoenaken boeat menoeloeng pada orang-orang Albanie, padahal itoe semoea kau goenaken boeat kaperloean kau sendiri.Sedeng kau koempoel itoe semoea oewang dan barang-barang, saja sendiri jang mendjadi kau poenja pekakas, moesti mati klaparan."

„Angkau lapar?" menanja imam Reschid. „Na ambillah ini,andjing !"

Itoe imam kaloearken sapotong roti kring dari sakoe kaftannja dan dilempar di hadepan Chefket, jang dari sebab lapar telah makan itoe roti dan minoem aer dari satoe soengi ketjil. Kamoedian ia toeroet imam Reschid berdjalan lebid jaoe.

Sigra djoega ini doe aorang jang dalem perdjalanannja lebi djaoe tiada banjak bitjara satoe pada laen, telah liwat di djalanan jang banjak tikoengannja dan naek di satoe goenoeng jang matjemnja seperti satoe benteng. Sambil boeang napas pandjang pendek ia berdoea menandjak di itoe goenoeng separo merajap; semingkin di atas ini goenoeng semingkin koerang poehoen-poehoen Di sana sini ada banjak batoe dan kajoe potongan jang disedia boeat diglindingken ka bawa aken binasaken balatentara moesoe jang brani tjoba naek di ini goenoeng. Diatas ada kadengeran swaranja andjing menggonggong.

Tiada lama lagi imam Reschid dan kaponakannja telah sampe di poentjak dan dapet liat satoe roema jang memang maoe dikoendjoengken oleh ia berdoea. Ini roema jang besar ada dari batoe mera dan dikoeroeng poehoen-poehoen kajoe dan satoe benteng jang tjoekoep tinggi dan lebarnja boeat taro meriam. Di ini tempat orang bisa melawan pada moesoe jang kepoeng tempat itoe.

Itoe roema ada inda serta tegoe, djendela dan pintoe-pintoenja semoea ada dari besi, disertaken satoe tembok aken menembak moesoe di loear. Di blakang roema ini ada satoe kebon sajoer, djoega bebrapa poehoen boea-boeahan. Dari satoe pompa orang bisa dapet aer ka atas dari satoe soengi ketjil, tiada djaoe dari itoe kebon sajoer.

Imam Reschid djalan menoedjoe ka itoe roema, di ikoet oleh Cliefket dan tiada antara lama lagi paman dan kaponakan ini telah berdiri di depan pintoe roema. Bebrapa andjing besar jang ada di atas benteng telah menggonggong lebi kras. Samentara itoe kadengeran swaranja orang angkat sendjata dan sigra djoega ada saorang meliat kaloear dari satoe pintoe ketjil sambil menanja:

„Perloe apakah kau orang naek di atas goenoeng dan dateng di roemanja Mahmoud Lipouri bei?"

„Boeat kamerdika'annja negri Arnautlik," menjaoet imam Reschid dengen lantjar.

,,Pamerenta di Stamboel ada sampe tegoe dan banjak laskar prangnja aken bikin toendoek segala pembrontakan," kata lagi itoe orang.

-„Tetapi Allah ada lebi tegoe dan lebi kwasa, sedeng kekwasa'an kita orang ada bergantoeng pada agama jang soetji dan pada oedjoeng sendjata jang berpengaroe."

„Slamet dateng, soedara-soedara," kata itoe orang Albanie dari dalem, jang sekarang baroe taoe, ia ada bitjara sama kawan-kawannja sendiri jang ingin bergerak boeat lepasken Albanie dari kekwasa'an serta pamerenta'an orang Toerki.

„Silaken masoek, sobat-sobat, saja nanti soeroe pergi ini semoea andjing, jang tiada nanti bikn djahat pada sobat-sobat dari orang Skipi."

Pintoe roema telah diboeka dan imam Chefket bersama Reschid masoek ka dalem, kamoedian itoe pintoe ditoetoep kombali.

Imam Reschid angkat kadoea tangannja aken membri salam dan sambil memandang itoe roema, ia berkata:

„Berkah slamet dan oentoeng besar nanti djadi bagiannja Mahmoud Lipouri bei dengen semoea familienja. Allah nanti melindoengken kau semoea dari segala bintjana. — Tapi anakkoe, apakah Mahmoud bei ada di roema ?"

„Ada." menjaoetitoe pengawal pintoe. „Silaken toean pergi ka roemanja, di mana toean nanti ditrima dengen pantes."