Landru/Bagian 6
BAGIAN KA VI.
Tipoenja njonja Heon.
———
Boeat djalanken ia poenja lelakon sebagi satoe pengeret prampoean, pemboenoeh dan perampas, serta boeat bikin orang melinken kenalken padanja dengen samar-samar sadja, Landru senantiasa pindah dari satoe tempat ka laen tempat dengen tida brentinja toekar djoega ia poenja nama serta pakerdjaän.
Pada soeatoe hari koetika njonja Laporte dateng koendjoengi padanja di Rue des Petits-Champs, Landru ada berkata :
„Tida lama lagi kitaorang aken pindah dari ini roemah, sebab jang poenja roemah soeda naekin oewang sewa roemahnja."
„Apa kaoe soeda dapet laen roemah?" tanja njonja Laporte.
„Soeda.“
„Dimana ?"
„Di Montmatre. Kamaren akoe soeda liat itoe roemah dan akoe soeda satoedjoe. Satoe antara sobat-sobatkoe jang kabetoelan hendak pindah dari Parijs soeda tawarken boeat ambil over itoe roemah jang pernanja ada di Place Dancourt, satoe tempat jang bagoes dan tida djaoe dari Boulevard de Clichy. Apa kaoe kenal itoe tempat ?"
„Tentoe sekali," djawabnja njonja Laporte, sebab ia poen ada orang kalahiran kota Parijs. „Akoe kenal Chope Dancourt dari depan sampe ka oedjoeng dan itoe tempat Cinema Montmatre doeloe ada mendjadi akoe poenja tempat tinggal."
„Betoel. Dan kaloe kaoe soeka, marilah kitaorang tinggal disana boeat bebrapa hari djikaloe oeroesan pindah soeda djadi beres," kata lagi Landru.
Place Dancourt letaknja dekat pada djalanan Boulevard de Clichy, satoe wijk dari kota Parijs jang besar dan inilah ada satoe antara tempat-tempat jang tersohor rame dengen penoeh cafe-cafe biasa dikoendjoengi oleh orang-orang jang koerang baek namanja dan terlaloe banjak berdjedjel koepoe-koepoe malem. Itoe roemah ketjil jang disewa oleh Landru ada berhadepan dengen satoe toko tembako, sedeng pada lempengan djendelanja ada berhadepan dengen post-politie, jang siang dan malem ada didjaga.
Di pemandangan laen-laen bangsat tentoe anggep bahoea pernanja itoe roemah jang berhadepan pada postpolitie dan letaknja di tempat rame, ada mendjadi satoe halangan besar boeat lakoeken segala matjem kadjahatan, sekali poen satoe kadjahatan ketjil, atawa djikaloe orang brani djoega lakoeken kadjahatan disitoe, njatalah orang itoe ada satoe bangsat kapala obi jang sanget brani mati. Aken tetapi di pemandangannja Landru hal itoe ada sabaliknja. la anggep itoe roemah ada soeatoe tempat jang sama sekali tida didoega orang bisa lakoeken soeatoe kadjahatan. Landru anggep jang ia nanti djadi saorang lebih pinter dari itoe sakalian politie djikaloe ia bisa lakoeken soeatoe kadjahatan di itoe roemah zonder dapet diendoes oleh itoe orang-orang politie.
Maka ia lantas moelai atoer maksoednja. Sakalian perabotan roemah tangga dari Rue des Petits-Champs, sama sekali ia angkoet ka Place Dancourt. Sebagitoe lekas ia pindah ka sitoe, lantas djoega ia bikin persobatan dengen itoe orang-orang politie jang mendjaga di sapoeternja Place Pigalle.
Satelah seleseh atoer ia poenja barang-barang perabotan dan riasken roemah itoe sabrapa ia bisa, lantas ia kirim kabar pada njonja Elise Laporte, oendang itoe njonja dateng ka ia poenja roemah baroe, serta tida loepa djoega kasih kabar jang sorenja iaorang nanti bersantap di restaurant dan malemnja plesir. . . .
Njonja Laporte tida tampik lagi itoe oendangan, itoe hari djoega ia lantas dateng dan oendjoek rasa senangnja dengen itoe tempat baroe dimana ia pikir bakal tinggal bersama Landru sebagi soear istri.
Landru trima kadatengannja njonja Laporte dengen manis boedi dan adjak ini njonja ka pekarangan blakang dari itoe roemah dimana ada toemboe banjak poehoen kembang jang bisa hiboerken hati. Sembari oendjoeki satoe-șatoe roepanja kembang, Landru menjanji dan kaloearken bebrapa sairan dari Musset jang menarik hati, hingga njonja Laporte jang dapet banjak pladjaran djoega dari sekolahan, merasa kagoem pada kapinterannja ini bangsat jang lantaran bagitoe pande kaloearken sair-sair bagoes, soeda kira ini badjingan ada satoe orang terpladjar tinggi.
Sahabisnja djalan-djalan dalem itoe kebon ketjil, Landru laloe adjak masoek ka dalem roemah dan koetika soeda doedoek berendeng di satoe bangkoe pandjang dari beloedroe jang aloes, Landru laloe berkata:
„Di sinilah djantoeng hati, akoe baroe bisa trima kadatengan kaoe sebagimana pantesnja. Disinilah djantoeng hatikoe, kitaorang bisa hiboerken hati sabagitoe banjak jang kita soeka." dan sembari berkata bagitoe. Landru laloe tjioemin moeloetnja njonja Laporte jang moengil sampe beroelang-oelang, samentara ini njonja jang soeda mabok tjinta, bales itoe tjioeman sama kerasnja
Koetika hari soeda moelai djadi sore, Landru adjak njonja Laporte pergi ka Cafe Leonac di Boulevard de Clichy jang pernanja tida berdjaoehan dengen Cigale.
Marika doedoek dan minoem dengen hati girang dan tertawa-tertawa, samentara Landru dengen isep satoe sigaret laloe moelai toetoerken hikajatnja jang ia karang sendiri. Antara laen-laen Landru kata, bahoea ia ada saorang jang soeda banjak sekali bikin perdjalanan, la tjeritaken hikajatnja koetika masih anak-anak, ia tjeritaken kakaja'annja dan tanah-tanahnja jang ada di deket Tonneins di Lot-et-Garonne. la sombongken dirinja jang ia namaken Raoul Dupont, satoe burger jang soeda berdjasa banjak pada negri. Dan ini nama Raoul Dupont ia pasang di depan roemahnja itoe jang baroe.
Lebih djaoe ini bangsat tjeritaken bagimana senang djikaloe ia dapet tempo aken dateng ka tanahnja, dimana salaennja bisa dapet hawa oedara jang bagoes, djoega ada amat enak boeat memboeroe binatang boewas, atawa poen bikin plesiran dengen bawa makanan ka oetan-oetan.
Sebagi penoetoep dari ia poenja dongeng kosong. Landru laloe berkata :
„Oleh kerna akoe sandiri tida sanggoep oeroesken itoe tanah-tanah jang loewas, maka sedari bebrapa tahon laloe akoesoeda sewaken pada saorang Amerikaan dengen harga mahal. Tapi maski kita soeda kasih sewa, kita masih tetep mempoenjai. kamerdika'an boeat dateng dan tetira disitoe sabrapa lama jang kitaorang soeka. Tida brapa lama lagi akoe bakal koendjoengi itoe tanah-tanah berhoeboeng dengen satoe oeroesan. Maka kapan kaoe soeka toeroet, baekłah kitaorang berangkat sama-sama."
„Oh ! akoe girang sekali, Raoul," sahoetnja njonja Laporte jang sama sekali tida doega ia soeda didjoestaken bagitoe djaoe. ,,Kapan kaoe bakal berangkat ka itoe tempat jang kaoe poedjiken bagitoe enak ?"
„Akoe nanti kabarken lagi pada kaoe."
Koetika iaorang soeda dahar kenjang, iaorang laloe menoedjoe ka satoe tempat pertoendjoekan jang tida berdjavehan disitoe, dan waktoe tengah malem Landru anter njonja Laporte sampe di pintoe tempat penginepannja njonja itoe.
Sampe di itoe malem njonja Laporte masih anggep Landru ada saorang hartawan dan saorang sopan jang berharga boeat djadi soeaminja. Tapi sial soenggoe boeat Landru kapertjajaännja njonja Laporte itoe tida sampe lama. Hal itoe ada berhoeboeng dengen terdjadinja satoe perkara.
Di hari besokannja njonja Laporte kabetoclan djalan-djalan dengen naek taxi bersama satoe temennja jaitoe njonja Picard, satoe prampoean djanda jang soeda perna diboedjoek oleh Landru, tapi oleh kerna litjinnja, tida bisa didjebak. Koetika taxi di djalanin sampe di djalanan Rue de Royale, njonja Laporte tjepet-tjepet oendjoek dengen djeridjinja bahoea itoe toean jang djalan di sebrang djalanan dan koemis serta dienggotnja bagitoe bagoes, ada itoe orang jang bakal djadi soeaminja. Njonja Laporte seboetken namanja itoe toean ada Raoul Dupont.
„Kaoe kliroe, sobat," kata njonja Picard, „kerna itoe boekan toean Dupont. Akoe poen ada kenal itoe toean. Satoe atawa doea boelan jang laloe, akoe soeda perna berkenalan padanja di Metro dan sedari itoe waktoe kitaorang sering bertemoe satoe sama laen."
„Siapa namanja jang betoel ?"
„Henri Mignot"
„Brangkali itoe ada laen orang," kata njonja Laporte jang merasa sangsi aken orang djelekin namanja itoe lelaki pada siapa ia soeda djato tjinta. „Tida sobat. Akoe liat betoel orang jang kaoe toendjoeki ada itoe toean jang seboetken dirinja padakoe dengen nama Henri Mignot. la soeda perna oendang padakoe dateng ka roemahnja di Rue des Petits-Champs. Satoe kali akoe soeda ikoet ia ka itoe roemah tapi koetika ia tanjaken dengen melit apa akoe ada poenja oewang simpenan, akoe lantas tampik ia poenja oendangan jang kadoea kali, kerna akoe kwatir nanti dirikoe dirampok di itoe tempat sepi".
„Inilah ada satoe perkara jang kabetoelan sekali," kata njonja Laporte, „aken tetapi kita belon bisa pastiken apakah itoe ada satoe crang djoega."
Njonja Picard jang tjoekoep terpladjar dan beroentoeng soeda lolos dari djebakannja Landru, laloe toetoerken lebih djaoe tentang pertemoeannja dengen i'oe lelaki, ia loekisken tampang moekanja lelaki itoe, petaken tingka lakoenja, loekisken keadaän dalem roemahnja itoe lelaki di Rue des Petits-Champs. la poenja loekisan itoe ada bagitoe terang, hingga njonja Laporte djadi terpaksa pertjaja bahoea itoe Henri Migont kaloe bagitoe ada satoe orang djoega dengen Raoul Dupont jang ia bagitoe tjintaken.
Aken tetapi toch tjintanja njonja Laporte pada ini badjingan ada bagitoe keras, hingga sekali poen ia soeda dapet kanjatahan jang teges sekali, ia tetap sangkal dalem hatinja bahoea brangkali hal itoe soeda ditoetoerken dengen kliroe oleh njonja Picard.
Maski poen hatinja berasa sangsi, tida loepoet in ia moelai berlakoe hati-hati, kadang-kadang ia tanja djoega pada diri sendiri, apakah ini Raoul Dupont boekan ada satoe setan jang biasa berglandangan malem aken tjari korban di antara orang-orang prampoean?
Pada besokannja di waktoe lohor djam doeabelas, njonja Laporte ada trima satoe soerat dari Landru, boenjinja soerat itoe ada begini:
„Djantoeng hatikoe,
„Kaoe poenja pergi dari dampingkoe, ada saoepama praoe jang ditinggal kamoedi. Akoe senantiasa djadi merasa sala, doedoek sala bangoen poen sala.
„Akoe merasa tida sanggoep loekisken pengrasaän tjintakoe pada kaoe. Kaoe poenja roepa jang manis senantiasa terbajang-bajang di depan matakoe. „Trimalah akoe poenja kiriman kembang jang berikoet dengen soerat ini, dan kapan kase tiioem kembang ini, ingetlah padakoe.
„Lebih djaoe akoe harep kaoe djangan loepa djandjimoe, jang sabentar malem kitaorang aken bertemoe lagi satoe sama laen.
„Tertinggal tjioem jang manis dari kaoe poenja ka tjinta'an
„Raoul".
Sedeng njonja Laporte batja soerat terseboet dengen hati moendoer madjoe, adalah Landru sedeng berdiam dalem satoe roemah di doesoen Sorbonne.
Satoe orang Italie moeda jang parasnja poetjat dan badannja koeroes ada doedoek di hadepannja Landru.
Ini anak moeda bangsa Italie tentoe pembatja masih inget bahoea ia ada student ilmoe doktor jang telah loepoet boeat tamatken pladjarannja lantaran soeda terseret oleh ratjoen alcohol. la telah djadi sobatnja Landru, sebagimana ternjata dengen ia poenja pertoeloengan soeda briken Landru ratjoen-ratjoen jang sanget berbahaja. Sering-sering iaorang bertemoe satoe sama laen di Cafe Boul Mich. Banjak kali djoega, djikaloe Landru kabetoelan ada simpen banjak oewang, ia kasih pindjem oewangnja itoe pada ini anak moeda jang soeda roedin, sampe itoe orang Italie merasa jang ia ada tanggoeng boedi besar sekali pada ini badjingan, maka tida poen heran djikaloe ia soeda briken segala apa jang ada diminta oleh Landru.
„Kaoe tentoe masih inget, berselang belon brapa minggoe kaoe ada tjeritaken padakoe jang kaoe ada dapetken saroepa pendapetan model baroe, dan tjontonja pendapetan itoe kaoe bilang hendak kasihken padakoe," kata Landru. „Tjobalah kasih akoe liat bagimana matjemnja pendapetan itoe."
„Ja, barang itoe sampe sekarang akoe masih simpen dengen baek", djawabnja itoe anak moeda. „Tapi apa kaoe taoe? ini ada satoe pendapetan jang soesah sekali. Banjak tempo akoe soeda goenaken, dan achirnja akoe beroentoeng soeda dapetken koetoe-koetoe toelen jang masih hidoep." Sahabisnja kata bagitoe, ia laloe kaloearken satoe boengboeng glas warna
biroe toewa, toetoepnja jang dari prop, dilapisin dengen lilin „Isinja boengboeng ini, adalah tersimpen akoe poenja pendapetan dari saroepa ratjoen jang amat berbahaja, orang jang kena makan ratjoen ini dengen pasti ia meninggal doenia zonder bisa ditoeloeng lagi, samentara doktor-doktor jang aken preksa itoe mait, tida nanti bisa terangken apa sasoenggoenja itoe orang meninggal doenia lantaran kena ratjoen, kerna ratjoen ini tida tinggalken bekas-bekas pada badan jang mati, hingga orang jang goenaken ini barang berbahaja tida oesah kwatir nanti ditjekel oleh politie atawa poen terseret oleh boentoetnja perkara boenoeh".
„Aken tetapi kaoe tentoe tida maoe terangken bagimana itoe moesti digoenaken, kerna. . . . . . . ."
„Kerna akoe takoet pikoel dosa. . . . . ." djawab itoe anak moeda, Morganti namanja, ,,kerna kaoe banjak oewang, hingga akoe nanti kasih taoe djoega resianja." Dan sambil berkata bagitoe Morganti laloe serahken pada Landru boengboeng ratjoen jang berbahaja itoe, sambil berkata lagi:
„Trimalah ini dan toeloenglah akoe oewang banjaknja 150 francs boeat ini sore, kerna akoe dioendang dalem pestanja satoe sobat."
„Ja, tapi kaoe belon tjerita abis begimana ratjoen ini dipakenja," kata lagi Landru.
„Tida soesa, sobat. Ambil sapotong benang jang aloes sekali, masoekin oedjoengnja benang itoe ka dalem ini boengboeng, kamoedian benang itoe jang soeda djadi basa dengen ratjoen, lantas tempelin pada barang makanan, siapa djoega jang kena dahar itoe makanan, lantas ia djadi mait. Satoe botol ini kaoe bisa boenoeh sariboe djiwa manoesia."
„Brapa lama orang binasa dari lantaran ini ratjoen?"
„Doeapoeloe ampat djam dan lima hari. Itoe bergantoeng dengen kakoeatan badannja orang jang teratjoen. Tapi ia moesti binasa, itoelah ada djadi kapastiannja ratjoen ini."
Sajang sekali ratjoen ini membinasaken terlaloe lekas," kata lagi Landru.
„Ja, aken tetapi, djoestroe lantaran bagitoe, orang jang teratjoen djadi tida dapet tempo lagi aken minta pertoeloengannja tabib, samentara moeloetnja tertoetoep boeat politie."
„Ja, betoel sekali katamoe," sahoetnja Landru jang laloe kasih masoek boengboeng itoe dalem sakoenja dengen hati senang. „Disini ada oewang 200 francs. Kaoe boleh bikin lebih loijar 50 francs dari sebagimana jang kaoe inginken."
„Tapi kaoe toch aken tambah lagi sabagitoe banjaknja djoega kapan kitaorang bertemoe lagi."
„Itoelah pasti."
Landru soeda beli itoe ratjoen boeat ampat ratoes francs, kern ia soeda itoeng bakal dapet kakajaän banjaknja doearatoes riboe francs dari hartanja njonja Laporte.
Henri Landru, sebagimana soeda dibilang ada saorang jang koerang pladjarannja, banjak hal jang ia melinken kenal sedikit sadja, jaitoe oepamanja tentang kawat oedara, ilmoe pisah, bacteriologie, fotografie, enz. Tapi toch boeat orang jang tida taoe keadaännja nanti bilang Landru ada saorang jang terpladjar tinggi.
Sebagimana soeda dioendang oleh Landru, njonja Laporte telah dateng koendjoengi roemahnja ini badjingan dengen hati penoeh kasangsian. Koetika ini njonja sampe di roemah terseboet dan disamboet dengen manis boedi oleh Landru, lagi sekali njonja Laporte perhatiken barang perabotan dan keadaännja kamar dimana sekarang ia diadjak doedoek oleh itoe badjingan, dan samoea perabotan itoe betoel tjotjok sebagimana katanja ia poenja sobat kamaren sore. Lebih djaoe njonja Elise Laporte jang soeda kapintjoek dengen boedi manis dan boedjoekannja Landru, perhatiken omongan dan klakoeannja ini pendjahat, tapi dalem perhatiannja itoe, tida sekali ada kanjatahan jang Landru ada poenja sifat-sifat djahat.
Dalem pertemoean ini, boekan kadjahatan jang tertampak di matanja njonja Laporte, tapi adalah pengrasaän tjinta jang menambah pada hatinja lantaran klakoean jang manis dan omongan jang pinter terdenger dioetjapken dari moeloetnja Landru.
Itoe malem njonja Laporte dapet hiboeran jang senang sekali di roemahnja Landru, teroetama koetika Landru oetjapken bebrapa patah sair jang merdoe dan dalem maksoednja, terpetik dari boekoe-boekoe sair jang ternama, sair-sair mana memang ada amat disoeka oleh orang-orang prampoean pada waktoe bikin pertjintaän dengen satoe lelaki jang disoeka. Itoelah djoega ada djadi sendjatanja Landru boeat pikat hatinja orang-orang prampoean, seperti Raspoetin soeda pikat orang-orang prampoean dengen ia poenja berbagi-bagi oetjapan agama jang memaksa orang pertjaja pada kasaktiannja, hingga tida poen heran kaloe sampe Keizerin dari Rusland toeroet kapintjoek dengen akalnja Raspoetin itoe.
Samentara Landru ada lebih djahat lagi. la pikat bagitoe banjak prampoean, boekan sadja ingin poeasken napsoenja tapi ingin rampas hartanja dan boenoeh korbannja.
Njonja Laporte soeda nginep di roemahnja Landru pada itoe malem dan bangoen sampe siang hari dengen badan lesce, samentara Landru soeda berdandan. Ini badjingan laloe hatoerken ia poenja maaf, kerna besok malem ia belon tentoe bisa bertemoe pada itoe njonja, kerna ada satoe oeroesan jang Landru hendak beresken.
Njonja Laporte jang tjoema kira Landru ada poenja banjak oeroesan satiap hari dalem oeroesan dagang, soeda tida perhatiken lebih djaoe pada omongannja Landru.
Tapi sabetoelnja oeroesan apakah jang di iboeki oleh ini badjingan, toekang berglandangan jang tida poenja pentjarian satoe apa salaennja pikat orang-orang prampoean jang berharta?
Itoe oeroesan jang diseboetken olehnja, adalah berhoeboeng dengen satoe soerat lamaran pada advertentienja, satoe soerat lamaran dari satoe djanda berharta dan poenja pentjarian.
Siapakah adanja prampoean itoe?
Namanja diseboet sadja njonja Heon. satoe djanda jang ada poenja roemah di Parijs dan satoe anak prampoeannja jang djoega djadi djanda, poen ada poenja satoe, roemah di Ermont dekat Seine et Oise.
Koetika ia kirim itoe soerat lamaran pada adresnja Landru, njonja Heon ada menoempang di roemahnja ia poenja satoe sobat, sedeng pertemoean jang hendak dibikin pada Landru, ia djandjiken di Cafe de l' Univers di Place du Louvre.
Dalem soeratnja itoe, njonja Heon ada bilang: „Akoe nanti pake satoe topi warna biroe dan pada djam ampat akoe soeda doedoek di depan Cafe. . . . . .“
Itoe lamaran ada sanget menarik hatinja Landru, teroetama pada tempat di mana pertemoean aken dibikin. Ia taksir sedikitnja ini njonja aken mempoenjai oewang satoe ton. Maka ia ambil poetoesan aken beresken ini perkara dengen lekas.
Pada waktoe jang telah diminta, Landru soeda dateng di Cafe terseboet, aken tetapi koetika ia dapet liat itoe njonja jang pake topi biroe, lantas moendoer bebrapa tindak lantaran amat terkedjoet.
Apakah sebabnja?
Itoe prampoean jang ada taksiran bakal ditrima lamarannja oleh Landru, dan jang Landru kira ada satoe nona manis, njatalah ada satoe nene-nene jang oemoernja koerang lebih anempoeloeh tahon.
„Demi iblis!" kata Landru dalem hatinja sendiri. „Apa ini nene maoe dari akoe. Tapi tida soesah boeat gorok lehernja ini nene jang soeda ilang tenaganja tiga perampat."
Landru tida merasa halangan aken doedoek pasang omong dengen ini nene dan boeat soempoetken ia poenja pengrasaän djenga, ia sengadja pasang moeka manis, laloe hampirken nene ini dan boeka topi hoendjoek hormatnja dengen tandes. la kenalken dirinja dengen nama Petit de Haymond, lantas doedoek di hadepannja itoe nene.
Ini nene poen laloe kenalken dirinja sebagi njonja Heon, tjeritaken dengen teroes-terang brapa banjak adanja ia poenja oewang simpenan, hal mana ada amat menggirangken pada Landru, ternjata dari kalakoeannja ini bangsat jang djadi semingkin getol gosok omong dengen ini nene, pada siapa dengen sedikit-sedikit Landru oendjoek birahinja seperti itoe nene ada satoe nona jang tjantik. Bahoea ini nene Heon djadi sanget soeka pada kalakoeannja Landru dan pada omongannja begitoepcen pada roepanja, itoelah tida oesah dikata lagi, kerna siapatah ada orang lelaki kadoea jang nanti tida tampik aken oendjoek tjintanja pada satoe nene kolot kaloe boekannja ini badjingan jang senantiasa aoes dengen oewang?
Sekarang Landru seperti orang jang sedeng pasang doea djebakan, satoe djebakan soeda dipasang dan ampir kena, samentara laen djebaken lagi ia sedeng atoer maski jang bakal didjebak ada satoe nene kolot. la pikir sahandenja satoe djebakan lolos ada satoe lagi.
Sendjata boeat binasaken djiwanja itoe korban-korban sampe sariboe djiwa poen sekarang soeda ada sadia dalem kantongnja, kaloe sadja halangan tida terlaloe besar boeat singkirken máitnja itoe korban-korban jang terboenoeh, nistjaja pakerdja'annja Landru saban-saban bisa diselesehken dengen tjepet. Tapi Landru tida koerang akal, maka ia soeda ambil poetoesan aken bikin ini nene djadi korbannja.
Koetika iaorang hendak berpisah, Landru soeda tida tampik aken loeloesken perminta'annja nene Heon aken bikin pertemoean jang kadoea kali di hari Selasa.
Dalem boekoe tjatetannja Landru, ia seboet nene Heon dengen tanda „Havre," jaitoe nama tempat dimana ia soeda bikin itoe pertemoean.
Pada malemnja Landru doedoek bersantap dengen njonja Laporte. Sabagitoe lama Landru masih belon djoega dapet satoe djalan aken singkirken djiwanja ini njonja moeda ka laen doenia, sedeng hatinja ingin sekali lekas dapet poenjaken itoe harta jang berdjoembla doearatoes riboe francs.
Menoeroet kainginannja, adalah pernikahan dengen njonja Laporte traoesah dibikin dengen oepatjara, tapi njonja Laporte jang mempoenjai banjak kenalan di antara orang-orang jang ternama, soeda minta itoe dengen keras, samentara Landru masih berpikir sangsi, dan ia merasa soesa sekali kaloe tida loeloesken permintaännja njonja itoe. Maka koetika iaorang lagi doedoek di Boulevard de Clichy, sambil pegangin tangannja njonja Laporte, Landru laloe tanja kapan njonja Laporte maoe tetapken tanggal dan harinja boeat iaorang poenja pernikahan.
„Akoe ada niatan," kata lagi Landru, jang pada sahabisnja kitaorang menikah, kitaorang nanti bikin perdjalanan ka Italie, kamoedian, waktoe poelangnja, kitaorang mampir djoega ka Engeland. Dari itoe baiklah kitaorang bikin ini pernikahan dengen lebih lekas, soepaja kita bisa lantas berangkat dari ini negri, sebab disini senantiasa ada riboet dan kakwatiran."
Njonja Laporte djadi inget pada penjerangan-penjerangan bom jang heibat dari fihaknja kapal-kapal terbang Duitsch, dan ia inget djoega bagimana soedara prampoeannja soeda djadi binasa lantaran meletoesnja satoe bom jang didjatohken dari kapal terbangnja orang Duitsch di betoelan poesatnja kota Parijs.
Menginget hal itoe njonja Laporte laloe kata :
„Memang hal itoe ada dipikirken djoega olehkoe. Maka hal kitaorang poenja hari nikah, atoerlah kaoe sendiri, lebih lekas ada lebih baek."
Landru ingin sekali bisa bawa njonja Laporte ka Vernouillet, dimana djiwanja njonja ini gampang sekali dibinasaken dan maitnja dibakar, aken tetapi hatinja soeda djadi keder dengen itoe tempat, kerna sekarang, sakalian orang politie, demikian poen sakalian tetangganja, senantiasa ada pasang mata pada itoe roemah jang mempoenjai semprong asep tinggi.
Kapan Landru pikirken hal itoe, ia djadi tida bisa tidoer, ia moesti kaloearken satoe akal boeat bikin ilang sama sekali orang poenja sangkahan djelek atas dirinja, soepaja itoe roemah bisa digoenaken lagi dengen tida ada jang sangka apa-apa.
Dari sebab itoe, besokannja sedari ia bitjaraken itoe oeroesan nikah dengen njonja Laporte, Landru laloe dateng ka Vernouillet. la masoek ka dalem kamar dimana ia ada simpen pakean-pakean toewa, atawa pakean bekas korban-korbannja, sama sekali ia angkoetin kaloear, toempoekin di satoe ploksok dari ia poenja kebon, dan sasoedanja itoe pakean bertoempoek seperti satoe boekit pasir tingginja, ia lantas toewangin minjak tanah. Di atas itoe pakean jang soeda menjala berkobar-kobar, Landru lemparken satoe koffer toewa. Asep item kaloear bergoeloeng-goeloeng dari itoe taboenan, samentara baoe sangit, seperti bangke dibakar, ada menjiarken baoenja sampe bebrapa roemah djaoenja.
Meunier, itoe toekang djaga jang doeloe soeda bikin pengadoean pada politie dengen satoe sangkahan djelek atas dirinja Landru, soeda djadi riboet sebab dialah ada tetangga jang paling dekat dengen Landru. Seperti djoega doeloe ini kali poen Meunier sangka Landru ada bakar lagi mait manoesia. Maka zonder pikir lagi, ia lantas rapport pada politie, jang sebentaran sadja dalem pekarangannja Landru soeda berkoempoel banjak orang politie dan pendoedoek doesoen.
Politie lantas tanja pada Landru baoe apa jang soeda tersiar dari roemah itoe, dan atas pengadoeannja banjak pendoedoek, maka ia orang perloe aken bikin papreksaän.
Dengen klakoean sabar dan merasa amat geli di hati, Landru laloe silaken itoe orang-orang politie masoek ka dalem roemah.
„Kombali satoe pengadoean", kata Landru koetika itoe orang politie naek di tangga roemah. „Sasoenggoenja di oedik-oedikan gampang sekali orang bikin soesa pada politie. Tapi akoe girang sekali jang toean soeda lantas dateng disini. Toean tadi ada tanja apa akoe soeda bakar dalem pekarangankoe. Itoe akoe bisa kasih katerangan dengen silaken djoega toean liat itoe toempoekan pakean toewa dan koffer. Tida brapa lama lagi akoe nanti pindah dari ini roemah, dan sebab akoe tida maoe bajar ongkost grobak boeat barang tetek bengek, maka akoe soeda bakar sadjoembla pakean-pakean toewa dan bebrapa koffer. Asep dan baoenja itoe barang toewa brangkali ada mendjadi lantaran hingga kaoe toean-toean dioendang kasini".
Kamoedian iaorang soeda sampe di kebon, toempoekan pakean jang soeda djadi aboe laloe dikorek-korek, brangkali iaorang kira bisa dapetken tengkorak manoesia, tapi apa jang didapetken, jalah tehgkorak koffer koelit. Sasoedanja mendapet kanjatahan apa jang dikataken oleh Landru samoea ada betoel, itoe sarombongan hamba-wet sigra berlaloe dari itoe roemah dengen hatoerken maäfnja lagi sekali pada Landru.
laorang lantas bri tane pada Meunier jang ini toekang djagal soeda doewa kali bikin kakliroean dalem hal menjangka orang, kerna apa jang Landru bakar melinken ada pakean dan koffer toewa.
Berselang satoe minggoe dari kadjadian di atas, telah dateng ka itoe villa satoe vracht auto besar jang lantas moeatken sakalian barang perabotan dari itoe roemah, kamoedian angkoet ka dalem satoe goedang jang pernanja dekat pada Porte de Bagnolet. Dalem boekoe register dari kantoor kawin (Burgerlijken Stand) di Dyon ada tertjatet bahoea doea penganten soeda disahken nikahannja di itoe kantoor, penganten prampoean bernama Elise Laporte dan penganten lelaki bernama Raoul Dupont, dan pada sahabisnja iaorang menikah, itoe hari djoega iaorang soeda berangkat bikin perdjalanan ka Italie.
Di ini negri iaorang soeda tinggal dalem kota Turijn, kamoedian iaorang pindah tinggal di Milaan, lantas iaorang teroesken perdjalanannja ka Genua.
Dalem perdjalanan iaorang dapetken berbagi-bagi kasenangan, teroetama njonja Laporte, jang senantiasa tilik segala gerakannja Landru, soeda dapet kanjataän bahoea ini orang sasoenggoenja ada saorang djoedjoer dan berhati baek. Soeda tentoe itoe samoea klakoean Landru soeda oendjoek dengen poera-poera dan bertentangan dengen ia poenja pengrasahan hati sendiri. Sebab soeda pertjaja sampe abis keadaän hatinja itoe soeami, maka njonja Laporte njataken kainginannja aken koendjoengi kota Rome. Sabetoelnja Landru soeda tida ingin bikin perdjalanan lebih djaoe, ia poenja kainginan, jalah balik kombali ka Parijs, aken tetapi njonja Laporte ingin sampeken djoega kota Rome, maka boeat senangken hatinja ini njonja, Landru toeroetin sadja kahendakannja. laorang berangkat ka ini kota jang rame dan indah, laloe ambil tempat dalem satoe kamar dari satoe hotel ketjil, tapi indah dan pernanja djoega dekat station.
Pengidoepannja kadoea orang itoe satiap hari tida laen dari pada plesir, koendjoengi tempat-tempat pemandian jang termashoer dan malemnja iaorang menonton di Schouwburg. Pada soeatoe malem sapoelangnja dari Opera, iaorang doedoek dalem kamarnja di hotel sembari omong-omong. Samentara Landru, sebagimana biasa satiap hari selaloe peloeki dan tjioemin istrinja, seperti badannja kadoea orang itoe soeda mendjadi satoe. Landru soeda liat betoel jang njonja Laporte soeda djadi lengket padanja, maka ia mengarti bahoea temponja boeat eret ini prampoean soeda sampe, maka ia laloe berkata dengen soeara aloes:
„Istrikoe jang manis, akoe pikir kita moesti beli satoe roemah. Dimana ini roemah kita moesti beli, itoelah kita berdoea moesti pikirken dari sekarang, soepaja pada waktoe kitaorang balik ka Frankrijk, kita lantas boleh moelai atoer itoe oeroesan. Doeloean kaoe ada bilang pada akoe, jang kaoe soeda tida betah tingggal di kota Parijs, tapi kaloe kita soeda balik, kita nanti bikin perdjalanan ka sapoeternja itoe kota, soepaja kita bisa dapet pilih satoe tempat di desa jang bagoes dan njaman".
Sabelonnja njonja Laporte menjaoet, Landru soeda teroesken lagi bitjaranja:
„Akoe tida taoe bagimana kaoe poenja pikiran. Dan djoega akoe tida taoe apa kaoe soeda pikir tentang kitaorang poenja harta. Sebagimana haroesnja, kitaorang poenja harta moesti didjadiken satoe, seperti kitaorang poenja badan berdoea sekarang soeda teriket mendjadi satoe soemanget."
„Tapi itoelah akoe belon dapet pikir Raoul," djawab njonja Laporte.
„Kaloe bagitoe," kata lagi Landru, „akoe pertjaja kaoe tida merasa kaberatan boeat bikin satoe soerat, dimana kaoe haroes boeboehi tanda tangan. Dalem soerat itoe aken menerangken jang kaoe poenja oewang simpenan jang masi tersimpen di Bank Credit Lyonnais, haroes didjadiken satoe, dan selandjoetnja aken mendjadi kapoenjaän kita berdoea."
„Samentara njonja Laporte masi berpikir, Landru soeda berkata lagi:
„Akoe sendiri nanti taro sadjoembla doeapoeloe riboe francs atas kaoe poenja nama, dan maski poen ini pengasihan tida besar, tapi toch kaoe soeka trima dengen senang hati. Oewang ini ada djadi kaoe poenja hak, kaoe boleh pake dan kaoe boleh abisken boeat kaoe poenja kasenangan. Maka dari itoe, persatoean dari kitaorang poenja harta perloe sekali dibikin, soepaja di blakang hari, apabila sala satoe antara kitaorang meninggal, itoe oewang aken mendjadi bagiannja jang masih idoep. Maka lagi sekali akoe menanja, apakah kaoe tida merasa halangan aken bikin itoe soerat sekarang djoega, soepaja besok pagi akoe bisa kirim soerat itoe ka Parijs boeat disahken?
Memang djoega, menoeroet atoeran oendang-oendang nikah di negri Barat, sasoeatoe perkawinan jang oemoem, haroes diberikoetken dengen persatoean harta, maka tentoe sekali, njonja Laporte jang merasa soeda idoep beroentoeng dengen ini lelaki, tida merasa halangan lagi boeat bikin itoe soerat.
Landru lantas bangoen dari tempat doedoeknja, angkat djanggoetnja njonja Laporte dan tindes bibirnja itoe djantoeng hati sebagi satoe tanda girang. laorang laloe hampirken satoe medja toelis dan Landru lantas toelis doewa acte jang boenjinja dengen tida salah ada diinget oleh ini badjingan. Doewa acte itoe soeda klaar dan Landru lantas berkata lagi:
„Boeat ini oeroesan ketjil akoe harep tida bikin pegal hatimoe, djantoeng hati," dan Landru laloe bangoen, peloek njonja Laporte dan tjioemin lagi moeloetnja itoe njonja jang masih bisoe aken djawab samoea bitjaranja ini badjingan. Kamoedian Landru landjoetken lagi omongannja: „Sabetoelnja akoe poen merasa tida perloe aken rewelken ini perkara harta, tapi kita moesti berlakoe menoeroet maoenja oendang-oendang negri, soepaja tida ada kasoesahan di blakang kali. Tjoba kita boleh persetan sama itoe oendang-oendang, tjoba kita boleh traoesah kwatirken pada karewelannja Weeskamer, tentoe kita troesa omongken ini perkara harta. Boekantah kitaorang menikah boeat katjintaän dan boekan boeat harta? Tapi djantoeng hatikoe jang manis kaoe toch tjoekoep mengarti apa jang akoe baroesan soeda terangken, maka perloe sekali kaoe teeken itoe soerat sekarang djoega soepaja besok pagi akoe boleh lantas kirim ka Parijs boeat disahken disana."
Njonja Laporte masih djoega tinggal awasken dengen bengong pada itoe doewa soerat jang terletak di atas medja. Ia sekarang moelai koempoelken pikirannja, dan moelai inget boekti apa jang ia telah alamken. Belon berselang bebrapa hari ia soeda denger tentang halnja ini pendjahat jang senantiasa ada ditjari oleh politie, tapi waktoenja aken boeka ia poenja resia masih belon djoega sampe, maka njonja Laporte soeda bersabar sampe nanti Landru maoe minta didjadiken satoe ia poenja oewang. Djoestroe sekarang adalah waktoenja aken ia boeka itoe resia.
Koetika Landru maoe boeka soeara lagi, njonja Laporte lantas berkata :
„Akoe nanti teeken itoe doewa acte, Raoul, dan kaoe pertjaja akoe boekan ada satoe prampoean jang soeka berdjoesta, tapi . . . . . . .
„Tapi," bales kata Landru dengen hati kwatir.
„Tapi dengen satoe perdjandjian
„Dan perdjandjian itoe?"
„Kaoe moesti serahken padakoe kaoe poenja koffer jang sekarang ada dalem itoe lemari dengen salamanja terkontji."
„Apakah jang kaoe maksoedken dengen ini perminta'an ?" tanja Landru dengen merasa amat tida enak dan heran.
„Akoe maksoedken", kata lagi njonja Laporte dengen brani, „jang akoe merasa sangsi bagi kaoe poenja kadjoedjoeran".
„Kaoe nanti menjesel jang kaoe soeda berkata begitoe". kata lagi Landru aken gertak ini prampoean jang ia kira bodo, tapi tjerdik sekali.
„Betoel. Akoe nanti menjesel kaloe tida oendjoek kaoe poenja kapalsoean, kerna akoe sekarang soeda taoe jang kaoe sering sekali toekar nama. Siapa sabetoelnja kaoe? Itoe akoe maoe taoe dan akoe nanti tjari taoe kendati akoe moesti minta pertoeloengannja politie. Di hadepannja akoe poenja sobat, Henriette Picard, kaoe mengakoe bernama Henri Mignot, advocaat, sedeng pada akoe kaoe mengakoe bernama Raoul Dupont, rentenier zonder ada poenja oewang satoe peser dan tida poenja kakaja'an, tapi dengen brani mati tadi kaoe bilang maoe taro doeapoeloe riboe francs atas acte kawin dari kitaorang poenja persatoean harta. Satoe bitjara jang bagoes sekali".
Landru dengerken bitjaranja njonja Laporte dengen hati panas dan gergetan. Ia rasaken di bawah kakinja sakoenjoeng-koenjoeng tanah djadi ambles dan terboeka satoe lobang jang amat dalem aken sadia terdjoenken ia. Tapi ia masih tinggal sabar, ia peloek tangannja di dadah dan kasih njonja Laporte bitjara lagi :
„Sasoedanja kitaorang menikah, akoe soeda bikin papreksaän, dan sekarang tjoekoeplah apa jang akoe ingin taoe. Dari itoe, serakenlah padakoe itoe koffer jang menjimpen bagitoe banjak kaoe poenja resia-resia, dan jang sedari kitaorang menikah belon perna satoe kali kaoe brani boeka di hadepankoe, atawa pertjajaken kontjinja padakoe. Bilanglah apa jang kaoe soeda simpen dalem koffer itoe. Apakah isinja dalem itoe boengboeng biroe jang kaoe simpen dalem satoe doos bagitoe rapi? Marilah serahken itoe ratjoen, atawa akoe nanti panggil politie boeat rampas itoe."
Moekanja Landru djadi poetjat dan sabentar lagi djadi mera, ia meremken matanja, dan angkat dadanja, sebagi satoe orang jang tida berdosa ditoedoeh boeta toeli. Kamoedian ia denger njonja Laporte berkata lagi:
„Kaoe soeda djoestaken akoe. Tapi kaoe poenja tipoe tida bisa mempan dan sabaliknja lilit lehermoe sendiri, ja, tipoe itoe soeda djiret leher kaoe, pemikat prampoean jang paling pande. Njatalah kaoe poenja perkataän-perkataän manis dan klakoean jang begitoe menjinta samoea ada palsoe, samoea pikatan jang boleh dioepamaken sebagi ratjoen! Ja, kave ini poen boleh dikata ada djadi radja ratjoen!"
Sahabisnja kenjang damprat itoe lelaki jang tadinja ia bagitoe tjinta, njonja Laporte laloe tertawa dan ia tertawa dengen sengit.
„Kaoe poenja nama boekan Dupont," kata lagi njonja Laporte. „dan djoega boekannja Henri Mignot. Kaoe ini ada satoe orang pelarian jang lagi ditjari oleh politie di Parijs, sebab kaoe soeda tipoe dan kaniaja pada banjak djiwanja orang prampoean. Kamaren akoe soeda dapetken bebrapa boekti dari kaoe poenja kadjahatan. Sabagitoe djaoe akoe soeda tinggal diam, kerna akoe ingin dapet taoe apa kaoe hendak berboeat pada dirikoe. Dan baroesan ternjatalah kaoe maoe akoe poenja oewang lebih doeloe, kamoedian aken abisken djiwakoe dengen ratjoen atawa dengen. . . . . . Ach ! betoel dengen ratjoen, sebab kaoe ada simpen itoe boengboeng biroe jang terboengkoes dalem doos fluweel."
„Oeler! Dari mana kaoe dapet taoe itoe?" treak Landru dengen koenjoeng-koenjoeng.
„Dari mana akoe dapet taoe? Lebih baek kaoe bilang dimana sekarang kaoe ada simpen itoe barang berbahaja!" kata lagi njonja Laporte jang roepanja sekarang tida bisa digertak lagi,"
„Kaoe soeda boeka akoe poenja koffer, tentoe selagi akoe berpegian. . . . . . . ." kata Landru dengen roepa goesar dan gergetan. „Setan alas! njatalah kaoe ini ada satoe oeler, satoe prampoean doerdjana jang tida satia, sekali poen akoe ada tjintaken kaoe dengen sagenap hati dan djiwa!"
„Betoel. Akoe soeda boeka kaoe poenja koffer, sebab akoe maoe taoe kaoe poenja resia, sebab Henri Mignot ada ditjari oleh politie di Parijs. sebab akoe tida maoe dipanggil lagi njonja Dupont, sebab tanah aerkoe tida boleh kasih merdika lebih lama lagi pada satoe pendjahat, satoe penipoe dan satoe pemboenoeh. Heh! oentoeng sekali akoe belon kena kaoe poenja boedjoekan aken taro tanda tangan di itoe kertas, tjoba akoe soeda berboeat bagitoe, tentoe akoe soeda teeken djoega vonnis kamatian bagi dirikoe sendiri."
Landru menggereng sebagi satoe singga jang lapar. la masih bisa tahan marahnja, kerna ia taoe disitoe boekan ada tempat aken remes batang lehernja ini korban.
la tida sekali kira ini prampoean ada lebih pande maen komedie dari pada dirinja sendiri, ia tida kira ini prampoean jang tadinja ada di bawah ia poenja pengaroe, dan bagitoe tjinta pada dirinja, sekarang berbalik djadi moesoehnja jang sanget berbahaja.
Landru masih bingoeng begimana ia moesti bikin brenti bitjaranja ini prampoean jang mengandoeng bagitoe banjak kagetiran bagi pendengerannja, tapi sabelonnja ia dapet pikir satoe akal, sakoenjoeng-ko enjoeng njonja Laporte soeda hampirken itoe medja toelis dan sembat itoe doea soerat acte, teroes lari menoedjoe ka pintoe.
Sebagi kilat menjamber Landru djadi terkedjoet kerna ia taoe kaloe itoe doewa soerat sampe djato di tangan politie, tentoe tida ada ampoen lagi boeat kadosahannja. Maka dengen sebat dan penoeh kasengitan, Landru lantas oeber ini prampoean, sentak tangannja dan kasih satoe djotosan di bawah djanggoetnja. Itoe djotosan ada keras sekali dan katambahan tjintjinnja Landru bantoe kakoeatan, hingga njonja Laporte djadi roeboeh lantaran itoe loeka jang mengaloearken banjak darah dari bawah djanggoetnja. la pangsan dengen rebah tida berkoetik.
Landru taoe kamerdikaännja tida santousa lagi di itoe tempat, satoe perkataän sadja dari itoe prampoean soeda tjoekoep aken bikin politie kota Rome kerdja keras aken tangkep dirinja, maka sasoedanja dapet rampas itoe soerat dari tangannja njonja Laporte, ia lantas masoek ka laen kamar dimana ada tersimpen barang- barangnja, lantas ambil bebrapa barang jang perloe dari koffernja, masoekin ka dalem sakoenja, berikoet djoega itoe ratjoen, lantas pasang satoe cigaret dan seperti tida ada kadjadian apa-apa, Landru lantas berdjalan kaloear dari Hotel dengen satoe toengkat di tangan. Orang jang liat tjoema kira Landru sedeng pergi boeat djalan-djalan aken dapet hawa oedara jang njaman.
Sasampenja di djalanan besar Landru bikin tindakannja dengen tjepet menoedjoe ka station. Djoestroe satoe sneltrein ampir berangkat. la lantas beli satoe kaartjis klas satoe boeat ka Ventimiglia. Doewa minuut kamoedian trein berangkat, tinggalken kota Rome bersama prampoean jang oeroeng djadi korbannja.
Lima djam belakangan, djoega dari itoe station ka djoeroesan jang Landru djalanin, ada menoempang dalem trein expres njonja Elise Laporte dengen loeka di bawah djanggoet jang masih dibebet.
Ini njonja jang hatinja masih panas sebagi bara, soeda taro soempa jang ia maoe bikin pembalesan pada itoe lelaki pemboenoeh, dan kapan ia soeda sampe di Parijs ia nanti boeka kedoknja lelaki itoe.