Landru/Bagian 7

by William Le Queux

BAGIAN KA VII.

Tjari korban baroe.

———

Sasoedanja terbebas dari bahaja kamatian di tangannja itoe badjingan Landru, dan dengen naek kreta api jang berdjalan siang malem dari Italie ka Frankrijk, satoe perdjalanan jang amat djaoe, achir-achir njonja Elise Laporte sampe di kota Parijs dengen badan lelah pada djam sabelas malem.

Dengen mengandoeng maksoed jang keras aken membales sakit hati pada itoe lelaki djahanam, njonja Elise Laporte dari station laloe berangkat poelang ka roemahnja dengen pikiran besok harinja ia nanti kasih rapport pada politie. Tjoba itoe malem badannja tida terlaloe tjape, tentoe ini prampoean soeda dateng pada politie.

Pada satengah djam kamoedian sedari sampenja trein jang didoedoeki oleh njonja Laporte, djoega sampe di itoe station satoe trein dari Marseille jang bawa dateng itoe badjingan Landru. Ini bangsat telah dapet katahoei jang ia di-ikoetin oleh moesoehnja, maka ia singga di Marseille, kamoedian ia sendiri jang berbalik koentitin itoe prampoean.

Satelah sampe di Parijs Landru tida brani oendjoek moekanja pada orang banjak, saban kali katemoe orang politie ia selaloe lengosken moekanja. Ia pikir djalan jang paling baek, jalah semboeniken diri sakoetika lamanja sampe nanti dateng koetika jang baek aken tjari korban baroe.

Satelah kaloear dari station, Landru lantas menoedjoe ka satoe roemah barang lelang di Montrouge dimana ada berdiam ia poenja satoe sobat nama Caillard, soedagar barang lelang atawa toekang tada barang tjoerian, jang soeda banjak djoega beli barang-barang demikian dari tangannja Landru. laorang ada kenal baek satoe sama laen. Koetika Landru mengetok pintoe roemahnja ini soedagar di waktoe malem, ia ini merasa haran dan terkedjoet djoega jang Landru soeda dateng bagitoe terkoenjoeng-koenjoeng. „Ja, kaoe djangan kaget, sobat, akoe dateng begini malem sebab berada dalem satoe kasoesahan. . . . . ."

„Ach! . . . . ."

„Denger doeloe, sobat. . . . ."

„Akoe harep. . . . . ."

„Ja, akoe taoe, kaoe tentoe harep tida karembet-rembet atas itoe kasoesahan jang terdjadi pada dirikoe".

„Itoelah betoel".

„Tida, malah kaoe aken dapet oentoeng dari akoe".

„Tjeritakenlah".

„Akoe sedeng dioeber-oeber oleh satoe prampoean jang hendak membales sakit hatinja. Akoe doega ia ada minta pertoeloengannja politie, maka akoe pertjaja politie tentoe soeda berkerdja boeat tangkep padakoe, dan akoe brani pastiken bebrapa orang politie tentoe soeda djaga akoe poenja roemah jang akoe baroe sewa di Place Dancourt. Kaoe tentoe kenal itoe roemah dan djoega kaoe tentoe taoe brapa banjak akoe soeda prabotken itoe, sebab antara barang-barang jang akoe pake boeat perhiasan roemah itoe, sabagian ada dari kaoe djoega. Akoe poenja dateng disini, 'jalah aken tawarken pada kaoe boeat beli kombali saantero perabotan jang ada dalem itoe roemah. Nah! tjoba kaoe bilang, brapa kaoe brani bajar itoe?"

Ini soedagar jang tjerdik dan taoe Landru sedeng perloe pake oewang, sengadja kasih liat roepanja sedeng kakoerangan oewang, dan merasa tida perloe aken beli barang-barang lagi. la angkat poendaknja dan gojang kapalanja sembari berkata:

„Ach! sajang akoe sekarang tida ada sadia oewang".

„Kaoe djangan djoesta sobat, akoe sampe mengarti kaoe poenja akal. Bilang sadja teroes terang brapa kaoe maoe bajar boeat itoe samoea barang perabotan".

„Tapi, bilang sendiri brapa kaoe maoe minta", bales menanja itoe soedagar.

Landru laloe seboetken satoe djoembla dan sigra djoega iaorang berdoea tawar menawar, jang achirnja Landru djadi djoeal itoe barang perabotan jang baroe dipake di Place Dancourt dengen harga 2500 francs. Oewang itoe lantas dikasihken pada Landru, samentara Landru laloe teeken satoe kwitantie dengen pake nama „Raoul Dupont". Dengen trein pagi Landru laloe berangkat ka Enghien, dimana ia ambil satoe tempat menginep di satoe pension ketjil dengen pake nama „Henri Fevard." Di ini tempat Landru mengoempet dengen tida saorang kenal padanja. Ia poenja barang perabotan dari roemahnja di Vernouillet ada tersimpen dalem satoe goedang sewahan, dan barang perabotan dari roemahnja di Place Dancourt ia soeda djoeal pada itoe soedager, hingga ia sekarang tida ada sangkoetan apa-apa lagi, melinken menoenggoe waktoe.

Besokan paginja, koetika Caillard, itoe soedagar barang-lelang dateng di Place Dancourt boeat angkat antero barang perabotannja Landru, ia dapetken disitoe bebrapa orang politie jang lagi djaga roemah itoe. Njatalah njonja Laporte soeda kasih pengadoean pada politie.

Toean Caillard jang dapet tjegahan dari politie aken boeka itoe roemah laloe kaloearken satoe kwitantie jang ia dapet trima dari „Raoul Dupont, kwitantie mana sengadja diboeboebi tanda tangan tiga hari lebih doeloe, hingga dengen adanja ini kwitantie itoe orang-orang politie tida bisa bikin tjegahan soeatoe apa, kerna barang-barang perabotan dari itoe roemah sekarang soeda djadi kapoenjaään jang sah dari ini soedagar. Pertanjaännja politie soeda didjawab olehnja:

„Ini barang perabotan akoe soeda beli dari satoe toean jang lebih doeloe akoe belon perna bertemoe. Tiga hari jang berselang ia dateng padakoe dan tawarken akoe ia poenja barang-barang perabotan, kerna ia aken berangkat ka Belgie. Akoe soeda beli ini samoea dan djoega soeda bajar oewangnja dengen beres, sebagimana adanja ini kwitantie jang mendjadi boekti".

Di Enghien Landru tida bisa berdiam lama, berselang doewa hari ia laloe pinda ka Beauvais, bebrapa minggoe kamoedian, dengen braniken hati ia laloe balik lagi ka Parijs dan poelang ka roemah istrinja.

Dengen bagitoe Landru soeda beroentoeng terbebas dari tangkepannja politie, sebab tida saorang ada taoe perhoeboengan apa ada antara Raoul Dupont atawa Henri Mignot dan Henri Desire Landru. Samentara di roemah-istrinja, ia melinken terkenal sebagi satoe ajah jang tjinta anak-anaknja dan sajang istrinja, sedeng di antara tetangganja, ia terkenal sebagi satoe soedagar jang banjak beroentoeng dalem dagangannja.

Berselang bebrapa minggoe sedari politie tjari katerangan dengen giat, aken tetapi tida berhasil boeat dapetken boekti-boekti atas pengadoeannja njonja Laporte, pendjagaän atas dirinja Landru tida dipegang keras lagi, hingga ini djahanam jang moelai dapet soesa lagi dalem oeroesan oewang dan idoep dengen mengoempet di antara istri, dan anak-anaknja, perlahan-perlahan moelai tongolken lagi kapalanja di kota Parijs.

Landru jang merasa dirinja telah slamat dari tjekelannja politie moelai pikir poela dengen djalan begimana sekarang ia moesti tjari korban-korban baroe, sebab toch boeat laen pakerdjaän ia tida mampoe.

Pada soeatoe hari, jaitoe di awalnja boelan November, dengen berkandaran auto dari Parijs Landru pergi ka Houdan, jaitoe satoe district ketjil dimana ada berdiri satoe astana toewa jang dibikin pada abad ka sembilan belas, dan sekarang astana ini soeda didjadiken gredja.

Houdan letaknja kira-kira ampatpoeloe mijl dari kota Parijs, pernanja di tengah-tengah Forest de Dreux dan Rambouillet. Dalem ia poenja perdjalanan Landru sengadja mampir di Hotel de Plat d'Etain dan doedoek minoem kopi disitoe sembari denger-denger brangkali di itoe tempat ada satoe roemah kosong jang maoe disewaken. Poelangnja Landru sengadja ambil djalan di oetan Rambouillet dan koetika ia sampe di desa Maulette, jaitoe satoe desa jang amat sepi, melinken ada berdiri satoe gredja ketjil pada djalanan sebelah kiri dan satoe villa bebrapa poeloe depa djaoenja di pinggir djalanan sebelah kanan. Di depan pintoe dari itoe villa ada ditempelin satoe papan jang menjataken bahoea itoe villa hendak disewaken. Landru liat di itoe tempat tida ada laen roemah jang lebih baek dari pada itoe villa, maka sasoedanja kiterin lagi itoe tempat sampe doewa kilometer djaoenja, Landru balik kombali aken tjari katerangan tentang itoe villa. Roemah ini letaknja betoel di pinggiran djalan besar, depan dan belakangnja ada dikoeroeng dengen pekarangan kebon jang loewas djoega, samentara satoe kamar auto jang besar ada didiriken di blakang roemah terseboet. Sasoedanja bikin papreksaän sakoetika lamanja, Landru merasa penoedjoe sekali dengen ini roemah, kerna djoestroe roemah jang begitoelah ada diinginken oleh ini djahanam jang masih teroes genggem maksoed-masoed kedjem dan temaha.

Ini villa njatalah ada dibri nama „Hermitage" atawa tempatnja pendita menedoeh. Salaennja itoe satoe gredja ketjil, di sapoeternja ini villa tida ada laen roemah, maka inilah memang ada roemah jang sanget diinginken oleh Landru jang hendak goenaken itoe boeat ia poenja sarang pertjintaän. Di itoe malem djoega lantas Landru pergi pada toean Tric, eigenaar dari roemah itoe, pada siapa Landru laloe minta sewa itoe roemah dengen satoe soerat contract dan briken oewang sewa roemah boeat tiga boelan.

Pada toean Tric Landru mengakoe ada djadi satoe ingenieur jang pegang pakerdjaän di Parijs dan ini ingenieur ternjata ada bajar oewang sewanja roemah dengen betoel.

Sapoeloe hari berselang sasoeda ia teeken itoe soerat contract, Landru laloe angkoet ia poenja barang perabotan roemah tangga bekas ia pake doeloe di Vernouillet dan jang koetika ia hendak berangkat ka Italie ia ada kirim di satoe goedang. Satoe prampoean toewa jang Landru bawa dari Parijs ada bantoe bersiken itoe barang perabotan, dan sasoedanja tinggalken tempat itoe ampatbelas hari lamanja orang tida dapet liat lagi pada Landru. Pada baroe-baroe pinda Landru ada ambil kabiasa'an aken dateng di hari Saptoe sampe di hari Senen, dalem waktoe mana ia oeroes sendiri makanannja dan pakeannja.

Landru ada perhatiken betoel keadaannja ia poenja kebon jang ada diblakang itoe gedong, hingga tida ada soeatoe podjokan dari kebon itoe jang Landru tida indjek.

Sasoedanja mempoenjai itoe roemah, Landru moelai tjari korban-korban baroe. la poenja perhoeboengan dengen njonja Heon jang boeat sakoetika lamanja soeda djadi poetoes. Landru samboeng poela dengen lebih manis, hal mana ada menggirangken hatinja itoe djanda toewa jang dengen gampang sekali soeda djato tjinta pada Landru. Itoe waktoe njonja Heon ada tinggal di Rue de Rennes nomor 165.

Kerna njonja Heon soeda djato tjinta pada itoe badjingan, maka tida soesa aken Landru bawa ini korban kolot ka Hermitage atawa Landru poenja Gedong pertjintaän.

Roemahnja Landru di Vernouillet ada dikiteri oleh roemahroemah kampoeng jang banjak pendoedoeknja, samentara roemah Landru di Gambais ada berdiri sendiri di satoe lapangan lebar, dikoeroeng oleh pekarangan jang loewas, maka soeda tentoe Landru merasa lebih laloeasa aken berboeat apa-apa disitoe.

Njonja Heon jang sabenarnja soeda ampir masoek ka lobang koeboer, merasa beroentoeng sekali dapetken satoe lelaki jangsoeka adjak ia ka taman plesiran, maka ada apakah lagi jang njonja Heon merasa sajang boeat kasih pada Landru, dan ada halangan apakah boeat ia loeloesken oendangannja Landru ka itoe Sarang Pertjintaän?

Begimana ini nene poenja gila tjinta pada Landru bisa ternjata dari ia poenja omongan koetika lagi beromong-omong dengen Landru. Ia njataken dengen tida merasa maloe lagi tentang pengrasaännja. la kata sedari anak prampoeannja meninggal doenia berselang belon brapa lama, hatinja senantiasa djadi merasa doeka, ampir tida ada apa jang bisa hiboerken kadoeka'annja itoe, tertamba lagi Landru soeda tinggalken padanja ka Italie sedeng Landru ada djandjiken perkara nikah. Oleh kerna demikian, boeat toeroetken hatinja jang djengkel, ia soeda pake banjak oewang dengen tida pikir-pikir lagi, hingga oéwang simpenannja jang memang tida sabrapa banjak soeda djadi abis. Hal itoe sama sekali ia tida pikirken, jang ia pikirken siang hari malem adalah Landru saorang jang ia begitoe tjinta. Apa jang masih katinggalan sebagi m'liknja, adalah barang perabotan roemali jang ada di roemahnja dan di roemah anak prampoeannja jang telah marhoem.

Laudru lantas berkata:

„Djantoeng hatikoe, itoe perkara djangan dipikirken lagi. Kaloe kitaorang soeda menikah tentoe kaoe tida perloe lagi dengen itoe barang perabotan, sebab di roemahkoe soeda sadia perabotan jang lengkap, maka lebih baek itoe perabotan jang ada di roemah kaoe dan roemah kaoe poenja anak, kasih satoe soedagar beli dengen harga bagoes. Akoe ada kenal satoe soedagar barang lelang jang bisa beli itoe barang-barang dengen harga bagoes sebab ia ada djadi akoe poenja sobat."

Njonja Heon jang tida inget laen dari pertjinta'an, tida perhatiken lagi dengen itoe hal, lantas sadja trima voorstelnja Landru.

Sebagi saorang jang merasa bangga dengen itoe pertoendangan, njonja Heon senantiasa oendjoek pada kenalan dan sobat-sobatnja tentang keada'annja Landru jang bakal djadi ia poenja soeami, dan lebih djaoe ia tjeritaken djoega jang djikaloe iaorang soeda menikah, marika aken berangkat ka Tunis dimana iaorang aken berdagang.

Kaloe ada perkara bertoendangan, Landru selaloe pake akal hendak bikin perdjalanan ka tempat-tempat jang djaoe. Maksoednja, jalah aken padajaken politie, dan laen dari bagitoe, sebagi djoega ia hendak cendjoek jang dirinja ada saorang hartawan, mampoe borosken oewang boeat bikin itoe perdjalanan.

Sasoedanja berselang satoe minggoe sedari Landru bawah njonja Heon ka Gambais, Landru laloe beli satoe dapoer jang ampat pasegi dan areng ampat keranjang.

Keadaännja njonja Heon jang tida mempoenjai vewang, ada mendoekaken pikirannja Landru, tapi oleh kerna soeda katelandjoer, Landru moesti merasa girang aken dapet oewang pendjoealan dari barang-barangnja itoe njonja.

Laen dari pada itoe, njonja Heon soeda bikin mendongkolnja Landru, sebab dalem ia poenja kabanggaän, njonja Heon soeda berkenalken Landru pada ia poenja sobat-sobat dan kenalan sebagi ia poenja soeami jang baek, pinter, tjerdik dan har awan.

Di awalnja boelan December Landru adjak njonja Heon djalan-djalan dari Parijs ka Garancieres, satoe station jang pernanja dekat dengen Gambais. Dalem ia poenja boekoe tjatetan Landru ada toelis onkost-onkost boeat itoe djalan-djalan. Dari Garancieres marika pergi plesiran dengen berkandaran. Malemnja iaorang poelang ka Gambais. Njonja Heon mergeloeh lantaran katjapean dari itoe djalan-djalan. Sabelonnja masoek tidoer iaorang berdoea doedoek makan doeloe pada djam poekoel sapoeloe malem.

Di atas buffet dari kamar makan ada disoesoen boeah sina as-appel pada atasnja satoe piring. Roepanja appel itoe ada seger dan timboelken napsoe boeat didahar. Sahabisnja bersantap njonja Heon laloe djoempoetisatoe appel itoe, teroes di koepas dan di dahar, samentara Landru awasken appel itoe dimakan.

,,Akoe ada ingetan besok maoe pergi djalan djalan ka oetan-oetan, apa kaoe soeka toercet, djantoeng hatikoe? Tapi ini malem kaoe moesti tidoer lebih siang. Kita poenja boedjang prampoean selama kitaorang berpegian soeda atoer beres kaoe poenja kamar".

„Ja, baroesan akoe poen soeda tengok itoe kamar tidoer, samoea ada rapi dan bagoes".

„Ambil lagi satoe ini appel, djantoeng hatikoe", berkata lagi Landru dengen sedikit memaksa dan sodorken teroes itoe piring boeah. „Ini boeah ada manis dan enak sekali. Bagimana kaoe rasa ?"

„Ja, sasoenggoenja manis sekali", dan sembari berkata bagitoe njonja Heon djoempoet lagi satoe dan teroes dahar.

Sembari awasken itoe appel masoek dalem moeloetnja njonja Heon, Landru menanja diri sendiri, apakah itoe ratjoen dari doktor Morganti aken berkerdja sebagimana moestinja. Tapi ini ada pertjobaän jang pertama, maka Landru moesti djaga dan perhatiken bagimana kasoedahannja itoe ratjoen.

Satengah djam kamoedian, itoe prampoean jang Landru djandjiken hendak kawin dan tanda tangan siapa Landru ada simpen dalem soerat-soerať jang dikirimken pada adresnja. laloe berpamitan dengen peloek tjioem pada Landrn, kamoedian naek ka loteng masoek ka kamar tidoernja.

Landru tinggal menoenggoe di bawah loteng sembari pasang koepingnja boeat denger apa-apa. Sembari menjenggoeken waktoe, Landru toewang cognac ka satoe glas, minoem itoe, kamoedian rebahken dirinja di satoe korsi males. la rebah dengen tida merem, koepingnja ia pasang terang-terang boeat denger kaloe ada soeara apa-apa jang dateng dari kamarnja njonja Heon.

Pintoe kamar makan dimana sekarang Landru ada rebah tinggal terboeka, aken. tetapi sampe satoe djam lamanja Landru tida denger soeara apa-apa salaennja soeara tindakan kakinja njonja Heon fang belon djoega naek ka pembaringan, hanja djalan moendar-mandir sebagi orang merasa badannja kapanasan. Zenuwnja Landru bergerak keras, ia menoenggoeken kamatiannja njonja Heon dengen tida sabar, tertamba lagi kapalanja soeda kamasoekan alcohol bagitoe keras, hingga dengen tida merasa lagi ia soeda poeles njenjak di atas itoe korsi males, hingga pada djam poekoel toedjoe pagi baroe ia mendoesin.

la lantas sadja bangoen dari korsi itoe, laloe menoedjoe ka kamarnja njonja Heon. la dapetken pintoe kamar masih tertoetoep. la ketok pintoe itoe dan tida dapet penjahoetan, maka ia laloe boeka dan masoek. Ia dapetken njonja Heon tjelentang di pembaringan dengen badan melintang dan badjoe pada bagian dadahnja terboeka.

Njonja Heon soeda kakoe dan antero badannja dingin. la soeda poetoes djiwa lantaran itoe ratjoen jang ditaroken dalem appel.

Landru merasa girang sekali, sebab prampoean jang mendjadi halangan boeat ia poenja pakerdja'an, sekarang soeda bisa disingkirken. Pikirannja ini bangsat soeda lega dan kadosahan apa ia soeda berboeat, itoelah sama sekali ia tida pikir. la sedoe kopinja dan minoem itoe dengen sabar. Sasoedanja berdandan, ia laloe kontji samoea pintoe dan teroes berangkat ka Houdan sampe kabesokan harinja.

Djam anam pagi ia balik kombali ka Hermitage dan moelai kasih laloeh samoea tanda-tanda dari kadjahatannja. Itoe dapoer ampat pasegi besar jang doeloe ia beli, ia laloe njalahken. Lima djam lamanja Landru berkerdja di dapoer aken bikin njalah itoe api sabagitoe kera: sebagimana jang ia inginken. Sampe waktoe tengah malem, api itoe soeda njala keras dengen kasih denger soearanja jang menggereng.

Landru lantas naek ka loteng; panggoel toeroen maitnja njonja Heon jang soeda kakoe dan biroe. la taro mait ini di atas satoe lembar karoeng, di atas mana soeda ada sedia satoe talenan besar. Perkakas kampak jang amat tadjem dan gergadji kajoe, samoea soeda sadia. Dengen itoe perkakas maitnja njonja Heon laloe dipotong-potong dan digergadji oleh ini badjingan jang tida ada lagi bandingannja dalem doenia dari ia poenja kakedjeman. Satoe-satoe keping mait itoe dilemparken ka dalem dapoer, jang dengen sakedjepan sadja bikin daging-daging dan toelang-toelang jang dilemparken, mendjadi aboe.

Di Vernouillet tetangganja Landru salaloe intip ia poenja perboeatan, tetapi di Hermitage jang sapoeternja ada lapangan sepi, tida ada satoe manoesia atawa iblis jang perdoeliken perboeatannja jang terkoetoek, dan tida ada satoe setan alas atawa beboeronan jang tjioem baoenja asep dari pembakaran mait itoe.

Antero malem Landru berkerdja aken bikin abis mait itoe di api, hingga besokan sorenja mait itoe tida katinggalan lagi barang sapotong, samoea soeda djadi satoempoekan aboe.

Malemnja itoe aboe jang roepanja mirip dengen kapoer aloes, dibawa oleh ini badjingan ka blakang gedong, dimana ada terdapet tanah betjek dan lembek. la toewang aboe itoe dan indjek-indjek sampe djadi saroe dengen tanah biasa.

Besokan sorenja djam tiga ia berangkat dengen kreta post ka Garancieres dan naek spoor poelang ka Parijs di roemah istrinja. Pada istrinja ia tjeritaken boeat kaperloean dagang ia soeda moesti berangkat ka Arcachon.

Besokan paginja Landru dateng ka roemah njonja Heon dan ka roemah anak prampoeannja njonja itoe, dimana ia laloe djoeal samoea perabotan apa jang ada disitoe pada toean Caillard. Barang jang melinken katinggalan padanja, jalah satoe kraag leher dan gaetan, barang mana orang dapetken dalem ia poenja kamar auto, samoea soeda ampir antjoer.

Kerna meliat gampangnja ia lakoeken itoe kadjahatan di Gambais dengen tida membahajaken pada dirinja, membikin ini badjingan djadi tambah brani.

Selagi berdaja aken abisken djiwa dan maitnja njonja Heon, Landru soeda ada poenja lagi doea korban baroe. Jang satoe ada njonja Buisson dan jang laen ada njonja Collomb. Antara ini doea korban, Landru lebih katarik hati pada njonja Collomb. Bagimana Landru bisa berkenalan dengen njonja Collomb, kita bisa toetoerken seperti di bawah ini:

Dengen pake nama FREMINET Landru ada sewa satoe kamar di Rue de Chateaudun di Parijs, pada satoe soerat kabar ia ada moeat satoe advertentie pembrian taoe jang ia maoe beli perabotan bekas pake. Dari advertentienja itoe ia trima satoe soerat lamaran dari njonja Collomb tinggal di Rue Rodier no. 15. Satrimanja itoe soerat Landru lantas koendjoengi njonja terseboet dan sasoedanja liat itoe barang perobatan, ia njataken maoe beli.

Njonja Collomb ada satoe djanda oemoer kira-kira 43 tahon, tapi pada Landru ia mengakoe oemoer 39 tahon. la ada satoe prampoean tjerdik, parasnja masih tinggal seger. Di waktoe masih gadis ia ada menikah sama satoe soedagar di Guatemala, tapi soeaminja itoe telah meninggal doenia di tempat terseboet, dan dengen bawa sedikit kakajaän dari soeaminja itoe, njonja Collomb balik poelang ka Parijs dengen maksoed aken berkerdja pada satoe kantoor assurantie.

la poenja oewang simpenan ada kira-kira anam riboe francs jang ia ada titipken dalem Bank di Parijs. Sebagi djoega laen-laen prampoean djanda jang merasa kasepian idoep sabatang karang, bagitoe djoega njonja Collomb soeda ambil satoe sobat lelaki moeda nama Bernard.

Landru djoega taoe adanja itoe tali persobatan antara njonja Collomb dan Bernard, aken tetapi ia poera-poera tida taoe. Sering-sering ia sengadja dateng bawa kembang pada njonja Collomb, atawa sering-sering kirim soerat jang merdoe boenjinja.

Lama kalamahan hatinja njonja Collomb djadi katarik pada ini badjingan, sekali poen bermoela ini djanda tida bagitoe soeka pada Landru lantaran djenggotnja jang itam ia anggep sebagi satoe tanda jang tida baek. Tapi Landru bisa sekali oendjoek tingka lakoe dan bitjara dengen manis di hadepannja ini njonja, dan laen dari bagitoe, Landru banjak kali oendjoek jang dirinja ada saorang hartawan, maski ia melinken ada satoe soedagar jang biasa beli barang perabotan bekas pake. Tentang barang-barangnja njonja Collomb, sabagitoe lekas soeda djadi dibeli dan diangkoet, lantas Landru bajar saparo oewang harganja sebagi voorschot, tapi dalem satoe kwitantie dimana njonja Collomb moesti taro tanda tangannja, ada diseboetken bagitoe roepa, hingga ini njonja tida dapet taoe jang di belakang kali kaloe itoe njonja tida bajar kombali itoe voorschot pada Landru, ia poenja antero barang-barang perabotan aken djadi miliknja Landru.

Tapi jang di'ingin betoel oleh Landru adalah oewangnja itoe djanda, boekanlah itoe barang perabotan jang tida sabrapa besar djoemblanja.

Pada maleman Kerstmis dari tahon 1916, Landru ada berdiam antero malem di roemanja itoe njonja, pada waktoe mana Landru ada bitjaraken oeroesan kawin.

Tawaran boeat nikah tida ditampik lagi oleh njonja Collomb jang itoe waktoe soeda merasa resep betoel dengen kalakoean dan omongannja Landru, apa poela ini njonja memang soeda sering kali toelis menoelis pada Landru, dimana ia njataken trima kasihnja boeat itoe badjingan poenja kiriman kembang dan boeahboeah. Pada saban kali menoelis soerat, Landru salaloe petik dari boekoe pertjintaän bebrapa perkataän jang sedep dan merdoe, sebagimana ia soeda goenaken dengen berhasil pada njonja Cuchet. Soerat-soerat itoe telah didapetken oleh politie koetika Landru soeda ditangkep.

Sasoedanja tetap dalem iaorang poenja perdjandjian nikah, esokannja Landru bawa ia poenja korban ka gedong Hermitage di Gambais. laorang berangkat di waktoe tjoeatja soeda petang, dan oedara itoe waktoe kabetoelan ada gelap, hingga sakalipoen prampoean toekang djaga pintoe tida taoe tentang berangkatnja itoe doea orang.

Di tengah perdjalanan iaorang soeda mampir di satoe hotel di St. Cyr, dimana iaorang doedoek bersantap. Njonja Collomb jang sama sekali tida taoe kaloe dirinja sedeng mengadepi bahaja maoet, doedoek bersantap di sampingnja Landru dengen girang dan goembira. Samentara Landru, tida brenti-brenti bikin senang hatinja ini korban dengen omongan-omongan merdoe. la tjeritaken segala matjem kaenakan dan kasenangan di hari kamoedian kapan iaorang soeda menikah dan tinggal di villa Hermitage.

Njonja Collomb dengerken dan samboet pembitjaraän itoe dengen soeara tertawa bergelak-gelak. Tiada lama lagi iaorang lantas abis bersantap dan naek kombali ka dalem autonja, teroes didjalanken menoedjoe ka villa Hermitage. Auto jang distir sendiri oleh Landru laloe dimasoeken ka dalem pekarangan. Koetika Landru boeka pintoenja auto aken pimpin toeroen njonja Collomb, ia lantas atoerken maäfnja sembari berkata:

„Kaoe tentoe soeka maafken, djantoeng hatikoe, jang kaoe poenja kadatengan disini tida ada satoe manoesia laen jang dateng samboet, kerna kaoepoen tentoe taoe, roemahnja saorang piatoe dan tida mempoenja istri, salaloe berada dalem kasoenjian. Laen dari bagitoe sekarang soeda deket tahon baroe, sebagimana biasa, boedjang-boedjang moesti dikasih vrij sampe abis tahon baroe. Akoe poenja boedjang prampoean jang soeda banjak oemoer, poen akoe kasih permisi balik ka kampoengnja sampe abis tahon baroe, djadi kitaorang disini moesti toeloeng diri sendiri dalem segala apa. Tapi akoe harep di lemari masih ada apa-apa jang boleh dimakan." Sembari berkata-kata bagitoe Landru soeda njalaken satoe lampoe batterij, djalan sembari peloeki badannja njonja Collomb. laorang liwati lagi satoe pintoe hek. laloe boeka pintoe besar. Lampoe besar laloe dinjalaken, sabagitoe lekas djoega njonja Collomb dapet kanjatahan jang roemah itoe ada enak sekali dan djoega ada sampe loewas, maski poen pernanja ada di tempat amat sepi.

Baroe berselang tiga Minggoe jang laloe kitaorang taoe njonja Heon soeda kena kadjebak masoek ka dalem itoe Sarang Pertjintaan dan tida bisa kaloear lagi, sekarang soeda masoek lagi korban jang kadoen.

Toean Freminet tetiron alias Landru anter korbannja masoek ka dalem kamar dimana doeloe njonja Heon poetoes djiwanja dengen menanggoeng kasakitan dari heibatnja itoe ratjoen. Landru tida loepa djoega bawa taschnja ini korban baroe ka dalem kamar terseboet.

„Apa kaoe soeka dahar apa-apa, djantoeng hatikoe," tanja Landru dengen soeara merdoe, „bilanglah itoe padakoe, dan bikinlah disini seperti roemah kaoe sendiri."

Njonja Collomb kasih djawaban jang ia sekarang belon ingin dahar apa-apa. Landru laloe toeroen ka bawah loteng aken pasang lampoe dalem kamar makan. Ini kamar makan ada terpisah dengen roewangan depan.

Koetika njonja Collomb toeroen dan masoek dalem itoe kamar makan, Landru soeda seleseh atoer kamar toe. Disana-sini ada terdapet kembang-kembang jang haroem. Di tengah-tengah medja ada berdiri satoe vaas dengen kembang-kembang jang bagoes dan masih seger, di satoe djendela ada ditaroken satoe pot jang djoega ada toemboe poehoen kembang. Pada ampat podjokan kamar djoega ada berdiri pot-pot jang bagoes, dimana poen ada terdapet poehoen-poehoen kembang jang haroem dan roepanja baroe sadja diambil dari lataran dan ditaro disitoe.

Sebagi satoe pendjahat jang tjerdik, Landru taoe bahoeasam oea orang prampoean soeka sama kembang, maka maski poen soeda djaoe malem, Landru-perloeken bawa lampoe pergi ka pekarangan kebon, petik bebrapa tjabang kembang jang bagoes-bagoes, dan gotong masoek bebrapa pot kembang jang seger-seger. Doegaännja ini pendjahat tida sekali salah, kerna koetika njonja Collomb masoek ka kamar itoe, ia ini kaloearken soeara treakan girang dan boeroe peloek pada Landru dan tjioemin ini lelaki sebagi ia poenja tanda tjinta. Kadoea pasangan itoe laloe doedoek di atas korsi pandjang jang terales dengen beloedroe dan sembari berpeloekan Landru lantas moelai kaloearken kapandeannja dengen sair-sair pertjintaän jang terkenal dan jang ia dapet pahamken dari boekoe boekoe pengarang jang ternama. Sabansaban patah Landru berikcetken dengen satoe tjioeman di bibirnja njonja Collomb jang trima itoe sebagi madoe manisnja, sama sekali ia tida taoe kaloe tjioeman itoe ada berarti satoe kamatian pada dirinja. Koetika njonja Collomb poen bales menjioem pada Landru, ini badjingan berkata :

„Adoeh! hati djiwakoe, akoe merasa beroentoeng sekali jang kitaorang soeda djadi satoe pasangan dan akoe berdoah kapada Toehan Jang Maha Kwasa, biarlah kitaorang tida dipisahken lagi sampe pada kitaorang poenja adjal bersama-sama." Boeat bikin tambah manis bibirnja njonja Collomb jang soeda menjamber pada bibirnja Landru, ini badjingan laloe ambil chocolade jang terisi dalem doos bagoes dari soetra, makanan mana Landru laloe soegoeken pada itoe korban.

Satoe djam kamoedian, koetika ini njonja masih berada dalem peloekannj Landru, ada kadengeran soeara treak jang ngeri. . . . . . .

Ratjoen jang heibat soeda menjerang keras pada paroe-paroe dan antero peroetnja njonja Collomb, hingga ini njonja rasaken tenggorokannja terbakar, antero bibirnja djadi biroe dan matanja mera sebagi bara.

Landru biarken itoe prampoean jang sedeng bertjilaka bertreak-treak sakoeatnja, sebab Landru toe, pada waktoe tengah malem bagitoe, tida nanti ada satoe iblis atawa pedjadjarasi jang maoe denger soeara ratapan jang sedin itoe.

„Ampoen, Fieminet! toeloengin akoe ambil satoe gelas aer dingin, toeloeng lekas! leherkoe terbakar! peroetkoe angoes! Oh! Allah! ja robi! apakah kaoe bikin pada dirikoe, Freminet! Oh! Freminet! apa kaoe ratjoenken akoe! Ja, Allah! kaoe boenoeh akoe sebab kaoe ingin hartakoe! Adoeh! toeloeng.

Dengen sakoeat tenaganja, njonja Collomb tjoba bangoenken dirinja aken hampirken satoe karaaf dimana ada tersimpen aer dingin, tapi baroe sadja kakinja toeroen dari korsi itoe, lantas ia roeboeh sebagi satoe kadebong pisang, badannja berkledjetan, moeloetuja kaloear boesah, matanja mendelik.

Landru tinggal mesem, ia awasken itoe kadjadian dengen hati penoeh kakedjeman.

Samentara ia lagi pikirken apa kamoedian ia moesti bikin dengen maitnja itoe korban, sakoenjoeng-kbenjoeng Landru ada denger soeara orang bitjara di depan pintoe roemahnja, dan tida lama Landru denger pintoe depan di ketok dan bel berboenji dengen njaring!

Landru terkedjoet. . . . . .

Di hadepan iioe mait ini badjingan jang njalinja besar tida bisa bergerak. . . . .

Dari djidatnja jang poetjat ada mengetel karinget dingin.

Siapa jang ketok pintoe?

Ada samboengannja.