Landru/Bagian 5

by William Le Queux

BAGIAN V.

Resia kamarnja pemboenoeh.

 Dalem pertandingan akal dengen moesoeh-moesoehnja, Landru haroes dibilang ada satoe tjabang atas jang brani betoel. Satiap kali berada di satoe podjok lantaran terdeser oleh orang-orang jang djadi satroenja, satiap kali djoega Landru dapet akal seperti kilat aken tangkis serangan moesoehnja itoe, hingga maski poen dirinja soeda berada di podjokan, toch ia tida bisa dikalahken oleh moesoehnja itoe.
 Maski poen soeda berhadepan dengen bahaja, toch parasnja Landru belon perna djadi berobah. Salaennja bagitoe, ketjerdikannja belon perna djadi poentoel, maka itoelah sebabnja, ini pendjahat saban-saban bisa bikin kliroe doega'annja politie atawa orang-orang jang djadi satroenja. Orang-orang jang tadinja bagitoe marah, bagitoe bentji dan bagitoe menantang dalem permoesoehannja, toch dengen meliat tingka lakoenja Landru, denge lantaran mendenger bitjaranja ini pendjahat, achir-achir itoe orang tarik kombali sangkahannja jang djelek dan minta maäf pada Landru.
 la poenja katjerdikan dan soeka berhati-hati dalem segala perkara, demikian poen ia poenja klakoean seperti saorang jang berhati djoedjoer dan satia, banjak kali loepoetken dirinja dari tjekelannja politie. Tjoba Landru tida poenja itoe pengasih boeat djadi pendjahat, atawa lebih teges tida poenja itoe katjerdikan, tentoe soeda lama Landru diboenoeh oleh moesoeh-moesoehnja, atawa ditjekel oleh politie aken didjebloesken dalem pendjara. Satoe boekti begimana besar adanja Landru poenja njali, bisa ternjata dengen hal jang ditoetoerken di bawah ini:
 Satelah dapet trima soeratnja toean Freidmann, iparnja njonja Cuchet, Landru soeda doega jang itoe oeroesan aken berboentoet pandjang. Koetika itoe malem ia dapet liat toean Freidmann di roemah minoeman, sedeng Landru berada sama satoe prempoean laen, ia senantiasa merasa tida senang djikaloe belon bisa selesehken itoe hal, sebab dengen lantaran katakoetan di liat oleh laen orang, ia poenja kamerdikaän djadi tida laloeasa lagi. Dari sebab itoe, satelah berselang satoe hari sadari ia trima itoe soerat, ia lantas dateng koendjoengi roemahnja toean Freidmann.

Satelah bertemoe moeka, Landru lantas njataken ia poenja rasa menjesel jang lantaran ada oeroesan dagang, ia soeda berangkat ka Lyon dan baroe tadi ia trima itoe soerat.

Bahoea toean Freidmann tinggal teroes tekoek moeka dan kaloearken perkataan-perkataän jang menjataken ia poenja tida senang hati, itoelah orang bisa doega, kerna omongannja Landru dan ia poenja oetjapan minta maaf, sama sekali tida bisa linjapken sangkahannja toean Freidmann, sebab toch Landru belon tjeritaken kamana perginja njonja Cuchet dan anaknja. Sahandenja Landru tjeritaken itoe samoea, brangkali toean Freidmann tida gampang pertjaja, kerna toean Freidmann soeda denger sendiri dari istrinja, begimana boesoek perboeatannja Landru, dan brapa kali njonja Freidmann soeda tjoba aken poetoesken perhoeboengannja ia poenja soedara prampoean dengen Landru.

Landru djoega taoe hal itoe, maka dengen goenaken itoe sebab, ia sekarang tjoba aken lolosken dirinja dari sangkahan djelek. Dengerlah apa jang ini pendjahat bilang di hadepannja toean Freidmann:

„Kaoe tentoe mengarti, toean, bahoea kaoe poenja soerat jang boenjinja sanget tida enak, bikin akoe merasa koerang senang. Njonja Cuchet dan Andre telah berangkat ka London, dan akoe mengarti bahoea itoe soerat jang kaoe toelis pada akoe, ada menoeroet kainginannja kaoe poenja istri jang ada bagitoe bentji padakoe. Njonja Cuchet dan Andre soeda tinggalken akoe sendirian, dan akoe tida taoe apa jang akoe moesti berboeat. Apa brangkali kaoe tida bisa rasaken begimana sedih dan hantjoer rasanja hati sang soeami dan ajah djikaloe ditinggal dengen mendadak oleh istri dan anaknja jang soeda bagitoe lama hidoep manis dalem satoe roemah. Ja, roepanja kaoe tida bisa pikir dan tjoba rasaken dalem pikiran pait getirnja akoe poenja pengidoepan di ini waktoe, hingga kaoe brani berlakoe begitoe kedjem dan tida taoe maloe aken toedoeh akoe ini saorang jang berklakoean tida baek. Kaoe toelis bahoea kaoe poenja istri selagi berada dalem roemahkoe soeda dapetken banjak soerat katerangan rijbewijs dalem akoe koffer? Tapi apakah kaoe tida taoe jang akoe ini ada soedagar auto ? „Tapi itoe pakean prampoean dan. . . . .?" tanja toean Freidmann.

„Saban hari akoe ada beli banjak barang-barang, antara mana ada banjak pakeannja orang-orang prampoean. Sasoeatoe soedagar ada poenja koffer-koffer jang penoeh dengen pakean-pakean prampoean", djawab Landru dengen lantjar dan lakoe jang sombong.

„Tapi bagimana dengen itoe soerat-soerat familie ? Djoega itoe soerat-soerat jang istrikoe soeda kasih liat pada njonja Cuchet?"

„Itoe soerat-soerat tida bikin njonja Cuchet goesar padakoe. Banjak kali akoe trima soerat-soerat begitoe, berhoeboeng dengen banjak orang prampoean jang djoeal barang-barangnja boeat samentara waktoe atawa boeat salama-lamanja. Maka kanapatah bikin kaoe dan istrimoe djadi heran atas kadatengannja soerat-soerat demikian?"

„Toean, lebih baek sekarang kaoe bitjara tentang hal njonja Cuchet, sebab djikaloe betoel ia pergi ka London, sebagimana kaoe telah bilang baroesan, tentoe sekali anak dan iboe tida loepa aken toelis soerat pada kitaorang disini. Bagimanatah bisa djadi njonja Cuchet bisa loepaken ia poenja soedara prampoean, maski poen ia ada di laen negri ?"

„ltoelah akoe tida bisa doega sama sekali dan akoe poen rasa njonja Cuchet tida nanti berlakoe bagitoe", djawabnja itoe badjingan. „Aken tetapi djikaloe kaoe taoe, toean, tentoe kaoe tida aken merasa heran. Njonja Cuchet dateng ka London dengen memangkoe djabatan Contra-spionnagedienst. Sapoeloe hari sabelonnja ia berangkat, ia soeda kasih akoe taoe ini resia dan ia minta djoega akoe djangan tjeritaken ini hal pada siapa djoega, tapi pada kaoe akoe rasa tida ada halangan. Lebih djaoe akoe maoe terangken, toean, soepaja kaoe djangan simpen itoe toedoehan djelek lebih lama atas dirikoe, bahoea berangkatnja njonja Cuchet ka London ada berhoeboeng dengen titahnja Departement van Oorlog, jang titahken itoe iboe dan anak boentoetin satoe spion prampoean jang itoe waktoe ada bikin perdjalanan ka London. Boleh djadi ia poenja kwadjiban nanti seleseh tida brapa lama lagi, dan boleh djadi ia nanti balik kombali ka Parijs sasoedanja lakoeken itoe satoe pakerdja'an".

Dalem itoe pertjakepan hatinja toean Freidmann moelai djadi sangsi, kerna semingkin Landru bitjara banjak, semingkin tida ada tanda-tanda jang bisa menoendjoeki dosanja ini pendjahat. Siapa djoega tentoe nanti bilang bagitoe, sebab klakoeannja Landru sebagi saorang jang berhati poetih bersih, djoedjoer dan teroes terang, samentara ia poenja bitjara jang tetap dan lantjar, sama sekali ada menoendjoeki jang dirinja sebagi saorang jang tida berdosa satoe apa. Dari sebab. bagitoe, toean Freidmann terpaksa pandang Landru sebagi saorang jang terhormat dan tarik kombali ia poenja toedoehan, malah djoega ia minta maaf jang ia soeda berlakoe bagitoe gegaba aken sangka djelek dirinja itoe badjingan.

Meliat begitoe, tentoe sekali Landru djadi merasa amat girang dan lantas kasih tabe aken berlaloe dari hadepannja toean Freidmann jang Landru pikir tida perloe lagi aken diboeat kenalan atawa sobat.

Esokan paginja Landru pergi ka Mantes dan koêndjoengi kantoor politie disitoe, hatoerken ia poenja maäf jang sakian lama ia tida dateng di hade pannja itoe pembesar politie boeat kasih katerangan fatsal itoe asep jang kaloear di roemahnja di Vernouillet. Maka oleh kerna demikian, Landru njataken lagi bahoea sekarang ia sengadja perloeken dateng boeat itoe oeroesan, kaloe-kaloe pembesar politie ada perloe dapet katerangan jang lebih loewas.

Ini poen ada menoendjoeki bagimana tabah hatinja Landru dalem hal membelaken diri dengen daja selimoetken matanja politie.

Pembesar politie lantas njataken bahoea oeroesan itoe ia soeda bikin abis, oleh kerna tida ada boekti-boekti jang bisa di dapetken.

Dengen hati senang Landru laloe pergi ka ia poenja villa di Vernouillet, ia masoek ka kamar makan dimana ia dapetken kembang jang tertantjep di vas soeda djadi kering, sedeng kekabang soeda moelai tebar djalanja di koeliling tembok. Dengen tida pikirken apa jang doeloe-doeloe ia soeda berbotat disitoe, Landru lantas sadja boeang itoe kembang mati ka dalem kebon, ambil sesapoe dan keboetan, lantas ia moelai bikin bersi itoe kamar, dan djoega laen-laen kamar, kerna tida brapa lama lagi ia aken trima tetamoe baroe jang aken didjadiken korban.

Sasoedanja tjoeatja djadi gelap, Landru baroe seleseh lakoeken kerdjaännja sebagi djongos. Ia lantas tinggalken itoe roemah dan berangkat poelang ka roemah istrinja di Neuilly, berdiam disitoe bersama anak-anak dan istrinja.

Ampat hari lamanja ia menginep di roemah istrinja, kamoedian ia permisi pada istrinja dengen alesan boeat oeroesan dagangan ia moesti berangkat ka Biarritz, tapi sabetoelnja ia balik kombali ka Vernouillet.

Sekarang Landru tida pikirken lagi tentang penjampoerannja orang politie, djoega tida kwatir dari fihaknja toean Freidmann, maka dalem kamerdikaän jang bagitoe senang, Landru lantas pikir soeda sampe waktoenja boeat trima koendjoengannja njonja Labord-Linie atawa diseboet djoega njonja Brazillie -- sebagimana Landru ada tjatet nama itoe dalem boekoe tjatetannja.

Berselang satoe minggoe sedari ia koendjoengi villanja di Vernouillet, Landru laloe dateng ka roemahnja njonja Labord-Linie, dan sebagi satoe toendangan jang sanget ditjinta, Landru laloe adjakin itoe njonja djalan-djalan naek auto ka Fonteinebleau, di tempat mana iaorang laloe toeroen dan doedoek minoem kopi di Hotel de France, kamoedian iaorang djalan-djalan di taman pada sampingnja astana jang ada disitoe.

Landru saban-saban njataken tjintanja jang amat besar pada ini njonja, dan saban-saban iaorang katemoe gombolan poehoen jang lebet, Landru peloek dan tjioemin moeloetnja njonja Labord-Linie, samentara njonja djanda itoe poen bales itoe katjinta'an dengen sapenoehnja hati, kerna njonja Linie kenal ini toean Cuchet ada saorang hati baik dan hartawan.

Landru soeda goenaken itoe, nama Cuchet sedari ia berkenalan dengen ini njonja, dan tida saorang bisa mengarti kenapa Landru pake itoe nama dari itoe prampoean jang ia boenoeh.

Esokan paginja Landru oendang itoe njonja dateng ka roemahnja di Rue des Petits-Champs. Disinilah Landru soedagoenaken boedjoekannja soepaja itoe njonja maoe serahken hartanja boeat didjoeal, kerna Landru ada kasih kapastian jang harta itoe bisa dapet harga mahal djikaloe didjiwal di itoe waktoe. Njonja Labord-Linie jang soeda djadi tergila-gila dengen ini lelaki, lantas pertjaja sadja apa jang dikataken oleh itoe pendjahat. Demikianlah itoe njonja djanda laloe serahken hartanja aken didjoeal, terdiri dari barang mas-inten, prabotan roemah dan pakean-pakean jang berharga mahal.

Doea hari kamoedian Landru soeda djoeal sakalian barang itoe pada satoe soedagar di Batignolles.

Esokannja tanggal 15 Juni, Landru laloe silaken njonja Labord-Linie dateng di villanja di Vernouillet.

Esokannja lagi, jaitoe di tanggal 16 Juni, njonja Labord-Linie sakoenjoeng-koenjoeng linjap dari itoe roemah, dari kota Parijs, dari negri Fransch, atawa lebih teges linjap dari doenia.

Kamana linjapnja?

Tida saorang taoe, tida saorang dapet tanda-tandanja, tida saorang ada denger soearanja waktoe maoe berpisah dengen ini doenia jang fana.

Tapi Landru, dengen linjapnja itoe njonja djanda, soeda dapet tambah kakaja'annja dengen óewang pendjoealan itoe harta banjaknja ampatblas ratoes francs !

Saja William le Queux, pengarang dari ini boekoe, soeda tjoba selidiki tjara begimana Landru soeda lakoeken itoe pemboenoehan atas dirinja itoe prampoean djanda, tapi dengen menjesel saja tida bisa toetoerken dengen terang djalannja itoe pemboenoehan.

Menoeroet boenjinja soerat-soerat katerangan jang dikoempoelken oleh politie, saja dapet kanjatahan bahoea Landru ada katarik hati pada katjantikannja ini prampoean, lantaran apa maka Landru soeda tinggalken itoe prampoean idoep sakian lama, satoe hal jang djarang terdjadi pada laen-laen prampoean jang djadi korbannja Landru.

Menoeroet doegaän dan djoega berhoeboeng dengen adanja bebrapa boekti, njonja Labord-Linie soeda diboenoeh ampir tida berbedaän dengen nona Nina Langlois. Lebih doeloe njonja Labord-Linie dikasih makan bonbons beratjoen, satelah itoe njonja djadi pangsan, lantas Landru boenoeh dengen laen sendjata. Malemnja djam doewa orang ada liat doewa lentera auto kaloear dari pekarangan roemahnja Landru, menoedjoe ka desa Oise.

Ampir berselang satoe tahon sedari terdjadinja perkara jang ditoetoerken di atas, lima mijl lebih djaoe dari desa Oise orang teleh dapetken satoe mait prampoean jang soeda tinggal tengkoraknja sadja dan oleh pendoedoek itoe desa laloe dikoeboer sebagi saorang jang tida terkenal. Koetika Landru ditoentoet di pengadilan, tida didapetken katerangan apa-apa tentang itoe perkara pemboenoehan. Katerangan jang dimadjoeken oleh saksi-saksi ada sanget bertentangan satoe sama laen. Melinken ada satoe hal sadja jang Landru tida bisa poengkir, jalah pada sasoedanja djoeal barang-barang miliknja itoe njonja djanda, Landru ada simpen dengen hati-hati sekalian soerat-soerat familie kapoenja'annja itoe njonja. Dengen maksoed apa ia berboeat demikian, itoelah ada satoe hal jang soesa ditebak.

Kita sekarang tinggalken itoe resia pemboenoehan jang gelap dan tengok apa jang Landru berboeat selagi ia masih bertoendangan dengen njonja Labord-Linie.

Sabelonnja njonja Linie di diboenoeh, Landru soeda bikin lagi satoe pertoendangan dengen satoe njonja djanda jang oemoernja lebih toewa dari njonja Labord-Linie. Namanja ini njonja djanda toewa ada Madame Guillin.

Dalem satoe soerat kabar jang terbit di Parijs Landru ada masoekin satoe advertentie tjari toendangan jang boenjinja seperti begini:

Satoe toean jang belon perna menikah, oemoer ampat poeloeh lima tahon, mempoenjai pengasilan kira-kira sapoeloe riboe francs satahon, ingin menikah dengen satoe njonja jang adatnja sabar, pande oeroes roemah tangga dan djoega ada poenja pengasilan jang sama banjaknja seperti di atas.

Njonja Guillin, jang soeda lamar itoe advertentie, ada satoe prampoean djanda jang soeda beroesia lebih limapoeloe tahon. la soeda lamar itoe itoe advertentie maski poen keadaännja tida bisa mengaboelken perminta'an jang tertoelis dalem advertentieitoe, kerna ia tida mempoenjai harta jang membri pengasilan 10.000 francs satahon, hanja melinken ada poenja simpenan kira-kira 20.000 franes jang ia telah dapetken itoe dari persenannja satoe familie di Melun lantaran ia soeda berkerdja disitoe bertahoen-tahoen dengen baek sebagi satoe pengoeroes roemah tangga.

Baroe sadja bertemoe satoé kali dalem perkenalannja dengen. Landru, lantas njonja Guillin soeda djadi amat soeka pada kalakoean dan omongannja. itoe pemikat prampoean jang mempoenjai koemis dan djenggot pandjang.

Itoe pertemoean soeda dibikin dalem roemahnja njonja Guillin sendiri di Rue Crozatier dan esokannja njonja Guillin bales mengoendjoengi roemahnja Landru di Rue des Petits-Champs.

Dalem boekoe tjatetannja, Landru namaken ini prampoean djanda toewa dengen pseudoniem „Crozatier" seperti ia soeda tjatet djoega namanja njonja Labord-Linie dengen perkata'an „Brazilie".

Landru jang soeda dapet niatan aken lakoeken poela satoe pemboenoehan atas dirinja ini prampoean djanda toewa, soeda kaloearken kadjoesta'annja boeat pikat itoe prampoean. Selagi doedoek berendeng di satoe korsi pandjang jang mengadepi pada djendela, dari mana orang bisa pandang pada pekarangan kebon jang tida ada toemboe tetaneman poehoen apa-apa, Landru toetoerken pada Madame Guillin jang ia ada trima banjak sekali bintang-bintang kahormatan dari pamarenta Fransch berhoeboeng dengen ia poenja bebrapa djasa jang ia soeda berboeat goena tanah aer selagi melakoeken djabatan di tanah sabelah Oetara dari Frankrijk, oleh kerna djasa mana maka pamarenta soeda angkat ia djadi Consul Fransch di Australie, hingga tida lama lagi ia aken berangkat ka itoe negri.

Madame Guillin jang berpikiran saderhana, belon perna bergaoelan dengen koertjatji jang banjak akal, salama hidoepnja ada tinggal di antara familie-familie hartawan jang belon perna omong djoesta, soeda lantas pertjaja sadja pada omongannja Landru, maka tidalah heran kaloe tida brapa hari lagi sedari marika bikin pertemoean, kadoea orang toewa itoe soeda bertoendangan.

Njonja Guillin jang soeda meresep dengen omongan dan klakoeannja itoe badjingan, telah merasa beroentoeng jang ia soeda dapet satoe lelaki begitoe pinter dan banjak harta, hingga rasa tjintanja pada ini lelaki soeda tida bisa dikata lagi.

Koetika njonja Guillin dateng ka Melun, satoe tempat jang pernahnja tida brapa djaoe dari Parijs, ia soeda tjeritaken tentang kaberoentoengan dirinja jang soeda bertoendangan dengen satoe toean hartawan jang ia poedji, baek dan pinter. Djoega ia tjeritaken tentang ia poenja berangkat ka Australie tida brapa lama lagi sebagi istrinja Consul Fransch. Soeda tentoe itoe tjerita membikin girang dan senang hatinja ia poenja sobat-sobat dan familie atawa membikin ngiri hatinja ia poenja saingan dalem pakerdjahan.

Njonja Guillin sebagimana soeda dibilang, oesianja soeda limapoeloe doea tahon, dari ketjil tida pernah dapet didikan, dan djoega ia tida dapet pladjaran dalem sekolahan, maka soeda tentoe dengen gampang sekali ia soeda kena boedjoekannja itoe badjingan. Landru, apalagi hatinja soeda djadi katarik dengen auto dan roemabnja Landru di Vernouillet jang bagitoe indah.

„Djantoeng hatikoe jang manis", kata Landru sembari peloeki badannja njonja Guillin, „apatah tida baek boeat satoe minggoe lamanja kaoe nginep disini ? Ini boelan hawa oedara di Parijs ada panas sekali, maka kaloe kitaorang berdiam disini, nistjaja kitaorang terbebas dari ganggoeannja hawa oedara jang djelek".

Bahoea oendangan itoe tida perloe dioelangken kadoea kalinja, itoelah tentoe orang bisa kira sendiri, kerna saorang prampoean satengah toewa sebagi njonja Guillin, maoe toenggoe kapantah lagi boeat tjobaken kasenangannja bersoeami istri salaennja itoe waktoe? Laen dari bagitoe, apatah hatinja tida ngiler liat kabagoesannja itoe villa, kabaikannja itoe lelaki jang peloeki ia sebagi satoe lelaki jang menjinta dengen sapenoeh hati ?

Demikianlah, berselang bebrapa hari, jaitoe di tanggal 2 Augustus 1915, dengen satoe auto jang penoch dengen koffer-koffer besar njonja Guillin laloe dateng kombali ka itoe villa, sebab ia soeda ambil poetoesan aken pinda disitoe, sampe nanti dateng waktoenja aken berangkat ka Australie. Itoe koffer ia soeda bawa ka itoe villa menoeroet nasehatnja Landru, soepaja katanja djadi gampang kapan iaorang maoe berangkat ka Australie.

Tentoe samoea sanak-familie dan kenalannja itoe njonja djanda toewa, kira njonja Guillin soeda hidoep senang sebagi njonja Consul Fransch di Australie. Tapi sabetoelnja sedari itoe hari njonja Guillin tida ada lagi di doenia.

Kamana linjapnja njonja Guillin ? Tida saorang taoe !

Tapi kita, pengarang dari ini boekoe, soeda beroentoeng dapetken tanda-tandanja tjara begimana ini pendjahat soeda boenoeh itoe prampoean djanda, sebagimana sekarang kita hendak toetoerken di bawah ini.

LANDRU 5.

Pada itoe hari jang njonja Guillin dateng pindah ka villa terseboet, sorenja iaorang berdoea djalan-djalan di kebon, kamoedian doedoek minoem thee di plataran.

Kerna tida dapet liat boedjang jang merawatken itoe roemah dan bersihken kebon, maka njonja Guillin laloe menanja pada Landru dengen merasa sedikit heran:

„Apatah kaoe tida ada poenja boedjang, Henri ?"

„Ada, dan ia ada satoe boedjang jang baek sekali, djantoeng hatikoe". Sahoetnja Landru dengen soeara lemah lemboet, „Namanja Bricourt, sedari bebrapa hari ia soeda permisi aken tida kerdja, lantaran anaknja jang toeroet di medan perang, telah dapet loeka dan sekarang ada dirawatin di roemah sakit di Rouaan. Akoe soeda kasih ia permisi sabagitoe lama jang ia soeka, lantaran akoe inget bahoea anaknja jang joema satoe, soeda, dapet loeka lantaran belaken kitaorang poenja tanah aer jang tertjinta. Ini njonja Bricourt ada tinggal di oedjoeng itoe djalanan. la ada satoe prampoean jang satia dan radjin. Kaoe nanti merasa senang sekali aken trima dalem rawatannja djikaloe nanti ia soeda masoek kerdja lagi."

Njonja Guillin merasa senang dengen itoe katerangan, dan hatinja semingkin tjinta pada itoe lelaki jang ada poenja pengrasaän tjinta bagitoe penoeh pada tanah aernja. Sama sekali ia tida doega kaloe itoe lelaki jang alim soeda djoestaken ia bagitoe djaoe dalem perkara jang bagitoe ketjil sadja.

Pertama Landru ada pikir bahoea tida terlaloe perloe aken ia abisken djiwanja ini prampoean dengen terboeroe-boeroe, sebab ia taoe bahoea harta bandanja prampoean ini soeda ada dalem tangannja, aken tetapi berhoeboeng dengen terdjadinja satoe perkara, Landru djadi dapet satoe firasat jang tida baek, maka ia lantas ambil poetoesan boeat abisken djiwanja prampoean itoe pada kabesokan harinja.

Tatkala Landru bawa satoe soerat ka post, soerat mana ada boeat satoe prampoean laen jang lamar advertentienja ini badjingan, njonja Guillin lantaran iseng, soeda djalan-djalan ka kamar-kamar samping dari itoe villa. Di antara banjak kamar-kamar ia dapet liat ada satoe kamar jang pintoenja terkoentji. Kerna iseng, djadi ia kapingin taoe apakah jang ada di'isiken dalem kamar itoe. Ia laloe pasang matanja di lobang kontji, dan dari terangnja genteng katja, ia bisa liat isinja itoe kamar. Di satoe podjokan ada bersoesoen bebrapa koffer dan perkakas besi jang ia tida dapet tape apa kagoenaännja, di atas tembok ada digantoeng pakean-pakean orang prampoean. topi-topi, dan di djoebin ada mengletakan spatoe-spatoe orang prampoean jang bekas dipake." Samentara di laen podjokan, ada disoesoen barang-barang linnen dan laen-laen barang lagi. Samoea itoe ada miliknja orang-orang prampoean jang soeda djadi korbannja ini pendjahat.

Oleh kerna merasa heran jang dalem roemahnja satoe djanda lelaki ada tersimpen bagitoe banjak pakean orang prampoean, maka tatkala Landru poelang, njonja Guillin soeda tanjaken hal itoe dengen melit. Maski djoega njonja Guillin kaloearken pertanjaän-pertanjaän itoe dengen soeara sabar dan tida oendjoek roepa jang tjemboeroean, toch dalem hatinja Landru soeda djadi tida enak. Tapi boeat semboeniken ia poenja pengrasaän itoe, dan djoega aken bikin ilang katjoeriga'annja njonja Guillin, Landru laloe berkata :

„Oh ! djantoeng hatikoe, brangkali kaoe ada kira itoe ada pakeannja orang-orang prampoean katjinta'ankoe. Tapi tida. Itoe samoea ada barang miliknja akoe poenja iboe jang telah marhoem. Djikaloe akoe inget pada iboekoe jang tertjinta, biasanja akoe masoek ka dalem kamar itoe dan pandang segala barang peninggalannja. Disitoelah akoe lantas djadi sedih dan koetjoerken banjak aer mata. Banjak kali djoega akoe berloetoet dan tjioemi roknja iboekoe jang ada tergantoeng di tembok sebagi djoega akoe ada di hadepannja iboe itoe jang tertjinta dan jang sekarang ada bersenang di tempat bakah. Maka djikaloe tida ada perloe apa-apa, djanganlah kitaorang hampirken kamar itoe, dan djangan sekali boeka kontjinja. Pakean-pakean itoe akoe simpen boeat salama-lamanja sebagi peringetan pada iboekoe".

„Njatalah kaloe bagitoe kaoe ini ada satoe anak jang berbakti, Henri, satoe anak jang haroes dapet berkahnja orang-orang aloes jang disoedjoetken oleh kaoe!" kata njonja Guillin dengen hati senang dan tambah tjintanja pada itoe pendjahat, sebab ia kira dengen sabetoelnja jang Landru ada baktiken iboenja bagitoe sanget, satoe hal jang djarang sekali kadjadian pada anak-anak djeman sekarang. Tapi maski djoega njonja Guillin soeda kasih liat jang ia tida menaro katjoerigaän lagi atas dirinja Landru, tapi toch ini pendjahat tetap pikir, bahoea datengnja itoe pertanjaän ada mendjadi satoe alamat jang tiada baik boeat dirinja. Kenapa ia ada berpikir bagitoe, jalah lantaran ia kwatir kaloe-kaloe ini njonja aken omongken itoe hal pada laen orang, maski poen omongan itoe ada satoe poedjian boeat dirinja, tapi itoe kamar resia. . . . . . . . . tetap tida boleh dikatahoei oleh laen orang salaen dirinja sendiri.

Pada itoe saät djoega Landru lantas ambil poetoesan boeat abisken djiwanja ini njonja djanda toewa, maka dengen mesem jang amat manis, ia laloe berkata:

„Harganja segala matjem barang-barang di Parijs tingginja sekarang tida bisa dikata lagi. Berhoeboeng dengen kitaorang poenja berangkat, maka akoe maoe tanja kaoe poenja pikiran, djantoeng hatikoe, apatah tida baek djikaloe kaoe djoeal sadja sakalian barang-barangmoe jang tida perloe dibawa dalem pelajaran? Salaennja kita aken terbebas dari penjewa'an vracht kapal, disini poen kita bisa dapet banjak oentoeng lantaran naeknja harga barang-barang. Kabetoelan sekali akoe ada kenal satoe soedagar jang djoedjoer, maka djikaloe kaoe ada pertjaja, biarlah akoe serahken padanja boeat toeloeng djoealken barang-barang kaoe".

„Betoel sekali Henri!" djawabnja njonja Guillin jang tida sekali merasa dirinja lagi ditipoe.

„Djadi kaoe moefakat dengen nasehatkoe?" tanja lagi Landru boeat dapet kapastian jang lebih tetap. „Marilah kita masoek ka dalem, sebab kaoe moesti bikin satoe soerat kwasa, soepaja si toekang djoeal boleh trima barang-barang dengen mengarti asal-oesoelnja".

Njonja Guillin toeroeti sadja kahendakannja Landru, iaorang laloe masoek ka kamar toelis, dan Landru toelis sendiri itoe soerat kwasa, laloe diteeken oleh njonja Guillin. Dalem soerat kwasa itoe ada menerangken jang Landru dibriken samoea kakwasaän boeat djoeal barang-barang pakean, perabotan roemah, mas inten dan soerat-soerat, aandeel jang ada tersimpen di Bank atas namanja njonja Guillin. Saorang prampoean sebagi njonja Guillin jang tida dapet pladjaran di roemah sekola, tida bergaoelan dengen orang-orang pinter, tentoe sadja gampang kena boedjoekannja satoe badjingan jang bagitoe pande sebagi Landru.

Sembari taro sabelah tangannja di poendak njonja Guillin, Landru-hiboerken hatinja njonja itoe dengen berbagi-bagi omongan manis, seperti ia tjeritaken bagimana enak dalem pelajaran kapal di klas satoe dari Frankrijk ka Australie, bagimana bagoes dan rame kota-kota di Australie, bagimana senang adanja ia poenja pengidoepan sebagi Consul di Australie dan njonja Guillin sebagi njonja consul. Brapa agoeng iaorang nanti rasa djikaloe sasampenja di Australie, iaorang aken disamboet dengen oepatjara oleh pembesar-pembesar di itoe negri, Lebih djaoe Landru tjeritaken lagi sekali tentang ia poenja djasa-djasa pada pamerenta di Frankrijk, hingga ia dapet itoe keangkatan Consul. Pendeknja banjak sekali jang Landru obrolken itoe waktoe. Ini bangsat memang ada poenja satoe kabiasaän, jang djikaloe ia maoe abisken djiwa korbannja, ia selaloe berdaja aken senangin hati korbannja dengen berbagi-bagi tjerita jang sedep dan manis.

Djaroem lotjeng berkiser sedikit-sedikit ka sabelah atas, dan dengen tida terasa lagi lotjeng itoe mengoetaraken djam sabelas malem.

„Besok malem kita nanti djalan-djalan dengen auto, djantoeng hatikoe," kata Landru. „sinar boelan di ini malem ada amat terangnja, tapi sajang soeda laat sekali. Kaloe sadja besok tjoeatja di langit tida diganggoe oleh pedoet item, brapa senang kitaorang nanti rasaken hawa oedara jang sedjoek di taman Bois de Bologne. Ja, kitaorang moesti rasaken boeat pengabisan kali kasedepannja pengidoepan kota Parijs, kerna tida lama poen kitaorang nanti tinggalken ini negri jang tertjinta dengen kitaorang poenja doah soepaja tatah laloehoer kita ini dilindoengi Allah dan dapet kamenangan dalem paprangan."

Itoe omongan jang bagitoe manis, jang membajangken adanja kasenangan di hari esok, siapakah bisa taoe kaloe ada poenja arti laen, kaloe itoe ada mengandoeng antjeman bahaja maoet atas djiwanja njonja Guillin? Maka ini njonja djanda, sebagimana soeda dibilang, lantaran pikirannja saderhana, soeda lantas sadja trima adjakan itoe dengen girang hati dan tida menaro katjoeriga'an satoe apa. „Oh ! kaoe ada baek sekali, Henri. Akoe merasa senang aken trima adjakan kaoe. Soenggoe sajang sekarang soeda laat". katanja njonja Guillin.

„Ja, tapi tida terlaloe lama kaloe kita menoenggoe sampe besok," kata lagi Landru. „Dan sekarang, sabelonnja kitaorang masoek tidoer, kita moesti minoem doeloe sedikit limonade", sembari kata bagitoe, Landru laloe bangoen dan hampiri medja buffet, dari mana ia ambil satoe botol limonade dan doea glas. Sakoetika lamanja Landru awasin pada itoe satoe glas, kamoedian ia taro glas itoe di hadepannja njonja Guillin, samentara satoe glas lagi ia taro di hadepannja.

Koetika itoe limonade soeda di'isiken di glas, lantas andru silaken njonja Guillin minoem, oendangan mana lantas di toeroet oleh ini njonja. Landru awasin itoe njonja minoem sampe abis satengah glas, kamoedian baroe ia minoem sendiri.

Tida brapa lama lagi, njonja Guillin, brangkali lantaran aoes, soeda minoem lagi itoe limonade sampe katinggalan saperampatnja, sama sekali ia tida rasaken apa-apa jang berbeda. Samentara itoe njonja masih sadja mengobrol, Landru sambil ladenin bitjara, ada perhatiken djalannja lotjeng, jang itoe waktoe soeda menoendjoeki poekoel sabelas koerang lima minuut. Semingkin djaroem pandjang dari itoe lotjeng menghampiri pada djam sabelas, kapalanja njonja Guillin semingkin ia rasaken berat, boeloe matanja tergantoeng, samentara pada pipinja jang soeda moelai sedikit kempot, ada kaliatan titik mera dan poetih.

„Eh! Henri, akoe rasaken badankoe tida enak".

„Begimana rasanja?"

„Badankoe moelai dingin !"

„Brangkali kaoe minoem itoe limonade terlaloe banjak".

„Tapi matakoe berkoenang-koenang, peroetkoe sakit dan. Oh! toeloeng Henri ! . . . . Henri ! . . . . toeloeng !" Lagi sekali njonja Guillin bertreak, tapi melinken bisa kaloearken perkataän: „Bang. . . ."

Moeloetnja lantas maoe terkantjing, tangannja mengepel keras, ia rebah dan bangoen lagi dari korsi pandjang, matanja mengawasi hingga melotot pada Landru, tangannja jang terkepel memoekoel kasana sini. Pemandangan ada ngeri sekali. Moeloetnja soeda penoeh boesa, samentara badannja bergoemeter, tida lama lagi badan itoe djadi lemes, sapoeloe minuut kamoedian djadi kakoe.

Njonja Guillin soeda djadi mait.

Landru awasken itoe samoea kadjadian dengen hati adem, dan koetika ia liat njonja Guillin djato tergoeling di oebin dengen menglisahan, ia tinggal mesem dengen peloek tangan, hingga kaloe kita inget, jang ini manoesia ada mempoenjai hati sama seperti kitaorang, tentoelah kita maoe bilang bahoea hatinja itoe mempoenjai darah boeas dan kedjem sebagi binatang oetan.

Siapa djoega jang liat njonja Guillin tergoeling-goeling mengglisahan lantaran menanggoeng itoe sakit jang heibat, nistiaja merasa ngenes dan tida tahan aken tida mengaloearken aer mata dengen deres. Aken tetapi ini binatang Landru tida sekali berobah paras moekanja.

Bebrapa saät kamoedian koetika maitnja itoe njonja soeda moelai dingin, Landru laloe angkat dan pondong masoeken dalem itoe kamar jang kamarennja njonja Guillin ada liat banjak tersimpen pakean prampoean.

Landru lemparken mait terseboet di kamar itoe, lantas ia kontji lagi pintoenja kamar dan teroes ia balik lagi ka kamar makan. Itoe doea glas bekas tadi iaorang minoem limonade, ialantas tjoetji dengen hati-hati. Sahabisnja kasih ilang segala tanda-tanda dari ia poenja perboeatan, ia lantas balik kombali ka dalem itoe kamar dimana maitnja njonja Guillin ada terletak di tempat gelap. Disitoe ada satoe koffer besar, jang berselang bebrapa hari njonja Guillin ada bawa boeat moeatin ia poenja barang-barang. Sekarang koffer itoe Landru boeka dan isiken maitnja njonja Guillin ka dalem koffer terseboet. Ia kontji koffer itoe dengen rapi, kamoedian ia berdiri boeat tjari pikiran. Koetika ia soeda dapet satoe pikiran jang baek, ia lantas kontji lagi itoe kamar dan dengen satoe auto ia lantas berangkat ka Parijs dan masoek di restaurant „L'Abbey," dimana ia laloe isiken peroetnja dengen berbagi-bagi makanan jang ledzat dengen ditemenin oleh bebrapa prampoean boengah rajah.

Seperti ia soeda djandji, bagitoelah besok malemnja Landru soeda dateng kombali ka Vernouillet aken adjak maitnja njonja Guillin naek auto: Landru ambil itoe koffer besar jang berisi maitnja njonja Guillin, naekin ka dalem auto, dan di loear koffer itoe ia tempelken satoe adres seperti : „NJONJA JACQUES

Station Arcachon,

Aken diambil sendiri.

Biasanja pada djam sabelas doea politie agent aken djalan meronda di itoe tempat. Landru tida maoe berangkat pada sabelonnja itoe doea politie liwat di depan pekarangannja, maka sasoedanja liat itoe doea politie agent liwat dan tida kaliatan lagi, Landru jang itoe waktoe soeda seleseh berdandan seperti chauffeur, jaitoe pake badjoe gombrang, pet jang pake merk auto, koemis dan djenggotnja jang ia koesoetin, lantas kaloearken autonja dari kamar garage, teroes berangkat dengen tida ada jang liat, menoedjoe ka djoeroesan Neuilly. la sampe di ini tempat pada djam poekoel toedjoe pagi.

Dengen tida kwatir nanti ada jang kenalin, Landru laloe bawa itoe koffer besar ka station Quai d'Orsay, dimana ia toenggoeken sampenja trein penoempang jang aken berangkat ka Biskaye. Sasoedanja ia kirim itoe koffer dan liat koffer itoe dinaekin ka atas wagen, ia laloe berangkat poelang dengen hati senang.

Apa jang orang dapetken dalem itoe koffer di station Biskaye, itoelah tentoe pembatja soeda taoe. Sampe Landru di hadepken pada pengadilan, baroelah ini resia djadi terboeka.

Orang taoe pada esokan paginja dengen pakean jang perlente Landru soeda dateng di Bank, dimana dengen kasih oendjoek ia poenja soerat kwasa, ia soeda dapet trima oewang simpenan dan soerat-soerat aandeelnja njonja Guillin. Itoe waktoe djoega Landru lantas djoeal kombali soerat-soerat aandeel terseboet dengen harga bagoes.

Dengen oewang pendapetan memboenoeh dan merampas seperti ditoetoerken di atas, Landru laloe berangkat poelang ka roemah istrinja dan berdiam disitoe sakoetika lamanja, tapi dengen tida poetoesken kerdja'annja boeat dapet poela korban-korban baroe.

Istrinja tentoe sadja tida taoe dari mana ini soeami soeda bisa gondol oewang bagitoe banjak, ia melinken taoe soeaminja ada satoe soedagar jang pande, jang mempoenjai peroentoengan bagoes aken saban-saban bawa poelang banjak oewang dari oentoeng berdagang. Tjoba ini istri taoe jang sang soeami ada satoe pemboenoeh, satoe djahanam jang paling kedjem, brangkali ia nanti boenoeh samoea anak-anaknja dan boenoeh djoega dirinja, soepaja dirinja tida dapet noda dan anak-anaknja tida katjepretan darah bangsat dan pemboenoeh.

Itoe advertentie jang soeda tarik njonja Guillin djadi korbannja ini bangsat, dan jang tjontonja sebagimana di atas kita soeda moeatken, masih teroes dimoeat dalem soerat-soerat kabar, dan koetika sampe sakian lama tida dateng lamaran lagi dari njonja- njonja hartawan, maka boenjinja ia robah lagi. Dalem ini advertentie jang baroe Landru seboetken dirinja ada satoe toean tanah (Landheer) jang belon beristri, ingin bikin kenalan dengen satoe djanda bekas istrinja officier-officier jang mempoenjai sedikit pentjarian, blakangan djikaloe satoe sama laen soeda tjotjok, iaorang nanti menikah.

Dengen ini advertentie, betoel djoega akalnja Landru djadi berhasil, kerna tida lama ia lantas trima soerat lamaran dari satoe njonja djanda, Elise Laporte namanja, satoe prampoean moeda jang tjantik djoega dan belon brapa lama ditinggal mati oleh soeaminja, satoe officier jang meninggal doenia dalem paprangan di Elzas dan ada tinggalken kakajaän pada istrinja kira-kira doearatoes riboe francs.

Pertemoean pertama jang Landru bikin pada ini njonja djanda, jalah di kamar-makan dari Grand Hotel de Paris.

Parasnja ini njonja djanda jang tjantik dan oesianja jang masih moeda, sama sekali tida di perdoeliken oleh Landru, hal jang diperhatiken, jalah tentang oewangnja ini prampoean, jang djikaloe Landru bisa dapetken, ia pikir kakajaännja aken bertambah bebrapa tingkatan. Kabetoelan sekali itoe waktoe kantongnja Landru soeda kempes, lantaran oewang jang ia dapetken dari hartanja njonja Guillin soeda djadi moesna di medja djoedi dan di tempat-tempat plesiran. Maka haroes dibilang Landru soeda moelai merasa aoes lagi dengen oewang darah.

Dari sebab merasa pentingnja pengidoepan dengen oewang di itoe waktoe, maka Landru soeda berdaja lebih-lebih dari jang soeda boeat pikat hatinja ini njonja djanda. Dalem ia poenja bitjara, dalem hal berlakoe di hadepannja ini njonja, Landru salaloe berdaja boeat oendjoek jang ada satoe toean sopan, satoe toean jang biasa idoep di antara orang-orang bangsawan, satoe toean jang berhati djoedjoer, teroes terang dan moerah hati. Dari sebab ini badjingan betoel-betoel pande sekali boeang tingka, maka tidalah heran kaloe njonja Laporte jang soeda rasaken tida enaknja hidoep sendirian, djadi merasa katarik hati dengen ini lelaki toewa, tapi rasanja boleh di boeat temen hidoep.

Tida berselang lama lagi sedari Landru bikin itoe pertemoean jang pertama, Landru lantas oendang ini njonja dateng di ia poenja „Sarang Pertjinta'an" di Vernouillet dan di ini roemah, marika laloe doedoek makan sore, malemnja iaorang plesir nonton opera di Schouwburg jang termashoer.

Tempo baek boeat kasih laloe ini prampoean berharta, belon djnega didapetken oleh ini badjingan, sedeng oewangnja soeda moelai djadi abis. Maka pada tanggal 15 October, sebab kapoetoesan akal dari mana ia bisa dapetken oewang, Landru telah dateng ka roemahnja njonja Guillin almarhoem.

Prampoean toewa jang djadi djoeroe-pendjaga roemahnja njonja Guillin, soeda tanjaken dengen melit kemana adanja ia poenja njonja, pertanjaän mana didjawab dengen pande oleh Landru :

„Kaoe tanjaken njonjamoe dengen bagitoe melit, njatalah kaoe ada satoe hamba jang satia. Njonjamoe ada dalem kaslamatan, tida kakoerangan soeatoe apa. la minta akoe sampeken trima kasihnja pada kaoe dan kirimken djoega ini sedikit oewang aken goena kaoe membeli sedikit pakean", dan sembari berkata bagitoe Landru laloe kaloear sedikit oewang dari kantongnja dan serahken itoe pada si prampoean, jang trima oewang itoe dengen mengoetjap banjak trima kasih. „Brangkali kaoe belon dapet taoe jang kaoe poenja njonja aken menikah dengen satoe Consul jang tida brapa hari nanti berangkat bersama-sama soeaminja itoe ka Australie. Itoelah djoega lantarannja maka akoe dateng kamari aken ambil ia poenja barang-barang perabotan soepaja waktoe berangkat ia tida djadi ripoeh lagi".

Sebagi djoega ia poenja roemah sendiri, dengen tida kwatir apa-apa Landru masoek ka dalem dan preksaken barang-barang perabotannja sama sekali. Selagi ia memereksa bagitoe, jang poenja roemah sewahan laloe dateng dan menagi oewang sewa roemah jang belon dibajar. Kerna Landru taoe kaloe ia tida bajar itoe oewang sewa roemah nistjaja ia tida nanti bisa angkoet itoe barang-barang, maka ia lantas bikin beres itoe oetang, panggil satoe vracht-auto dan teroes angkoet barang-barang perabotan roemah itoe. Antara barang-barang perabotan itoe, Landru ada dapetken satoe peti jang berisi bebrapa doos barang bingkisan jang terbikin dari mas dan perak, jaitoe miliknja njonja Guillin jang terboenoeh, atawa jang ia dapet dari anteran familienja koetika ia bikin hari tahon atawa bekas bingkisan waktoe ia menikah. Koetika Landru kamoedian ditangkep, itoe souvenier masih ada katinggalan bebrapa doos, berikoet satoe pak ramboet palsoe jang orang kenalken ada djadi miliknja njonja Guillin.

Demikianlah asal-oesoelnja maka orang taoe bahoea linjapnja njonja Guillin jang sakoenjoeng-koenjoeng, ada berhoeboeng dengen kadjahatannja ini bangsat, kerna adanja itoe boekti-boekti ramboet palsoe dan souvenier miliknja itoe njonja.

Itoe barang perabotan jang Landru angkoet, lantas dibawa ka tempat lelang, dimana Landru soeda dapet banjak oewang dari pendapetannja lelang, sebab itoe waktoe segala matjem barang ada naek harga.

Djadi Landru soeda abisken boekan sadja djiwanja njonja Guillin, tapi djoega harta banda dan oewangnja itoe njonja.

Sedeng Landru ada bagitoe beroentoeng dalem kadjahatannja dengen lakoeken itoe pemboenoehan pada njonja Guillin, adalah dajanja boeat abisken djiwanja njonja Laporte dan rampas miliknja tida berhasi malah djoega dirinja Landru ampir-ampir diseret oleh politie ka dalem pendjara. Antara kadjahatan-kahadjahatan jang dilakoeken oleh Landru, ia rasaken dalem oeroesannja njonja Laporte ada paling berbahaja.

Sigra djoega pembatja nanti bisa dapet taoe kadjadian itoe dengen apa jang kita toetoerken di laen bagian dari ini hikajat.