Landru/Bagian 4
BAGIAN IV.
Pertjobahan meratjoenin.
—————
Landru ada poenja satoe tabeat jang djikaloe ia hadepken satoe bahaja, kaadahannja tida djadi beroba atawa goegoep dan djoega boeat ambil poetoesan boeat bela dirinja ia ada sebet sekali.
Koetika ia dapet liat itoe doewa orang mengandang di tengah djalanan boeat tahan autonja, Landru lantas kaboerken kandarannja dan terdjang itoe doea orang jang terpaksa moesti lompat ka pinggir soepaja tida kena katoebroek.
Lampoenja auto itoe belon djoega dipasang, hingga Landru bisa laloeasa teroesken perdjalanannja zonder dapet dikenalken.
Lagi doewa kilometer sampelah Landru di djalanan besar dan dengen sebet Landru pasang lampoenja, Kamoedian kaboerken lagi itoe auto ka djoeroesan kota Parijs.
Itoe doea orang jang telah saksiken bagimana Landru lakoeken kadjahatannja dan soeda tjoba dengen tida berhasil aken tahan autonja itoe bangsat, laloe rapportken hal itoe pada politie.
Politie lantas dateng di tempat terseboet, dimana orang telah dapetken satoe tasch tangan, pakean, topi, enz. Politie dan detectief jang lakoeken papreksaän disitoe tida dapet laen boekti jang menjataken orang soeda keniaja satoe djiwa. Maka politie melinken bisa taro sangkahan bahoea orang jang tinggalken pakeannja disitoe, soeda sengadja memboenoeh dirinja sendiri, samentara itoe auto jang liwat, boleh djadi kabetoelan sadja berdjalan disitoe. Maski bagitoe politie tinggal teroes oesoet dan tjari kaloe-kaloe betoel saorang prampoean soeda memboewang diri disitoe. Ampat hari kamoedian betoel djoega politie telah katemoeken maitnja nona Nina Langlois sedikit djaoeh dari tempat dimana ia soeda dianjoetken oleh Landru.
Samentara Landru alias Raymond Lenoir tetiron di Chateau des Grandes Vignes pada ampat hari berselang, soeda dapet trima oewang warisarinja nona itoe jang ia boenoeh, banjaknja ampat riboe tiga ratoes francs.
Dengen radjin politie masih teroes oesoet tentang kamatiannja itoe nona, dan soeda dapet katerangan djoega jang itoe nona soeda perna bikin perhoeboengan dengen saorang lelaki nama Raymond Lenoir, orang lelaki mana politie tjari koeliling tempat sampe berboelan-boelan, tapi tida djoega dapet dikatemoeken. Sampe Landru ditangkep, baroelah politie bisa dapet tebak bahoea itoe Raymond Lenoir dan Henri Landru ada satoe orang.
Di waktoe sorenja pada sasoeda trima itoe oewang warisan dari nona Langlois, Landru kaliatan sedeng riasken dirinja di kamar rias dalem ia poenja roemah di Rue des Petits-Champs, jang sebagimana orang taoe, dari Rue de la Paix orang bisa djalan menemboes ka bagian sabelah belakang dari Palais Royal.
Di kamar riasnja ini, Landru telah pake-pakean costuum warna aboe-aboe dan sembari hadepken satoe katja besar, Landru awasken dirinja, bikin rapi djenggot dan koemisnja. Sabentar sore roepanja Landru aken trima koendjoengannja satoe tetamoe jang tentoe djoega bakal datengken kaoentoengan besar padanja, maski ia moesti kerdjaken poela satoe kadosahan.
Pembatja tentoe belon loepa jang Landru masih iket keras ia poenja perhoeboengan tjinta dengen njonja djanda Labord-Linie, dan paling belang belakang pada itoe djanda dari satoe Luitenant, jaitoe Madame Gabrielle Nadaud, doea prampoean mana Landru soeda takdirken bakal mati ditangannja, tapi lantaran terhalang oleh satoe perkara, ia terpaksa oeroengken niatannja boeat abisken djiwanja itoe deoa prampoean.
Koetika itoe hari ia pergi ka Lyon, Landru tida loepa menoelis soerat pada njonja Labord-Linie, pada siapa ia kabarken dengen perkatain-perkatain manis jang oleh kerna adanja satoe lantaran, ia tida bisa lantas balik ka Parijs.
Apa jang Landru sedeng atoer dalem roemahnja ini, soenggoe ada satoe perkara jang menarik hati.
Sasoedanja klaar berias dengen perlente, Landru laloe pasang lampoe, kamoedian ia hampirken satoe lemari dalem tembok, dari mana Landru kaloearken satoe botol ketjil jang tertoetoep rapet sekali.
Isinja itoe botol ketjil, adalah ratjoen jang berbahaja sekali, barang mana Landru soeda dapet beli dari ia poenja satoe sobat bekas student ilmoe doktor jang tida bisa tamatken pladjarannja lantaran terlaloe banjak tenggak minoeman keras.
Dalem itoe lemari tembok salaennja itoe botol ketjil, Landru ada taro djoega satoe revolver, satoe kedok item dari soetra, bebrapa barang laen lagi jang biasa digoenaken oleh pendjahat-pendjahat di ini djeman.
Ini lemari dalem tembok ada dibikin oleh Landru sendiri, dan ia soeda kerdjaken itoe dengen bagitoe terliti, hingga sekali poen satoe detectief jang pande, tida gampang bisa doega bahoea dalem tembok itoe ada berisi satoe lemari ketjil jang menjimpen resia kadjahatannja Landru.
Sasoedanja kontji kombali lemari itoe, Landru laloe bawa itoe botol jang berisi barang tjaer warna koening di bawahnja satoe lampoe. Ia liat isinja botol itoe masih ada tigaperampat banjaknja. Kamoedian ia bawa botol itoe ka medja makan, dimana soeda teratoer barang hidangan boeat doea orang bersantap.
Dari atas itoe medja Landru ambil satoe tjangkir, toewang sedikit aer panas, kamoedian toewang isinja itoe botol, jang satelah djato di aer panas, minjak jang ditoewangken itoe djadi boejar menjampoer pada aer.
Soepaja oewap dari itoe ratjoen tida naek dan masoek di hidoengnja, Landru ambil satoe setangan dan toetoepin hidoeng itoe, samentara tangannja ia soeda lapisin dengen saroeng tangan. Kamoedian ia ambil satoe glas, laloe pindahken isinja tjangkir itoe ka dalem glas terseboet, toetoepin moeloetnja glas dengen satoe lembar kertas vloei.
Di atas buffet ada satoe basi besar jang berisi penoeh dengen boeah anggoer jang seger-seger dan membikin mengiler pada siapa jang liat, sedeng satoe basi lagi ada penoch dengen boeah appel jang djoega ada kaliatan seger-seger dan manis roepanja.
Doea matjem boeah itoe Landru ambil dan taro dideketnja lantas ia ambil satoe spuit ketjil, kasih masoek ratjoen jang tadi ia taro di glas, lantas meoeloetnja spuit itoe jang tadjem dan lantjip sabesar djaroem, ia toesoek pada itoe boeah, hingga dengen bagitoe ia bisa kasih masoek rajoen terseboet ka dalem boeah zonder meroesaki koelitnja boeah terseboet. Koetika oedjoengnja spuit itoe ia kasi kaloear, lantas ia ambil satoe sikat jang aloes sekali, dan dengen ini sikat ia bikin baek kombali itoe lobang bekas ditoesoek, hingga sama sekali tida kaliatan bekasnja.
Sahabisnja itoe Landru ambil sapotong koelit poehoen, masoekin koelit itoe dalem glas jang berisi aer ratjoen, dan koetika ratjoen itoe soeda njerep, lantas koelit poehoen terseboet digosokin pada sendok soep jang disediaken boeat tetamoe. Itoe aer ratjoen lantas kering sendirinja di sendok itoe, hingga tetamoenja Landru nanti goenaken itoe zonder merasa tjoeriga satoe apa.
Samoea barang-barang jang ia tadi goenaken boeat taro ratjoen terseboet, seperti glas, pompa ketjil, sikat dan itoe koelit poehoen, demikian poen itoe servet dan saroeng tangan, ia koempoelken djadi satoe, kamoedian ia lemparken ka dalem dapoer perapian.
Sasoedanja rapi atoer persadia'an dalem itoe kamar, ia laloe boeka samoeanja djendela dan pintoe, soepaja hawa oedara jang seger bisa masoek kombali.
Dengen sabar Landru laloe menoedjoe ka kamar tidoernja, dimana ia laloe tjoetji djenggot, koemis dan tangannja dengen saboen carbol.
Sapoeloeh minuut kamoedian Landru kaloear dari itoe roemah, ia menoedjoe ka djalanan Rue du Mail, dimana ia mampir pada satoe toko dan beli satoe krandjang kembang harga sapoeloe francs, lantas ia balik poelang kombali ka roemahnja, atoer kembang itoe di medja makan soepaja djadi kaliatannja menggirangken pada ia poenja tetamoe prampoean jang lagi ditoenggoe datengnja.
Djam satengah anem koki toewa, djanda dari toekang kebon nama Amelot, jang bekerdja pada Landru satiap pagi dan sore, jaitoe melinken njapoe, bersihken perabotan, tjoetji pakean dan bawa makanan, telah dateng di itoe roemah dengen bawa djoega makanan boeat Landru sebagimana biasa.
Pada baboe ini Landru berkata: „Sabentar sore aken dateng disini satoe njonja jang bakal toeroet bersantap sama akoe. Akoe serahken ini oeroesan pada kaoe njonja, dan akoe harep kaoe bisa atoer sampe rapi dan menjenangken”
Trés bien m'sieur!” djawabnja itoe baboe, jang lantaran soeda lama kerdja pada Landru, djadi ia gampang menyarti apa jang dikahendaki oleh ini pendjahat,
Dengen tida kaloearken laen-laen perkata'an, lantas itoe baboe toewa atoer barang hidangan jang ledzat-ledzat.
Koetika lotjeng mengoetaraken djam toedjoe malem, lantas di loear pekarangan ada kadengeran soearanja auto jang dibrentiken. Landru tjepet-tjepet toeroen dari tangga loear dan teroes boekain pintoenja auto, dari mana ia sangkel toeroen satoe prampoean satengah toewa jang roepanja masih tinggal imanis, jaitoe djanda dari satoe officier: Fransch jang soeaminja telah meninggal doenia dalem paprangan.
Dengen dipimpin oleh Landru, njonja itoe naek di tangga dengen roepa girang, samentara Landru jang dari tadi soeda bersadia aken berlakoe manis dan hormat, laloe berkata:
„Oh! Gabrielle, djantoeng hatikoe, njatalah kaoe pegang betoel djandjimoe. Akoe soeda djengkel menoenggoeken kadatenganmoe, kerna akoe rasaken itoe tempo jang akoe toenggoei en ada terlaloe lama, aken tetapi ach, kaoe toch sekarang: Soeda dateng, akoe merasa girang sekali. Adoeh! Gabrielle jang boto, kaoe betoel masih pande berdandan. Akoe tentoe merasa bangga pada orang-orang di Parijs djikaloe sabentar, sahabisnja bersantap, kitaorang pergi nonton Opera jang bikin pertoendjoekan di Casino de Paris Sahabisnja dari sitoe, kitaorang nanti plesir sampe poewas ..........” Sembari berkata bagitoe, iaorang soeda berdjalan naek tangga sampe di dekat kamar makan, di atas medja soeda sadia segala matjem barang hidangan jang ledzat-ledzat. Sembari peloekin djantoeng hatinja jang bakal didjadiken korban, Landru tjioemin itoe njonja djanda beroelang-oelang dan peloek dengen keras badannja orang seperti ia tida bisa terlepas lagi dari itoe djantoeng hati jang ia tjintaken bagitoe keras, satoe klakoean jang pada saban kali ia oendjoek bagitoe, hatinja prampoean lantas djadi melengket padanja.
Njonja Gabrielle biarken dirinja dipeloek dan bibirnja jang merah dengen sepoean ditjioemin beroelang-oelang, sebab itoelah jang ia maoe, maka hatinja djadi merasa girang sekali berada di hadepannja Landru, jang dalem doegaannja tentoe Landru ada tjintaken ia dengen keras.
,,Apa kaoe sasoenggoenja ingin nonton, Raymond?’’ tanja njonja djanda itoe, ,,tapi akoe tida kapingin. Akoe lebih senang tinggal disini bersama kaoe, soepaja kita dapet tempo lebih banjak aken bitjaraken kitaorang poenja oeroesan. Apa kaoe tida ada laen-laen oeroesan lagi di loear?”
,,Tida, Gabrielle,’’ djawab Landru dengen soeara manis. ,,Dan kaloe kaoe rasa baik aken tinggal sadja dalem roemah, akoe poen selaloe toeroeti kahendakmoe, kerna apa jang bisa menjenangken hatimoe, itoelah jang akoe nanti berboeat.
Koetika iaorang soeda doedoek mengadepi itoe medja makan jang soeda sarat, Landru laloe soegoeken padanja minoeman anggoer jang manis, aken tetapi Njonja Gabrille tampik dengen soeara manis, dan minta sadja aer dingin jang ia toewang sendiri dari satoe karaf. Landru tida bisa tjegah dan djoega tida brani oendjoek ia poenja rasa tida senang kerna kwatir nanti maksoednja dapet ditebak.
Persantapan laloe dimoelai. Orang moelai dahar soep lebih doeloe. Njonja Gabrielle soeda pegang itoe sendok soep jang soeda diratjoenin, samentara Landru awasin dengen hati kwatir, kaloe-kaloe itoe sendok poen ditampik dan minta ditoekar jang baroe. Aken tetapi njonja djanda itoe tida berboeat demikian, hanja teroes tempelken sendok itoedibibirnja, hingga lantaran merasa girang, Landru ampir-ampir lepas sendoknja sendiri, baik djoega ia tjepet robah sikapnja, hingga tida kentara di matanja itoe njonja djanda.
Landru merasa maksoednja tida brapa djam lagi aken terkaboel djikaloe itoe njonja dahar teroes itoe boeah-boeahan jang soeda diratjoenin, ia nanti meninggal doenia tida membri tanda soeatoe apa dibadannja, samentara doktor-doktor poen tida aken bisa menjataken apa betoel itoe njonja meninggal lantaran diratjoenin.
Kaloe itoe njonja soeda meninggal doenia, Landru kombali aken trima satoe warisan jang besar djoega.
Sebagimana dl atas soeda ditoetoerken, Landru belon brapa lama dapet bikin pertjintaän dengen ini njonja Gabrielle Nadaud, djanda dari satoe Luitenant, jang Landru soeda boedjoek hingga itoe njonja maoe serahken ia poenja soerat kwasa pada ini badjingan. Pertama kali ia berkenalan sebagi satoe soedagar, dan berhoeboeng dengen kasoesahannja itoe njonja djanda dalem oeroesan oewang, Landru soeda kasih pertoeloengan padanja, sebab liat itoe njonja ada poenja harta banda jang boleh didjadiken satoe tanggoengan.
Sasoedanja kasih itoe satoe pertoeloengan, Landru madjoe satoe tindak lagi, jaitoe tawarken dirinja boeat djadi kwasa dari sakalian harta bandanja djanda itoe. Sebab liat Landru mendeser teroes dan beroelang-oelang minta menikah padanja, maka njonja Gabrielle tida merasa kwatir lagi boeat teeken itoe soerat kwasa jang menjataken bahoea ia serahken antaro harta bandanja pada Landru. Djadi kaloe itoe njonja djanda meninggal doenia, hartanja aken djato ditangannja Landru, sebab toch njonja Magar itoe tida mempoenjai anak sebagi ahliwaris.
Iaorang masih teroes doedoek bersantap dengen hati senang, Landru tertawa sebab ia bakal dapet harta dan dapet sampeken maksoednja aken bikin itoe prampoean pinda ka laen doenia, samentara njonja Gabrielle tertawa-tertawa sebab sangka ia baka dapet satoe soeami jang berharta djoega, dan djoega tida terlaloe djelek, malah perlente dandanannja.
Lantaran pande oendjoek moeka manis, berlakoe hormat dan pande kaloearken perkataän-perkataän merdoe jang ia dapet pahamken dari boekoe sairannja Musset dan Vigny, maka tida heran kaloe saban prampoean jang Landru inginken, salaloe kasampean maksoednja. Bagitoelah soeda terdjadi dengen njonja Gabrielle jang lantaran merasa bagitoe resep dengen tingka lakoe dan omongannja ini pendjahat, soeda toeroeti sadja segala kahetndakannja.
Achir-achir iaorang soeda seleseh bersantap, tapi iaorang moesti makan boeah, maka Landru lantas boeroe-boeroe bangoen dan ambil itoe doea basi jang berisi penoeh dengen boeah appel dan anggoer jang seger-seger, laloe ia taro doea basi itoe di depannja njonja Gabrielle.
,,Marilah tjobain ini anggoer, djantoeng hatikoe!’’ kata Landru dengen soeara lemah-lemboet.
,,O! tentoe! Ai, betoel bagoes ini anggoer,’’ kata njonja Gabrielle. Dan sembari berkata bagitoe, ia soeda petik satoe rentjeng, laloe masoekin satoe bidji ka dalem moeloetnja.
,,Ja,’’ djawabnja Landru. ,,Akoe sendiri tida bagitoe soeka dengen boeah-boeahan, aken tetapi boeat kaoe poenja kasenangan, akoe soeda perloeken tjari anggoer jang begini seger dan bagoes.”
,,Kaoe baik sekali, Raymond!’’
Itoe koetika nene Amelot laloe masoek ka dalem kamar makan sembari bawa kopi, dan koetika pintoe kamar ia soeda toetoep kombali, laloe kadengeran pintoe loear di ketok. Itoe nene laloe boeroe-boeroe dateng ka loear dan dapetken saorang prampoean jang seboetken namanja njonja Juvanon.
Ini orang jang tida dioendang dateng pada waktoe malem jang bagitoe penting boeat Landru, ada mendjengkelin betoel pada ini badjingan, tapi ia lantas dapet satoe pikiran, kerna ia inget itoe njonja Juvanon ada satoe tooneelspeelster (anak bangsawan opera), jang berselang belon brapa lama Landru soeda perna bertemoe di St. Denis berhoeboeng dengen satoe oeroesan pendjoealan barang permata.
Landru pikir tida ada bahaja apa-apa aken kasih itoe doea prampoean bertemoe satoe sama laen, maka koetika njonja Juvanon masoek, ia laloe adjar kenal pada njonja Gabrielle.
,,Doedoek njonja, kaoe tentoe dateng disini boeat oeroesan dagang?’’ kata Landru.
Itoe njonja djawab betoel dan kasih oendjoek jang ia ingin berlaloe dari itoe kamar lantaran merasa koerang senang berada di hadepannja laen prampoean. Tapi Landru silaken itoe njonja doedoek, dan djandji djikaloe njonja Gabrielle soeda abis dahar kopi, iaorang nanti bitjaraken itoe oeroesan dagang berdoeaän. Tapi maskipoen moeloetnja ada kata bagitoe, hatinja kapingin soepaja ini njonja lekas pergi.
,,Apa jang akoe hendak bitjaraken, sama sekali boekan resia,’’ kata itoe njonja. Akoe melinken ingin kasih taoe pada toean, berhoeboeng dengen akoe poenja niatan berangkat dari Parijs dalem tempo tida brapa lama lagi, maka akoe ingin soepaja kaoe soeka toeloeng djoealken akoe poenja harta banda. Toean Jaques Bijard saja poenja sobat, dan toean djoega tentoe kenal padanja, ada kasih taoe pada akoe jang toean ada poenja banjak kenalan boeat toeloeng djoealken dengen lebih tjepet akoe poenja harta banda dengen harga bagoes. Akoe sengadja dateng begini waktoe boeat dapet taoe apa toean tida merasa halangan dengen permintaän akoe ini, jang djikaloe akoe soeda dapet katetepan dari toean, akoe tida tjari laen orang boeat minta pertoeloengannja".
„Dengen senang hati, njonja, akoe soeka toeloeng djoealken itoe barang-barang," djawab Landru dengen hati girang.
Landru ada kenal baek pada Jacques Bijard jang ada djadi sobatnja itoe njonja, kerna ini Jacques poen ada saorang jang dikenal baik dalem golongan pendjahat.
Sabetoelnja Landru tida brani ganggoe barang miliknja njonja Juvanon, kerna ini njonja ada poenja banjak kontjo di antara orang-orang jang soeka berglandangan malem. Tapi sekarang, oleh kerna njonja Juvanon sendiri jang tawarin hartanja pada Landru. maka ini bangsat dapet pikiran nekat aken kangkangin harta itoe.
Samentara iaorang lagi doedoek beromong-omong, mendadak ada kadengeran soearanja telefoon jang berboenji di sabelahnja itoe kamar makan. Landru tjepet-tjepet hampiri telefoon itoe.
Orang jang bitjara di telefoon ada safoe nona jang baroe sadja bertjere dengen soeaminja, Ini nona jang biasa dipanggil Marie Combes ada tinggal di Rue de Basano, belon brapa lama ia ada lamar advertentienja Landru, jaitoe advertentie tjari njonja sebagimana modelnja kita soeda terangken doeloean. Djadi ini nona ada Landru poenja toendangan jang ka lima jang soeda kena kadjebak dengen advertentienja itoe djahanam.
Pada tiga minggoe jang laloe Landru soeda boedjoekin itoe nona aken menikah, sebab ifoe nona ada poenja oewang simpenan kira-kira lima riboe francs. Sebab masih ada korban laen jang perloe moesti disingkirkan lebih doeloe, maka Landru belon ada sempet boeat lakoeken kadjahatannja pada itoe nona, tapi soepaja itoe korban tida terlepas dari tjengkeremannja, maka ia toelis satoe soerat boeat wartaken bahoea berhoeboeng dengen ia poenja oeroesan dagang, maka boeat samentara waktoe ia tida ada di roemah. Soeda berselang tiga minggoe sedari itoe nona trima soeratnja Landru, dan seperti orang jang tida sabar atawa merasa sanget aoes, itoe nona laloe telefoon ka roemahnja Landru boeat dapet katahoei apa Landru soeda balik atawa belon. Sebagimana soeda ditoetoerken, itoe waktoe Landru sendiri jang sahoetin itoe telefoon, maka koetika ia dapet bitjara pada itoe nona, ia laloe kaloearken soearanja jang aloes, dan tjeritaken jang ia baroe sadja balik dari perdjalanannja ka Brussel, kamoedian ia oendang itoe nona aken besok sore dateng ka roemahnja boeat minoem thee, oendangan mana ada ditrima dengen girang hati oleh itoe nona, maka telefoon laloe ditaro lagi sasoedanja marika bitjara sedikit boeat laen-laen oeroesan.
Sembari berdjalan ka kamar makan, Landru tjatet dalem ia poenja boekoe notitie djam brapa ia bakal trima koendjoengannja itoe nona.
Koetika Landru sampe di kamar makan, dengen sanget terkedjoet ia liat njonja Juvanon sedeng pegangin serentjeng boeah anggoer, dan dengen roepa sedikit maloe ini njonja laloe berkata pada Landru:
„Akoe harep kaoe tida goesar, tapi itoe boeah anggoer jang roepanja begitoe seger, soeda bikin akoe merasa mengiler, hingga zonder toenggoe kaoe poenja permisi akoe soeda ambil ini satoe rentjeng dan soeda dahar dengen enak."
Sakoetika lamanja Landru tida bisa berkata apa-apa, tapi boeat semboeniken ia poenja rasa kaget, ia soengging satoe senjoem di pipinja. Achir-achir ia berkata:
„Silahken njonja, makan lagi ini boeah".
Landru tida pikirken poela apa jang bakal kadjadian dengen itoe doea njonja jang soeda makan begitoe banjak boeah anggoer jang teratjoen, apa jang Landru pikirken, jalah bagimana ia moesti sadiaken djalan soepaja oewangnja itoe njonja lantas bisa djato di tangannja sabegitoe lekas marika berdoea soeda meninggal doenia lantaran teratjoen.
Maka sasoedanja bertjakepan dengen kotjak, Landru laloe oendang, njonja Juvanon dateng di laen kamar boeat bitjaraken lebih djaoe tentang itoe pendjoealan barang. Pembitjarahan itoe tida lebih lama dari sapoeloe minuut, kerna sasoedanja dapet kanjataän jang ia tida bakal dapet banjak oewang, lantas Landru bikin pendek itoe omongan, hampirken poela pada njonja Nadaud. Pada kadoea prampoean itoe Landru adjakin aken pergi nonton pertoendjoekan opera jang maen di gedong Casino de Paris, tawaran mana ditrima dengen girang hati oleh itoe doea prampoean. Koetika pertoendjoekan abis dimaenken, Landru anferken itoe doea prampoean poelang ka masing-masing tempatnja, samentara dalem hatinja berpikir, apakah ja poenja ratjoen bisa berhasil apatah tida dalem satoe minggoe jang bakal dateng.
Sahabisnja anterin itoe doea prampoean, Landru laloe poelang ka roemahnja dan masoek tidoer dengen njenjak dengen tida pikirken kadosahan jang ia soeda berboeat.
Esokan sorenja, sebagimana ia soeda djandjiken, nona Marie Combes dateng mengoendjoengi, kadatengan mana ada ditrima dengen penoeh rasa tjinta oleh Landru, jang maski poen oesianja soeda tinggi, aken tetapi itoe waktoe ia kaliatannja banjak lebih moeda lantaran dandanannja amat perlente.
Dalem pertemoean itoe Landru soeda goenaken segala daja boeat bikin itoe nona djatoh tjinta padanja, dan sebagimana jang ia harep, semoea telah terkaboel. Itoe nona jang oesianja banjak lebih moeda dari Landru, soeda peloek Landru koetika hendak perpamitan poelang.
Esokannja Landru poelang ka roemah istrinja sendiri aken liat keadaan anak-anaknja. la berdiam di roemah itoe lima hari lamanja, lantas ia balik ka roemahnja di Rue des Petits-Champs, di roemah mana ia dapetken satoe soerat jang terkirim oleh njonja Gabrielle Nadaud, boenjinja soerat itoe ada seperti begini:
**
„Hari Rebo akoe tida bisa dateng pada kaoe. Akoe telah dapet sakit . . . . . . . sakit pajah sekali. Doktor bilang akoe dapet demem Spanjol. Datenglah tengokin akoe — Gabrielle".
**
Satelah abis batja itoe soerat, Landru mesem sebagi iblis, dalem hatinja tertawa keras, kerna ternjata ia poenja maksoed kasampean djoega. Njonja Gabrielle soeda moelai diserang oleh ratjoen jang tersimpen dalem itoe boeah. Tida lama lagi tentoe itoe njonja meninggal doenia. Dan bagimana dengen njonja Juvanon? Itoe poen ada dipikirken oleh Landru. Landru pikir tida halangan aken loeloesken permintaännja njonja Gabrielle jang ampir menoetoep mata, soepaja ia poenja dateng tengoki si sakit, membri satoe djalan poela aken toetoep kadasahannja.
Dengen satoe taxi sabentaran sadja Landru soeda sampe di roemahnja njonja Gabrielle Nadaud. Satoe njonja djoeroerawat dari roemah sakit boekain pintoe dan Landru lantas menanja:
„Bagimana kawarasannja njonja?"
„Oh! njonja sakit paja," kata itoe djoeroerawat. „Sabentar doktor dateng lagi. Baroesan doktor baroe sadja berangkat. Njonja masih teroes ngatjo dan doktor larang orang dateng menengoki".
„Aken tetapi njonja sakit apatah ?" tanja Landru dengen roepa poera-poera heran dan kwatir. Njonja dapet sakit demem Spanjol jang keras sekali. Penjakit itoe soeda menjerang dalem peparoe. Ada sedikit harepan boeat njonja bisa semboeh".
Landru gojang-gojang kapala sebagi orang jang merasa amat menjesel. Dan koetika hendak berlaloe dari itoe roemah, ia pesen pada itoe djoeroe-rawat aken saban hari kasih kabar telefoon padanja. Dalem hatinja Landru merasa amat girang jang harepanja soeda deket terkaboel.
Tiga kali satoe hari Landru ketok telefoon ka roemahnja njonja Gabrielle Nadaud aken menanjaken pri-kawarasannja njonja itoe, dan saban kali njonja djoeroe rawat kabarken, penjakitnja njonja Nadaud djadi semingkin berat.
Delapan hari lamanja njonja Nadaud menanggoeng itoe sakit jang amat sengsara. Lardru saban kali dapet itoe kabar merasa amat girang. Pada hari ka sembilan, koetika Landru ketok telefoon dari roemahnja di Rue des Petits-Champs, ia dapet djawaban jang mengedjoetken dari njonja djoeroe-rawat. Njonja Nadaud jang soeda disangkaken oleh Landru bakal binasa dengen koeasanja itoe ratjoen, achir-achir moelai semboeh, dan doktor soeda kasih kapastian tida brapa hari lagi njonja terseboet aken djadi semboeh.
Landru banting itoe telefoon dan moeloetnja mengoetoek.
Landru merasa penasaran sekali jang maksoednja soeda djadi gagal. la merasa dengen berkerdja sendirian memang maksoed jang besar kabanjakan gagal. Tjoba ia ada poenja kontjo sebagi prampoean djoeroe-rawat boeat poera-poera djaga njonja Gabrielle,
tapi diam-diam tambahin ratjoen pada obatnja, nistjaja maksoednja aken tida bisa gagal lagi. Tapi Landru sabaliknja pikir, kontjo itoe satoe waktoe bisa menjilakaken djoega dirinja, maka ia merasa lebih baik bekerdja sendiri. Djadi tabeatnja Landru ada laen sekali dari Charles Peace atawa Fantomas. Pendjahat-pendjahat jang terseboet belakangan ini. selaloe koempoelken kontjo boeat lakoeken kadjahatan-kadjahatan jang besar.
Sapoeloe minuut kamoedian sasoedanja trima kabar jang tida menjenangken tentang kawarasannja njonja Gabrielle jang soeda moelai semboeh, Landru lantas berangkat ka roemahnja njonja Juvanon aken tjari taoe apakah pada ini njonja poen ratjoennja tida memakan.
Koetika ia ketok pintoe roemahnja njonja terseboet, satoe prampoean jang berpakean itam laloe boekaken pintoe. Meliat itoe pakean, Landru lantas mengarti apa jang soeda kadjadian dalem itoe roemah, aken tetapi ia poera-poera tida tape dan oendjoek roepanja seperti orang berkwatir:
„Apa akoe boleh bertemoe dengen njonja Juvanon, Madame ?" tanja Landru.
Sajang sekali kaoe dateng kablakangan, tuean. Kamaren akoe poenja soedara prampoean jang kaoe hendak katemoeken sekarang, soeda meninggal doenia lantaran sakit demem Spanjol".
„Meninggal doenia? Ja, Allah. . . . . . ." dan sembari berkata begitoe Landru laloe angkat kadoea tangannja jang dirangkepin dan oetjapken bebrapa perkata'an jang tida kadengeran boeat berdaoh pada rohnja jang meninggal.
„Kasian kaoe poenja soedara," kata lagi Landru. „Apa doktor tida bisa toeloeng? Kenapa kaoe tida panggil doktor jang pande?"
„Apa kaoe tida taoe, toean? Kitaorang soeda pagggil bebrapa doktor jang pande, dan samoea tida berhasil. . . . ."
„Apa maoe dikata. . . . . ." kata lagi Landru.
Sasoedanja menjataken doekanja hati satoe sama laen, Landru laloe berpamitan pergi, samentara dalem hatinja berkata: Njonja Juvanon soeda makan lebih banjak itoe boeah anggoer, maka ia meninggal doenia dengen tida bisa tertoeloeng oleh doktor. Njonja Gabrielle tida makan banjak anggoer, maka doktor masih kaboeroe toeloeng".
Landru toenda pikirannja fatsal njonja Gabrielle, apa jang sekarang ia lagi ichtiarken, jalah daja boeat poenjaken hartanja nona Marie Combes.
Sorenja koetika abis poelang dari roemahnja njonja Juvanon Landru soeda doedoek berpeloekan dengen nona Marie Combes dalem roemahnja ini pendjahat di Rue des Petits-Champs. Landru soeda peloek dan tjioem beroelang-oelang bibirnja itoe nona jang mera manis, boleh djadi lantaran soenggoe bernapsoe pada katjantikannja nona itoe, beda pada laen-laen prampoean jang Landru melinken berlakoe birahi boeat iket hatinja itoe prampoean, samentara dalem hatinja pandang renda pada prampoean itoe. Itoe waktoe Landru ada pake ia poenja badjoe smoking jang pas betoel pada badannja jang tegep, samentara pada lobang kantjing sabelah atas, ia ada pake satoe kembang jang haroem baoenja. Ramboetnja ia beresken hingga litjin betoel, samentara koemis dan djenggotnja ia pale dengen perlente betoel. Nona Marie Combes jang tida sekali taoe bahoea Landru ada satoe badjingan, pemboenoeh prampoean dan pengeret jang sanget kedjem, soeda merasa resep betoel pada klakoean dan bitjaranja ini pendjahat jang sanget pande. Laen dari bagitoe, Marie Combes soeda pertjaja betoel pada bitjaranja Landru jang soenggoe-soenggoe aken menikah. Apakah jang membikin Marie Combes merasa halangan boeat menikah pada ini lelaki toewa, jang maski soeda banjak oemoer, tapi ada poenja banjak harta dan perlente. Apakah koerang nona-nona moeda jang tjantik soeda sengadja djoeal dirinja pada Baron-baron atawa Graaf, soepaja bisa idoep senang dengen oewang tjoekoep? Samentara Marie Combes ada pikir, Landru toch ampir tida beda dengen itoe Baron-baron dan Graafgraaf, toch kakaja'annja Landru, sebagimana ini pendjahat ada sombongken, ada bermiljoenan. Dari itoelah nona Marie Combes djadi ambil poetoesan aken loeloesken perminta'annja ini lelaki toewa boeat menikah.
Kadoea orang itoe bertjanda sampe djam sapoeloe, pada waktoe mana Landru laloe adjakin nona Combes pergi ka Grand Cafe. Disitoe marika doedoek mendengeri soearanja muziek jang merdoe. Samentara muziek sedeng kasih denger lagoe „Pelit Mari, petite femme," Landru lagi pikirken tjara bagimana ia moesti bikin abis djiwanja ini nona jang ada mempoenjai harta anem riboe francs. la poenja ichtiar boeat abisken djiwanja njonja Gabrielle soeda gagal, samentara orang jang boekan diniatken, jaitoe njonja Juvanon, soeda gantiken njonja Gabrielle poelang ka acherat, maka Landru pandang hal itoe ada sebagi satoe alamat tida baik boeat dirinja.
Landru belon sempet ambil poetoesan, tatkala mana sakoenjoeng-koenjoeng Landru bangoen dari tempat doedoeknja, bajar harganja minoeman dan lantas adjak nona Marie Combes berlaloe dari itoe tempat.
Itoe nona dengen merasa heran toeroet berlaloe dari itoe tempat, tapi Landru tida maoe bilang apa sebabnja ia mendadak berlaloe dari itoe Cafe. Tapi jang mendjadi lantaran aken Landru berangkat dengen tergoepoe-goepoe, jalah ia dapet pandang dari djaoe pada toean Friedmann, iparnja njonja Cuchet jang Landru soeda bakar maitnja.
Belon selang brapa lama toean Freidmann soeda toelis soerat pada Landru ka Vernouillet boeat menanjaken keada'annja njonja Cuchet, soerat mana oleh Chef Postkantoor di tempat terseboet soeda dikirim lebih djaoe pada adresnja Landru di Parijs. Soerat itoe baroe kamaren Landru dapet trima. Boenjinja ada sanget tida menjenangken, sebab itoe ipar soeda tida pertjaja katerangannja Landru jang njonja Cuchet soeda berangkat ka Engeland. Malah djoega toean Freidmann ada kata dalem soeratnja jang ia tida nanti brenti tjari katerangan dimana adanja njonja Cuchet, atawa kaloe ia mati, siapa pemboenoehnja.
Sebagi penoetoep dalem soeratnja, toean Freidmann ada toelis begini:
„Koendjoengannja akoe poenja istri jang paling blakang ka toean poenja villa di Vernouillet, tatkala toean tida ada di roemah, ia soeda boeka satoe koffer, dalem mana ia soeda dapetken berbagi-bagi matjem rijbewijs boeat satoe auto dengen tertoelis roepa-roepa
nama. Laen dari itoe ia ada katemoeken djoega bebrapa pakean prampoean dan banjak soerat-soerat familie dari orang-orang prampoean bersama lagi satoe toempoekan soerat-soerat. Apakah artinja itoe samoea ? Akoe harep bisa dapet katerangan dari kaoe tentang hal itoe.
„Anak dan iboe soeda linjap dengen mendadak, zonder satoe manoesia dapet taoe, katjoeali kaoe saorang !
„Kaloe kaoe teroes tida kasih djawaban atas ini soerat, akoe terpaksa minta pertoeloengannja politie. Brikenlah kita katerangan jang lengkap sabelonuja liwat tiga hari.
„FREIDMANN".