Landru/Bagian 3
BAGIAN III.
Resianja satoe dapoer.
—————
Datengnja bebrapa pertanjahan dari itoe orang politie jang sakoenjoeng-koenjoeng, bikin Landru tiada bisa kasi djawaban lantas, aken tetapi sebagi satoe penjahat jang tiada kakoerangan akal, lantas ia mengarti, bahoewa hal itoe bisa terbitken katjoerigaännja itoe orang, politie.
Dengen sebet ia lantas roba sikepnja, hal mana sasoenggoenja ada loear biasa.
,,Dan? Apa toean maoe?’’ tanja Landru dengen hati berdebar-debar, aken tetapi roepanja ada tetep dan sabar.
,,Akoe moesti bikin papreksaän dalem ini roemah’’, djawabnja itoe orang politie. ,,Ada dateng pengadoean, jang di waktoe tengah malem kaoe ada bakar apa-apa jang berbaoe boesoek. Meunier, toekang potong heiwan di Rue de Mantes ada tjerita, bahoewa pada djam doewa malem koetika ia bersama istrinja sedeng berdjalan poelang dan liwat disini, ia telah dapet liat asep mengeboel dari kaoe poenja lobang asep, sebagi djoega ada barang apa-apa jang dibakar dengen keras. Akoe dikirim kamari boeat bikin papreksaän’’.
Landru tertawa dan angkat poendaknja.
,,Toean poenja sobat, itoe toekang potong heiwan, tentoelah soeda kliroe’’, djawab Landru, ,,sebab akoe tiada ada bakar apa-apa. Masoek, toean, kaoe sendiri nanti bisa saksiken. Djalan teroes ka dapoer boeat bikin papreksaän dan apa jang akoe perloe terangken, adalah pada djam doewa akoe sedeng tidoer’’.
,,Ada doewa orang lagi jang mengadoe, antara siapa ada teritoeng djoega satoe thabib di Triel’’, kata itoe orang politie. ,,Inilah jang djadi lantaran maka akoe diprenta dateng aken bikin papreksaän dalem ini roemah’’.
,,Baek’’, kata Landru dengen mesem, ,,itoe ada djadi kaoe poenja kewadjiban, akoe mengarti, dan akoe silaken kaoe lakoeken kwadjibanmoe itoe. Roemah ini ada terboeka boeat kaoe’’. Landru lantas berdjalan di moeka dengen diikoeti oleh itoe orang politie, lantas marika berdoea menoedjoe ka tempat dimana tempo hari itoe pemboenoehan jang kedjem ada dilakoeken, aken tetapi sebagimana soeda ditoetoerken, samoea tanda-tanda soeda dihilangken oleh itoe pendjahat.
Landru soeda bisa bikin dirinja djadi sabar, hal mana memang ada perloe di matanja itoe politie.
,,Siapa lagi ada tinggal dalem ini roemah?’’ tanja itoe orang politie.
,,Akoe poenja istri dan anak lelaki Andre!’’ djawab Landru dengen lantjar.
,,Dan dimana adanja marika itoe sekarang? Boleh djadi marika bisa tetepken kaoe poenja katrangan, jang mana, memang ada perloe sekali.’’
,,Tentoe sadja marika bisa dan maoe terangken, aken tetapi menjesel ini waktoe kadoewa orang itoe boeat samentara waktoe ada berdiam di Parijs aken menenamoe sama sobat-sobatnja.’’
,,Dan kapan marika itoe dateng kombali?’’
Sakoetika lamanja Landru tinggal diam, sebab ini ada satoe pertanjahan jang bisa bikin dirinja djadi berada dalem bahaja. Ia dapet kanjatahan jang ini orang politie hendak desek dirinja dengen pertanja’an-pertanja’an jang kaloe tiada didjawab dengen ati-ati, tentoelah ia bakal alamken perkara jang tiada enak.
Sama sekali Landru tiada doega, jang iloe asep dan itoe baoe di waktoe tengah malem ada menarik orang poenja pikiran!
Landru kamoedian kasi katerangan dengen sabar, bahoewa njonja Cuchet dan anaknja ada koendjoengin ia poenja soedara prampoean di roemah siapa marika berdoea ada menginep.
,,Besok brangkali marika aken balik,’’ kata Landru, ,,dateng kombali kaloe kaoe maoe, toean, boeat landjoetken papreksaän.’’
Djikaloe politie di Parijs tanja katrangan pada njonja Friedmann apa betoel ia poenja soedara-prempoean ada menginep padanja, tentoelah njonja itoe aken djawab bahoea njonja Cuchet tiada ada menginep disana. Dan kaloe hal itoe politie tanjaken pada Landru, ia ini soeda bersadia aken djawab bahoea ia soeda bertjektjokan sama njonja Cuchet dan kasoedahannja itoe njonja berlaloe dari roemahnja dengen gondol djoega ia poenja barang-barang. Achirnja itoe politie soeda seleseh bikin papreksaän di roemah itoe dengen tida dapetken boekti atawa apa-apa jang bisa tjotjok dengen itoe sangkahan, maka dengen lakoe hormat itoe politie lantas permisie berpamitan,
Sabegitoe lekas itoe orang politie berlaloe, Landru tjepet singkirken itoe kembang-kembang jang soeda di taro di atas medja dan lantas bawa itoe ka dalem kebon dimana kembang-kembang itoe ia lantas lemparken. Berhoeboeng dengen terdjadinja koendjoengan itoe jang sama sekali ia tida doega, Landru anggep ada berbahaja boeat trima lagi ia poenja bakal korban jang kadoea di Vernouillet.
Dengen tjepet Landru naek di atas autonja dan menoedjoe poela ka Neuilly. Disana ia masoekin kandarannja ka kamar auto, kamoedian ambil satoe taxi dan dateng lagi ka roemahnja itoe njonja djanda. Dengen roepa jang girang Landru lantas sadja tjioemin tangannja njonja Labord-Linie dan kata begini.
,,Akoe menjesel sekali, djantoeng hatikoe, jang akoe moesti bertaoeken pada kaoe, bahoewa baroesan akoe ada trima kabar tida enak boenjinja. Penjerangan jang dibikin dengen satoe pesawat-oedara di Belleville kemaren malem, soeda bikin sala satoe familiekoe djadi binasa.
Maka sekarang akoe moesti lekas berangkat ka Lyon boeat bri pertoeloengan pada istri dan familienja.
,,Astaga!’’ kata itoe njonja djanda. ,,Tadi pagi djam tiga akoe poen ada denger soeara letoesan bom djato dan akoe dapet kabar tida koerang dari doewapoeloeh orang jang soeda binasa’’.
,,Betoel, dan anampoelueh orang dapet loeka’’ djawab Landru. ,,Menjesel sekali jang akoe moesti bikin kaoe djadi kapiran, djantoeng hatikoe, aken tetapi dalem kaädahan begini, tentoe djoega kaoe bisa maäfken padakoe, boekan?’’
Landru awasin itoe njonja djanda dengen matanja jang tadjem, hingga kabanjakan orang prampoean jang diawasin bagitoe djadi binggoeng, atawa sama sekali tiada taoe apa jang ia moesti berboeat.
,,Tentoe sadja, Henri jang manis!’’ djawabnja itoe njonja djanda dengen soeara doeka. ,,Kapan kaoe balik kombali?’’
,,Itoelah akoe tiada bisa tentoeken lebih doeloe. Tapi akoe harep lagi satoe minggoe, maski sekarang akoe belon brani pastiken. Tapi maski bagitoe, akoe berdjandji aken saban-saban toelis soerat pada kaoe.’’
Sasoedanja kasi tjioeman berkali-kali dan oendjoek pengrasaän hatinja jang penoe tjinta dan setia, Landru lantas tinggalken itoe njonja djanda dan djalan menoedjoe pada istri dan anak-anaknja.
Sebab pertjaja soeami itoe selaloe pergi dan lama baroe poelang lantaran oeroesan dagang, maka itoe istri dan anak-anaknja Landru djadi tida taro katjoerigaän apa-apa pada Landru.
Njonja Landru, satoe prampoean jang djoedjoer, satiap hari ada kerdja keras boeat dapetken sasoeap nasinja, sama sekali tiada taoe tentang adanja itoe ,,sarang pertjinta'an’’ dari ia poenja soeami jang dibikin di Rue des Petits-Champs di loteng katiga. Begitoe djoega njonja Landru tiada taoe tentang adanja itoe roemah mait di Vernouillet jang soeaminja sewa, satoe tempat jang dipake boeat abisken djiwa dan maitnja prampoean-prampoean jang dibawa kasitoe.
Njonja Landru selaloe pandang ia poenja Henri sebagi satoe orang dagang jang radjin dan tjerdik, biarpoen doeloean soeda perna beroeroesan sama Justitie, tapi sekarang ternjata ia ada djadi satoe soeami jang satia dan satoe ajah jang tjinta pada anaknja.
Dalem banjak hal Landru soeka sekali lakoeken pakerdja’an jang melanggar atoeran, sebagi djoega Raspoetin jang terkenal di antero doenia, aken tetapi jang terseboet blakangan ada saorang jang soeka dengen barang perhiasan, kasoeka’an mana djadi lantaran bagi ia poenja bintjana. Landru poen soeka sekali kerdja dengen diam-diam, timbang dengen mateng, tjerdik dan bisa berpikir lebih doeloe sabelonnja berboeat apa-apa.
Djoestroe ini ada satoe tabeat jang banjak kali bisa klaboein hakim-hakim. Kaloe ia tertawa dan bisa bitjara pandjang lebar, itoelah tandanja Landru sedeng atoer bagimana pemboenoehan itoe moesti dikerdjaken dan djikaloe ia tjioem satoe prempoean atawa oesap-oesap ramboetnja prampoean itoe, itoelah satoe tanda jang ia sedeng berpikir brapa francs ia bisa gaet dari itoe prampoean kapan ia boenoeh.
Henri Landru ada terkenal di kampoengnja sebagi satoe soeami jang setia dan satoe ajah jang paling baek, tapi di Parijs ia terkenal sebagi satoe pendjahat jang paling tjerdik dan bebrapa tahon lamanja ia soeda bisa klaboein politie, hingga lantaran begitoe djadi kadjahatannja selaloe tinggal semboeni.
Pada itoe malem jang siangnja soeda terdjadi gledahan di roemahnja di Vernouillet, Landru doedoek makan dengen enak bersama anak-anak dan istrinja. Tatkala istrinja benain medja makan Landru dengen roepa jang sabar isep ia poenja sigaret.
Sakoenjoeng-koenjoeng Landru bangoen dari tempat doedoeknja seperti lakoenja orang jang dapet inget apa-apa dan lantas ia bilang pada istrinja:
,,Djantoeng hatikoe, besok akoe moesti pergi ka Lyon boeat oeroesan dagang, dan rasa lebih baek akoe berangkat dengen trein malem.’’
Sang istri tida menghalangi satoe apa.
Itoe malem djoega Landru sigra brangkat dari Parijs djam 8.35 dengen menengteng satoe koffer dan pada djam lima pagi Landru soeda sampe di Lyon.
Landru sewa satoe kamar di Hotel Terminus jang pernanja ada deket station, di tempat mana, sasoedanja minoem kopi, ia toelis satoe soerat pada Brigadier politie di Mantes, dan namanja politie itoe — tra saorang taoe kenapa diseboet ,,Le Jolie’’. Dalem soeratnja Landru ada bertaoeken bahoea satoe penggawe politie soeda dateng dalem villanja di Vernouillet, hal mana ada sanget bikin hatinja tida senang. Dan lantaran ada oeroesan dagang, maka ia terpaksa moesti berlaloe dari Parijs dengen mendadak dan boleh djadi satoe minggoe lamanja ia tiada ada dalem itoe villa.
Lebih djaoe dalem soeratnja Landru ada toelis begini:
„Akoe soeda bitjara sama itoe agent, jang ia boleh tanjaken
„katerangan pada istrikoe tentang itoe pengadoean, jang soeda
„dimadjoeken lantaran meliat ada asep kaloear dari akoe poenja
„lobang asep di waktoe tenga malem, aken tetapi itoe pembi-
„tjarahan moesti ditoenda, sebab akoe poenja istri dan anak tiri
„boeat oeroesan familie soeda brangkat ka London, brang-
„kali marika aken tinggal disana lamanja ampatblas hari.
„Sabegitoe lekas marika dateng kombali, akoe nanti kabarken
„pada toean, akoe rasa ada perloe aken bertaoeken pada toean
„ini hal sebab akoe poenja berangkat jang mendadak dari
„Vernouillet bisa timboelken toean poenja sangkahan djelek’’. Sasoedanja masoekin ini soerat dalem satoe bus, Landru sigra baringken dirinja boeat satoe djam lamanja. Kamoedian ia djalan-djalan sedikit dan pada itoe malem djoega dengen menoempang trein malem Landru soeda balik kombali ka Parijs.
Jang paling heran adalah dalem boekoe tiatetannja Landru jang ada dipegang blakangan oleh hakim, ada ditoelis ongkos-ongkos dari ia poenja kadatengan di Lyon dengen pake nama ,,Brazilie’’, nama ketjil dari njonja Labord-Linie.
Begitoelah dalem procesverbaal politie ada ditoelis:
Kanjalahan administralienja ada beres.
Ada dibikin tjatetan dari ongkos, pendapetan dan taksiran dari harganja satoe prempoean, sebagimana orang dagang bikin penaksiran pada barang dagangannja: Brapa banjak bisa didapetken kaoentoengan dari ini?
⁂
Landru poenja pertjintaän laen, adalah ditoetoerken sebagi berikoet:
Tempo njonja Cuchet masih idoep, lantaran Landru poenja advertentie-kawin, ini djahanam soeda beroentoeng bisa bikin perhoeboengan sama satoe njonja djanda jang oesianja masih moeda dan pinter, Gabrielle Nanaud namanja. Ia poenja soeami satoe luitenant, soeda binasa dalem paprangan Europa, dan salaennja barang perabotan jang berharga bebrapa riboe francs, njonja djanda itoe tiada ada poenja laen warisan.
Tempo marika soeda bertemoe satoe sama laen, Landru lantas kasi oendjoek tjintanja sembari oesap-oesap ramboetnja itoe njonja sembari berpikir tjara bagimana ia bisa poenjaken kakajahannja itoe djanda.
Dengen teroes-terang itoe djanda mengakoe, bahoewa pengidoepannja ada djelek, tapi ini tiada djadi halangan boeat Landru madjoeken permintaan kawin sama itoe djanda, jang sasoedanja tinggal diam sakean lamanja, achir achir soeda trima itoe tawaran.
,,Akoe voorstel aken lebih doeloe kaoe djoeal sadja ini barang perabotan’’, memboedjoek Landru, ,,berselang satoe boelan akoe poen soeda djoeal perabotan akoe poenja soedara prempoean dengen harga bagoes, dan kaloe kaoe djoega maoe djoeal prabotanmoe, tentoelah kaoe bisa dapet banjak oewang. Dan kaloe kaoe pertjajaken ini oeroesan pada akoe, kave nanti liat akoe bisa oeroes ini dengen berhasil bagoes’’.
Itoe djanda tinggal diam sakoetika lamanja, sebab ia merasa kaberatan boeat lepasken barang-barang jang ada djadi peninggalan soeaminja, sekalipoen di itoe waktoe betoel-betoel ia ada kaperloean dengen oewang.
Dengen tjepet Landru soeda bikin taksiran harganja itoe perabotan.
,,Oleh kerna akoe ada poenja pengartian dalem dagangan begini’’, kata Landru, ,,Maka akoe merasa ada banjak harepan jang ini perabotan bisa dapet harga sampe sapoeloeh riboe francs, aken tetapi haroeslah padakoe kaoe kasiken soerat koeasa, jang menerangken perabotan ini akoe boleh djoeal pada siapa djoega’’.
Kamoedian Landru pegangin tangannja itoe djanda dan tjioemin beroelang-oelang.
,,Tentoe sadja akoe pertjaja pada kaoe dan itoe tawaran dengen senang akoe trima baek’’.
Besokan paginja djam sembilan Landru soeda dateng lagi diroemahnja itoe djanda. Soerat katrangan tentang penjerahan itoe barang perabotan sigra diteeken oleh Njonja Nadaud, jaitoe dengen perdjandjian jang itoe barang perabotan aken tinggal sabegitoe lama dalem itoe roemah sampe ada jang beli.
Dalem lijst dari orang-orang jang telah djadi korbannja Landru, sama sekali tida ada diseboetken namanja njonja Nadaud. Perhoeboengan njonja Nadaud dengen ini pendjahat baroe katahoean, sasoedanja papreksain dalem perkaranja Landru berachir.
Hatinja Landru soeda koentjoeb boeat lantas bawa njonja Nadaud atawa njonja Labord-Linie ka Vernouillet, sebab kaloe ia berboeat begitoe tentoelah politie aken njataken herannja dengen itoe perobahan jang mendadak dalem ia poenja roemah-tangga.
Tjoba kaloe tida begitoe, tentoelah doea prampoean itoe soeda dapet nasib dibakar seperti njonja Cuchet. Dari sebab itoe, pakerdjaän boeat kasi laloe njonja Nadaud dan njonja Labord-Linie dari doenia, ia toenda doeloe sampe di laen waktoe.
Landru itoe waktoe ada perloe sekali pake oewang, maka ia lantas toelis satoe soerat pada satoe prampoean jang oesianja masih moeda, jaitoe nona Nina Langlois namanja tinggal di Grenelle Quartier, pada siapa Landru telah adjar kenal sedari tiga minggoe jang berselang dalem satoe cabaret di Montmartre.
Itoe nona ada anak prampoeannja satoe orang tani jang saderhana, tinggal di deket St. Martin-des-Champs, satoe tempat jang djaoenja kira-kira tigapoeloeh kilo-meter dari Parijs. Berselang bebrapa boelan nona ini ada trima warisan jang tida brapa besar djoemblanja dan dateng di Parijs boeat djoempaken ia poenja soedara prampoean jang soeda nikah.
Pada malem pertama dari itoe perkenalan, Landru soeda dapet taoe bahoewa nona Langlois ada poenja warisan jang berdjoembla ampat riboe tigaratoes francs, dititipken pada Parijsche Bank, maka dalem pertemoean jang kadoewa kalinja Landru lantas kasi voorstel soepaja itoe nona ambil oewangnja boeat maen speculatie.
Nona Nina Langlois soeda kena kapelet oleh kerna merasa resep dengen omongannja Landru jang bagitoe manis dan pande.
Dalem pertemoean jang katiga kali, njatalah nona itoe soeda djato di bawah pengaroenja Landru, kerna ini pendjahat soeda toelis bebrapa soerat jang sebagi madoe manisnja pada itoe nona. Soerat jang tersalin di bawah ini ada berasal dari pengadilan jang preksa perkaranja Landru, dan ini ada djadi satoe boekti bagimana djahat Landru soeda djalanken rolnja sebagi satoe penipoe dan pemikat prampoean.
,,Nonakoe jang baek boedi, ,,Kaoe poenja tindakan, kaoe poenja gerakan dan soeara jang merdoe, selaloe terasa dan terbajang-bajang, sedeng kaoe poenja mata kaoe poenja mesem, ah! hati djiwakoe, biar bagimana djoega akoe tiada nanti bisa loepaken. Akoe merasa beroentoeng sekali jang akoe soeda bisa djadi kaoe poenja sobat, aken tetapi dengen begini akoe masih belon merasa poeas. Jang akoe inginken, ada lebih dari itoe, jaitoe soepaja akoe bisa tinggal teroes djadi kaoe poenja temen hidoep sahingga mati.
,,Apakah goenanja boeat djadi kaoe poenja sobat jang tida berarti apa-apa?
,,Akoe ingin persobatan antara kitaorang ada mempoenjai satoe arti jang dalem dan jang laen orang tiada bisa artiken. ,,Ach, nonakoe jang manis, kaloe akoe inget ini, datenglah kadoekaän jang tiada bisa dihiboerken, oleh kerna merasa kwatir kaloe-kaloe kainginankoe ini tiada terkaboel.
,,Dalem ini doenia jang lebar akoe rasaken tida ada laen hiboeran salaennja kaoe, maka, oh! hati djiwakoe, kasilah djawaban jang sasoenggoenja, apatah kaoe trima sbaek boeat djadi istrikoe jang paling terijinta?
,,Datenglah, nona manis, ja, datenglah besok sore djam tiga di Rue des Petits-Champs, dan djangan bikin akoe menoenggoe lebih lama dari itoe djam.
,,Oh! Nina, djantoeng hatikoe, liatlah akoe puenja katjintaän jang meresep di antero hati dan njawa.’’
Orang jang tjintaken kaoe,
RAYMOND.
Nona Nina Langlois jang soeda mabok dengen obrolannja Landru, sigra kirim kawat berdjandji aken dateng, dan pada djam jang terseboet di atas ia soeda sampe di roemahnja itoe pendjahat.
Landru samboet kadatengannja itoe nona manis dengen roepa jang girang dan sebagi satoe katjintaän lama, Landru lantas sadja tjioemin itoe nona beroelang-oelang, hingga lantaran begitoe, nona Nina Langlois merasa pasti jang Landru tjintaken ia dengen sagenep hati.
Satengah djam kamoedian Landru bawa nona Nina Langlois dengen autonja ka Armenonville dan disini marika doedoek minoem thee sampe matahari toeroen baroelah iaorang poelang kombali.
Tatkala marika soeda sampe di roemah, Landru jang taoe bagimana ia moesti berlakoe pada saorang prampoean, soeda madjoeken lagi akalnja satindak.
Ia tjerita pada itoe nona tentang kakajahannja dan ia poenja villa di Cannes, samentara itoe nona jang soeda keresepan dengen itoe tjerita, soeda trima baek permintaännja Landru boeat djadi ia poenja toendangan.
Landru poenja oemoer jang ada banjak lebih toewa serta djenggotnja jang begitoe pandjang, sama sekali tiada dipikirken oleh nona Nina Langlois. Djoega tida bikin itoe nona djadi kaget koetika Landru dengen manis dan soenggoe-soenggoe minta itoe nona serahken oewangnja.
,,Kaoe poenja oewang di bank sekarang ini tida dapet rente, djantoeng hatikoe, maka akoe soenggoe tiada mengarti kenapa kaoe ada begitoe bodo? Sebagi saorang dagang, kaloe kaoe pertjaja, akoe sanggoep boeat bikin kaoe poenja oewang dalem tempo satoe tahon aken djadi sapoeloeh kali banjaknja. Dalem ini waktoe, sedeng banjak orang ada kakoerangan oewang, soenggoe bodo sekali kaloe orang masi maoe taro oewang pada bank jang tiada kasi boenga.’’
,,Boekan dari sebab akoe tiada mengarti bagimana oewang itoe moesti digoenaken,’’ kata nona Nina Langlois, ,,hanja akoe poenja soedara prampoean dan ipar soeda nasehatken dengen keras aken titipken itoe oewang pada bank’’.
,,Soeda tentoe marika kata begitoe, kerna iaorang boekan orang dagang’’, djawab Landru ,,kaloe samoea orang titipken oewangnja di bank, apatah nanti terdjadi dengen perdagangan? Tida, anak, pertjajalah akoe, dengen oewang kapitaal orang bisa bikin dirinja djadi hartawan, toeroetlah apa jang akoe bilang, djantoeng hatikoe. Kaoe tentoe mengarti, kapan akoe maoe oeroes oewangmoe, itoelah berarti seperti akoe moelai oeroes kakajaänkoe. Tiadakah dalem tempo jang tiada bebrapa lama lagi kitaorang menika? Soenggoe akoe merasa beroentueng sekali bahoea istrikoe jang ketjil dan boto, ada poenja simpenan sendiri jang besar djoega djoemblanja. Dan kaloe kaoe poenja oewang itoe soeda membri hasil jang bagoes di tangan akoe, apatah tida baek boeat kaoe, sebab dengen adanja itoe pengasilan kaoe djadi merdika boeat lakoeken apa jang kaoe maoe?’’
,,Tentoe sadja’’, kata itoe nona jang soeda meresep betoel dengen obrolonnja Landru, hingga dengen tiada berpikir lagi soeda moefaket sadja dengen voorstelnja itoe pendjahat.
,,Sekarang, kaloe kaoe soeda pertjaja betoel padakoe, kasikenlah akoe soerat kwasa boeat trima itoe oewang di bank terseboet, dan sasoedanja itoe akoe nanti dagangin soepaja itoe oewang dalem tempo satoe tahon djadi sapoeloeh kali banjaknja’’, kata lagi itoe pendjahat. Dengen minta itoe soerat kwasa, Landru pikir jang nona Nina Langlois tiada nanti bisa bikin pengadoean apaapa kaloe besok paginja Landru soeda bisa poenjaken itoe oewang. Sedeng begitoe, niatan boeat abisken djiwanja itoe nona poen soeda berada dalem pikirannja.
Itoe nona tinggal diam sakoetika lamanja; ia inget pada nasehat soedara prampoean dan iparnja, aken tetapi achir-achir toch ia djadi moefaket djoega dengen voorstelnja Landru dan begitoelah soerat koewasa dikasiken pada Raymond Lenoir, tinggal di Chateau des Grandes Vignes di Frocout deket Beauvais, satoe nama palsoe jang Landru dapet dari boekoe tjerita.
Landru lantas panggil satoe prampoean toewa toekang bersiken roemahnja boeat djadi saksi dalem itoe oeroesan.
,,Akoe nanti berboeat sabrapa bisa aken bikin itoe oewang djadi sapoeloeh kali banjaknja”, kata Landru aken hiboerken hatinja Nina Langlois. Boeat bikin enak hatinja ia poenja korban Landru laloe adjak Nina Langlois bersantap dalem satoe restaurant jang ada di sapoeternja Palais Royal.
Sebagimana ada djadi maksoednja Landru, kapan ia soeda dapetken itoe soerat kwasa, lantas itoe nona ia hendak singkirken ka laen doenia, soepaja ia boleh trima warisannja. Aken tetapi itoe waktoe Landru liat masi terlaloe siang boeat djalanken itoe maksoed jang kedjem.
Sasoedanja bersantap marika doedoek minoem kopi, blakangan Landru soegoeken djoega pada itoe nona satoe glas likeur, jang lantaran tiada biasa minoem-minoeman keras, maka Nina Langlois soeda djadi mabok. Dalem ka’adahan begini Landru merasa lebih gampang boeat sampeken maksoednja.
Iaorang tinggal teroes mengobrol pandjang pendek sambil tertawa, samentara itoe nona jang boto, djadi mera lantaran minoem-minoeman terseboet. Landru awasin nona itoe dan dalem hatinja menanja apatah tiada baek ia abisken djiwanja Nina Langlois di itoe malem djoega ?
Achirnja ia ambil poetoesan boeat lakoeken itoe kerdjaan dengen sigra.
Sasoedanja berdiam di-itoe cafe sampe djam satengah sapoeloeh, iaorang laloe berangkat poelang dan sasampenja di roemah, Landru lantas kaloearken satoe doos bonbons, laloe soegoeken itoe pada Nina Langlois.
Dengen tida tjoeriga Nina ambil doewa bidji, tetapi Landru paksa soepaja itoe nona ambil lebih banjak. Dalem itoe waktoe Landru selaloe kaloearken perkataän-perkataän jang manis, ia tida loepa djoega aken oendjoek tjintanja. Kadang-kadang Landru menjoebit, tarik dan tjioemin itoe nona beroelang-oelang, tapi samentara berboeat bagitoe ia selaloe perhatiken betoel kaadaännja Nina Langlois, maka ia merasa heran sekali koetika ini pendjahat liat jang itoe bonbons soeda tida bekerdja sebagimana moestinja.
Landru laloe paksa itoe nona ambil lagi itoe bonbons sembari berkata:
,,Ini malem hawa oedara ada panas sekali, ja, djantoeng hatikoe? apatah tiada baek kita djalan-djalan sabentaran dengen auto? Kamoedian akoe nanti anterin kaoe ka roemahnja kaoe poenja soedara prampoean’’.
Nina Langlois toeroetin itoe perminta’an dan satoe perampat djam kamoedian doea orang itoe soeda pasiar dengen auto di sepandjang Place de Ja Concorde.
Di itoe malem oedara ada gelap dan boelan ada tertoetoep dengen awan item, tetapi Landru djalanken autonja dengen kentjeng; di deket desa Beaumont, Landru biloekin autonja ka satoe djalanan jang ketjil dan sepi, pernanja di antara doewa soengei. Sasoedanja djalanken bebrapa meter lagi, auto itoe ia lantas brentiken.
Lampoenja itoe kandaran lantas ia pademken, samentara itoe nona ada tidoer dengen njenjak, kapalanja menjender di poendaknja Landru, sebab itoe bonbons jang beratjoen soeda bekerdja.
Sasoedanja pasang mata dan koeping bebrapa minuut lamanja boeat dapet kapastian apa di itoe tempat ada orang atawa tida, Laudru lantas ambil topinja itoe nona, boeka pakean dan mantelnja.
Pakean terseboet, begitoepoen ia poenja koffer-tangan, Landru taroh samoeanja di pinggir kali dan itoe barang-barang ia atoer begitoe roepa, hingga sasoeatoe orang jang liwat disitoe, nistjaja moesti dapet liat.
Maksoednja Landru berboeat demikian, adalah soepaja orang doega jang itoe nona soeda boenoeh dirinja sendiri dengen njeboer di kali.
Sasoedanja tjopotin ia poenja sapatoe, soepaja tida bisa didapetken tanda-tanda, Landru sigra pondong itoe nona jang sedeng pangsan, kamoedian ia berdiriken di tanah, soepaja telapakan kakinja itoe nona djadi njata di betjek.
Satelah itoe Landru pondong itoe nona ka pinggir soengei dan anjoetken dalem aer jang sedeng mengalir deres. Sasoeda seleseh kerdjaken itoe perboeatan jang terkoetoek, dengen sabar Landru doedoek kombali dalem autonja, dan dengen tida pasang lampoe lagi ia djalanken autonja. Tapi sakoetika itoe djoega doewa orang lelaki mendadak moentjoel dari tempat jang gelap dan kaokin Landru boeat brentiken autonja.