Landru/Bagian 15
BAGIAN XV.
Nasibnja Njonja Pascal.
———
Dalem Landru poenja boekoe tjatetan ia ada toelis tentang njonja Pascal:
„Pasca: roepanja manis, kaliatannja moeda. Pake mantel dan tapi vilt besar."
Di sabelah bawah ia ada toelis tanggal 15 April dan d bawahnja ini tanggal ia ada toelis angka: 5 h. 15, toelisan mana ia maksoedken: Djam lima 15 minuut sore, jaitoe tempo korban itoe ia abisken djiwanja.
Njonja Pascal soeda binasa djiwanja lantaran tida mace denger nasehat soedara prampoeannja. Sabelonnja njonja Pascal menikah, dan sabelonnja ia berangkat ka Gambais, soedara prampoeannja ada kasih nasehat aken lebih baek ia djangan djadi menikah dan ada berbahaja aken toeroet itoe lelaki berangkat ka Gambais, kerna soedara ini ada dapet denger apa-apa tentang itoe orang jang berdjenggot item dan mata tjelong. Aken tetapi koetika njonja Pascal dateng ka Gambais dan liat kasenangannja itoe villa, demikian poen kabaekannja Landru, ia soeda tertawaken itoe soedara prampoean jang terlaloe banjak tjoeriga. Salaennja njonja Pascal rasa jang Landru ada saorang jang pantes-pantes, djoega njonja Pascal ada pikir jang dirinja sampe tjerdik, kerna pengidoepannja di tempo doeloe jang banjak tjatjat ada mengasih ia pengadjaran bagimana moesti perhatiken kasoekäännja lelaki dan bagimana haroes dapet taoe lelaki jang baek atawa djahat. Tapi ini sekali njonja Pascal njata soeda liat dengen kliroe pada Landru.
Pada soeatoe pagi di tanggal 5 April, njonja Pascal ada madjoeken permintaän pada Landru aken djalan-djalan ka Houdan, hal mana dengen tida banjak rewel soeda ditoeroet oleh ini badjingan.
Di Cafe du Commerce, satoe waroeng kopi jang saderhana marika berdoea doedoek minoem thee. Sabagian dari itoe waroeng kopi ada didjadiken tempat maen biljart. laorang beli djoega hebrapa barang makanan dan koetika soeda poelang ka roemah, njonja Pascal laloe sadiaken barang santapan, samentara Landru berkerdja dalem ia poenja garage.
Disitoe ia ambil satce botol anggoer mera dan sasoedanja boeka perop dari itoe botol, sigra ia ketesin tiga poeloe tetes barang tjaer jang berwarna mera tanah dari satoe botol ketjil. Itoelah ada saroepa ratjoen jang sanget djahat, barang mana Landru simpen dalem satoe lemari ketjil bersama satoe boekoe jang berkalimat: „Tjampoeran ratjoen di djeman doeloe kala." Boekoe dan ratjoen itoe kamoedian soeda didapetken oleh politie sasoedanja Landru ditangkep.
Sasoedanja itoe botol dikotjok pergi dateng, ia laloe bawa ka kamar makan dan taro di atas buffet, la laloe naek ka loteng dan ambil satoe botol anggoer anjou, satoe matjem minoeman jang Landru biasa minoem kapan doedoek dalem cafe-cafe.
Koetika marika soeda doedoek bersantap, Landru silaken korbannja minoem satoe glas anggoer mera.
„Akoe sendiri aken minoem satoe glas anjouwijn," kata Landru.
„Soekoer kaoe tawarken akoe anggoer mera. Lucien," kata njonja Pascal dengen senjoem manis dan hati girang. „Akoe tida nanti minoem anggoer anjou, sebab terlaloe keras boeat akoe."
Njonja Pascal laloe minoem abis sagelas, tapi sapoeloe minuut kamoedian ia lantas berkata :
„O! akoe mabok sekali! Apa boleh djadi lantaran itoe anggoer, Allah panas goer? Adoeh! tenggorokankoe rasanja. . . . .panas sekali, seperti kabakar. Ach! akoe soeda kena makan ratjoen......!
„Kaoe edan!" Itoe pengrasa'an tentoe dateng lantaran kaoe poenja pikiran sendiri dan hatimoe jang limboeng. . . . . ."
„Tida. . . . . . .!" treak lagi njonja Pascal.
Landru antepin itoe njonja bertreak dan kamoedian rebahken kapalanja di atas medja makan. Itoe badjingan ambil satoe cigaret dan isep itoe dengen keboelken asepnja ka oedara. Samentara menoenggoeken djiwanja itoe njonja sampe djadi abis, Landru awasken moekanja itoe korban dengen mata tida berkesip. Badannja ini njonja ada koeat, ratjoen itoe tida bikin ia teroes mati mengglisahan. Landru ada sedikit djengkel, ia ingin sekali itoe korban lekas abis djiwanja, sebab di Parijs masih ada menoenggoe satoe nona tjantik jang ia perloe dateng temenin lagi.
Dari kamar makan njonja Pascal masih ada tenaga aken naek ka loteng dengen dipimpin oleh Landru. Beroelang-oelang njonja Pascal minta Landru panggilin doktor dan ini bangsat bilang ia soeda minta pertoeloengannja satoe orang tani jang dekat itoe roemah aken toeloeng panggilin doktor, tentoe tida brapa lama doktor itoe dateng. Tapi sampe djam poekoel lima pagi itoe doktor jag diharep datengnja tida moentjoel, kerna Landru melinken bitjara djoesta sadja, samentara njonja Pascal soeda djadi pajah sekali. Bebrapa saät lagi, sasoedanja menanggoeng sakit jang amat sengsara, achirnja itoe njonja meninggal doenia.
Landru antepin maitnja itoe njonja di kamar sampe hari soeda djadi malem lagi, tatkala mana ia laloe boekaken antero pakeannja itoe korban, bawa mait terseboet ka roemah batoe jang berdiri di belakang kebon, jaitoe tempat jang Landru biasa potong maitnja ia poenja korban-korban. Disitoe maitnja njonja Pascal poen dipotong-potong dan dimasoeken dalem karoeng, betoel seperti Landru soeda berboeat pada maitnja njonja Collomb dan nona Marie de Layons. Pakeannja itoe njonja ia toempoekin di atas dapoer dan teroes ia bakar. Samoea tanda-tanda ia laloe singkirken, hingga tida ada saketes dara orang bisa dapetken bekasnja. Koetika soeda djaoe malem dan djalanan samoea soeda sepi, Landru laloe masoeken itoe mait dalem auto, lantas kontji samoea pintoe roemah dengen rapi, dan djalanken autonja menoedjoe ka soengei de Eure, jaitoe satoe tempat jang djaoenja doeapoeloe kilometer dari Gambais dan letaknja di antara Charpont dan oetan du Chandon. Landru boeang itoe mait jang soeda antjoer dipotong-potong ka dalem itoe soengei, jang lantas djadi tenggelem ka dasarnja jang dalem.
Dari sitoe ia tida balik lagi ka Gambais, hanja berdjalan teroes ka Parijs. Djam sabelas ia soeda sampe di Parijs, ditrima dengen penoeh kagirangan oleh nona Fernande Segret.
„Apa kaoe taoe kenapa akoe baroe poelang begini malem, djantoeng hatikoe?" tanja Landru pada itoe nona.
„Oh! tida, soeamikoe jang manis. Kaoe tentoe soeda pergi oeroes daganganmoe dan poelang begini wakioe dengen banjak kaoentoengan."
„Ah! kaoe satoe prampoean jang tjerdik, kaoe soeda bisa tebak dengen djitoe. Betoel sekali dalem bebrapa hari jang laloe akoe soeda dapet banjak kaoentoengan dari dagangankoe. Sekarang marilah kitaorang pergi ka restaurant aken doedoek makan minoem boeat ini peringetan."
Esokannja Landru pergi sama Caillard dan djoeal barang-barang miliknja njonja Pascal dengen harga tigaratoes ampatpoeloe frank.
Sedari itoe waktoe Landru idoep manis bersama nona Fernande Segret. Sering-sering ia anter ini nona tetira ka Gambais, itoe tempat jang ini nona soeka sekali. Banjak kali Landru tinggal ini nona sendirian dalem itoe gedong djikaloe la moesti oeroes pentjariannja.
Kadang-kadang ia tida poelang, lantaran moesti oeroes dengen lantas pendjoeal motorfiets dan auto-auto tjoerian, dari dagangan mana ia dapet banjak oentoeng, hingga ia bisa idoep teroes dengen itoe nona Fernande Segret sampe di boentoetnja boelan December.
Pada itoe boelan, dengen kasih kenal dirinja sebagi soedagar barang-barang perabotan, ia dapet tempel satoe juffrouw, Marchadier namanja, satoe prampoean jang dapet didikan baek dan baroe beroemoer tigapoeloe tahon. Ini njonja ada sewaken kamar-kamar di Rue St. Jacques.
Ini njonja ada tjerita pada Landru jang ia ingin djoeal barang-barang perabotannja.
Njonja Marchadier doeloe ada satoe prampoean jang soeka tjari hasil di loearan dengen semboeni, tapi belakangan ia boeka satoe roemah pensioen jang ternjata tida membri hasil tjoekoep padanja, maka ia telah ambil poetoesan aken djoeal sadja itoe perabotan dan idoep lagi seperti doeloe.
Landru soeda dateng disitoe dengen poera-poera hendak beli barang-barangnja itoe njonja. tapi ini prampoean jang soeda perna idoep latjoerken diri, dengen gampang sekali katarik hatinja pada Landru, hingga oeroesan djoeal barang ia djadi loepaken, hanja omongin sadja hal dirinja.
Besokan malemnja Landru oendang itoe prampoean dateng di satoe restaurant di Boulevard des Italiens, aken bersantap sama-sama, oendangan mana telah ditrima dengen girang. Disitoe iaorang doedoek beromong-omong dengen asik, njonja Marchadier tjeritaken ia poenja resia-resia diri, sarmentara Landru oendjoek jang ia ada satoe lelaki jang belon perna menikah, ada poenja pentjarian tjoekoep dan ada poenja oewang contant jang besar djoemblanja.
Sasoedanja bikin pertemoean doea kali, Landru njataken ia ada tjinta pada itoe njonja, hal mana memang ada diharep oleh ini prampoean.
Pada soeatoe hari koetika iaorang doedoek di satoe restaurant di St. Jacques, Landru ada bilang begini:
„Djantoeng hatikoe, akoe dapet kanjataän jang kaoe ada dalem kasoesahan oewang. Kaoe poenja barang-barang akoe soeka bajarin boeat doea riboe frank, sabagian barang-barang itoe akoe hendak djoeal, samentara sabagian poela akoe hendak simpen dalem akoe poenja garage. Kaoe sendiri boleh tinggal bersama akoe di Gambais."
„Akoe moefakat dan memang akoe kapingin sekali liat itoe villa di Gambais jang kaoe sering seboetken."
„Besok kaoe boleh ikoet akoe," dan sahabisnja kata bagitoe ia laloe kaloearken oewang kertas doea riboe frank, jang ditrima oleh njonja Marchadeur dengen hati sanget katarik.
Sabagian barang-barangnja njonja itoe ia lantas djoeal pada Caillard boeat harga sariboe frank, sabagian poela ia angkoet dan simpen di Neuilly.
Pada tanggal 13 Januari njonja Marchadier laloe berangkat bersama Landru pergi ka Gambais, samentara nona Fernande Segret soeda doea hari Landru bawa poelang ka Parijs.
Itoe waktoe oewangnja Landru melinken tinggal bebrapa frank sadja, kerna doea riboe ia soeda kasihken pada njonja Marchadier, samentara sariboe frank oewang pendjoealan barang perabotan ia belon bisa trima dari Caillard. Sedeng bagitoe moesin dingin soeda dateng, hingga maski poen tida ada oewang. Landru terpaksa pergi ka Houdan dan goenaken ia poenja antero oewang aken beli areng batoe jang ia sendiri bawa dengen autonja ka Gambais.
Koetika njonja Marchadier dateng ka Gambais, ia ada bawa ia poenja doea andjing, aken tetapi tiga hari kamoedian orang tida dapet denger lagi soeara menggonggongnja itoe doea binatang dan bagitoe poen njonja Marchadier tida katahoean lagi kamana linjapnja!