Landru/Bagian 16
BAGIAN KA XVI.
Kemana linjapnja njonja Marchadier?
———
Njonja Marchadier tida merasaken lama itoe pengidoepan jang senang di Gambais.
Koetika berangkat ka Gambais, dalem ia poenja tasch ketjil njonja Marchadier ada simpen ia poenja oewang doeariboe frank bersama oewangnja sendiri bebrapa ratoes frank. Itoe oewang doea riboe ada pengasihannja Landru, jang lantaran itoe djoega, maka djiwanja djadi diabisken oleh ini pemboenoch, kerna Landru ingin lekas dapet kombali itoe oewang dan berangkat poelang boeat hidoep kombali pada nona Fernande Segret jang ia tjintaken bagitoe soenggoe-soenggoe.
Di Parijs Landru ada beli daging, salade, roti dan satoe potong camembert kaas (kedjoe).
„Ini barang makanan tentoe ada tjoekoep boeat kita poenja persantapan jang saderhana, boekan?" tanja Landru. „Di Gambais sabentar kita aken beli poela apa-apa jang perloe."
Itoe prampoean tjantik jang sekarang tjoba singkirken dirinja dari pengidoepan di Parijs jang bertjatjat, kamoedian doedoek bersantap boeat pengabisan kali bersama Landru. Ini badjingan ada tawarken si njonja dahar ikan sardijntjes jang si bangsat boeka sendiri di dapoer.
Itoe njonja jang tida taro tjoeriga satoe apa laloe ambil doca potong ikan itoe, laloe dahar dengen bernapsoe, samentara Landru sendiri tida maoe dahar itoe, hanja dahar bebrapa potong saucijs.
Itoe ikan sardijntjes jang itoe njonja dahar dengen enak telah kaboelken harepannja si bangsat, kerna baroe sadja itoe njonja habis bersantap, atawa ia baroe moelai dahar boeah, ia lantas rasaken kapalanja poejeng, hingga ia moesti bersender di korsi lantaran tida tahan poesingnja itoe kapala.
Lima minuut kamoedian andjing-andjingnja itoe njonja pada klepekan mati, lantaran Landru soeda kasih makan daging jang lebih doeloe ditjelepin dalem ratjoen. Njonja Marchadier mati belakangan sasoedanja menanggoeng kasakitan jang heibat.
Maski poen belakangan orang tida bisa dapetken maitnja njonja Marchadier, tapi toch koetika politie bikin gledahan di itoe roemah, di bawah batoe-batoe lebar jang dibongkar, politie soeda dapetken tengkorak-tengkorak dari itoe doea andjing, koetjing dan laen-laen toelang manoesia.
Djem delapan malem koetika tjoeatja ada gelap dan oedjan saldjoe ada toeroen dengen deres, Landru soeda boekain antero pakeannja itoe njonja, jang sasoedanja telandjang boelet, ia laloe goeloeng dengen satoe salimoet dan masoeken dalem ia poenja auto. Pakeannja itoe njonja ia bakar di dapoer, bersama itoe tasch ketjil jang oewangnja ia soeda pindahken ka kantongnja. Koetika soeda tengah malem Landru laloe berangkat dengen autonja jang berisi mait, ka itoe fabriek glas di Vierzy, dimana doeloe Landru soeda bakar maitnja nona Marie de Layons dalem dapoer machine dari fabriek terseboet. Bedanja ini mait dari njonja Marchadier Landru tida potong-potong lagi seperti maitnja nona Marie, hanja sekarang dengen boelet-boelet seperti orang bikin panggang babi, Landru masoekin itoe mait jang soeda kakoe ka dalem itoe dapoer jang apinja berkobar keras. Sabentaran sadja lantas ada tersiar baoe sangit, dan Landru sigra berlaioc dari itoe tempat dengen hati senang, sebab ia soeda selseh lakoeken itoe pakerdjaän dan kantongnja penoeh lagi dengen oewang.
Dari Vierzy Landru teroesken perdjalanannja dalem oedjan saldjoe menoedjoe ka Parijs. Esokannja tanggal 16 Januari ia soeda doedoek poela bersama nona Fernande Segret dalem roemahnja di Rue Rochechouart.
Nona Fernande Segret jang sampe itoe waktoe masih belon djoega dapet taoe Landru poenja pentjarian jang betoel, merasa gegetoen jang Landru saban-saban poelang dengen bawah banjak oewang, jang menoeroet katanja itoe badjingan ada oewang kaoentoengan dari ia poenja dagangan.
Dalem ia poenja boekoe tjatetan Landru ada toelis jang pada kabesokannja ia soeda bajar oetangnja sariboe ampatpoeloe lima frank. Perkara meratjoenin prampoean dan rampas hartanja, kaliatan ada djadi kasoekaännja Landru jang ia tida bisa bikin abis, maski poen Caillard dan Armand Blaisot seringkali peringetken padanja. Ini nasehat boekan sadja Landru tida maoe denger, malah ia kataken sobat-sobatnja itoe terlaloe pengetjoet dan banjak kali djoega ia oendjoek boekti pada sobat-sobatnja itoe bagimana politie-politie di Parijs sama sekali tida haroes ditakoetken.
Bahoea nasehatnja itoe doea sobat ada sanget berharga boeat di denger, itoelah kamoedian Landru telah dapetken boektinja, dirinja telah katangkap dengen tida sekali terdoega.
Bagiman resianja Landru katahoean, itoelah pengarang dari ini boekoe ada toetoerken seperti berikoet:
Berselang bebrapa hari satelah ia lakoeken pemboenochan atas dirinja njonja Marchadier, kabetoelan anaknja njonja Buisson jang tinggal di roemah sakit dekat Bayonne, telah dapet sakit keras.
Ajahnja ini anak soeda meninggal doenia dan njonja djanda Buisson telah diboenoeh oleh Landru, tapi ini anak tida taoc laen dari pada bilang jang iboenja ada tinggal di Parijs. la poenja tante, nona Lacoste, satoe pengawal-kamar dari satoe familie hartawan di Parijs, anggep perloe aken kabarken pada ia poenja soedara prampoean tentang anak itoe jang dapet sakit keras.
Pada waktoe jang belakangan njonja Lacoste ada dapet liat soedara prampoean itoe doedoek bersama satoe tocan nama Andre Charcroix di satoe cafe. Njonja Lacoste djoega ada doedoek sama-sama di cafe itoe dan koetika Landru berlaloe dari tempat doedoeknja aken boeka ia poenja jas loear, njonja Buisson samperin soedaranja dan bisikin di koepingnja njonja Lacoste dengen bilang bahoea toean Andre Charcroix ada poenja satoe villa jang bagoes di Gambais.
Oleh kerna nona Lacoste tida taoe betoel adres tempat tinggal soedaranja, maka ia soeda toelis soerat pada burgermeester di Gambais dengen permintaän boeat briken katerangan tentang adresnja toean Andre Charcroix.
Djawabannja burgermeester ada bilang bahoea di Gambais tida ada saorang jang tinggal dengen pak nama Andre Charcroix, dan itoe burgermeester bilang lebih djaoe, brangkali orang jang nona Lacoste maksoedken, adalah itoe toean jang pake nama Dupont dan ada sewa satoe villa jang terkenal dengen nama „Hermitage" miliknja toean Tric.
Nona Lacoste sigra pergi pada politie di Parijs, briken katerangan pada marika jang ia soeda tida beroentoeng tjari soedara prampoeannja, dan lebih djaoe ia kasih liat socrat jang ia trima dari Burgermester di Gambais.
Bagimana roepanja toean Andre Charcroix, atas permintaäunja politie nona Lacoste laloe petaken dengen teges. Satelah politie dapet itoe katerangan, ia lantas djadi inget Raymond Diard jang djoega ada sama betoel dengen potongan dari roepanja Andre Charcroix jang nona Lacoste toetoerken. Sampe itoe waktoe samoea orang politie memang masih dapet prenta aken tangkep itoe pemboenoeh dari njonja Cuchet dan anaknja, bebrapa roemah jang tersangka, kadang-kadang dapet koendjoengannja politie aken gledah brangkali bisa didapetken itoe orang jang ditjari, aken tetapi oleh kerna saban-saban gledahan itoe djadi gagal, maka samoea orang politie moelai djadi lelah.
Sekarang, sasoedanja nona Lacoste madjoeken itoe pengadoean, politie djadi bersiap lagi dengen penoeh kagoesaran dan kagoembiraän.
Dengen dipimpin oleh Inspecteur-politie Gaffiot, satoe detectief soeda sampe di Gambais dan tjari katerangan-katerangan. la lantas dapet kanjatahan bahoea itoe orang jang pake nama Dupont dan Andre Charcroix, bersama lagi bebrapa poeloe nama palsoc, sabetoelnja ada satoe orang sadja. Persadiaän lantas dibikin aken tangkep Landru djikaloe ia dateng lagi ka Gambais.
Itoe pemboenoeh sabetoelnja tida taoe kaloe politie sedeng berichtiar aken tangkep padanja. Aken tetapi pendjagaän pada itoe villa soeda dilakoeken tiga boelan lamanja, Landru belon djoega dateng kombali ka sitoe, hingga orang politie moelai tjoeriga apa Landru soeda taoe lebih doeloe jang dirinja sedeng didjaga.
Soeda bebrapa kali orang politic masoek ka dalem itoe villa dengen diam-diam, aken tetapi samoeanja tida dapet tanda-tanda dari kadjahatannja Landru. Di loteng politie melinken dapetken bebrapa lembar courant Inggris jang lama, maką politie taro sangkahan brangkali Landru ada toeroenan Inggris.
Sabetoelnja itoe waktoe Landru sedeng toentoet satoe pengidoepan jang sedep sekali di Parijs bersama satoe nona moeda jang tjantik, pada siapa Landru ada djato tjinta seperti itoe nona djoega tjintaken Landru.
Pada hari Djoemahat tanggal 11 April, oedara di langit ada bagoes sekali, maka Landru laloe adjakin ia poenja djantoeng hati, nona Fernande Segret jang eilok, aken djalan-djalan di di djalanan jang rame.
Marika djalan-djalan sampe di Rue de Rivoli, tatkala mana Landru dapet liat dalem satoe toko ada didjoeal satoe eet-servies (piring mangkok boeat makan nasi) jang sembabat betoel dengen marika poenja thee-servies (piring mangkok boeat minoem thee) jang ada di roemahnja.
Nona Fernande Segret liat itoe barang ada bagoes sekali, dan Landru laloe berdjandji aken beliken itoe boeat persenan di hari rajah Paaschen.
Marika laloe masoek ka dalem itoe toko, lantas djadi beli itoe eetservies boeat harga delapanratoes frank. Itoe waktoe Landru baroe bajar saratoes frank dan berdjandji aken bajar sakoerangnja sabagitoe lekas itoe barang di anterken ka roemahnja. Sebagi adresnja ia toelis: Lucien Guillet, Rue Rochechouart.
Dengen hati senang iaorang landjoetken djalan-djalan lebih djaoe sembari beromong-omong, sama sekali marika tida taoe apa jang bakal terdjadi dengen dirinja.
Koetika Landru dan nona Segret baroe kaloear dari itoe toko, kabetoelan dapet diliat oleh nona Lacoste, jang dengen terkedjoet ada kenalken roepanja Landru sebagi itoe toean jang bernama Andre Chareroix dan jang soeda bawa soedara prampoeannja, njonja Buisson, ka tempat jang tida katahoean. Dengen penoeh sakit hati nona Lacoste laloe bertaoeken hal itoe pada politie, pada siapa doeloepoen ia soeda perna mengadoe fatsal soedaranja itoe. Dengen tida boeang tempo lagi, politie tjepet dateng ka itoe toko dan dapetken adresnja itoe pemboenoeh seperti di atas kita soeda toelis. Kita sekarang balik kombali ikoetin Landru, jang sasvedanja anterin nona Segret poelang, Landru laloe pergi pada ampat sobatnja, samoea ada pendjahat-pendjahat di Parijs jang terkenal. Di satoe cafe jang tida djaoe dari djalanan Place de Pigalle, iaorang doedoek bermoefakatan.
Permoefakatan itoe ada berhoeboeng dengen oeroesan memeres oewangnja satoe pengarang bangsa Inggris. Ini pengarang sengadja dateng ka Parijs aken karang satue boekoe jang menoetoerken kadjahatannja bangsat-bangsat di Parijs. Aken tjari taoe resia-resia itoe, ia sacda bertemoe dengen satoe badjingan jang bisa oendjoek dengen djitoe bagian-bagian dari itoe tjerita jang hendak dibikin. Itoe badjingan adalah kontjonja Landru, jang sengadja maoe boeka sabagian dari marika poenja resia-resia boeat dapet oepahan dari si pengarang, tapi sabetoeluja iaorang berboeat demikian tida laen dari pada hendak peres oewangnja si pengarang itoe. Sampe djaoe malem Landru baroc poelang ka roemahnja.
Esokan paginja djam toedjoe Landru soeda bangoen dan pergi kaloear aken beli satoe lembar soerat kabar La Martin.
Sapoeloe minuut, kamoedian koetika Landru balik kombali, nona Segret dapetken soeaminja ada sedikit go goep dan poetjat. Nona Fernande Segret kasihken soerat-soerat jang baroesan dianterken oleh lopperpost. Koetika Landru lagi batja itoe soerat-soerat, sakoenjoeng-koenjoeng pintoe diketok. Itoe waktoe nona Segret lagi berdandan, maka ia melinken kasih taoe pada soeaminja di loear ada orang ketok pintoe. Pertama Landru merasa sangsi, ia berpikir sakoetika lamanja, tapi achir-achir ia angkat poendaknja dan berdjalan kaloear.
Apa jang telah terdjadi di loear, itoelah nona Segret tida dapet taoc, ia melinken bisa tjeritaken jang koetika socaminja boeka itoe pintoe, lantas kadengeran soearanja orang lelaki, berikoet satoe pergoeletan dan koetika pergoeletan itoe socda djadi sirep, nona Segret dapet denger ia poenja Lucien bilang begini:
„Apa? Apa kaoe maksoedken? Maoe tangkep akoe? Lantaran apa ?"