Landru/Bagian 14
BAGIAN KA XIV.
Landru djato tjinta.
———
Dari perhoeboegannja Landru sama nona Fernande Segret orang nanti dapet kanjataän jang ini bandot kolot soeda djato tjinta pada itoe nona tjantik.
Apa jang ia soeda berboeat pada ini nona, sasoenggoenja ada perkara jang ia belon perna berboeat dalem pengidoepannja, Sekali poen soeda mempoenja ini goela-goela jang manis, tida oeroeng Landru tjari dan bikin perhoeboengan dengen bebrapa prampocan laen, jang dengen roepa-roepa kadjoestaän, boedjoekan dan penipoean, itoe prampoean-prampoean jang sama sekali tida mempoenjai dosa padanja, ia djadiken korban.
Dari ia poenja perboeatan-perboeatan itoe, ternjata jang Landru ada satoe pendjahat paling bandel. Semingkin politie tida bisa tangkep padanja, semingkin ia pandang renda pada itoe hamba-hamba wet, semingkin gampang ia dapetken korban, semingkin giat ia lakoeken berbagi-bagi pemboenoehan jang datengken hasil padanja. Dengen. tida kwatirken satoe apa sekarang Landru soeda dateng kombali ka Parijs, sewa satoe roemah dan piara lagi djenggotnja seperti doeloe hari. Nasehat sobatnają si Caillard, Landru soeda loepaken atawa tida maoe perdoeliken lagi, apa jang ia sekarang inget, jalah tjari korban baroe.
Pada nona Fernande Segret Landru kasih kenal dirinja sebagi Lucien Guillet, orang dari Rocroi, di tempat mana ajahnja ada djadi satoe ingenieur, dan satelah ajahnja meninggal doenia, ia gantiken kerdjaän ajahnja itoe. Lebih djaoc ia kata jang ia ada poenja satoe auto garage di locar kota Parijs dan ada poenja satoe villa bagoes di Gambais.
Esokan sorenja, koetika nona Fernande Segret kaloear dari toko tempat kerdjanja, ia liat di pinggir djalanan ada menoenggoe toean Guillet.
„Oh! djantoeng hatikoe," kata tocan Guillet, koetika marika berdoea soeda kasih tangan satoe sama laen. „Akoe tida bisa bilang dengen perkataan brapa besar adanja akoe poenja rasa girang jang sekarang akoe soeda bisa bertemoe poela dengen kaoe. Akoe merasa tida ada laen kaberoentoengan dalem pengidoepankoe seperti ini waktoe jang akoe bisa pegang tanganmoe jang aloes. Djam waktoe kaoe kaloear akoe toenggoe dengen tida sabar. Achir-achir akoe dapet liat lagi senjoemmoe jang amat manis."
Lebih djaoe ia oetjapken laen-laen perkataän jang manis dan merdoe di dengernja, soepaja bisa iket hatinja itoe nona moeda.
Nona Fernande Segret ada kata, jang sabagitoe lekas Lucien Guillet bikin pertemoean pertama padanja, ia lantas njataken pengrasa'annja baloca ia tida bisa hidoep zonder berdamping dengen itoe nona, dan Lucien kasih kapastian dengen soempah jang ia belon perna djato tjinta pada satoe prampoean dan belon perna hatinja bagitoe katarik seperti soeda kadjadian dengen parasnja Fernande Segret. Melinken ialah saorang jang bisa mengiket hatinja.
Itoe omongan-omongan jang amat manis seperti madoe tawon, ada datengken rasa senangnja Fernande Segret sebagi satoe gadis jang belon perna dapet rasa tjintanja lelaki.
Koetika nona Segret adjar kenal itoe badjingan pada iboenja, sigra djoega ini iboe njataken ia poenja rasa tida senang atas pilihan anaknja, teroetama tempo dapet taoe jang anaknja maoe menikah dengen itoe lelaki toewa jang sama sekali si iboe tida penoedjoe Baroe sadja si iboe liat parasnja itoe badjingan, lantas ia dapet pengrasaän jang ini orang ada mengandoeng resia apa-apa, aken tetapi nona Segret soeda djadi bagitoe tjinta pada Landru, hingga ia tida perdoeliken pada bantahannja ini orang toewa dan berbalik hiboerken iboenja dengen berbagi-bagi omongan, soepaja iboenja bisa satoedjoe dengen itoe pertoendangan.
Dengen pandjang lebar nona Fernande Segret toetoerken pada iboenja jang Lucien Guillet ada saorang terpladjar jang boekan sadja klakoeannja ada sopan santoen, aken tetapi djoega ia ada saorang jang mampoe dan baek adatnja. Boeat itoe berbagi-bagi katerangan, tida memoewasken pada katjoerigaännja sang iboe jang masi tetep merasa sangsi bagi kadjoedjoerannja itoe lelaki. Dari sebab itoe, ia soeda perloeken djoega pergi pada Burgermeester di Rocroi dan tanja pada ini poengoeroes tjatja-djiwa apakah di tempat bilangannja ada tinggal saorang jang terkenal dengen nama Lucien Guillet. Orang jang ditanja tentoe sadja kasih djawaban bahoea di antara orang-orang jang tinggal dalem bilangannja, tida ada jang pake nama Lucien Guillet. Katerangan itoe membikin iboenja nona Segret djadi semingkin tjoeriga dan tinggal tetap pikirannja seperti pertama kali.
Aken tetapi Landru ada satoe pendjahat jang sanget brani mati dan tida taoe maloe. Sabagitoe lekas nona Segret berfaoeken pada Landru jang iboenja soeda dapet katerangan jang tida menjenangken dari Burgermeester di Rocroi, Landru laloe dateng pada itoe iboe dan dengen klakoean jang koerang adjar ia laloe tertawaken dengen berdepan pada ini orang toewa tempo ini njonja toedoe Landru ada satoe orang jang tida poenja tempat tinggal.
„Inget baek-baek, njonja, jang kaoe soeda bikin akoe merasa tida senang dengen kaoe poenja omongan. Akoe brani pastiken pada kaoe, dan kaoe nanti liat boektinja jang akoe ini ada saorang djoedjoer seperti djoega kaoe. Djikaloe akoe ingin menikah pada kaoe poenja anak, itoelah tida laen lantarannja, hanja sama sadja seperti kaoe poenja soeami tempo ia ada tjintaken kaoe".
Sahabisnja ia berkata bagitoe, ia lantas berlaloe.
Dengen melawan pada bantahannja sang iboe, nona Segret djadi djoega menikah dengen Landru dan hidoep dengen merasa amat beroentoeng bersama ini lelaki kolot. Hal itoe ada diakoeh djoega oleh nona Segret sendiri koetika Landru dipreksa perkaranja di pengadilan.
Sebab Landru sanantiasa ada temenin ia di roemah, tjoema kadang-kadang sadja tida poelang, katanja berhoeboeng dengen ia poenja oeroesan dagang, maka nona Segret sama sekali tida doega kaloe Landru ada saorang jang soeda mempoenjai anak dan istri. Sama sekali ia tida doega kaloe Landru pergi boekan oeroes dagangan, hanja oeroes ia poenja laen-laen perhoeboengan pada banjak prampoean. atawa poelang ka roemah istrinja.
Bagitoelah nona Fernande Segret soeda hidoep akoer dengen ini badjingan, tida beda dengen laen-laen pendoedoek kota Parijs jang djikaloe hari soeda sore, iaorang berdoea pergi djalan-djalan di taman, kamoedian doedoek bersantap di restaurant, pergi ka Schouwburg atawa cabaret. Landru ada saorang-lojar salaloe bisa toeroetken boeat kasenangannja nona Segret. Itoelah tida heran, kerna sahabisnja boenoeh njonja Jaume. Landru ada dapet oewang tarohan 10.000 frank dari Armand Blaisot.
Dengen itoe oewang darah Landru toentoet pengidoepannja sebagi orang pantas pantas, oendjoek itoe kamampoean pada laen-laen orang prampoean jang ia ada taksiran boeat kamoedian hari eret hartanja. Landru tida loepa aken tjatet dalem ia poenja BOEKOE ITEM sasoeatoe onkost jang ia pake.
Itoe koetika paprangan antara Frankrijk dan Duitschland sedeng heibatnja, kota Parijs sering kali di waktoe malem dapet serangan bom dari pasoekan-pasoekan kapal oedara Duitsch, hingga di waktoe pendoedoek sedeng tidoer njenjak di pembaringan, mendadak oewoengan roemahnja di djatoken bom jang meletoes dengen keras dan binasaken banjak djiwa. Orang-orang hartawan atawa poen pendoedoek jang sajang djiwanja binasa, telah lari ka laen-laen tempat loear bilangan kota Parijs. Landru goenaken itoe koetika jang baek dengen boedjoek nona Segret pinda ka villanja di Gambais, dan kainginannja Landru lantas ditrima oleh nona Segret dengen girang.
Boeat pergi ka itoe tempat Landru ada beli doea kaartjis poelang pergi, beda sekali dengen ia poenja kabiasaän pada laen-laen prampoean.
Bebrapa minggoe iaorang tinggal di Gambais dan nona Fernande Segret njata ada merasa senang sekali tinggal di itoe villa jang njaman.
Iboenja nona Segret senantiasa berdaja tida brenti aken bikin anaknja maoe singkirken diri dari itoe badjingan, aken tetapi nona Segret rasaken jang hatinja tida sampe koeat aken berboeat demikian, sebab ia soeda djato tjinta pada itoe badjingan.
Samentara tjintanja Landru pada ini nona melinken boeat sakedar sadja, sebab djikaloe ia sedeng ada di Parijs, Landru salaloe tjari plesiran dengen laen-laen prampoean.
Satoe perkara jang loetjoe telah terdjadi pada Landru koetika ini badjingan tidoer plesir dengen satoe nona tjantik.
Pada soeatoe malem tatkala boelan mentjarken sinarnja jang gilang-goemilang, Landru ada kaloear dari roemáhnja di Rue Rochechouart dan menoedjoe ka Montmartre aken katemoeken ia poenja sobat-sobat. Sasoedanja doedoek sakean lamanja dalem satoe cafe di Place Blanche, sakoenjoeng-koenjoeng matanja katarik dengen parasnja satoe nona tjantik jang ada disitoe. Landru laloe tempel ini nona dan adjak plesir, pertama ia bawa di satoe cabaret, kamoedian ka satoe roemah penjoendelan. Sampe hari ampir pagi baroe iaorang berpisa. Koetika Landru membri slamat tinggal satoe sama laen, sigra djoega Landru dapet kanjatahan jang ia poenja dompet soeda ditjoeri orang, dalem mana ada berisi oewang tida koerang dari sariboe frank.
Si pentjoeri tentoe boekan laen dari pada itoe prampoeau jang salaennja itoe satoe dompet berisi oewang, lebih doeloe dari itoe djoega ia soeda dapet bajaran dari Landru. Landru merasa gemes sekali pada ini prampoean, tapi ia tida bisa berboeat laen dari pada biarken sadja itoe perkara, sebab kaloe ia minta pertoeloengannja politie, bisa djadi dirinja nanti ditjekel. Sebagi satoe pendjahat oeloeng Landru merasa maloe sekali jang dirinja soeda kena ditipoe oleh satoe prampoean.
Lantaran ilangnja itoe oewang, ia djadi roedin, sebab itoelah ada oewang simpenannja jang paling pengabisan. Samentara nona Fernande Segret masih ada berdiam di Gambais. Oleh kerna demikian, perloe sekali ia tjari djalan boeat dapetken oewang lagi 'soepaja salaennja bisa kasih pengidoepan pada anak-istrinja, djoega bisa piara teroes pada nona Fernande Segret.
la laloe ambil djalan jang biasa, jaitoe kasih masock advertentie dalem soerat kabar jang boenjinja seperti :
„Satoe toran jang belon perna menikah, ingin bikin perkenalan dengen satoe njonja."
Itoe advertentie soeda dapet banjak sekali soerat-soerat lamaran, antaranja ada dari tiga prampoean jang dengen djalan tjerdik sekali Landru soeda bisa gaet oewangnja dan kamoedian tida kasih kabar satoe apa lagi padanja.
Djoega satoe njonja jang bernama Pascal ada lamar itoe advertentie, dan Landru soeda djawab dengen manis soerat lamarannja itoe.
Njonja Pascal ada satoe prampoean djanda jang tjantik sekali. la baroe sadja ditinggal mati oleh soeaminja di medan perang. Ini njonja baroe beroemoer tiga poeloe amat tahon, lantaran soeaminja meninggal, telah masoek berkerdja pada satoe bengkel jang ternama dan letaknja di depan gedong opera.
Landru bikin pertemoean dengen ini njonja di satoe cafe pada djalanan Rue de Royale, dimana ia kenalken dirinja pada njonja terseboet dengen nama Forest de Barzieux, sebagimana ia soeda teeken namanja dalem ia poenja soerat balesan pada itoe njonja.
Djadi ini njonja kenal pada pendjahat terseboet dengen nama bagitoe.
Njonja Pascal ada poenja satoe kaponakan prampoean, Marie Jeanne Fauchet jang ada berkerdja sama-sama ia dalem satoe bengkel, dan dalem ini bengkel ,rame sekali orang bitjaraken tentang nikahannja itoe njonja djanda dengen „un monsieur tres bien".
Sekarang soeda sampe tanggal 28 Maart 1918, jaitoe hari jang hawa oedara moelai dingin serta banjak oedjan, pada moesin mana ada enak sekali kapan orang tinggal di pedoesoenan jang sepi. Itoelah djoega sebabnja maka njonja Pascal dengen girang toeroet Landru berangkat ka Gambaiş.
Tapi sedari itoe njonja pergi ka tempat terseboet, orang tida katemoeken lagi padanja. Landru djoega tjoema beliken ia kaartjis spoor boeat perginja sadja.
Haroeslah diterangken jang ini njonja tadinja ada tinggal di Rue Stendhal dan di satoe roemah jang ketjil ia melinken ada mempoenjai perabotan jang berharga kira-kira ampat ratoes frank. Itoe njonja ada saorang jang dateng dari Toulouse, di tempat mana ia ada mempoenjai hikajat jang bernoda, tapi kita tida perloe tjeritaken disini.
Itoe waktoe nona Segret soeda diadjak balik ka Parijs oleh Landru soepaja tempatnja di Gambais boleh di'isiken oleh ini njonja Pascal.
Sebagi djoega laen-laen prampoean jang soeda djadi korbannja Landru, demikian poen njonja 'Pascal ada merasa enak sekali aken tinggal di itoe villa.
Sebagimana kita soeda taoe, Landru ada satoe badjingan jang pande ambil hatinja prampoean. Demikianlah, maski poen ia soeda ada poenja katjintaän jang lebih tjantik dan moeda, toch di hadepannja ini njonja djanda, Landru bisa berlakoe seperti sasoenggoenja ia ada tjinta pada ini prampoean.
Dalem villa terseboet Landru soeda berlakoe sabrapa jang ia bisa aken senangken hatinja ini prampoean djanda. kerna tida brapa lama lagi poen ini njonja aken ia boenoeh, sebab Landru soeda aoes lagi dengen oewang.
Bahoea Landru ada napsoe betoel aken boenoeh itoe njonja, inilah ternjata dari ia poenja perboeatan jang tida perdoeli pada orang-orang jang menjaksiken dan anter kadoea orang itoe berangkat dari Parijs.
Ada banjak sekali orang-orang jang taoe tentang perhoeboengan Landru dengen itoe njonja djanda. Koetika Landru koendjoengi roemahnja njonja djanda itoe dan adjak ini njonja djalan-djalan, si njonja ada bilang pada ia poenja djoeroe pendjaga pintoe prampoean tentang ia poenja pernikahan jang tida brapa lama lagi dengen toean jang ada disampingnja. Itoe djoeroe pendjaga pintoe intjer matanja pada Landru, kamoedian mesem sindir pada njonja Pascal. Hal itoe membikin Landru merasa tida senang, tapi tida djadi satoe halangan boeat ia aken lakoeken pemboenoehan atas dirinja itoe njonja. Salaennja dari itoe, djoega satoe kali njonja Pascal soeda perna oendjoek pada sobatnja, jaitoe njonja Carbonnel, siapa adanja ia poenja toendangan.
Njonja Carbonnel jang kapingin liat roepanja toendangan dari njonja Pascal itoe, soeda toeroet anter koetika kadoea kamanten itoe berangkat ka station aken landjoetken marika poenja perdjalanan ka Gambais, dalem perdjalanan mana njonja Pascal ada bawa djoega ia poenja satoe koetjing jang bagoes.
Tapi itoe samoea tida dikwatirken oleh Landru. la poenja napsoe aken poenjaken hartanja itoe njonja ada bagitoe besar, hingga ia loepaken samoea perkara. Kantongnja Landru itoe waktoe soeda kempes betoel, ia belon kirimken oewang pada anak istrinja dan djoega masih ada satoe nona manis jaitoe nona Fernanda Segret, jang sekarang berdiam di gedongnja di Rue Rochechouart. Maka tentang abisken djiwanja itoe prampoean, itoelah ada niatannja Landru jang soeda pasti.
Apa jang soeda terdjadi dengen njonja Pascal, itoelah ada sama ngerinja dengen laen-laen kadjadian pada korbannja Landru. Dalem tjatetannja politie jang selidiki itoe perkara, ada ternjata jang pada tanggal 28 Maart njonja Pascal moelai tinggal dalem itoe villa di Gambais, aken tetapi pada tanggal 5 April itoe njonja soeda tida ada kaliatan lagi, dan anam hari kamoedian prampoean djoeroe pendjaga dari roemahnja njonja Pascal didatengi oleh Landru jang bilang bahoea njonjanja soeda pinda dan aken bikin perdjalanan ka laen negri, maka barang-barangnja samoea perloe aken didjoeal. Sama sekali barang-barang itoe telah dapet harga tigaratoes ampatpoeloe frank.
Bagimana Landru soeda binasaken djiwanja njonja Pascal ?
———