Landru/Bagian 13
BAGIAN KA XIII.
Satoe kantong berisi 10.000 Frank.
———
Kerna sabelah tangannja memegang steur auto, maka dengen sabelah tangan kiri Landru tida koeat pegang njonja Jaume soepaja tida lompat kaloear dari auto. Itoe lompatan jang nekat boekan lantaran ingin melariken diri dari dampingnja Landru, aken tetapi lantaran itoe njonja tida tahan sakit jang moeles dalem peroetnja. Dari auto jang berdjalan keras, ia terbanting di djalanan besar jang penoeh batoe dan menglisahan disitoe bebrapa saät sampe Landru ada tempo moendoerken autonja dan angkat itoe korban masoekin lagi ka dalem auto bangkoe sabelah dalem. Disitoe njonja Jaume jang tjantik soeda lepasken napasnja jang pengabisan, samentara Landru tjepet djalanken lagi autonja lebih djave. Tapi ia soeda kasasar, boleh djadi lantaran ada sedikit bingoeng berhoeboeng dengen matinja itoe korban jang tjantik. la baroe mendoesin jang ia soeda kasasar sasoedanja djalanan dalem oetan tida ada temboesannja, hingga ia moesti balikin lagi autonja berdjalan sapoeloe kilometer. Achirnja ia sampe djoega di djalanan jang menoedjoe ka Marlotte, biloek di satoe gang dan laloe brentiken autonja disitoe.
Satoe bajangan itam kaloear dari satoe gombolan poehoen jang lebet, menghamperi pada autonja Landru.
„Wel, apa disini ada santousa?" tanja Landru.
„Ja, akoe soeda toenggoe disini saperampat djam, tida dapet liat satoe orang jang poen," kata orang ditanja, dan orang itoe boekan laen, hanja Armand Blaisot.
„Mari sini," kata Landru sambil tangannja pegang satoe lampoe batterij dan sorotken sinarnja pada moekanja njonja Jaume jang soeda biroe dan badannja djengker. „Apa kaoe sekarang soeda girang?"
Armand Blaisot bergidik dan tjepet ia moendoer dengen bebrapa tindak kablakang, „Mon Dieu! Akoe tida maoe liat lagi. . . . . ." kata ia dengen soeara terpoetoes-poetoes dan dari roepanja ternjata jang ini pendjahat ada lebih ketjil njalinja dari Landru, baroe sadja ia liat maitnja itoe prampoean dengen mata mendelik, ia soeda katakoetan satengah mati.
„Mari sini tanganmoe. . . . . . . ." kata Armand, tangan kanannja memegang satoe kantong jang disodorken pada Landru „Ini oewang boeat kaoe. . . . . ."
Landru sodorken tangannja dan trima itoe kantong jang berisi oewang, laloe masoeken dalem sakoenja.
Armand lantas hendak berlaloe, tapi Landru pegang tangannja sembari berkata:
„Belon selseh sobat! Kaoe moesti bantoe akoe gotong itoe mait ka belakang gombolan, disitoe soeda ada lobang boeat koeboer ini mait. Mari kaloearken sedikit kaoe poenja tenaga, akoe soeda amat tjape!"
„O! Demi tengkorakkoe, djangan kasih akoe liat lagi itoe mait . . . . . ." dan sahabisnja kata bagitoe ia lantas ambil spedanja, sigra lariken itoe kandaran dengen tida ambil perdoeli lagi pada Landru.
Landru merasa tida senang dengen klakoeannja itoe sobat, aken tetapi sasoedanja bengong sakoetika lamanja, ia laloe moelai oeroes sendiri itoe pakerdjaän mengoeboer mait dengen pikiran jang sekarang toch ia soeda trima oepah jang tjoekoep dari itoe pakerdjaän. Koetika ia sampe di tempat jang ia soeda galiken lobang, ia lantas menoedjoe ka tempat-tempat jang ia soeda koeroeng dengen benang itam aken dapet katahoei apa orang soeda masoek ka sitoe apa tida. la dapet kanjataän itoe tempat belon dikoendjoengi orang.
Kamoedian ia masoeken itoe mait dalem lobang bersama pakeannja, dengen doegaän bahoea orang tentoe tida taoe jang disitoe ada satoe mait jang tertanem.
Laen dari bagitoe, sahandenja itoe mait orang dapetken, tentoelah Armand Blaisot sendiri jang tertangkep, kerna samoea kenalannja njonja Jaume taoe jang Armand ada poènja perhoeboengan rapet dengen itoe njonja. Djadi ini badjingan soeda pikir lebih doeloe sasoeatoe djawaban djikaloe orang hendak toedoeh padanja.
Perkakas besi jang ia bekas pake, koetika berdjalan poelang, ia lemparken di pinggiran satoe rawa. Esokan paginja ia kombali ka roemah istrinja dengen oewang darah sapoeloe riboe frank.
Sampe itoe waktoe Landru masih takoet balik ka Parijs, itoe kota jang maski poen ada loewas, tapi njata ada sanget berbahaja boeat dirinja. Sekalipoen tempo hari ia djalan-djalan dengen Armand di satoe cafe jang soenji dirinja ada slamat, aken tetapi sahandenja ia dateng di cafe jang rame, nistjaja dirinja aken bernasip seperti doeloe hari djoega.
Maski poen ia soeda mempoenjai oewang sapoeloe riboe frank di kantong sebagi oepahan boeat ia poenja kerdjahan kedji, toch Landru tida merasa poewas dengen itoe djoembla. la ingin mempoenjai lebih banjak lagi dengen djoeal barang-barangnja njonja Jaume. Barang-barang itoe ada berdjoembla saratoes ampatpoeloe frank, satoe djoembla jang haroes dikata banjak djoega boeat pemandangan ini badjingan.
Di Parijs ada banjak sekali pendjahat dan pengeretan, aken tetapi jang perboeatannja sebagi Landru, itoelah soesah didapetken kadoeanja.
Dengen oewang sapoeloe riboe frank jang ia dapet lantaran abisken djiwanja njonja Jaume. Landru laloe berdiriken poela satoe „Sarang Pertjintaän" di Rue Rochechouard no. 76, dekat Boulevard Rochechouard di Montmartre dan tida brapa djaoe dari ia poenja „Sarang Pertjintaän" jang doeloe di Place Dancourt.
Itoe roemah ada besar dan tinggi, kadoea tepinja ada berdiri bengkel horlogie dan satoe toko obat-obatan, sedeng di depannja ada satoe toko pakean dan kamar obat.
Satelah dapet sewa ini roemah jang ia perabotken dengen lengkep, Landru laloe moelai tjari poela korban baroe. Saban malem ia djalan kaloear, tjari njonja-njonja tjantik jang ia rasa ada poenja harta boeat' dieret.
Sampe di moesin panas Landru soeda beroentoeng bisa bikin perhoeboengan soerat dengen delapan prampoean.
Pada soeatoe malem di boelan Mei 1917, koetika sinarnja buelan jang poernama ada kaliatan gilang-goemilang, Landru dapet liat satoe nona jang oesianja moeda, naek dalem satoe tram. Dengen tida berpikir banjak lagi, Landru laloc boentoetin itoe nona. Kamoedian Landru bikin perkenalan dengen ini nona jang bernama Fernande Segret, penggawenja satoe toko jang itoe hari kabetoelan ada dapet vrij.
Prampoean moeda ini belakangan djadi toendangannja Landru jang sampe Landru dihoekoem masih teroes hidoep dan dari moeloetnja itoe nona orang dapet korek hikajatnja Landru. Orang aken dapet kanjataän jang Landru ada katarik keras pada ini nona, ternjata jang Landru tinggal satia dalem pertjintaän dan kasih ini nona tinggal hidoep dengen merdika, beda sekali ia poenja kalakoean dengen laen-laen prampoean jang ia soeda djadiken korban kapan ia soeda poewasken napsoenja.
Dari moeloetnja itoe nona sendiri kita dapet katerangan seperti :
Bersama satoe sobatnja, nona Segret pergi belandja, dan koetika ia naek dalem tram, ia bertemoe dengen satoc toean djenggot itam jang beroemoer kira-kira ampatpoeloe toedjoe tahon.
Roepanja toean itoe pinter, pakeannja ternjata ada bikinan toko jang ternama. la awasken nona Segret dalem tram dengen mata tida berkesip sembari tangannja oeroet-oeroet ia poenja djenggot. Matanja itoe ada mengandoeng pengaroe, kerna orang jang diawasken lantas dapet pengrasahan aneh, bingeeng dan kamoedian djadi soeka pada itoe orang.
Koetika nona Segret toeroen dari tram, itoe tocan boentoetin dari belakang, dan di tengah djalanan ia lantas adjak omong. Pertanjaännja Landru jang pertama tida didjawab oleh nona Segret, jang sengadja djalan semingkin kentjeng, tapi Landru poenja tindakan ada lebih pesat, hingga nona Segret kasoesoel dan ia denger Landru berkata dengen lemah lemboet:
„Oh! nona, apa kaoe tida soeka denger akoe bitjara? Akoe ini ada saorang jang hidoep sabatang karang dalem doenia. Akoe liat kaoe ada tjantik sekali. Hatikoe djato tjinta pada kaoe, apa kaoe tida soeka djadi sobatkoe? Ah! nona jang manis, djalanlah sedikit perlahan, troesah kwatir orang liatken dan troesa kwatir omongan kita di denger oleh laen orang. Kaoe liat akoe ikoetken kaoe kamana djoega kaoe sampe, dan akoe tida nanti tinggal kaoe sabelonnja kaoe berdjandji jang besok pagi djam sapoeloeh kaoe nanti bertemoe dengen akoe di Place de l'Etoile, di oedjoengaja Avenue Wagram."
Mendenger itoe omongan-omongan manis jang penoeh oempakan, nona Segret djadi goegoep dan bingoeng tida taoe apa jang ia haroes berboeat dan tida taoe apa jang ia moesti menjaoet. Saparo inget dan saparo loepa ia djadi loeloesken permintaännja Landru, esokan paginja pada djam jang ditentoeken ia bertemoe dengen itoe tocan toewa di tempat jang diminta dan itoe toean toewa lantas pegang tangannja dengen gemeter, oetjapken perkataän-perkataän jang menarik hati.
Terdjadinja ini pertemoean, njata ada berhoeboeng dengen satoe drama jang aneh sekali. Kadjadian itoe ada ditoetoerken lebih djaoe oleh nona Segret seperti jang ditoetoerken pada bagian jang berikoet.
———