Tao Teh King/Bab 79

Dari Wikisumber bahasa Indonesia, perpustakaan bebas
Tao Teh King diterjemahkan oleh Kwee Tek Hoay
Bab 79

LXXIX.

MEMENOEHI PERDJANDJIAN.

  1. Kapan sasoedahnja terdjadi pertjidra'an besar bisa diadaken perdamian, pastilah ada satoe fihak jang merasa tida senang atawa koerang poeas. Bagimanakah ini ka'ada'an haroes diperbaeki?
  2. Maka itoe saorang boediman sasoedahnja bikin satoe perdjandjian, ia tjoemah djalanken sadja 'apa jang itoe perdjandjian tetepken boeat ia lakoeken, dan tida mendesek pada fihak jang laen boeat penoehken djoega kawadjibannja.
  3. Itoe orang jang bedjik hanja perhatiken apa jang ia telah berdjandji, samentara orang jang tida bedjik tjoemah bergoelet boeat dapet apa jang mengoentoengken bagi dirinja.
  4. Itoe Tao dari Langit tida perna mengèlonin; ia selamanja membantoe pada orang jang baek.

Boeat adaken satoe perdjandjian dami, pada sasoedahnja timboel perselisihan besar, jang bisa memberi kapoeasan pada kadoea fihak, itoelah djarang kadjadian. Moesti sadja ada apa-apa jang bikin salah satoe merasa koerang senang. Maka oentoek adaken kaberesan saorang boediman tida soeka mendesek pada fihak laen soepaja penoehken apa jang ditetepken dalem itoe perdjandjian, hanja lebih soeka djalanken sadja apa jang ia sendiri diwadjibken aken berboeat, biarpoen dirinja kena dibikin roegi, dan tida perdoeli apa laen fihak poengkir djandjinja atawa maen poeter-poeter aken terlolos dari kawadjiban jang koerang enak, atawa tjoemah mendesek boeat dapet apa jang mengoentoengken. Boekan sadja soeal perdjandjian jang dibikin sasoedahnja terdjadi perselisihan besar atawa peperangan antara satoe dengen laen bangsa, hanja dalem perhoeboengan jang terdjadi satiap hari, antara pakoempoelan-pakoempoelan, oeroesan familie, soeami-istri, persobatan, dan sabaginja, dimana masing-masing orang ada poenja kawadjiban sendiri jang haroes dilakoeken, selaloe ada terdapet perboeatan tjoerang atawa nakal dari marika jang hanja ingin enak sendiri, dengen poengkir atawa tjoba meledjit dari kawadjibannja, tapi ingin jang laen toeroet betoel apa jang didjandji atawa ditetepken. Saorang jang paling tjoerang dari banjak akal bisa merasa goesar kaloe kena ditipoe oleh sobat-sobatnja jang ia ingin berlakoe djoedjoer! Soeami jang paling bangor dan nakal mendjadi kalap dan nekat djikaloe mendapet taoe istrinja tida setia! Berapa banjak pemimpin pakoempoelan jang menggroetoe pandjang-pendek lantaran malesnja kawan-kawan sakerdja jang tida maoe lakoeken kawadjibannja sabagimana moesti! Ini matjem perasa'an tida poeas ada tertampak di mana-mana dan kaliatan tida ada abisnja. Tetapi Lao Tze oendjoekin djalan jang saderhana boeat beresin itoe ka'ada'an jang tida memoeasken dengen menoeroet toeladan dari Orang-orang boediman, jang tjoemah perhatiken sadja kawadjibannja sendiri, jang ia penoehken sabagimana moesti, tida perdoeli apa laen fihak maoe djalanken djoega kaharoesannja atawa tida. Ia tida soeka mendesek atawa bergoelet aken minta laen orang pegang djandjinja, dan merasa poeas kapan ia soedah bisa penoehin apa jang ia sendiri ada berdjandji, biarpoen lantaran itoe ia moesti menanggoeng roegi. Ia tida pikir nanti dapet berkah dan pembalesan dari Thian boeat kadjoedjoeran dan kasetia'annja sama itoe perdjandjian, kerna Thian tida perna mengèlonin pada siapa djoega. Tapi ia taoe jang Thian selamanja membantoe pada orang jang baek, hingga kapan ia selaloe berlakoe bener, ia aken tinggal selamet, dan manoesia poenja tipoe daja jang tjerdik, kadjahatan dan katjoerangan, tida bisa meroegiken apa-apa bagi dirinja saorang jang pegang tegoeh pri kabeneran.

Ada soesah aken soeroe laen fihak berlakoe djoedjoer, tetapi sasoeatoe orang, kaloe maoe, bisa djalanken itoe kadjoedjoeran dalem dirinja sendiri. Memang banjak jang pikir ada bodo sekalih aken pegang kadjoedjoeran di antara Orang-orang jang tjoerang dan nakal, hingga paling baek berlakoe tjerdik dan sama-sama saling menipoe, menjoerangin, mendjoestain dan bersikep poera-poera. Orang jang pikir begitoe soedah loepa jang Thian ada membantoe pada fihak jang berdjalan bener. Seloeroeh alam ada terlipoet oleh Wet dari Kabeneran, jang memberi kaselametan pada siapa jang berlakoe menoeroet itoe wet, dan katjilaka'an pada jang melanggar. Maka perdjandjian jang saorang boediman paling perhatiken dan bersedia aken penoehin, adalah itoe perdjandjian boeat berlakoe bener, kerna ini ada jang paling mengiket dan berpengaroeh atas samoea machloek dalem doenia. Pertjoba'an boeat tarik kaoentoengan bagi diri sendiri dengen goenaken katjoerangan dan tipoe-daja, itoelah boekannja tjerdik, hanja bodo, kerna hatsilnja tida bisa laen dari meroegiken pada diri sendiri.