Tao Teh King/Bab 74

LXXIV.

KATJATJATANNJA MENGHOEKOEM.

1. Kapan rahajat negri tida takoet mati, ada apakah goenanja menakoetin marika dengen kamatian sabagi hoekoeman ?
2. Dan djikaloe marika selaloe diadjarin soepaja takoet sama mati, dan akoe bisa bekoek samoea pendjahat besar dan boenoe-boenoein pada marika, apakah akoe berani lakoeken itoe ?
3. Selamanja ada tersedia Algodjo Besar!
4. Barang siapa mereboet itoe pakerdja'an algodjo ada sama djoega saorang jang baroe beladjar maoe tjoba lakoeken pakerdja'annja bas toekang kajoe.
5. Orang jang lantjang begitoe djarang sekalih jang terlolos dari katjilaka'an kena loekain tangannja sendiri.

⁂

Disini Lao Tze ada oetaraken satoe peladjaran besar dan penting jang terboengkoes dalem loekisan dan oedjar-oedjar saderhana.

Terlebih doeloe biarlah kita bitjarain sadja bagian jang sabelah loear sabagimana adanja.

Kapan satoe negri, lantaran diperentah tida beres atawa rahajatnja dibiasain boeat berlakoe serakah dan kemaroek pada barang doenia, mendjadi kaloet dan tida berentinja timboel perampasan dan peperangan atawa laen-laen kadjahatan, hoekoeman jang paling berat orang tida nanti takoetin. Maka sabaliknja dari-pada mengadaken hoekoeman jang bengis, ada lebih baek pada rahajat diadjar boeat merasa poeas aken hidoep saderhana soepaja marika tida djadi kedjem, boeas dan tida takoet mati aken sampeken kaserakahannja.

Dan djikaloe itoe rahajat, lantaran takoet sama hoekoeman jang bengis tida berani melawan, hingga sasoeatoe pndjahat jang berdosa besar gampang ditangkep dan dihoekoem boenoeh masih moesti ditanja: apakah pantes kita Orang djatohken itoe hoekoeman mati?

Disini kaliatan Lao Tze boekan sadja anti-peperangan, tapi djoega anti-hoekoeman mati, biarpoen terhadep pendjahat jang berdosa besar.

Lantarannja kenapa itoe Goeroe Toea tida setoedjoe sama hoekoeman mati, adalah lantaran ia taoe bahoea selamanja ada tersedia Algodjo Besar jang djadi toekang menghoekoem dan membinasak Siapa maoe tjoba djalanin itoe pakerdja‘an Algodjo, kasoedahannja ada sama djoega saorang jang baroe beladjar maoe lakoeken pakerdja‘annja bas toekang kajoe. Sabelonnja itoe kajoe jang ia kampak atawa pahat bisa berwoedjoet, ia soedah kena loekain tangannja sendiri jang belon faham menggoenaken itoe pekakas tadjem. (Ajat 1-5).

Sekarang maksoednja ini peladjaran jang tersemboeni.

Boeat sasoeatoe kadjahatan, kasalahan atawa perlanggaran pada Wet Natuur atawa Wet dari Kabeneran, jang bersifat Welas Asih, soedah tersedia pembalesannja jang oleh orang Hindoe dan Buddhist diseboet Karma, jang nanti memberi hoekoeman satimpal, dari mana tida ada satoe manoesia bisa lolosken diri.

Hoekoeman jang diadaken deh manoesia kabanjakan tida adil, sebab selaloe disertaken kabentjian dan nafsoe ingin menindes, dan sering djoega tida didjalanken dengen betoel, kerna berat sabelah atawa mengèlonin satoe fihak. Pada djeman doeloe kapan satoe boedak melawan pada toeannja lantes dihoekoem berat, terkadang diboenoeh mati, sedeng kapan si toean memboenoeh boedaknja jang tida salah apa-apa tjoemah dari saking kedjemnja, ia tida ditoentoet, atawa paling banjak tjoemah dihoekoem denda ringan. Sampe sekarang poen ada beberapa negri jang maski wetnja satoe roepa boeat samoea rahajat tetapi didjalankennja mentjong, lantaran membedaken warna koelit dan deradjat. Banjak matjem hoekoeman siksa jang sanget kedjem dan ngeri, jang berlakoe pada beberapa abad laloe, sekarang telah dihapoesken dan diganti dengen jang lebih mengenal kamanoesia'an. Dan ini perobahan dalem wet hoekoem masih berdjalan teroes, tambah lama lebih adil dan berkasian, hal mana mengoendjoekken bahoea itoe hoekoeman mati satjara kedjem jang berlakoe pada 25 abad laloe di djaman koetika Lao Tze masih hidoep, dengen sasoenggoenja ada terlaloe bengis, hingga ada dengen sapantesnja kaloe itoe Goeroe Toea menentangin. Sekarang poen di beberapa negri masih ada gerakan boeat minta dihapoesken hoekoeman mati.

Tapi Lao Tze poenja toedjoean boekan sadja lantaran terdjoeroeng oleh pri kamanoesia‘an, hanja berdasar atas pengartiannja pada sifat dari Tao atawa Natuur Wet, Sasoeatoe kadjahatan tida perloe dibales, dihoekoem atawa diboenoeh mati, sebab Natuur soedah sedia Algodjo Besar jang bakal djatohken kampak hoekoemannja dengen tida perna loepoet, dengen adil, tjotjok dan satimpal sama sasoeatoe orang poenja djahatan atawa kasalahan. Siapa jang maoe gantiken mendjadi algodjo, maoe menghoekoem dan memboenoeh mati boeat bales sakit hati pada itoe orang jang berdosa, kasoedahannja hanja meroegiken dirinja sendiri, sebab kainginan „membales” jang berdasar atas kagoesaran dan kabentjian seringkalih melangkahi wet ka‘adilan, dan achirnja menimboelken Karma djelek bagi dirinja. Dan ini peladjaran ada tjotjok sama apa jang dioetaraken dalem laen fatsal di sabelah moeka, dimana Lao Tze boekan sadja tida soeka membales djahat, hanja bales kadjahatan dengen kabaekan. Dan ini peladjaran ada tjotjok sama apa jang diterangken dalem beberapa agama akesi serahken pembalesan dari orang poenja kadjahatan di tangannja Toehan, jaitoe pada Natuur Wet, jang seperti diterangken dalem fatsal jang laloe, ada meroengkoep pada segala apa, hingga tida satoe poen bisa terlolos. Mengapatah orang moesti poesingin kepala dan tjapein hati boeat membales djahat sedeng sasoatoe perboeatan jang bertentangan sama Wet dari Katjinta‘an, itoe Tao atawa Natuur Wet, soedah pasti aken terhoekoem ? Sasoeatoe pertjoba'an aken menghoekoem satjara kedjem pada orang jang bersalah, maski kaliatannja bagimana pantes dan adil di mata doenia, tinggal tetep bertentangan sama Wet dari Katjinta‘an jang mendjadi sarinja Tao.

Ini peladjaran dari Lao Tze tambah lama semingkin tjotjok sama pendapetannja criminologist (achli-achli kadjahatan manoesia) dari djaman sekarang, jang djoega anggep sifatnja hoekoeman boekan moesti beroepa pembalesan pada si pendjahat poenja perboetan berdosa hanja moesti diatoer sabagi menjemboehin penjakit atawa pendidikan aken bikin marika djadi baek, jaitoe berdasar atas katjinta'an. Malah hoekoeman mati poen lebih banjak bersifat pendjaga‘an oentoek kaselametan orang banjak dan antjeman pada laen-laen pendjahat, dari-pada pembalesan atas dirinja itoe orang jang berdosa.

Bagi saorang jang hendak mentjari katentreman hidoep dengen mengikoeti tjaranja Tao bekerdja, ini peladjaran aken djangan membales, dan serahken sadja segala apa di tangannja itoe Algodjo Besar atawa Karma, sasoenggoenja ada penting sekalih, sebab mengoerangin banjak tindesan dalem penghidoepan jang terbit lantaran mendendem, sakit hati, atawa merasa bentji dan gemes pada orang-orang jang dianggep soedah berlakoe tida pantes, meroegiken atawa menjakitken. Maka maskipoen jang dibitjarain dalam ini fatsal ada kadjahatan besar jang haroes dihoekoem mati, sabenernja bisa dipake djoega dalem segala matjem kadosa‘an, besar atawa ketjil, jang soedah oemoem terdjadi dalem pergaoelan hidoep dari manoesia. Kapan kita orang taoe siapa berboeat salah soedah pasti aken terhoekoem oleh itoe Algodjo Besar jang toekang memboenoeh dan menjiksa orang-orang berdosa, mengapatah kita moesti tjapein hati boeat mendendem, mengoetoek, menjoempahin dan ingin membales? Sabaliknja kita haroes mendjaga soepaja itoe kabentjian tida madjoe terlaloe djaoe hingga mendatengken Karma djelek bagi diri kita sendiri!