Tao Teh King/Bab 72

LXXII.

MENJINTA DIRI.

1. Kapan manoesia tida merasa takoet pada bahaja jang ada di depan mata, marika bisa bikin dirinja hadepken bahaja jang paling heibat.
2. Biarlah marika berhati-hati aken membesarin itoe roemah lantaran merasa kesel pada kesesekan jang lagi dihadepin.
3. Kapan ia tida bentji pada itoe roemah poenja sesek atawa ketjil, tida nanti bisa timboel itoe rasa kesel.
4. Inilah sebabnja kenapa orang jarg Boediman, sedeng sampe kenal harga dirinja, tida perna tondjolin itoe di moeka orang banjak.
5. Ia menjinta pada dirinja, tetapi tida menaro harga terlaloe tinggi.
6. Dengen begitoe ia singkirken kasombongan, dan bisa merasa poeas.

⁂

Menjinta dan menghargain diri sendiri, menoeroet Lao Tze, boekan ada sikep jang salah, kaloe sadja djangan ditondjolin atawa dibanggain di moeka orang banjak.

Saorang jang tida merasa takoet, atawa biasa memandang ringan, pada bahaja ketjil jang tertampak di depan mata, achirnja bisa terdjeraemoes ka dalem bahaja jang paling heibat. Inilah, seperti soedah dierangin dalem beberapa fatsal jang laloe, lantaran segala kasoekeran besar bermoelahnja ketjil, hingga kapan tida didjaga bisa membahajaken. (Ajat 1).

Sasoedah mengoendjoek itoe ka'ada'an, soepaja orang berhati-hati dan djangan pandang ringan pada bahaja jang ada di depan mata, Lao Tze memberi inget soepaja orang mendjaga pada bahaja jang dateng dari dalem diri sendiri, jaitoe perasa'an bosen, kesel dan tida senang boeat oeroesan ketjil jang bisa bikin moentjoel kasoesahan besar, Oepama saorang jan tida betah dan merasa kesel lantaran sesek dan tjioetnja iapoenja roemah, sabelon ia rombak dan bikin loeas biarlah ia pikir dengen terliti, apa betoel kapan itoe roemah soedah dibesarin ia poenja kakeselan mendjadi linjap, dan apa tida manti moentjoel lagi laen kasoesahan jang lebih tida enak dari-pada apa jang ia alamin doeloean. Sebab djikaloe ia tida merasa djemoe atawa bentji pada katjioetannja itoe roemah, ia tida nanti kesel aken berdiam disitoe, Djadinja boekan itoe roemah, hanja iapoenja hati dan pikiran jang haroes dibetoelin lebih doeloe soepaja bisa menjotjoki sama itoe ka'ada'an.

Itoe roemah tjioet jang orang ingin rombak dan besarin tjoemah satoe pelambang sadja. Dalem kahidoepan seringkalih terdjadi apa-apa di sapoeter kita jang membikin kita orang merasa kesel dan tida senang. Toedjoean manoesia, terhadep sasoatoe ka'ada'an jang tida enak, baek dalem oeroesan negri, pakerdja'an, pergaoelan atawa poen adat kabiasa'an, adalah boeat basmi dan hapoesken itoe. Oepama, satoe kaoem boeroeh jang merasa gadjinja tida tjoekoep, atawa bekerdja terlaloe berat, maoe berdaja soepaja ditambah bajaran atawa djam bekerdja dikoerangin. Di negri-negri Barat, kapan perminta'annja kaoem boeroeh jang soedah bersariket tida diloeloesken, orang adaken pemogokan jang terkadang bikin antero negri djadi kaloet, Kasoedahannja, lantaran gadji koeli-koeli ada tinggi, barang kaperloean hidoep semingkin mahal, ongkos negri jadi naek, padjek-padjek semingkin berat, dan achirnja harga oewang dibikin djatoh, hingga itoe pertambahan gadji tida saberapa memberi kaoentoengan. Sabaliknja, lantaran tingginja oepahan kaoem boeroeh, barang kaloearan dari itoe negri djadi begitoe mahal hingga terdorong dari pasar-pasar kena disaingin oleh laen negri jang kaoem boeroehnja terima dibajar moerahan, Begitoelah achirnja timboel penganggoeran, jang membikin tanggoengan rahajat djadi semingkin berat. Dan negri-negri koeat jang tida bisa kerdja'an tjoekoep pada rahajatnja, tjoba mentjari kalonggaran dengen maloemken perang boeat rampok daerah negri laen, taloekin laen bangsa atawa saling reboet tanah-tanah djadjahan, hingga kasoedahannja antero doenia djadi kaloet lantaran petjahnja peperangan heibat jang menimboelken kasangsara'an besar.

Manoesia poenja kainginan kouwkati, jang tjoemah pikir kapentingan diri sendiri sadja, memang tida ada abisnja. Maka Lao Tze madjoeken pikiran, mana libeh baek, itoe roemah jang dirasain sesek dan tjioet lantes dirombak soepaja lebih besar, atawa orang jang mengisi-in tjoba tjotjokin diri sama itoe ka'ada'an, kerna sabagian besar dari manoesia poenja pengeloehan boekan lantaran kahidoepannja memang soedah tida tertahan lagi, hanja kabanjakan dari sebab hatinja jang temaha tida merasa poeas dan ingin perobahan, soepaja bisa dapet lebih banjak atawa lebih baek dari-pada jang soedah atawa lagi dihadepin. Dengen begitae penghidoepannja djadi bergontjang teroes-meneroes, tida bisa alamin katentreman, sebab baroe sadja satoe kainginan terkaboel, lantes moentjoel lagi ampat lima jang laen, boeat mana marika moesti bertreak kombali dan bergoelet teroes sampe achirnja dateng bintjana heibat jang menimpah pada marika samoea.

Dalem penghidoepan masing-masing orang sendiri poen ini peladjaran bisa diboektiken kabenerannja. Oepama saorang anak prampoean atawa djedjaka model koeno dalem soeal pedjodoan biasa serahken nasif di tangan orang toeanja, dan terima dengen baek itoe pasangan jang orang toeanja tjari atawa pilih, lantaran iaorang tida kandoeng kainginan atawa angen-angen sendiri dalem hal mentjari djodo. Kahidoepan marika belon tentoe ada lebih tjilaka dari-pada orang-orang moeda modern jang sabagian besar moesti alamken kadoeka'an dan rasa kadoehoeng heibat dari pertjinta'an gagal, dikapiranin oleh kekasihnja, dapet anak zonder menika, dan laen-laen kagetiran lagi. Anak-anak prampoean koeno jang dipingit, dan merasa poeas dengen sedikit kasenangan jang didapet dalem roemahnja, belon tentoe ada lebih sangsara dari anak-anak prampoean modern jang dioembar, jang alamin banjak djengkel lantaran tida poenja pakean baroe boeat pesiar sama kawan-kawan, tida poenja doeit boeat beli tennis racket, boeat krul ramboet dan laen-laen kaperloean dari satoe gadis modern!

Djadinja itoe kaberoentoengan jang Lao Tze oendjoek boekan bergantoeng dari loear, hanja moesti dateng dari dalem hati, jang merasa girang dan poeas dalem kasaderhana'an Dengen berontak, melawan dan ingin merobah itoe segala ka'ada'an, orang tida bisa bikin kadoedoeka'annja betoel-betoel djadi lebih baek dan menjenangken, sebab kita-orang moesti insjaf jang boeat itoe perbaekan jang kita inginken, kita sendiri tida bekerdja apa-apa, atawa tjoemah membantoe sedikit sekalih, boeat bikin itoe angen-angen berwoedjoet. Kabanjakan manoesia tjoemah bisa tjomelin laen orang, ingin laen orang berboeat ini atawa itoe, sedeng ia sendiri tjoemah maoe terima enaknja sadja. Maka kasoedahannja itoe segala gerakan boeat dapetken apa-apa jang lebih baek, boekan datengken kaberkahan, hanja dalem kabanjakan hal malah menimboelken karoewetan-karoewetan baroe (Ajat 1-3).

Maka itoe saorang boediman, maski ia sampe kenal harga diri atawa kapandeannja, tida maoe tondjolin itoe pada orang banjak, dan maski ia tjinta dirinja sendiri, tida pandang itoe sang diri terlaloe tinggi — tida maoe tjoba tjari lebih dari-pada apa jang ia soedah dapet, sebab ia bisa merasa senang dan poeas dalem segala kaada'an. Dan itoe watek saderhana, merendah dan tida sombong, membikin ia selamanja tinggal beroentoeng, hingga kahidoepannja selaloe aman dan tentrem. (Ajat 4-6).