Tao Teh King/Bab 71

Dari Wikisumber bahasa Indonesia, perpustakaan bebas
Tao Teh King diterjemahkan oleh Kwee Tek Hoay
Bab 71

LXXI.

PENJAKITNJA PENGATAOEAN.

  1. Mengataoei diri sendiri poenja kabodoan itoelah ada bagian jang paling berharga dari pengataoean.
  2. Tinggal bodo dari itoe matjem pengataoean ada satoe penjakit.
  3. Djikaloe orang pandang itoe kabodoan sabagi penjakit, ia aken lekas dibikin semboeh.
  4. Orang boediman ada terbebas dari ini penjakit.
  5. Dari sebab ia pandang itoe sabagi penjakit, maka ia bisa lolosken dirinja.

Orang Soenda ada poenja ini sjairan :

Daoen hanggasa tjongona,
Lain ekeur toetoelisan;
Anoe ngarasa bodona,
Lain djalma bodo pisan.

Tapi Lao Tze oendjoek lebih djelas lagi dengen membilang, antara segala pengataoean, jang paling berharga ada pengataoean atas diri sendiri poenja kabodoan.

Helaas! berapa banjak manoesia jang aken terloepoet dari karoegian, kedoehoeng, kamenjeselan, kadoeka'an dan kasangsara'an, djikaloe ia siang-siang soedah insjaf atas kabodoannja diri sendiri!

Manoesia dapet kamadjoean, djadi tjerdik dan pande, dari sakean banjak pengalaman, jang kabanjakan ada sanget pait dan getir, sabelonnja ia djadi tersedar. Saorang jang tida bisa insjaf atas kabodoan dan kakoerangannja, hanja selaloe anggep dirinja paling pande dan pinter sendiri — tegesnja orang jang bandel dan koekoeh dalem kasombongannja — itoelah ada sama djoega mendapet satoe penjakit, jang ia tida insjaf ada menjengkrem pada dirinja, hingga sabagitoe lama ia tida bisa kenal dan pandang itoe sebagi satoe penjakit jang berbahaja, tida nanti bisa disemboehin. (Ajat 1-3).

Satoe orang jang dapet nama Boediman, jaitoelah jang bisa bikin dirinja terbebas dari itoe matjem penjakit — jang soedah insjaf atas segala kabodoannja, dan lantaran soedah taoe sifatnja itoe penjakit, maka ia tida bisa diganggoe lagi.

Apa jang dinamaken „kasoetjian” sabetoelnja boekan barang jang orang koedoe tjari, kedjer dan koempoelin dalem dirinja, hanja menoeroet Lao Tze poenja peladjaran, nanti bisa didapet sendiri dengen tida banjak soesah kaloe sadja orang bisa singkirken itoe „penjakit” jang beroepa kabodoan, di dalem mana ada terselip kasombongan, kaserakahan, ka'angkoehan dan laen-laen lagi jang melipoeti diri manoesia berlapis-lapis, hingga kaliatannja sanget mendjidjiken. Kapan kita memandang aer di soengei jang sanget boetek, kotor, mesoem dan berbaoe batjin, kita poen bisa lantes mengarti jang sifatnja itoe aer boekan begitoe, kerna waktoe baroe mengalir dari soembernja ada bening, bersih dan sedep diminoem. Kaloe achirnja kaliatan mendjidjiken, inilah ada dari lantaran itoe aer telah kamasoekan sanget banjak kotoran — itoe manoesia djadi boesoek lantaran terdjeroemoes dalem hawa nafsoe cheiwani — dan kapan itoe aer soedah dibersihken dari segala loempoer dan laen-laen kotoran jang mengerem di dalemnja; dan disaring dengen hati-hati, ia lantes djadi bening kombali seperti sediakala. Begitoe poen manoesia, jang tjoemah moesti singkirken atawa moesnaken segala hawa nafsoe dan pikirannja jang bersifat rendah, aken bisa sampe dalem kasoetjian jang sampoerna, jaitoe jang Lao Tze namaken „Bersatoe dengen Tao.” (Ajat 4,5).