Tao Teh King/Bab 65

LXV.

KABEDJIKAN JANG SADERHANA.

1. Orang-orang di djeman koeno jang hidoep menoeroet Tao tida goenaken itoe aken bikin rahajat mendjadi sedar, hanja malah mendjaga soepaja marika djadi tinggal dalem kasaderhana'an menoeroet natuur.
2. Kasoekerannja memerentah rahajat adalah lantaran terlaloe banjak menggoenaken atoeran.
3. Siapa menjoba aken memerentah satoe karadja'an dengen menggoenaken banjak atoeran, ialah mendjadi satoe peroesak samentara jang memerentah zonder adaken wet-wet, ia ada djadi satoe berkah.
4. Mengenal ini doea sifat itoelah artinja taoe bagimana moesti pegang perentah dengan sampoerna jang boleh diboeat toeladan, dan kapan ini azas dipernahken teroes-meneroes di depan mata, itoelah dinamaken kabedjikan jang saderhana.
5. Ini kabedjikan saderhana ada amat dalem dan loeas, dan maskipoen pertama kaliatannja ada bertentangan pada laen-laen tjara jang orang biasa. goenaken, tetapi komoedian nanti membawa kaberesan sampoerna jang menjotjoki dengen sifatnja Alam.

⁂

Disini ada dibitjaraken soeal memerentah negri, jang boeat orang biasa, jang tida perna taro perhatian pada politiek atawa oeroesan pamerentahan, brangkalih tida gampang boeat mengarti maksoed dari ini peladjaran dengen sapenoehnja.

Aken tetapi barang siapa radjin mengamat-amati pada kakaloetan di mana-mana negri pada djeman sekarang, nanti lantes bisa liat bahoea soember dari itoe segala gontjangan dan perledakan politiek, jang mengenain oeroesan dalem atawa loear negri dari masing-masing bangsa, atsalnja dari lantaran pada pamerentahan ada digoenaken terlaloe banjak atoeran jang membikin penghidoepan rahajat boleh dibilang sama sekalih soedah terlipoet oleh wet; apalagi di djeman sekarang, dimana segala oeroesan jang berhoeboeng sama economie ada ditilik dan diatoer oleh negri, jang tentoeken djoega gadjinja kaoem boeroeh, lamanja djam bekerdja, banjaknja hari mengaso, toendjangan di waktoe sakit atawa menganggoer, dan sabaginja. Laen dari begitoe pada masing-masing golongan ada terdapet persariketan boeat mendjaga kapentingan berame, jang haloeannja kabanjakan kouwkati, kerna aken goena kasenangan atawa kabaekan dari fihaknja, marika tida perdoeliken karoegian dan kasoekeran dari fihak jang laen. Persariketan kaoem boeroeh tida soeka satoe fabriek pake pegawe jang boekan kaoemnja, tida perdoeli itoe orang-orang djadi mati kalaparan. Demikian poen gerakan dari kaoem prampoean jang ingin dapet hak penoeh satjara lelaki dan reboet sasoeatoe pakerdja'an jang marika biasa djalanken, kasoedahannja tjoemah membikin banjak lelaki djadi werkloos. Dan ini samoea ada boeah dari itoe roepa-roepa atoeran aken bikin rahajat djadi pinter, madjoe dan terӓtoer beres menoeroet wet, hingga kabedjikan satjara natuur, jang soedah berada dalem dirinja sasoeatoe manoesia, tida dapet tjoekoep kasempetan aken kasih oendjoek roepanja. Dan kasoedahan dari ini ka'ada'an, membikin dalem itoe negri-negri tida berentinja timboel gontjangan, seperti pemogokan, kariboetan politiek, pembrontakan dan laen-laen lagi, jang membikin kaloetnja doenia. Angen-angen emancipatie (hak sama rata dengen lelaki) dari fihak prampoean, menjebabken semingkin koerang djoemblah lelaki jang maoe djadi soeami dan ajah, kerna koeatir dirongrong dan diperboedakin oleh istrinja, jang tjerdik dan pinter dan mempoenjai kamaoean sendiri, hingga banjak gadis djadi prawan kolot dan djoemblah kalahiran merosot toeroen, jang bisa bikin kabangsa'an djadi loedes. Ini samoea ada hatsil dari haloean aken bikin „sedar dan madjoe” pada rahajat, dan dilemparken ka samping itoe kasaderhana'an menoeroet natuur. (Ajat 1-3).

Satoe kepala pamerentah jang pande dan haroes didjadiken toeladan, jaitoelah jang kenal betoel segala kadjahatan dan kabaekannja itoe doea matjem tjara — memerentah dengen kakoeatan wet, dan memerentah menoeroet kasaderhana'annja natuur. Kapan ia bisa kamoekaken teroes-meneroes itoe tjara jang belakangan, inilah berirti ia soedah bisa sampeken itoe kabedjikan saderhana jang paling baek dan sampoerna sendiri. Tapi boeat bisa djalanken itoe pamerentahan jang tjotjok sama Tao, orang koedoe mempoenjai pengartian loeas dan dalem, jang djadi djoega sifatnja itoe kabedjikan saderhana. Orang jang pengartiannja tjoepet tida nanti bisa hargain pada ini peladjaran, sebab perhatiannja tjoemah ditoedjoeken pada apa jang ada di depan mata, zonder pikir kasoekeran jang aken moentjoel di hari nanti. Oepama, banjak orang sanget kagoemin pada kasopanan dan kamadjoean satjara Barat, sedeng sabetoelnja itoe matjem kasopanan seperti jang tertampak sekarang ini, jang bikin bangsa koelit poetih terpandang besar dan berkoeasa, tjoemah baroe berdjalan boeat sedikit abad, hingga belon tjoekoep mendapet oedjian dari sang tempo. Antara bangsa-bangsa koeno ada banjak jang mendadak madjoe dengen pesat, berkoeasa besar dan sanget berpengaroeh — seperti bangsa Phoeniciers, Assijriers, Troyers, Carthagers dan laen-laen lagi — tapi berselang beberapa abad telah djadi moesna dan kasopanannja loedes; malah kabesaran dan kamadjoean jang begitoe tegoeh dan oelet dari Egypte, Griek dan Rome, poen sekarang soedah linjap. Maka kapan ini samoea dibanding sama kasopanan Tionghoa jang soedah berdjalan lebih dari 5000 taon dngen berida di bawah pengaroehnja Too Kauw, siapakah bisa bilang pikiran Lao Tze ada keliroe? (Ajat 4-5).