Tao Teh King/Bab 58

LVIII.

MEMBIARKEN LAEN-LAEN ORANG PERBAEKI DIRINJA SENDIRI.

1. Satoe pamerentah jang merdika dan adil memberi kasempetan pada rahajat aken mentjari kamadjoean sendiri.
2. Djikaloe iloe pamerentah ada kedjem dan memeres, rahajat mendjadi terlindes dan bersangsara.
3. Kasangsara'an hanja ada sabagi bajangan dari kaberoentoengan.
4. Kaberoentoengan hanja ada sabagi mantel dari kasangsara'an.
5. Kapankah ini ka'ada'an aken berächir?
6. Djikaloe kita lepasken kadjoedjoeran, kapalsoean dan katjoerangan aken oendjoek roepanja; dan apa jang „baek" dalem perdjalanannja aken memberi tempat pada apa jang „djahat".
7. Sasoenggoehnja manoesia soedah lama ber­ada di bawah awan item.
8. Maka itoe saorang boediman, maskipoen penoeh kadjoedjoeran, tida pernah pahat dan oekir laen orang.
9. la berlakoe bener, tetapi tida menjelah pada laen orang.
10. la bertabeat lempeng, tapi tida lempengin orang-orang laen.
11. Ia dapat penerangan, tetapi tida pernah menghina dengen iapoenja kagoemilangan.

⁂

 Apa jang ditoetoerken dalem ini fatsal ada samboengan dari fatsal jang laloe, dengen di­tambah sama beberapa katerangan baroe jang sanget penting.

Kita soedah bilang toedjoeannja Lao Tze poenja peladjaran adalah soepaja jang mendjadi kepala pamerentah djangan soeka menggretjok dan tjoba lahirken atoeran-atoeran boeat memperbaeki dan menjopanken rahajat, tetapi boe­kan aken membiarin rahajat terlipoet dalem ge­lap goelita, hanja soepaja marika madjoe dalem ka'ada'an sawadjarnja, menoeroet natuur, boekan dengen paksa'an. Ini toedjoean sekarang bisa diliat dari boenjinja ajat 1, jang membilang pamerentahan jang adil dan merdika memberi kasempetan pada rahajat aken mentjari kamadjoean sendiri, zonder koedoe dipimpin atawa moesti menaloek pada kamaoeannja laen-laen orang.

Dalem soeal kabatinan ini matjem peladjaran ada penting sekalih, sebab seperti dalem Buddhisme ada oendjoek, sasoeatoe orang bisa dapetken kasampoerna'an atas ichtiar dan kamaoean sendiri, traoesah koedoe mengèkor pada laen-laen orang. Tapi Lao Tze poenja toedjoean boekan sadja dalem kamadjoean batin, hanja pada kahidoepan lahir poen haroes didjalanken atoeran aken memberi kamerdika'an penoeh pada sasoeatoe rahajat soepaja berichtiar mentjari kamadjoean sendiri, seperti sekarang dalem negri-negri jang terätoer rapih itoe kakoeasa'an ada dipetjah-petjah hingga pada provincie, residentie, kota-kota, dan malah desa-desa, diberi kakoeasa'an aken pegang prentah dan atoer kaberesan sendiri dengen adanja berbagi bagi raad atawa madjelis. Kapan sasoeatoe orang bisa memerentah dirinja sendiri dengen menggoenaken pengaroehnja Tao jang bersifat saderhana dan tida toeroetin nafsoe, siapakah bisa bilang Jang doenia tida aken mendjadi tentrem ? Ini angen-angen bisa disampeken kapan jang mendjadi radja, pembesar-pembesar dan teroes sampe pada orang biasa, masing-masing hidoep menoeroet Tao, tida mendesek aken memegang koeasa dan memerentah satoe pada laen, hanja masing-masing penoehken sadja kawadjiban sen­diri menoeroet andjoeran dari marika poenja sataoe hati, jang diwoejoetken di dalem itoe Seng atawa manoesia poenja watek aseli, (Ajat 1).

Satoe pamerentah jang berlakoe bengis dan adaken padjek berat, biar poen dengen maksoed boeat kabaekan oemoem, tida oeroeng membi­kin rahajat merasa tertindes dan bersangsara, dan itoe kasangsara'an ada sabagi bajangan dari kaberoentoengan, sabagi djoega itoe kaberoenfoengan ada mantel atawa tjadir dari kasangsara'an. Orang merasa dirinja sengsara lantaran ia soedah kenal apa jang dinamain kaberoentoengan, dan orang merasaken dirinja beroentoeng lantaran soedah taoe bagimana sifatnja sangsara. Begitoelah sangsara dan beroentoeng dateng saling bergantian dengen tida ada achirnja, sebab begitoe lekas orang lepas­ken kadjoedjoeran, lantes kapalsoean dan katjoerangan oendjoek roepanja ; dan apa jang dinamain baek lama-lama nanti memberi tempat pada sifat djahat, seperti siang terganti oleh malem dan terang oleh gelap. Itoelah sebabnja maka kahidoepan manoesia selaloe ada di-ikoetin oleh awan item, sabegitoe lama orang masih oetamaken sifat jang satoe dengen tida perdoeliken pada jang laen. Kasoedahannja, begitoe lekas satoe pengoeroes negri tjoba adjar ma­noesia boeat djadi „baek" lantes orang banjak djadi gemper riboetin perboeatan jang dipandang „djahat". Begitoe lekas satoe moralist mengadjar manoesia boeat kenal „kasopanan", lantes moelai orang riboetin kalakoean jang dianggep „biadab". Jang paling tjilaka, dari antara sariboe orang jang gemer memaki dan menghina laen orang „Siauw-djin" belon tentoe ada satoe jang bisa poenjaken bajangan dari satoe „Koen-tjoe", hingga itoe atoeran boeat mengasih kenal perbeda'an antara Koen-tjoe dengen Sauw-djin kasoedahannja boekan bikin di doenia ada lebih banjak Koen-tjoe, hanja kasih gegaman pada orang-orang jang berhati boeroek dan dengki aken menista „Siauw-djin" satoe pada laen, dan orang-orang jang bangga dan sombong atawa palsoe, poera-poera mendjadi „Koen tjoe" tetiron! (Ajat 2-7).

Maka itoe saorang boediman tida pernah mendesek aken bikin laen orang djadi sama seperti dirinja dalem priboedi dan kasopanan ; inilah boekan lantaran koeatir disaingin, hanja kerna mengarti pada wet natuur, dimana tida satoe poehoen nanti berkembang dan berboeah kapan belon temponja, dan kamadjoean batin manoe­sia nanti dateng dari dalem dirinja sendiri, tida koedoe didesek dari loear.

Djadinja saorang jang mengenal Tao, moesti mempoenjai sifat sabar dan menaoein, hingga maskipoen ia sendiri selaloe berlakoe bener, ia tida menjelah pada jang berdjalan salah ; maski ia soedah bisa memilih djalanan loeroes, ia tida membentji pada jang soeka memaen di loeroeng jang bengkok ; biar poen ia soedah dapet tjoekoep penerangan, ia tida soeka menghina dan bikin laen orang djadi silo sama kagoemilangannja. Inilah jang dibilang memandang sama-rata pa­da samoea machloek, jang ditjintaken seperti soedara-soedara sendiri, hingga sabaliknja dari riboet menjelah dan membentji, ia taro kasihan dan menghampoera pada tjatjat dan kalemahan soedara-soedaranja jang masih berada dalem kagelapan. (Ajat 9-11).