Tao Teh King/Bab 59

LIX.

MEMELIHARA ITOE TAO.

1. Dalem hal memerentah manoesia dan mendjalanken kawadjiban pada Thian tida ada satoe apa jang begitoe berfaedah seperti kasaderhana'an.
2. Tjoemah dengen kasaderhana'an orang bisa sampeken iapoenja sifat pertama jang sawadjarnja.
3. Kapan soedah kombali pada iapoenja sifat pertama jang sawadjarnja, adalah sama djoega ia dapet poenjaken pri kabedjikan jang tida berwates.
4. Dengen kabedjikan jang tida berwates tida satoe apa jang ia tida sanggoep lakoeken.
5. Kapan tida satoe apa jang ia tida sanggoep lakoeken, orang poen tida bisa taoe sampe be­rapa djaoe kakoeasa'annja nanti mendjalar.
6. Dan kapan orang tida bisa taoe sampe berapa djaoe kakoeasa'annja nanti mendjalar, ia ada sampe tjakep boeat memerentah atas saboeah karadja'an.
7. Orang jang begitoe ada pegang poko resia aken memerentah, dan aken tinggal terpelihara boeat salama-lamanja.
8. Ia ada sabagi poehoen jang akarnja dalem dan bongkotnja koeat.
9. Tjara begitoe orang bisa hidoep lama.

⁂

Kombali disini,, boeat kasakean kalihnja, Lao Tze oendjoek kafaedahannja berlakoe sadeçhana, sebab boekan sadja menjotjokin dengen sifatnja Tao, tapi djoega bisa membikin orang dapetken iapoenja sifat pertama jang sawadjarnja. Tapi ini oedjar ada sedikit gelap. Apatah jang dinamakan„ sifat pertama jang sawadjarnja"? Jaitoelah sifat dari satoe baji atawa anak ketjil, jang segala perboeatan dan kalakoeannja ada bersih dari kadosa'an, sebab tida kandoeng maksoed boeat tarik kaoentoengan, kamashoeran atawa kapoedjian, dan djoega tida berniat aken kasih oendjoek kapandean, katjerdikan, kagoemilangan ; dengen pendek : bersih dari sifat kouwkati, temaha, serakah, tipoe-daja, djoeal laga, atawa maksoed tersemboeni, hanja segala perboeatannja ada menoeroet natuur. Inilah berarti, dengen berlakoe seperti anak ketjil jang tida mengenal kadosa'an, iloe orang hidoep di dalem, dan persatoeken dirinja pada, itoe Tao jang maha besar. (Ajat 1 dan 2).

Kapan soedah gaboengin diri hingga mendjadi satoe sama Tao, ia poen djadi mempoenjai kabedjikan tida berwates, jang membikin ia bisa lakoeken segala apa, dan kakoeasa'annja nanti mendjalar saloeas- loeasnja, hingga ia ada sampe tjakep aken memegang prentah atas saboeah karadja'an, kerna ia soedah poenjaken resia aken pegang prentah, dan kakoeasa'annja nanti ting­gal kekel seperti poehoen jang soedah beräkar dalem dan bongkotnja koeat hingga bisa ting­gal hidoep dalem tempo jang amat lama. Pendeknja : siapa soedah bersatoe atawa bekerdja menoeroet Tao, ia aken berkoeasa atas doenia dan bisa memerentah manoesia seperti djoega itoe Tao, jang mengatoer kaberesan di seloeroeh alam dengen diam-diam.

Tetapi itoe perkata'an „memerentah karadja'an" banjak orang di djeman sekarang ada sangsiken. Bagimanatah saorang jang berlakoe seperti anak-anak, atawa jang hidoep saderhana, ketjilin diri, dan tida poenja banjak kamaoean, bisa pegang perentah atas saboeah negri jang meminta kapandean dan tanggoengan berat?

Memang kaliatannja ini matjem peladjaran ada samar dan tida masoek di akal kapan orang tjoemah pikir kawadjiban dan kadoedoekannja saorang Radja atawa Kepala Pamerentah dalem doenia djeman sekarang. Tapi boeat di Tiong­kok pada tempo doeloe ada laen sekalih. Rahajat jang dapet makan tjoekoep dan tida dipêrês oleh pamerentah ada gampang dipimpin, hingga boekan sadja Lao Tze, malah Khong Tjoe poen pertjaja jang katentreman bisa lantes tertjipta kapan satoe negri mempoenjai radja jang adil dan berlakoe bersih hingga bisa diboeat toeladan oleh sekalian rahajat. Laen dari itoe saorang Radja jang memerentah menoeroet Tao soedah boekan teritoeng lagi manoesia bia­sa, hanja termasoek dalem kalangan Sengdjin atawa Nabi. Orang poen soedah taoe bagimana Jesus Kristus soedah berdiriken „Karadja'an Sorga“ dan Buddha poenja „karadja'an“ dibi­lang ada lebih besar dan lebih kekel dari samoea karadja'an doenia, sebab berdasar atas katjinta'an pada manoesia. Maka itoe perkata'an „radja“ dan „memerentah“ serta „tinggal kekel,“ tida selaloe koedoe diartiken kakoeasa'an boeat pegang perentah atas saboeah negri dengen tetep selamanja, hanja bisa djoega dimaksoedken kakoeasa'an rohani jang diampoenjai oleh sasoeatoe orang jang soedah bisa hidoep menoe­roet Tao, kerna dalem ini persatoean sama itoe kakoeasa'an jang paling besar di seloeroeh alam, ia poen djadi toeroet berkoeasa djoega di seloeroeh doenia jang beräda daletn lingkoengannja Tao. Dan satoe Sengdjin jang mendjalanken Kabeneran menoeroet Tao goena kaselametan manoesia, biar poen tida berdoedoek di atas tachta karadja'an, tinggal dihormat dan di djoengdjoeng oieh sekalian rahajat, terkadang le­bih dari satoe radja. Dan sampe sekarang Khong Tjoe ada dihormatken lebih tinggi dari-pada samoea keizer-keizer jang pernah pegang prentah di Tiongkok. Inilah ada apa jang Lao Tze maksoedken dengen perkata'an „kakoeasa'an mendjalar", „mernerentah karadja'an", „terpelihara selamanja", „bisa hidoep lama", dan sabaginja lagi. Soedah terang itoe oedjar-oedjar boekan bermaksoed, kapan soedah bersatoe dengen Tao lantes itoe orang mempoenjai kakoeasa'an besarsabagi satoe „Allah", dan djoega boekan ia hidoep lebih lama dari laen-laen manoesia, hanja itoe Sengdjin poenja priboedi aken berpengaroeh, dan dirinja aken di-inget dan didjoengdjoeng, lebih lama dari laen-laen orang. (A jat 3-9).

Tao Teh King (page 273 crop)