Tao Teh King/Bab 48

Dari Wikisumber bahasa Indonesia, perpustakaan bebas
Loncat ke navigasi Loncat ke pencarian
Tao Teh King diterjemahkan oleh Kwee Tek Hoay
Bab 48

  1. Kadjengkelan badan dan pikiran satiap hafi djadi berta-mbah, dalem pertjoba'an boeat dapet pengataoean.
  2. Tapi ini kadjengkelan satiap hari djadi semingkin koerang dengen djalan peladjarin Tao.
  3. Koerangin dan koerangin lagi kaoe poenja pertjoba'an (aken mentjari pengataoean) sampe tida katinggalan satoe apa lagi jang kaoe hen­dak lakoeken.
  4. Dengen tida-berboeat, tida ada satoe apa jang kaoe tida nanti mampoe kerdjaken.
  5. Orang bisa memerèntah doenia dengen antepin segala apa berdjalan menoeroet tjaranja sendiri.
  6. Tapi siapa selaloe maoe tjoba lakoeken ini atawa itoe, ialah tida tjotjok boeat pegang perintah pada doenia.

Dalem fatsai XLI ajat 3, Lao Tze ada bilang :— „Kapan saorang bodo mendenger Tao, iatertawain terpingkel-pingkel.”

Kita rasa, oedjar-oedjar dalem fatsai di atas, kapan dikasih denger pada orang-orang jang tida perna perhatikan philosofie kabatinan, nistjaja samoeanja nanti tertawa terpingkel-pingkel, maski djoega marika boekan teritoeng „bodo”, kerna apa jang diädjar disitoe kaliatannja ada sänget bertentajigan sama toedjoean oemoem dari manoesia.

Tapi marilah sekarang kita-orang preksa, apakah betoel itoe oedjar-oedjar samoea tida masoek di akal?

Pertama, haroeslah orang mengarti betoel apa itoe jang dinamain pengataoean, bagimana toedjoeannja dan ka mana achirnja.

Bagi orang jang kabanjakan, mentjari pe­ngataoean itoe teroetama boeat bikin dirinja pinter, soepaja gampang tjari makan, dapet kadoedoekan jang tinggi dan terhormat dalem pergaoelan, koempoel kakaja'an dan sabaginja lagi. Boeat dapetken itoe kapinteran, kaoentoengan bagoes dan kadoedoekan jang moelja, orang moesti bergoelet keras moelai dari bangkoe sekola sampe mendjadi aki-aki jang bongkok dan ompong dengen belon tentoe bisa berhatsil. Dan itoe sedikit orang jang kaliatannja „berhat­sil” dengen goenaken kapinteran dan katjerdikannja, belon tentoe hidoepnja betoel-betoel beroentoeng dan tentrem, kerna dalem doenia selaloe ada sadja soeal-soeal jang dateng mengganggoe dan menjoesahken. Maka boekan sadja Lao Tze, hanja samoea Nabi-nabi dan Goeroe-goeroe Doe­nia tida benerken pada itoe matjem toedjoean hidoep.

Ada djoega orang jang kandoeng ingetan hen­dak goenaken pengataoeannja boeat „menoeloeng sasama manoesia”. Tapi apa jang ia namaken „sasama manoesia” kabanjakan tjoemah berwates pada iapoenja bangsa atawa negri, kaloe boekan tjoemah pada familie dan sobat-sobatnja. Dan itoe kapinteran jang dipake boeat menoeloeng bangsa dan negri, toedjoeannja seringkalih meroegiken pada laen bangsa dan laen negri. Maski tadinja ia tida kandoeng pikiran aken membentji pada siapa djoega, tapi lantaran hen­dak toeloeng familie, sobat, bangsa, negri enz. lantes ia moesti berfihak dan toeroet terdjoen dalem persaingan dan pergoeietan matimatian. Itoe kapinteran jang dipake boeat memadjoeken industrie dan perdagangan dari satoe negri — oepamanja Japan — tjoemah membikin dilaen negri banjak orang djadi werkloos lantaran perdagangannja moendoer kena disaingin. Begitoelah ampir segala tjabang dari penghidoepan ada mendjoeroes ka persaingan jang menjebabken ini doenia tambah lama semingkin kaloet, kerna orang tjoemah kedjer pengataoean dan kapinteran sakedar boeat sampeken iapoenja kainginan doenia jang selaloe tambah-menambah zonder mengenal wates dan tida ada abisnja, sampe terbit bentroken jang achirnja menimboelken perledakan dan kamoesna'an. Begitoelah resultaat dari itoe pertjoba'an boeat dapetken pengataoean, kabanjakan tjoemah timboelken kadjengkelan dan kasoesahan badan dan pikiran jang senantiasa bertambah. (Ajat 1).

Tapi kapan orang bisa berlakoe lebih saderhana dalem hidoepnja, dengen djalan koerangin nafsoe dan kainginannja dan ketjilin pertjoba'an ini atawa itoe jang ditoedjoeken pada kaoentoengan doenia, lantes itoe ganggoean jang beroepa kadjengkelan djadi semingkin koerang. Inilah soedah diakkoe oleh sasoeatoe orang jang berpengalaman. Dan djikaloe ini pengoerangan dilakoeken teroes sampe tida katinggalan satoe apa lagi jang dikedjer atawa diinginken — tida pikir satoe apa boeat kaoentoengan diri sendiri — di itoe waktoe orang moelai dapet persatoean sama Tao, kerna deugen menoentoet penghidoepan saderhana, pikiran tentrem dan tida kouwkati, ia tida bisa ketarik ka dalem pergoe­letan dan kakaloetan doenia — ia tida merasa kakoerangan satoe apa hingga hidoepnja tinggal dalem katentreman dan kapoeasan. Dengen bersatoe di dalem Tao ia djadi poenjaken segala apa jang ada dalem doenia. Dari sebab hatinja tida kapingin, itoe emas, inten, kakoeasa'an, kamashoeran dan laen-laen tida poenja pengaroeh aken bikin ia djengkel atawa sedih. Maski tida berboeat apa-apa ia toeroet kerdjaken segala, se­bab soedah bersatoe di dalem Natuur. (Ajat 1-4). Natuur poenja atoeran tida ditoelis dalem boekoe wet, tida disiarken pada orang banjak, tapi tida ada jang bisa langgar. Pertjoba'an aken atoer djalannja penghidoepan manoesia menoeroet wet agama atawa moraal, tjoemah timboelken kakaloetan lantaran itoe segala wet dan atoeran doenia tjoemah bersifat samentara waktoe, menoeroet kaperloean oemoem dari itoe djeman. Sedeng begitoe evolutie manoesia ada mempoenjai banjak tingkatan jang berlaenan. Golongan jang pande tida perloe sama itoe wet sebab pengartiannja soedah meliwatin djaoe dari apa jang ditetepken dalem itoe atoeran hingga itoe wet-wet tjoemah djadi samatjem gandoelan jang menghalangin ; fihak jang masih bodo p oen kabanjakan tida merasa poeas sama itoe segala matjem atoeran dari moraal dan kasopanan, lantaran kapinterannja belon sampe hingga mendjadi sadja satoe ringkoesan tida enak dari mana marika berdaja aken lolosken diri dengen brontak atawa pake akal aloes dan berpoera-poera. Itoe Kepala Pamerentah jang radjin adaken segala matjem wet dari atoeran moraal dan kasopanan, sabaliknja dari menoeloeng dan membikin tentremnja rahajat, malah djadi ripoeh aken kedjer dan moesoehin itoe orang-orang pande jang tertawain marika poenja wet, atawa antjem, kep dan hoekoem itoe orang-orang bodo jang tida kenal atoeran atawa bikin pelanggaran.

Sasoeatoe wet, biar poen bagimana rapih, daerahnja soedah diwatesin, dan itoe orang-orang djahat jang tjerdik banjak jang dapet lobang aken lolosken diri dari djaringnja wet, Dan satoe wet jang adil, tjoemah djadi hoeroef mati kaloe beräda ditangan pembesar jang djahat dan bodo. Ini bisa diliat bagimana berpoeloehan millioen djiwa telah dibinasakan dalem permoesoehan agama lantaran orang artikan boenjinja kitab-kitab soetji dengen kliroe.

Brangkalih orang nanti bilang, kapan tida ada wet, orang-orang djahat tida bisa dihoekoem. Ini anggapan tida bener, kerna menoeroet Tao atawa Natuur wet, segala actie (perboeatan) selaloe menimboelken reactie (pembalesan) jang mendjadi sabagi imbangan. Kapan tida ada wet hingga negri djadi kaloet, orang-orang jang tida soeka meliat kadjahatan nanti bergerak sendiri aken membasmi. Di Tiongkok ada kabiasa'an, segala karewelan ketjil-katjil dan perselisihan da"lem oeroesan civiel, diberesin sadja oleh orang-orang toea dari satoe kampoeng, zonder mengadoe pada politie atawa hakim, dan tida kaoearin oewang riboean roepiah boeat bajar ladvocaat. Kapan satoe anak ada bersalah, iapoanja orang toea dan soedara-soedara toeroet menanggoeng, hal mana membikin dengan sendirinja orang djadi ngeri aken lakoekan kadja­hatan, hingga di dalam nagri bisa terdapet kaberesan zonder ada hakim, politie dan advocaat.

Laen dari itoe djangan diloepa, pada djamannja Lao Tze dan Khong Tjoe, pangaroehnja toeladan baek dari satoe kepala pamerentah ada besar sekalih, hingga satoe radja jang bedjik bisa bikin rahajatnja djadi baek dengen sendirinja zonder kaloearken wet-wet baroe dan atoer segala matjem perobahan, hanja antepin sadja orang ikoetin kabiasa'an jang soedah ada dan berlakoe dari djeman koeno. Laen dari itoe djàrigan diloepa, penghidoepan di Tiongkok pa­da djeman doeloe ada djaoe lebih saderhana dari djeman sekarang, dan apa jang dinamakan „wet" kabanjakan ada wet moraal jang mirip seperti atoeran agama. (Ajat 5,6).

Tao Teh King (page 221 crop)
Tao Teh King (page 221 crop)