Tao Teh King/Bab 49

XLIX.

KABEDJIKANNJA MENGALAH.

1. Orang boediman tida mempoenjai pikiran-pikiran tetep dan pasti jang dinamain kapoenjaannja sendiri.
2. Ia tjotjokin dirinja dengen pikiran dari laen-laen orang.
3. Pada perboeatan jang baek akoe nanti membales baek; pada perboeatan jang tida baek poen akoe nanti membales baek djoega.
4. Jang dinamaken pri kabedjikan jaitoelah kabaekan.
5. Pada jang setia akoe berlakoe setia; pada jang menjoerigain poen akoe bales dengen tare kapertjaja'an
6. Jang dinamaken pri kabedjikan jaitoelah kasetia'an.
7. Orang boediman hidoep di doenia dengen menahan nafsoe satjara saderhana, dan hatinja mendjalar dengen penoeh sympathie pada sega­la orang.
8. Orang banjak kasih padanja marika poenja kapertjaja'an, dan ia pandang marika samoea sabagi anak-anaknja.

⁂

Dalem ini fatsal poen kita ada dapetken tiga soeal berlaenan jang terädoek mendjadi satoe. Ajat 1 dan 2 moestinja terpisah dari ajat 3 sampe 6, sedeng ajat 7 dan 8 poen tida berhoeboeng dengen jang di sabelah atasan.

Apa jang dibitjarain dalem ajat 1 dan 2, ada mirip seperti diterangin dalem commentaar dari kitab Thay Hak fatsal X, dalem mana ada dioendjoek, saorang radja boediman haroes tjotjokin perboeatannja dengen satoe oekoeran soepaja djadi sama pada kainginannja rahajat, sebab dengen ini djalan ia nanti bisa tarik ra­hajat poenja hati, bikin marika beroentoeng dan negri mendjadi tentrem dan mamoer.

Tapi disini Lao Tze boekan tjoemah maksoedken kalakoean dari saorang boediman jang memererentah negri, hanja poedjiken soepaja orang djangan pake pikiran sendiri jang dipegang de­ngen tetep dan pasti, dan lebih baek tjotjokin diri sama pikiran dari laen-laen orang. Inilah memang ada tjara jang paling bener boeat djaoeken segala perbentrokan dan perbantahan, jang sering terdjadi pada orang jang koekoeh sama iapoenja pikiran atawa anggepan jang di­pandang paling betoel sendiri.

Kaliatannja ini peladjaran ada mengandjoerin orang berlakoe lemah, kerna oemoemnja dipan­dang manoesia jang tida poenja pikiran dan kamaoean sendiri ada paling tangpak dan tida bergoena bagi pergaoelan hidoep, hingga kaada'annja mirip seperti idioot. Tapi haroeslah dimengarti, dalem hal apa Lao Tze mengadjar soepaja orang tjotjokin diri sama pikiran publiek atawa orang banjak. Boeat bisa mengarti ini hal, lebih doeloe perloe difahamken, apa jang itoe orang banjak biasa pikir dan sampe brapa loeas marika poenja pengartian. Kapan menggoenaken ini pertimbangan, kasoedahannja kita tida dapetken laen, hanja jang diperhatiken atawa dipikirken oleh orang banjak tjoemah soeal-soeal tèktèkbengèk atawa jang menjangkoet pada kasenangan dan kapentingan sendiri jang bersifat kouwkati. Saorang, jang tentangin itoe toedjoean dari orang banjak dan tjoba soeroe marika berlakoe dermawan, djangan kouwkati, pegang tegoeh kasoetjian dan laen-laen peladjaran jang tinggi, pastilah sama djoega hendak antjoerken batoe sama tangan, hingga pakerdjaannja aken sia-sia. Maka boeat soeal-soeal kadoenia'an, jang berhoeboeng dengen siahwe atawa penghidoepan sahari-hari, ada lebih baek orang djangan soeka berlakoe koekoeh dan ta­rik oerat, kerna kapan manoesia poenja evolutie masih rendah, tida ada satoe Nabi, Orang Soetji, Boediman atawa Poedjonggo jang bisa merobah, hingga pertjampoerannja tjoemah timboelken kakaloetan dan melinjapken orang poenja katentreman, kerna itoe peladjaran tinggi marika belon sanggoep toeroet, hanja bisa petik sadja bagian lapisan loear, jang marika djalanken satjara palsoe dan poera-poera. Maka dengen tjotjokin diri sama pikirannja laen-laen orang boekan sa­dja ia terbebas dari segala bentrokan, malah bisa dapetken katentreman menoeroet tjaranja natuur, jang selaloe madjoe dengen tetep maski djoega tida memaksa dan mendjoeroengin.

Dengen begitoe kita bisa liat, soeal tida koe­koeh dengen pikiran sendiri dan tjotjokin ciri sama pikiran laen-laen orang, itoelah boekan dimaksoedken kaloe orang banjak berlakoe kedjemdan kouwkati, itoe orang boediman moesti toe­roet berlakoe begitoe djoega. Kapan ini pela­djaran demikian toedjoeannja, nistjaja Lao Tze tida adjar aken membales baek pada perboeatan djahat, dan taro pertjaja pada orang jang bertjoeriga, kerna ini matjem pikiran soedah terang tida nanti bisa disetoedjoein oleh orang banjak

Soeal tida menentangin pikiran laen orang dalem boekoe „Di bawah Kakinja Goeroe Soetji” dari Krishnamurti ada diberi katerangan begini:

„Kaoe moesti membedaken antara jang perloe dan tida perloe. Tinggal tetep sabagi batoe karang dimana soeal bener dan salah ada tersangkoet, kaoe haroes mengalah selamanja pada laen orang boeat segala oeroesan jang tida perloe. Sebab kaoe selaloe moesti berhati moerah dan lemah-lemboet, bisa menimbang dengen pantes dan bersedia aken menoeloeng dan melajanin, dengen beriken pada laen-laen orang itoe saroepa kamerdika'an penoeh jang kaoe ada perloe atawa ingin dapetken bagi dirimoe sendiri.“

Dan lagi:

„Maka itoe biasakenlah boeat lebih banjak mendengerin dari-pada bitjara; djangan madjoeken pikiran apa-apa katjoeali kaloe diminta dengen langsoeng boeat kaoe njataken pikiranmoe.“

Dari ini peladjaran orang bisa dapet taoe sabagian dari itoe sebab-sebab jang membikin ada lebih baek orang djangan bawa pikiran atawa maoenja sendiri dalem soeal-soeal jang koerang perloe. Tapi dalem oeroesan bener dan salah, sabagi djoega memegang tegoeh kasoetjian diri, orang moesti tinggal tetep dan tegoeh seperti batoe karang, djangan maoe menjerah atawa kena dipengaroehin oleh pikiran laen orang. Tapi ini sikep bisa dilakoeken zonder menghalangin laen-laen orang atawa tentangin publiek poenja anggepan, kerna oemoemnja itoe orang banjak tida nanti memoesoehin pada siapa jang tida perna ganggoe atawa toeroet tjampoer marika poenja oeroesan.

Ada banjak soeal jang publiek b'asa riboetin, bertengkar dan tarik oerat, sabenernja tjoemah berfaedah saliwatan, dan kasoedahannja tinggal tida berobah apa-apa maski digemperin bagimana heibat. Maka saorang boediman jang soedah bisa kenalin apa jang penting dan apa jang tida bergoena, lebih soeka tida menjataken pikiran apa-apa, hanja ikoetin sadja laen-laen orang, apalagi dalem soeal-soeal doenia, dimana itoe kabeneran dan kasalahan seringkalih bedanja tjoemah saramboet sadja. Maka kapan ditimbang dari ini djoeroesan, bisa diliat jang Lao Tze poenja peladjaran dalem ini hal ada menggenggem sari kabeneran jang moesti dapet penghargaan penoeh dari orang-orang jang pandjang pikiran. (Ajat 1, 2).

Dari sebab sifatnja pri kabedjikan ada baek, djoedjoer dan setia, maka bagi siapa jang hendak pegang tegoeh padanja tida ada tempat atawa pikiran lagi boeat berlakoe jang sabaliknja, hingga boekan sadja pada orang jang baek dan djoedjoer, hanja pada jang tida baek dan tida djoedjoer poen ia bales dengen kabaekan dan kadjoedjoeran. Ini poen ada bersetoedjoe dengen sifatnja natuur: apa orang menjomel lantaran oedjan terlaloe banjak, atawa mengeloeh dari panas terlaloe keras, toch itoe moesim oedjan dan moesim panas tinggal tetep seperti biasa. Sifatnja natuur tida mendendem dan membales djahat. Dan dari sebab Taoisme poenja dasar ada boeat menjotjoki penghidoepan satjara natuur, dengen woedjoet jang beroepa Tek atawa Kabedjikan, maka sikep mengalah dan tida membales djahat ada satoe hal sawadjarnja, jang moesti dipegang oleh siapa jang mendjalanin Tek Too.

Brangkalih orang nanti bilang, ini matjem peladjaran tida practisch bagi penghidoepan sahari-hari, Tapi djangan diloepa, dalem laen-laen bagian soedah diterangken kaperloeannja aken orang lepasken segala apa, djangan menggretjok pada segala oeroesan tèktèkbengèk, ketjilin diri sendiri, dan laen-iaen lagi. Ini peladjaran me­mang onpractisch atawa tida bisa dipake oleh marika jang masih bergoelet aken tjari kakaja'an, kabesaran, kamashoeran, kakwasa'an dan laen-laen kaoentoengan doenia. Tapi boeat saorang Taoist jang maoe hidoep menoeroet Tao, ini sifat mengalah dan tida maoe membales djahat boekan pakerdja'an jang terlaloe soesah, kerna lantaran tida kapingin mempoenjai atawa dapet apa-apa, segala pen djahat, pentjoeri, penipoe, pendjoesta, penghina dan sabaginja tida bisa bi­kin ia roegi, hingga tida ada sebab boeat mem­bales. Sabaliknja, dengen berdasar pada itoe kabedjikan paling tinggi jang ia djalanken, iapoen ada poenja pengaroeh aken menolak atawa mendjaoeken segala orang djahat, dan tarik disapoeternja hanja orang orang jang baek dan djoedjoer.

Dimana tida ada nadjis, laler idjo tida ada kaliatan, Dimanaada boenga haroem, tawon madoe dateng seliweran.

Maka orang jang pandang membales baek pada kadjahatan tida bisa didjalanken, itoelah lantaran ia masih soeka banjak tjampoer oeroes­an, dan kapingin poenjaken barang, doenia.(Ajat 3-6).

Boeat bisa djalanken itoe pri kabedjikan jang paling tinggi, satoe orang boediman moesti hidoep dalem doenia dengen saderhana dan me­nahan nafsoe, soepaja tida bisa dipengaroehin oleh doenia poenja segala matjem penarik jang membikin ia menjimpang dari toedjoean. Ia selaloe oendjoek sympathie atawa katjinta'an pada samoea orang, jang ia pandang sabagi anak-anaknja sendiri. Satoe ajah jang tjinta betoel pada anak-anaknja, tida membedaken antara jang tjakep dan berparas djelek, jang pinter dan jang bodo, jang gagah dan jang lemah, jang baek dan jang nakal, hanja katjinta'annja terbagi sama rata, Begitoelah itoe orang boediman tida bisa bentji pada orang jang djahat, hanja merasa kasian boeat kabodoan dan kasesatannja, jang pasti aken memberi kasoedahan djelek padanja. Dengen itoe sikep jang sama tengah dan tida menjebelah, tida soeka berfihak atawa memilih, ia bisa dapetken orang banjak poenja kapertjaja'an, dan satoe kalih soedah dipertjaja, tiada soesah aken ia bikin orang banjak toeroet nase­hat dan adjarannja. (Ajat 7,8).

Tao Teh King (page 228 crop)