Tao Teh King/Bab 41

XLI.

SOEKA DAN TIDA SOEKA.

1. Kapan saorang boediman mendenger Tao,ia toeroet dan goenaken itoe.
2. Kapan saorang biasa mendenger Tao, terkadang ia pegangin sabentaran, komoedian di­lepas kombali.
3. Kapan saorang bodo mendenger Tao, ia tertawain terpingkel-pingkel.
4. Djikaloe tida ditertawain dan didjêngèkin oleh itoe matjem orang, nistjaja tida berharga boeat diseboet Tao.
5. Maka itoe, tjotjok seperti djoeroe-pensjair aken bilang:
6. Jang bersinar dengen Tao dalem bajangan aken linjap terhilang,
7. Sebab iapoenja djalan di dalem Tao selaloe moendoer ka belakang,
8. Dan tinggal berlakoe goerem dan samar dalem samoea perbaeatannja,
9. Kabedjikan jang paling tinggi memang djoega tida ada namanja.
10. Kasoetjian paling besar kaliatan sabagi membi­kin maloe dan hina,
11. Kabidjaksana'an sedj'ati kaliatan sabagi barang jang paling fana.
12. Kabaekan jang sawadjarnja kaliatan sabagi pa­ling aneh sendiri,
13. Apa jang paling kekel jaitoelah Perobahan jang tida berobah lagi.
14. Dan barang jang pesegi betoel tida terdjadjak pandjang-lebarnja.
15. Tempaian jang paling besar tida bisa dioekoer kaloeasan boeletnja
16. Beboehj'ian paling njaring tida nanti kadengeran iapoenja soeara
17. Benda Jang paling besar sendiri tida mengoendjoek iapoenja roepa.
18. Sebab Tao ada tersemboeni dan tida mempoenjai nama, tetapi ia tinggal back dari awal sampe di achir.

⁂

Satoe peladjaran batin jang diseboet „tinggi" jalah lantaran tida bisa disampeken atawa dimengarti oleh golongan jang pengataoeannja masih „rendah." Inilah boekan sebab itoe pe­ladjaran ada roewet dan soeker didjalanken, hanja kerna ada banjak orang jang masih teriket oleh hawa nafsoe kadoenia'an belon bisa lepas­kan diri aken mandjat ka tingkatan sabelah atas. Dari sebab itoe maka maskipoen tiada koerang jang akkoe kabeneran dan kafaedahannja, tapi jang bisa pegang dan djalanken dengen betoel tjoemah orang-orang boediman jang ketjil djoemblahnja. Orang-orang biasa jang pengartiannja sedeng-sedeng sadja, tjoemah bisa petik sabagian, dan lantes diiepasken lagi dengen alesan„tida sanggoep, sebab terlaloe berat." Malah orang-orang bodo jang gêndêng boekan sadja tida soeka ambil perdoeli, hanja tertawain pada itoe peladjaran, dan ini djoestroe mengoendjoekken Tao poenja kabesaran dan kaägoengan, sebab peladjaran jang dipoedji dan dihargain oleh golongan tjoepet dan berbatin rendah, di­ pandang bagoes, baek, bener dan berfaedah oleh marika, itoelah boekan Tao namanja (Ajat 1-4). Lao Tze poen, sabagi djoega samoea poedjonggo-poedjonggo Tionghoa di djeman koeno, ada satoe pensjair ; dan dalem ini fatsal ia ada toelis satoe sjairan jang meloekisken prilakoenja saorang jang soedah dapetken Tao, dan toetoerken djoega Tao poenja kagandjilan dan sifat-sifatnja jang loear biasa. Itoe 12 garis sjairan, jang penoeh dengen oetjapan berfaedah, ada harga boeat dibitjaraken masing-masing garisan dengen terpisah sendirian.

Begitoe lekas saorang soedah bersatoe sama Tao, ia poen aken djaoeken diri dari doenia dan terlinjap dalem bajangan, jaitoe di tempat jang soerem, kerna ia tida kapingin lagi sama segala kagoemilangan jang beroepa nama termashoer, terpoedji dan dikagoemin oleh orang banjak lantaran, seperti scedah diterangken da­lem fatsai XL di moeka ini, djalanannja Tao boekan „madjoe", hanja moendoer ka belakang dan kaloe itoe Taoist (penganoet Tao) bekerdja, iapoenja tjara selamanja tida kataoean, samar dan goerem, kerna segala apa jang ia lakoeken selaloe dengen diam-diam, tida ditondjolin pa­da orang banjak boeat dapet pengharga'an dan kapoedjian. {Ajat 5-S).

Itoe nama dermawan, boediman, moerah hati, giat, radjin, djiatsiem dan sabaginja lagi jang orang biasa seboet aiawa beriken padasesamanja, boekan teritoeng kabedjikan paling tinggi, jang haroes melebihi segala apa hingga tida bisa diloekisken dalem perkata'an, Djoega lan­taran bekerdjanja diam-diam, orang poen tida bisa beriken poedjian apa-apa. (Ajat 9).

Ada banjak orang jang tjoba mendjalanken kasoetjian paling tinggi soedah hidoep satjara go­longan jang paling miskin, hingga boeat makanja rnarika moesti mengemis. Ada djoega jang singkirken diri di tempat soenji seperti orang boeangan, terpisah dari familie dan sobat-sobatnja; ada lagi jang dengen soeka sendiri pergi tinggal di tengah oetan, hidoep di antara bang­ sa biadab, tida perdoeli moesti tanggoeng sangsara dan terpisah dari anak istrinja. Orang jang masih ketarik pada segala kasedepan doenia tentoe pandang itoe matjem penghidoepan de­ngen perasa’an ketjiwa dan djidii aken lakoeken. (Ajat 10).

Begitoe poen dengen kabidjaksana'an toelen, jang toedjoeannja mengoerangken kainginan dan melepasken segala apa, mengetjilken diri sendi­ ri sampe lama-lama tida kaliatan lagi—ini matjem sikep ada sanget bertentangan sama toedjoean dari kabanjakan manoesia jang tjoba koempoel härta dan kakaja‘an sabegitoe banjak jang bisa didapat, tjari nama termashoer dan membesarken diri soepaja kaliatan gilang-goemilang. Ka­pan dibanding ini doea toedjoean, jang terseboet doeloean kaliatan bersifat „fana“, kerna mendjoeroes pada kamoesna'an, sedeng jang belakangan seperti „hidoep“, kerna berdaja aken bikin diri dan pakerdja'annja kaliatan di antero doenia. (Ajat 11).

Kabaekan jang sawadjarnja ada dipandang paling aneh sendiri oleh doenia, sebab menoeroet orang banjak poenja pengartian dan adat kabiasa‘an, sasoeatoe kabaekan moesti dilakoeken tjoemah pada orang-orang jang disoeka, pada familie, sobat, kawan atawa bangsa sen­diri, dan haroes dapet pengganti jang satimpal, seperti rasa soekoer dan trima kasih, kapoedjian, dan malah kaoentoengan jang beroepa pem­ balasan baek bagi diri sendiri. Kabaekan jang dilakoeken diam-diam dengen tida kataoean sekalih poen oleh fiiiak jang ditoeioeng, dan tida harep pemberian frima kasih atawa kapoedjian, inilah oleh kabanjakan orang-orang jang „dermawan“ dipandang aneh dan gêndêng ! (Ajat 12).

Kahidoepan manoesia, dari terlahir sampe mati, ada terdiri dari satoe roentoenan perobahan, dan kamadjoean dari batin manoesia poen begitoe djoega : bergeraknja perlahan sekalih, hing­ ga moesti meliwatin bebrapa raloes incarnatie sabelonnja bisa sampe pada katentreman kekel. Inilah boekan lantaran itoe djalanan memang djaoe dan soesah, hanja kerna manoesia tida poenja katetepan dan kakerasan hati boeatlakoeken perobahan tandes pada batinnja, hanja lebih soeka membetoelin serba-sedikit jang kepalangtanggoeng dan djaoe dari sampoerna, hingga sabentar-bentar moesti dirobah dan diperbaeki lagi. Tetapi kapan orang persafoeken dirinja pada Tao, dengen satoe kalih lakoekcn perobahan ia nanti sampe ka poentjak paling tinggi jang membikin ia tida perloe adaken perobahan apaapa lagi, kerna ia soedah bersatoe pada apa jang paling kekel. (Ajat 13).

Djikaloe ada lapangan pesegi jang tida bisa ditaksir pandjang lebarnja, atawa tempajan jang boeletannja tida kena dioekoer, inilah tentoe ada melebihi dari segala apa jang manoesia perna menampak dalem doenia; dan djoestroe demi­kianlah ada sifat dari Tao jang terbesar sendiri.(Ajat 14-15).

Soeara goentoer jang paling heibat tjoemah bisa menoeroenken oedjan di satoe daerah sadja, sedeng perideran moesim jang bekerdja diam-diam menetepken toeroennja oedjan, datengnja. tempo panas dan sabaginja di seloeroeh negri, zonder banjak riboet. Maka itoe Lac Tze selaloe bilang, apa jang berwoedjoet, jang bisadirabah, diliat dan didenger, kakoeasa'annja moesti berwates, kerna jang paling besar sendiri tida mengoendjoek soeara atavva roepa, tetapi segala titahnja didenger dan ditoeroet betoel dalem seloe­ roeh alam Dan lantaran demikian maka dari bermoelah sainpe pengabisan Tao selaloe tinggal baek dan kekel. {Ajat 16-18).

Tao Teh King (page 195 crop)