Tao Teh King/Bab 42

XLII.

PEROBAHAN DARI TAO.

1. Tao melahirken jang Satoe; iioe satoe melahirken jang Doea; dan itoe doea menjiptaken jang Tiga.
2. Dari itee jang Tiga telah kaioear segala benda.
3. Segala benda ada terdjoeroeng oleh jang Tida-kaliatan dan ketarik oleh jang Kaliatan.
4. Jang bikin itoe sekalian benda-benda djadi bersatoe adalah itoe hawa napas jang aloes dan kosong.
5. Mendjadi piatoe, teräsing sendirian, dan sabagi kreta tida berroda, inilah semoea orang tida inginkan; tetapi radja-radja dan orang-orang besar goenaken ini nama-nama oentoek dirinja.
6. Benda-benda djadi semingkin bertambah lantaran dikoerangin, dan kapan ditambahin marika berbalik djadi semingkin koerang.
7. Apa jang orang adjar dengen perboeatan-nja akoe nanti goenaken boeat mengadjar pada marika.
8. Sabagi tjonto, marika jang brangasan dan kepala besar tida dapet kamatian jang sawadjarnja (dari penjakit).
9. Dengen begiloe marika memberi peladjaran berfaedah, jang akoe samboet dan goenaken.

⁂

Brangkalih lantaran di djeman doeloe itoe potong-potongan bamboe jang moeat toelisan dari Tuo Teh King dibikin tertjampoer adoek dan kesingsal roentoenannja, maka dalem ini fatsal ada terdapet tiga matjem peiadjaran berlaenan jang moestinja diatoer terpisah. Oepama ajat 1 sampe 4 ada berisi katerangan tentang kadjadian doenia atawa tertjiptanja segala benda, sedeng ajat 5 dan 6 moestinja berada dalem fatsal XXXIX di bawahnja ajat 12. Ajat 7 sam­pe 9 meroendingken soeal jang tida berhoeboeng sama apa jang dibitjarain di sabelah atasan, hingga haroes dipisah mendjadi satoe fatsal sen­diri atawa digaboeng sama laen fatsal jang membitjarain soeal samatjem itoe. Bebrapa pe­njalin Barat jang saksiken ini kagandjilan dan terdapetnja oedjar-oedjar jang ampir sama dalem berbagi-bagi fatsal, soedah lantes tarik poetoesan bahoea isinja Tao Teh King boekan ditoelis oleh satoe orang, hanja koempoelan dari bebrapa banjak toelisan jang terpentjar dan komoedian digaboeng mendjadi satoe boekoe, sedeng nama Lao Tze sabagi penoelisnja tjoemah satoe pèdèngan sadja. Tetapi kita sendiri pikir amat boleh djadi itoe kagandjilan ada dari lantaran kliroenja orang pasang roentoenan dari itoe potong-potongan bamboe jang berarakan, seperti perna kadjadian djoega dengen oedjar-oedjar di dalem Thay Hak jang sabagian telah linjap atawa kena teradoek-adoek.

Tetapi sekarang kita haroes trima aken salin dan bitjaraken sabagimana adanja, dan kita dapetken itoe ampat ajat pertama dari ini fatsal ada katerangan ringkes atas kadjadiannja ini alam dan doenia bersama sekalian isinja.

Tao, jang dalem sifatnja jang paling tinggi ada berarti Kakosongan Besar (BOE-KEK) telah lahirken Sifat-Pertama jang beroepa Sari Kahidoepan jang tjara Tionghoa dinamain Thay Kek (tjara Sanskrit : Alaya ; Inggris : Universal Soul) jang mendjadi akar dari segala benda. Inilah jang dibilang Sifat Jang Satoe (Unity) ka dalem mana semoea machloek dan benda aken kombali, dan ka sitoelah ada toedjoean paling achir dari segala manoesia jang hendak mentjari kasampoerna'an dan kakekelan.

Ini Thay Kek melahirken Sifat Doea.(Duality) jang tjara Tionghoa dinamaken Yang dan Yin, jang bisa diartiken Terang dan Gelap, Positief dan Negatief, Watek Lelaki dan Watek Prampoean, Aloes dan Kasar, dan achirnja dipake djoega sabagi symbool dari Matahari dan Remboelan, atawa Langit dan Boemi. Moentjoelnja ini doea sifat mendatengken penjipta'an, jang membikin terlahir benda-benda di ini alam.

Dari ini Yang dan Yin lantes moentjoel Sifat Jang Tiga (Trinity atawa Trinioerti)jang orang Tionghoa namaken Thian Tee Djin, jaitoe Langit, Boemi dan Manoesia, jang dalem agama Kristen diseboet Eapa, iboe dan Anak, sedeng dalem Agama Agypte koeno diseboet Osiris, Isis dan Horus. Ada terlaloe pandjang, dan lagi disini boekan tempatnja, boeat bitjaraken dan petjahken resianja itoe Trimoerti. Tjoemah perloe dioendjoek bahoea dalem anggepan Tionghoa, dengen perkata'an Langit (Thian) ada dimaksoed segala apa jang bersifat rohani, sedeng jang dibilang Boemi (Tee) ada wakilken sifat Djasmani (Kasar). Manoesia, jang mengandoeng tjampoeran dari Langit dan Boemi ( Yang dan Yin), djiwanja teritoeng pada Rohani dan toeboehnja termasoek Djasmani.

Jang membikin itoe doea sifat, Yang dan Yin, Rohani dan Djasmani, bisa berkoempoel djadi satoe, adalah itoe „Hawa Napas" jang aloes dan kosong, dan inilah ada katerangan penting sekalih, sebab ada tjotjok deiigen philosofie dari bebrapa agama jang terlampak di seloeroeh doenia. Oepamanja dalem agama Hindoe ada dibilang balioea ini doenia ada ditjipta oleh Brahma. Itoe perkata'an Brahma ada terambil dari perkata'an brih jang berarti „mendjalar," dari mana ada atsalnja perkata'an Inggris „to breathe" jang berärti menapas. Begitoe poen perkata'an Jahoedi bra (penjipta'an) tida bisa disangsiken ada berätsal dari Sanskrit brih, hal mana menoendjoekken adanja itoe katjotjokan bahoea Brahma, jang djadi penjipta segala apa, ada beroepa „Hawa Napas" dari alam. (Ajat 1-4).

Radja-radja boediman di djeman koeno biasa seboet dirinja sabagi „anak piatoe", „teräsing sendirian" dan „kreta zonder roda," aken meloekisken dirinja poenja karendahan dan tida berdaja. Inilah ada dari sebab dengen berlakoe rendah orang bisa naek ka tempat tinggi, sedeng siapa agoengin dirinja berbalik dipandang rendah, lantaran adanja itoe wet jang mengimbangin, hingga siapa maoe meninggiken diri nanti djatoh ka bawah dan jang berdiam di bawah dikasih naek ka atas. Begitoe poen segala apa di doe­nia djadi bertambah lantaran dikoerangin, dan djadi koerang lantaran ditambahin. Ini soeal soedah dibitjaraken pandjang-lebar dalem com­mentaar dari fatsal XXXVI hingga tida perloe diroendingken lebih djaoe. (Ajat 5-6).

Boeat mengadjar manoesia tida perloe orang moesti tjari pengataoean jang terlaloe berat dan roewet, hanja tilik sadja kadjadian sahari-hari, dimana bisa didapet tjoekoep tjonto-tjonto jang boleh dipake mengadjar lagi pada orang banjak. Oepama saorang jang terlaloe galak, brangasan dan kepala batoe, gemer tjari setori dan berkalahr, biasanja orang jang begitoe dapet kematian diboenoeh orang; dan inilah ada satoe peladjararo jang berfaedah boeat menasehatin manoesia soepaja beriak oe sabar dan menahan nafsoe. Djadinja dengen djalan saderhana, jaitoe menga­sih liat tjonto-tjonto jang bisa tertampak saharihari dalem penghidoepan, orang poen bisa beriken banjak peladjaran jang penting dan ber­harga bagi sesama manoesia. (Ajat 7-9).