Tao Teh King/Bab 40

XL.

MELEPASKEN PAKERDJA'AN

1. Tao poenja djalanan ada berbalik moendoer ka belakang.
2. Sifat jang kentara dari Tao jaitoe lemah-lemboet.
3. Segala apa di doenia telah terlahir dari Tao poenja sifat jang berwoedjoet, dan itoe sifat berwoedjoet ada beratsal dari Tao poenja sifat jang tida-berwoedjoet.

⁂

Inilah ada fatsal paling pendek sendiri jang Lao Tze perna toelis, tapi oedjar-oedjarnja beroelang-oelang ada terselip dalem berbagi-bagi fatsal jang laen.

Maskipoen begitoe pendek, dalem ini fatsal ada terdapet bahan boeat orang petjahken antero soeal dari kahidoepan ; disini ada terdapet itoe soember atawa akar dari semoea agama jang besar.

Kaliatannja Tao poenja perdjalanan „moendoer ka belakang" ada satoe paradox atawa bertentangan dengen anggepan oemoem, tetapi apa jang doenia anggep „madjoe" — dalem peladjaran, kapandean, pengartian dan kasopanan — sabenernja mendjoeroes pada kadoenia'an jang sifatnja tida kekel. Boeat dapetken kamadjoean rohani — bersatoe dengen Tao — orang moesti lepaskan pri kadoenia'an. Ini bisa diboektiken dengen oedjarnja Jesus :

„Akoe bilang padamoe, katjoeali kaloe satoe orang trima Karadja'an Toehan sabagi satoe anak ketjil, ia tida nanti bisa masoek ka sitoe sama sekalih." (Luk. 18 : 17). Bagimanatah sifatnja satoe anak ketjil ? Jaitoe saderhana, tida sombong dan angkoe, tida temaha, dan senantiasa lemah-lemboet.

Apa jang doenia anggep „madjoe“ selaloe ada dibarengin dengen kaserakahan, jang tambah-menambah dengen tida mengenal wates. Dalem politiek negri, economie, pergaoelan hidoep dan sabaginja, itoe sasoeatoe tindakan dari kamadjoean selaloe membawa karoewetan, kerna boekan sadja soesah didapet, tapi djoega kapan satoe kalih soedah tertjapei, tida bisa di­pegang tegoeh, dan satoe waktoe moesti mero­sot dan ambrek kombali, seperti bisa diliat da­ri djalannja hikajat dan terboekti dari kakaloetan doenia sekarang ini. Dengen begitoe maoe atawa tida orang moesti balik kombali ka dalem kasaderhana'an, berlakoe himat sakeras-kerasnja dan koerangin kainginan sabanjak-banjaknja. Djadinja itoe peladjaran „moendoer ka bela­kang", biarpoen dalem oeroesan doenia, masih ada djoega faedahnja boeat ditoeroet, dan ma­lah oleh segala bangsa soedah didjalanken, maski djoega saking terpaksa. Tapi djikaloe orang berlakoe saderhana dengen soeka sendiri lantaran insjaf pada kabaekan dan kafaedahannja, berkah dari ini peladjaran nanti bisa dipe­tik sapenoeh-penoehnja. Semingkin madjoe batinnja itoe orang, semingkin banjak kainginan-kainginan jang ia lepasken, hingga ia nanti berbalik „moendoer ka belakang" dan djadi seperti satoe anak ketjil, dengen sifat mana — seperti dibilang oleh Jesus — baroelah manoesia bisa masoek ka dalem Karadja'an Sorga, jaitoeka dalem Tao jang terbesar. (Ajat 1,2).

Segala apa dalem ini doenia ada tertjipta oleh Natuur, jaitoe Tao poenja sifat jang woedjoet. Dan ini sifat berwoedjoet atsalnja ada dari Tao poenja sifat jang tida berwoedjoet, jaitoe jang dibilang Boe Kek atawa Kakosongan. Kapan orang hendak mentjari katjotjokan di dalem Tao, lebih doeioe ia moesti meniroe sifatnja Natuur jang serba saderhana dan bekerdja dengen diam-diam tetapi tetep dan tida bisa berobah. Dari sitoe ia nanti poelang ka atsalnja aken balik kembali ka daiem itoe Kakosongan jang maha tentrem, jang kaoem Buddhist na­maken Pari Nirwana (Ajat 3).

Tao Teh King (page 163 crop)