Tao Teh King/Bab 29

XXIX.

DJANGAN MENGGRETJOK.

1. Djikaloe satoe orang ingin perbaekin doenia dan pegang itoe dalem tangannja, akoe liat ia tida nanti berhatsil.
2. Doenia ada samatjem pekakas sembahjang dari Illahi jang tida boleh diperlakoeken dengen kasar.
3. Siapa tjoba bikin perbaekan apa-apa ia tjoemah tjoba meroesak memegang dan menghalangin ; siapa dengen kakoeatan, ia aken kailangan.
4. Dengen goenaken kakerasan, djikaloe jang satoe madjoe ka moeka jang laen aken katinggalan maen di blakang ; djikaloe jang satoe maen panas-panasan jang laen aken tinggal adem-ademan ; djikaloe jang satoe dikoeatken jang laen djadi dibikin lemah; djikaloe satoe dibri toendjangan jang jang laen mendjadi gondjet.
5. Maka satoe orang boediman singkirken segala kagoembirahan, kagirangan jang sia-sia dan kabesaran jang goemilang.

⁂

Dari djeman koeno sampe sekarang belon perna ada satoe orang jang bisa memegang kwasa atas satoe negri atawa bangsa boeat dibikin baek menoeroet kainginannja sendiri. Boekan sadja itoe kakwasa'an dengen lekas djadi moesna malah itoe atoeran, titah atawa peladjaran jang ia siarken tida bisa tinggal ke­kel, kerna segala apa dalem doenia selaloe berobah, hingga pertjoba'an boeat adaken satoe katetepan, maski bermoelah kaliatan berhatsil bagoes, achirnja moesti gagal kerna tjoemah bisa dipake boeat satoe tempo atawa satoe djeman sadja. Inilah ada dari lantaran sifatnja doenia sabagi Perabotan aloes boeatan Toehan jang moesti diperlakoeken dengen hati-hati, ti­da boleh sembarangan atawa maen menggampangin sadja. Melinken natuur, jang bekerdja diam-diam dan perlahan, sabar dan tetep, itoelah sadja jang mampoeh atoer kaberesan da­lem doenia. Sasoeatoe pertjoba'an aken bikin pergaoelan hidoepnja manoesia djadi lebih baek dari sifat sawadjarnja (natural), atawa hendak berboeat apa-apa dengen kakerasan jang ber­tentangan dengen natuur-wet, tjoemah menghalangin dan meroesak, dan kasoedahannja itoe orang sendiri aken tanggoeng karoegian dan kailangan segala apa. (Ajat 1-3).

Pertjoba'an aken adaken perobahan dengen paksa, selaloe menimboelken kakaloetan, kerna kapan jang satoe madjoe, jang laen aken katinggalan. Orang bitjara dari hal „madjoe" se­bab di sablahnja ada apa-apa jang „moendoer" atawa „kablakang." Bangsa A doeloe kaliatan koeat dan madjoe, sedeng bangsa B terpan­dang lemah dan moendoer. Sekarang kaloe dibikin madjoe sampe melebihin dari A, lantes pamoeka-pamoeka bangsa A bertreak dan berdaja aken menjoesoel pada B hingga achirnja timboel perlomba'an dan persaingan tida abisnja dengen doea-doea tida merasa tentrem dan poeas, hanja selaloe berkoeatir dan maen panas-panasan. Kakaloetan doenia jang sekarang dalem oeroesan economie, politiek, persendjata'an dan banjak laen-laen lagi, ada dari ini sebab-sebab jang soedah dioendjoek oleh Lao Tze sadari 26 abad laloe. Sabagitoe lama orang beIon insjaf dan perhatiken ini pengoendjoekan, katentreman jang sampoerna tida bisa tertjapei.

Lebi djaoe Lao Tze terangken poelah, ka­pan jang satoe djiatsiem atawa berhati panas aken iakoeken samatjem pakerdja'an jang dirasa baek dan penting, pastilah jang laen aken ting­gal adem-ademan. Sebabnja maka bisa terdjadi begitoe ada saderhana sadja : dimana ada „hati panas" disitoe moesti terdapet djoega „hati adem" jang tida maoe ambil perdoeli apa-apa. Djikaloe tida begitoe, jaitoe kapan semoea manoesia sama djoega gemer dan giatnja, perkata'an„djiatsiem" tida nanti moentjoel, sebab tida ada tanda jang bisa oendjoek sikep berlaenan.

Kabenerannja Lao Tze poenja pembèbèran bisa disaksiken oleh semoea pemimpin kong-ek jang, kapan berlakoe terlaloe djiatsiem, giat dan goembirah, pastilah aken dapet menjesel besar dari sikepnja kabanjakan orang jang maen adem-ademan. Marika menjomel pandjang-pendek, tjelah itoe orang jang berhati „dingin", sedeng sabetoelnja jang salah ada iaorang sen­diri jang maen panas-panasan lantaran ketarik sama andjoerannja orang-orang jang hendak„perbaeki" bangsa dengen bertentangan pada natuurwet.

Sabetoelnja, itoe pengoendjoekan bahoea kapan jang satoe dibikin koeat jang laen djadi lemah, dan kapan jang satoe ditoendjang jang laen djadi gondjet, ini semoea bisa diliat de­ngen njata dalem oeroesan negri, politiek, per­dagangan, economie dan laen-laen jang terdjadi sahari-hari. Lantaran Duitschland jang tadinja lemah dengen mendadak bikin koeat dirinja, lantes laen-laen negri jang tadinja terpandang koeat djadi merasa lemah dan boeroe-boeroe tam­bah persendjataännja. Kapan satoe negri toenjang Industrien soepaja bisa lawan bersaing pa­da laen-laen negri, lantes itoe negri-negri saingan jang merasa persoesahaännja moelai gondjet boeroe-boeroe tjari akal aken menoendjang de­ngan adaken import restrictie, contingenteering, quota systeem, dan sabaginja lagi. Begitoelah itoe segala staatsman dan patriot jang maoe adaken„perbaekan" ini dan itoe boekan datengken kamamoeran, malah timboelken kakaloetan, kakoeatiran dan katjoerigaän, jang satoe waktoe bakal meledak dan menjilakain pada manoesia di seloeroeh doenia. Maka saorang boediman jang djaoe dan loeas pengartian dan pemandangannja tida terlaloe bergoembirah pada segala matjem pergerakan boeat memperbaeki ini dan itoe jang tjoemah kaliatan bagoes dan goemilang di loearnja sadja, hanja lebih soeka mengandel pada tjara bekerdjanja natuur jang, maskipoen perlahan dan tida kentara, belon perna gagal dalem sasoeatoe toedjoeannja. (Ajat 4-5).