Tao Teh King/Bab 28

XXVIII.

BERLAKOE SABAGI ANAK KETJIL.

1. Saorang lelaki jang gagah, merasa poeas berlakoe sabagi prampoean lemah, aken mendjadi tjonto atawa model boeat manoesia.
2. Sabagi tjonto boeat manoesia, kabedjikan tida nanti tinggalken padanja. la aken balik kombali sabagi satoe anak ketjil.
3. Siapa jang, kerna sedar atas dirinja poenja terang, merasa poeas aken tinggal berdiam di tempat soerem, ia aken mendjadi satoe tjonto boeat seloeroeh doenia.
4. Sabagi model boeat seloeroeh doenia, iapoenja kabedjikan kekel tida bisa linjap. Ia aken balik kombali pada jang maha èsa.
5. Siapa jang, maski tjoekoep moelja, tinggal di dalem kahina'an, aken mendjadi doenia poenja tanah jang legok atawa lembah.
6. Sabagi doenia poenja lembah, itoe kabedjikan kekel nanti mengalir aken isi padanja. la aken kombali ka dalem kasaderhana'an jang sampoerna atawa kahidoepan poenja sari jang pertama.
7. Ini sari pertama jaitoelah terpisah-pisah, telah jang. lantaran menjebabken timboelnja berbagi-bagi woedjoet dari kahidoepan.
8. Dengen memelok itoe sari pertama, saorang boediman bisa djadi toekang memerentah doenia jang paling bidjaksana.
9. Pamarentah jang adil dan bedjik jaitoelah jang belon perna tida memperdoeliken atawa

poen perna menjakitin pada salah-satoe orang.

⁂

Evolutie dari manoesia moelainja dari baji sampe mendjadi saorang jang besar dan gagah. Kapan soedah besar dan gagah, serta sampoerna priboedinja, ia aken berlakoe lemah-lemboet seperti prampoean, dan komoedian balik kem­bali seperti satoe anak ketjil poelah.

Orang jang pegang tegoeh kasopanan atawa ka'adaban, berikoet segala atoeran dan oepatjaranja, dan begitoe poen jang maoe djaga kaberesan dengen kaloearin segala matjem wet atawa atoeran agama sambil kasih oendjoek kapandean dan kakwasa'annja, inilah tjoemah baroe sampe di tingkat pertengahan. Kapan ia soedah madjoe lebih djaoe dan djadi semingkin deket pada kasampoerna'an sedjati, itoe semoea atoeran-atoeran doenia atawa aga­ma ia lemparken, laloe balik kombali mendjadi seperti anak ketjil, jaitoe hidoep menoeroet na­tuur.

Maka maskipoen mempoenjai kagagahan dan kakwasa'an besar ia berlakoe lemah-lemboet, hingga bikin orang merasa kagoem dan pan­dang padanja sabagi tjonto dari manoesia jang sampoerna, dan dalem ini kadoedoekan ia pe­gang tegoeh kabedjikannja dan laloe balik hi­doep seperti anak-anak. Maka maskipoen insjaf dirinja soedah poenjaken tjoekoep penerangan, ia merasa poeas berdiam di tempat jang gelap atawa soerem. Ia tida maoe kedjer kadoedoek­an jang oleh doenia kaliatannja bergoemilang, hanja tjari tempat soenji dan hidoep antara orang hina dan miskin, maski djoega pintoe dari astananja radja-radja atawa orang-orang jang hartawan selaloe ada terboeka boeat ia kaendjoengin. Ia merasa jang pakerdja'annja boekan ada dalem golongan orang jang besar boeat kakaja'an atawa kamoelja'an doenia, hanja lebih tjotjok diantara orang hina-dina jang tersia-sia dan tida diperdoeliken. Dengen begitoe ia mendjadi tjonto bagi seloeroeh doe­nia, dan achirnja iapoenja kabedjikan jang kekel membikin ia bisa balik kombali, jaitoe bersatoe pada jang maha èsa. (Ajat 1-4).

Dengen singkirken diri dari segala kamoel­ja'an doenia, dan pilih kahina'an dan kamiskinan sabagi dasar dari kahidoepannja, orang bisa poenjaken kabedjikan kekel jang dateng berkoempoel atas dirinja, jang djadi sabagi doenia poenja tanah lembah, ka mana semoea aer bia­sa mengalir. Kamoelja'an doenia poen sifatnja tida bisa kekel, hanja selaloe terantjem dengen kamoesna'an, kasoekeran dan kasedihan ; maka saorang jang betoel-betoel moelja, lebih soeka memilih tempat hina dan rendah, dimana ia tida aken kailangan satoe apa, malah pri kabedjikannja selaloe bertambah, jang achirnja nanti bikin ia bersatoe pada itoe kasederhana'an sampoerna jang mendjadi kahidoepan poenja sari pertama, jaitoe Tao. (Ajat 5-6). Sapandjang katerangan kitab-kitab koeno da­ri bangsa Tionghoa dan Hindoe, begitoe poen dari bebrapa bangsa toea, jang menoetoerken atsal-oetsoelnja kadjadian doenia, pada sabelonnja langit dan boemi tertjipta di ini alam tjoemah ada satoe sari, jang diam dan tentrem, jai­toe jang dinamaken sari pertama, jang membri kahidoepan. Terpetjahnja itoe sari kahidoepan ka dalem berbagi-bagi woedjoet, benda dan machloek, membikin timboeinja perbeda'an dan pemisahan, jang djadi semingkin heibat lagi lantaran manoesia, terdjoeroeng oleh hawa nafsoe jang tersemboeni dalem badan kasar, jaitoe sifat cheiwani, selaloe mementingken diri sendiri jang dikira ada berbeda dari laen-laen orang. Tapi kapan ia soedah insjaf atas sia-sianja ba­rang doenia, lepasken hawa nafsoenja dan persatoeken diri pada semoea, jang sabetoelnja ada mendjadi Satoe, ia poen aken mempoenjai kakwasa'an jang paling tinggi, jaitoe kakwasaän Ulahi, hingga saorang boediman jang soe­dah sampe ka dalem itoe tingkatan nanti bisa memerentah doenia dengen beres, sebab tida satoe apa jang ia tida perdoeliken, tapi djoega tida satoe apa jang ia ganggoe atawa persakitken. Taro perhatian zonder menggretjok, mengadaken kaberesan dan ka'adilan zonder menjakitken siapa djoega, inilah ada kabidjaksanaän jang paling tinggi. (Ajat 7-8).

Tao Teh King (page 138 crop)