Pembalesannja Kawanan Liangsan/Bagian katiga/Bab 23
XXIII
Pokthiantiauw bikin penjerangan,
sedeng di gredja Bankengsi ter-
bit satoe kakaloetan heibat.
Sabelonnja pertempoeran itoe terdjadi, baek diterangken dengen ringkes, bagimana sebabnja jang membikin Tam Hoa Hosiang djadi begitoe goesar dan dateng menjerang ka ini tempat.
Sabagimana jang pembatja taoe, waktoe Honw jan Tjiak dan kadoea poetranja menoeloeng itoe orang prampoean, dengen memboenoe satoe hweshio biadab jang maoe lakoeken perboeatan kedji, sabenernja dalem itoe ada lima padri, dan tiga antaranja itoe waktoe kabetoelan ada di blakang.
Satetah dapet taoe jang kawannja telah diboenoe dan satoenja soeda lari, tigapadri jang laen poen lantas lari ka gredja Bankengsi, aken melapoer pada Tam Hoa, dengen membilang: bahoewa kawannja jang. doea telah diboenoe oleh tiga brandal dari lemmatjwan. ― Maski benernja hweshio-hweshio itoe tida taoe, siapa adanja orang jang telah menoeloeng itoe njonja, tapi toch marika brani djoega tetepken, bahoewa Houw-jan Tjiak dengen kadoea poetranja ada kawannja Lie Eng.
Itoe omongan jang sembarangan njatalah djadi kabetoelan.
Mendenger itoe perkatahan, Tam Hoa djadi amat goesar, maka dengen tida menoenggoe lagi datengnja ia poenja soedara Pit Hong, kapala padri itoe laloe pergi ka tangsinja Kan Li-poet, pada siapa memang ia telah serahken kakoeasahan dari itoe gredja.
Sigra djoega ia kasi taoe pada itoe kapala perang Kimkok, bahoewa orang-orang di lemmatjwan soeda boenoe ia poenja moerid jang tida bersala, sakedar boeat merampas barang-barangnja dan membikin soesa.
„Beroentoeng ini satoe kaloeng moeteara jang Pintjeng sendiri simpen, tida kena dirampas oleh itoe tiga brandal,“ kata poela Tam Hoa Hosiang sambil serahken itoe barang ka tangannja Kan Lie-poet: „maka boeat kadjahatannja itoe, Pintjeng ingin sekali sapoe itoe kawanan begal jang terkoetoek.
Kan Lie-poet jang meliat itoe barang berharga, djadi amat soeka hati, hingga apa jang dikata oleh Hosiang ia pertjaja sadja. Malah ia poen bilang: kaloe begitoe bener djahat itoe brandal di lemmatjwan dan pantes dikasi labrakan.
Ini perkatahan memang lagi daharep oleh Tam Hoa, maka satelah denger Kan Li-poet kata begitoe, ia lantas minta ini panglima Kimkok soeka bantoe balatentara, kerna moeridnja sendiri tida ada sabrapa banjak, maka zonder bantoean tentoe ia tida bisa serang itoe goenoeng.
Kan Li-poet jang soeda trima orang poenja bingkisan, dengen zonder pikir lebi djaoe laloe serahken limaratoes soldadoe, jang ditrima oleh Tam Hoa dan itoe hari djoega Hosiang ini berangkat ka lemmatjwan.
Satelah sampe, kapala padri ini prenta soldadoenja berdiriken tenda di oetan Siplisiong, soepaja di hari esok boleh madjoe bertempoer. Dan kadatengannja ini sigra djoega dapet diliat oleh itoe liauwlo-liauwlo iang lagi meronda, dimana dengen tida ajal lagi marika laloe rapport ini pada Lie Eng, sabagimana di sebla atas telah dibilang.
Begitoelah pada besok paginja, baroe sadja moelai terang tana padri ini siapaken soldadoe madjoe ka lemmatjwan boeat minta perang. Dari bawah goenoeng ia bertreak dan memaki-maki tapi tida ada satoe moesoe jang kaloear.
Koetika matahari toeroen. moesoe tida djoega meladeni tantangannja, Tam Hoa djadi kesel dan moendoerken kombali tentaranja balik ka pasanggrahan sendiri. Sedeng besoknja pagi-pagi ia soeda dateng lagi.
Ini kali tingkanja itoe padri djadi lebi sombong. Sambil poeter sendjata ia bertreak sakeras-kerasnja.
„He! brandal-brandal kaparat! Lekaslah kaoe toeroen goenoeng boeat trima mampoes, kerna akoe soeda menoenggoe sadari kamaren,“
Orang di lemmatjwan tida perdoeliken itoe treakan, hingga Tam Hoa djadi lebi sengit dan laloe prenta soldadoenja bertreak, tapi sabagimana jang soeda, sampe sore poen tida kaliatan satoe moesoe jang samboet datengnja.
Meliat dirinja saban kali dateng didjemoer begitoe roepa, Tam Hoa djadi amat mendongkol, sedeng soldadoe Kim jang tadinja ada goembira, pelahan-pelahan djadi toeroet kesal dan boeat liwati tempo marika pada pergi ka doesoendoesoen aken merampas orang ketjil poenja barang pakean atawa makanan, dan banjak djoega jang rampas orang poenja anak istri, hingga pendoedoek di sakiternja sitoe pada lari kalangkaboet.
Tam Hoa taoe perboeatannja ia poenja soldadoe ada begitoe roepa, tapi ia antep sadja dan sekali-kali tida maoe menjega,
Pada hari jang katiga, kombali padri ini dateng manantang, dan ini kali kaliatannja ada lebi keren lagi.
Bermoela ia memaki-maki' hingga satenga harian tida djoega ada jang ladeni. Kerna doega moesoe tentoe tida aken kaloear kombali. Maka Tam Hoa lantas moendoerken tentaranja ka blakang sambil bersoerak-soerak seperti orang jang kagirangan. Tapi baroe sadja barisan itoe moendoer sedikit djaoe, koenjoeng-koenjoeng terdenger soeara membeledoer dan berbareng itoe kadengeran soeara soerakan rioeh.
Tam Hoa poenja soldadoe djadi terkedjoet, tapi itoe Hosiang dengen gaga laloe tahan moendoernja ia poenja soldadoe dan atoer kombali barisan itoe boeat toenggoe datengnja moesoe.
Tam Hoa itoe ada berpengawakan gemoek, tenaganja amat koeat dan gegamannja sabatang toeja besi jang beratnja kira-kira anampoeloe kati, dan toenggang saekor koeda jang boeloe poeti. Sambil lintangin sendjata itoe di atas sela, ia toenggoe datengnja moesoe.
Kaloe dipandang dari djaoe, mirip seperti Lonw Ti-tjim jang mendjelema kombali.
Dengen mata mentjorot ia awasi pada itoe ampat moesoe jang lagi mendatengi dengen teriring oleh limaratoes liauwlo, Orang itoe ada Lie Eng Oan Swie, Jo Liem dan Houw-jan Tjiak, jang satelah ampir berhadepan, sambil menoeding Tam Hoa itoe berkata:
„He, kaoe ini restan dari kawanan Liangsan jang tida taoe adat sekali. Mengapatah sasoedanja berhadepan padakoe boekannja lantas toeroen dari koeda trima di-iket, hanja begitoe koerang adjar....“
Sabelonnja perkatahan itoe abis dioetjapken, Lie Eng soeda angkat gegamannja dan timpa di kapalanja itoe Hosiang; tapi Tam Hoa kaboeroe kelip dan bales memoekoel.
Kadoeanja ini lantas berantem sengit, hingga tigapoeloe djoeroes belon ada jang menang atawa kala.
Houw-jan Tjiak jang liat padri itoe ada gaga perkasa, tida tahan napsoenja lantas menjerang, tapi Tam Hoa tida merasa keder dan tangkis datengnja itoe sendjata jang blakangan, kamoedian bales mengantem.
Moeridnja itoe padri jang ada di blakang laloe prenta soldadoe Kim tioep trompet dan berbareng itoe marika menjerang pada Jo Liem dan Oan Swie, jang disamboet dengen goembira oleh rahajat Iemmatjwan.
Paperangan itoe kaliatan amat sengit tapi maski begitoe, sampe sore tida ada jang menang atawa kala. Kerna itoe waktoe matahari ampir soeroep, maka kadoea fihak masing-masing moendoerken barisannja poelang ka tempat sendiri.
Sasampenja di atas Tjhigiethia, Lie Eng berkata dengen soeara memoedji:
„Bener-bener si goendoel itoe gaga sekali, ia bisa tahan lawan akoe bersama Houwjan Heng poenja serangan, dengen sedikit poen tida kaliatan keder.“
„Kaloe begitoe, njatalah kita tida boleh lawan dengen kekerasan pada itoe Hosiang jang gaga.“ kata Tjioe Boe: sebab ia ada mempoenjai tenaga jang besar, maka kita haroes goenaken satoe tipoe.“
Kamoedian Tjioe Boe toetoerken bagimana tipoe itoe moesti didjalanken, dengen begitoe ia kira Tam Hoa jang kosen bisa dialaken dengen gampang.
Semoea Hohan jang denger djadi tepok tangan sambil memoedji, sedeng Lie Eng dengen girang laloe djalanken itoe akal boeat membikin moesoe poenja kaloet.
Tjioe Boe ini memang ada saorang jang banjak mempoenjai taktiek dan daja oepaja bagoes, dan banjak kali tipoe jang kaloear dari pikirannja, njata ada mendatengken hasil. Maka ini kali poen, dengen tida bersangsi itoe Twako Iemmatjwan soeda toeroet dengen girang hati.
Sigra djoega bersiapan boeat menjerang moesoe telah dilakoeken beres.
Pada hari esoknja waktoe Tam Hoa Hosiang dateng minta perang, tida ada satoe orang jang maoe ladenin. Di atas goenoeng tjoema kaliatan liauwlo jang berdjalan moendar-mandir sambil gojang bendera dan bersoerak-soerak.
Sampe sore tida djoega ada jang toeroen bertempoer, hingga Tam Hoa doega moesoenja tentoe merasa djeri, maka dengen merasa enak di hati hweshio itoe balik kombali ka tenda sendiri dengen tida tjoeriga.
Waktoe hari ampir djadi malem, Lie Eng laloe prenta Houw-jan Tjiak bersama doea poetranja, dengen terbantoe oleh Jo Liem pergi menjerang gredja Bankengsi, samantara Pwe Soen, Tjoa leng, Touw Hin dan Oan Swie diprenta semboeni di kadoea samping djalanan goenoeng; sedeng Lie Eng bersama Tjioe Thong nanti lakoeken pengedjeran.
Pada djam jang ditentoeken marika itoe toeroen goenoeng dengen bersoeara. Masing-masing menoedjoe ka tempat jang diprenta. Koetika Houw-jan Tjiak sampe di gredja-Bankengsi, hari soeda liwat tengamalem.
Koetika Tam Hoa bawa pasoekannja menjeJang lemmatjwan, di itoe gredja tjoema ditinggalken satoe padri toea bersama bebrapa hweshio jang tida begoena, boeat mendjaga. Maka itoe malem salagi itoe kapala goendoel membatja kitab, Houw-jan Tjiak laloe membri tanda boeat soldadoenja dateng menjerang.
Semoea liauwlo lantas bergerak dan hantem itoe gredja kalangkaboet, hingga itoe padri toea djadi terkedjoet dan şabelonnja ia sempet menanja ada apa, pintoenja gredja terboeka dan Houw-jan Tjiak bersama poetranja telah sampe.
Dengen tida banjak bitjara lagi, Hohan itoe ajoen sendjatanja dan sakedjeb itoe kapalanja padri toea lantas terpental ka tana.
Liauwlo jang mengikoeti laloe oebrak-abrik gredja Benkengsi, tabas sasoeatoe hweshio jang dikatemoeken, hingga sabentara sadja dalem itoe gredja soeda tida ada sabidji orang.
Jo Liem jang rasa tida perloe gredja ini dikasi tinggal lama, laloe ambil oempan api dengen maksoed maoe bakar. Tapi Houw-jan Tjiak jang dapet taoe maksoednja itoe kawan, laloe menjega dan kata:
„Sabar doeloe, boeat bikin ini gredja djadi aboe, masi ada banjak tempo.“
„Tapi boekantah lebi baek lantas dibakar,“ kata Jo Liem: „soepaja itoe kapala-kapala goendoel tida bersarang lagi di ini tempat.“
„Itoe betoel,“ kata Houw-jan Tjiak: „tapi sabelonnja moesnaken ini gredja, baek kita menggeraktak doeloe, kerna menoeroet doegahankoe, di dalem ini tentoe ada banjak barang-barang berharga, jang itoe padri kaparat telah dapet dengen djalan tida halal.“
„Sahabisnja berkata, ampat orang itoe laloe masoek ka dalem-dalem kamar dan tjari di sasoeatoe peti, dengen di-ikoet oleh sakalian liauwlo.
Apa jang didoega oleh Houw-jan Tjiak, njatalah bener sekali. Di dalem itoe peti-peti, teroetama jang djadi kapoenjahannja Tam Hoa Ho siang, ada tersimpen banjak sekali oewang, moeteara dan mas. Sedeng di laen-laen peti ada terdapet batoe-batoe poewalam jang soeda didjadiken barang perhiasan. Sedeng di dalem kamar orang dapetken itoe, brapa ratoes liauwlo jang menggeraktak di blakang dapetken banjak ramsoem, dan barang-barang ini lantas diangkoet ka loear.
„Njatalah itoe kapala goendoel ada kaja,“ kata Jo Liem sambil bersenjoem: „pantes djoega ia bisa dapet bantoeannja tentara Kimkok boeat menjerang kita, sataoe brapa besar ia membri soewapan pada Kam Li-poet, boeat dapetken itoe sadjoembla soldadoe boeat djadi bantoeannja."
Tjhie Seng dan Houw-jan Giok jang pergi di laen kamar, kerna, gredja ini memang besar dan ada banjak mempoenjai kamar-kamar, dapetken dalem bebrapa kamar ada berbaring orang-orang prampoean, jang lantaran denger soeara riboet-riboet, soeda djadi bangoen dengen gelagapan.
Prampoean itoe semoea masi moeda dan tjantik-tjantik. Marika itoe ada berpake pakean sepert Niko, tapi kaloe liat kamarnja jang begitoe indah, njatalah itoe pakean tjoema boeat membikin samar orang poenja mata sadja.
Waktoe ini doea Hohan masoek, itoe semoea prampoean tjantik djadi katakoetan dan lantas berloetoet sambil minta-minta ampoen.
„Kaoe ini prampoean apatah maka boleh ada dalem ini gredja?“ tanja Houw-jan Giok dan Tjhie Seng dengen soeara berbareng: „hajoe mengakoe teroes terang, soepaja akoe tida oesah toeroen tangan.“
Itoe prampoean-prampoean sabagian pada menangis lantaran katakoetan, brapa antaranja tjoema bisa manggoet-manggoet seraja minta diampoeni djiwanja. Tapi jang mempoenjai hati lebi besar dan tjerdik, laloe tjeritaken teroes terang, bahoewa marika ada anak istri dari familie baek-baek, jang soeda dirampas oleh Tam Hoa Hosiang dan disimpen dalem ini kamar, dengen terdjaga oleh bebrapa padri laen.
Houw-jan Tjiak dan Jo Liem jang denger liauwlonja kasi taoe ini perkara, laloe dateng ka kamar blakang, dimana poetranja laloe kasi taoe apa jang itoe nona-nona ijantik telah bertaoeken padanja,
„Bener-bener hwesho kaparat soenggoe!“ kata Houw-jan Tjiak: „kaloe begitoe, djangan Joheng bakar ini gredja, hanja baeklah kita berdiam sadja doeloe di sini aken menoenggoe datengnja itoe Hosiang, jang kaloe denger gredjanja dioebrak-abrik, tida lama lagi tentoe marika balik poelang. Dan di sitoe kita nanti bikin peritoengan padanja. — Boekan baek begitoe?“
Jo Liem menjataken satoedjoe dan itoe orang-orang prampoean laloe dipindaken ka laen kamar jang terpisa. Kamoedian Hohan itoe prenta rahajatnja masak nasi dan sedoeh thee, kerna dalem itoe gredja ada banjak sekali barang jang boleh didahar, apapoela marika memang ada merasa lapar.
Bebrapa liauwlo diprenta menoenggoe di sebla loear, sabagi djoeroekabar boeat membri taoe kadatengannja Tam Hoa.
Esoknja satoe moerid hweshio jang bisa lolosken diri laloe boeroe-boeroe pergi ka Iemmatjwan aken membri taoe ini kadjadian ngeri pada goeroenja, Sambil menangis itoe moerid kaparat tjeritaken, bagimana samalem kawanan begal telah dateng ka gredja Bankengsi dan telah merampas. Boekan sadja barang-barang telah diangkoet, hanja padri toea dan bebrapa kawannja soeda dibinasain.
Mendenger ini warta. Tam Hoa djadi amat terkedjoet. Sakoetika lama ia berdiam seperti orang kasima, dan waktoe inget kombali diri, ia lantas prenta soldadoenja rombak pasanggrahan, aken balik ka gredja, boeat liat bagimana kadjadiannja itoe sarang.
Lie Eng jang memang bernanti sakean lama, satelah liat itoe Hosiang moendoerken balatentara, lantas prenta pasoekannja jang semboeniken lantas mengedjar,
„Kedjer begitoe tjepet sabisanja!“ bertitah itoe Twako dengen soeara jang menggoembiraken hati.
Liauwlo semoea lantas mengedjer seperti terbang. Maka tida antara lama, sigra djoega barisan itoe dapet disoesoel. Tapi itoe soldadoe-soldadoe Kim jang hatinja soeda djadi ketjil lantaran itoe kekagetan, tida maoe melawan, hanja berdjalan lebi tjepet, sedeng moesoe dari blakang menjoesoel teroes.
Tam Hoa Hosiang jang gaga soeda tida ada ingetan boeat melawan, kerna hatinja tida memikiri laen dari barang miliknja, jang tentoe soeda abis dirampas oleh itoe begal-begal. Lebi lagi menginget itoe prampoean-prampoean jang ditinggalken dalem kamar, hatinja boekan patoet poenja gemes dan mendongkol pada itoe kawanan brandal jang begitoe brani mengganggoe kasenangannja. — Sekali-kali ia tida doega, kaloe brandal itoe sabenernja ada orang-orang gaga dari lemmatjwan.
Sasampenja di satoe tikoengan, itoe soldadoe-soldadoe Kim lantas pada merat. dengen tida perdoeli tanda-tanda prenta jang dibriken oleh itoe kapala padri,
Waktoe ampir sampe di deket gredja, lantas terdenger soeara perletoepan keras, hingga padri itoe djadi kaget, kerna berbareng itoe lantas kaliatan Pwe Soan, Tjoa leng, Touw Hin dan Oan Swie. Koetika liat orang-orang jang ada di hadepan nja itoe, semoea ada Hohan di lemmatjwan, baroelah Tam Hoa mendoesin dari lelapnja, bahoewa ia telah kena tipoenja moesoe.
Dengen tida banjak bitjara Hosiang ini lantas menjerang dengan sengit. Ampat moesoe ia lawan dengan tida merasa keder, soearanja tetaboean perang diboenjiken amat rioeh, hingga Houw-jan tjiak dengan sedereknja jang ada di dalem gredja, lantes dapet taoe, bahoewa kapala padri jang di toenggoe itoe telah sampe. Sigra djoega marika itoe laloe kaloear membantoe.
Ini Hosiang jang soeda djadi nekat lantaran liat gredjanja dioebrak-abrik, tida sekali merasa keder, hanja mengantem teroes dengen tida perdoeli brapa banjak djoega moesoe jang mengeroeboeti padanja.
Tapi, kendati bagimana djoega gaganja Tam Hoa, lantaran dikeroeboeti oleh Hohan begitoe banjak, achirnja ia djadi lelah dan satoe kali koedanja berdjingkrak, dirinja lantas terdjato dari toenggangan.
Bebrapa liauwlo laloe tangkep dan iket padanja. Tida lama Lie Eng telah sampe ka itoe gredja dan doedoek di roewangan pertengahan.
Houw-jan Tjiak laloe dateng dan tjeritaken satoe persatoe apa jang rahajatnja telah dapetken dalem itoe gredja.
Mendenger begitoe, Lie Eng laloe mengawasi itoe padri jang tertawan, sambil berkata:
„He, soenggoe akoe tida kira sekali ada begitoe matjem kaoe poenja kalakoean. — Boekantah sapantesnja satoe Tjoetkedjin seperti kaoe, moesti pake hati baek dan toeloeng pada sasamanja, tidalah moesti serakahken sagala harta doenia dan rampas orang poenja anak istri boeat djadi kasenangan hatimoe. — Djoega akoe tida mengarti, kenapa sakean lama kaoe maoe bertentangan padakoe, jang belon pernah bermoesoe pada kaoe?“
Tapi Tam Hoa boekan ada satoe padri jang takoet mati, satelah denger ditanja begitoe, laloe membentak dengen soeara keras, jang katanja: kaloe maoe boenoe boleh lantas boenoe, apa bikin dirinja ditanja begini atawa begitoe.
Jo Liem jang denger begitoe, djadi amat goesar dan lantas bangoen dari tempatnja doedoek aken tabas kapalanja itoe hweshio. Tapi Lie Eng kaboeroe tjega dan kata, boeat anter djiwanja ini Hosiang kaparat ka acherat, ia ada mempoenjai saroepa atoeran jang lebi baek.
Sahabisnja kata begitoe, ini Twako laloe prenta panggil itoe orang-orang prampoean jang Tam Hoa soeda koeroeng sakean lama, kamoedian marika itoe dibagi oewang boeat bekal dan diprenta poelang ka masing-masing poenja roema. Itoe orang-orang prampoean, jang soeda katoeloengan dan terlepas dari tangannja kawanan padri kaparat, laloe berloetoet membilang banjak trima kasi, kamoedian pada berlaloe.
Lie Eng prenta liauwlo iket tangannja itoe kapala padri, jang talinja ditjangtjang ka satoe pilar. Sasoeda itoe diambili oempan api, seperti kajoekajoe kering dan roempoet, jang ditoempoek dalem roewangan itoe gredja. Satelah barang oempan itoe tjoekoep banjak, gredja Bankengsi laloe dibakar, hingga sabentaran sadja apinja berkobar-kobar.
Semoea Hohan dan liauwlo jang ada menonton dari loear, pada bersoerak-soerak dengen tepok tangan. Waktoe api sedeng menjala besar, lantas berbaoe sangit, njatalah itoe padri kaparat jang soeda meroesaki kahormatannja gadis-gadis dan menodaken sakalian orang põenja anak istri, dapet hoekoemannja jang satimpal.
Waktoe api ampir padem itoe semoea Hohan laloe balik poela ka lemmatjwan sambil membawa barang-barang jang terdapet dari itoe gredja.
Lie Eng laloe adaken perdjamoean dan semoea Hohan laloe doedoek makan minoem dengen sagala soeka hati.
Tapi baroe sadja orang minoem bebrapa tjawan, satoe liauwlo dateng membri taoe, bahoewa dari Gakbio poenja Wantiang jang bernama Tee Tjong, ada dateng minta katemoe dan sekarang orang alim itoe ada di loear.
Mendenger begitoe Lie Eng dan sadereknja laloe kaloear menjamboet, jang kamoedian persilaken masoek dalem roewangan Tjhigiethia. Sasoeda satoe pada laen membri hormat dan perkenalken masing-masing poenja nama, Tee Tjon disilaken doedoek.
Itoe Twako laloe menanjaken apa-apa, sabagimana biasanja orang jang baroe bertemoe.
Sasoeda menanjaken ini itoe dan tjeritaken hal riwajatnja dalem itoe sakean lama, Tee Tjong lalpe kasi taoe, bagimana sasoedanja perang brenti, Tong Koan masi sadja maoe tahan padanja, dengen membri alesan hendak betoelken doeloe grędjanja, sabagi gandjaran jang sedikit waktoe itoc ia ada mengikoet dalem paperangan sabagi toekang membawa soerat.
Tapi berhoeboeng poetoesnja perdamian antara Songtiauw dan Kimkok, maka paperangan djadi timboel kombali dan angkatan perangnja Kimkok telah menjerang Tionggoan, jang sekarang soeda menjebrang di soengei Hongho.
Baginda dan pembesar-pembesar djadi kabingoengan, dengen tida taoe apa moesti berboeat, kata Tee Tjong lebi djaoe, baeknja ada pouw Silong Lie Kong jang bersoenggoe hati atoer pendjagahan boeat djaga moesoe poenja serangan jang begitoe mendesak. Lebi beroentoeng lagi sekarang soeda ada bebrapa radja moeda, antara mana adalah Tiong Soe-touw jang toea poen telah berada di Tongkeng.
Semoea soedara-soedara ada mendengeri, sedeng Tee Tjong tjeritaken labi djaoe, baginana kamoedian ia diprenta membawa lagi soerat-soerat ka bebrapa kota besar, dimana achirnja ia dapet taoe: Thaysioe Lauw le di kota Taybenghoe soeda menaloek pada moesoe, sedeng Tja Tjin di Tjongtjioe, ada tertimpa bahaja besar.
Lie Eng dan sadereknja djadi terkedjoet, waktoe mendenger itoe perkatahan jang paling blakang. Maka dengen tida sabar ini Twako laloe menanja: bahaja apa adanja itoe jang menimpa pada dirinja Tja Tjin.
Tee Tjong lantas tjeritaken kombali, berhoeboeng dengen maksoednja Sinsiang Lie Pang-jan jang hendak bitjaraken perdamian, dengen soeda berdjandji pada Nam May-wat boeat serahken saratoes laksa oewang mas dan limaratoes lakas oewang perak, tapi lantaran kas negri tida mempoenjai begitoe banjak simpenan, maka boeat menjoekoepi itoe laloe diminta-mintaken orang-orang hartawan poenja oewang dan kakajahan, dengen diantjem, siapa jang tida maoe kasi atawa masi membanta, nanti dihoekoem mati, Dan begitoelah hal ini telah terdjadi djoega pada pendoedoek di Tjongtjioe, dimana Tja Tjin telah merasaken itoe bahaja. Kerna Ko Goan, jang djadi Thaysioe di itoe kota, soeda memaksa boeat minta djoega hartanja familie Tja.
„Ko Goan itoe siapatah?“ menanja Lie Eng
„Ia itoe ada soedaranja Ko Kim,“saoet Tee Tjong,
„Oh, kaloe begitoe kita poenja moesoe ?“
„Benerlah.“
Satelah denger Ko Kim soeda memaksa pada Tja Tjin, dan sekarang soeda tangkep familie Tja saroema tangga, Lie Eng djadi berdjingkrak lantaran goesarnja. Atas pertanjahannja laen-laen soedara, Tee Tjong tjeritaken lebi terang: bahoewa Ko Kim soeda minta Tja Koko kaloear- ken tigariboe tail mas dan sapoeloe riboe tail perak, boeat tjoekoepi itoe djoembla boeat membri pada moesoe. Tapi kerna itoe permintahan jang boekan-boekan, oleh Tja Tjin tida bisa ditoeroet, maka Ko Kim laloe tangkep itoe orang bangsawan poenja familie.
Sasoeda mendenger itoe tjerita, Lie Eng laloe berdami boeat toeloeng famili Tja poenja saroema tangga, semoea Hohan, jang memang doeloe ada angkat soedara pada Tja Tjin, njataken moefakat.
„Boeat lakoeken ini pertoeloengan, kita moesti berlakoe seperti orang pergi menoeloeng roema kabakaran,“ kata Lie Eng: „tida boleh koe lambat. „Itoelah betoel,“ saoet jang laen-laen: „kaloe bisa sekarang kita orang moesti bersiap.“
Begitoelah perdjamoean laloe ditoetoep dan Lie Eng laloe adjak soedara-soedaranja boeat menoeloeng itoe Koko, dengen membawa sariboe liauwlo boeat menjerang pendjara. Sedeng soedara-soedara jang ada di atas goenoeng dipesen boeat djaga hati-hati serangannja orang Kimkok
Orang-orang jang Lie Eng adjak adalah Houw-jan Tjiak, Jo Liem, Tee Tjong, Houw-jan Giok, Tjhie Seng dan jang salaennja diprenta mendjaga goenoeng.
Di sapandjang djalan Lie Eng dan Tee Tjong beromong-omong boeat dilakoeken itoe pertoeloengan. Kerna Ko Kim ada mempoenjai ilmoe siloeman, dikoeater ini Ko Gwan djoega ada mempoenjai peladjaran begitoe. Tapi biar bagimana djoega, toch itoe soedara moesti ditoeloeng, maka hal ilmoenja familie Ko itoe tida perloe terlaloe direwelken lebi djaoe.
Achirnja Lie Eng prenta Tee Tjong pergi djalan. doeloean boeat mengabarken pada Tja Tjin, jang pertoeloengan tida lama lagi aken sampe, soepaja itoe Koko jang ada dalem pendjara tida terlaloe iboek.
Tapi siapa taqe, sadari Tja Tjin ditangkep, Ko Gwan soeda atoer pendjagahan baek-baek, kerna ia poen taoe jang Tja Tjin ini ada mempoenjai soedara-soedara angkat orang gaga di lemmatjwan, hingga boeat Tee Tjong poenja masoek, ada terlaloe soeker, sebab pintoe kota terdjaga begitoe keras dan orang-orang jang masoek atawa kaloear dipreksa betoel.
Apapoela dalem waktoe blakang Ko Gwan soeda denger djoega, jang barisan dari lemmatjwan soeda begerak, maka sakalian orangnja Thaysioe itoe pesen lebi hati-hati.
Begitoelah waktoe Lie Eng poenja barisan sampe di kota Tjongtjioe, Tee Tjong jang soeda sampe lebi doeloe laloe membri taoe, bagimana Ko Gwan soeda atoer pendjagahan begitoe teliti, hingga dengen zonder tipoe, tida gampang orang bisa masoek ka dalem itoe kota, djangan kata maoe dipoekoelpetja.
Lantaran ini, terpaksa Lie Eng toenda barisannja di loear kota, samantara itoe tida brentinja ia berdaja, soepaja bisa menoeloeng pada Tja Tjin.
Tja Tjin ada toeroenan dari Keizer Tjioe Sie Tjong (Tja Eng), maka di bagian ka IV nanti ditjeritaken bagimana Tja Tjin tertoeloeng dan achirnja berkoempoel pada Hohan-hohan di lemmatjwan, hingga bagian jang aken dateng, tjeritanja djadi rame betoel.
Maka djangan loepa batja samboengannja.
TAMAT BAGIAN KA III.