Pembalesannja Kawanan Liangsan/Bagian ka ampat/Bab 1
Bagian ka ampat.
Tja Tjin dapet toeloengan, barisan
lemmatjwan bikin kakaloetan
besar di dalem kota
Tjongtjioe
Lie Eng dan sadereknja soeda tida dapetken daja jang lebi baek boeat masoek ka dalem kota. Kerna Ko Gwan soeda atoer pendjagahan lebi keras dari hari-hari jang laloe. Ini Thaysioe telah doega, kaloe pintoe kota dipentahg dan rahajat diperkenanken boeat kaloear masoek, maski dilakoeken pamereksahan bagimana teliti djoega, pastilah itoe Hohan-hohan dari lemmatjwan masi bisa samarken diri, hingga lebi baek kaloe ditoetoep teroes.
Begitoelah hal ini telah kadjadian,
Lie Eng jang liat begitoe djadi amat koeatir, kerna tida ada djalanan boeat masoek, achirnja ia ambil poetoesan boeat serang kota Tjongtjioe dengen berterang. Dimana sigra djoega ia prenta Houw-jan Tjiak bawa limaratoes liauwlo aken menantang perang.
Tapi Ko Gwan tida maoe ladeni, hanja tinggal toetoep pintoe dengen poera-poera toeliken koeping. Besoknja Lie Eng prenta lagi laen soedara boeat madjoe, tapi sabagimana kamaren, ini kali poen begitoe djoega.
Satiap hari Hohan-hohan dari lemmatjwan soeda dateng poekoel itoe kota, tapi lantaran pendjagahan dilakoeken begitoe keras, saban kali madjoe terpaksa barisan itoe djadi kombali dengen tida dapetken hasilnja.
Lie Eng djadi bingoeng betoel. Kerna ia koeatir, sabelonnja kota Tjongtjioe terpoekoel petja, Tja Tjin soeda djalanken hoekoemannja
Tiga hari telah berlaloe.
Ko Gwan jang liat barisannja Lie Eng meujerang begitoe keras, lantas dapet doegahan ini semoea dimaksoedken tentoe boeat menoeloeng persakitan. Tapi kaloe Tja Tjin soeda mati, brangkali itoe barisan lemmatjwan aken moendoer sendirinja. Dengen berpikir begitoe, ini Thaysioe laloe prenta orang panggil cipier boei, jang satelah dateng, ia laloe berkata:
„Bagimana keadahannja Tja Tjin di dalem pendjara?“
„Didjaga dengen teliti sekali,“ saoet itoe cipier sambil membongkokki badan: „siang dan malem dipreksa dengen keras.“
„Baeklah,“ saoet Ko Gwan: „tapi ini malem itoe persakitan kaoe boleh abisken sadja djiwanja dengen gantoeng di satoe tiang sampe mati, soepaja besok pagi kapala itoe boleh dipantjer di pintoe kota Tjongtjioe. Kaloe barisan lemmatjwan soeda liat kapalanja Tja Tjin, pastilah itoe pasoekan setan nanti moendoer sendirinja.“
Cipier manggoetken kapala, soeatoe tanda ada mengarti baek atas itoe prenta.
Ini cipier ada bernama Kit Hoe, saorang jang berhati baek dan bisa mengenal orang. Pada waktoe pertama kali Tja Tjin dimasoeki ka dalem pendjara, ia rawati dengen baek. Kendati Ko Gwan prenta djaga keras, tapi ia lakoeken pendjagahan sabagimana biasanja sadja.
Itoe hari sapoelangnja ka tempat sendiri, sasoedanja menerima itoe prenta, hatinja merasa amat tida enak. Kerna menoeroet pengliatannja, Tja Tjin itoe saorang baek dan berboedi, hingga terlaloe tida patoet kaloe ia moesti toeroet prentanja Thaysioe boeat lakoeken itoe hoekoeman ngeri.
„Akoe moesti toeloeng padanja,“ kata Kit Hoe dalem hati: „tapi tjara bagimanatah boeat lakoeken itoe pertoeloengan?”
Boeat lakoeken itoe pertoeloengan, maski banjak atawa sedikit, besar atawa ketjil, kaloe kataoean oleh Thaysioe pastilah dirinja djadi bersala. Lantaran itoe, maka ia rasa: kaloe maoe membri toeloengan ada lebi baek menoeloeng betoel-betoel, djangan satenga hati.
Begitoelah achirnja cipier ini ambil poetoesan, boekan sadja hendak toeloeng Tja Tjin dari kamatian, tapi hendak briken djoega orang bangsawan itoe poenja kamerdikahan.
Achir-achir dapet satoe tipoe jang baek, maka dengen girang ia balik kombali ka dalem pendjara dan berkata pada orang-orang jang sebla bawahannja:
„Ini sekali kita-orang bisa dapet satoe kasenangan dan kaplesiran, dimana kaoe berame djoega bisa toeroet rasaken itoe.”
„Kaplesiran apatah?” tanja kawan-kawannja dengen heran.
„Tadi akoe dipanggil oleh Thaysioe,” kata Kit Hoe: „diprenta, jang ini malem moesti gantoeng itoe persakitan Tja Tjin. Tapi itoe orang tawanan ada banjak mempoenjai doewit, maka ada lebi baek kaloe sekarang kita ambil oewangnja boeat membeli arak dan daging, goena kita poenja kaplesiran. Kerna ia soeda mati, oewang itoe toch bakal djadi kapoenjahan kita djoega boekan?”
Semoea kawannja jang denger djadi soeka hati, maka perkatahannja Kit Hoe itoe tida ada saorang jang tida membilang betoel. Sasoedanja beromong-omong pada itoe semoea orang jang diwadjibken mendjaga persakitan, cipier ini laloe masoek ka tempatnja Tja Tjin, dimana ia dapet liat, roepanja itoe orang, bangsawan ada sedikit poeijet, sedeng parasnja kaliatan lesoe, soeatoe tanda ia ada menanggoeng kadoekahan hati.
Kit Hoe laloe menghamperi, sambil tertawa ia berkata:
"Tja Kwadjin, apa kaoe taoe ada terdjadi kabar apa-apa di ini kota?‘
"Ada terdjadi apatah ?“ begitoe Tja Tjin bales menanja: "mana akoe bisa taoe?"
Barisan lemmat wan soeda poekoel ini kota sadari tiga hari jang laloe, dengen maksoed maoe toeloeng padamoe," kata itoe cipier: "tapi Thaysioe belon pernah kaloearken balatentara boeat melawan."
Lebi djace Kit Hoe tjeritaken, bagimana Thaysioe Ko Gwan telah kaloearken prenta boeat lantas djalanken hoekoeman mati atas dirinja ini persakitan, tapi boekan dengen hoekoeman boenoe, hanja hoekoem gantoeng.
Tja Tjin djadi kaget dan poetiet.
"Apa Kwadjin tida inget," kata poela Kit Hoe:
"doeloe waktoe kaoe ditangkep oleh Ko Kim jaitore soedaranja Thaysioe jang sekarang, lantaran hoekoeman dilakoeken lebi lambat, sampe kaboeroe Doeroe dateng barisan dari Liangsan, hingga djiwanja Ko Kim sendiri telah binasa. Tapi sekaran Thaysioe tida maoe sampe kadjadian begitoe lagi, berhoeboeng datengnja barisan dari lemmatjwan, maka alas prentanja ini malem akoe moesti lantas djalanken itoe hoekoeman gantoeng atas dirimoe, soepaja barisan lemmatjwan boleh moendoer kombali.
Tja Tjin tida bisa berkata soeatoe apa, hanja tinggal menepas aer mata sadja.
Kit Hoe laloe minta Tja Tjin kaloearken oewangnja, maka orang bangsawan ini tida kaberatan dan sigra djoega ia kaloearken saratoes tail perak dan briken pada itoe cipier, sarajah minta, kaloe sasoedanja mati, ini cipier soeka toeloeng beliken peti boeat koeboer maitnja.
Kit Hoe berdjandji nanti lakoeken itoe pesenan. Maka oewang terseboet ia lantas bagiken pada kawan-kawannja jang ada di sitoe, saorang doea tail dan doea tail poela boeat beli arak dan barang makanan, sedeng salebinja ia masoeki dalem sakoe sendiri.
Itoe malem kawan-kawannja pada makan minoem dengen sagala soeka hati. Tapi itoe cipier sendiri tida minoem banjak dan lantas pergi ka kantoornja Thaysioe, jang waktoe balik kombali, tangannja membawa satoe Lengtjiam, dan menoeroet katanja: Ko Gwan prenta bawa Tja Tjin ka kantoornja boeat djalanken itoe hoekoeman di sana.
Ini perkatahan ada dipertjaja oleh itoe semoea pendjaga boei. Maka Tja Tjin dengen tangan terbelenggoe laloe dibawa ka loear pendjara.
Di djalanan, cipier itoe katemoe Soen Thongtji, dan waktoe Kit Hoe oendjoeki itoe Lengtjiam sabagi satoe pertandahan, itoe penggawe jang meronda lantas berlaloe ka laen tempat dengen tida merasa tjoeriga.
Tja Tjin sabegitoe djaoe masi belon taoe kaloe dirinja maoe ditoeloeng, hanja mengikoet sadja ka mana cipier itoe maoe bawa. Sasampenja di satoe kampoeng Kit Hoe laloe hamperi satoe roema dan di sini Tja Tjin dibawa masoek.
Itoe cipier laloe boekai borgolannja dan kasi taoe maksoednja jang bener.
Mendenger itoe perkatahan Tja Tjin laloe djatoken dirinja di depan itoe cipier. Tapi Kit Hoe boeroe-boeroe angkat bangoeni, sambil berkata:
„Kaloe akoe soeda tida membri taoe lebi doeloe ini perkara pada Kwadjin, kerna akoe koeatir nanti djadi gagal. Tapi sekarang kita-orang telah beroentoeng bisa liwati bebrapa kasoekeran. Boekan sadja kawan-kawankoe tida mendoega soeatoe apa, hanja Soen Thongtji poen soeda lepasken kita liwat.
„Tapi ini roema siapatah ?" tanja Ta Tjin.
„Ini roemanja Tong Goe-tji," saoet Kit Hoe: „pendoedoek di kota Koensinkoan jang idoep dengen mendjoeal sajoer, Tapi waktoe Song Kong-beng ditangkep lantaran boenoe mati Giam Pho-sek, dan lantaran Tong Goe-tji inget boedinja Kong-beng Koko, maka ia soeda tjoba menoeloeng dan achirnja kataoean, dimana ia ditangkep dan lantas diboewang ka mari."
„Hoekoeman itoe soeda lama didjalanken abis," kata poela itoe cipier: „tapi lantaran tida poenja ongkos poelang kombali ka tempat sendiri maka ia tinggal teroes di ini kampoeng. Padanja akoe soeda berempoek boeat menoeloeng Tja Kwadjin, dimana ia poen moefakat. Sekarang baek Kwadjin semboeni doeloe di sini, boeat bernanti toeloengnja Hohan-hohan lemmatjwan."
Tja Tjin djadi amat girang dan menjataken rasa soekoernja pada Kit Hoe jang baek.
„Akoe tida taoe dengen apa boedimoe akoe nanti bales," kata itoe orang bangsawan: dengen ini pertoeloengan jang kaoe briken, tida bedah sabagi kaoe samboeng kombali akoe poenja djiwa.
Kamoedian marika berdami lebi djaoe, achirnja Tja Tjin toeroet nasehatnja itoe cipier, boeat toelis satoe soerat aken disampeken ka pasang grahannja barisan lemmatjwan. Soerat itoe di-iket di oedjoeng pana, jang dari tembok kota lantas dfpanaken ka tangsinja Lie Eng.
Sasoedanja itoe marika berdami lebi djaoe boeat toeloeng lepasken familienja itoe orang bangsawan. Tapi sabelonnja koelawarga Tja katoeloengan, esoknja ini perkara lari Ko Gwan dapet taoe sebab sampe siang Kit Hoe masi djoega belon dateng anterken itoe kapala.
Sigra djoega ia tanja laen-laen pendjaga boei, jang lantas membri taoe: hahoewa Kit Hoe soeda bawa itoe persakitan ka kantoornja Tjaysioe, kerna katanja itoe persakitan maoe dihoekoem di sana.
Soen Thongtji jang itoe malem ada meronda lantas ditanja, mengapa ia tida tangkep itoe doea orang. Tapi ini penggawe kata: bagimaua ia bisa taoe kaloe Tja Tjin dan Kit Hoe soeda bersakongkol satoe pada laen, kerna cipier itoe ada membawa djoega Lengtjiam sabagi pertandahan.
"Ah, itoe orang-orang doerhaka!” kata Ko Gwan sambil banting-banting kaki, dengen soeara moerka:"soenggoe akoe tida mengarti, bagimana itoe Lengtjiam bisa terdjato ka dalem tangannja Kit Hoe."
Kamoedian ia prenta Soen Thongtjie bawa sadjoembla soldadoe boeat gledah roema-roema dan waroeng-waroeng dalem ini kota, jang kaloe kadapetan ada Tja Tjin, moesti lantas ditangkep bersama orang jang poenja-roema.
Prenta ini dilakoeken dengen sigra. Itoe penggawe lantas bawa soldadoe koeda dan bikin pamereksahan di sana sini. Sasoeatoe roema dipreksa dengen teliti, dari bawah sampe ka atas dan sagala podjok tida ada jang diliwatken.
Tapi itoe orang jang ditjari tida katemoe.
Keadahan dalem kota Tjongtjioe itoe waktoe djadi amat kaloet.
Sebab pintoe kota sadari tiga hari jang laloe soeda ditoetoep, maka Ko Gwan doega Tja Tjin tentoe masi ada di dalem kota. Maka waktoe orang jang diprenta menggeledah dateng membri taoe pakerdjahannja, Thaysioe ini djadi goesar dan kata:
,,Moesti ada, mana boleh tida! Kerna sadari tiga hari jang laloe pintoe kota ada tertoetoep, maka ia tentoe masi ada di dalem kota. Oelangken poela papreksahanmoe dengen lebi teliti."
Dengen apa-boleh-boeat penggawe itoe menggeledah poela di sasoeatoe roema. Tatkala itoe Tong Goe-tji ada doedoek di pertengahan, sambil hadepken koeali boeboer dan pentang kadoea daon pintoe besar-besar, sedikit poen tida merasa koeatir.
Pada tetangganja Goe-tji berkata:
,,Sabegitoe lama pintoe kota masi tertoetoep, orang tida bisa keloear tjari pengasilan. Kaloe keadahan tinggal begini roepa, lagi satoe boelan sadja kita-orang di sini aken hadepken bahaja kalaparan." „Sekarang Thongtjie bersama bebrapa orang politie soeda morlai menggledah poela,“ kata itoe tetangga: „kerna Thaysioe tida maoe pertjaja kaloe Tja Tjin soeda bisa kaloear dari ini kota.“
„Ah, kaloe kita bisa dapet taoe tempat semboeninja Tja Tjin, enak betoel,“ kata Tung Goetji dengen roepa seperti orang kapingin: „dengen membri taoe pada orang politie, kita bisa trima persen saratoes koan, jang tjoekoeplah boeat dipake brapa boelan salagi pintoe kota belon diboeka.“
Salagi marika beromong-omong, itoe orang politie telah sampe dan marika laloe brenti di depan itoe roema, dimana Tong Goe-tji laloe silaken mampir.
Boleh djadi Tja Tjin itoe ada mengoempet di ini tempat,“ kata sala satoe dari itoe oppas-oppas dengen soeara memaen.
„Silaken sadja kaoe masoek boeat preksa,” kata toean roema dengen soeara tetep: „soepaja kaoe tida melanggar kawadjibanmoe jang dipertjajaken.”
Maski sabenernja politie itoe tida maoe masoek, tapi menginget kawadjibannja, jang moesti gledah sasoeatoe roema dengen zonder ada katjoealinja, satoe antaranja laloe masoek dan melongok-longok, dimana ada kaliatan gelap, dan di tana ada menggeletakan banjak kajoe-kajoe aloes. Pada waktoe kaloear orang politie itoe berkata:
„Tja Tjin tida ada, tapi ada Tja Sin.”
Tja Sin itoe berarti „kajoe bakar“, maka kawan-kawannja laloe tertawa dan berlaloe kombali.
Ampir berbareng itoe, ada terdenger soearanja rahajat negri jang bersoerak. Dan waktoe tetangga-tetangganja Tong Goe-tji menanja: ada apa, marika itoe bilang, bahoewa barisan lemmatjwan jang mengoeroeng ini kota telah moendoer kombali.
Ini kabar ditrima dengen girang hati, Goe-tji bersama laen-laen orang laloe boeroe-boeroe naek ka tembok kota. Kamoedian rahajat negri madjoeken permintahan pada pembesar Tjongtjioe, soepaja kota diboeka kombali boeat orang tjari kajoe, berasa dan sabaginja. Ko Gwan jang sasoeda preksa betoel moesoe tetah berlaloe, lantas Prenta boeka pintoe boeat lamanja tiga djam, tapi saliwatnja dari itoe moesti ditoetoep kombali, sebab koeatir itoe barisan dateng menjerang dengen djalan menggelap.
Moendoernja ini barisan sasoenggoenja ada menggoenaken satoe tipoe. Kerna sala satoe dari itoe Hohan-hohan, jang satelah poengoet itoe soerat jang Goe-tji panaken, laloe bawa ka tangsinja dan serahken pada Lie Eng.
Soerat itoe bouenjinja membri taoe pada Tja Tjin poenja sakalian sobat-sobat, bahoewa itoe orang bangsawan sekarang soeda berada di loear pendjara. Lie Eng jang sasoedanja batja itoe lantas berdami, achirnja diambil poetoesan boeat moendoerken ini barisan ka dalem oetan, soepaja pintoe kota Tjongtjioe tida ditoetoep salama-lamanja. Kaloe pintoe soeda diboeka, marika boleh masoek dengen menjamar.
„Kaloe kita toenggoein toch pertjoema,“ kata sala satoe dari itoe Hohan: „sebab Ko Gwan tida maoe kaloear perang. Maka baek kita poera-poera moendoerin sadja, tambahan kita soeda taoe jang Tja Koko telah berada di loear pendjara.“
Semoea orang gaga menjataken satoedjoe, demikianlah barisan terseboet lantas dimoendoerin.
Boeat masoek ka dalem kota Te Tjong berdoea Jo Liem menjamar sabagi penggawe penggawe kantoor, Houwjan Giok berdoea Tjhie Seng menjaroe djadi anak sakolahan, dengen bawa bebrapa pengikoet; sedeng liauwlo-liauwlo ada jang menjamar djadi toekang kajoe, toekang roempoet dan sabaginja, dengen bertjampoeran pada anak negri marika masoek ka dalem kota.
Kerna di dalem itoe soerat jang Tong Goe-tji panaken kaloear, Tja Tjin ada terangken di mana dirinja ada semboeni, maka begitoe orang-orang lemmatjwan sampe di dalem, marika itoe laloe pergi ka itoe kampoeng boeat katemoeken Tja Tjin.
Goe-tji laloe anterken ampat Hohan itoe ka dalem.
Tida perloe ditoetoerken lagi bagimana ampat orang gaga itoe djadi girang dan beromong-omong, dan Tja Tjin saban-saban mengoetjap trima kasi, boeat tenaga jang itoe semoea Hohan telah kaloearken.
Kamoedian Jo Liem tanjaken tempatnja Tja Tjin poenja koelawarga, soepaja sabentar kaloe kota soeda terpoekoel petja, marika bisa lantas toeloeng bawa familienja itoe orang bangsawan.
Lebi djaoe Jo Liem tjeritaken daja bagimana Lie Eng soeda tetepken boeat toeloeng ini Koko.
Waktoe hari moelai malem, barisan lemmatjwan jang tadi siang soeda moendoer, telah balik kombali, hingga Ko Gwan jang denger djadi kaget dan lantas prenta bikin pendjagahan lebi koeat. Salaennja soldadoe, anak negri poen banjak jang bantoe mendjaga.
Tong Goe-tji bersama itoe ampat Hohan jang menjamar laloe toeroet mendjaga.
Di waktoe masi sore Ko Gwan sendiri meronda, Tapi sasoedanja malem ia balik kombali ka gedongnja dan tinggalken ia poenja soldadoe bersama orang-orangnja. Kira-kira djam ampat waktoe orang jang mendjaga sedeng ngantoeknja Tee Tjong laloe kibarken soetra poeti, jaitoe pertandahan boeat barisannja madjoe menjerang.
Sasoeda membri itoe tanda, Tee Tjong laloe tabas-tabasin soldadoe jang mendjaga, sedeng Tjhie Seng berdoea Houw-jan Giok lantas boeka pintoe kota boeat barisannja masoek, jang lantas menerobos sambil tabas sasoeatoe soldadoe jang dikatemoe.
Koetika jang dari loear menjerang masoek, jang dari dalem poekoel kaloear, hingga sabentaran sadja balatentara jang mendjaga itoe kota abis terboenoe. Lie Eng berame laloe pergi ka gedongnja Ko Gwan dan boenoe sasoeatoe orang jang dikatemoeken dalem itoe roema.
Ko Gwan bersama familienja dalem tempo sakedjeb telah binasa. Sedeng Tee Tjong bersama Jo Liem dan jang laen-laen laloe pergi ka pendjara boeat lepasken familie Tja, jang kamoedian lantas berkoempoel di pertengahan gedongnja Thaysioe.
Itoe malem keadahan dalem kota Tjongtjioe ada amat kaloet. Tapi rahajat lemmatjwan memang soeda dipesen, jang marika tjoema boleh binasaken sadja soldadoe-soldadoe, sedeng anak negri tida dikasi ganggoe.
Waktoe orang lepasken koelawarganja. Tja Tjin, laen-laen persakitan poen soeda toeroet terlepas dan bantoe fihaknja lemmatjwan dengen goembira. Kamoedian Lie Eng kaloearken prenta boeat bikin keadahan mendjadi aman kombali.
Ko Gwan poenja harta banda lantas dirampas sedeng Lie Eng laloe preksa keadahannja goedang negri, seperti ramsoem, oewang, alat sendjata dan sabaginja. Dan ini semoea diangkoet bawa poelang.
Sebab di dalem kota banjak orang-orang jang soeesa, maka Tong Goe-tji laloe ambil beras dan oewang boeat dibagi-bagiken pada tetangganja. Semoea orang pada poedji kabraniannja Goe-tji ang katanja: lebi doeloe dari ini marika tida doega kaloe ia ada mempoenjai njali begitoe besar.
Sigra djoega orang doedoek omong-omong dan Tja Tjin hatoerken trima kasi atas Lie Eng dan sakalian Hohan poenja pertoeloengan, sedeng pada Kit Hoe dan Goe-tji, djoega tida loepa dihatoerken itoe.
Begitoelah dengen berlakoe soenggoe hati, kota Tjongtjioe bisa dipoekoel petja dan Tja Tjin beserta koelawarganja, semoea telah katoeloengan.