Pembalesannja Kawanan Liangsan/Bagian katiga/Bab 1
BAGIAN KATIGA.
I
Bikin peroendingan bitjaraken tempat.
Dapet lamatan, orang-orang
gaga meninggalken
Siauwhewan.
Pada soeatoe hari, di waktoe oedara ada bagoes, Twako dari Siauwhewan prenta orangnja bikin sadia barang-barang makanan, dan sembari minoem, itoe orang-orang gaga ada roendingken banjak perkara jang boeat djadi kabaekannja marika poenja diri dan tempat.
Apapoela menginget itoe waktoe marika soeda perhinaken Lu Thaysio dan Teng Tjoe-pian, maka Gak Ho jang berpikir pandjang, djadi merasa koeatir, kaloe-kaloe itoe doea orang jang bersakit hati nanti madjoeken dakwahan pada pamerenta, dengen toedoeh bahoewa marika telah dateng merampok atawa menipoe, tentoe bisa mendatengken perkara jang tida enak.
Oleh kerna itoe djoega, maka Gak Ho kasi pikiran, lebi baek dari sekarang bikin persadiahan, soepaja begitoe bahaja jang tida didoega mendatengi, iaorang bisa menangkis dengen zonder merasa keder atawa kasoesoe.
Tek Seng dan Hoei Po djawab, dari perkara tempat troesa terlaloe di-iboeki, kerna Siauwhewan ada satoe tempat jang bagoes sekali dan tida gampang boeat didatengi moesoe. Tong Wie samboeng itoe bitjara dan kata: loewasnja Siauwhewan ada kira-kira delapanratoes li, dengen dikiteri oleh toedjoepoeloe doea poentjak goenoeng jang tinggi, tegesnja maoe dioendjoek, bahoewa ini tempat ada sebagi benteng jang tegoeh boeat melawan dan menangkis datengnja moesoe.
„Laen dari begitoe,” kata Tong Wie: „kita poenja ramsoem dan oewang poen ada sadia tjoekoep, apatah djoega jang moesti dikoeatirken lagi?“
„Salaennja barang-barang kaperloean dan oewang kita ada sadia sampe banjak,“ barkata Tong Seng jang samboeng bitjaranja ia poenja Koko: „kita paenja orang-orang jang biasa melakoeken pakerdjahan tangkep ikan poen ada banjak dan boleh digoenaken sabagi rahajat dalem waktoe bertempoer. Dan kaloe kita ada kakoerangan koeda atawa alat sendjats, itoelah dengen gampang sekali sekali bisa dibeli. Maka dalem sakadjeb kita poenja angkatan perang djadi lengkep betoel boeat bersatroe pada tentara negri.“
Maski samoea soedara-soedaranja ada poedjiken betoel tentang kabagoesannja Siauwhewan dan katjoekoepannja marika poenja barang-barang bekelan, tapi Gak Ho jang berpemandangan loewas dan pande dalem ini oeroesan, masi tetep gojang kapala sambil berkata:
„Tentang kaloewasan dan bagoesnja ini tempat, itoelah akoe telah liat. Tapi boeat perhoeboengan ada satoe tempat mati, inilah jang koerang bagoes. Tjoba kaloe tida begitoe, haroes dibilang Siauwhewan ada sampoerna betoel.“
„Dari banjaknja orang-orang jang lakoeken pakerdjahan penangkep ikan, itoelah akoe tida sangkal,” kata poela ia: „tapi marika itoe, boekan ada orang-orang jang terp'adjar dalem paperangan. Apatah Hengtiang sakalian tida denger, kendati sedikit kaloe terpladjar, ada lebi menang pada jang banjak, tapi koerang terpladjar?”
Ini perkatahan jang paling blakang membikin itoe soedara-soedara jang tadi telah berkata-kata djadi tida bisa menjaoet. Sedeng Gak Ho berkata lebi djaoe.
„Apapoela kaloe dari Ohtjioe, Siangtjioe dan Souwtjioe lakoeken pengepoengan sakali berbareng, ka manatahkita nnnti moendoer? betoel itoe Lu Thaysioe ada satoe pembesar goblog dan tida mengarti atoeran perang, tapi kaloe ada laen orang jang pande dan djalanken itoe tipoe, bagimana?”
Itoe peroendingan masoek betoel dalem hatinja masing-masing, hingga Lie Tjhoen sendiri tida bisa berkata soeatoe apa. „Kaloe begitoe, apa tida baek kaloe sekarang kita berame balik sadja ka Liangsan, boeat djalanken apa jang doeloe Kong-beng Koko soeda tida bisa landjoetken?“ kata Tong Wie: „begitoe brangkali Gak Koko ada satoedjoe?“
„Itoe poen tida baek,“ saoet Gak Ho.
„Kenapa?“ tanja Hoei Po.
„Sebab ada babrapa hal jang mendjadi rintangan, dan djoega tempat itoe tida bersatoedjoe dengen keadahan sekarang.“
„Bagimana boleh djadi begitoe?“
„Jang mendjadi sebab, jalah boekan laen. Pertama, antara Siauwhewan dan Liangsan pernahnja teramat djaoe, hingga kaloe kita moesti pinda dari sini ka sana, ada menjoesaken bagi semoea koelawarga. Kadoea, itoe tempat soeda tida begitoe mahmoer lagi sabagimana doeloe, hingga tida baek boeat djadi tempatnja pergerakan besar jang kita-orang hendak lakoeken. —Nah, itoelah sebab-sebabnja.“
Lie Tjhoen menjataken satoedjoe dengen pendapetannja Gak Ho jang dinjataken baroesan, kerna ini Twako poen kata: satoe kali itoe teeki soeda binasa, soeker diharep aken bisa bangoen kombali. Sedeng hawa-hawa jang baek dan hawa kadjajahan poen, sekarang soeda tida ada lagi.
„Kaloe begitoe, di mana kita-orang moesti djadiken pangkalnja ini pergerakan?“ kata Tong Wie dan Tong Beng dengen soeara berbareng: „bermoela akoe soeda anggap jang Siauwhewan ada soeatoe tempat bagoes. Tapi kaloe denger peroendingannja Gak Koko jang begitoe loewas, bener bener kaliatannja ini tempat djadi tida sampoerna. Sekarang tjobalah Twako dan Gak Koko oendjoek, di mana ada tempat jang paling baek?"
„Inilah tida terlaloe gampang," saoet Gak Ho: boeat dapetken satoe pangkalan jang bagoes dan mahmoer, kita moesti tjari biar betoel, tida boleh sembarangan."
Lie Tjhoen manggoetin kapalanja, tanda moefakat.
Kerna masing-masing ada koerang goembira, maka perdjamoean lantas ditoetoep, kerna hari poen itoe waktoe soeda moelai malem.
Semoea Hohan lantas pada masoek ka kamarnja sendiri-sendiri, begitoe djoega Lie Tjhoen, jang baroe sadja taro kapala tida antara lama, telah mengimpi toenggang saekor oeler itam besar, menoedjoe ka satoe djoeroesan jang ia tida taoe apa namanja.
Achir-achir ia telah sampe dinaatoe astana jang indah, dengen penoeh rasa kapingin taoe keadahannja ini tempat, maka Lie Tjhoen tekan sedikit badannja itoe oelar jang ditoenggang, maka itoe binatang poen laloe masoek ka dalem. Tapi alangkah kagetnja, waktoe meliat jang di pertengahan itoe astana ada satoe korsi besar sabagi tachta, dimana ada doedoek saorang jang berbadan tegap, jang satelah diawasin, boekan laen dari Song Kong-beng.
Lie Tjhoen djadi heran jang tertjampoer kaget dan bingoeng. Tapi itoe Twako dari Liangsan lantas berkata dengen soeara njaring:
„Lie Hiante, kaoe poenja dateng ini ada waktoe jang bener sekali. Berhoeboeng dengen kaoe poenja angen-angen jang besar maka akoe soeka oendjoeki satoe tempat jang bagoes dan mahmoer, jaitoe di poelo Kimgo. Maka lekaslah kaoe pergi ka sana bersama-sama sakalian kita poenja Hengte, boeat geraken itoe peroesahan besar jang sakean lama ada terkandoeng dalem hatimoe."
Baroe sadja Lie Tjhoen maoe tanja lebi djaoe di mana pernahnja itoe poelo, koenjoeng-koenjoeng di oedara ada kadengeran soeara gemoeroe, dan itoe astana djadi mengedar seperti maoeroeboe. Maka hatinja djadi kaget dan takoet, kamoedian kaliatan apa-apa jang membikin ia djadi terkedjoet dan lantas tersedar.
Sakean lama Lie Tjhoen memandang langitnja koelamboe, sedeng hatinja masi rasa berdebar-debar. la lantas soesoet kringet jang membasaken oeboeh, sambil pikiri lebi djaoe itoe impian. „Kong-beng Koko telah oendjoeki satoe tempat." kata ia dalem hati sendiri: satoe tempat boeat gerakin itoe pakerdjahan besar. Tapi, dimanatah pernahnja itoe poelo Kimgo?"
Teroes sampe pagi ia tida bisa poeles lagi, kerna hatinja merasa heran jang tertjampoer girang.
Baroe sadja hari moelai terang tana, ini Twako laloe tjoetji moeka dan badan, kamoedian toekar pakean, dan pergi ka itoe roewangan tempat di mana kamaren marika beroending. Di sitoe ia dapetken soeda ada berkoempoel bebrapa Hohan, jang sigra djoega ia kasi taoe tentang impiannja.
„Kaloe begitoe," kata Gak Ho, jang sasoeda denger Lie Tjhoen poenja tjerita: „berhoeboeng dengen itoe agen-agen besar jang terkandoeng dalem hati, baek sekali kaloe Twako ambil toeladan dari Sri Baginda Lie Sie-bin."
Baginda Lie Sie-bin telah berboeat bagimanatah ?" tanja Lie Tjhoen.
„Dengen meliat sadja pada priboedinja, sabelonnja Baginda itoe djadi Keizer, Thio Tiongkian soeda bisa lantas taoe, jang Lie Sie-bin itoe bakal djadi satoe djoengdjoengan," kata Gak Ho jang menoetoerken itoe tjerita di djaman dahoeloe: „kerna boekan sadja kalakoean adil jang dioendjoek, hanja telah oendoerken diri ka loear dari Tionggoan, aken menjebrang laoetan berdiam di satoe poelo. Tapi blakangan, koetika di dalem negri timboel hoeroe-hara, kerna delapanbelas Radja-radja Moeda pada berontak boeat mereboet kebesaran, dengen di loear orang poenja doegahan Lie Sie-bin laloe siapken ia poenja angkatan laoet aken balik kombali ka Tionggoan boeat pademken itoe hoeroe-hara, dan sasoedahnja negri mendjadi aman, orang laloe angkat dirinja mendjadi Toewan jang mamerenta itoe benoewa."
„Maka sekarang", kata poela Gak Ho: „boeat sampeken itoe maksoed besar, baeklah Twako toeroet pengoendjoekannja Kong-beng Koko dan berangkatlah dari sini menjebrang laoetan, pergi di poelo Kimgo, boeat toenggoe sampe dateng itoe waktoe jang baek." sont
„Hiante poenja voorstel ada bersetoedjoe pada apa jang dibilang kaharoesan," kata Lie Tjhoen dengen girang: maka betoel-betoel akoe moefakat sekali."
Berbareng itoe dateng poela laen-laen Hohan ka itoe roewangan, dan pada itoe soedara-soedara jang dateng blakangan dan belon denger tentang impiannja, Lie Tjhoen laloe tjeritaken satoe persatoe, dan bagimana kamoedian Gak Ho soeda kasi pikiran jang disatoedjoe olehnja.
Semoea Hengte jang denger itoe. masing-masing djadi girang dan soeka hati. Maka itoe voorstel boeat menjebrang laoetan laloe ditetepken, kerna semoea orang poen tida ada jang membanta. Sigra djoega orang-orang penangkep ikannja dibri prenta boeat beresken sagala barang-barang kaperloean jang bakal dibawa; sedeng orang-orang prampoean, benahken barang-barang pakean dan perhiasan jang berharga. Dan kaloe itoe semoea soeda selesih, iaorang nanti berangkat tinggalken ini Siauwhewan.
Itoe hari prenta dikaloearken, semoea orang-orang penangkep ikan bekerdja repot, Tapi baroe sadja selang satoe hari, sedeng saorang menbawa kabar, jang Siangtjioe poenja Thaysioe, lantaran sakit hati soeda kirim rapport pada Siangsi di kota Radja, dalem mana ada dikasi taoe, jang kawanan Liangsan di Siauwhewan telali bikin onar. Maka pamerenta agoeng telah prenta siapkan balatentara aken menjebrang ini tempat, tida lama angkatan perang itoe tentoe bakal sampe ka mari.
Satelah denger itoe kabar, Gak Ho kata, kaloe begitoe baeklah harinja berangkat dimadjoeken lebi lekas. Tapi hal ini tida disatoedjoe oleh Tek Seng, jang bilang: boekantah ini ada waktoe jang baek boeat bikin pertempoeran pada tentara negri.
Orang-orang jang soeka berperang, semoea njataken satoedjoe pada Tek Seng. Tapi Gak Ho tetep tida moefakat, kaloe moesti memboewang tenaga sta-sia.
Lie Tjhoen jang merasa bitjaranja itoe sobat ada lebi betoel, laloe tanja bagimana pikirannja. Gak Ho bilang, kaloe semoea soeda sadia, ini malem djoega boleh lantas berangkat djalan Sebab ini waktoe ada perloe iaorang himatken tenaga. Seande dalem ini paperangan pada tentara negri, di fihaknja dapet kamenangan, apahasilnja, toch tida laen dari pada memboewang tenaga.
Ini katerangan, baroelah semoea soedara-soedara djadi moefakat.
Sigra djoega Lie Tjhoen laloe kasi taoe orang-orangnja, bahoewa ini malem praoe moesti tersadia, dan barang-barang sabrapa jang ada, moesti lantas dimoeatken ka dalem itoe kandaran aer, pada sabelonnja tentara nagri dateng ka ini tempat.
Ini prenta dilakoeken dengen tjepet, tida lama semoea telah selesih, dan praoe-praoe jang moeat barang, koelawarga prampoean dan orang-orang semoea telah belajar di bawah angin jang bagoes,
Selang satoe hari, praoe-praoe itoe telah kaloear dari telaga dan sekarang ada belajar di tenga laoetan besar. Oleh kerna itoe waktoe ombak ada kentjang, maka banjak praoe djadi teroembang-ambing, hingga menerbitken rasa koeatir di hatinja itoe orang-orang jang berada di dalemnja.
Soepaja bisa tetepken hatinja orang-orang prampoean jang memang gampang katakoetan Lie Tjhoen laloe prenta anak-anak praoe belaboe di soeatoe pasisir, waktoe mana kabetoelan, di itoe tempat ada banjak orang, dan atas pertanjahannja ini Twako, orang itoe kata:
„Tentoe sadja ini praoe-praoe tida bisa tahan damparannja ombak, sebab ini poen ada kandaran-kandaran jangjtjoema digoenaken di soenge, atawa telaga. Tapi boeal belajar di laoetan, orang haroes goenaken kapal besar."
Temennja itoe orang jang di pasisir poen bilang, kaloe tetep dipake praoe boeat belajar, pastilah kandaran-kandaran ini moesti kaleboe. Katerangan mana membingoegken sanget hatinja itoe Twako.
„Kaloe begitoe, di mana kita moesti dapet kapal?" kata Lie Tjhoen dengen hati jang amat masgoel
„Oh, itoelah gampang sekali," kata Gak Ho jang dari tadi ada mengawasken ka satoe djoeroesan: kapal jang menoenggae kita soeda sadia. Dan apa itoe di sana boekan ada kapal boeat anter kita?"
Lie Tjhoen dan laen-laen Hohan pada menengok, dan betoel sadja ka djoeroesan jang dioendjoek ada kaliatan saboea kapal besar jang lagi berlaboe. Kapal itoe ada mengibarken bendera jang diloekis doea hoeroef „Djoe Bit."
Semoea orang jang meliat itoe djadi amat girang, apapoela itoe merek jang terloekis di bendera tiang kapal.
———