Pembalesannja Kawanan Liangsan/Bagian kadoea/Bab 10
X
Dengen katjerdikannja Gak Ho menoe-
loeng Lie Tjhoen. — Bikin pem-
balesan mendapet sadjoembla
kaoentoengan.
Satelah sampe, Lie Hoen dan Ko Tjeng laloe menanja dengen Soeara berbareng:
„Bagimana itoe oeroesan, beres ?“
„Belon thoekoep,“ Saoet Tong Wie sambil golengken Kapala.
„Belon toekoep ? Brapatah itoe Thaysioe maoe dapet dari kita?“
„tigariboe tail“
„Hola itoelah boekan sedikit oewang. “ „Sabetoelnja, bermoela ia maoe minta diteboes salaksa tail perak, “kata Tong Wie jang laloe toetoerken satoe persatoe apa jang Twakonja telah tjeritaken padanja, Tapi sasoedanja dikasi taoe, jang kalue. maoe dimintaken Sabegitoe, itoe Twako lebi soeka dibawa ka kota Radja, achirnja pembitjarahan itoe djadi poetoes boeat tigariboe tail sadja.
„Betoel itoe djoembla ada besar,“ kata Tong Wie: „tapi akoe soeda sanggoepin boeat tjoekoepi itoe djoembla“ „Dengen tjara bagimanatah Tong Hengte hendak dapetken itoe oewang?" menanja Lie Hoen dan Ko Tjeng sambil mengawasi: „apatah dari kita poenja perdagangan jang biasa, atawakah dengen mendjoeal barang-barang?“
„Boekan, boekan begitoe,“ saoetnja: „pada waktoe akoe sanggoepin itoe, akoe soeda tetepken djoega Satoe perniatan jang bagoes“
„Niatan bagimana jang Koko telah pikir?“ tanja Tong Beng jang soeda moelai koerang sabar: „tjeritakenlah! tjeritakenlah! soepaja kita bisa lantas lakoeken.“
„Kita lakoeken sadja itoe pakerdjahan jang doeloe hari,“ saoetnja sambil memandang itoe tiga soedara: „sebab dengen laen djalan ada terlaloe soesa dan lama boeat didapet, kerna itoe djoembla poen boekan sedikit. Tapi dengen itoe pakerdjahan, kita bisa dapetken dengen sekali madjoe, Malah bisa diharep djoega aken mendapet lebihan.“
Tong Beng, dan Lie Hoen dan Ko Tjeng satoe pada laen saling mengawasi. Dengen itoe penjaoe au, marika poen mengarti, jang Tong Wie hendak lakoeken kombali pembegalan atawa pembadjakan seperti doeloe.
„Apa Hiante tida moefakat?“ tanja ia, koetika liat itoe tiga so dara tenggal berdiam sadja.
„Ah, masa!“ saoet Lie Hoen: „tjoema sadja, apa Twako. djoega taoe apa jang kita bakal lakoeken ?”
„Itoe tida perloe,“ saoet Tong Wie: „asal kita bisa bawa itoe djoembla jang koerang, inilah akoe rasa soeda tjoekoep. Boeat apa Twako taoe dari mana kita dapet. Atawa sekali poen kamoedian ta taoe, kita boleh bilang sadja teroes terang, moestail ia boleh djadi koerang senang?“
Begitoe ampat soedara ini laloe berdami, achirnja iaorang ambil poetoesan boeat toeroet pikiran jang telah ditetepken oleh Tong Wie Sekarang marika. dikin permoefakatan, di tempat mana pembadjakan itoe haroes dilakoeken.
Sasoedanja beroending sakoetika lama, achirnja ditetepken, jang Tong Wie berdoea Tong Beng lakoeken pembadjakan di daerah Sowtijioe, sedeng Lie Hoen berdoea Ko Tjeng nanti mamegat soedagar-soedagar jang liwat bilangan Ohtjioe.
Tong Wie doea soedara lantas satodjoe, dan sehabisnja bitjara, marika laloe siapken keperloeannja.
Orang-orangnja jang biasa membantoe tangkep ikan dan jang paling boleh dipertiaja, laloe dipili bebrapa poeloe orang, dengen membawa sendjata-sendjata jang lengkep pada roeroen ka praoe.
Pada itoe sore langit ada sedikit gelap, maka praoe-praoe itoe lantas kaloear dari moeara dan masing-masing ambil fihaknja sendiri. Anak-anak praoe jang memang ada asal pembadjak, lantas djalanken kandaran aernja seperti. angin, sedeng Tong Wie Sabentar-sabentar menengok ka sana dan sini.
Tatkala itoe di daerah Souwitjioe belon ada kaliatan satoe praoe jang liwat. Tapi ini orang gaga tida djadi poetoes harepan, hanja meronda dengen bernapsoe. Dengen tida perdoeli oedara gelap dan. angin riboet.
Datengnja angin samingkin santer, hingga lajar-lajar terpaksa moesti digoeloeng, soepaja praoe tida teroembang-ambing.
Tong Wie masi djoega belon dapet liat ada praoe jang liwat.
"Ah, ini malem tentoe tida ada praoe jang liwat,”
kata Tong Wie dengen hati kesel: "Sebab angin begini riboet. Tapi biarlah kita menoenggoe sadja sampe besok malem, kerna tempo toch nasi ada bebrapa hari."
Tapi, sedeng Tong Wie tidea mempoenjai harepan dapet megat orang di waktoe gelap goelita begitoe, dateng Tong Beng sembari berkata dengen tangan menoendjoek :
"Koko, tjoba kaoe liat ka itoe djoeroesan, apaitoe boekan praoe besar jang lagi belajar dengen ladjoe:"
Tong Wie angkat sebla tanganja jang dikeloengken dan phe di atasan djidat. Dengen mata menjoerang ia memandang ka djoeroesan jang dioendjoek.
Tempat itoe amat gelap, tapi kerna soeda biasa maen di laoet dan djoega biasa dengen pemandangan begitoe, maka sasoeda melihat sabentaraan, ia memanggoet dan berkata:
„Ja, bener itoe praoe besar ada moeat banjak orang.”
Kamoedian ia geraken tangan, aken prenta anak-anak praoe djalanken praoenja dengen tjepet boeat mengedjer.
Sigra djoega praoenja si pembajak ini soeda berdjalan seperti angin, menjoesoel itoe praoe jang tadi kaliatan lapat-lapat. Bagi orang-orang jang meliat itoe kaadahan, pasti boleh membikin bangoen boeloe badan. Kerna doea-doea kapala dari itoe pembadjak ada berdiri dengen pegang sendjata terhoenoes, jang satoe berdiri di depan dan jang laen di belakang praoe.
Tida lama kamoedian, sigra djorga praoenja Tong Wie itoe telah menempel pada itoe praoe besar. Sabelonnja kadoea kandaran itoe berdeketan, dengen soeara menggerang Tong Wie angkat gegamannja, sambil bertreak:
„Tahan itoe praoe jang di depan!”
Dan waktoe itoe praoe menempel, ia sigra melontjat, hingga orang-orang di dalem itoe praoe besar djadi terkedjoet. Tapi sigra djoega ini kapala pembadjak lantas lemparken gegamannja, satelah liat saorang gaga jang berada dalem itoe praoe, kerna orang itoe ia kenalin boekan laen dari Gak Ho adanja, sabagimana jang soeda ditjeritaken dalem fatsal sebla atas.
| · | · | · | · | · | · | · | · | · | · | · | · | · | · | · | · | · | · | · | · | · | · | · | · | · |
| · | · | · | · | · | · | · | · | · | · | · | · | · | · | · | · | · | · | · | · | · | · | · | · | · |
Tentang pertemoeannja Tong Wie dan Gak Ho pembatja telah liat, maka di sini tida perloe ditoetoerken lebi djaoe.
Begitoelah sasoedanja ketemoeken Hwa Hoedjin dan Tjin Kiongdjin, dan berkenalan pada Hwa Kongtjoe. marika beromong-omong dan kamoedian Tong Wie oendang Gak Ho mampir sabentaran di Siauwhewan.
Ini oendangan tida ditoelak, maka praoe itoe berdjalan ka moeara terseboet, sedeng anak-anak praoe dan orang-orang prampoean jang tadinja soeda djadi katakoetan, mendjadi senang kombali.
Sigra djoega tetamoe-tetamoe itoe telah sampe, dengen lakoe hormat Tong Wie adjak Gak Ho doedoek di roewang pertengahan, sambil memanjaken ini itoe tentang keadahannja ini sobat jang sakean lama baroe katemoe.
Gak Ho toetoerken itoe dengen ringkes dan tjeritaken bahoewa ia maoe pergi ka Hangtjioe, dan sekali-kali tida dikira bisa katemoe Tong Wie. „Tapi bikin apa di Hangtjioe?” menanja Tong Wie.
„Boeat tjariken satoe tempat goena Hwa Soso dengen sakalian koelawarganja,” saoet itoe orang gaga.
„Dari pergi ka tempat jang begitoe djaoe,” kata Tong Wie: „apa tida baek kaloe Gak Koko bersama koelawarga Hwa tinggal sadja di sini pada kita orang? '
„Kaloe kadatengankoe tida djadi menjoesaken, tentoe sadja akoe soeka sekali,” saoet Gak Ho:
„kerna di Hangtjioe poen kita-orang belon ada mempoenjai tempat jang tentoe boeat toempangken itoe koelawarga.”
Tong Wie kaliatan girang, jang ini orang gaga djoega maoe tinggal bersama-sama.
„Tapi,” kata poeta Gak Ho:„mengapa akoe tida liat laen-laen Hengte, kamanatah ia orang pada pergi?”
„Akoe belon tjeritaken halnja kita-orang poenja soedara-soedara itoe,” kata Tong Wie sambil mengelah napas:„maka tentoe sadja Gak Koko tida mendapet taoe, dan sekarang ada tempo boeat akoe tjeritaken itoe.”
Ini penjaoetan membikin Gak Ho djadi heran dan memandang itoe sobat dengen sorot mata menanja.
„Ah, kiia ini poenja idoep, seperti djoega memang ditjiptaken, boeat selaloe beroeroesan pada kawannja dorna,“ kata Tong Wie dengen paras doeka: “apatah memang begitoe brangkali kita-orang telah ditakdirken, maka boleh ada sadja djalannja jang membikin kita djadi bersangkoetan padanja.“
„He, apatah maksoednja Hiante poenja omongan?” menanja Gak Ho jang belon mengarti:„ada oeroesan apatah antara kita dengen itoe kambrat dorna?”
Tong Wie laloe tjeritaken satoe persatoe bagimana iaorang toedjoe sobat jang berasal dari masing-masing tempat, soeda bisa berkoempoel djadi satoe dan achirnja tinggal di ini tempat dengen memperoesahaken penangkepan ikan. Pengidoepan jang ditoentoet dalem itoe sepandjang waktoe jang telah liwat, ada begitoe roekoen dan senang, hingga tida bedah sabagi soedara poetoesan peroet.
Gak Ho mendengeri dengen sabar.
Tong Wie tjeritaken lebi djaoe, bagimana blakangan Pahsantjoa goenaken pengaroenja Lu Thay-sioe boeat tarik kaoentoengan jang menjoesaken padaorang-orang ketjil, hingga Lie Tjhoen dengen sadereknja eoeda hinaken itoe orang jang berpengaroe.
Oleh kerna Pahsantjoa ada baek pada Lu Tji-kioe, maka dengen pertoeloengannja itoe pembesar, Lie Tjhoen dengen doea soedaranja soeda kadjebak dengen satoe tipoe, hingga itoe pembesar telah mintaken oewang teboesan boeat tiga soedaranja itoe.
Satoe persatoe ditjeritaken terang.
Sampe achirnja ia moesti tjari lagi sareboe tail perak boeat menjoekoepi djoembla jang koerang, dan itoelah sebabnja, maka ia bersama Tong Beng lakoeken pembadjakan di tengah soengei. Tapi tida kira boleh katemoe Gak Ho.
„Ini pertemoehan haroes dibilang ada dengen maoenja Allah,“ kata Tong Wie jang toetoep bitjaranja: „maka sekarang, dengen menginget jang Gak Koko poenja katjerdikan, akoe ingin sekali dapet kaoe poenja pikiran, tjara bagimana baeknja boeat toeloeng Lie Twako dan kadoea Hengte kita?“
„Kaloe begitoe,” kata Gak Ho, jang sasoedanja denger Tong Wie poenja bitjara: „tjoba akoe nanti pikir satoe daja jang samporna.”
Itoe waktoe orang-orangnja Tong Beng soeda sadiaken barang santapan, maka Tong Wie laloe adjak ini sobat doedoek hadepi perdjamoean.
Berbarang itoe, Lie Hoen dan Ko Tjeng djoega soeda balik, maka ini doea soedara djadi amat girang, satelah orangnja kasi taoe, jang Tong Wie dan Tong Beng waktoe djalan meronda dan katemoe Gak Ho, jang sekarang ada di dalem lagi maoe doedoek minoem. Ini doea soedara laloe boeroe-boeroe, maka pertemoean ini ada menggirangken sanget hatinja itoe orang-orang gaga. Ko Tjeng laloe menanjaken ini itoe, demikian poen Lie Hoen, jang tanja, bagimana Gak Ho poenja keadahan dalem waktoe jang laloe.
Gak Ho djawab itoe dengen ringkes dan kamoedian lima orang gaga itoe doedoek berdjamoe dengen segala soeka hati.
„Bagimana dengen kaoe poenja pakerdjahan, Lie Hengte?” tanja Tong Wie, pada waktoe soeda moelai doedoek makan minoem: „beroentoenglah ?”
„Ja, kita-orang ada beroentoeng djoega,” saoet Lie Hoen sambil katawa: „jang maski tida dapet oewang, tapi kita-orang poenja pamegatan di Ohtjioe, telah dapet ampatratoes goeloeng soetra-soetra bagoes.”
„Ampatratoes goeloeng soetra ?” mengoelangi Tong Beng: „oh, ampatratoes goeloeng soetra soeda ada lebi dari harga sariboe tail perak, kaloe sagoeloengnja doea tail satenga sadja.”
„Brangkali ada berharga lebi mahal dari itoe,” kata Ko Tjeng.
„Dan bagimana dengen kaoe di Souwtjioe, Tong Hengte ?” begitoe Lie Hoen dan Ko Tjeng balik menanja.
„Kita-orang tida dapet soeatoe apa, salaenja telah bertemoe pada Gak Koko dengen koelawarga Hwa,” saoetnja Tong Wie: „tapi kendati begitoe, toch kita-orang poenja kagirangan tida mendjadi koerang."
„Ja, tentoe,” kata Lie Hoen dengen girang: „kerna dengen bertemoe pada Gak Koko, ada lebi beroentoeng dari pada kita dapetken sariboe tail perak.”
Kamoedian lima orang itoe beromong-omong lebi djaoe, sedeng gelas-gelas jang kosong tida brentinja ditoewangken arak.
„Soedakah kaoe dapet pikir satoe daja jang baek, Gak Koko, boeat toeloeng itoe-soedara-soedara?” tanja kombali Tong Wie.
„Kaoe troesa salempang, Tong Hengte,” saoetnja orang jang di tanja itoe sambil tertawa: „dari tadi akoe soeda dapet itoe.”
„Soenggoe ?” menanja Tong Wie: „begitoe tjepet?”
„Ja,” saoet Gak Ho sambil manggoet.
„Nah, apa akoe kata,” kata Tong Wie dengen girang: „boekankah kita ada lebi beroentoeng katemoe Gak Koko, dari pada dapetken sariboe tail perak? Tapi belon taoe daja bagimana jang telah dipikir itoe?”
„Ja, daja apatah jang kaoe telah pikir, Gak Koko?” tanja Ko Tjeng. Lie Hoen dan Tong Beng poen ingin sekali mendenger itoe, maka katiga itoe, dengen soeara berbareng lantas minta Gak Ho soeka lantas menjataken.
„Apatah boleh kaoe njataken itoe, Gak Koko?“ tanja marika
„Tentoe!“ saoetnja: „kerna kaoe poen moesti taoe bagimana ini tipoe haroes digoenaken.“
Sahabisnja kata begitoe, Gak Ho laloe toetoerken satoe persatoe, tjara bagimana akal itoe haroes didjalanken. Dan itoe ampat orang gaga, jang sasoeda mendenger daja oepanja ini sobat, djadi amat girang dan masing masing menjataken bagoes.
„Sadari doeloe memang akoe kenal Gak Koko ada mempoenjai pikiran tadjem dan otak jang tjerdik,“ memoedji Tong Wie: „maka ini tipoe jang kita bakal djalanken, soenggoe soesa sekali boeat didoega lebi doeloe.“
„Boeat djalanken ini daja oepaja,“ kata Gak Ho jang sasoedanja berdiam sakoetika lama: „besok Hengtiang djangan loepa sadiaken doea praoe besar jang terhias indah, kerna kandaran ini amat perloe.“
„Baek, sigra djoega akoe nanti sadiaken.“ saoetnja Tong Wie dan Tong Beng.
Lie Hoen dan Ko Tjeng merasa girang sekali, maka iaorang makan minoem teroes sambil tjerita-tjerita. Waktoe semoea soeda pada poesing, baroelah orang-orang gaga itoe pada masoek ka dalem kamar.
Tapi Gak Ho pada sabelonnja tidoer lantas pesan pada Hwa Kongtjoe, tjara bagimana orang moeda ini haroes berlakoe boeat menoeloeng itoe tiga orang gaga jang lagi sedeng terpandjara, dan pesenan ini oleh Kongtjoe ditoeroet betoel. „Troesa koeatir, akoe nanti lakoeken betoel prentamoe, Sioksiok,” kata itoe orang moeda.
Gak Ho merasa soeka hati denger itoe penjaoetan, maka ia rasa tida perloe dipesen lebi djaoe, hanja lantas sadja pada masoek tidoer.
Sekarang biarlah kita tinggalken ini orang-orang gaga jang soedą baringken diri lantaran tjape dan poesing, hanja mari kita liat pada Lu Thaysioe, jang lagi sedeng harepken itoe djoembla dari Lie Tjhoen.
Pada maleman dimana Tong Wie doedoek makan minoem bersama Gak Ho, Lu Thaysioe poen ada hadepi arak sambil lajangken pikirannja.
Saban-saban, sahabisnja keringi gelas sendiri, ia berdongak ka atas sambil memikiri itoe tiga-riboetail perak. Bebrapa kali kadengeran ia berkata:
„Ah, kaloe bener-bener Lie Tjhoen mampoe kasi itoe oewang, djaja djoega akoe ini. Sasoenggoenja bodo sekali, kaloe akoe tida maoe goenaken kakoeasahan sabagi pembesar di ini kota. Boekantah akoe ada tjoekoep berkoeasa dan salagi mamegang ini pangkat, akoe tida boleh kasi liwat ini tempo jang baek.”
Sambil berpikir, matanja seperti meliat itoe boengkoesan oewang jang berisi tigariboe tail.
„Salagi ada mempoenjai kakoeasahan boeat pidjit dan peres, kaloe akoe tida maoe goenaken sampe kapan lagi,” kata poela ia: „boekantah kaloe dari sekarang akoe berlakoe radjin begitoe, kamoedian dateng itoe waktoe boeat akoe meletaken djabatan, tentoe peti oewangkoe soeda penoeh.
„Di ini doenia tida ada keadilan, katjoewali oewang jang bisa membikin perkara bengkok mendjadi lempang, perkara sala djadi betoel. Maka apatah boleh akoe maen soengkan-soengkanan kaloe orang maoe kasi oewang? ― Toch bodo sekali, bodo amat, kaloe ada jang maoe kasi, akoe pergi tampik.
„Ini perboeatan jang sekarang akoe lakoeken, ada membawa doea kabaekan. Pertama, djadi kaliatannja menoeloeng sobat aken ilangi rasa sakit hatinja; kadoea, satoe kaoentoengan besar ada dateng padakoe. Ha ha ha ha! di manatah maoe tjari lagi perkara jang begini bagoes dan mengoentoengin kantong?”
Demikianlah pembesar kaparat ini berkata-kata. Kamoedian ia tjegloek lagi araknja hingga kapala merasa poesing, baroe ia masoek tidoer.
Esoknja pagi, sasoedanja toekar pakean, Lu Thaysioe laloe pergi ka kantoornja dan doedoek di sitoe aken mamereksa soerat-soerat.
Tapi, kendati mata ada memandang rapport-rapport, tapi hatinja tida poetoes mengharep datengnja oewang jang aken dikirim dari Siauwhewan.
„Sadari jang didjangdjiken, kamari-in soeda selang brapa hari,“ kata ia dalem hati: „akoe doega kamaren itoe oewang dateng, tapi tida. Apa ini hari brangkali ? Atawakah besok, sebab itoe tempo sapoeloe hari masi belon liwat ”
Tapi, ah, maski kapan djoega dia bawa, oewang itoe tentoe tida boleh ka mana larinja, kata poela ini pembesar rakoes: „boeat apatah akoe terlaloe pikir-pikirin. Dateng ini hari, dateng besok atawa noesa, toch sama djoega.”
Salagi si kaparat ini memikir-mikir begitoe, koenjoeng-koenjoeng dateng satoe pengawal pintoe masoek ka dalem itoe kontoran, hingga Lu Thaysioe djadi terkesiap dan angkat kapala kombil mengawasi.
„Ada apa oeroesan ?” tanja ini pembesar dengen hati berdebar, kerna doega, brangkali ada orang dari Siauwhewan jang lagi diharep-harep. „Apa ada orang dateng?“ tanja ia dengen tjepet.
„Bener,“ saoet si pengawal sambil memanggoet bongkoki badan.
„Ho, ho, orang dari mana?“ tanja Lu Thaysioe dengen moeka terang.
„Itoelah tida ada dibilang,“ saoet si pengawal: „tapi jang dateng ini ada saorang moeda jang berparas tjakep, pakeannja poen bagoes, jang kaloe diliat dandanannja njata Kongtjoe itoe ada saorang bangsawan.“
„Kongtjoe?“ mengoelangken Lu Thaysioe: „Kongtjoe kaoe bilang?“
„Bener, inilah kaartjisnja,“ sambil kata begitoe si pengawal serahken satoe tiap mera jang ada tertoelis namanja itoe tetamoe.
Lu Thaysioe samboeti dengen tjepet dan memandang pada hoeroef-hoeroef jang ada tertoelis di atas keras, sambil keroetken djidat boeat bisa membatja terlebi teges.
Aer moekanja lantas djadi lebi terang, soeatoe tanda hati ada penoeh dengen pengharepan dan kagirangan.
„Baek, baek,“ kata ia sambil maggoetken kepala dan berbangkit.
Si pengawal tida menanjaken apa-apa lagi hanja, lantas berlaloe. Sedeng Lu Thaysioe lantas bertindak kaloear dengen terboeroe-boeroe, sambil pegangi itoe tjap jang ada di tangan.
Apatah sabenernja jang membikin Lu Thaysioe djadi begitoe girang?
Inilah tida perloe diterangken, kerna sigra djoega pembatja aken mendapet taoe.
Sasampenja di loear betoel sadja Lu Thaysioe dapet liat ada berdiri saorang moeda jang berparas tjakep dan berpakean perlente, lagi menoenggoe padanja. Satelah liat ia kaloear, itoe Kongtjoe laloe angkat kadoea tangannja membri hormat, jang laloe dibales oleh ini pembesar dengen paras berseri-seri.
„Slamat dateng, Kongtjoe,” kata Lu Thaysioe sembari bales orang poenja hormat.
Itoe Kongtjoe poen oetjapken bebrapa perkatahan manis, maka sambil pimpin orang poenja tangan. Lu Thaysioe berkata:
„Bagimana tentang ajahmoe, ada baek?“
„Baek dan banjak trima kasi,“ saoet itoe Kong-tjoe: „harep Loja djoega ada dalem kaslamatan.”
„Kadatenganmoe ini soenggoe ada menggirangken sekali,” kata Lu Thaysioe: „tapi akoe tida taoe sadari kapan kaoe berangkat dari kota Radja? Ah, tjobalah kaloe terlebih siang akoe dapet taoe jang kaoe hendak ka mari, tentoelah siang-siang akoe prenta orang dateng samboet.”
„Oh, Loja poenja katjintakan ada besar sekali, manatah Bwanpay brani trima itoe kahormatan sedeng penjamboetan jang sekarang dilakoeken poen, soeda tjoekoep membikin Loja banjak Soesa.“
„Ah, soesa apatah djoega, hahahaha!“
Sembari berkata-kata, Lu Thaysioe toentoen tetamoenja itoe ka kantoran dan silaken orang moeda ini berdoedoek. la berlakoe begitoe hormat, kerna jang dateng ini poen boekan laen dari poetranja Ong Hoan jang kadoea, jaitoe soedara moeda dari Ong Tiauw-ien jang memangkoe djabatan Swanwie.
Kerna pada Ong Hoan, Lu Thaysioe ada kenal baek, maka pada ini poetra jang maski poen ia belon pernah katemoe moeka, toch kadatengannja disamboet dengen hormat ditanjaken ini itoe, sabagi satoe kenalan lama.
Atas pertanjahannja ini pembesar, Ong Kongtjoe berkata:
„Bwanpay kaloear dari kota Radja, sabenernja boekan bermaksoed laen dari pada menganter iboe pergi sembajang di Hangtjioe poenja gredja Tian Tiok, di mana doeloe iboekoe ada berkaoel.“
„Ja, itoe gredja memang angker sekali,“ kata Lu Thaysioe jang memoetoesi orang poenja perkatahan.
„Nah, sasampenja di sini,“ kata poela Ong Kongtjoe: lantaran menginget jang seringkali Hoetjin ada seboet Loja poenja nama sabagi sobat baek, maka dengen ambil kabranian akoe lantans dateng ka mari dengen lebi doeloe zonder membri taoe, maka boeat ini kalantjangan harep Loja nanti soeka membri maäf."
,,Maäf apatah djoega ?" kata Lu Thaysioe sambil tertawa dan silaken tetamoe itoe minoem thee jang di soegoeken.
Ong Kongtjoe minoem itoe thee dan berkata poela.
„Maksoedkoe dateng ka mari, boekan laen dari pada hendak menengoki Loya, jang mendjadi Hoetjin poenja sobat baek. Dan nanti kaloe soeda poelang, akoe aken tjeritaken djoega pada Hoetjin tentang ini pertemoean."
„Oh, trima kasi, Hiantit, trima kasi atas kaoe poenja katjintahan," kata Lu Thaysioe dengen girang, atas kaoe poenja boedi jang soeda begitoe maoe tjapeken hati, akoe haroes menjataken rasa soekoer jang tida terhingga."
Boeat ini perkataan-perkatahan jang paling blakang, Ong Kongtjoe tjoema seboet sadja Poet Kam Tong.
„Apa kaoe aken tinggal lama di ini kota?" menanja Lu Thaysioe kamoedian.
„Oh, tida. Sekarang djoega, sasoeda bertemoe pada Loya, akoe hendak balik kombali ka praoe," saoetnja.
„Begitoe tjepet ?" „Ja, kerna iboekoe perloe moesti dianter.”
„Kaloe begitoe, biarlah pada sahabisnja santap akoe nanti prenta orang sadiaken makanan dan arak.“
„Trima kasi, Loja, djangan bikin banjak soesa,“ kata Ong Kongtjoe jang menjega dengen sanget, hingga Lu Thaysoe djadi apa-bole-boeat tida bikin perdjamoean.
Ini pembesar sengadja berlakoe begitoe manis dan hormat-hormat, dengen maksoed soepaja kaloe Ong Kongtjoe poelang, nanti ia tjeritaken pada ajahanda sendiri tentang penjamboetan jang dilakoeken olehnja, atawa dengen laen perkatahan, maoe bikin soepaja Ong Hoan poenja hati djadi senang dan girang.
Begitoelah sahabisnja minoem thee, Ong Kongtjoe berbangkit dan minta permisi boeat balik sadja ka praoe. Lu Thaysoe tida bisa menjegah, hanja laloe toeroet menganter pinggir kali tempat dimana itoe kandaran aer ada berlaboe.
Meliat jang Lu Thaysoe ada toeroet menganter bersama orang-orangnja, Kongtjoe ini kaliatannja djadi amat girang, maka di sapandjang djalan pada sabelonnja iaorang sampe, satoe pada laen tida brentinja bitjara ini dan itoe.
Boekan sadja itoe pembesar, hanja bebrapa orang-orangnja poen ada toeroet djoega dalem itoe penganteran.
Sasempenja di pinggir kali, Ong Kongtjoe angkat tangan membri hormat dan hatoerken trima kasinja. Tapi Lu Thaysioe jang ingin bermoeka-moeka dari Ong Hoan, dengen harepan, kaloe-kaloe dengen kalakoeannja jang manis dan hormat itoe, Ong Hoan jang ada mendjadi kawanaja dorna dan mempoenjai pengaroe, bisa menoeloeng apa-apa goena dirinja.
Maka sabagi orang jang belon tjoekoep kaloe tjoema menganter sadja, hanja menjataken miatnja boeat katemoe pada orang moeda ini poenja iboenda.
„Akoe ingin sekali berdjoempa pada Lingtong boeat oendjoek hormatkoe," kata ini pembesar kaparat.
„Ah, masatah Bwanpay brani bikin soesa pada Loja,“ kata Ong Kongtjoe: „brangkali iboekoe ada di dalem.“
„Tida apa, tida apa,“ kata Lu Thaysioe dengen soeara memaksa.
Waktoe itoe orang moeda berlompat ka praoe, itoe pembesar djoega toeroet berlontjat dan tinggalken oerang-oranguja di darat.
Dengen tida merasa tjoeriga, Lu Thaysioe masoek ka dalem praoe. Tapi satelah sampe di roewangan tempat orang prampoean, dengen kaget dirinja ditoebroek oleh doea orang jang tenaga koeat, hingga si kaparat djadi gelagapan.
Thaysioe ini laloe diringkoes.
Sabelon ilang ia poenja rasa takoet, ada dateng lagi doea orang jang menoebroek dan mengantjem padanja sambil berkata:
„Djahanam! apa kaoe liat ini golok ?!“
Dengen hati berdebar-debar dan moeka jang poetjet seperti mait, Lu Thaysioe mengawasi itoe orang-orang gaga, sedeng itoe Kongtjoe jang dikira bener ada poetranja Ong Hoan, tinggal berdiri sambil bersenjoem-senjoem.
Matanja mengawasi pada itoe orang moeda dengen hati katakoetan.
„Ini golok ada tjoekoep tadjem boeat binasaken djiwamoe!“ kata poela itoe orang gaga sarajah angkat goloknja: „kaoe maoe mati atawa maoe idoep, hajoe bilang!“
„Ampoen ampoenilah akoe ini, Hohan!" treak Lu Thaysioe dengen soeara gerogokan lantaran takoet: „akoe mengapatah ? akoe toch masoek ka mari ada dengen maksoed boeat katemoeken Lingtong, boeat oendjoek akoe poenja hormat, boekannja dengen perniatan boeroek sabagimana jang Tjiongwie Hohan telah pikir!”
„Siapatah itoe Lingtong, akoe tida kenal padanja ?“ kata itoe orang jang mamegang golok sambil kenaken oedjoengnja itoe sendjata di djidatnja si kaparat. „Ong Hoedjin, istrinja akoe poenja sobat,“ kata Lu Thaysioe, jang njata sabegitoe djaoe masi belon taoe kaloe dirinja telah tertipoe.
Sabetoelnja itoe orang moeda jang mengakoe ada djadi Ong Hoan poenja poetra kadoea, boekan laen dari pada Hwa Kongtjoe, jang lakoeken pesenan Gak Ho. Kerna itoe orang gaga jang soeda pernah tinggal di gedongnja Ong Swanwie, dan telah denger djoega bagimana perhoeboengan nja Ong Hoan pada ini Thaysioe, maka ia rasa pasti, kaloe digoenaken ini tipoe, nanti berhasil.
Njatalah doegahannja Gak Ho itoe ada betoel. Mana Ong Kongtjoe?“ treak Lu Thaysioe dengen soeara meratab: „toeloeng! toeloenglah akoe ini!“
„Siapa kaoe tjari?“ menjentak saorang jang pegang lehernja.
„Ong Kongtjoe,“ saoet Lu Thaysioe.“
„Kita-orang tida kenal itoe Ong Kongtjoe.“
„Poetranja akoe poenja sobat, Ong Hoan.“
„Oh, itoe djahanam! itoe kaparat jang mendjadi kawannja dorna sabagi kaoe?“
Mendenger ini penjaoetan, Lu Thaysioe djadi samingkin poetjet, kerna heran sekali, bagimana ini orang-orang gaga brani nistaken itoe poetra bangsawan, dengen perkatahan seperti jang di seboet baroesan. Tapi berbareng dengen pertanjahannja, Hwa Hong tjoen lantas menjaoet:
„Akoe ada di sini!“,
„Oh, Kongtjoe, toeloenglah!“ berseroeh poela Lu Thaysioe sambil awasken ka tempat di mana soeara itoe kadengeran. „Toeloenglah akoe.“
Tapi itoe Kongtjoe tida menjaoet lagi.
„Kaoe ini ada satoe djahanam besar,” berkata Gak Ho dengen mata melotot: „maka lekaslah bilang, apa kaoe maoe mati atawa idoep? Orang jang samatjem kaoe ini sabetoelnja tida haroes dikasiannin. Lebi lekas kaoe mampoes ada lebi baek boeat keamanannja rahajat negri jang sering diperes dan dipentjet.“
Mendenger ini perkatahan-perkatahan jang dioetjapken begitoe tetep dan diseboet kalakoeannja jang begitoe roepa, Thaysioe kaparat ini djadi lebi katakoetan. Sekarang baroe ia moelai mendoega-doega, siapa adanja ini orang gaga.
Sabentar ia mengawasi Gak Ho, sabentar ia memandang Ko Tjeng dan Lie Hoen. Tapi itoe semoea Hohan ia rasa belon taoe liat.
„Tapi Hohan ini siapatah ?“ tanja ia kamoedian dengen soeara bergoemeter.
„Kaoe tida kenalin akoe?“ begitoe Gak Ho alik menanja: „ha, itoelah ada lebi baek lagi, dari pada kaloe kaoe dapet taoe siapa adanja kita.“ Tong Wie dan Tong Beng pegangin teroes itoe korban dengen kentjang, sampe Lu Thaysioe tida bisa berkoetik sakali-kali atjan. Kamodian, dengen kalakoean jang sanget menakoetin, Lie Hoen dan Ko Tjeng angkat goloknja dan ajoenken itoe barang tadjem seperti orang jang hendak menabas, sampe Lu Thaysioe djadi terkentoet-kentoet dan berkata dengen soeara mege-mege:
„Ampoen! ampoen! mati akoe!“
„Ja, memang lebi baek kaoe mampoes, pembesar djahanam!“ kadengeran soeara menjentak jang mengagetken hati.
Oedjoeng golok menempel kombali di djidatnja itoe pembesar.
Thaysioe melekin sedikit matanja dan ia tjoba raba-raba lehernja, jang njata masi menempel di poendak.
„Kaloe begitoe, akoe belon di tabas,“ pikir ia dengen pengrasahan jang teramat ngeri.
Waktoe Tong Beng dan soedaranja pegang si kaparat dengen tenaga sedikit kendoran, Lu Thaysioe laloe angkat tangan menjodja-njodja
Ini kadjadian ngeri ada diliat djoega oleh orang-orangnja itoe Thaysioe jang berdiri di darat. Tapi boekan sadja tida ada jang dateng menoeloeng, hanja semoea djadi soeka hati satelah liat madjikannja dapet perlakoean jang begitoe roepa
Inilah soeda terdjadi, lantaran si pembesar terlaloe djahat. Boekan sadja pada orang-orang jang ada perkara ia maoe peres, tapi pada orang sendiri poen, gadjinja ia maoe tahan-tahan.
Itoe orang-orang djadi bersoekoer, jang ini perboeatan, atawa lebi betoel dibilang, satoe pembalesan ia bisa dapet saksiken dengen begitoe njata.
Itoe waktoe Gak Ho jang rasa tida boleh terlaloe diantjem teroes-teroesan, kerna ini pembesar poen moesti diadjak mengomong dan kasi kenal siapa dirinja, maka ia lantas berkata dengen baek, bahoewa orang-orang gaga ini boekannja bangsa boeas, sabagimana dirinja, hanja ada kawannja Lie Tjhoen.
Satelah denger begitoe, Lu Thaysioe djadi katakoetan.
„Sekarang dengen pendek akoe maoe tanja,“ kata Gak Ho: „apa kaoe maoe mati atawa maoe tidoep, hajoe bilang teroes terang?“
„Tentoe akoe maoe idoep,“ saoetnja.
„Nah kaloe maoe idoep, lekaslah kaoe lepas itoe Lie Tjhoen bersama doea kawannja,“ kata Gak Ho: „soepaja akoe poen bisa lepasken kaoe dari ini tempat. Tapi kaloe ia ada koerang apa-apa, djiwamoe djoega aken binasa. Akoe ini orang-orang dari kawanan Liangsan, kaoe taoe?“
Mendenger ini perkatahan, dengen tida bernanti lagi Lu Thaysioe laloe kaokin orangnja boeat lekas lepasken pada Lie Tjhoen bersama doea soedaranja. Dan tida lama itoe tiga orang tawanan soeda kaloear dan dateng ka itoe praoe, dan waktoe bertemoe pada itoe soedara-soedara, hatinja djadi amat girang.
Waktoe meliat pada Gak Ho, Lie Tjoen, Tek Seng dan Hoei Po djadi kaget dan girang, kerna tida taoe dari mana datengnja ini sobat. Atas katerangannja Tong Wie jang lantas tjeritaken satoe persatoe, baroelah itoe tiga orang gaga dapet taoe doedoeknja hal dan menjataken soekoer tida soedanja.
Laen-laen soedaranja poen kasi taoe bagimana sebabnja Gak Ho boleh dateng berkoempoel di Siauwhewan, dan ini katerangan jang paling blakang, menggirangken sanget hatinja itoe Twako dan kadoea Hengte jang baroe kaloear dari pendjara.
Tapi Gak Ho jang lagi antjem itoe Thaysioe, masi djoega belon maoe lepasken si kaparat, kendati poen itoe tiga orang tawanan soeda dilepasken dari satadi.
„Hohan, boekantah kawan-kawanmoe itoe akoe soeda lepas,“ kata Lu Thaysioe: „maka hareplah dengen kamoerahan hatimoe, kaoe soeka lantas lepasken akoe dari ini tempat“
„Lepasken pada kaoe, itoelah gampang,” kata Gak Ho: „tapi toenggoe doeloe.”
„Ada apatah lagi jang maoe ditbijaraken ?” „Kaoe ini ada satoe ambtenaar jang kedjem dan temaha, maka dengen begitoe, akoe bisa doega, bahoewa kakajahanmoe ada besar sekali. Maka sekarang, sabelonnja kaoe berlaloe, lekaslah kasi akoe tigariboe tail perak sabagi ongkosnja dari ini pakerdjahan berat. Begitoelah kaloe kaoe maoe idoep.“
Mendenger ini perkatahan, Lu Thaysioe djadi apa-boleh-boeat. Maoe atawa tida terpaksa ia kaokin lagi orangnja soeroe lekas ambil oewang pada Naynay tigariboe tail perak boeat dibriken pada ini orang-orang gaga.
Tida lama itoe oewang dianterken. Tapi Gak Ho masi djoega belon maoe lepasken, hingga Lu Thaysioe djadi amat kesel dan koeatir kerna pikir: „apa brangkali orang maoein djoega djiwanja, maka sasoeda sagala permintahannja ditoeroet, tapi dirinja belon djoega maoe dimerdikken kombali.“
„Hohan boekantah sagala permintahamoe akoe soeda toeroet?“ kata Lu Thaysioe dengen soeara meratap: „maka mengapatah kaoe belon djoega maoe lepasken padakoe. Ja akoe harep kaoe poenja kasian, toeloenglah lepasken padakoe.“
„Nanti doeloe itoe gampang,“ kata Gak Ho „akoe masi ada satoe lagi jang maoe diadjak beroeroesan padamoe.“
„Apatah itoe?“ tanja ini pembesar. „Apa kaoe tida taoe, jang ini hari Teng Tjoe-pian ada membikin pesta hari taonnja,“ kata Gak Ho: „dimana ia ada oendang sakalian sobat-sobatnja dengen soegoeken arak jang baek maka ini hari akoe pikir maoe pergi ka sana boeat toeroet membri slamat bersama-sama kaoe. Bagimana kaoe pikir?“
„Akoe tida taoe sekali-kali,“ kata itoe Thay-sioe: „tapi kaloe bener ia ada membikin pesta dan Hohan semoea hendak pergi, moestail amat akoe brani tida toeroet.“
Maski moeloet kata begitoe, tapi hatinja Lu Thaysioe ada amat berkoeatir. Kerna ia tida pertjaja ini orang-orang gaga jang boekan djadi sobatnja Teng Tjoe-pian maoe dateng membri slamat, tentoelah ada satoe oeroesan apa-apa jang dikahendaki.
Tapi maski mendoega bagimana djoega, toch ia tida brani njataken itoe, salaen dari pada menoeroet sadja.
Sigra djoega praoe lantas didjalanken menoedjoe ka tempatnja itoe Pahsantjoa, Lu Thaysioe tinggal doedoek di tempat jang tadi dengen hati penoeh kakoeatiran Itoe waktoe Gak Ho soeda berkoempoel pada Lie Tjhoen dan laen-laen sobatnja, sembari beromong dengen tertawa-tawa.
Lie Tjhoen jang belon mengarti Gak Ho poenja maksoed, atas ini koendjoengan ka Matjeksan, laloe bikin bebrapa pertanjahan, apa bener Teng Tjoe-pian ini hari bikin pesta hari taon.
„Ja, bener,” kata Gak Ho sambil tertawa jang kamoedian laloe toetoerken satoe persatoe tjara bagimana ia bisa dapet taoe. Kamoedian orang gaga ini tertawa bergelak-gelak, dan laen-laen sobatnja poen toeroet tertawa.
Sembari beromong-omong Gak Ho laloe pesen bagimana Thaysioe haroes berboeat, dengen antjem keras, kaloe pesenannja tida ditoeroet, pasti djiwanja bakal binasa.
Lu Thaysioe lantaran katakoetan djadi menoeroet sadja Sedeng Gak Ho sahabisnja mamesen lantas toekar pakean satjara satoe oppas.
Tida lama kandaran aer itoe telah sampe di Matjeksan, jang begitoe praoe menempel pada daratan, Gak Ho laloe naek ka darat dan pergi ka roemanja itoe Pahsantjoa, boeat wartaken kadatengannja Lu Thaysioe.
Teng Tjoe-pian djadi amat heran dan tida mengarti, bagimana Ini pesta jang dibikin dengen saderhana dan tida ada dikirim oendangan pada itoe pembesar, tapi Lu Thaysioe boleh dapet taoe.
„Soenggoe akoe heran sekali,” kata Teng Tjoe-pian itoe: „betoel akoe ada bikin pesta ketjil boeat rajahken hari taonkoe, bagimana Lu Thay-sioe bisa dapet taoe, sedeng oendangan akoe tida kirim padanja?” Sahabisnja kata begitoe, dengen terepot-repot Pahsantjoa lantas pegi menjamboet, sedeng laen-laen tetamoenja jang denger ada pembesar kota Siangtjioe maoe dateng, laloe minggir ka roewangan samping. Di djalan itoe toean roema ada heran dan ada girang. Herannja kerna tida dikirim oendangan, bagimana Lu Thaysioe bisa dapet taoe, girangnja, kerna dengen datengnja itoe pembesar kota, djadi menambaken terangnja ia poenja moeka.
Sabelonnja Pahsantjoa dateng memang Gak Ho soeda pesen pada sekalian soedara-soedaranja bagimana moesti berboeat, maka waktoe Tjoe pian itoe sampe, semoea laloe bangoen dan kaloear dari praoe.
„Ah, slamat dateng, Thaysioe Loja!“ berseroeh Tjoe-pian pada waktoe meliat tetamoenja itoe jang ada di-ikoet oleh banjak orang gaga. „Lantaran repot dan tambahan pesta jang dibikin amat saderhana, maka akoe tida brani wartaken itoe pada Loja. Tapi tida taoenja sobatkoe dapet taoe djoega dan telah tjapeken diri boeat dateng ka mari.“
Thaysioe bales itoe dengen sedikit perkatahan jang manis, tapi hatinja Toehan Allah jang taoe, apa sabentar bakal kadjadian.
Sasoedanja beromong-omong sedikit, marika itoe telah sampe di roemanja Teng Tjoe-pian dan sabagi toean roema, ini Pahsantjoa ada berlakoe hormat sekali dan lantas toewangken arak, tapi baroe sadja gelas-gelas moelai di toewang, Gak Ho soeda tjekek lehernja sembari berkata:
„Soeda lama memang akoe denger kaoe poenja nama, beroentoeng ini hari bisa katemoe boeat bikin peritoengan!“
Lie Tjhoen dan laen-laen soedaranja poen laloe madjoe dengen tjaboet golok sambil mengantjem, dimana sekarang baroelah Pahsantjoa bisa kenalin siapa adanja itoe tetamoe jang dateng.
„Bangsat! kaoe ini satoe djahanam, jang sabegitoe djaoe soeda bikin soesa anak negri dan tida soengkan akoe poenja oewang,“ kata Lie Tjhoen; „sekarang bilanglah apa kaoe maoemati atawa hidoep?“
Teng Tjoe-pian djadi goemeteran sakoedjoer badan sedeng laen-laen tetamoe jang memang dateng tjoema lantaran takoet djadi amat soeka hati meliat itoe orang hartawan jang amat berpengaroe dibikin maloe begitoe roepa. Maka dalem itoe waktoe perdjamoean djadi kaloet tetamoe-tetamoe jang berdoedoek di roewangan samping lantas berlaloe satoe persatoe, katjoewali Gak Ho, Lie Tjhoen dan soedara-soedaranja.
Pahsantjoa jang ditjekek djadi meratep, matanja memandang pada itoe Thaysioe, dengen pengharepan, minta itoe sobat poenja pertoeloengan boeat mintaken mapoen. Gak Ho jang mengarti orang poenja maksoed, dengen bersenjoem laloe berkata:
„Sabetoelnja orang samatjem kaoe, kapala andjing, moesti diboenoe, soepaja besok noesa tida mengganggoe lagi pada laen orang. Tapi kaloe akoe boenoe, djadi bikin kotor akoe poenja golok sadja, maka sekarang lebi baek kaoe kaloearken tigalaksa tail perak boeat teboes djiwamoe, jaitoe oewang jang kaoe dapet dari serak-seriknja rahajat negri.“
„Ah, Hohan, manatah akoe ada poenja oewang begitoe banjak,“ treak Teng Tjoe-pian dengen soeara meratap.
„Tida ada oewang?!“ membentak Lie Tjhoen: „nah kaloe begitoe, soedalah, boenoe sadja padanja¡“
„Eh, tahan! tahan! akoe nanti tjoba liat!“ treak itoe toean roema dengen soeara ketakoetan.
„Ampoenilah akoe, akoe nanti preksa dan briken itoe djoembla jang diminta.“
Begitoeiah dengen di-ikoeti oleh bebrapa orang gaga, Teng Tjoe-pian masoek ka dalem kamar dan kaloearken itoe oewang jang diminta. Dan sasoedanja di-itoeng betoel, Hoei Po laloe bawa ka praoe, sedeng Teng Tjoe-pian ditinggalken di itoe tempat dengen diantjem, kaloe sadja ia bikin laen-laen gerakan jang tida enak, djagalah hati-hati djiwanja. Kamoedian Gak Ho dengen Lie Tjhoen dan jang laen-laen laloe balik kapraoe dengen membawa itoe djoembla, jang sekarang djadi tigalaksa tigariboe tail perak.
Waktoe orang-orang gaga itoe berangkat, tentoe Teng Tjoe-pian ada bikin banjak pertanjahan pada Lu Thaysioe, maka itoelah tida oesah dikata. Sekarang, menjesel tida menjesel, apa maoe dikata, kerna katjilakahan ini semoea ada dari gara-garanja itoe toean roema djoega.
Lu Tjhoen dengen soedara-soedaranja djadi amat girang. Koetika sabelonnja sampe di Siauwhewan, atas pertanjahannja itoe Twako, jang memang belon taoe terang tentang perdjalanannja ini sobat, Gak Ho laloe tjeritaken satoe persatoe bagimana sadari dirinja maoe ditangkep, sampe bisa menoeloeng pada familie Hwa, dan kamoedian waktoe maoe pergi ka Hangtjioe, di tenga telaga Souwtjioe ia telah katemoe Tong Wie jang pegat praoenja, dan begitoelah sampe dateng ka Siauwhewan dan berdami boeat toeloeng ini Twako bersama Tek Seng dan Hoei Po. Satoe persatoe ditjeritaken dengen terang.
Mendenger itoe tjerita, hatinja Lie Tjhoen djadi girang sekali. Apapoela dapet taoe jang Hwa Hoedjin dan Kiongdjin ada di roemanja.
Tida lama iaorang telah sampe ka tempat sendiri. Lie Tjhoen bersama itoe doea soedara jang laen laloe katemoeken pada Hwa Hoedjin dan Kiongdjin djalanken kahormatan sabagimana pantesnja dan menanjaken hal-hal jang telah laloe. Dan semoea itoe didjawab oleh itoe doea njonja dengen terang. Sabagian dari itoe hikajat ada sabagimana jang baroesan Gak Ho telah toetoerken di praoe, jaitoe hikajat jang pembatja telah taoe dan tida perloe dioelangken lagi.
Kamoedian, sahabisnja beromong-omong, Hwa Hoedjin minta dengen hormat itoe sakalian Hohan jang ada mendjadi soeaminja poenja sobat baek, atawa soedara angkat, soekalah aken toeloeng pimpin poetranja.
„Oh, itoelah tida oesah dipesen lagi," kata Lie Tjhoen dan jang laen-laen dengen girang hati: „kerna Kongtjoe itoe poen ada seperti kita-orang poenja Hiantit, maka tentoe sadja sabrapa bisa sekalian Hengte nanti pimpin boeat membales Hwa Hengtiang dan Tjin Hengtiang aimarhoem poenja penasaran.,,
Kadoea njonja itoe oetjapken banjak trima kasi kamoedian marika masoek kombali ka dalem, lantas di samboet oleh itoe Twako poenja familie prampoean.
Demikianlah itoe hari di Siauwhewan dirajahken satoe perdjamoean besar, sabagi tanda kagirangan jang marika poenja Twako dan kadoea Hengte tida koerang soeatoe apa, laen dari itoe aken membri slamat pada Gak Ho dan familie Hwa, jang sekarang ada berkoempoel sama-sama.
Di loear perdjamoean boeat orang-orang lelaki sedeng di dalem ada boeat orang-orang prampoean.
Toekang-toekang tangkep ikannja Lie Tjhoen poen, semoea toeroet rajahken ini pesta dengen girang, dan pendoedoek di itoe kampoeng poen ada dioendang, dimana banjak orang memang ada pandang tinggi pada itoe orang-orang gaga, semoea dateng aken membri slamat.
Demikianlah Lie Tjhoen jang ampir dapet tjilaka lantaran kaniajahannja pembesar di Siangtjioe, telah terindar dari itoe bahaja. Tapi apatah itoe orang-orang gaga jang soeda menjataken diri sendiri ada djadi orang dari kawanan Liangsan, nanti tinggal teroes di itoe tempat, inilah aken ditoetoer dalem bagian katiga, jang tjeritanja ada lebi rame dan menarik hati.
Tamat Bagian Kadoea.