Pembalesannja Kawanan Liangsan/Bagian kadoea/Bab 4

by Tong Th. Fuctriorider

V
Bertemoe Tio Gisoe.: Kor Keng djaja
kombali. Lantaran kasom-
bongannja, kombali me-
nampak bahaja.

---

Waktoe ia maoe berangkat dan baroe sadja kaloear dari roema, di samping pintoe ada kaliatan saorang lelaki jang berpangawaken koeroes, pakeannja mesoem, djongkok dengen mata kedap kedip mengawasi padanja.

Tio Liang-sih djadi terkesiap, kerna roepanja orang itoe seperti ia kenalin. Tapi apa boleh djadi, itoe orang jang doeloe begitoe diindahken, sekarang. sampe djadi begini roepa, hingga mirip sabagi pengemis?

Maka Liang-sih laloe masoek kombali ka dalem itoe roema tempat pembrentian dan panggil pengoeroes dari itoe Koan, aken diprenta pangeil itoe Pengemis, bawa masoek ka mari boeat ditanja.

„Tapi boeat apa Loya ambil perdoeli padanja, itoe orang toch ada satoe pengemis jang tramempoenjai roema tangga," kata itoe pengoeroes Koan, jang mendjadi heran bagimana satoe ambtenaar jang berpangkat Gisoe, maoe ambil poesing segala orang begitoean. „Troesa kaoe banjak rewel!“ kata Liang-sih:

„hajoe lekas panggil padanjan dan bawa masoek ka mari.’

Itoe pengoeroes lantas berlaloe.

Sasampenja di loear, ia laloe bawa itoe pengemis aken diadjak bertemoe pada Tio Gisoe. Itoe pengemis jang dari satadi memang soeda rasa-rasa kenalin, djadi girang dan rasa mendoega dengen pasti, bahoewa orang berpangkat itoe benerlah ada ia poenja kenalan lama.

Dan lantaran pikir begitoe, maka waktoe mengadep ia tida berloetoet, hanja mengawasi lebi tadjem, sampe itoe pengoeroes Koan membentak dan kata:

„He, apa matamoe petja dan tida kenalin pada Gisoe Loya, maka kaoe mengadep dengen tida berloetoet?“

Kamoedian, dengen tida merasa tjoekoep sama itoe perkatahan sadja, si pengoeroes Koan lantas katain jang pengemis itoe koerang adjar, tida taoe adat dan laen-laen poela perkatahan kasar.

Baroe sadja moeloetnja itoe brentt berkata-kata, Tio Liang-sih jang soeda dapet kenalin siapa adanja itoe pengemis, laloe berkata dengen soeara girang jang tertjampoer kaget:

„Ai!, ai!, sobatkoe! Mengapatah kaloe boleh ada di sini, dengen roepa sampe djadi begini matjem?”

Itoe pengemis djoega lantas berseroeh jang menjataken kagirangan, kerna sekarang poen ia telah kenalin siapa adanja itoe Gisoe. Maka dengen mengaloearken perkataan-perkahan sabagi satoe sobat lama jang baroe bertemoe kombali, itoe pengoeroes Koan djadi terkedjoet, hingga parasnja mendjadi poetjet.

„He. siapatah adanja ini pengemis ?” menanja ia dalem hati sendiri. „Ai!, ai!, apatah bangsat ada mendjadi kenalannja Gisoe Loya. dan kaloe boekan begitoe, mengapatah djoega marika satoe pada laen membahasaken sobat?”

Itoe waktoe Liang-sih lantas prenta si pengoeroes Koan lekas ambilin satoe korsi, boeat itoe pengemis, jang sampe sekarang masi tinggal berdiri. Tentoe sadja ini prenta dilakoeken dengen sigra, sedeng hatinja mendjadi koeatir dan berkata:

„He, orang apatah adanja itoe pengemis, maka satoe ambtenaar jang berpangkat begitoe besar maoe doedoek bersama-sama? ― Ai, ai, kaloe begini, akoe tentoe boleh djadi tjilaka, kaloe itoe orang mendendam hati jang akoe telah perlakoeken dengen kasar dan telah bentak-bentak padanjn?”

Tapi siapatah adanja itoe pengemis?

Itoe poen boekan laen dari Kwe Keng, jang sekarang soeda amat pajah dan liongpwe abis-abisan !

Pengawakannja jang memang koeroes, djadi bertamba gering. Pakeannja poen soeda amat mesoem, betoel sabagimana pengemis jang melarat Dalem keadahan begitoe, siapatah bisa kenalin padanja.

Tapi kenapa ia ada di sini?

Itoelah boekan laen, sabagimana jang pembatja. masi inget, pada itoe malem waktoe pasanggrahannja kena diserang oleh Lie Eng, ia bersama Thio Hiong soeda beroentoeng dapet melariken diri. Tapi di tenga perdjalanan Kwe Keng ini telah kasasar, dan waktoe maoe balik kombali, hatinja merasa koeatir dapet tegoran dari Tong Koan.

Oleh kerna merasa maloe, takoet dan sataoe apa lagi, maka ia soeda tida maoe ambil djalanan jang meneroes ka Pakkeng, hanja berdjalan teroes meneroes, dengen tida kataoean ka mana jang hendak ditoedjoe.

Itoe waktoe pakeannja tjoema samengga-mengganja satoe badjoe dan satoe tjelana jang ada dibadan, hingga berboelan-boelan jang dipake itoe- itoe djoega, maka apa heran kaloe dalem sakean waktoe itoe, djadi amat mesoem dan kotor?

Begitoelah waktoe katemoe pada Liang-sih, itoe pembesar jang doeloe uernah djadi moeridnja, ia tida bisa lantas kenalin, kerna sekarang poen Liang-sih soeda berpakean Gisoe, dengen berdjalan ada jang anter.

Waktoe Liang-sih mengakoe sobat, baroe ia kenalin betoel, bahoewa matanja tida kliroe apa jang baroesan ia telah liat. Tapi. waktoe satoe pada laen soeda oetjapken itoe perkatahan-perkatahan, Kwe Keng baroe inget jang dirinja ada dalem keadahan bagimana, maka ia merasa amat maloe, hingga tida brani angkat moeka lagi.

„Tapi bagimana Soetiang poenja keadahan boleh djadi sampe begini?“ menanja Liang-sih sambil mengawasi.

Kwe Keng masi tida bisa menjaoet, ia toendoek dengen tida berkata-kata. Ia maoe tjeritaken perkara jang sabenernja, hatinja merasa amat emaloe, tapi kaloe tida dibilang betoel-betoel, kaloe kamoedian Liang-sih dapet kabar jang sabenernja, pasti dirinja boleh djadi lebi maloe lagi. Dan lantaran ini djoega, ia tjoema gojang-gojang sadja kapala.

Tio Liang-sih taoe apa jang Kwe Keng ada tpikir dalem hatinja, maka sebelonnja menanjaken hal ihwalnja, ia lantas panggil pengikoetnja boeat adjak Kwe Keng ka dalem kamar, dengen ambiiken satoe stel pakean boeat toekaran.

Kamoedian, sasoedanja berdandan rapi, Kwe Keng kaloear kombali dan ini kali roepanja djadi kaliatan gaga, dengen ada sedikit sombong-sombongnja.

Liang-sih silaken ia berdoedoek, sedeng pada pengoeroes Koan disoeroe sediaken barang santapan. Itoe pengoeroes roema pembrentian djadi bertamba-tamba herannja. Dan sekarang tida ada jang brani menanja apa-apa lagi, hanja lantas sadiaken barang hidangan beserta arak jang baek.

Liang-sih bersama Kwe Keng lantas makan minoem dengen sagala soeka hati.

Kwe Keng roepanja soeda brapa hari tida dapet makanan, maka waktoe membaoeken itoe barang santapan jang lesat, sigra, djoega loedanja djadi mengatja dan peroetnja berboenji grioek-grioek.

Makannja poen djadi lebi napsoe. sabelonnja Liang-sih abis satoe mangkok, Kwe Keng soeda menamba doea kali, araknja poenja sakali minoem kering dan tamba lagi. Baek djoega itoe waktoe tida ada orang, tjobalah kaloe, ada jang liat, tentoe orang boleh djadi tertawa gelak-gelak.

Sahabisnja bersantap, baroelah Tio Liang-sih moelai menanja kombali, bagimana itoe angkatan perang jang pergi ka lemmatjwan, dan bagimana Kwe Keng sekarang boleh ada di sini dengen keadahan begitoe roepa.

„Ah, kaloe moesti ditoetoerken satoe persatoe, soenggoe aken poenja peroentoengan ada teramat djelek,“ kata Kwe Keng sambil mengelah napas:

„akoe poen merasa maloe kaloe moesti bitjaraken itoe.“

„Tapi pada kaoe, jang ada mendjadi kenalan lama,“ kata poela ia: „biar bagimana djoega tentoe akoe moesti kasi taoe dengen sabener-benernja.”

Kamoedian ia toetoerken, bagimana waktoe angkatan perangnja sampe di lemmatjwan, pada pertama kali kaloear perang, lantas dapet kakalahan. Dan malemnja dari itoe hari Lie Eng dateng menjerang dari ampat pendjoeroe, hingga soldadoenja jang mati boekan sedikit. Dan ia sendiri poen, kaloe tida kaboeroe lari, tentoe soeda binasa di tangan moesoe.

Thio Hiong begitoe Kwe Keng landjoetken tjeritanja, pada pertama kali berperang soeda kalanggar Lie Eng poenja golok wasiat, dan lantaran ini, maka Ma Tjhoen jang ada sabagi panglima besar, soeda djadi goegoep dan bingoeng, malemnja dari itoe hari, ia soeda loepa atoer pendjagahan.

Begitoelah ia tjeritaken satoe persatoe, bagimana angkatan perang negri jang poekoel lemmatjwan telah abis moesna tampakkrana, hingga ia bersama Thio Hiong lantas melariken diri, kerna tida sanggoep melawan lebi lama.

„Tapi kenapa Soetiang tida lantas balik kombali ka Pakkeng bersama-sama Thio Hiong?” tanja Tio Liang-sih: „boekantah kaoe bilang, itoe waktoe soeda bisa melariken diri bersama itoe panglima?”

„Bener,” saoet Kwe Keng: „tapi kamoedian kila-orang djadi terpentjar, sebab itoe malem, atawa lebi betoel kaloe dibilang soeda ampir fadjar, djalanan di sana sini masi gelap goelita kita-orang melarikan diri dengen tida dapet liat satoe apa, hanja lari sadja asroek-asroekan dengen memboeta.”

„Tapi besok siangnja toch kaoe bisa ambil djalanan jang betoel?”

„Oh, ja, bener Tapi waktoe soeda djadi siang, akoe oeroengken itoe niat boeat balik ka Pakkeng.”

„Nah kenapa?”

„Sebab akoe merasa maloe kaloe poelang dengen abis-abisan begitoe roepa. Dari sitoe akoe lantas niat maoe pergi sadja ka kota Radja aken tjari Lim Siansoe, brangbali dengen pertoeloengannja, akoe bisa madjoe kombali ka tempat jang baek. Tapi, ja, dasar peroentoengankoe jang tjilaka, mendadak baroe sadja sampe di sini, akoe dapet sakit, sedeng oewang boeat ongkos di djalan tida ada. Nah lantaran madjoe ka kota Radja tida bisa dan maoe poelang ka Pakkeng djoega tida bisa, akoe djadi begini roepa."

Mendenger itoe tjerita, Liang-sih kasian-kasiannja ada, dan gelinja poen ada, hingga ia djadi tertawa dan kata:

„Ah, bener-bener tjilaka neroektoek amat Soe ting poenja diri, hingga-menampak nasib begini roepa?”

Karoean, karoean,” kata Kwe Keng sambil gojang kapalanja: „tapi baek djoega akoe bisa bertemoe pada Tjoenkliwa.”

Kamoedian ia menanjaken halnja Liang-sih, bagimana ini sobat dalem samantara waktoe sadja telah beroleh ini djabatan jang besar. Liang-sih laloe toetoerken bagimana ia telah membri pikiran pada Tong Koan boeat moendoerin orang-orang Tayliauw, dengen menggoenaken taktiek bersarikat pada negri Kimkok; dan advies ini oleh Tong Koan, laloe dibertaoeken pada Sri Baginda.

Sabaliknja, Baginda Song jang satelah meliat itoe lapoeran, lantaran doega ia ada saorang jang mempoenjai pikiran loewas, lantas oendang ka kota Radja boeat ditanja lebi djaoe dalem oeroesan politiek negri. Atas pertanjahan mana ia telah djawab dengen terang dan diberikoeti alesan-alesan jang tegoe.

Djoega ia tjeritaken, bagimana perhimpoenan permoesjawaratan ia telah bertentangan pikiran pada Lie Tay-hong, tapi kerna pikirannja dapet toendjangan dari Taysoe Tjoa Keng, Baginda djadi toeroet ia poenja advies, hingga ia diangkat mnndjadi oetoesan aken pergi ka negri Kimkok boeat bikin persarikatan.

Itoe maksoed telah terkaboel dan negri Kimkok soeda kirim djoega oetoesannja dateng ka Tong-king boeat tetepken itoe perdjandjian, dan sekarang itoe negri pada siapa Tiongkok ada bersarikat, soeda bersadia boeat gerakan satoe angkatan perang jang tegoe aken memaloemken perang pada Liauwkok.

Lantaran pakerdjahannja jang sebat itoe, maka sapoelangnja ka kota Radja, oleh Sri Baginda ia dikoerniaken ini djabatan Gisoe boeal membantoe Tong Koan mendjaga Pakkeng, dan sekarang poen ia lagi maoe berangkat ka itoe tempat.

Djoega ia kasi taoe, jang oleh Sri Baginda ia dikasi masoek she Tio, hingga sekarang ia boleh toelis dan seboet naman a Tio Liang-sih. Satelah mendenger iioe tjerita jang pandjang lebar, Kwe Keng laloe menepok tangan sambil membri slamat.

„Hola!, kaloe begitoe Tjoenkhwa beroentoeng betoel!” kata Kwe Keng dengen soeara kagoem:

„jang dalem tempo toedjoe-delapan boelan sadja soeda beroleh ini pangkat jang besar.”

„Ah, sasoenggoenja djoega Tjoenkhwa haroes dapet itoe koernia dan pahala,” kata poela Kwe Keng dengen soeara memoedji: „kerna pikiranmoe jang loewas dan otak jang tadjem, memang pantes mendapet itoe. Maka sekarang, dengen ini akoe hatoerken slamat dan harep dalem sedikit tempo aken beroleh pangkat jang lebi besar.”

Sahabisnja kata begitoe, ia angkati satoe gelas arak boeat itoe sobat. Liang-sih trima itoe pembrian slamat dengen hati girang. „Tapi apa sekarang Soetiang maoe landjoetken perdjalanan ka kota Radja?“ tanja Tio Liang-sih kamoedian.

„Sekarang boeat apatahı akoe pergi ka sana?“ saoet Kwe Keng: „sebab akoe toch maloe moesti katemoe Liem Siansoe dalem keadahan begini roepa.“

„Djadinja, bagimana Siansoe poenja pikiran?“

„Inilah akoe sendiri belon dapet pikir.“ „Apa Soetiang maoe ikoet akoe sadja balik ka Pakkeng?“

„Sabetoelnja akoe memang soeka sekali ikoet pada Tjoenkhwa Tapi kaoe taoe sendiri, jang lantaran itoe kakalahan di lemmatjwan, akoe tida ada moeka boeat ketemoe kombali pada Tong Djoebit.“

„Abis bagimana? Kasana tida maoe, kemari maloe, ka mana jang Soetiang niat pergiken, masa maoe berdiam di sini sadja?“

„Tentoe tida.“

Liang-sih lantas berdiam sambil toendoeki kapala.

Sabelonnja ambtenaar itoe dapet satoe pikiran jang baek Kwe Keng telah berkata kombali:

„Ka mana jang Tjoenkhwa rasa baek akoe pergi? Tjobalah toeloeag tjariken satoe tempat boeat melindoengken diri, soepaja bisa dapet satoe pakerdjahan jang terpandang, sesab kaloe Tjoenkhwa jang poedjiken, tentoe akoe bisa dapetken itoe dengen tida sebrapa soesa, boekan?“ „Djoestroe inilah jang akoe lagi pikirin,“ saoetnja Liang-sih sambil memanggoet: „nanti, nanti akoe pikir,“

Kwe Keng mengawasi dengen berdiam.

Selang sasaät Liang-sih itoe berkata:

„Ja, ja, sekarang akoe inget, ada satoe tempat jang baek boeat Soetiang toempangken diri dan pegang satoe pakerdjahan. Belon taoe, apa kaoe soeka atawa tida?“

„Di mana?“

„Di kota Kiankong, pada Ong Tiauw-hin.“

„Siapatah itoe Ong Tiauw-hin?“

„Poetranja Ong Hwan.“

Kwe Keig berdiam sembari inget-inget itoe nama, tapi maski dipikir brapa lama djoega, nama itoe njata ia tida kenal.

„Akoe tida kenal itoe Ong Tiauw-hin.“

„Itoelah tida mendjadi satoe halangan, kaloe sadja Soetiang bawa akoe poenja soerat padanja, tentoe ia trima.

„ltoe Ong Tiauw-hin ada satoe anak moeda jang sopan dan manis boedi bahasanja,“ kata poela itoe Gisoe lebi djaoe: „pada ajahnja akoe ada kenal baek, dan kaloe kaoe bawa soeratkoe padanja. tentoe ia trima dengen senang hati dan briken satoe pakerdjahan jang bertimpal pada Soetiang poenja deradiat. „Soekoerlah kaloe begitoe,” kata Kwe Keng dengen girang.

Tio Liang-sih lantas prenta orangnja ambil kertas dan tinta, sigra djoega ia toelis satoe soerat jang dialamatken pada Ong Tiauw-hin di kota Kiankiong dan boenjinja begini:

„Sobatkoe jang terhormat,

„Sadari berpisa, soeda lama djoega kita orang tida bertemoe. Bagimana dengen keadahan kaoe dan ajahmoe sekarang ini, apa ada baek djoega?, ja, akoe harep dengen koernianja Toehan jang Maha Koeasa, kaoe dengen sakalian familie ada di dalem slamat dan beroentoeng.

„Lantaran repot sama oeroesan negri dan pakerdjahan jang akoe djabat di ini waktoe, maka akoe poen tida bisa sering-sering menoelis. dan boeat itoe kealpahan, harep kaoe dan ajahmoe tida djadi ketjil hati.

„Bersama ini akoe ada kirim djoega Sian seng Kwe Keng, saorang jang berilmoe dateng pada kaoe, jang akoe harep, kaloe ada pakerdjahan jang terboeka, soedilah kaoe briken padanja.

„Poedjian lebi djaoe atas kapandeannja Kwe Sianseng, akoe rasa tida perloe ditoetoerken kerna sigra djoega kaoe nanti mendapet boektinja, la salaennja ada mengarti baek dalem ilmoe soerat, djoega ada mempoenjai banjak kasaktian jang ada bergoena bagi djabatannja dalem oeroesan negri. Tapi kaloe akoe soeda kirim dia padamoe, kerna sabagi orang berilmoe, ia soeka djalan mengoembara, hingga kabetoelan sekali ini hari akoe katemoe padanja boeat dateng pada kaoe.

„Lebi doeloe akoe hatoerken trima kasi atas kaoe poenja katjintahan hati, jang tentoe tida nanti menampik kadatengannja ini orang berilmoe. Tertinggal hormatkoe;

Gisoe Tio Liang-sih."

„Nah bawalah ini soerat padanja," kata Liang sih pada sasoedanja menoelis. Tapi sabelonnja itoe soerat dimasoeki ka dalem envelop, ia kasiken doeloe pada Kwe Keng boeat dibatja.

Kwe Keng laloe samboeti dan batja itoe dengen girang. Kerna itoe poedjian poen ada bagoes sekali, sedeng kadjelekan-kadjelekannja, tida ada diseboet. Kamoedian ia serahken kombali itoe soerat sambil hatoerken trima kasi.

„Sebab akoe moesti berangkat ka Pakken dengen tjepet," kata Liang-sih pada sasoedanja toelisken adres di itoe envelop: „maka kita-orang tida bisa beromong-omong lebi lama dari sabagimana adanja sekarang. Ini hari djoega akoe maoe lantas berangkat, sedeng Soetiang poen boleh lantas pergi ka sana."

Kwe Keng memanggoet.

Tio Liang-sih laloe ambil satoe selimoet dan satoe stel pakean boeat toekaran, bersama oewang tigapoeloe tail perak boeat ongkosnja djalan Ini semoea laloe dibriken pada Kwe Keng, jang trima itoe pembrian dengen amat girang.

Kamoedian ini Gisoe prenta orangnja bawa kaloear itoe sakalian barang-barang dari roema Koan, aken ditoeroenin ka dalem praoe jang memang telah bersadia, sedeng Kwe Keng poen toeroet menganter sampe di tepi soengei.

Pada waktoe maoe berpisa, Tio Liang-sih pesen lagi sedikit apa-apa, sedeng Kwe Keng oetjapken poela trima kasi dan hatoerken slamat djalan.

Sasoedanja praoenja itoe ambtenaar tertoelak ka sebrang, baroe Kwe Keng balik kombali ka itoe roema Koan tempat dimana ambtenaar-ambtenaar brenti menginep. Dan sekarang laganja djadi lebi agoeng dan tinggi.

,,Hm, itoe orang terkoetoek, jang tida liat mata padakoe," kata Kwe Keng sambil berdjalan ka Honghoa Ekkoan: ,,sekarang ada dateng giliran boeat akoe kasi semprotan padanja, soepaja dia boleh taoe akoe ini siapa dan orang bagimana. Kaloe akoe belon damprat padanja, akoe belon merasa poewas."

Hatinja merasa girang, kerna inget bisa dapet bales sakit hati pada itoe pengoeroes Koan jang tadi soeda maki-maki dan damprat padanja. Begitoelah sasampenja di dalem, ia laloe doedoek di tempat mana baroesan Tio Liang-sih ada berdoedoek, sambil treaki itoe pengoeroes jang mendjaga ini roema.

Itoe pengoeroes laloe dateng dengen berloetoet, sambil berkata:

,,Harep Loya soeka membri ampoen atas kasalahankoe jang tadi, jang soeda tida bisa kenalin pada goenoeng Thaysan, hingga telah berlakoe kasar dan koerang adjar. Sasoen ggoenja akoe ini saorang renda, jang ada mempoenjai mata, tapi tida mengenalin pada orang besar. Boeat kasalahan mana, lagi sakali harep soedi diampoeni."

,,Sabetoelnja orang samatjem kaoe, bangsa kapala andjing. haroes dihoekoem rangket ampat poeloe rotan, boeat kaoe poenja koerang adjar dan tida taoe adat!" kata Kwe Keng dengen soeara bengis jang dibikin-bikin: ,,tapi sebab kaoe mengakoe teroes terang, jang maski matamoe melek tapi seperti boeta dan tida kenalin akoe siapa, — ja, baeklah akoe kasi ampoen dari itoe hoekoeman jang berat, tapi hoekoem rangket sapoeloe rotan, tida boleh tiada didjalanken."

,,Oh, Loya, Loya Taydjin, harep ampoenilah hambamoe ini!" treak itoe pengoeroes Koan dengen soeara meratap, lantaran kira şasoenggoenja ia maoe dihoekoem: „lagi sakali harep Loya Taydjin soeka membri ampoen dan bebasken hoekoeman itoe sama sekali, sebab kaloe Loya hoekoem djoega tentoelah akoe tida bisa merawati dan melajani lagi sabagimana pantesnja. Boeat itoe kamoerahan hati, akoe hatoerken banjak trima kasi, Dan djoega akoe berdjandji, jang boeat kadepanin akoe nanti berlakoe lebi hati-hati, soepaja bisa kenali goenoeng Thaysan jang besar.”

Mendenger diri ada dibahasaken „Loya Tay djin„, hatinja Kwe Keng djadi girang betoel, hingga dengen mendadak ia rasaken dirinja djadi lebi tinggi doea kaki dan kapalanja poen ada merasa sabesar gantang.

Lebi lagi djadi soeka hati. sebab liat itoe pengoeroes Koan sambil berloetoet tida brentinja manggoet-manggoet.

„Nah, baeklah akoe bebasken kaoe dari semoea hoekoeman,“ kata kamoedian: „tapi hajoe sadiaken akoe thee jang baek, leherkoe soeda terlaloe aoes, Dan kaloe ada koewe phia, kaoe boleh bawa djoega ka mari.”

„Akoe..... akoe..... nanti sadiaken dengen lantas!“ kata itoe pengoeroes Koan sambil berbangkit boeroe-boeroe, kerna merasa girang jang dirinja soeda dibebasken dari hoekoeman. Tapi djoestroe lantaran maoe boeroe-boeroe begitoe, kapalanja djadi kabentoer medja sampe djadi bendjoet. Tapi hal ini ia tida rasaken kerna hatinja amat girang dan lantas berlari-lari ka dalem aken sedoe thee.

Kwe Keng jang meliat kalakoeannja itoe orang, hatinja djadi amat senang. Kerna rasa dirinja soeda djadi tinggi dan kapingin dapet perindahan lebi besar, maka wakfoe itoe pengoeroes kaloear kombali membawn theekoan dan sapiring koewe phia, ia lantas berkata:

„Berdiri di sini, toewangi tjangkir-tjangkir jang kosong. Tapi, he, ini koewe phia apatah?”

„Oh, ini phia jang paling enak," djawabnja: „jang disadiaken boeat ambtenaar-ambtenaar, sabagimana jang tadi disoegoeken pada itoe Gisoe, Loya poenja sobat jang dateng mampir.”

„Apa kaoe bilang! Akoe poenja sobat itoe Gisoe!?” menjentak Kwe Keng dengen soeara keras.

„Oh, akoe tida taoe Loya poenja apatah Gisoe itoe?” kata si pengoeroes dengen soeara goegoep lantaran katakoetan.

„Itoe Gisoe jang tadi boekannja akoe poenja sobat,” kata Kwe Keng: „hanja akoe poenja moerid. kaoe mengarti?”

„Oh, oh, kiranja Loya Taydjin poenja moerid.”

Ja, lantaran itoe djoega, maka ia berlakoe hormat. Apa kaoe tida denger jang ia pangil akoe „Soetiang“, dan Soetiang itoe ada berarti Soehoe. Kaoe mengartitah, bantong?“

„Oh, oh!“

,,Dan kaloe ia soeda beroleh itoe pangkat jang besar, semoea ada dari pertoeloengankoe. Akoe soeda masoeki satoe soerat pada Sri Baginda, dan dengen soeratkoe itoe djoega, ia telah diangkat ka dalem itoe djabatan.“

„Oh, oh!“

Sekarang dia maoe pergi ka Pakkeng, kerna begitoelah memang akoe poedjiken pada Baginda, soepaja ia diangkat djadi Gisoe aken membantoe Tong Djoebit jang lagi mendjaga wates negri dari serangannja orang-orang Tayliauw.“

„Oh, oh!“

„Akoe telah adjarken ia roepa-roepa ilmoe gaib, dan dengen itoe kapandean jang ia dapet dari akoe. boleh dipastiken ia bisa moendoerin moesoe jang dateng ka itoe kota, kaloe sadja itoe orang-orang Tauliauw brani dateng lagi.“

„Oh, oh!“

„Dan akoe djoega ini hari maoe berangkat ka kota Kiankong, aken mamegang satoe djabatan penting di itoe kota. Kerna pembesar di sana, jang bernama Ong Hwan, soeda merasa kawalahan mengoeroes perkara-perkara jang soeker, hingga Baginda telah angkat akoe boeat bantoe pegang pamerentahan di itoe tempat.“ „Oh, oh!”

„Oh-oh oh-oh sadja, bantong!”

„Ampoen, Loya Taydjin.”

„Kaoe mengarti apa jang akoe omong?”

„Ja, ja!”

„Kaoe tentoe heran djoega, boekan, bagimana akoe boleh dateng ka mari dengen keadahan begitoe roepa, sabagimana jang bermoela kaoe telag liat, jaitoe memake badjoe petja roepa mesoem dan laga seperti pengemis?”

„Ja, ja, heran betoel.”

,„,Itoelah boekan laen dari pada memang akoe sengadjain. Akoe sengadja menjamar begitoe boeat selidiki dan intip pakerdjahannja sasoeatoe pembesar. Sebab kaloe akoe pake uniform dari djabatankoe, orang lantas bisa kenalin, hingga kasalahan-kasalahannja akoe tida dapet liat.”

„Ja, ja, itoe bener.”

„Sebab kaoe tentoe taoe, bagimana pembesar- pembesar kota jang kaloe denger kabar jang bilangannja ada ambtenaar jang maoe dateng preksa, ia lantas berlakoe lebi radjin dan bersadia-sadia lebi doeloe, hingga ia poenja kamalesan jang sabenernja, djadi tertoetoep. Tapi kaloe akoe menjamar sabagi pengemis, boekan sadja bisa liat ia poenja kerdjahan, hanja bisa tjoba djoega hatinja.”

„Ja ja, itoe betoel sekali.” „Nah, apa sekarang kaoe soeda membarti, apa maksoedkoe dateng ka mari dengen berpakean begitoe boeroek, tida pake kopia dan tida pake kasoet?„

„Ja ja, mengarti betoel.“

„Nah kaloe bener kaoe mengarti tjabalah bilang, apa akoe poenja maksoed begitoe?“ thug

„Maksoednja maoe menjamar.“

„Bener! bener! hahahaha! hahaha!“ kata Kwe Keng dengen girang: „hajoe toewang lagi itoe tjangkir- tjangkir jang kosong, kerna sahabisnja minoen thee akoe lantas maoe berang kata melakoeken lebi djaoe akoe poenja penjelidikan."

Itoe _pengoeroes Koan laloe toewang kombali semoea tjangkir jang soeda tida ada isihnja.

Sasoeda itoe sapotji thee dan sapiring koewe phia jang disoegoeken, dihamtem bersi, Kwe Keng lantas prenta panggil koeli boeat membawa boengkoesannja, jaitoe jang berisi satoe tjelana dan satoe badjoe pemberian dari Tio Liang-sih. Sabenernja ini boentelan ketjil boleh ditengteng sadja lantaran maoe belaga, maka ia meminta ditjariken koeli dan ogah membawa sendiri.

Itoe pengoeroes laloe kasi taoe, bahoewa di ini tempat djarang sekali ada koeli jang boeat disoeroe, katjoeali orang-orang hoekoeman. Dan apatah ini „Loya Taydjin“ maoe pake koeli jang demikian.

„Orang hoekoeman?“ tanja Kwe Keng dengen heran:„dan tida ada koeli jang betoel?“

„Tida ada,“ saoetnja.

„Nah kaloe tida ada lah apa-boleh-boeat. Pergilah panggil orang hoekoeman itoe kamari.“

„Brapa orang jang Loya perloe pake?“

„Satoe soeda tjoekoep.“

„Baeklah, sigra djoega akoe nanti bawa mengadep orang itoe ka mari.“

Sahabisnja berkata, pengoeroes Koan itoe berlaloe, sedeng Kwe Keng merasa senang dalem hati, kerna kira itoe pengoeroes Koan pertjaja apa jang telah dibilang. Tapi sabenernja itoe orang jang diobrolin, kendati moeloetnja berkata:„oh, oh,— oh, oh,“ dan “ja, ja,— ja, ja,“ tapi dalem hatinja merasa jang itoe omongan tida bener adanja.

Tida lama orang itoe telah dateng kombali sembari membawa satoe orang koekoeman jang dihadepken pada Kwe Keng, sambil berkata:

“Inilah adanja orang itoe. Loya.”

„Baek,” kata Kwe Keng, jang lantas prenta ambil boengkoesannja dan kamoedian ka loear dari itoe Koan bersama-sama itoe orang hoekoeman sabagi penganter.

Boeat pergi ka kotą Kiankong, dari ini tempat ada djaoe djoega. Maka sasoedanja melaloeken bebrapa hari dengen ambil perdjalanan jang melintasi Swatang, baroelah ia sampe di kota terseboet ampoenja bilangan. Tapi itoe waktoe soeda malem dan Kwe Keng bersama pengikoetnja laloe tjari tempat pembrentian di satoe doesoen.

Tapi di ini desa jang soenji tida ada roema menginep, djoega tida ada waroeng boeat orang boleh mampir dengen sekalian menoempang tidoer. Lantaran itoe, maoe atawa tiada kapaksa Kwe Keng pergi ka roema orang jang paling deket dengen maksoed seperti jang ditoetoerken di atas.

Roema-roema di ini doesoen, kaloe waktoe soeda liwat menggerib sadja, kabanjakan pada toetoep pintoe. Maka kadatengannja Kwe Keng itoe, tida ada jang taoe.

„Ah, baek akoe ketok sadja pintoenja,” kata Kwe Keng dalem hati.

Sigra djoega ia soeda mengetok, sambil memanggil orang jang poenja roema.

Tida lama, pintoe terboeka dan saorang toea jang dari parasnja kaliatan asem, mengawasi padanja dengen roepa heran.

„He siapatah?“ kata itoe orang jang poenja roema.

„Akoe ini moeridnja Liem Tjindjin, Koksoe dari Sri Baginda jang sekarang ada bertachta di kota Radja“‘ begitoelah Kwe Keng moelai kenalken dirinja, dengen seboet namanja itoe Koksoe boeat menambaken kakerenannja: „datengkoe kamari boekannja sengadja, tapi lantaran kamaleman di djalan, terpaksa dateng ka mari dengen pengharepan dibriken tempat menginep boeat samaleman.“

Sabelonnja orang toea itoe menjaoet. Kwe Keng telah berkata kombali:

„Akoe ini maoe pergi mendjabat pangkat di kota Kiankong, tjoema samaleman sadja akoe maoe nginep dan besok akoe nanti teroesken poela perdjalanankoe.‘’

Kaloe didenger dari omongannja itoe, njatalah Kwe Keng ada saorang jang amat mati-matian, kerna datengnja ka Kiankong sakedar boeat tjari pakerdjahan, jang belon tentoe aken ditrima, tapi pada toean roema ia mengakoe maoe pergi ka itoe kota boeat mendjabat pangkat.

Ah, bener-bener orang sombong dan toekang mengobrol jang tida kadoeanja lagi!

Tapi itoe obrolan njata telah berhasil sabagimana jang diharep. Kerna sasoeda mendenger itoe, sigra djoega roepanja itoe orang toea djadi beroba laen, dan lantas boekain pintoe silaken Kwe Keng bersama pengikoetnja masoek ka dalem.

Sasoedanja membri hormat, Kwe Keng laloe menanjaken toean roema itoe poenja nama dan oesia, dan djoega namanja ini doesoen.

Itoe orang toea bilang: ia sa orang she Tjian, jang sekarang telah beroemoer tjoekoep anampoeloe taon. Ini doesoen terkenal dengen nama Honglokbo, jang ada termasoek dalem daerah Tjengtjioe. Dan di ini tempat toean roema soeda tinggal bebrapa toeroenan, dengen oesahakens awa-sawa, kebon dan pemeliharaän heiwan.

Kwe Keng memanggoet, sedeng Tjian Hoangwe prenta orangoja sadiaken barang makanan, kerna ia doega, ini doea tetamoe jang dateng kasorean, tentoe belon santap.

Tida lama barang-barang hidangan telah sadia, dan Kwe Keng bersama pengikoetnja disilaken dahar. Dan makanan itoe maski tida terlaloe banjak roepanja, tapi toch ada tjoekoep, dan membri kanjatahan jang toean roema ada saorang hartawan.

Sasoedanja dahar, Tjian Hoangwe adjak doedoek minoem thee sambil beromong-omong, dan atas pertanjahannja Kwe Keng, Hoangwe ini kata, maski dirinja tida terlaloe hartawan, tapi dari pengasilannja kebon-kebon dan sawa-sawa, haroes dibilang ada lebi dari tjoekoep. Tjoema menjesel tida beroentoeng mempoenjai anak lelaki boeat samboeng toeroenan, dan lantaran inilah ia djadi berdoeka.

„Tapi kendati begitoe, toch akoe merasa senang djoega dengen mempoenjai sadja satoe anak prampoean“ kata poela Tjian Hoangwe: „jang maski roepanja tida terlaloe eilok, tapi tjoekoep mengarti boeat oeroes sagala pakerdjahan prampoean. Boekan sadja oeroesan roema tangga, hanja ini oesaha semoeanja poen ada dioeroes olehnja.“

„Itoelah baek djoega," kata Kwe Keng: “sebab dengen mempoenjai satoe anak prampoean toch tida boleh dibilang tida sekali ampoenja anak.- Dan brapatah oemoernja sekarang Hoangwe poenja siotjia?“

„Dengen ini taon masoek oemoer delapanbelas.“

„Oh, itoelah soeda tjoekoep bermantoe.“

„Ja, kaloe ada djodonja. Tapi dalem sabegitoe djaoe, belon ada orang moeda akoe penoedjoe, hingga sampe sekarang anakkoe itoe belon mempoenjai toenangan.“

„Ah, dalem sedikit tempo tentoe aken dapet orang jang dipenoedjoe. Maka boeat itoe; troesa Hoangwe terlaloe keseli hati.“

„Oh, sianseng tida taoe,“ kata Hoangwe sambil mengelah napas: „kakeselankoe boekan tjoema begifoe sadja.“

„Bolehtah akoe dapet taoe lantaran apa?“ menanja Kwe Keng: „kaloe-kaloe akoe bisa membri pikiran jang baek?“

Tjian Hoangwe mengela poela napas, jang ini kali ada lebi pandjang, sedeng parasnja djadi samingkin doeka, hingga ia rasa ampir tida sanggoep toetoerken itoe kadoekahan. Tapi sebab pikir, boleh djadi djoega ini tetamoe bisa membri pikiran-pikiran jang baek, maka dengen hati tergerak ia tjeritaken riwajątnja itoe anak prampoean, jang ringkesnja ana begini:

Sabagimana baroesan telah dibilang, bahoea gadisnja itoe ada satoe anak jang baek dan terpeladjar, tambahan denger kata. Dan lantaran itoe maka ia merasa dapet djoega satoe hiboeran.

„Tapi, ia, siapatah njana jang peroentoegankoe ada begini djelek,“ kata poela ia sambil soesoet mata dengen tangan badjoe: „pada tiga boelan jang laloe itoe anak seperti orang jang koerang beres pikiran. Kerna pada soeatoe hari diserang saroepa penjakit, hingga bebrapa hari beroentoen tida maoe makan atawa minoem.“

„Ja, orang sakit memang tida enak dahar,“ kata Kwe Keng.

„Oh, boekannja begitoe sadja,“ saoet itoe orang toea: „pada soeatoe hari, jaitoe selang kira-kira saminggoe sadari ia dapet sakit, lantaran satiap hari tida maoe dahar, maka akoe telah pergi ka kamarnja boeat menengoki. Di sitoe akoe liat ia soeda bangoen dan berias, memake pakean jang bagoes. seperti orang jang maoe pergi melantjong. Tapi sahabisnja berdandan begitoe, ia doedoek sadja, dan waktoe akoe tanjain dahar, ia tjoema gojang sadja kapala dan tertawa.

„Waktoe akoe soeda berlaloe, akoe denger ia mengomong bisik-bisik, hingga akoe djadi kaget, kerna pikir: apa brangkali ia ada semboeniken katjintahan. Kerna kaloe bener begitoe, akoe tentoe boleh dapet maloe.

„Dengen hati tjoeriga akoe laloe balik kombali ka kamarnja dan megintip dari lobang koentjian pintoe bersama-sama istrikoe jang akoe adjak dateng. Tapi di sitoe tida kaliatan ada orang atawa bajangannja. Tapi toch bitjaranja masi kedengeran sadja. Tempo-tempo sahabisnja mengomong ia soeda katawa seperti orang kagirangan.

„Dari itoe penjelidikan dan pengintipan jang akoe bikin beroelang-oelang, akoe dapet kanjatahan, jang anakkoe itoe boekan semboeniken katjintahan, hanja penjakitnja itoe telah beroba djadi penjakit otak. Sadari itoe waktoe hingga sekarang, jang soeda berdjalan tiga boelan lamanja, tida sekali ia maoe dahar atawa minoem. Kaloe dibawain apa-apa ia boewang dan teroes tinggal tidoer. Tapi saban pagi ia bangoen dan sore poen barias tida brentinja, hingga akoe tida bisa berboeat laen dari pada liatin sadja, sebab bebrapa thabib jang dioendang. tida bisa menoeloeng.”

„Soenggoe peroentoengankoe tjilaka sekali,” kata itoe orang toea sabagi penoetoepnja; „sataoe doeloe hari akoe ada berboeat kadjahatan apa, maka ini hari moesti menampak kadoekahan jang begini roepa, dan anak prampoean jang tjoema satoe-satoenja sampe diserang ini penjakit jang begini heibat."

„Oh, kaloe begitoe, njatalah Lohan poenja Leng-ay terkena pengaroenja siloeman,“ kata Kwe Keng pada sasoedanja mendenger itoe semoea tjerita: „tida sala, siotjia itoe terkena ganggoeannja siloeman. Dan mengapatah Lohan tida maoe minta pertoeloengannja satoe Hwatsoe jang mempoenjai ilmoe tinggi, boeat oesir itoe iblis djedjadian?“

„Soeda, Hwatsoe poen soeda dioendang, tapi tida bisa menoeloeng soeatoe apa,“ kata Tjian Hoangwe dengen amat doeka

„Begitoe? — Hwatsoe manatah jang Lohan telah minta pertoeloengannja?“

„Jang tinggal di gredja Tjiwikoan.“

„Apatah Hwatsoe itoe bilang?“

„Ia tida bilang soeatoe apa. Kerna dengen maoe menoeloeng anakkoe, bebalik dirinja sendiri djadi tjilaka. Kerna baroe sadja satoe kali ia dateng menengoki dan maoe obati, mendadak dirinja dihinggapi penjakit, jang sampe sekarang masi tinggal rebah di atas pembaringan hingga amat berbahaja bagi djiwanja.“

„Kaloe begitoe. tentoelah ilmoenja itoe Hwatsoe koerang tinggi dan tida tjoekoep sakti boeat laloeki itoe siloeman jang menggangoe siotjia. Sebab kaloe ia ada mempoenjai itoe kasaktian, pasti tida aken terdjadi demikian.”

Mendenger ini perkatahan-perkatahan jang paping blakang, Tjian Hoangwe lantas inget apa jang bermoela Kwe Keng seboet, waktoe ia terkenalken diri sabagi moeridnja Liem Tjindjin, Koksoenja Sri Baginda jang sekarang.

Koenjoeng-koenjoeng ini orang toea lantas dapet satoe pikiran, jang kaloe-kaloe Kwe Keng ada mempoenjai itoe kapandean boeat toeloeng semboelken anaknja dari godahannja itoe siloeman Begitoelah sambil berbangkit dari tempatnja doedoek, ini toean roema laloe berkata sambil angkat kadoea tangan:

„Apa jang sabegitoe djaoe sianseng poenja pembitjarahan, njatalah jang kaoe ini ada sa-orang pande jang mengenal ilmoe-ilmoe gaib. Sebab orang jang tida mempoenjai itoe pengartian, tida nanti bisa bilang, jang anakkoe ada diganggoe siloeman.“

„Dan baroesan, pada pertama kali sianseng kenalken diri,“ kata poela ia: „kaloe akoe tida sala denger, kaoe bilang dirimoe ada moeridnja Liem Tjindjin, Koksoe jang sekarang dari kita-orang poenja Sri Bagiada karadjahan Songtiauw. Dan kaloe bener begitoe, pastilah sianseng ada mempoenjai ilmoe-ilmoe jang sakti boeat oesir itoe siloeman jang mengganggoe Leng-ya.

„Maka ini, dengen hormat, tapi djoega sanget Lohan meminta dengen sagala kasoedjoetan pada sianseng, soedilah toeloengi anakkoe itoe. Dan kaloe sampe djadi tersemboeh, oh, soenggoe itoe boedi akoe nanti djoengdjoeng di atas kapala dan oekir salama-lamanja di dalem hati dengen tida diloepa.

„Boekantah kaoe tida menampik, sianseng ? ― Tidakah kaoe soeka aken loeloesken permoehoenankoe, boeat oesirin setan, itoe iblis atawa siloeman djadjadian jang mengganggoe gadisnja?“

Mendenger itoe perkataan-perkatahan jang dioetjapken oleh Tjian Hoangwe, dimana dirinja ada dipandang saorang berilmoe jang sakti, Kwe Keng djadi sanget girang, ia poen memang saorang jang sombong dan soeka membanggaken kapandean sendiiri. Maka satelah denger toean roema meminta toeloengannja dalem itoe perkara, maka dengen girang ia lantas loeloesken sambil berkata:

„Oh, tentoe sadja! Tentoe sadja akoe soeka aken menoeloeng Lohan poenja Leng-ay. kerna boeat oesir siloeman toch memang ada akoe poenja kasoekahan. Maka tida oesah diminta sampe doea kali, akoe lantas loeloesken. Tjian Hoangwe djadi amat girang, hingga koenjoeng-koenjoeng parasnje jang doeka djadi berseri-seri. Hingga dalem itoe saät, dirinja djadi kaliatan lebi moeda sapoeloe taon dari pada oesianja jang bener.

„Soekoerlah! soekoerlah;“ kata itoe orang toea dengen soeara kagirangan: „ah, soenggoe beroentoenglah akoe ini.“

Kamoedian ia djoengdjoeng kadoea tangannja di atas kapala, seperti orang jang memoedji pada Toehan, dengen mendadak, tida dipanggil dan tida dioendang, boleh dateng saorang berilmoe ka roemanja.

„Oh, akoe haroes mengoetjap beriboe-riboe soekoer pada Thian jang Maha Koeasa!“ kata poela Hoangwe: „kerna datengnja sianseng kamari, ada seperti Allah jang mengirim kaoe boeat toeloeng akoe poenja anak.“

„Ja, saorang jang berhati baek, memang salaloe dapet koernianja Thian,“ kata Kwe Keng: „sebab Lohan toch ada saorang toea jang dermawan dan moera hati, maka sagala kasoesahan dan katjilakahan, dengen sigra bisa dapet pertoeloengan“

Maski moeloet kata begitoe, toch dalem hatinja Kwe Keng merasa koeatir djoega, kaloe-kaloe ilmoenja ada koerang tinggi boeat taloeki ini siloeman. Dan kamoedian, kaloe sampe ini pakerdjahan gagal, bagimanatah nanti djadinja, apa tida maloe?, sedeng ia soeda boeka moeloet besar?

Begitoelah ia menanja beroelang-oelang dalem hati sendiri.

Tjian Hoangwe laloe menanja: barang apa-apa jang moesti dipake boeat itoe kaperloean. Bilang sadja, ia lantas sadiaken.

„Apa Soetiang maoe pake barang-barang sembajang?“ kata ini orang toea, jang tadi memanggil. Sianseng, tapi sekarang soeda lantas membahasaken Soetiang, jaitoe itoe satoe perbahasaän boeat orang-orang sakti dan orang-orang jang berilmoe, kerna ia poen rasa jang tetamoenja ini boekan orang sembarangan.

Kwe Keng jang lagi kabingoengan sendiri, tida lantas menjaoet, hanja kata:

„Toenggoe, akoe nanti pikir barang apa jang moesti digoenaken.“

Maski moeloet kata begitoe, tapi hatinja ingin meliat tampang parasnja siotjia. Maka sakoetika lama ia tinggal berdiam aken memikiri, tjara bagimana dirinja bisa berhadepan pada itoe gadis.

Pembatja djangan kira, lantaran Kwe Keng itoe ada moeridnja Liem Tjindjin dan mempeladjari ilmoe-ilmoe orang pertapahan, lantas hatinja djadi soetji seperti laen-laen orang berilmoe, Tida! Malah boleh dibilang, ia ada lebi gila basa dari laen-laen pemoloran. Maka kaloe denger sadja namanja gadis-gadis atawa prampoean eilok, hatinja lantas dat-dit-doet!, dan pikirannja jang memang boeroek, sigra djoega djadi orah karoean rasanja.

Demikianlah, satelah inget: orang jang dihinggapi lingloeng atawa beringetan tida beres itoe, ada satoe gadis, koenjoeng-koenjoeng ia poenja gila basa lantas timboel, dan sakean lama diam berpikir.

„Hm! hm! mengapa akoe begitoe bodo,” kata ia dalem hati sendiri: „boekantah sekarang akoe ada mempoenjai alesan boeat minta liat itoe siotjia, kaloe sadja akoe kata, lebi doeloe orang jang sakit itoe moesti dipreksa, apa bener ia terganggoe oleh ailoeman atawa boekan. Kaloe dengen membri alesan begitoe, Tjian Hoangwe toch tida boleh tjela padakoe, dengen membilang akoe tida sopan dan laen-laen?”

Sigra djoega apa jang telah dipikir baroesan laloe dinjataken, hingga ini orang toea jang tida taoe perniatarinja Kwe Keng, djadi amat girang, dan sambil manggoet-manggoet laloe berkata:

„Oh, baek!, baek!, akoe nanti adjak ia ka mari.”

Kaloe dalem itoe saät Tjian Hoangwe djadi timboel harepan besar, ini poen tida oesah diboeat heran, kerna sabagi ajah jang telah beroesia begitoe toea dan tjoema samengga-mengganja mempoenjai satoe anak prampoean, jang sekarang ada dalem sakit, tidakah ia nanti djadi girang amat, kaloe ada saorang jang bisa toeloeng semboelken?

Dan lantaran itoe, manatah ia ada mempoenja kasempetan boeat mendoega djelek atawa menjangka-njangka jang tida karoean?

Begitoelah ia berlari-lari ka dalem aken membri taoe sang istri. bahoewa itoe tetamoe jang sekarang noempang menginep, ada saorang berilmoe jang bisa toeloeng gadisnja. Maka hajoelah bawa itoe anak ka loear boeat dipreksa, kerna sabelonnja diliat, orang jang hendak mengobati tida taoe bagimana asalnja penjakit itoe.

Tjian Hoedjin djoega djadi soeka hati satelah mendenger itoe perkatahan, maka sigra djoega marika laloe pergi ka kamarnja siotjia, jang di itoe waktoe, sabagimana biasanja, soeda berias.

Tapi lama gadis itoe soeda dihadepken pada Kwe Keng, jang laloe mengawasi dari atas sampe ka bawah dan dari bawah memandang ka atas dengen tida merasa poewas. Betoel parasnja ini nona tida sabrapa tjakep, tapi toch haroes dibilang manis, terlebi poela ada berdandan rapi.

Siotjia itoe, tida toendoek atawa merasa maloe, waktoe diawasi oleh Kwe Keng begitoe roepa. Si gila basa ini mengimplang-ngimplang tida bisa soeda, sedeng loeda entjer ampir sasanja maoe mengatja, kerna amat napsoe dan kapingin. Tjoba kaloe itoe waktoe tida ditegor, brangkali si kaparat masi mengimplang teroes, kerna ia poen telah djadi loepa pada diri sendiri.

„Bagimana, soetiang?“ tanja Tjian Hoangwe dengen soeara palahan: „benertah anakkoe ini terganggoe siloeman ?“

„Ja, ja, ja, ja, ja,“ saoet Kwe Keng dengen soeara goegoep sambil manggoet-manggoet: „bener, bener terganggoe yaukwai.“

Tjian Hoangwe dan istrinja saling memandang dengen roepa koeatir.

Dan waktoe gadis itoe soeda dibawa masoek, Kwe Keng berkata poela:

„Lohan poenja Leng-ay diganggoe oleh siloeman Kioebwe Holi, oh, satoe siloenman jang amat djahat dan bandel.“

„Begitoe?, astaga!“

„Pantes djoega itoe Hwatsoe jang Lohan oendang tida bisa oesir padanja, kerna siloeman ini poen: tida sembarang-barang bisa ditaloeki“

„Astaga! Kioebwe Holi itoe siloeman apatah?“

„Jang berasal dari rase. Satoe rase jang bertapa di sembilan poehoen Bwe.“

„Abis bagimana, Soetiang?“

„Oh, Hoangwe troesa koeatir, akoe nanti oesir itoe siloeman jang djahat.“

„Soekoerlah! Soekoer alhamdoellilah !!“

„Nah sekarang sadiakenlah itoe barang-barang jang perloe dipake, soepaja akoe boleh lantas moelai goenaken ilmoekoe” Hoangwe djadi girang dan laloe tanja, barang apa-apa itoe jang dikata perloe.

Kwe Keng laloe kasi taoe, jaitoe: lilin, hio, doepa dan sabaginja, kerna ia moesti bikin sembajang.

Tjian Hoangwe memanggoet, kamoedian prenta orang-orangnja sadiaken itoe barang jang terseboet, sasoeda barang-barang itoe tersadia di satoe medja, toean roema laloe kasi taoe pada tetamoenja itoe:

Kwe Keng lantas bersiap boeat mendjalanken ilmoenja.

Tapi sekarang ia tida ada mempoenjai papan Lengpay, kerna doeloe waktoe bertanding pada Oan Swie, itoe hikmad telah dibikin poena. Dan boeat gantinja itoe, si kaparat laloe ambil sadjelébék batoe oebin dan pegang itoe di tangan.

Boedjang-boedjangnja Tjian Hoengwe ada djoega bebrapa orang jang berhati brani, dan sebab kapingin liat bagimana orang menaloeki siloeman, laloe berdiri di tempat jang sedikit djaoe. Dari sini marika mengawasi dengen roepa kagoem.

Kwe Keng kaliatan moenḍar mandir sembari pegang itoe batoe. Tangannja jang kanan sabentar menoendjoek ka Oetara dan sabentar menoeding ka Barat, sedeng moeloetnja kelihatan berkemak-kemik.

Di sini haroes djoega diterangken, bahoewa Kwe Keng tida ada mempoenjai itoe kapandean boeat mengoesir siloeman. Betoel doeloean waktoe bertanding pada Oan Swie ia bisa toeroenken oedjan dan angin, dan laen-laen kedjadian jang oleh orang biasa dianggap heran. Tapi itoe semoea sabenernja ada pengaroenja hikmad, boekannja djampe atawa dowa. Sekarang itoe djimat atawa barang-barang moestika soeda tida ada, maka ia tida bisa berboeat laen, dari pada batja sadja sedikit djampe-djampe jang boekan moestinja terpake dalem ini maksoed, kerna kaloe tida berboeat begitoe, ia merasa maloe, kerna di hadepannja Tjian Hoangwe ia telah menjombongi dari sabagi orang jang berilmoe.

Sasoeda batoe itoe dipoeter-poeter brapa kali, ia lantas tepok sambil menjentak dengen soeara keras, katanja:

„He, angkaoe siioeman Kioebwe Holi, lekas kaoe pergi dari sini, djangan mengganggoe lebi lama pada siotjia, kaloe dirimoe tida maoe djadi binasa, kerna akoe Kwe Keng Todjin soeda ada di sini boeat kasi hadjaran padamoe!”

Berbareng dengen abisnja itoe perkatahan-perkatahan jang paling blakang, dari djoeroesan Timoer-salatan lantas berkesioer angin jang amat sedjoek, hingga dinginnja sampe meresep ka toelang-toelang.

Kwe Keng ada takoet dan girang-girang sedikit, takoet itoe dari kerna koeatir, apa angin ini ada angin siloeman, jang brangkali telah djadi moerka padanja. Sabaliknja merasa girang, kerna doega brangkali djampeannja jang dibatja baroesan bener-bener djadi kabetoelan, hingga membikin itoe siloeman djadi lari dengen pindjam djalan di angin.

Ia harep ini doegahan jang blakangan nanti berboekti.

Tapi dalem itoe saät djoega, berbareng dengen abisnja angin sedjoek, lantas dateng angin keras jang lantas bikin padem semoea apinja lilin dan lampoe-lampoe jang terpasang di itoe tempat.

Orang banjak djadi kaget, terlebi poela meliat laganja Kwe Keng djadi seperti orang gila. Sekarang ini kaparat jang tjoema bisa menjombongken diri, boekan berdowa atawa menoendjoek-noendjoek sabagimana tadi, hanja dengen itoe djoebin ia poekoeli kapala sendiri sampe kadengeran ngebeletak-ngebeletoek.

Itoe boedjang-boedjang masi belon dapet mendoega, jang di itoe waktoe Kwe Keng soeda karangsokan. Marika kira, itoe perboeatan ada dilakoeken dengen sengadja. Tapi bagimana kaget hatinja, satelah dapet liat, jang tida lama kamoedian Kwe Keng itoe djato tjelentang dengen kapala beloemoeran dara.

Si kaparat tida inget lagi pada dirinja.

Tapi liwat sasaät ia bergerak-gerak sambil bertreak dengen soeara keras. Tapi soearanja itoe ada bedah dari pada tadi.

„Ha, toea bangka! toea bangka jang terkoetoek!” bertreak Kwe Keng sambil menoeding-noeding:

„kaoe tida kenal saratan, tida bisa meliat gelagat. Apa kaoe tida taoe, bahoewa akoe ini Pak Yoe Ong poenja poetra, jang soeda ditentoeken ada berdjodo pada kaoe poenja anak prampoean?”

Tjian Hoangwe dan semoea boedjang-boedjangnja djadi bergidig. Tapi tida ada saorang jang brani menjaoet.

Kwe Keng mendjerit lagi:

„Lantaran akoe ada berdjodo pada Tjian Siotjia, maka djoega akoe soeda dateng ka mari aken lakoeken prentanja Toehan. Tapi kaoe dengen zonder tjari taoe lagi, soeda lantas sadja dengeri moeloetnja kaoe poenja tetamoe, jang salaen hendak monjombongi diri, djoega ada mempoenjai perniatan-perniatan jang sanget boeroek aken padajai bakal istrikoe. Maka boeat perniatannja jang tida bagoes itoe, sekarang akoe moesti kasi bagianja, soepaja ia taoe rasa.”

Kwe Keng memoekoel kapala sendiri, sambil tjomeli djoega dirinja jang dikataken gila basa dan laen-laen poela.

„Sekarang akoe membri ampoen padamoe laki istri, sebab kaoe poen ada teritoeng akoe poenja mertoea, Tapi akoe tida boleh antepi sadja istrikoe di sini dan sekarang djoega akoe maoe bawa ka tempat kadiamankoe, di mana kita-orang nanti menikah dan idoep kekal boeat salamanja.”

Itoe laki istri djadi amat kaget. Sekarang marika taoe, bahoewa Kwe Keng itoe telalı karangsokan.

Sabelonnja marika bisa berpikir lebi djaoe, satoe boedjang jang mendiagai siotjia. lantas menghamperi pada Tjian Hoangwe aken kasi taoe; jang siotjia telah linjap dengen tida kataoean ka mana perginja.

Tentoe sadja ini kabar ditrima sabagi menjambernja gledek. Hoangwe laki istri laloe memberoe ka tempatnja siotjia, tapi nona itoe soeda tida ada.

Kadoea orang toea itoe djadi menangis sasambat Sekaraag Kwe Keng jang tadi terletak tida diperdoeliken lagi, kerna boedjang-boedjang semoea diprenta tjari itoe gadis jang ilang dengen koenjoeng-koenjoeng.

Tapi, maski ditjari bagimana djoega, gadis itoe tida dapet dikatemoeken. Di sagala tempat dan ploksok telah dipreksa, di kebon, di soemoer dan di mana sadja jang didoega brangkali siotjia itoe ada, tida djoega dapet dikatemoeken.

Sasoeda hari djadi terang tana, itoe semoea boedjang dateng mengadep aken membri taoe. bahoewa marika soeda tjari nonanja dengen siasia sadja.

Tjian Hoedjin tida bisa berboeat laen dari pada menangis segak-segoek Sedeng soeaminja seselin diri sendiri, mengapa dengen begitoe gampang ia maoe dengerin sadja moeloetnja itoe tetamoe.

Ah, tjoba kaloe ia oesah toeroet bitjaranja Kwe Keng. maski sakit-sakit toch itoe anak masi ada di roema. Kendati pikiran ja tida beres, toch mending djoega ada jang diliat-liat. Tapi sekarang?, sekarang apa jang maoe diliat, bajangannja poen tida ada.

Lantaran itoe, Tjian Hoangwe djadi gemes dan bentji pada Kwe Keng, hingga ia tida perdoeliken lagi pada itoe tetamoe.

Brapa besar kadoekahan jang menghinggapi itoe laki istri, inilah dengen kalam tida bisa diloekis dengen terang. Dan soepaja pembatja djoega tida oesah tatoeroetan doeka boeat memikiri itoe, baeklah kita tinggalken sadja ini orang toea dan mari liat si sombong itoe.

Pada waktoe hari moelai terang tana, Kwe Keng poen telah tersedar dari pangsannja. la bangoen dari tempatnja terletak dengen badan merasa amat sakit, sedeng tida taoe lantaran apa maka diri djadi begitoe.

„He, he, akoe mengapatah?” tanja ia pada pengikoetnja jang ada berdiri tida djaoe dari sitoe.

„Apa Siangkong tida inget?” demikianlah si pengikoet balik menanja.

„Tida. — Akoe mengapatah?“

„He adjaib soenggoe!“

„Tapi akoe kenapatah?“

„Boekantah samalem Siangkong menangkep siloeman?“

Kwe Keng djadi terkedjoet, tapi berbareng itoe, la lantas inget semoea perkara. Dengen tangan kiri ia sekah dara jang ada di sapandjang moekanja, sedeng dalem hati ada doega, balioewa itoe maksoed jang telah dilakoeken, maski tida dengen sabenernja, tentoe soeda djadi ka petoelan. Dan ia tentoe soeda bertaroeng pada itoe siloeman, dan ini dara di moeka, tentoelah kena siloeman itoe.

„Oh, tentoe itoe siloema: soeda kena akoe hantem kapalanja dan telah mampoes brangkali?" pikir Kwe Keng dalem hati: „dan sabelonnja ia mampoes, akoe kena kapoekoel hingga pangsan dan loepa pada itoe semoea. Begitoe, begiloe tentoe!“

Kamoedian ia menanja:

„Mana dia bangkenja itoe siloeman?“

„Siloeman apa?“ tanja si pengikoet dengen dieran.

„Jang samalem akoe hadjar,“ saoetnja.

„Apa Siangkong djoega telah djadi edan?“ kata itoe pengikoet.

Kwe Keng mengawasi dengen mendelong, kerna tida mengarti kenapa orangnja ini boleh kata begitoe.

„Sasoenggoenja akoe loepa sekali apa jang terdjadi,“ kata Kwe Keng jang sasoedanja mendelong sakean lama: „apa jang akoe inget jaitoe, akoe membatja dowa boeat panggil itoe siloeman dateng, dengen maksoed boeat ditangkep. Tapi itoe siloeman ada terlaloe djahat, hingga akoe moesti berklai padanja begitoe sengit. Kaoe toch liat dara di kapalakoe, boekan, bekas kena gegamannja itoe yaukwai“

„Tapi manatah Tjian Hoangwe, mengapa akoe dideminin begini roepa ?" menanja poela ia.

Itoe perkataan-perkatahan jang Kwe Keng oetjapken baroesan, tjoema menoeroet sadja doega-doegahannja. Sedeng ia sendiri tida taoe apa jang dirinja telah berboeat, ia kira itoe pengikoet djoega tida taoe apa-apa, maka ia kaloearken itoe perkatahan dengen tida dipikir lagi.

Tentoe sadja ini pengikoet djadi katawa dan lantas toetoerken satoe persatoe sabagimana jang ia telah liat. Dan sasoeda denger begitoe, boekan patoet Kwe Keng poenja rasa takoet dan ngeri.

„Ai, ai, sampe begitoe?“ kata ia: „soenggoe akoe tida taoe sekali ada perkara demikian roepa?“

„Djoestroe lantaran begitoe dan lantaran ilangnja siotjia dengen koenjoeng-koenjoen,“ kata si pengikoet: „maka Hoangwe djadi gemes pada Siangkong, kerna Lohan itoe kata, kaloe tida lantaran kaoe poenja perboeatan dan kebisahan, gadisnja itoe tentoe tida djadi linjap lantaran moerkanja siloeman."

„Dia kata begitoe?“

„Ja.“

„Wah, tjilaka!“

„Maka menoeroet pikirankoe, baek kita lari sadja sekarang, soepaja Siangkong tida oesah mendapet maloe lebi besar. Hoangwe laki istri sekarang lagi berada didalen sedeng tangisi anaknja, maka baek kita merat dan tida oesah katemoeken lagi padanja. Bagitoe ada lebi baek, boekan?“

Kwe Keng rasa bitjaranja itoe pengikoet ada bener, maka sigra djoega ia njataken moefakat dan prenta itoe pengikoet lekas ambil boentelannja, soepaja boleh lantas lari.

Selang bebrapa saat iaorang soeda kaloear dari roemanja Tjian Hoangwe.

Marika itoe djalan seperti dioeber setan, dan djalannja itoe baroe djadi sedikit pelalanan, sasoedanja berlaloe djaoe djoega.

Di sapandjang djalan itoe Kwe Keng berpikir dan merasa amat menjesel, mengapa ia berlakoe begitoe gegaba, sedeng sendiri tida mempoenja kapandean dalem itoe hal.

„Ah, beroentoeng djoega akoe tida mati,“ kata ia dengen soeara pelahan: „soenggoe akoe tida doega, kaloe itoe siloeman bisa mendjadi moerka.“

Sasoedanja berlaloe djaoe djoega dan sampe di satoe kali ketjil, Kwe Keng laloe brenti boeat ilangi tjape. Di sini ia boeka pakeannja dan tjoetji itoe badjoe jang dara dowangan, kamoedian djemoer di atas roempoet.

Sembari menoenggoeken badjoenja kering, Kwe Keng beromong-omong pada pengikoetnja dan menanjaken lebi djaoe dari apa jang si pengikoet belon tjerita tentang itoe kadjadian.

Itoe pengikoet laloe toetoerken lebi djaoe satoe persatoe, bagimana boedjang-boedjang semoea merasa heran meliat Kwe Keng poenja kalakoean waktoe memoekoel-moekoel kepala dengen hatoe.

„Soenggoe, orang semoea kira kaoe lagi tjhio-tang,“ kata itoe pengikoet sabagi penoetoepnja ia poenia penoetoeran: „sebab kira begitoe memang biasanja kaloe orang maoe tangkep siloeman.“

„Ah, akoe tida doega kaloe itoe siloeman ada begitoe djahat,“ kata Kwe Keng dengen merasa djenga. Tapi maski soeda rasaken maloe dan sakit dari kasombongannja, toch itoe adat ia belon djoega bisa roba, hanja lantas bilang: doeloe-doeloean memang ia biasa tangkep siloeman, dan laen-laen poela obrol jang meninggiken diri.

„Tapi biar bagimana djoega,“ kata si pengikoet „toch perboeatanmoe itoe haroes dibilang sala, kerna salaennja itoe siloeman tida dapet ditangkep, itoe Hoangwe poenja anak djadi linjap. Dan laen dari begitoe, sekarang kita djadi kalaparan. Tjoba seandenja Siangkong tida tjoba menoeloeng, tentoe ini pagi kita berangkat pada sasoedanja disoegoeken barang daharan.“

„Ja, sekarang apa maoe kata,“ djawab Kwe Keng sambil mengelah napas: „tapi, eh,... sadari berangkat akoe belon tanja kaoe poenja nama, dan siapatah namamoe?“

„Akoe bernama Nge-kho, ada toeroenan jang katiga dari familie Ong.“

„Djadi namamoe Ong Ngo-kho?“

„Bener“

„Tapi perkara apa jang membikin kaoe dihoekoem?“

„Oh, kaloe moesti toetoerken itoe semoea soenggoe ada terlaloe pandjang.“

„Tapi masa kenapa?“

„Baeklah kaloe Siangkong maoe denger djoega.“

Kamoedian si pengikoet itoe lantas moelai menoetoer. la kata: doeloe ia tinggal di kota Tintjoe, sadari engkongnja, sampe pada toeroen ajalinja, semoea ada djadi orang-orang dagang. Demikianlah pada taon jang laloe, bersama ajahnja Ngo-kho pergi ka Hopak aken berniaga, tapi tida lama di itoe tempat ajahnja meninggal doenia hingga ia moesti bekerdja sendiri boeat mengoeroes dagangan.

Tapi, sebab oesiauja ada amat moeda dan oewang ada banjak, maka di Hopak ia ada mempoenjai bebrapa kawanan bangsa pemoloran, jang satiap hari adjak pergi ka roema-roema plesiran, berdjoedi dan sabaginja, hingga dalem bebrapa boelan sadja, dagangannja jang memang tida besar, djadi abis dipake begitoe sadja.

Boeat berdagang lebi djaoe soeda tida ada poenja modal, sedeng maoe bekerdja, di sana sini tida ada jang maoe pake, dan achirnja ia telah bikin oetang pada sala satoe langganan ajahnja, dengen perdjandjian: jang oewang itoe aken dibajar dengen barang-barang.

Temponja pembajaran itoe ada pendek. Dan satelah hari boelan jang ditetepken itoe sampe dan barang jang didjandjiken belon dimasoeki, itoe langganan laloe mendakwa, jang achirnja lantaran ditoedoeh lakoeken penipoehan, maka pengadilan telah djatoken hoekoeman tiga taon boewang ka laen tempat.

Dalem pehoekoeman ia ada bekerdja baek. Pembesar jang berkoeasa padanja tida berlakoe terlaloe bengis, begitoelah lantaran merasa kasian, maka waktoe Kwe Keng minta satoe koeli, itoe pembesar dari orang-orang hoekoeman telah kirim ia boeat penganter, jang sekarang hoekoeman itoe soeda didjalanken sataon lebi.

„Demikianlah adanja akoe poenja hal,“ kata Ngo-kho kamoedian.

„Ja, kaloe begitoe pantes,“ kata Kwe Keng: „akoe poen liat kaoe poenja moeka boekannja seperti moeka pendjahat.“

Lebi djaoe Kwe Keng kata, beroentoeng sekali jang Ngo-kho telah katemos padanja, kerna dengen djadi ia poenja pengikoet, salaennja troesa djalanken pakerdjahan seperti orang hoekoeman, djoega, kaloe ia beroentoeng dapet pakerdjahan jang baek, ia tida nanti loepa boeat toeloeng padanja, asal sadja Ngo-kho bekerdja baek dan satia.

Ong Ngo-kho oetjapken trima kasi boeat itoe perdjandjian bagoes.

Koetika itoe badjoe jang didjemoer soeda kering, kombali doea orang ini berangkat djalan menoedjoe ka kota Kiankong.

Waktoe lohor baroelah iaorang katemoe satoe waroeng, dimana marika laloe masoek dan minta nasi, kerna sadari pagi memang kadoeanja ini belon dahar, maka peroetnja djadi lapar sekali, hingga nasi jang disoegoeken bersama sajoer kangkoeng, marika itoe hantem bersi dengen amat bernapsoe.

Esoknja pagi-pagi iaorang berdjalan kombali Tapi di sapandjang djalan jang ka depanin itoe; tida ada perkara-perkara penting boeat ditoetoerken, maka sasoedanja berlaloe lima hari, di waktoe lohor marika telah sampe di bilangan kota Tian-tiangkoan, dan dari sitoe boeat pergi ka kota Kiankong soeda tida sabrapa djaoe lagi

„Dalem ini bebrapa hari jang blakangan, hawanja teramat panas, dan kita poen soeda berdjalan dengen tida brenti-brentinja,“ kata Kwe Keng: „hingga kaki rasanja ampir maoe pata, dan sekarang baeklah kita brenti sadja doeloe di ini doesoen, boeat tanja pada orang, masi brapa djaoe lagi ka kota Kiankong.“

Ngoklio manggoetken kapalanja menjataken satoedjoe, kerna ini pengikoet poen memang soeda amat tjape.

Di ini tempat jang baroe disampeken, Kwe Keng liat ada kira-kira berdiri tigapoeloe roema, jang pendoedoeknja masing-masing ada memperoesahaken pakerdjahan tani. Dengen pengoendjoekannja satoe anak ketjil, Ngo-kho bersama Kwe Keng pergi ka satoe waroeng. Tapi hatinja djadi amat heran, waktoe meliat itoe roema jang si katjoeng tadi kataken waroeng nasi jang ada trima djoega boeat tetamoe-tetamoe dateng menginep.

„Masatah ini roema penginepan?“ kata Kwe Keng sambil memandang pada pengikoetnja: „brangkali itoe katjoeng soeda ngebohong, apa tida?“

Tapi toch tida ada lantarannja boeat ia mendjoesta,“ saoet Ngo-kho: „baeklah kita tjoba menghamperi dan tanja jang poenja roema.“

Sigra djoega Kwe Keng soeda memanggil-manggil dari loear. Tida lama dari dalem kaloear saorang toea, jang kapalanja ada diboengkoes dengen tjoekin, parasnja poetjet dan sedakepi tangan.

Dari pertanjalian-pertanjahannja Ong Ngo-kho orang toea itoe bilang: betoel ia ada ngewaroeng dan trima djoega tetamoe-tetamoe jang dateng bermalem. Tapi ini hari, lantaran dapet sakit, maka ia tida bikin barang-barang hidangan.

„Kaloe mane nginep, boleh,“ kata poela orang jang poenja roema itoe: „makan poen boleh, tapi moesti masak sendiri, kerna akoe lagi mariang dan tida bisa sadiaken barang hidangan, sedeng anakkoe jang biasa membantoein mengoeroes, lagi tida ada di roema.“

Lantaran tida ada poela laen waroeng, terpaksa Kwe Keng bersama pengikoetnja mampir djoega di itoe tempat, kerna boeat berdjalan lebi djaoe, kakinja soeda tjape. Toean roema silaken masoek ka dalem, di mana ada kaliatan satoe tetamoe jang djoega lagi atoer barang hidangan. Dan sajoer jang dimasak oleh itoe tetamoe laen, ada berbaoe begitoe sedep, hingga membikin Kwe Keng dan pengikoetnja djadi lapar.

Tida lama itoe orang toea kaloear kombali sambil membawa satenga batok beras sama saiket koetjai, dan oendjoeki pada Ngo-kho dapoer tempat masak. Sahabisnja kata begitoe si toea itoe masoek kombali dalem kamar sambil menggetget-getget kadinginan.

Ngo kho jang di pendjara biasa bekerdja masak dan menjapoe, bisa djoega matengin ini beras dan koetjai boeat mengisi peroet, sedeng, Kwe Keng tinggal rebah di pembaringan sembari toenggoein nasi jang lagi dimasak.

Tida selang lama si pengikoet dateng membri taoe, bahoewa nasi dan sajoer soeda mateng.

Marika itoe laloe, doedoek bersantap.

„He, apa ini?“ tanja Kwe Keng sembari toendjoek samangkok daging ajam jang dimasak tjauw: „dari......“

„Ssst!“ kata Ngo-kho dengen soeara pelahan sambil kedipken mata.

Kwe Keng berdiam, tapi hati merasa heran dan girang djoega.

Kadoeanja itoe laloe bersantap dengen amat bernapsoe. Masing-masing sendok nasi maen penoe-penoehan, jang satoe tida kala pada jang laen. Sedeng Kwe Keng poenja rasa heran masi belon linjap, kerna tida abis mengarti, dari mana ini pengikoet dapet ajam masak tjauw, sedeng tadi apa jang ia liat itoe orang toea kasiken, tjoema sajoer koetjai sadja.

Sabelonnja abisan dahar, di laen roewangan kadengeran itoe tetamoe jang tadi riboet kailangan sajoer.

„He, siapatah telah ambil akoe poenja samangkok ajam masak tjauw?“ kata itoe tetamoe dengen soeara keras: siapa soeda masoek ka akoe poenja kamar?“

Itoe perkataan-perkatahan jang kadengeran, Kwe Keng lantas mengarti, bahoewa Ngo-kho soeda tjoeri itoe makanan, dan pantes djoega, waktoe ia maoe tanja, itoe pengikoet membri tanda aken ia berdiam.

Itoe tetamoe jang kailangan ajam masak tjauw masi tinggal riboet achirnja djalan ka loear, di mana kamarnja Kwe Keng moesti diliwatin. Tapi sebab kamar itoe tjoema satoe roewangan jang tida terdingding atawa terpedeng, maka apa ada di sitoe orang bisa dapet liat. Begitoe si tetamoe telah liat djoega toelang-toelangnja ajam di atas medja dan batoe.

Si tetamoe djadi bertjekat dan lantas melongok ka dalem itoe mangkok, dimana ia dapet liat koewanja dan lantas kenalin. bahoewa itoelalı ada masakannja.

„Ah bangsat, soenggoe koerang adjar sekali, kaloe begitoe kaoe soeda makan akoe poenja barang,“ kata itoe tetamoe sambil menoeding.

„He, orang apatah kaoe ini, beg toe koerang adjar brani menoedoe dengen memboeta?“ membentak Kwe Keng. Ngo-kho djoega bangoen berdiri dan memaki, seperti djoega orang jang sasoenggoenja tida bersala.

Itoe tetamoe jang memang ada kenalin mangkoknja, dan djoega masakannja, masatah maoe soeda dengen begitoe sadja, satelah toedoehannja itue dibanta, ia djadi amat goesar dan lantas memaki terlebi keras, hingga dalem tempo sabentaran sadja, dalem itoe waroeng telah penoeh dengen orang, jang maoe liat ada terdjadi perkara apa.

Itoe orang toea jang lagi terserang demem poen djadi ka loear kombali.

„Ada perkara apatah jang membikin kaoe djadi riboet?“ tanja itoe orang jang poenja waroeng.

„Kaoe poenja doea tetamoe jang baroe dateng ini ada bangsat-bangsat, kaoe taoe?“ kata itoe orang sambil menoed ng pada Kwe Keng dan Ngo-kho: „marika telah tjoeri akoe poenja ajam masak tjauw dan gegares itoe dengen enak, dengen tida sekali merasa maloe. Soenggoe akoe baroe mendapet orang jang begini matjem!“

Kwe Keng laloe tjoba membanta, bilang itoe ajam ia telah beli di djalanan, hal ini ditetepken djoega oleh Ngo-kho, jang bilang memang betoel ini ajam kapoenjahannja sendiri, dan bagimana orang brani toedoe begitoe.“

„Dia djoesta! dia djoesta!“ saoet orang jang poenja itoe: „kaloe betoel kaoe ada beli ajam di djalanan, nah oendjoekilah akoe boeloenja, di mana kaoe soeda tjaboet dan potong itoe?“

„Akoe soeda potong ini di kali, dan boeloenja djoega akoe soeda tjaboet dan boewang di soengei,“ begitoe Ngo-kho tjepetin menjaoet, pada sabelonnja Kwe Keng bisa membri djawaban: „apa kaoe kira akoe poenja Siangkong tida mampoe beli saekor ajam?, dan kaoe kenalin siapa adanja akoe poenja Siangkong?“

„Akoe ini moerid dari Liem Tjindjin, kata Kwe Keng dengen tjepet, sambil menoendjoek pada diri sendiri dengen lakoe jang amat sombong, kerna kira, dengen seboet namanja itoe Koksoe, orang nanti djadi takoet: „kaoe taoe siapa adanja itoe Liem Tjin-djin, jaitoe Keizer jang sekarang bertachta di karadjahan Song ampoenja Koksoe sedeng akoe ini ada moeridnja?“

„Dia djoesta! dia djoesta!" kata poela sorang laen: „djoega akoe tida perloe taoe siapa adanja kaoe. Tapi akoe tjoema maoe bilang, jang katerangan itoe tida bisa dipertjaja, kerna tida boleh djadi kaoe soeda potong itoe ajam di kali. Atawa lebi betoel dibilang bahoewa ajam itoe memang ada kapoenjahankoe jang kaoe telah tjoeri, bangsat!„

„Apa, tida boleh djadi?„ saoet Ngo-Kho, jang memang ada pande bitjara dan lantas kasi taoe apa sebabnja itoe ajam ia telah potong di soengei Sebab itoe adalah begini: kerna itoe ajam salaloe maoe terbang sadja, dan ampir-ampir djadi terlepas, maka ia soeda djadi djengkel dan lantas potong di waktoe mandi! kerna ini ajam jang dibeli poen memang ada boeat dimakan, maka mengapatah ia tiada boleh potong.

„Selaennja dibawa tida djadi seraka, djoega sasoedanja dipotong, akoe troesa koeatir nanti djadi terlepas,” kata poela itoe pengikoet: „apa poela di waktoe mandi, akoe liat aer soengei ada begioe bening, hingga gampang dibersiken isih peroetnja. maka djoega sasampenja di sini, ajam itoe soeda tida boeloenja, kerna soeda sadia tinggal dimasak sadja.”

Kwe Keng djadi girang denger pengikoetnja poenja kapandean bitjara. Tapi itoe tetamoe tida djoega maoe mengarti, laloe tanja: mana kakinja, mana kapalanja, dan laen-laen bagian anggotanja. Tapi Ngo-Kho jang pande bitjara, kata: itoe sabagain soeda masak lebi doeloe di laen tempat pembrentian, dan apa jang ada sekarang tjoema satinggalnja sadja.

„Oh, ini orang bangsat besar jang pande bitjara dan bisa omong poeter balik,” kata saorang laen: „liatlah moekanja ada tanda hoeroef ”Djat”, itoe ada menjataken dirinja ada satoe perantean atawa orang hoekoeman jang minggat.”

„Benerlah! benerlah!” kata jang laen-laen dengen soeara riboet.

Adoeken sadja pada politie ledi baek, dari pada kita-orang bereboet omong padanja,” kata temennja itoe tetamoe jang ajamnja tertjoeri. Itoe perkatan jang paling blakang, Ngo-Kho tida bisa banta, kerna memang djoega di moekanja ada tanda tjap dari besi panas, sabagi mana biasanja orang-orang jang dapet hoekoeman bilang taon, moekanja ditjap dengen hoeroef Djat”. dan begitoe djoega itoe tanda jang tida bisa ilang, ada di moekanja.

Sabelonnja orang jang mampoenjai ajam madjoeken dakwahan, koenjoeng-koenjoeng dari rombongan orang banjak jang lagi menonton, laloe dateng saorang moeda jang berkalakoean sopan dan boedi bahasa manis, laloe menanja, perkara apatah jang membikin riboet sampe begini.

Sasoedanja denger apa jang orang kasi taoe, itoe orang moeda laloe kaloearken oewang dan briken itoe pada orang jang poenja ajam, dengen perkatahan manis ia minta soepaja ini perkara dibikin abis sadja.

„Akoe harep ini perkara ketjil tida ditarik pandjang,” kata ia lebi djaoe: „kerna ini doea tetamoe ada orang dari laen tempat, maka kaloe ini perkara moesti tertoentoet, boekantah djadi menjoesaken djoega dirinja?”

Itoe orang trima penggantiannja itoe orang moeda, dan begitoelah perkara lantas djadi beres, hingga Kwe Keng dan Ngo-Kho tida oesah berkenalan pada politie di itoe tempat.

Kwe Keng liat orang itoe poenja kamoerahan hati, ia lantas oetjapken trima kasi dan kamoedian menanja: siapatah adanja sobat ini poenja nama.

„Bolehtah akoe dapet taoe siapa adanja sianseng poenja nama jang terhormat?” menanja Kwe Keng dengen membongkokki badan: „apatah sianseng pendoedoek di ini tempat, tapi kaloe tida sala, kaliatannja seperti orang pelantjongan djoega, boekan?”

„Bener,” saoet itoe orang: „akoe jang renda ini bernama len Boen-ho, jang maoe pergi ka kota Kiankong, pada sala satoe sobatkoe di sana.”

„Oh, kaloe begitoe, sianseng maoe pergi ka itoe kota?” kata Kwe Keng dengen girang: „ja, akoe djoega hendak pergi ka itoe tempat, tapi lantaran terlaloe tjape, maka soeda brenti di sini sabelonnja hari mendjadi sore. — Kaloe begitoe, apa tida baek kaloe besok kita-orang berdjalan sadja sama-sama?"

„Dengen senang hati," saoet orang itoe sambil memanggoet.

„Apatah sianseng taoe, masi brapa djaoe pernahınja kota Kiankong dari ini tempat?“

„Dari sini soeda tida brapa djaoe lagi, hanja tjoema melintasi satoe kali sadja.“

„Oh, kaloe begitoe soeda tida brapa djaoelagi? Itoelah ada baek sekali."

„Bolehtah akoe menanja, sianseng hendak koendjoengi siapa di itoe kota?“

„Ja, tentoe sekali," saoet Kwe Keng sambil bersenjoem, jang kamoedian lantas tjeritaken, bahoewa datengnja ka Kiankong ada dioendang oleh poetranja pembesar di itoe tempat.

Kendati len Boen-ho tida tanja, apa perloenja Swan-wie mengoendang Kwe Keng,toch ini orang sombong dan biasa meninggiken diri, laloe kasi taoe bahoewa ia dioendang, kerna poetranja itoe pembesar hendak bergoeroe dalem berbagi-bagi ilmoe. Lebi djaoe Kwe Keng itoe kata: ia ada moeridnja Liem Tjindin, jang sekarang ada mendjadi Sri Baginda ampoenja Koksoe, dan aen-laen poela obrolan kosong, jang maksoednja sakedar soepaja orang boleh pandang ia tinggi.

Kaloe diliat begitoe, bener-bener Kwe Keng ini boekan sadja orang jang tida taoe maloe, tapi djoega tida kenal mampoes!

Tjoba kaloe laen orang, jang maski bagimana sombong djoega, tentoe soeda djadi kapok dan tatobatan lantaran berkali-kali telah rasaken boeanja ia poenja obrolan. Jang pertama soeda dapet maloe 'di hadepan orang banjak, waktoe mengadoe ilmoe pada Oan Swie. Kadoea, djoega lantaran mengagoengken kapandean dan waktoe ikoet bawa balalentara, ampir ia mampoes di tangannja Lie Eng. Katiga, djoega lantaran itoe kasombongan dan mengakoe ada mempoenjai kasaktian, boekan sadja dapet maloe, malah djiwanja poen ampir linjap di roemanja Tjian Hoangwe.

Tapi Kwe Keng roepanja soeda tida inget itoe semoea, maka sekarang lagi-lagi ia kaloearken itoe pengomongan-pengomongan djoesta dan ka Jakoear tjongkak.

Tapi len Boen-ho tida begitoe tanggap, hanja dengeri sadja apa jang dibilang, tapi tida memoedji atawa menanjaken halnja ilmoe-ilmoe, maka achirnja terpaksa Kwe Keng jang soeda djadi katjapean ngobrol, djadi brenti sendirinja, pada sabelon hari mendjadi malem. Tjoba kaloe laen orang, jang djoega soeka ngomong dan maoe tanjaken ini itoe lebi djaoe, atawa ada pertjaja apa jang dibilang olelinja, tentoelah ia poenja ngebrahoel ada lebi besar lagi.”

Satoe malem telah berlaloe.

Esoknja pagi-pagi len Boen-ho soeda bangoen, sedeng Kwe Keng bersama pengikoetnja poen, pada sasoedanja membajar oewang menginep dan beres jang dibriken kamaren sore, laloe berangkat djalan sambil beromong-omong.

Sasampenja di pinggir kali katiga orang itoe laloe menjebrang dengen praoe, dan waktoe naek ka darat, iaorang telah berada dalam bilangan kota Kiankong.

Ini kota maski tida besar, tapi toch ada rame. Banjak sekali pemandangan jang indah-indah, orang dagang poen ada banjak, djoega kaliatan roema-roema berhala jang dirawat bagoes dan netjis.

Kwe Keng laloe hamperi satoe gredja, dan pada pengoeroesnja ia kenalken diri dengen berbagi-bagi obrol, hingga si pengoeroes jang tida taoe, dan kira apa jang dibilang itoe bener adanja, lantas sadiaken barang makanan dan oendang Kwe Keng bersama kawannja doedoek bersantap.

Boen-ho djoega toeroet bersama-sama.

Sahabisnja santap Kwe Keng laloe kaloearken sedikit perak antjoer dan kasiken itoe pada Ong-Ngo-Kho boeat goena membeli pakean, sebab pakean jang sekarang ada di badsnnja itoe pengikoet, terialoe djelek, hingga ia rasa pantes boeat diadjak ketemoeken Ong Swan-wie jang hendak dikoendjoengken.

Ngo-kho trima itoe, lantas berlaloe. len Boen-ho djoega itoe siang djalan-djalan sakalian serep-serepin roema sobatnja jang maoe di koedjoengi. Sasoedanja dapet keterangan, ia balik kombali ka itoe gredja, tempat di mana Kwe Keng ada menoenggoe.

Tida selang lama Ngo-kho telah komabli dengen membawa satoe stel pakean dan oendjoekki itoe pada si kaparat jang djadi pemadjikan,

„Ja, itoe poen bagoes djoega,“ kata Kwe Keng: besok pagi kaoe boleh pake ini pakean baroe." Ngo-kho manggoetken kapalanja dan lantas berlaloe.

Sorenja dari itoe hari, kombali si pengoeroes gredja sadiaken barang hidangan dan oendang tiga orang itoe doedoek dahar. Di waktoe santap Kwe Keng tida bitjara banjak, kerna taoe jang omongannja itoe tida ditanggap oleh len Boen-ho, sedeng pada itoe pengoeroes jang boleh diobrolken, tida ada toeroet doedoek sama-sama.

Sahabisnja sautap Ngo-kho lantas betoelin tempat tidoer jang itoe pengoeroes gredja oendjoeki boeat djadi kamarnja bertiga Sasoedanja sadijaken djoega tekoan dan tjangkir-tjangkir, pengikoet itoe kaloear kombali.

Itoe sore iaorang tida bitjara banjak. Sasoedanja minoem bebrapa tjangkir thee, Kwe Keng berdoewa Boen-ho tidoer di satoe randjang, sedeng Ngo-Kho di papan jang terales tiker kasar.

Esoknja pagi ini tiga orang hatoerken trima kasi pada pengoeroes dari itoe gredja, jang soeda briken tempat menginep dan makan pertjoema.

Kamoedian Boen-ho membri slamat berpisa pada Kwe Keng, jang sekarang ada menoedjoe ka roemanja Ong Tiauw-ien.

Tida lama kamoedian, sigra djoega iaorang telah sampe ka itoe tempat jang dikoendjoengi, dan pada pengawal pintoe Kwe Keng serahken satoe kaartjis nama bersama soeratnja Tio Liangsih. jang memoedjikem dirinja.

Ong Tiauw-ien tatkala itoe djoestroe lagi herada di roema, satelah itoe pengawal serahken soerat bersama tjap, ia laloe batja lebi doeloe itoe kaartjis nama, jang ia tida sekali merasa kenal

„Kwe Keng?, siapatah Kwe Keng?” berkata Tiauw-ien dengen soeara menggerendang.

Kamoedian ia boeka itoe socrat, jang boenjinja sebagimana pembatja telah taoe. Dan sahabisnja membatja itoe ia djadi girang dan lantas silaken Kwe Keng itoe dateng mengadep.

Tiauw-ien sendiri laloe kaloear menjamboet kamoedian, sasoedanja mendjalanken peradatan dan kahormatan sabagimana biasanja toean roema menjamboet tetamoe, ia prenta orang sadiaken thee di itoe roewangan.

Pada boedjangnja ia prenta sadiaken makanan, boeat oendang Kwe Keng makan minoem dan membri slamat atas kadatengannja.

„Soeda lama akoe ada denger Siansoe poenja nama sabagi orang berilmoe,” kata Ong Tiauw-ien: „soenggoe akoe merasa beroentoeng sekali, jang dari tempat begitoe djaoe siansoe bisa sampe di sini”

„Swanie poenja nama jang moelia dan arif bidjaksana poen ada membikin akoe djadi kenang kenangan, begitoe Kwe Keng bales memoedji; „njatalah itoe poedjian jang orang sering oetjapken, bener adanja. Soenggoe tida sala kaloe orang bilang: ada lebi beroentoeng katemoeken oranguja, dari pada denger sadja namanja.”

Ong Tiauw-ien merasa girang denger dirinja dipoedji saorang moelia dan arif bidjaksana, maka sembari silaken tetamoenja mtnoem thee, ia berkata lagi:

„Dalem ini soerat Gisoe Tio Liang-sih ada memoedjiken Siansoe poenja kapandean jang tinggi, dan akoe harep, sasoędanja ada di sini Siansoe soeka toeroenken roepa-roepa peladjaran jang bergoena bagi saorang moeda seperti akoe, jang memang ada beraoes sekali pada peladjaran.”

„Sabetoelnja akoe sendiri tida ada mempoenjai kapandean begitoe tinggi,” kata Kwe Keng dengen soeara merenda, — tapi toch dengen sobenernja ia tida ada mempoenjai soeatoe kamanpoean, aen dari tingka jang sombong dan tjongkak tapi dengen omong merenda begitoe, ada seperti djoega jang dirinja bener-bener saorang berilmoe: „tapi boeat Swanie poenja boedi katjintahan jang begitoe besar dan manis, jang telah menerima kadatengankoe begini hormat, tentoe sadja sagala apa jang ada dalem dirikoe, akoe nanti kaloearken,„ (Apa jang ada dalem dirinja Kwe Keng, oesoes besar jang berisi ampas makanan, dan itoe brangkali jang maoe dikaloearken?, kaloe benar demikian, lebi doeloe orang moesti tekap idoeng. Letter Zetter).

Begitoelah sambil minoem thee masing-masing kaloearken roepa-roepa omongan merenda, kamoedian ditanjaken hal ini atawa itoe, jang tida lama kamoedian, satoe boedak dateng membri taoe, bahoewa barang makanan telah sadia.

Tiauw-ien laloe oendang tetamoe itoe doedoek berdjamoe.

Meliat kelakoean dan bitjaranja toean roema jang begitoe menghormat, Kwe Keng memoedji dalem hati sendiri, jang Ong Tiauw-ien sasoeng goenja ada saorang moeda jang manis, bener sabagiman katanja Liang-sih dalem ia poenja poedjian.

“Oh, kaloe ini orang moeda bisa djadi akoe poenja Tjoekong, soenggoe beroentoenglah dirikoe ini,„

Sigra djoega kadoeanja itoe telah doedoek hadepi medja. Sembari minoem, kombali liauw-ien menanjaken roepa-roepa hal, sampe pada prihalnja Tio Liang-sih dan bagimana Liang-sih telah beroleh itoe pangkat Gisoe dengen masoep she Tio.

Kwe Keng lantas tjeritaken satoe persatoe, tapi sabagimana kabiasahannja, kombali ia kata: semoea pangkat jang didapet oleh Liang-sih dan anoegrahan dari Sri baginda, ada dari pertoeloengannja. Tjeritaken djoega bagimana sakean lama Tio Liang-sil ada ambil peladjaran padanja, dan boeanja itoe peladjaran adalah pangkat Gisoe jang sekarang itoe pembesar beroleh

Itoe omongan kosong Kwe Keng karang begitoe roepa, hingga maoe atawa tida, terpaksa Ong Tiauw-ien djadi pertjaja, Hingga hatinja ini orang moeda djadi girang, kerna anggap Kwe Keng bener-bener ada saorang berilmoe tinggi.

„Akoe harep Siansoe nanti soeka toeroenken seantero peladjarannja padakoe dengen soenggoe hati,“ kata Tianw-ien: „dan moelai dari tni hari, akoe angkat kaoe djadi goeroe dan jakini sagala peladjaran jang ditoeroesken pada dirikoe.“

„Oh, itoelah tentoe sekali,“ kata Kwe Keng: maski djoega tida diminta, akoe tentoe nanti toeroenin seanteronja, sabagimana tadi akoe telah bilang.“

„Trima kasi boeat Siansoe poenja katjintahan, kata Tiauw-ien sambil membri hormat sabagimana biasanja satoe moerid jang mengangkat goeroe. Dan ini kahormatan laloe dibales oleh Kwe Keng, jang berkata:

„Ah, boeat apatah Swanie djalanken itoe kahormatan, hingga membikin itoe boedi djadi lebi berat boeat akoe sanggoep pikoel,“

Sahabisnja makan minoem, Tiauw-ien kata: sekarang lebi baek tinggal sadja di sini. Kamoedian prenta satoe boedak boeat bersiken itoe gedong ketjil jang berada di taman boenga, sedeng laen boedak diprenta ikoet Kwe Keng pergi ka gredja boeat ambil barang-barangnja, aken dipindaken ka mari.

Bermoela Kwe Keng menampik, ia kata: ia sendiri poen ada poenja pengikoet jang boleh diprenta membawa itoe, djadi boeat apatah bikin soesa boedaknja toean roema. Tapi sabenernja, ia sendiri merasa maloe, lantaran tida ada poenja banjak pakean jang moesti dibawaken oleh itoe boedak.

Sigra djoega Kwe Keng itoe telah berlaloe dan pergi ka gredja tempat semalem ia mengnep.

Satelah sampe, ia dapet liat Boen-ho jang tadi kaloear bersama-sama, soeda berada kombali dalem itoe bio. Maka ia lantas menanja, bagiman dengen itoe sobat jang ditjari.

"Ah, tida beroentoeng,„ kata Boen-ho dengen mengelah napas: „dari tempat djaoe akoe dateng, tapi, itoe sobat jang ditjari roepanja soeda pinda ka laen tempat, hingga ditjari di sana sini, tida djoega dikatemoeken. Tapi bagimanatah dengen sianseng, beroentoengkah?“

„Ja, akoe soeda katemoe pada Ong Swanie,“ kata Kwe Keng dengen roepa girang dan bangga: „poetranja Ong Loya itoe betoel ada saorang moeda jang beradat aloes, berkalakoean sopan dan berboedi bahasa manis, kerna maski poen baroe katemoe, ia soeda oendang akoe makan minoem dan menanjaken banjak hal, sabagi satoe sobat lama jang baroe bertemoe“

Boeat membikin dirinja kaliatan lebi mentereng, Kwe Keng kata, itoe Ong Tiauw-ien ada menghargaken betoel orang-orang jang pande, dimana dirinja telah diangkat djadi Swanie itoe poenja goeroe, Dan sekarang ia disoeroe tinggal dalem satoe gedong moengil di taman boenga, soepaja sembarang waktoe bisa membri peladjaran-peladjaran jang bergoena.

Dan laen-laen poela obrol jang maksoednja tida laen dari pada boeat mengagoengken diri sadja.

„Njatalah sianseng ada lebi beroentoeng dari akoe,„ kata len Boen-ho sambil mengelah napas: „den boeat itoe kaberoentoengan, panteslah akoe hatoerken slamat, dengen harep djoega jang dalem sedikit tempo aken beroleh pahala apa-apa.”

„Akoe hatoerken trima kasi boeat kaoe poenja poedjian,„ kata Kwe Keng dengen girang.

„Tapi mengapa kaoe balik lagi ka mari?“ tanja Boen-ho.

Sebab akoe maoe ambil barang-barangkoe dan adjak djoega akoe poenja pengikoet.“

Boen-ho tida menjaoet lagi, hanja tinggal toendoeki kapala dengen tarik napas seperti orang jang menanggoeng doeka.

Tida lama Ong Ngo-kho soeda bawa itoe boenkoesan badjoe dau berdiri di samping, aken menoenggoe itoe madjikan jang lagi mengomong.

Melijat keadahannja Boen-ho, Kwe Keng inget djoega bagimana ini orang moeda soeda menoeloeng padanja di roema menginep. Tjoba kaloe itoe waktoe tida ada dia, jang lantas damiken dan bajarin harganja itoe ajam jang Ngo-kho tjoeri, tentoe dirinja soeda diserahken pada politie, dan maski belon tentoe dihoekoem, tapi tjape hati dan boewang tempo, itoelah lebi doeloe soeda bisa didoega.

Lantaran menginget begitoe, maka ia merasa kasian djoega pada Boen-ho. Koenjoeng-koenjoeng satoe pikiran lantas timboel dalem hatinja, hendak angkat Boen-ho djadi moerid dan adjak tinggal bersama-sama.

Apatah Kwe Keng poenja kapandean ada lebi tinggi dari Boen-ho, maka ia kapingin diri diangkat mendjadi goeroenja itoe orang. moeda? Tapi kaloe diliat dandanan, kalakoean dan gerak gerakannja, kepandeannja itoe orang moeda tida kala pada si toekang ngobrol.

„Kaloe akoe bisa boedjoek padanja mendjadi moerid,“ kata Kwe Keng dalem hati: „boekan sadja itoe kabaekan jang ia telah oendjoek di roema penginepan, djadi bisa terbajar, hanja padakoe poen ia djadi bebalik beroetang boedi. Laen dari begitoe, kaloe akoe ada mempoenjai doea moerid seperti Ong Tiauw-ien len Boen-ho dirikoe bisa terpandang lebi tinggi di matanja pendoedoek kota Kiankong.”

Sahabisnja berpikir ia berkata:

„Kaloe itoe sobat jang kaoe tjari tida ketemoe, apa tida lebi baek kaloe kaoe tinggal sadja bersama-sama akoe di itoe kebon blakang? Di sitoe akoe rasa ada lebi enak dari pada berdiam di ini gredja.”

„Trima kasi boeat kaoe poenja katjintahan dan tawaran, sianseng,„ kata Boen-ho: lagi pada itoe Ong Swanwie akoe belon pernah beladjar kenal, hingga maski kaoe sendiri soeka adjak, tapi belon tentoe ia maoe trima.”

„Oh, itoelah akoe tanggoeng,„ kata Kwe Keng: „sabagimana baroesan akoe telah bilang, Ong Swanwie itoe ada saorang moeda jang beradat-aloes, berkalakoean hormat dan soeka bergaoelan pada orang-orang berilmoe dan gaga, maka kaloe padakoe jang berilmoe ia maoe boeat goeroe, moestail amat ia tida soeka bertjampoeran pada kaoe, jang ada begini gaga perkasa?”

Boen-ho tida menjaoet, hanja tinggal toendoek sarajah berpikir.

„Akoe harep kaoe tida menampik, sobat, kata poela Kwe Keng.

Boen-ho masi tinggal berdiam. la tida maoe lantas trima tawarannja Kwe Keng, kerna dari itoe kariboetan di roema menginep, ia lantas bisa taoe Kwe Keng dan Ngo-klo ada orang bangsa apa. Tapi kaloe dari itoe tempat ia maoe toeroet berdjalan sama-sama sampe di sini, itoelah ada dari lantaran, sebab ia djoega memang maoe ka mari.

Itoe Ong Tiang-ien, soeda lama ia denger banjak ditjeritaken kabangorannja, sabagimana biasanja anak-anak moeda dari orang-orang jang berpangkat dan ada mendjadi kaoemnja dorna.

Jang soeka permaenken orang poenja anak perawan, istri-istri jang mempoejai soeami dan orang-orang prampoean baek², dengen mengandel sadja pada orang toeanja poenja kabesaran dan pengaroe. Inilah sebabnja jang membikin Boen-ho djadi merasa sangsi.

„Kaloe ditimbang betoel-betoel, memang tida moesti akoe tjampoerken diri pada Kwe Keng dan Ong Tiang-ien,“ kata Boen-ho dalem hati sendiri: „tapi keadahankoe jang sekarang, memaksa boeat akoe trima tawarannja. Kerna sobat jang akoe tiari itoe tida ada, hingga boeat samantara waktoe pada sabelonnja dapet tempat jang lebi baek boeat semboeniken diri, biarlah akoe merenda dan angkat ini orang kaparat mendjadi goeroe, maski kapandeannja padakoe. sabetoelnja belon tentoe akoe ada di sebla bawah.“

Sasoedanja tetep pikir begitoe, Boen-ho laloe oetjapken banjak trima kasi, dengen poera-poera girang ia kata: ia merasa beroentoeng betoel bisa mengangkat Kwe Keng sabagi goeroe. Dan ini omongan membikin si Kwe Keng djadi teramat girang, begitoelah bersama-sama Ngo-kho dan Jen Boen-ho, marika laloe pergi ka gedongnja Ong Swanie.

---