Pembalesannja Kawanan Liangsan/Bagian ka ampat/Bab 4
IV
Lantaran pertjaja pada ilmoe setan
Keizer Song Kiem-tjong
sampe kena tertahan.
—————
————
———
Tentang kakalahannja Tiauw Peng-tiong esoknja pagi soeda didenger oleh Tjiong Soe-touw jang tida bisa berboeat laen dari pada tarik napas dan berkata:
„Ha, kaloe ia toeroet akoe poenja maoe, ake toenggoe datengnja itoe doea laksa_balatentara jang dipimpin oleh soedarakoe, tentoelah ini hati tida dapet karoesakan jang begini roepa.”
Kerna itoe balatentara jang ditoenggoe, samp sekarang poen belon dateng, maka Tjiong Soe-touw masi tahan teroes soldadoenja, dengen tid sekali maoe kaloear boeat maloemken peran. Sedeng kabar dari halnja Tiauw Peng-tiong, tid ada.
Lie Pang-gian jang denger itoe kakalahan, lantas madjoe lagi pada Keizer boeat minta dibkin perdamian sadja, dengen roepa-roepa tjeri mantri ini memboedjoek, hingga Keizer jang memang amat lemah, djadi menoeroet sadja.
Soepaja tida sabentar-bentar niatnja itoe djoeng-djoengan djadi beroba, maka Lie Pang-gian madjoeken lagi voorstel, soepaja kabesarannja Lie Kong dan Tjiong Soe-touw lekas ditarik. Tapi sabelonnja Keizer bilang ini atawa itoe, satoe mantri jang bernama Soen Tjoan dan ada memegang pangkat Tjamtie Tjengsoe, laloe madjoe sambil berkata:
„Hamba bisa oendjoek saorang pande jang ada mempoenjai kasaktian gaib dan ilmoe Liok-kah-liok-toen-hoat, boeat dimadjoeken ka medan perang aken bertempoer pada moesoe, dan orang toe kaloe toeankoe satoedjoe boleh dioendang,“
„Siapatah adanja itoe orang sakti?“ tanja Keizer dengen pikiran bingoeng.
„Jaitoe ada bernama Kwe Keng,“ saoetnja itoe mantri.
Keizer dengen tida menanja lebi djaoe, laloe aloearken firman boeat oendang Kwe Keng dateng ka kota Radja.
Meliat hal-hal di atas, njatalah djajanja merk ay Song-tiauw soeda ampir djadi linjap. Kerna dekan sadja Keizernja ada begitoe bodo dan lemah tapi mantri-mantrinja poen ampir semoea la bangsa kaparat, jang salamanja madjoeken orstel jang boekan-boekan. Baek mantri jang besar atawa ketjil. Tjobalah liat apa matjemnja itoe Lie Panggian, jang salaloe bikin hatinja baginda djadi kalangkaboet dengen ia poenja andjoer-andjoeran boeat berdami. Dan sekarang kombali ada Soen Tjoan jang poedjiken Kwe Keng itoe orang jang tida mempoenjai satoe goena.
Apatah ini boekan ternjata, jang kaloe negri soeda apes, sagala mantri semoea tida karoeanan.
Tapi biarlah kita tida oesah bikin peroendingan apa-apa lebi djaoe, hanja salin sadja sabagimana adanja djalan tjerita.
Tentang Kwe Keng pembatja soeda kenal, maka tida perloe ditoetoerken lebi djaoe. Tapi perloe djoega diterangken, pada sasoedanja Liem Leng-souw jang mendjadi goeroenja mati, Kwe Keng lantas menoempang pada Ong Tiauw-ien, jaitoe poetranja Ong Hoe jang telah diboewang bersama-sama itoe anam mantri dorna.
Kerna Ong Hoe poenja djaja soeda abis dan binasa di perjalanan, maka Kwe Keng laloe menoempang pada Soen Tjoan, jaitoe orang jang baroesan poedjiken padanja.
Tida lama kamoedian Kwe Keng itoe telah mengadep di hadepan baginda, dimana Keizer laloe menanja, apa bener Kwe Keng ada mempoenjai itoe kasaktian gaib boeat moendoerken moesoe Kim. Dengen tida bersangsi lagi Kwe Keng laloe menjaoet sabagi orang jang bener-bener paham. Ia tjeritaken pandjang pendek, bagimana ia ada djajanken dan jakinken ilmoe To dan sabaginja, jaitoe obrol jang tida perloe aken ditoetoerken lebi djaoe. Tapi tjoekoep membikin baginda djadi girang.
„Ini semoea ada dari lantaran Thaytjouw dan Liattjong poenja moestadjeb,“ kata Keizer dengen hati girang: „maka di dalem negri ada kaloear orang loear biasa jang sabagi keng.“
Kwe Keng jang denger itoe poedjian, rasaken dirinja djadi lebi tinggi doea kaki dari sabagi mana biasanja. Maka dengen sanget mati-matian ia laloe minta baginda prenta orang diriken satoe panggoeng di tana kosong, dengen oendjoek djoega brapa besar dan bagimana matjemnja, dengen minta disadiaken barang apa apa boeat dipake, kerna ia hendak mengasi liat kapandean atawa kasaktiannja.
Baginda toeroet itoe permintahan dan laloe prenta satoe mantri laen diriken panggoeng terseboet.
Tida lama kamoedian panggoeng jang dipinta itoe telah rampoeng didiriken, maka Kwe Keng oendang baginda boeat menjaksiken.
Sasoedanja barang-barang sembajang tersadia dan oepatjara diadaken salengkapnja, dengen mamegang satoe pedang Kwe Keng laloe naek ka atas itoe panggoeng saraja kemoe aer dan riap-riapken ramboet, dan sebla tangannja mamegang pedang, sambil moeloetnja kemak-kemik seperti orang batja dowa.
Tida lama oepatjara sembajangan telah selesih dan Keizer balik ka kraton.
Dasar negri maoe tjilaka, maka dalem diwan karadjahan djadi sarangnja manoesia-manoesia temboehoek seperti matjem di atas. Begitoelah Kwe Keng liat baginda salaloe menoeroeti sadja kainginannja, maka hatinja djadi amat girang dan tida kasi liwat ini waktoe jang baek, dengen minta diadaken djoega gadis-gadis boeat mendjaga itoe sagala oepatjara, kerna katanja, begitoelah memang moestinja.
Keizer jang memang dasarnjia goblog, djoega toeroet ini permintahan, hingga Kwe Keng djadi teramat girang dan satiap malem ia bisa poewasken napsoenja jang seperti binatang alas, dengen zonder terhalang.
Itoe panggoeng tempat dimana Kwe Keng djalanken moeslihatnja boeat pedajaken Keizer, ada dirias amat bagoes. Prampoean eilok dan nona-nona tjantik tida ada poetoesnja, dengen disadiaken satoe kamar, jang menoeroet katanja boeat bernanti datengnja dewa.
Dalem diwan karadjahan tida ada mantri jang bidjaksana boeat menjega kalakoeannja sagala kaparat, hingga apa jang dilakoeken oleh Kwe Keng, dalem sedikit hari telah didengar djoega oleh Kan Lie-poet, jang djadi tertawa gelak-gelak dan kata:
„Ah, dasar Keizer goblog. Kaloe Lie Kong dan Tjiong Soe-touw jang akoe maloein soeda dipetjat, soenggoe boleh dibilang gampang sekali kita dapetken ini negri Song.“
Tida lama ini kapala perang Kim lantas geraken balatentara poekoel kota sakeras-kerasnja, hingga rahajat dan mantri besar dan ketjil djadi katakoetan. Tapi baginda jang memang ada taro kapertjajahan besar pada ilmoenja Kwe Keng, maski soeda dikasi taoe tentang penjerangannja moesoe, masi sadja bersenang-senang makan minoem bersama goendiknja.
Tapi selang brapa hari kamoedian, waktoe moesoe jang poekoel pintoe Tjinmoei begitoe seroeh, baroelah baginda prenta Kwe Keng bawa sadjoembla balatentara kaloear moendoerken moesoe. Dan ini manoesia kaparat, dengen amat mati-matian laloe kaloear dengen membawa sadjoembla laskar perang.
Barisannja Kwe Keng tida diatoer sabagimana moestinja, tapi toch soepaja djangan sampe maloe ia kaloear djoega dan baroe sadja bergebrak, pasoekannja djadi moesna seperti daon kering ditioep angin dan aparat itoe lari ka satoe djoeroesan dengen tinggalken pintoe kota jang terpentang.
Kan Lie-poet laloe madjoeken barisannja, jang dengen gampang moesoe bisa masoek ka dalem kota dengen tida ada halangan.
Begitoelah kota Pankeng terdjato di tangannja orang Kim.
Kan Lie-poet lantas kaloearken bebrapa atoerar jang perloe, tetepken hatinja rahajat negri dan kamoedian prenta orang kabarken pada Kiem-tjong beserta Thaysianghong, soepaja dateng boeat tetepken perdamian.
Waktoe mendenger warta kotanja soeda petja, baroelah Keizer djadi tersedar dan berkata:
„Ah, Tjaysiang Lie Pang-gian dan Soen Tjoan soeda bikin kapiran pada kami. Soenggoe menjesel jang bermoela kami tida toeroet bitjaranja Lie Kong dan Tjiong Soe-touw, tjoba kaloe kami toeroet, pasti tida kadjadian begini roepa.“
Kerna Kan Lie-poet minta dengen keras, maka Kim-tjong Hongte laloe kaloear dari astananja dan pergi ka tempatnja moesoe. Di sapandjang djalan ini Keizer ada katemoe banjak sastrawan, antara mana adalah Tan Tong jang pernah ingetin padanja, tapi nasehatnja itoe sastrawan tida ditoeroet,
Baginda roepanja maloe, maka dengen Kedoeatangan ia toetoepi moekanja dan tida lama kamoedian telah sampe.
Kan Lie-poet prenta Keizer itoe dateng mengadep, dimana lantas ditahan dengen tida dikasi poelang kombali ka astana.
Ah, soenggoe katjiwa betoel, satoe Keizer dari Thay Song tiauw moesti menampak kamelaratan dan kahinaän jang begini roepa di tangan moesoe —— Tapi kaloe dipikir, siapatah jang poenja sala?
Kan Lie-poet lantas minta diadaken roepa-roepa barang mas dan perak, moeteara dan soetra-soetra, dengen sadjoembla besar oewang mas dan perak. Laen dari begitoe, ia minta djoega bilangan Hopak-Hotong dan Samtien.
Datengnja baginda ka mari ada bersama-sama Silong Lie Tjiok-soei, satelah ini mantri liat jang Baginda Kim-tjong dikasi pake pakean preman dan diperlakoeken dengen kasar, hatinja merasa seperti dioeroet-oeroet, hingga dengen tida terasa mantri jang satia ini menangis dengen sedi.
Orang-orang Kim jang liat begitoe, lantas eoesir Lie Tjiok-soei ka loear Sedeng bebrapa antaranja laloe boedjoeki dengen roepa-roepa perkatahan, soepaja ini mantri Song menaloek sadja pada Kimkok.
„Di langit tida ada doea matahari,“ kata Lie Tjiok soei sambil mengelah napas: maka bagimanatah maoe soeroe akoe berhamba pada doea madjikan."
Kan Lie-poet jang meliat kasatiahannja Lie Tjiok-soei, djadi lebi soeka dan lantas prenta orangnja boedjoek, tapi ini Silong boekannja menoeroet, hanja laloe menjatji kalangkaboet dengen goesar, jang membikin orang-orang Kim jadi, amat moerka.
Tapi sebab Lie Tjiok-soei tida maoe brenti bermaki- maki, achirnja ia diboenoe tida lama kamoedian. Dengen begitoe, Lie Silong telah djalanken kawadjibannja dan oendjoek kasatiahannja sampe di achir jang paling pengabisan.
Kan Lie-poet jang liat begitoe laloe berkata:
Tempo negri Liauw binasa, banjak mantri-mantrinja jang telah korbanken satjara moelia, bagimana Lamliauw jang ternama negri besar, tjoema Lie Silong sadja ?"
“Kamoedian Kan Lie-poet prenta orang koeboer maitnja Lie Tjiok-soei dengen satjara pantes, kerna panglina Kim ini poen mengindahi pada mantri jang begitoe satia. Sasoeda itoe baroe ia prenta orang ambil barang-barang jang ada di astana Keizer. dimana Thaysianghong (Keizer toea) poen toeroet ditangkep dan ditahan bersama-sama anaknja, Keizer Kiem-tjong.
Boekan sadja barang-barang berharga, seperti moestika bidoeri, mas perak dan kaart negri, di angkoet oleh orang-Kim, hanja dajang-dajang astana poen, semoea dibawa mengadep pada Kan Lie- poet; katjoewali permisoeri jang bisa loepoetken diri dengen ambil djalan dari pintoe blakang dan semboeni di roema orang preman.
Atas prentanja Kan Lie-poet, itoe semoea barang berharga dikoempoelken djadi satoe boeat dibawa ka Kimkok, sedeng Gouw Pay-mouw diprenta himpoenken semoea mantri-mantri Song ang lama boeat angkat satoe pengganti aken mengoeroes pamerentahan negri, sebab Keizer Kim-tjong berserta Thaysianghong maoe dibawa ka negri Ki n.
Gouw Pay-mouw lakoeken prenta itoe dengen sigra. Sasoeda semoea mantri berkoempoel, Thio Pang-tjiang diangkat djadi Tjouw-tee boeat atoer pamerentahan, Thio Siem djadi Thaysiangsie dengen oeroes boekoe-boekoe, sedeng Tjan Tio-teng djadi Kayhongsoe doedoek di bagian pengadilan. Sedeng jang laen semoea tinggal tetep dalem pangkatnja jang lama.
Sesoeda Gouw Pay-mouw itoe berlaloe, Lu Houw lantas menanja pada itoe Tjouw-tee, apa ini kabesaran hendak dipangkoe teroes boeat salamanja, atawakah sakedar boeat didjalanken sadja sedikit tempo salagi orang Kim ada di sini.
Thio Pang-tjiang menjaoet: masatah ia maoe kangkangin ini kabesaran boat salama-lamanja, sedeng ia sendiri ada mendjadi hambanja Song-tiauw. Ini keangkatan sakedar ditrima salagi Kan Lie-poet masi ada di sini sadja, tapi begitoe pasoekan Kim soeda balik kombali ka negrinja, sigra djoega ia nanti angkat saorang dari familienja Keizer boeat pengganti.
,,ltoelah ada betoel sekali,“ kata Lu Houw: "di dalem masi ada permisoeri, sedeng di loear ada Khong Ong, djadi njatalah jang Toehan Allah tida maoe poetoesken karadjahan Songtiauw. Maka sabagi mantri jang satia, Siangkong djangan doedoeki itoe kabesaran sabagi kadoedoekannja satoe djoengdjoengan, maski djoega dalem pemilihan Siangkong jang diangkat djadi Tjouw-tee. Sabelon ada penggantinja, sasoeatoe soerat jang kaloear djangan diseboet firman, djoega djangan Siangkong pake pengawal atawa oepatjara seperti radja, kerna itoe bisa menerbitken perkara-perkara jang koerang baek. Sekarang baeklah lekas prenta orang tjari Khong Ong di kota Tjeetjioe, jang terkabar soeda bisa melariken diri dari tahanannja orang Kim.“
Thio Pang-tjiang satoedjoe dengen ini pikiran, sigra djoega ia kaloearken itoe prenta dan titah saorang jang boleh dipertjaja boeat tjari Khong Ong, boeat diangkat mendjadi Keizer.
Ini perdamian ada di loear taoenja orang-oran Kim. Oetoesan jang diprenta Pek Tjeetjioe jaitoe Tjia Kek-khe, jang itoe hari djoega lantas berangkat bersama bebrapa kawannja.
Khong Ong, sabagimana di sebla afas kita liat, soeda ditahan oleh orang Kim waktoe baginda kirim ka pasanggrahan moesoe, kerna Kan Lie-poet maoe bikin, dirinja sabagi barang tanggoengan, boeat tetepken itoe perdamian.
Sasoedanja ditahan sedikit waktoe, Khong Ong berdaja saboleh-boleh boeat minggat, dan perboeatannja itoe telah dikatahoei oleh soldadoe Kim, jang lantas mengedjar sambil bersoerak-soerak.
Khong Ong dengen amat katakoetan lantas masoek ka dalem oetan, waktoe mana kabetoelan ada satoe koeda jang tioekoep pakeannja lagi tidoer, maka ia lantas naekin dan petjoet sakoeat-koeatnja, hingga binatang ini lari kasatoe djurusan seperti terbang. Tapi satelah sampe di satoe tempat, binatang ini brenti dengen tida mane bergerak lagi, jang maski disabeti bagimana poen, si koeda tide maoe bergerak.
Khong Ong djadi amat kesel dan lantas toeroen, dimana baroe ia dapet taoe, bahoewa koeda itoe ada koeda-koedaan batoe jang berada di gredja Tjwehoekoen. Salagi memandang itoe dengen kagoem, dari blakang kaliatan banjak Soldadoejang dateng memboeroe, sembari boenjiken gembreng.
Tapi sigra djoega hatinja djadi legah, satelah liat benderanja ada tertoelis merk Songtiauw.
Ini barisan ada dipimpin oleh Tjong Tek jang niat menoeloeng baginda di kota’. Radja. Tapi di tenga djalan satelah berpapasan pada Khong Ong, ia laloe menghamperi sambil berloetoet
Ini orang bangsawan agoeng djadi girang, sedeng Tjong Tek dengen soeara menghiboer laloe berkata:
"Beroentoeng Allah soeda perlindoengken toeankoe, hingga karadjahan Song bisa dibangoenken kombali. Maka sekarang baeklah toeankoe ikoet hamba ka kota Tjelengtjioe boeat berlindoeng dan geraken poela karadjahan Songtiauw."
Khong Ong lantas toeroet, jang sasampenja di dalem kota, Tjong Tek lantas bikin kantorannja seperti astana Hengtian, dimana lantas dikaloearken soerat plekat boeat tjari orang-orang pinter dan kosen, koempoelken soldadoe dan bikin alat sendjata. Dan anak negri jang denger Khong Ong bisa melariken diri dan sekarang berada di itoe kota, beroentoen-roentoen pada dateng berhamba, antara mana adalah Thio Tjoen, Biauw Tjoan, Jo Gin-tiong, Tiang Soe-tiong dan Nio Yang-tjouw, orang-orang bidjaksana dan gaga perkasa, hingga dalem sedikit tempo PasukannjaTjong Tek djadi bertenaga besar.
Pada soeatoe hari salagi berhimpoen boeat madjoeken tentara, Khong Ong trima kabar jang kota Radja soeda petja dan baginda doea-doeanja telah tertawan, sedeng oeroesan pamerentahan sekarang ada diatoer oleh Thio Pang-tjiang salagi Tjouw-tee.
Ini warta membikin Khong Ong djadi menangis sedi. Tapi Tjong Tek jang ada di sitoe laloe memboedjoek.
"Sekarang perkara soeda djadi begitoe, menangis poen tida bergoena,“ kata ini mantri djoedjoer dengen soeara menghiboer: "paling peroe bangoenkan poela tentara boeat dapeti itoe nilik jang soeda terilang dan menoeloeng pada Koen Hoe, jang sekarang ada dalem kasoesahan, itoe paling perloe."
Laen-laen mantri dan panglima poen bilang begitoe, kerna dengen menangis tida mendatengken faedah apa-apa.
Sebelonnja perhimpoenan itoe boebar, pengawal pintoe dateng membri taoe, bahoewa di loear da dateng Tjia Kek-khe membawa Gwanyoe Bengthayhouw poenja soerat, minta mengadep Khong Ong lantas soesoet aer matanja dan si aken Tjia Kek-khe masoek ka dalem. Soerat toe lantas diboeka di hadepannja orang banjak alem mana ada minta dengen sanget soepaja Khong Ong lekas balik kombali ka kota Radja.
„Lamkeng itoe ada satoe tempat jang tananja bagoes dan soeboer,“ kata Tjong Tek, pada sasoedanja Khong Ong batja itoe soerat: „di mana doeloe Thaytjouw telah oendjoek kagagahan dan pengaroenja membikin taloek pada semoea radja-radja ketjil. Letaknja ada di tenga-tenga dari ampat pendjoeroe, dari mana gampang sekali aken membikin perhoeboengan ka sana ka mari. Maka sekarang baeklah toeankoe lekas balik kombali ka sana, aken geraken kombali ini pakerdjahan besar.“
Khong Ong toeroet ini perkatahan, maka pada boelan kalima Khong Ong dinobatken mendjadi Keizer dengen gelaran Ko-tjong Hongte, roba nama taor djadi Kiantham Gwanlian (785 taon sabelonnja berdiri Republiek Tiongkok).
Kim-tjong diangkat djadi Hauw-tjoe-yan-seng Hongte; Ibotsoeri Wie Si djadi Swanho Hong-ho dan istrina, Sia Si djadi Hongho, sedeng mantri-mantri ditamba pangkatnja satoe tingkat dan membri dpega persenan.
Sedeng mantri-mantri jang berada di dampingnja Keizer baroe, dapet naek pangkat dan hadia, adalah Bwee Tjip-ee jang herpangkat Houwpouw Siangsi, merasaken seksahannja Kan Lie-poet, sebab ini kapala perang Kim maoe djoega diadaken itoe mas dan perak satjoekoepnja, dari apa jang telah diminta.
„Thiantjoe sekarang ada tertawan dan mengalamken kasoekeran boekannja ketjil,“ kata itoe mantri: „orang poenja pikiran kaloet, rahajat dan mantri ada lebi lagi sedeng soeka mati dari menampak ini kadjadian, djadi maski korbanken apa djoega, itoe mas dan perak tida bisa diadaken tjoekoep.“
Mendenger ini perkatahan, Kan Lie-pdet djadi amat moerka, maka ia laloe prenta orang boenoe pada Bwee Tjip-lee, boeat dikasi fondjoek pada laen-laen orang jang brani membaita kahendaknja. Kamoedian prenta orangnja paksa pada rahajat negri, boeat adaken djoega itoe oewang jang diminta, kerna sabelonnja dapet ia tida nanti maoe tarik doeloe pasoekannja poelang ka negri Kim.
Keadahannja rahajat itoe wak toe ada amat soesa, kerna boekan sedikit orang jang soeda korbanken milik harta bandanja jang diminta dengen paksa.
Doea Keizer jang tertawan alamken
kasoesahan, Jan Tjeng dateng
persembaken boea.
Itoe kakaloetan di kota Piangkeng, dimana kadoea Keizer telah ditangkep dan rahajat negri dapet banjak kasoesahan, telah didenger djoega oleh Tee Tjong berdoea Jan Tjeng, hingga marika itoe djadi mengelah napas
„Sekarang perkara soeda djadi begini roepa“ kala Tee Tjong: „maka tjoekoeplah apa jang akoe dapet taoe boeat d wartaken pada Lie Twako, dan besok akoe pikir maoe balik sadja ka lemmatjwan bersama sama Joheng.“
„Toenggoe doeloe,“ kata Jan Tjeng: „berhoeboeng dengen petjanja kota Radja, dimana Ho pak dan Hotong poen telah terampas oleh moesoe, maka akoe djoega lida bisa tinggal lebi lama di ini tempat.“
„Djadi Janheng maoe pinda?“ tanja Jo Liem
„Ja,“ saoet Jan Tjeng: sasoeda memberesken satoe oeroesan, baroe akoe nanti anteri kaoe poelang.“
Jo Liem dan Tee Tjong laloe menanja, oeroesan apa. Tapi Jan Tjeng tjoema djawab itoe dengen tertawa sadja.
Pada hari esoknja Jan Tjeng berkata pada itoe doea soedara, boeat memberesken itoe oeroesan ia perloe mengadjak Jo Liem, maka Tee Tjong menoenggoe sadja di roema. Sahabisnja berkata ia masoek kombali toekar pakean dan berdandan seperti satoe djoeroe kabar, sedeng sebla tangannja membawa satoe rantang rotan jang ditjat idjo, dan apa isinja tida kataoean.
Tee Tjong djoega tida menanjaken lebi djaoe, hanja tinggal menoenggoe di roema.
Sasampenja di djalanan Jan Tjeng serahken rantang itoe pada Jo Liem boeat dibawa. Marika itoe djalan menoedjoe ka djoeroesan Oetara, jang gasoedanja melaloei kira-kira limabelas li iaorang sampe dibawahnja satoe goenoeng ketjil.
Di sitoe ada kaliatan satoe pasanggrahan besar dengan bebrapa ratoes pasanggrahan ketjil jang berada di sakiternja.
Jo Liem djadi merendak dan berkata:
„He, kita maoe ka manatah ?“
„Sst !, djangan bersoeara,“ kata Jan Tjeng: „hanja ikoet sadja akoe berdjalan dan djangan tanja apa-apa.“
Jo Liem merasa heran dan awasken itoe tempat, dimana ada kaliatan banjak sendjata dan bendera jang meloekisken Radja Wali Itam, hingga banjaknja itoe sampe tempat terseboet djadi gelap.
Samingkin lama mingkin njata, bahoewa jang kaliatan toempoekan-toempoekan koening itoe ada tenda koelit jang didiriken oleh orang Kim. Pemandangan itoe membikin orang poenja hati djadi keder. Tapi Jan Tjeng sedikit poen tida beroba aer moekanja, sedeng ini kawan tida menanjaken apa-apa.
Waktoe sampe di depan pasanggrahan, Jan Tjeng mengadep pada pendjaga pintoe, jang sasoedanja bitjara sedikit lama, itoe pengawal lantas anterken pada officiernja, jang lantas kasiken satoe Lengtjiam sambil titahken anter itoe doea orang ka sebla dalem.
Sasoedanja liwatken lagi banjak tenda-tenda, sampelah marika di tempat jang ditoedjoe.
Jan Tjeng lantas menghamperi pada satoe tenda jang terdjaga oleh kira-kira tiga atawa ampat ratoes soldadoe Kim jang bersendjata lengkap, dan waktoe liat itoe Lengtjiam jang dioendjoeki padanja, soldadoe itoe kasi doea orang ini masoek.
Di dalem itoe tenda ada berdoedoek Thay-sianghong (ex-Keizer Wie-tjong), jang ada memake kopia Tjoansi Tongkin, badjoe Kioeliong- pouw biroe berkembang, degen pake iketan pinggang dari GiOk, dengen tertjantoem satoe batang Kioelamhio, dan kasoetnja tersoelam.
Keizer toea itoe kaliatan lagi berdoeka hati.
Satelah sampe Jan Tjeng membri hormat dan berloetoet lima kali sambil berkata:
Bisin di dalem rimha poenja Jan Tjeng, jang soeda menerima Pihe poenja boedi dan ampoenken Sin poenja kadosahan. Satelah denger jang Pihe maoe dibawa mengalor, dengen mati-matian Sin dateng mengadep, soepaja bisa meliat lagi sakali.“
„Oh,.....“ kata itoe ex-Keizer, jang roepanja soeda tida inget lagi pada Jan Tjeng.
„Keng ada mendjabat pangkat apa ?“ tanja poela baginda.
„Sin joema di dalem oetan poenja rahajat biasa,“ saoet Jan Tjeng: „doeloe waktoe pesta Gwansiauw Sin souda pernah melajani pada Pihe di roemanja Lie Soe soe, dan di sitoe toeankoe ada membri soerat, pengampoenan, dan soerat itoe sampe sekarang hamba ada simpen dengen baek.“
Sambil kata begitoe ia kaloearken itoe soerat dari sakoenja dan kasiken pada Thaysianghong, jang lantas samboeti dan liat.
„Oh, oh,....... .“ kata baginda seperti orang jang tersedar: „kiranja Liangsan poenja orang gaga? ― Ah, soenggoe kami menjesel jang tatkala itoe tida bisa mengenalin pada orang-orang bidjaksana, hingga Song Kong-beng jang ada mempoenjai pahala besar, sampe mati teraniaja oleh dorna. Soenggoe kami poenja pikiran itoe waktoe ada, amat gelap, kerna ada terlaloe banjak dorna dalem diwan karadjahan.“
„Kaloe kamoedian kami bisa poelang kombali ka astana,“ kata poela baginda: „kami nanti minta pada Keizer jang sekarang boeat diriken gredjanja dan membri koernia pada anak tjoetjoenja.“
Jan Tjeng mengoetjap banjak trima kasi. Kamoedian bangoen berdiri sambil gapeken Jo Liem jang berdiri di sebla loear.
Jan Tjeng lantas samboeti itoe, rantang dan sambil berloetoet ia serahken itoe dan berkata:
„Kaloe ini hari hamba bisa berdjoempa pada Seng Gan, itoélah ada berlaksa poenja beroentoeng. Oleh kerna tida ada mempoenjai apa-apa jang boeat dipersembaken, maka waktoe maoe kamari Bisin tjoema membawa sadja ini satoe rantang jang herisi saratoes boea Tjengtjoe dan sapoeloe bidji Oeykam, boeat toeankoe mengilangken aoes“
Satoe Taykam toea jang ada ikoet padą baginda, laloe samboeti rantang itoe, jang lantas diboeka toetoepnja dan serahken pada baginda.
Keizer toea laloe ambil satoe bidji dari itoe djeroek koening, jang rasanja begitoe manis dan kopior, hingga rasanja enak sekali.
„Dalem brapa hari ini kami poenja hati salaloe bergontjang dan moeloet rasa kakeringan,“ kata Thaysianghong: „sekarang dengen dapetken ini boea, tjoekoeplah membikin ilang itoe rasa aoes.
Meliat keadahannja ini djoengdjoengan, jang doeloe ada begitoe termoelia dan terdjoengdjoeng oleh sabenoewa poenja rahajat, tapi sekarang menampak nasib begini tjilaka, Jan Tjeng djadi kasian.
„Sekarang baroelah kami bisa liat mana orang-orang jang satia dan bidjaksana, tapi semoea telah kasep!“ kata baginda sambil mengelah napas.
Jan Tjeng tida menjaoet, sedeng baginda kata lebi djaoe:
„Dalem karadjahan boekan sedikit mantri-mantri Boen dan Boe, jang trima gadji dan boedinja negri toeroen menoeroen, tapi satoe hari keadahan djadi beroba, semoea lantas djaoeken diri boeat mendjaga sadja masing-masing poenja djiwa dan koelawarga, tida saorang jang ada pikiran boeat dateng tengoki pada kami.
„Njatalah orang-orang bidjaksana boekan tjoema berada di kalangan mantri-mantri dan familie jang berdeketan, dan inilah ada ternjata dari keng poenja kadatengan, jang njata ada begitoe satia, jang dengen, meloepaken bahaja telah kamari.
„Ah, menjesel baroe sekarang kami bisa tersedar. Ja, soenggoe kami maloe mengapa tida lebi siang bisa meliat orang jang bidjaksana. Atas keng poenja pembrian ini soenggoe kami hargaken besar sekali.“
Sahabisnja kata begitoe baginda kaloearken satoe kipas dan toelisken itoe dengen ampat baris sairan, jang diboeboehi djoega tanda tangan, dengen perkatahan-perkatahan: „Tertoelis oleh Kao Tjoe Too Koen Hongtee.“
„Simpenlah ini kipas sabagi peringetan,“ kata baginda sambil kasiken kipas itoe pada Jan Tjeng.
Jan Tjeng samboeti itoe sambil mengoetjap banjak trima kasi.
Itoe kipas ada amat bagoes, di roembe-roembenja ada tergantoeng satoe boetir Haylamhio jang haroem, sair itoe ada berboenji:
„Salagi bersoesa hati di antara terompet dan tamboer-tamboer,
Dalem doenia tjoema tertampak saorang Tiongsin dateng menghiboer,
Kaloe boea Tjengtjioe bisa mengombaliken rasanja,
Membri koernia sabagi membales atas djasanja.“ Itoe ampat baris perkatahan Jan Tjeng telah batja, hingga hatinja djadi amat girang. Sedeng baginda lantas prenta Taykam ambil saparo dari isihnja itoe boea aken dibagi pada ex-Keizer Kim-tjong, jang berada di laen roewangan.
Taykam trima prenta lantas bawa saparo dari itoe beboeahan.
Jan Tjeng masi maoe bernanti, dengen harep bisa katemoe djoega pada itoe Keizer moeda, jang brangkali nanti dateng sasoedanja trima itoe boea. Tapi satoe soldadoe lantas menghamperi padanja, disoeroe lekas kaloear.
Dengen apa-boleh-boeat Jan Tjeng lantas bersodja delapan kali di hadepan itoe djoengdjoengan jang bernasib djelek, dengen aer mata melele.
Baginda liat begitoe, djadi toeroet kaloearken aer mata dengen hati merasa amat piloe alas Tjeng poenja kasatiahan.
„Harep sadja hal perdamian bisa lekas djadi beres,“ kata baginda pada Jan Tjeng: „kaloe kami bersama Hongte moeda bisa lekas balik kombali ka astana, nistjaja kami tida loepa boeat oendang pada keng.“
Jan Tjeng memanggoet sambil bersodja.
„Kami soeda prenta djoege Taykam boeat kasi taoe pada Hongte moeda,“ kata poela baginda: „jang baboeahan tadi ada keng poenja pembrian.“
Jan Tjeng mengoetjap trima kasi, dan sasoedanja bersodja lagi, baroe ia berlaloe.
Panglima jang tadi kasiken itoe Lengtjiam, satelah liat Jan Tjeng mamegang kipas, djadi tjoeriga dan lantas preksa. Kerna dikasi katerangan jang menjenangken, maka ia bisa kaloear dengen tida banjak soesa.
Sigra djoega doea orang ini berdjalan dengen tjepet, jang sasoedanja berada di satoe tempat djaoe djoega dari itoe pasanggrahan, Jo Liem berkata:
„Ah, kaoe poenja hati soenggoe taba, Janheng!“
„Kenapa ?“ tanja Jan Tjeng.
Jo Liem lantas kasi taoe, kaloe bermoela ia taoe ini sobat maoe dateng ka mari, tentoe ia tida soeka boeat toeroet, kerna waktoe menoenggoeken, hatinja merasa amat koeatier. Tjoba kaloe boekan katelandjoeran soeda ada di dalem ja tentoe balik kombali.
Jan Tjeng tertawa.
„Bagimana dengen Janheng poenja pertemoean pada Thaysianghong ?“ tanja Jo Liem kamoedian.
Atas ini pertanjahan Jan Tjeng menjaoet sabagimana adanja, dan kasi liat djoega itoe kipas jang Keizer toen toelisken sair. Itoe pembrian boea soeda ditrima dengen rasa soekoer dan penerima jang besar. Apa jang tadi Thaysianghong telah kata, Jan Tjeng toetoerken satoe persatoe dengen terang.
„Soenggoe kasian sekali satoe Keizer moesti menampak nasib jang begitoe roepa,“ kata Jo Liem dengen soeara menggerendang
Dalem sapandjang djalan itoe, iaorang bitjara teroes.
Sasoedanja berdjalan sedikit djaoe, kadengeran soeara orang menangis dan sasambat jang sedi, hingga kadoeanja ini djadi heran.
Tida lama kamoedian dari satoe tempat kaliatan sarombong anak negri jang teriring oleh bebrapa soldadoe politie. Dan orang-orang itoe semoea ada berpakean mesoem, jang saban-saban dipoekoel oleh oppas pengiringnja, kaloe marika berdjalan sedikit lambat.
Jan Tjeng bersama Jo Liem lantas minggir, boeat kasi rombongan itoe liwat. Kadoea orang gaga ini mengawasi tawanan itoe dengen hati kasian, kerna tida taoe ada perkara apa jang membikin itoe orang-orang lelaki dan prampoean ditangkep.
Meliat djalanan jang ditoedjoe, Jan Tjeng bisa doega bahoewa orang-orang tawanan itoe maoe dibawa ka barisannja orang Kim.
Koenjoeng-koenjoeng kaliatan satoe njonja satenga toea jang berdjalan dengen berpimpinan tangan pada satoe gadis, dimana saban-saban kaiatan marika itoe soesoet aer matanja dengen oedjoeng badjoe.
Satelah meliat pada Jan Tjeng, njonja itoe berseroeh:
„Siauw-it-ko!!........“ Siauw-it ko!!
Jan Tjeng djadi terkedjoet dan laloe mengawasi. Njatalah ia itoe ada istrinja toean lama.
Itoe njonja teroesken perkatahannja:
„Dji Hoangwe lantaran tida tahan menanggoeng kadoekahan, telah binasa. Sedeng kita-orang kombali delapanratoes tail perak boeat dikoempoel-koempoel aken goenanja pamerenta Kim. Tapi lantaran memang soeda tida ada poenja lagi oewang dan barang boeat penoehken itoe pemeresan jang kaliwat-liwat, kantoor Kay-honghoe soeda prenta kirim sadja kita-orang ka pasoekan Kim, jang kaloe sampe di pasanggrahan besar masi tida bisa adaken djoega itoe djoembla, kita bakal didjoeal salakoe boedak, sedeng jang moeda bakal didjadiken isinja roema-roema pelatjoeran.“
Sahabisnja kata begitoe si njonja besesambat kombali.
„Toeloenglah!..... toeloenglah kita iboe bersama anak, Siauw-it-ko!“ kata poela itoe njonja dengen amat sedi: „akoe taoe kaoe poenja priboedi jang aloes, jang tentoe tida meliat orang poenja katjilakahan jang begini roepa.“ „Ja, akoe poen denger djoega atas wafatnja Dji Hoangwe,“ kata Jan Tjeng: „tapi lantaran kota lagi terkoeroeng, maka akoe tida bisa dateng menengoki. Tentang hal oewang delapan ratoes tail perak boeat peneboesan, akoe nanti berdaja boeat adaken. Troesa kaoe koeatir, Dji Andjin.“
Itoe njonja menarik napas legah.
Kamoedian marika beromong-omong lagi. Itoe njonja kasi taoe, bahoewa ia bakal dibawa ka pasanggrahan orang Kim, dan kaloe dari sitoe tida ada orang jang membajari itoe oewang peneboesan, baroe dibawa ka kota Taybenghoe, aken didjoeal.
Jan Tjeng berdjandji nanti bawaken itoe oewang.
„Akoe nanti dateng bawaken itoe oewang,“ kata Jan Tjeng: „maka sekarang baeklah Andjin bersama Siotjia djalan sadja doeloean, jang sigra djoega sasoeda membawa oewang akoe nanti menjoesoel ka pasanggrahan orang Kim,“
Kamoedian Jan Tjeng bersama Jo Liem teroesken poela perdjalanannja poelang, sedeng Dji Andjin bersama jang laen-laen digiring teroes ka tempat jang bakal dibawa.
„Baek djoega itoe barang-barang dan oewang jang doeloe hari dihadiaken oleh Festi masi ada dan boleh digoenaken boeat menoeloeng akoe poenja Andjin bersama gadisnja,“ kata Jan Tjeng: „maka baeklah kita lekas poelang dan preksa itoe simpenan, sampe atawa tida, kaloe koerang akoe nanti djoeal boeat tjoekoepi itot djoembla."
Tida lama kamoedian marika itoe telah sampe di roema sendiri.
Tee Tjong tanja pada Jo Liem ka mana tadi marika pergi, sedeng Jan Tjeng laloe masoek ka dalem kamar, aken preksa itoe simpenan.
Njatalah oewang itoe ada tjoekoep, hingga Jan Tjeng djadi girang.
Sasoedanja sadiaken itoe, ia laloe kaloear kombali dengen adjak kadoea sobat ini pergi memana boeroeng, boeat tambanja makanan sore; sedeng pada orangnja ia telah prenta potong ajam.
Sembari djalan Jan Tjeng tjeritaken tentang pertemoeannja jang baroesan pada Dji Andjin, dan beroentoeng oewang boeat peneboesan ada tjoekoep.
„Doeloe waktoe akoe maoe pergi ka Liangsan boeat minta bantoean aken menoeloeng Louw Hoangwe, itoe waktoe dalem sakoe tida ada sakepeng boeat ongkos,“. kata ia lebi djaoe: „di djalan akoe katemoe saekor prendjak jang lagi mentjlok di tjabang kajoe, dimana akoe lantas toedjoeken panakoe sembari meramalken, jang kaloe boeroeng itoe akoe bisa pana kena, beroentoenglah apa jang dimaksoedken; dan achirnja kena dan niat itoe poen telah kasampean dengen gampang.“
„Sekarang kita aken menoeloeng Andjin berdoea Siotjia,“ kata poela ia: „maka biarlah akoe bikin ramalan pada itoe gowak jang berdiri di atas poehoen, jang bila maksoedkoe bisa kasampean, kenalah gowak itoe akoe pana.“
Sahabis kata begitoe ia angkat gendewanja, jang lantas di-intjerken ka atas poehoen dan lepas boesoernja.
Satelah kadengeran soeara mendjeprat, dari atas itoe poehoen laloe djato doea ekor boeroeng itoe, hingga Jo Liem jang meliat lantas tepok-tepok tangan sambil berseroeh:
„Alamat bagoes: alamat bagoes! Bisa diharep doea-doea aken katoeloengan, sebab satoe boesoer mengenaken doea ekor gowak, inilah soenggoe djarang sekali!“
Jan Tjeng djoega djadi girang dan hamperi itoe korban, jang njatalah boesoer itoe soeda menemboes lehernja itoe gowak dan tadjemnja anak pana telah mengenaken pada kawannja jang di sebla hingga doea-doea djadi djato.
Baroe sadja Jan Tjeng poengoet itoe, mendadak ada liwat satoe kelintji dan satelah liwat di depannja Jo Liem, ini orang gaga dengen gapa lantas toebroek semberi samber kakinja, hingga, binatang itoe mengaloearken soeara treak.
Katiga orang itoe djadi amat girang.
Sekarang tida perloe marika berdjalan lebi djaoe, kerna binatang jang ditjari itoe poen soeda terdapet dengen gampang.
Marika laloe balik kombali dan serahken itoe kelintji bersama doea gowak boeat djadi tambanja makanan sore.
Itoe malem iaorang makan dengen enak.
Esoknja pagi-pagi Jan Tjeng soeda bangoen dan bangkoes itoe oewang jang perloe, bersama Jo Liem ia lantas pergi ka pasanggrahan Kim boeat bajar itoe oewang peneboesan, sedeng Tee Tjong tinggal di roema.
Pada satoe Thaubak jang mengoeroes itoe, Jan Tjeng serahken oewangnja dan toetoerken maksoed kadatengannja.
Thaubak memanggoet, kamoedian ambil boekoe dan preksa satoe-satoe nama.
„Prampoean itoe jang satoe bernama Mouw Si dan jang laen Louw Si, boekan ?“ tanja itoe Thaubak kamoedian.
„Benerlah,“ saoet Jan Tjeng.
„Baek, sigra djoega nanti dikaloearken dan bawa ka mari.“
Kamoedian itoe penggoeroes itoeng oewang jang terboengkoes, sasoeda djoemblanja tjoekoep, ia lantas prenta satoe soldadoe bawa kaloear itoe doea orang jang telah dibajar oewang teboesannja.
Selang sasaät doea orang itoe dibawa dateng ka hadepannja Jan Tjeng.
Andjin bersama Siotjia satelah liat Jan Tjeng, boekan maen girangnja. Maka sigra djoega ia maoe adjak itoe njonja dan gadisnja poelang ka roema. Tapi koenjoeng-koenjoeng si pengoeroes minta ditamba lagi tigaratoes tail perak, dengen bilang, kaloe orang tawanan ini sampe ka Tay benghoe, djoembla itoe tentoe djadi naek anamratoes tail.
Jan Tjeng djadi kamekmak, hingga sakoetika lama ia tjoema mengawasi sadja dengen tida berkata-kata.
„Bagimana boleh tamba lagi tigaratoes tail?“ tanja ia kamoedian.
„Ja, sebab begitoelah memang telah ditetepken,“ saoetnja.
Jan Tjeng lantas mengomong manis dan minta itoe Thaubak poenja kasian, aken tida ditamba lagi oewang teboesannja. Tapi itoe pengoeroes tjoema gojang kapala sadja, tida loeloesken boeat djoembla jang koerang.
„Kaloe begitoe, kasilah akoe tempo lagi lima hari, brangkali sampe di itoe hari akoe bisa adaken poela tigaratoes tail jang koerang," kata Jan Tjeng, jang rasa tida bisa membanta lebi djaoe.
Sedeng Dji Andjin bersama Siotjia jang soeda begitoe girang, djadi poetjet seperti mait. Anak dan iboe saling memandang dengen sedi.
„Lima hari, sapoeloe hari djoega masi boleh“, kata itoe Thaubak: „tapi akoe kasi taoe, bahoewa lagi doea hari ini semoea orang bakal dibawa ka Taybenghoe, maka kaloe soeda sampe di sana, itoe djoembla djadi anamratoes, sabagimana tadi akoe telah bilang, itoelah kaoe haroes taoe.“
Jo Liem jang dari satadi tinggal berdiri dan mendengeri sadja orang poenja bitjara, satelah denger begitoe, kadoea alisnja djadi berdiri. Dengen tida merasa ia lantas rabah gagang goloknja, baek Jan Tjeng dapet liat dan bisiki pelahan-pelahan
„Inget, Joheng,“ kata Jan Tjeng: djangan kita tjari lantaran boeat menjoesaken diri. Biarlah ini oeroesan diatoer dengen dami. Akoe masi bisa adaken itoe djoembla jang diminta.“
Kamoedian Jan Tjeng hamperi pada Andjin dan hiboeri njonja ini dengen perkatahan-perkatahan jang menimboelken harepan.
„Senangken sadja Andjing poenja hati,“ kata Jan Tjeng: sigra djoega akoe nanti dateng kumbali bawa itoe oewang.“
Sahabisnja berkata ia kasiken itoe njonja perak antjoer sakira lima tail boeat belandja, samanmenoenggoe sampe dirinja terbebas.
Andjin berdoea anaknja trima itoe sambil menangis.
Jan Tjeng laloe menghiboer kombali, dan sasoedanja berpamitan, ia bertindak ka loear. Sasampenja di djalanan Jo Liem menggrendang tida soedanja, kerna hatinja amat gemas pada itoe Thaubak jang tiada mengenal kasian.
Tapi Jan Tjeng memboedjoek dan kata: djangan poela bangsa koertjatji beg toe, maski mantri-mantrinja sekali poen, tida soengkan lakoeken kakedjeman. Maka biarlah kasi iaorang makan itoe oewang, asal sadja bisa menoeloeng itoe njonja dan gadisnja jang bersangsara
Sasampenja di roema iaorang lantas tjeritaken pada Tee Tjong apa jang telah kadjadian. Sasoedanja berdami sakoetika lama, achirnja diambil poetoesan jang esok pagi Tee Tiong nanti balik ka lemmatjwan boeat membri kabar pada Lie Eng dari apa jang diprenta serepin, kamoedian nanti balik kombali membawa oewang peneboesan. Tapi sebab waktoe jang bakal ditelepken itoe tentoe bakal liwat temponja, maka Jan Tjeng minta Tee Tjong bawa oewang itoe anamratoes tail dan teroes ka Taijbenghoe sadja, kerna sampe di itoe hari, Andjin bersama gadisnja tentoe soeda dibawa ka itoe kota. Sedeng ia bersama Jo Liem nanti menoenggoe di kota terseboet.
„Anamratoes tail ?“ kata Tee Tjong: „boekantah tadi Janheng bilang, kakoerangan itoe tjoema tigaratoes?“
„Bener,“ saoetnja jan Tjeng: „tapi kaloe kita bisa adaken sekarang, salagi orang tawanan itoe masi ada di pasanggrahan. Djika soeda dibawa ka Taijoenghoe, djoembla itoe djadi doea kali lipat.“
Pada esoknja pagi-pagi Tee Tjong lantas berangkat ka lemma jwan, sedeng Jan Tjeng bersama Jo Liem, lantas beresken barang-barangnja boeat dibawa, kerna itoe hari orang-orang Kim jang mengiring persakitan poen telah berangkat, maka esok pagi ia poen maoe menjoesoel.
Begitoelah esoknja pagi sahabisnja santap kadoea sobat itoe lantas berangkat ka kota Radja dan masoek di kota Soanhoamoei. Di dalem kota kaliatan amat sepi, orang-orang jang mendjoealan dan berdjalan poen sedikit sekali. Di atas ranggon Lionghonglaw jang begitoe tinggi dan indah, soeda ditempati oleh saorang jang boekan familie Tio.
Meliat keadahan di kota Radja jang dalem waktoe blakangan soeda beroba begitoe roepa, Jan Tjeng merasa piloe Kadoeanja ini berdjalan teroes sampe di satoe tempat, dimana ada berdiri gedongnja Louw Tjoen-kiat, jang sekarang soeda kaliatan tida karoean matjem, dan pengliatan ini membikin hatinja bertamba ngenas.
Sasoedanja berdjalan-djalan sakoetika lama, dan sagala pemandangan jang tertampak, meloeloe menjediken hati, maka Jan Tjeng bersama Jo Liem laloe berdjalan kaloear. Tapi belon liwat brapa djaoe, ia berpapasan pada orang moeda nama Louw Seng, jang doeloe ada djadi pengoeroes gedongnja Louw Djihoangwe.
Itoe orang moeda ada membawa beras kira-kira doea atawa tiga gantang. Maka Jan Tjeng kenalin padanja, lantas hamperi aken menanja.
Louw Seng djadi kaget, tapi sigra djoega ia menangis, satelah kenali siapa adanja orang menanja padanja.
Jan Tjeng lantas menjataken tentang keadahannja Louw Tjoen-kiat, dan siapa jang tinggali roema itoe, maka sekarang itoe gedong tida karoean matjem.
Dengen sedi Louw Seng tjeritaken satoe persatoe atas kematiannja itoe madjikan, bagimana Andjin bersama Siotjianja soeda ditangkep, lantaran tida bisa adaken sadjoembla oewang jang diminta oleh pembesar negri, Roema-roema dalem ini kota soeda djadi roesak, kerna ditimpoek dan disoeloet oleh soldadoe-soldadoe Kim jang waktoe bermoela masoek ka dalem ini kota. sedeng ia sendiri sekarang soeda tinggal dikampoeng. Oleh kerna amat lapar, maka tadi ia soeda ka loear kota boeat menoekar badjoe dengen ini beras.
Lebi djaoe Louw Seng tjeritaken, bagimana waktoe njonjanja ditangkep, orang jang mendjaga tida perkenanken boeat ia masoek katemoei. Dan sekarang Andjin berdoea Siotjia soeda dibawa ka kota Taijoenghoe.
Maski halnja itoe njonja, Jan Tjeng soeda taoe, tapi ia tjoba dengeri djoega apa jang boedak ini toetoerken. Salagi beromong-omong, langit jang soeda moelai mendoeng lantas moelai gerimis, maka Louw Seng minta Jan Tjeng bersama Jo Liem soeka mampir ka roemanja, jang tida sabrapa djaoe dari sini.
Satelah sampe Jan Tjeng liat roema itoe soeda terlaloe boeroek. Pintoe dan pagernja telah rejot, sedeng perabotnja poen lebi banjak jang roesak dari jang oetoe.
Louw Seng lantas silaken doedoek, kamoedian ia pergi masak thee dan nasi. Jan Tjeng kasiken doea tail perak boeat beli daging dan arak, dan prenta ini dilakoeken dengen sigra.
Tida lama Louw Seng dateng bawa daging kambing bakar bersama sabotol arak jang baek. Sambil bersantap dan minoem-minoem, Jan Tjeng laloe tjeritaken tentang pertemoeannja pada Louw Andjin dengen Siotjia, dan datengnja ka mari ada boeat serepin itoe njonja jang bersangsara.
Mendenger ini perkatahan, Louw Seng djadi amat girang, apapoela mendenger madjikannja bersama Siotjia maoe ditoeloeng.
Sahabisnja dahar, katiga orang itoe laloe tidoer di atas bangkoe pandjang jang berada di loear roema. Beroentoeng itoe malem oedjannja tida besar iaorang tida oesah terlaloe kadinginan.
„Kerna di sini poen kaoe ada terlaloe soesa,“ kata Jan Tjeng: „maka baeklah ikoet sadja akoe poelang, dan kamoedian kita boleh pergi ka Taijbenghoe boeat menoeloengi Andjin; sedeng datengkoe ka mari sakedar meliat keadahan di ini kota, sekalian tjari taoe keadahannja Louw Djihoangwe poenja roema tangga ― Sekarang apa jang akoe maoe taoe, akoe soeda taoe.“
Louw Seng menjataken girangnja hati dan soeka boeat mengikoet.
Sahabisnja minoem thee, Jan Tjeng lantas balik kombali ka doesoennja bersama-sama Jo Liem dan Louw Seng. Satelah sampe, ia laloe benah-benahken barang jang perloe terbawa. Kamoedian panggil doea boedjangnja, satoe orang besar dan jang laen anak-anak.
Pada boedjang jang besaran ia prenta sadiaken makanan, kerna sahabisnja santap maoe pergi ka Taybenghoe, sedeng pada boedjang jang ketjil, ia berkata:
„Lekaslah kaoe poelang ka roemamoe, kasi taoe pada ajah-boendamoe jang sekarang akoe maoe berangkat pergi dan belon taoe sampe kapan balik kombali. Kerna pergikoe ini tida katentoean poelangnja, maka ini roema, kebon dan sagala apa jang ada katinggalan, biar dioeroes sadja oleh kadoea orang toeamoe, dan ia poen boleh tinggal sadja di sini menggantiken akoe. Kamoedian kaoe djoega boleh ikoet bersama-sama.“
Boedjang ketjil itoe berlaloe, sedeng Jan Tjeng berdoea Jo Liem lantas doedoek bersantap.
Waktoe abisan dahar, orang jang dipanggil itoe telah dateng, maka Jan Tjeng laloe kasi taoe sagala niatnja. Itoe hbpanja itoe anak djadi girang dan berdjandji nanti oeroes ini sagala oesaha dengen soenggoe hati.
Sasoedanja Louw Seng bersama itoe doea boedjang abisan dahar, Jan Tjeng soeroe pikoel itoe boengkoesan saorang sapikoel, sedeng jang ketjil tjoema mengikoet sadja. Marika kaloear dari itoe doesoen dengen membawa sendjata.
Selang brapa hari sampe di satoe tempat jang amat soeker diliwati. Maka sambil mengelah napas Jan Tjeng berkata pada Jo Liem:
„Kita orang lelaki merasa soesa boeat lintasin ini tempat jang banjak loempoernja, bagimana lagi Andjin bersama Siotjia, orang-orang prampoean? Tentoelah boeat langkahi ini ia moesti koetjoerken lagi aer mata ?"
Jo Liem tjoema mengelah napas sadja.
Pada laen harinja djoestroe langit ada terang, maka Jan Tjeng bersama kawannja jang djalan berlenggang memandang tempat-tempat dengen senang, sedeng Louw Seng bersama temennja jang memikoel, dan itoe boedjang ketjil, telah katinggalan djaoe di blakang.
Sasoedanja naek di satoe tandjakan, Jan Tjeng lantas berdoedoek di bawah poehoen aken menoenggoe pengikoetnja. Jo Liem rebah-rebahan di atas roempoet sambil mengawasi terbangnja boeroeng-boeroeng di tjabang kajoe.
Tapi satenga harian ampir berlaloe, orang jang djalan blakangan itoe belon djoega kaliatan mata idoengnja.
„He, apatah ia kasasar?“ kata Jan Tjeng sambil memandang ka djoeroesan tempat dimana baroesan ia dateng.
„Ja, kenapatah lama amat belon djoega ia sampe?“ menjamboeng Jo Liem.
Kerna merasa koeatir, maka kadoeanja laloe balik kombali dan toeroen dari itoe tandjakan. Satelah sampe di bawa, dari djaoe kaliatan Louw Seng berlari-lari sambil bertreak, hingga Jan Tjeng djadi kaget dan berkata: „Kenapa? kenapa kaoe sendirian dan mana temenmoe?“
„Tjilaka! tjilakalah!“ kata Louw Seng sambil menghamperi dengen tersengal-sengal. Moekanja kaliatan poetjet
Sasoeda menetepken hati baroe ia tjerita beli djaoe, bahoewa di samping gredja bagian Wetan ada penjamoen jang telah pegat itoe djongos ketjil dan boenoe padanja. Oleh kerna amat takoet, maka ia lantas lemparken itoe pikoelan, soepaja bisa melariken diri lebi tiepet,
Jan Tjeng berdoea djadi kaget dan goesar atas kadjahatannja itoe penjamoen jang kedjem, maka kadoeanja laloe pergi ka itoe gredja dan betoel sadja ia dapetken itoe Boedjang ketjil soeda binasa.
„Kasian!“ kata Jan Tjeng: „kaloe akoe taoe djiwamoe bakal binasa begini roepa, akoe tentoe soeroe kaoe berdiam sadja di roema bersama-sama ajah-boendamoe. Tapi meginget kaoe poenja kasatiahan dan katjerdikan, maka akoe telah adjak djoega, dengen harepan brangkali perdjalanan ini bisa menambaken kaoe poenja katjerdikan.“
Sahabisnja berkata ia prenta Louw Seng galiken satoe lobang boeat koeboer. Baroe sadja tana itoe dioeroek selesih, lantas kadengeran soeara tamboer dan gembreng, maka katiganja itoe laloe, mengoempet sembari ngintip.
Tamboer itoe kiranja diboenjiken oleh tentara Kim, maka sabelonnja barisan itoe dateng déket, Jan Tjeng lantas berangkat kombali dengen tida sempet boeat tjari taoe ka mana boedjangnja jang satoe telah pergi. Sebab kaloe tida lekas berangkat dan dirinja kataoean oleh itoe soldadoe-soldadoe, pastilah djiwanja bakal binasa.
Sigra djoega iaorang telah berlaloe dari tempat terseboet dan menoedjoe ka satoe kampoeng jang paling deket.
Maski doea pikoel barang-barang semoea telah linjap, baek djoega di sakoenja masi ada oewang. Maka liwat ampat li marika masoek dalem satoe waroeng dan sembari dahar Jan Tjeng menanja pada toekang roema makan, djalanan mana jang orang moesti ambil boeat pergi ka Taybenghoe.
„Kaloe maoe djalan jang paling deket, moesti lintasi satoe goenoeng jang diseboet Kimkenia dan dari sini ada kira-kira lima li djaoenja,“ saoetnja itoe djongos; „toeroen dari itoe tandjakan sampalah di doesoen Jahouwpoh, dan dari sitoe ka Taybenghoe tjoema tinggal satoe hari lagi sadja.― Tjoema......“
„Kenapa ?“
„Itoe djalanan ada berbahaja.“
„Ah, itoe tida kenapa, asal sadja bisa lekas sampe,“ Sasoedanja bajar oewang makan marika laloe berangkat kombali.
Katiganja itoe laloe berdjalan dengen tjepet, betoel sadja kira-kira lima li ada kaliatan satoe goenoeng dan inilah jang diseboet Kimkenia.
„Brangkali di sini ada brandal,”kata Louw Seng dengen roepa katakoetan, waktoe menginget apa jang terdjadi pada itoe penjamoen jang telah binasaken si boedjang ketjil: „harep hati-hati”.
„Siapa bilang ada brandal ?“ tanja Jo Liem.
„Sebab tadi itoe tjioepo kata, ini tempat ada berbahaja,“
„Berbahaja ada banjak roepa, boekan tjoema lantaran banjak penjamoen.“
Louw Seng tida menjaoet lagi.
Jan Tjeng berdjalan teroes dan sasampenja di deket itoe goenoeng, ada kadengeran soeara riboet, jang membikin tiga orang ini djadi kaget dan lantas bersedia.
Jo Liem pasang koeping, tapi njatalah itoe soeara gemoeroe boekan laen dari mengerotjoknja aer jang dari atas toeroen ka satoe djoerang, seperti tjoeroeg. Jang samingkin deket kadengerannja samingkin riboet.
Jan Tjeng laloe adjak Jo Liem menghamperi lebi deket aken meliat kabagoesannja itoe tempat. Adjakan mana bermoela tida maoe ditoeroet, kerna Jo Liem kata: kaloe moesti brenti-brenti, apa tida nanti djadi telaat boeat sampe ka Taybenghoe.
„Ah, kita toch tida aken lama-lama, “saoet itoe sobat “hanja meliat-liat sadja sabentaran dan kamoedian boleh berangkat lagi.“
Jo Liem tida membanta, maka kadoeanja itoe naek ka atas, dengen terikoet oleh Louw Seng dari blakang.
Keadahannja itoe, tempat betoel bagoes. Aer jang djato ada sabagi katja djerninja. Poehoen-poehoen ada kaliatan soeboer dan boeroeng jang berterbangan dari satoe ka laen tjabang, ada banjak.
Itoe pemandangan ada menjenangken hati, maka sakoetika lama iaorang berdiri sambil meliat ka sana sini.