Pembalesan Kedji/Bab 5

Dari Wikisumber bahasa Indonesia, perpustakaan bebas

V.

11,000 ANJOET DI MEDJA DJOEDI.


„Ko Dian-hoei sadja ganti'in, owee memangnja tida maoe maen“.

„Lo, kan djadi auwban begitoe? Tida apa, owee boleh doedoek sadja meliatin dari samping. Maen brapa ini?“

„Ah, maen ketjil-ketjil sadja. Tadi pergi mandi di Djembatan Doewa, habis Kek-soen adjakin mampir ka mari. Kabetoelan katemoe ko Ek-tjong, Kek-hoaij dan ko Soei-kian. Iseng-iseng djadi doedoek maen, tapi ko Dian-hoei boleh lantas ganti'in owee poenja tempat. Djangan seedji, kaga, owee kaga katain auwban.“

„Lo, djadi owee ini dateng-dateng ko lantas ngadoek.“

„Kaga, memang owee soeda maoe brenti tah.“

„Habis ko Hoaij-wan maoe lantas poelang? Kaloe begitoe owee kaga maoe. Orang ko boleh katain owee dateng oesir orang.“

„Kaga, owee tinggal meliatin di samping."

Sambil kata begitoe Hoaij-wan lantas berbangkit, kamoedian Kek-soen laloe bangoen berdiri, seraja berkata dengen memaen:

„Ini orang Pekalongan maennja moedjoeran. Kaloe ia maoe adjak bersero, kita maoe djoega dapet bagian dari wisitnja.“ „Boleh, kaloe ko Kek-soen kata begitoe, tapi bagimana maennja ko owee belon taoe. Apa ini lagi maen samgiok ?“

„Kaukipeh," djawab Kek-hoaij.

„Habis belon moetoes ko owee boleh ganti'in sadja.“

„Kita lagi tida maen lowak,“ kata Ek-tjong.

„Bagimana maennja djoega owee belon taoe.“

„Tjaptoen-gohtoen," kata Soei-kian. „Sampongngeh tjapgoh-shatjap.“

Tapi kaloe ko Dian-hoei maoe maen lebi besar, boleh djoega," kata Kek-hoaij.

„Lo, ko owee lantas disoeroe ngedjagoin.“

„Tida apa, lawan sadja, kita bersero," kata Kek-soen.

„Kita maen samgiok sadja gan enakan ?“ kata lagi Dian-hoei.

„Poenja soeka,“ kata Kek-hoaij.

„Nah ja, begitoe lah begitoe," kata Soei-kian.

„Ko Ek-tjong bagimana ?“ tanja Dian-hoei.

„Toeroet sadja.“

„Bagimana maennja?" tanja poelah Dian-hoei.

„Moelah-moelah djangan besar-besar," kata Kek hoaij. „Tarik sapoeloe, satoe kartoe gohtoen. Apa samoea soeka begitoe ?“

„Baek," djawab jang laen-laen dengen berbareng.

„Boeat moelah-moelah siapa jang maoe bertaro toapaij tjepeh ?" kata Kek-soen. „Owee pegang Ko Dian-hoei.“

„Di sini," kata Ek-tjong dan Soei-kian dengen berbareng.

„Do, djadi doewa ratoes.“

„Jang poenja diri lawan djepeh," kata Dian-hoei.

„Djadi lo gaitiang.“

Sigra kartoe ditoekar dengen jang baroe, dikotjok dan ampat orang itoe lantas moelahi mengadoeh oentoengnja.

Achirnja Dian-hoei jang dapet kamenangan.

„Sekarang sariboe sama owee,“ kata Kek-hoaij.

„Baek," djawab Dian-hoei. „Brapatah ko Keksoen maoe dapet bagian ?“

„Bertaro sama Kek-hoaij owee kaga toeroet.“

„Ja, dia soedara,“ kata lagi Dian-hoei. „Tapi soedalah biar owee lawan sendiri. Djadi ja, ko Kek-soen, eh salah: ko Kek-hoaij ?“

„Eh, eh, masa memaen?“

Laloe ampat pentopan itoe moelahi mengadoeh oentoeng kombali, dan djoega sakali ini adalah Dian-hoei jang dapet kamenangan.

„Ai, betoel dia moedjoer,“ kata Kek-hoaij dengen senjoem oeroeng. „Djangan ia ada bawa djimat dari Kalongan ini orang.“

„Lo, baroe djoega doewa kali. Mana boleh tentoe orang maen ? Samentar poelang kantong kosong boleh djadi djoega.“ „Nah, sekarang tiga riboe, ko Dian-hoei.“

„Baek, kaloe orang maoe anteri oewang lebi banjak,“ djawab itoe orang Pekalongan dengen memaen.

„Sekarang kita djoega bertaroh ko Soei-kian," kata Kek-soen. „Djangan banjak-banjak, lima ratoes sadja.“

„Baek,“ djawab soedagar tembako itoe.

„Owee pegang ko Dian-hoei, ko Soei-kian maoe pegang siapa ?“

„Pegang diri sendiri.“

„Dan kita djoega mari bertaroh ko Hoaij-wan,“ kata Ek-tjong.

„Ah, owee soeda kenah kapatik pehgoatoen, itoe soeda tjoekoep.“

Sigra pentopan-pentopan itoe beradoeh oentoeng kombali, tapi sakali ini adalah Kek-hoaij jang dapet kamenangan, lantaran apa mendjadi Kek-soen poenja pertarohan sama Soei-kian ada seri sadja.

„Eh, eh, ko lantas kenah tarik kantong,“ kata Dian-hoei. „Sekarang lima riboe, ja, ko Kek-hoaij? Kaloe misti mati, biar owee mati di sini djoega.“

„Baek, owee si toeroetin sadja. Tida perdoeli orang ada pakeh djimat Kalongan, kaloe maoe menang tentoe menang djoega.“

„Dan kita bertaroh teroes seperti tadi, ja, ko Ek-tjong, eh salah : ko Soei-kian ?“ kata Kek-soen.

„Baek.“ Laloe orang moelahi tarik kartoe dengen klakoean amat soenggoe-soenggoe, kamoedian Kek-hoaij lantas berkata dengen soeara angker:

„Liap !“

Sasaät berselang masing-masing orang bantingken kartoenja diatas medja, dan Dian-hoei laloe berseroe dengen soeara sember:

„Goen !“

„Bagoes !“ berseroe Kek-soen, jang doedoek di sampingnja itoe orang Pekalongan. Dan betoel sadja ia itoelah jang dapet kamenangan boeat itoe sakali poekoel, dan dalem gilirannja laloe ia berseroe dengen soeara keren:

„Samgiok !“

Orang toeroenken tiga kartoe dari tangannja, dan kamoedian terbalikin itoe diatas medja, samantara Dian-hoei berseroe poelah:

„Ang-goen-soe-tjhio !. . . . . . . .}Sekarang sambie !“

Koetika samoea orang soeda toeroenken kartoe, lantas orang Pekalongan itoe berseroe lagi dengen soeara jang lebi njaring:

„Soe !“

„Bagoes !" berseroe Kek-soen. „Sekarang jang pengabisan.“

„Ja, jang pengabisan," kata Dian-hoei. „Sambie lagi !“

„Ho, tjilaka betoel !" berseroe Kek-hoaij, dan lantas tjelentangin kartoenja jang pengabisan diatas medja. „Djoega belon boleh dikata owee tentoe menang,“ kata Dian-hoei. „Siapa taoe bentar lagi owee kalah teroes sampe longpwee?“

Dan laloe orang-orang pentopan itoe soeda moelahi mengadoeh lagi marika poenja oentoeng.

Pertaroengan itoe ada dilakoeken dengen sabentar kalah, sabentar memperoleh kamenangan. Koetika lontjeng mengoetaraken poekoel sambilan malem, dan orang rameh-rameh doedoek bersantap, laloe marika dapet kanjatahan: Kek-hoaij kalah sariboe lebi, Dian-hoei menang ampir sariboe, Ektjong menang bebrapa ratoes roepiah, Soei-kian kalah ampir doewa riboe dan Kek-soen menang doewa riboe lebi.

Habis dahar Hoaij-wan lantas berdjalan poelang, dan sasampenja didepan hek, ia ini berkata pada Kek-hoaij, jang anteri padanja:

„Kalah sedikit soedalah, djangan seperti orang maoe adoeh djiwa. Besok kita misti oeroes banjak kerdjahan, lebi baek djangan poelang laat.“

„Ah, masa goea gila!“ kata Kek-hoaij, kamoedian lantas ia balik pada laen-laen kawannja, jang soeda menoenggoeken ia di medja maen.

Sigra djoega orang moelahi bertaroeng kombali. Sakali ini Kek-soen, jang soeda menang doewa riboe lebi, tinggal adem-ademan tida maoe toeroet bertaroh lagi, dan koetika lontjeng mengoetaraken poekoel sapoeloe, ia poen, jang sadari tadi kaliatannja seperti orang tida betah berdoedoek diam, lantas berdjalan poelang dengen tindakan loear biasa pesatnja.

Kek-hoaij poenja ka‘adahan oewang itoe waktoe ampir tida berbedah seperti salagi orang doedoek santap. Laloe ia berkata:

„Soedalah tida goena kita maen lama-lama. Sekarang boeat pengabisan, samoeanja soeka atawa engga?“

„Poenja soeka,“ kata Soei-kian dan Ek-tjong dengen berbareng.

„Baek sekali,“ kata Dian-hoei. „Owee kabetoelan soeda kapingin tidoer. Ai, badan rasanja soeda kliwat pegal. Baroe tadi owee naek dari kapal.

„dan boeat pengabisan kita bertaroh jang paling besar, njoh, ko Dian-hoei!“ kata poelah Kek-hoaij.

„Brapa?“

„Soedalah owee maoe boewang-boewangan sapoeloe riboe.“

Dian-hoei tida lantas menjaoet. Ia keroetin sabentaran alisnja, sabagimana biasanja orang berlakoe kaloe ada merasa sangsi, kamoedian laloe ia berkata:

„Terlaloe gedeh, ko Kek-hoaij. Sakali longpwee tjiatlat betoel! Lagi sama sekali owee poenja oewang tjoema ada toedjoe riboe.“

„Besok bajar djoega boleh,“ kata Kek-hoaij.

„Lo, soedalah toedjoe riboe sadja.“

„Tida apa, lawan soeda ko Dian-hoei,“ kata Soei-kian. „Owee ambil bagian jang salebinja tiga riboe.“

„Kaloe begitoe, djadi !“ kata Dian-hoei.

„Baek,“ kata Kek-hoaij, ,tapi inget, ini boeat pengabisan kali: siapa jang menang boleh djalan poelang dengen tida boleh dihalangin. Soeka begitoe?"

„Djadi,“ kata Soei-kian.

„Ja djadi,“ kata Dian-hoei, seraja tioep-tioep ia poenja tangan.

Laloe orang moelahi tarik kartoe, dan sakali ini dengen lebi soenggoe-soenggoe dari jang soeda-soeda. Kamoedian orang bertaroeng dengen amat sengit, samantara Ek-tjong dan Soei-kian, jang tida toeroet maen, tinggal meliatin dari blakang. Medja sampe djadi tergeser lantaran klakoeannja Kek-hoaij jang satengah nekat, dan achirnja adalah Dian-hoei jang dapet kamenangan.

Kek-hoaij banting ia poenja oewang kakalahan diatas medja, ambil topinja, dan lantas berdjalan poelang. Sabelas riboe lebi ia poenja oewang soeda anjoet di medja djoedi !

Samantara Dian-hoei, Soei-kian dan Ek-tjong sedeng mengitoeng-itoeng masing-masing poenja kakalahan dan kamenangan, Kek-hoaij soeda ada ditengah djalanan Kampoeng Baroe jang sepi, seraja berkata pada diri sendiri:

„Kaloe Hoaij-wan dapet taoe ini perkara, tentoe goea digrendengin tida bisa soeda."