Pembalesan Kedji/Bab 4
VI.
EMOT! EMOT!!
Di itoe tanggal 15, betoel doewa djam lebi doeloe sabelonnja Hoei-djin pergi mantjing, Emot kaloear dari roemahnja di Gang Lontar dengen gendong boengkoesan. la ambil djalanan jang meneroes ka Toasaibio, menjebrang di djembatan Blandongan, kamoedian teroes djalan ka Patekwan dan masoek ka Gang Toko.
Maski sabenarnja ia pantes bertindak dengen gantjang dan girang lantaran soeda dapet pandjer doewa ratoes, toch sekarang prampoean toewa itoe ada berdjalan dengen meroengkoet dan sabentar-bentar tarik moeka meringis.
Emot itoe sadari kemaren ada dapet sakit demam. Apa sebabnja maka boleh dateng itoe penjakit, ia sendiri tida taoe, atawa sekali poen ia bisa rasaken, boleh djadi ia tida nanti soedi boeat mengakoeh teroes-terang.
Kaloe dikata lantaran kagirangan, didengernja seperti moestahil jang rasa girang bisa datengken bintjana, tapi sabenarnja adalah begitoe. Sapoelangnja dari Kampoeng Baroe, di waktoe malemnja teroes sampe pagi ia tida dapet poeles. Hatinja mengomong sadja, bagimana ia misti goenaken itoe oewang jang soeda ada dalem tangannja, brapa banjak oentoeng jang nanti terdapet dari kerdjahannja, bagimana ia nanti goenaken itoe oewang jang bakal mendjadi miliknja, daja-oepaja apa ada ang paling baek, soepaja kerdjahannja tida djadi gagal. Begitoelah terpoeter-poeter ia bikin panas otaknja, sampe achirnja matahari terbit. Koetika itoe ia rasaken seperti kapalanja ada djadi bengap, badannja dirasaken melajang, dan pengabisannja ia djadi meriang.
Di itoe hari djoega Emot ada lebi soeka traoesa gendong boengkoesan, kerna ia poenja antero toeboe masi ada tida karoean rasanja. Tapi ia pikir: „Kaloe goea tida djalan seperti tjengkauw, habis dateng-dateng pergi ka Gang Toko boeat lepas oempan, ini ada banjak tida baeknja. Sedikitnja boleh djadi orang nanti pasang mata pada goea. Kaloe kadjadian begitoe, nanti membikin soesa goea poenja oeroesan.“ Lebi djaoe, bilah menoeroetin enak badannja, memang Emot ada lebi soeka tinggal di roemah, tapi kombali ia merasa kwatir, jang tjara begitoe nanti hilang tempo dan achirnja samoea nanti djadi terlaloe laat. Itoelah sebabnja ia soeda paksa sadja berdjalan, maski poen ia poenja awak sabetoelnja masi soemeng, satoe penjakit jang tida boleh dibilang enteng bagi orang seperti ia, jang soeda banjak oemoer.
Tatkalah sampe di Gang Toko, lantas sadja Emot itoe masoek ka tempat kadiamannja satoe toekang roti baso, jang terkenal di sitoe seperti roemahnja Lim Koei-liat. Entjimnja Soan-nio djoestroe baroe habis berbenah dan lagi bertjokol di krosi sembari tampin siri, samantara si nona tjantik sendiri sedeng asik mendjait.
„Maoe belih tjit, nona-nona, kaen jang bagoes dan moera?“ kata Emot dengen paksa dirinja boeat pasang moeka tertawa.
Soan-nio tinggal tida menjaoet, tapi itoe bekas njonja Tek-kin lantas berkata:
„Mana ada doeitnja, bi Emot, mentar-mentar tanjain belih barang sadja.“
„Hala doeit di kantong masa bisa karoejoek! Hajolah toeloeng lakoein satoe-doewa potong. Badan sampe sekarang masi rasanja tida enak, tapi soeda misti dipaksa boeat djalan: begitoelah oentoengnja orang tjari sasoewap nasi, nona-nona, panas manda kapanasan, sakit-sakit misti ada djoega di tengah djalan, tjoema sadja mati belon taoe bakal ada di mana.“
„La djangan kata begitoe, bi Emot,“ kata poelah njonja Koei-liat, „di sini djoega boekannja orang senang. Liat sendiri: dari gelap boeta, sampe begini hari baroe habisan.“
„Djadinja tida maoe dilakoehin saia poenja dagangan ini, nona-nona? Hai taoeh bagimana ini hari poenja peroentoengan! Njawak rasanja masi griming-griming, kaloe toeroetin badan, kapinginnja tinggal tidoer-tidoeran di roemah.“ Sambil kata begitoe laloe ia gendong kombali boengkoesannja dari batoe, dan pergi berdjalan kaloear, sasoeda lebi doeloe mengasi tanda pada entjimnja Soan-nio, jang koetika itoe sedeng mengoenja siri.
Njonja moeda itoe lantas toeroet berbangkit, dan laloe ikoetin tjengkauw itoe berdjalan kaloear.
Emot berdoedoek di baleh jang pernahnja di samping pintoe sabelah loear, kamoedian laloe ia berkata dengen bisik-bisik:
„Saia kenal nona soeda lama, makanja ini hari saia djadi brani bitjara. Baroe ini kan saia ada bitjara perkara si nona Soan? Sekarang saia maoe bawa kabar lagi. Ja, orang kata djoega apa, ja, nona: perkara omong ma tida djahatnja, kaloe sama-sama soeka, ja djadi, tida soeka la soeda. . .“
Tjengkauw itoe mendehem bebrapa kali, dan sasoeda telan loeda laloe ia berkata lagi:
„Ada jang maoe. la kapingin berbini moeda, sebab ia salamanja tida bisa akoer sama bininja jang sekarang. Orangnja kaja; ia si kata, brapa djoega nona minta, ia nanti kasi boeat ganti nona poenja onkost piara, tapi saja lantas poetoesin sadja, jang nona boekannja lantaran liat oewang; betoel engga, ja, oewang itoe pendek djalannja. Memang djoega kita poenja kapingin, asal sadja ia bisa hidoep broentoeng laki-bini. Tapi ia maoe lekas."
„Siapa orangnja ?“ „Baba Kek-soen, soedagar besar di Pintoe Ketjil.“
„Bi Emot poenja pengliatan bagimana, apa tida ia nanti siasia ?“
„Itoe saia brani tanggoeng. Kaloe orang jang pembosenan saia djoega takoet masoekin bitjara sama nona. Ini orangnja soeda sampe oemoer, pikirannja djoega soeda tjoekoep. la djoega kata sama saia, makanja ia maoe anak prawan, sebab ia boekan maoe tjoema boeat satoe doewa hari sadja.“
„Ja, saia djoega soeda omong sama entjeknja. Entjeknja kata: Ja, kitaorang miskin memang nak misti dikasi orang, tjoema djanganlah sampe jang boleh djadi siasia. Ha, keh saia si tida harep senang, asal sadja ada tempat boeat toempangin diri di hari toewa soeda tjoekoep.“
„Saia djoega kira jang nona tentoe ada pikir begitoe. Kaloe saia poenja pengliatan, nona boleh kasi. Ja, banjak-banjak si saia tida brani bilang, tapi kaloe boeat nona poenja penghidoepan di hari toewa sadja si pendeknja boleh traoesa salempang. Tapi ia maoe lekas, sebab ia soeda merasa tida bisa tahan sama bininja jang sekarang.“,
„Bagimana lekas si ia poenja maoe ?“
„la kata begini: Emot kaloe bisa dalem satengah boelan, boleh, kaloe tida tjari jang laen sadja, sebab goea tida bisa menoenggoe lama-lama. Kaloe dipikirin ja betoel djoega nona: siang ia soeda “berkerdja tjapeh boeat tjari doeit, habis malem ia tida bisa dapet kesenangan dari bininja.“
„Kliwatan amat, bi Emot, maoe dikroepoekin begitoe! Ini hari ngomong, ini hari maoe lantas djadi.“
„Pendeknja begini da, samentar nona berdami sama baba, besok saia dateng lagi boeat trima kabar. Sabetoelnja ia soeda ngomong sama saia kemaren doeloe, tapi sebab kemaren saia dapet sakit, djadi baroe saia dateng ini hari.“
Sambil kata begitoe Emot gendong boengkoesannja, dan berdjalan pergi, sasoeda lebi doeloe kaloearken lagi bebrapa boedjoekan.
Dari sitoe tjengkouw itoe teroes poelang ka roemahnja dan tinggal teroes itoe satoe hari tida pergi mendjoewalan.
Djoega di itoe malem ia tida bisa tidoer enak. Soenggoe ia poenja mata soeda saksiken betoel, jang njonja Koei-liat sapoeloe sambilan nanti bakal serahken Soan-nio, tapi hatinja itoe toewa bangka sanantiasa masi merasa kwatir, jang kerdjahannja nanti mendjadi gagal.
Oleh kerna itoe, baroe sadja hari moelahi fadjar, Emot itoe soeda bangoen dari tidoernja, dan doedoek berpikir di atas randjang, bagimana ada jang paling baek ia atoer bitjara soepaja djadi meresep di orang poenja hati. Kamoedian sigra ia bersisir, dan koetika ia liat matahari soeda naek tinggi laloe ia kaloear dari roemahnja.
Sekarang ia dapetken njonja Koei-liat Itoe ada doedoek di baleh, boleh djadi sedeng menoenggoeken ia poenja dateng. Emot lantas gantjangken ia poenja tindakan, bikin djadi doewa kali lebi tjepet.
„Hai djalan dari roemah ka mari sadja sampe begini pajah,“ kata tjengkauw itoe, sasoeda doedoek sama-sama di baleh.
„Entjeknja baroe sadja kaloear mendjoewalan, si Soan lagi berbenah sendiri di dalem. Saia samalem soeda berdami dari itoe perkara Entjeknja kata, ia taoe Kek-soen itoe ada orang baek-baek, dagang hasil boemi ta apa katanja. Lebi djaoe ia serahken saia timbang sendiri, kerna ia kata, Soan nio ada saia jang poenja tjoetjoe. Dari samalem saia pikirin belon bisa ambil poetoesan jang tentoe.“
„Kaloe saia si kata lebi baek nona kasi sadja, Koerang bagimana lagi: orangnja sampeh kaja, lagi soeda tjoekoep oemoer.
„Itoe si ia maoe begitoe lekas, djadi pikiran saia terlaloe kasian sama si Soan. Anak memang soeda tida ada mah-bapanja, habis masa kita serahken sadja menta-menta? Namanja anak prampoean, orang kata pakeh kembang tjoema sekali.“
„Habis ia soeda poenja maoe begitoe, bagimana ? Kaloe saia si kata orang poenja penghidoepan ada pandjang djalannja. Ini hari kita serahken menta-menta, siapa taoe besok-noesa ia nanti djadi orang jang paling senang. Apa lagi nona Soan bisa dapet anak, soeda traoesa ditjeritaken lagi."
„Apa ia maoe tjampoer sama bini toewanja ?“
„Kaga, itoedia soeroe saia lekas-lekas tjari satoe roemah. Dari kemaren doeloean djoega ia soeda kasi oewangnja sama saia saratoes lima poeloe. Ia kata, sebab maoe lekas-lekas, tjari sadja doeloe roemah-roemah ketjil jang sembarangan; nantinja djoega gampang.
„Ja, saratoes lima poeloe boeat onkost ketak-ketik sadja djoega soeda habis. Bi Emot taoe sendiri bagimana orang perabotin roemah. Apa lagi ini si Soan, sedikitnja djoega misti dibekalin ini-itoe jang moera-moera.
„Begini tegesnja: sabetoelnja ia kasi saia doewa ratoes; nona bisa pikir sendiri, mana ia pertjaja kasi saia banjak-banjak; tentoe ia takoet saia nanti oentoengin sabodak-bodak. Saia tadinja ingetan maoe dapet djoega sedikit, namanja djalan kasana-kamari, tapi kaloe nona kata begitoe, soeda ambil sadja samoeanja, saia nanti minta laen lagi sama ba Kek-soen sendiri.“
„Doewa ratoes djoega sabetoelnja masi kliwat katjentet boeat onkosin satoe anak prampoean jang maoe kaloear pintoe. . . . .“,
„Tadi saia soeda bilang sama nona: di blakang kali gampang; boeat orang seperti baba Kek-soen oewang sariboe doewa riboe si brapa harganja; kendati ampat lima riboe djoega tentoe ia tida sajang. Jang diharepin sekarang, tida laen, tjoema si nona Soan biar dapet disajang. Sekarang kendati kita sembarang-barangnja, asal sadja boleh pandjang djalannja, boekan begitoe nona ?“
„Ja, saia djoega boekan ja maoe pandang oewang sadja. Kita orang hidoep asal sadja djangan terlaloe soesa di hari toewanja soeda tjoekoep. Saia sendiri tida ada poenja anak, ikoetin laki begini poenja soesa; jang saia taroh harepan tjoema si Soan; mengkali sadja saia bisa toempangin diri soeda toewanja.“
„Kaloe nona bisa kata begitoe, lebi baek. Sekarang kita tinggal bitjaraken boeat oeroes si nona Soan. Saia rasa baek nona sendiri jang pergi tjarihin roemah dan sakalian perabotin apa jang perloe, kerna nona tentoe ada lebi taoe bagimana oeroesannja orang Tjina.“
„Bi Emot jang ngider dowang tentoe ada lebi taoe dimana ada roemah.“
„Di Gang Togee ada satoe roemah kosong, tjoema saia tida taoe siapa jang poenja; nona pergi tanja-tanja orang sadja.“
„Ja, masa enko Kek-soen maoe roemah keh gitoean; bi Emot bolehnja heran, salah-salah ia boleh djadi mara sama kita.“ „Soeda di sitoe ada jang paling baek, nona denger sadja saia poenja moeloet. Sebab ba Keksoen sendiri soeda bilang sama saia: Emot, loe misti tjarihin satoe roemah djangan di tempat rame, biar djelekan sedikit tida kanapa. la kata, ada banjak tida enak, lagi ia maloe, kaloe baroe-baroe sadja ia berbini moeda, ada banjak orang dapet taoe.“
„Mengkali ia takoet sama bininja; salah-salah nanti kaloe ini perkara kataoehan sama bininja dan bininja berkeras, nanti ia siasia sama si Soan.“
„Nona bolehnja heran, soeka pikirin begini-begitoe jang kaga misti, bikin hati djadi sangsi tida karoean. Kapan saia soeda bilang: ba Kek-soen makanja maoe berbini moeda, sebab ia tida sanggoep sama bininja jang sekarang. Sekarang tjoema kita harepin soepaja nona Soan dapet disajang. Kaloe diliat dari roepanja si nona, tentoenja ia bakalan disajang kliwat-liwat. Kaloe nona Soan soeda dapet hati, apanja jang ditakoetin lagi? Orang kata ga apa: boleh terlepas sama jang toewa, kaga boleh terlepas sama jang moeda. Nona poenja diri djoega soeda traoesa dikwatirin lagi; kaloe kata boeat menoempang senang sadja si soeda barang jang tentoe.“
„Tapi bagimana nanti dioeroesnja ini perkara? Soenggoe serebah soesa. Kaloe saia soeda dapet roemah habisnja bagimana? Masa saia bawa sadja si Soan ka sana dan tinggalin ia sendirian ? Apa baek saia toenggoein sama-sama ? Tapinja saia maloe la, belon taoe katemoe belon apa, dateng-dateng kapergokan di sitoe. Bagimana baeknja bi Emot poenja pikiran ?“
„Hala nona ngomong sapata sadja saia soeda mengarti samoeanja. Memang djoega anak prawan masa ditinggal sendirian, soeroe toenggoein lakinja ? Salah-salah boleh kadjadian lagi seperti di dalem tjerita: lelaki jang poenja belon dateng, lelaki loearan nanti dateng ngadoe-biroe. Tapi perkara itoe apanja nona pikirin, itoe samoea saia sampe mengarti. Lebi doeloe saia nanti kasi taoe ba Kek-soen, kapan misti dateng di itoe roemah, habis dari sini saia sama nona nanti anterin nona Soan ka sana. Nah, kaloe nona soeda liat nona poenja tjoetjoe soeda tentoe tempatnja, nona boleh lantas poelang lagi; saia sendiri jang nanti toenggoein: kendati misti nginep samaleman djoega masa saja tinggal-tinggal kaloe ba Kek-soen belon dateng ?“
„Nantinja masa si Soan sendirian sadja di itoe roemah, enko Kek-soen tentoe tida salamanja ngedjontrot di sitoe. Biar nanti saia tjari'in satoe boedjang prampoean boeat temenin.“
„Kaloe nona bisa pikir sampe begitoe djaoe, ba Kek-soen nanti djadi lebi senang lagi. Ia djoega tentoe tida soeka, nona Soan tinggal sendirian sadja dalem roemah, kaloe ia tida ada sama-sama. Djadinja poetoes da kita poenja bitjara, ja, nona ? Saia lantas boleh kasi taoe ini perkara sama ba Kek-soen. Saban ada sempat saia nanti mampir ka mari boeat ngebantoein. Sekarang saia maoe pergi mendjoewalan da, hai matahari soeda naek begini tinggi, toh bisa dapet doeit toh kaga ini hari.“
„Sering-sering dateng ja, bi Emot, boeat bantoe rekokin.“
„Traoesa takoet. Tapi saia kira baek ini hari djoega nona pergi liat itoe roemah; lebi lekas beres kan lebi baek?“
„Ja, satoe kali soeda djadi begini, saia djoega maoe lekas-lekas oeroes soepaja lekas djadi selesi. Nantilah liat, samentar djoega kaloe saia sempat, saia nanti pergi.“
„Soeda da ja, nona, saia maoe brangkat sadja.“
Sambil kata begitoe Emot lantas berdjalan pergi. Sasoeda menengok lagi sakali ka blakang, laloe ia berkata dalem hati :
„Dapet tiga ratoes jang tentoenja. Kaloe ini perkara bisa dioeroes lebi lekas, goea nanti minta tambanja. Tapi boleh djadi nona Soan dan entjimnja jang nanti paling broentoeng besar lantaran goea poenja kerdjahan ini. Goea djoega tida pertjaja, jang ba Kek-soen nanti tida tergila-gila sama dia, orang masi begitoe moeda dan tjakap. Tapi engga apa, masa kamana parannja; sedikitnja goea boleh sering-sering glendotin sama dia.“ Dengen kagirangan begitoe Emot teroes berdjalan sampe ka Kampoeng Baroe, dan masoek ka dalem itoe roemah jang dipagerin poehoen toelang-toelang, tapi oleh kerna di sitoe tida ada soeatoe orang salaennja boedjang-boedjang, tjengkauw itoe djadi kapaksa tahan peroetnja jang menjimpan banjak perkatahan, dengen menoenggoe doedoek di batoe.
Sampe lontjeng mengoetaraken poekoel doewa belas ia tinggal di sitoe, tapi koetika itoe ia lantas djadi merasa amat djengkel. Laloe ia gendong kombali boengkoesannja dan teroes djalan poelang ka roemah.
„Tapi besok lohor djoega masa kamana parannja ia tida dateng di sitoe," kata Emot sasoeda rebahken diri diatas pembaringan. „Goea misti sering-sering bisa dapet perkara seperti ini, tentoe djoega tida lama goea boleh traoesa gendong boengkoesan lagi.“