Pembalesan Kedji/Bab 6
VI.
NASIBNJA NONA SOAN.
Matahari baroe sadja silam ka Barat. Samoea roemah di Gang Toko soeda kaliatan amat soeram, dan dari bebrapa pintoe jang terboekah malaenkan bisa diliat kelak-keliknja api pelita jang menjorot teroes ka djalanan.
Njonja Koei-liat ada doedoek di baleh depan roemahnja dengen saorang diri. Tingkah-lakoenja menjataken, jang itoe waktoe ia ada amat tida bisa menahan sabar. Ia naekin kadoewa kakinja diatas baleh, ia ngiser ka mari, geser ka sana, senderken blakangnja di tembok, kamoedian laloe ia mengelah napas, dan achirnja berkata dengen soeara menggrendeng:
„Tjilaka betoel! Sampe begini hari blon kaliatan mata-idoengnja. Kita pikiran maoe adjak bitjara perkara ini-itoe.
Kamoedian njonja moeda itoe laloe masoek ka dalem, dimana ia dapetken Soan-nio sedeng mandi. Ia doedoek di salah-satoe krosi, dan sembari menampin siri, ia berkata dengen menarik moeka manis :
„Habis toekar pake an jang baroe, mentar goea maoe adjak pergi. Maoe berias jang lekasan.“
„Maoe pergi ka mana, tjim ?“
„Hala loe ikoet sadja, maoe apa si tanja-tanja begitoe ?“ Soan-nio siram lagi badannja dengen aer dari timba jang pengabisan, kamoedian laloe ia salin talesannja dengen kaen jang kering, dan naek dari tjimtjhe.
„Toekaran jang baroe, itoe toh soeda terlaloe boesoek“ kata poelah njonja Koei-liat. „Kan ada kaen badjoe jang goea baroe beli'in ?“
„Hala ini djoega boleh, tjim. Malem-malem ini!“
„Toekar soeda djangan bikin goea djadi djengkel. . . . . . . . . .}“
Samantara itoe kadengeran soeara orang boeka pintoe, dan tida sabrapa lama berselang, Emot laloe masoek ka dalem.
„Gini waktoe baroe kaliatan,“ kata lagi njonja Koei-liat. „Dari tadi ditoenggoein bolehnja kamana ?“
Sambil bitjara begitoe ia berbangkit, dan dengen diboentoeti oleh Emot, laloe ia berdjalan teroes kaloear.
„Apa soeda sediah ?“ tanja prampoean toewa itoe, sasoeda berdoedoek di baleh, ,sekarang sadja kita brangkat. Kaloe sampe ba Kek-soen dateng doeloean, djadi tida baek boeat nona, tida baek boeat samoea-moea djoega."
„Soeda poekoel brapa si 'ni ?“
„Ampir poekoel delapan.“
„Nah ja, baeklah.“ Sambil kata begitoe, njonja moeda itoe masoek lagi ka dalem, seraja berseroe :
„Soan ! Soan ! soedahan, Soan ?“
„Tanggoeng, tjim, sedikit lagi.“
Gadis itoe sedeng berpoepoer. Lantaran entjimnja treakin padanja, ia djadi berias lebi tjepat, hingga sigra djoega soeda djadi selesi.
„Hajo da kita brangkat, lama-lama nanti kamaleman,“ kata poelah njonja Koei-liat.
Soan-nio ikoeti entjimnja berdjalan kaloear. Njonja Koei-liat lantas maoe mengoentji pintoe, tapi gadis itoe laloe berkata :
„Kaloe mentar entjek poelang, bagimana ? Dengenan ia belon makan. Lebi baek rapetin sadja dan kirim-kirim sama tetangga.“
„Ja, begitoe djoega baek. Tapi kamana ia soeda pergi, sampe begini waktoe belon poelang ? Orang maoe djalan bolehnja ada sadja jang begini-begitoe.“
Sambil menjomel begitoe, njonja moeda itoe laloe pergi menjeblah, dan seroeken dari depan pintoe :
„Nja Tjeng, nja Tjeng, saia kirim-kirim pintoe, ja! Mentaran saia balik.“
„Baek," saoet satoe soeara dari dalem, „maoe ka mana ?“
„Dekat, mentaran djoega saia balik.“
Kamoedian Soan-nio bersama entjimnja itoe lantas berdjalan, diboentoeti oleh Emot, jang koetika itoe roepanja ada amat bergirang. „Maoe ngikoet, bi?“ tanja gadis itoe tatkalah soeda dekat sampe ka moeloet gang. „Tapi maoe pergi ka mana ini, tjim ?“
Njonja Koei-liat tida mendjawab, tapi Emot laloe menjaoet, katanja :
„Saia ikoet la boleh. Boeat apa doedoek kahar, dekat-dekat kita djalan sadja, mentaran djoega sampe; lagi soeda gelap masa kanapa?“
„Eh, bi Emot soeda taoe lebi doeloe, maoe pergi ka mana 'ni?“
Prampoean toewa itoe merasa jang ia soeda salah bitjara, lantaran apa djadi ia tinggal diam sadja, berlaga tida denger Soan-nio poenja pertanjahan.
Orang ambil djalanan dari Gang Lamtjeng, dan dari sitoe teroes ka Gang Togee. Emot, jang koetika itoe ada berdjalan di moeka, lantas memboeka pintoenja satoe roemah ketjil jang pernahnja di sitoe, kamoedian sigra ia masoek kadalem dan pasang lampoe-lampoe.
Njonja Koei-liat, jang katinggalan sedikit djaoe di blakang, djoega achirnja masoek ka dalem pertengahan roemah itoe dengen dandan pada Soan-nio.
„Ka mari, tjim? Roemah siapa ini?“ tanja gadis itoe jang tida mengarti soeatoe apa. „Belon taoe satoe kali saia dateng di sini.“
Njonja moeda itoe tida lantas menjaoet. Ia djatoken dirinja di satoe krosi gojang jang ada di itoe pertengahan, dan tinggal diam sampe sakean lama salakoe orang jang sangsi, Emot berdiri di dekatnja Soan-nio.
„Roemah siapa ini?“ tanja poelah gadis itoe, jang njata ada merasa samingkin heran. „Mana orang jang poenja roemah, dateng-dateng entjim boleh doedoek di sitoe?"
„Satoe orang soeda belihin ini roemah boeat loe, Soan,“ kata njonja Koei-liat dengen soeara jang tida kaloear lampias. „Sekarang ini samoea perabotan loe jang poenja. Goea si tjoema harep soepaja bisa noempang senang.“ Kamoedian dengen, hadepken pada itoe prampoean toewa jang tida brentinja menjengir, laloe ia berkata : „Bi Emot, trima ja si nona? Sekarang saia maoe poelang.“
Dengen melengak Soan-nio mendenger bitjaranja ia poenja entjim itoe. Samantara itoe njonja Koei-liat soeda lantas kaloear dari itoe roemah dan berdjalan pergi. Emot tinggal berdiri di ampirnja si gadis.
Koetika meliat entjimnja berdjalan kaloear, Soan-nio lantas memboentoeti dari blakang, tapi Emot, jang roepanja soeda bisa mendoega lebi doeloe, lantas pegang tangannja gadis itoe, seraja berkata dengen bersenjoem:
„Nona maoe ka mana? Sekarang nona poenja roemah di sini. Mari ikoet saia ka dalem. Saia nanti oendjoekin nona poenja kamar, nona poenja tempat tidoer, nona poenja dalemtoe pakean,. . . . . . . .}“ Soan-nio lantas emposken pada itoe prampoéan toewa, tapi lebi djaoe tinggal diam sampe sakean lama. Ia merasa ada seperti mengimpi, denger itoe segala perkatahan dari entjimnja dan Emot. Sabegitoe djaoe ia tida lantas bisa mengarti, apa sebab orang berboeat begitoe padanja.
Sabenarnja djoega samoea ada terdjadi begitoe mendadak dan begitoe aneh bagi gadis itoe. Mengapatah dengen koenjoeng-koenjoeng entjimnja boleh adjak ia ka sitoe, habis lantas tinggalken ia bersama Emot? Mengapatah entjimnja dan Emot, tadi berkata, bahoewa roemah itoe ada ia jang poenja?
Ini samoea tida dapet diartiken oleh Soan-nio, jang tida lantas bisa mendoegah boesoek, dan samantara ia tinggal berdiri seperti kasima, njonja Koei-liat soeda berdjalan djaoe.
Entjim itoe, lantaran soeda kenah digelapken dengen bitjara hal kakajahan dan lojarnja Kek-soen, achirnja soeda djadi mendengeri sadja moeloetnja. Emot, jang memangnja ada amat bisa kaloearken madoe.
Betoel djoega bekas njonja Tek-kin itoe tida boleh disangkal ada menjajang pada tjoetjoenja, tapi klakoeannja menjajang itoe boekan boleh dioepamaken seperti orang sajang satoe moestika atawa soeatoe apa jang soesa didapetken lagi. Ia sajang Soan-nio ada seperti orang menjajang soeatoe barang mahal, jang apabilah didjoewal, tentoe aken mendapet harga bagoes.
Oleh kerna itoe djoega, koetika pertama kali sadja mendenger bitjaranja Emot, njonja moeda itoe poenja hati soeda lantas djadi tergerak, dan pada waktoe prampoean toewa itoe dateng kadoewa kalinja, mengasi taoe jang Soan-nio bisa dapet takepan saorang hartawan, lantas djoega dengen gampang bisa dikorek perkatahan satoedjoe dari entjimnja si gadis itoe.
Pada tanggal 16 njonja Koei-liat itoe soeda poetoesken bitjaranja sama Emot, jang ia soeka kasi Soan-nio boeat mendjadi goendiknja Kek-soen, dan moelahi pada esokannja soeda tida brentinja diatoer berbagi-bagi perkerdjahan, hingga sekarang ini, baroe sadja 23 Phegwee, samoea persediahan boeat pertemoeannja gadis itoe sama orang jang penoedjoe padanja,soeda djadi selesi.
Lantaran itoe oewang doewa ratoes tida sampe atawa tida ada kalebiannja boeat perabotin satoe roemah-tangga, Emot soeda masoeki perkatahan pada babanja, dan dengen lojar Keksoen soeda tambahken lagi doewa ratoes. Itoelah taroetama jang mendjadi sebab, kaloe samoea soeda bisa terdjadi begitoe lekas, kerna klakoeannja Kek-soen jang begitoe gampang soeda kaloearken oewangnja, djoestroe membikin njonja Koei-liat lantas mendapet harepan dalem hatinja, jang ia sering-sering nanti boleh mengglendot kaloe ada dalem kasoesahan.
Emot maoe berlakoe lebi terliti, soepaja dengen gampang samoea bisa terdjadi menoeroet betoel sabagimana harepannja, dengen tida katemoeken soeatoe halangan lagi. Itoe sebab ia soeda kisiki pada bekas njonja Tek-kin itoe, aken djangan kasi taoe lagi itoe perkara pada Soan-nio.
Aken tetapi, sabagimana orang mengimpi bisa mendoesin, begitoe poen plahan-plahan gadis itoe moelahi mengarti, bagimana doedoeknja perkara. Pirasatnja membilangi, jang dirinja soeda didjoewal dengen diam-diam, dan achirnja, koetika ia pikir boelak-balik, menginget bagimana bebrapa kali entjimnja soeda bitjara kasak-koesoek pada Emot, bagimana entjimnja dalem hari-hari jang paling blakang ada amat ripoe, bagimana dengen tida soeatoe sebab ia soeda dibelihken pakean baroe jang bagoes dan bagimana entjimnja dan entjeknja soeda beroelang-oelang bitjaraken perkara orang mendjadi goendik, — Soan-nio lantas dapet satoe rerasahan pasti, jang ia soeda didjadiken orang poenja bini moeda, dan sekarang ini sedeng menoenggoeken itoe orang jang penoedjoe padanja.
Dengen mendadak ia djadi amat aseran, dan berkata pada Emot dengen soeara keras:
„Toewa bangka, loe maoe bilang kaga, apa sebab goea ditinggalin di sini ?“ Emot meliat glagatnja koerang baek laloe ia mengoentji pintoe, kamoedian berkata dengen soeara lemah-lemboet :
„Nona belon djoega mengarti, apa sebabnja nona dibawa ka mari? Mari ikoet saia ka kamar, saia nanti tjeritaken satoe-persatoe.“
„Kanapa loe koentji pintoe, toewa bangka engga maoe mampoes?“ kata Soan-nio dengen soeara lebi keras lagi. „Lekas boeka dan anteri goea poelang ! Kaloe kaga goea nanti medjerit sakoewat-koewatnja biar samoea orang dateng ka mari.“
„Ai, nona kanapa boleh gegaba begitoe? Saia siapa; nona poenja entjim sendiri jang soeroe saia di sini, toenggoein sampe ba Kek-soen dateng. . . . .“
„Siapa itoe ba Kek-soen, bangsat? !“ berseroe Soan-nio dengen soeara amat aseran. „Lekas boeka pintoe dan anterin goea poelang! Kaloe loe engga maoe, toenggoe di sini, goea nanti poelang sendiri!“
„Nona kanapa boleh begitoe engga poenja pikiran?“ kata Emot dengen soeara sabar. „Boekan saia kaga maoe tjeritain terang satoe-persatoe, tapi mari toh masoek doeloe, kan ada lebi enak kita bitjara?“
„Goea kaga maoe perdoeli sama loe poenja batjot, bangsat !“ berseroe Soan-nio dengen amat sengit. „Lekas kamari'in itoe koentji, goea maoe poelang, kaganja misti dengerin loe poenja omongan, bahtauw toewa, pedjadjaran !“ „Eh, eh, kanapa nona lantasnja boleh djadi begitoe mara sama saia? Saia si namanja orang disoeroe, diprenta apa djoega tentoe menoeroet. Kaloe nona maoe taoe terang doedoeknja perkara, saia nanti tjeritain, tapi mari toh kita doedoek di dalem. Kaloe nona soeda denger terang, habisnja kaga maoe tinggal di sini, masi ada tempo boeat nona pergi, saia tentoe kaga bisa tjegat.“
Sambil kata begitoe Emot dandan tangannja Soan-nio, dan maoe adjak masoek ka dalem kamar, tapi gadis itoe lantas merontak, seraja berkata dengen aseran :
„Loe maoe apa adjak goea ka mari? Loe kira goea orang bagimana maoe diboeat poenja soeka begitoe ?“
„Eh denger doeloe saia poenja bitjara, djangan lantas mara tida kadjoentroengannja. Kan nona maoe taoe apa sebabnja nona dibawa ka mari? Nah, saia nanti tjeritain.“
Saparoh lantaran kapoetoesan daja, saparoh lantaran kapingin denger bagimana orang soeda atoer boeat dirinja, Soan-nio achirnja djadi menoeroet djoega masoek ka dalem itoe kamar soepak, dimana tida ada lebi dari satoe pembaringan, satoe lemari, satoe medja ketjil dan doewa krosi.
„Apa jang loe maoe tjeritain lantas tjeritain, goea kaga kasoekahan tinggal lama-lama di sini,“ kata gadis itoe kamoedian. „Nona doedoeklah doeloe, soepaja kita bisa omong lebi enak. Kan tjerita saia djoega enga bisa beres kaloe nona tersanga-sanga begitoe?“
Soeda katelandjoeran Soan-nio djadi toeroet ambil tempat di salah-satoe krosi. Emot lantas mengglepok di djoebin, kamoedian lantas berkata poelah :
„Begini : nona poenja entjim soeda kasi boeat nona didjadiken bini moeda orang, makanja nona dibawa ka mari.“
Soan-nio tida merasa heran denger itoe bitjara, kerna memang poen soeda ia dapet doega lebi doeloe. Lantas ia berkata :
„Tapi goea kaga taoe itoe perkara dan goea engga kapinginan djadi segala orang poenja bini moeda.“
„Kaga maoe habis nona maoe apa sekarang ? Maoe poelang, dimana nona poenja roemah ? Nona maoe mengadoeh sama siapa, sedengan nona poenja entjim sendiri soeda soeka kasi boeat nona djadi orang poenja bini moeda? Kasi nona poelang sekarang, nona poenja entjim tentoe lantas oesir; ia tentoe djadi mara sebab nona soeda kaga maoe toeroet ia poenja prenta. Nona maoe kamana habisnja ?“
Soan-nio poenja moeka dengen mendadak lantas djadi poetjat, tatkalah mendenger bitjaranja Emot itoe. la merasa amat sakit hati, tapi sabaliknja tida bisa berdaja soeatoe apa. Ia soeda tida ada poenja orang-toewa, ia malaenken menoempang sama entjimnja, dari itoe kamanatah ia misti poelang?
Tadi, koetika napsoe amaranja sedeng berkobar, ia sama sekali tida menginget soeatoe apa, tapi sekarang, sasoeda kaängkoehannja itoe kenah diamblesin dengen bitjaranja Emot jang begitoe tadjem, segala perkara bagi ia mendjadi terang seperti katja, dan oleh kerna pikir boelak-balik tida ada katinggalan soeatoe daja boeat ia melawan orang poenja poetoesan jang kedji itoe, hatinja lantas mendjadi sesak. Laloe ia berbangkit, lepasken dirinja diatas pembaringan, selesapken kapalanja dibawa bantal, dan laloe menangis tersedoeh-sedoeh.
Meliat begitoe, dengen bersenjoem Emot djalan kaloear, dan berkata pada diri sendiri dengen soeara menggrendeng:
„Sagitoe adja ko? Bengisnja persetan; goea kira bagimana keh, habis sekarang menangis. Orang jang menangis boleh traoesa disalempangin. Goea sekarang tjoema misti toenggoein si baba. Kaloe ia dateng, oewang, habis goea boleh pergi soeda. Biar dia kerak-kerok berdoewa, itoe boekan goea poenja tanggoengan.“
Kamoedian laloe prampoean toewa itoe memboeka pintoe, dan doedoek mengglepok di djoebin depan roemah, seraja sabentar-bentar melongok ka sana-sini.
„Tadi goea denger tongtong soeda poekoel sambilan," berpikir prampoean toewa itoe dalem hati. „Kamaren ia kata maoe dateng kira-kira begini hari, habis sampe sekarang ia belon kaliatan. Goea djengkel betoel la kaloe misti toenggoe lama-lama di sini. Sekarang goea soeda bisa bikin ia nangis, tapi saändenja samentar ia maen gila-gilahan lagi, bagimana akal ?"
Menginget sampe di sitoe Emot mengelah napas, tapi kamoedian laloe ia berkata dengen soeara dalem tenggorokan :
„Tapi biar bagimana tentoe goea tida nanti kasi ia maen gila-gilahan, itoe anak. Biar ia boto, kaga oeroengan goea nanti bisbis ia poenja moeka, kaloe ia maoe gampang-gampangan sadja bikin kepiran goea poenja oewang tiga ratoes. Anak kaga taoe diri ! la poenja kakirahan bagimana, taoeh ! Apa mengkali ia maoe harep dapet laki jang lebian lagi ? Hm! ia rasa enak sadja orang kaja-kaja maoe sama dia boeat bini toewa !“
Samantara itoe Soan-nio masi teroes bersedoeh-sedoeh dalem kamar dengen membekam di pembaringan. Di itoe masa nona moeda itoe poenja pengrasahan hati adalah boleh dioepamaken seperti orang jang maoe binasaken satoe matjan tapi sabaliknja soeda tida ada mempoenja tenaga aken berboeat demikian.
Tida, sama sekali boekan lantaran tida maoe bersoeami kaloe gadis itoe sekarang ada merasa amat bernapsoe boeat membanta orang poenja kahendak, tapi itoe tjara, itoe perboeatan jang sekarang ada didjalanken oleh entjimnja dan Emot, toelah jang membikin ia merasa dirinja amat dipersakiti.
Betapa besar nona Soan poenja goesar samantara ia melosoh diatas randjang, itoelah ada amat soesa aken diloekisken dengen pena, tapi menoeroet atoeran biasa, djoestroe api amara jang berkobar samingkin besar ada samingkin lekas djoega mendjadi padem, terlebi poelah djika orang ada koetjoerken aer kasedihan boeat bantoe menjiramken itoe.
Begitoelah koetika lontjeng mengoetaraken poekoel sapoeloe gadis itoe merasaken badannja mendjadi lemas dan dingin, kamoedian sigra djoega mendjadi poeles.
Tatkalah itoe Emot soeda melongok kadalem kamar, boeat saksiken bagimana ka'adahannja ia poenja ikan jang sekarang ini telah termasoek didalem djala, dan tempo ia dapet denger jang Soan-nio ada mengorok, prampoean toewa itoe laloe menjeringit, seraja berkata dalem hati:
„Sekarang samoea soeda djadi bagoes betoel-betoel. Kaloe ba Kek-soen lekas dateng, kamana parannja itoe oewang tiga ratoes ? Eh, eh, goea boleh mintain lebian djoega. Kiranja gampang tah, bikin satoe ikan sampe ada sediah boeat makan ? Pendeknja goea maoe tjoba dan goea maoe bitjara.”
Dan dengen moeka girang jang hina sekali laloe ia berdjalan kaloear kombali. Tatkalah ia sampe di pertengahan, lantas ia lepasken dirinja di krosi gojang, dan anggoet-anggoetan di sitoe semberi meremi matanja.
Plahan-plahan soeda djadi poekoel sapoeloe satengah, dan ampir di itoe waktoe djoega saorang lelaki laloe membeloek ka Gang Togee dari djalanan Patike. Ia itoe tida brentinja meliat ka sana-sini pada roemah-roemah jang pernahnja di sitoe, dan tatkalah matanja menampak sorot terang-terang jang kaloear dari satoe roemah ketjil, lantas ia tjepatken tindakannja, hingga dalem bebrapa saät ia soeda ada didepan pintoenja roemah itoe.
„Koerang adjar ini toewa bangka," kata orang itoe dengen menggrendeng. „Kaga taoe, apa ia maoe sampehken kita kabar djahat atawa kabar baek, maka ia soeda lantjang-lantjangan ambil tempat di krosi gojang dan djadi poeles.”
Toewa bangka jang dimaksoedken oleh itoe laki-laki adalah Emot, jang sekarang ini soeda brenti anggoet-anggoetan dan kaliatannja seperti soeda tida mempoenja samanget, sekali poen sabenarnja belon mendjadi sabagimana jang orang ada sangka padanja. Maka djoega itoe soeara menggrendeng soeda lantas dapet didenger olehnja, dan lantas ia berlompat dengen amat kaget, dan koetika prampoean toewa itoe mendapet liat siapa adanja jang berdiri didepan pintoe, dengen mendadak moekanja kaliatan djadi girang sekali. Sasoeda mendehem lebi doeloe, laloe ia berkata sembari menjengir :
„Sampe kesal rasanja saia menoenggoein di sini. Baba si djandji orang tida inget daratan.”
„Koerang adjar, goea sama sekali tida ada langgar djandji. Sekarang baroe poekoel brapa loe tentoe kaga taoe, sebab loe soeda kaenakan ngalamin djadi njonja besar tidoer di krosi gojang, bangsat ! Kaloe begitoe itoe krosi. . . . . . . . . ..”
„Ssst, djangan riboet-riboet,” kata Emot sembari gojang-gojangken tangannja. „Lebi baek mari kita ngomong di loear.”
Sambil bitjara begitoe, prampoean toewa itoe laloe toentoen tangannja itoe lelaki, kamoedian laloe ia berkata lagi :
„Sekarang samoea soeda sediah; si nona boto lagi sedeng poeles boeat baba poenja kaenakan, dari itoe misti tambain lebian boeat saia, jang dari tadi tida brentinja dirongrong.”
„Hai mata doeitan amat, loe Emot! Goea sama sekali belon liat barangnja, dateng-dateng loe soeda maoe bitjarain perkara doeit sadja.”
„Boekan begitoe. Samoea misti dengen patoet. Baba sekarang tinggal trima sediahnja sadja; saia jang soengsang-soembel tadi, dirongrong tida brentinja; sekarang saia maoe poelang soeda, besok saia maoe beli'in apa-apa boeat sedekah; tambain keh barang lima poeloe ma."
„Soeda terlaloe banjak goea habis doeit boeat ini; sekarang loe maoe minta ditambain lagi, baek-baek bagoes.“
„Kan boekan sakali ini sadja saia nanti boewang tenaga boeat baba? Boleh djadi besok atawa noesa saia nanti bisa tjari'in anak prawan jang lebi bagoes lagi, dari itoe misti timbangin toh !“
„Koerang adjar, loe poenja tekoek-tekoekan samoea soeda ada di kantong goea, Emot ! Kaloe lagi maoe oewang apa jang nanti loe kaga bisa? Tapi siapa namanja itoe boedjang jang loe soeda tjari'in boeat nona Soan?“
„Belon ba. Hala baba keh jang kaga taoe sadja. Bagimana bisa sempat tjari boedjang. Makan nasi djoega rasanja engga kaboeroe.“
„Nah, apa goea kata! Kaloe soeda disoeroe ini itoe samoea kaga oeroes. Tapi kan djoega loe soeda sanggoepin itoe, brani engga ngakoeh?“
„Sebab memang saia sanggoep tjari orang jang baek, tapi maoe orang jang baek toh misti plahan-plahan, engga boleh keh orang kabakaran djenggot sadjadi-djadinja sadja. Itoe perkara si pendeknja gampang.“
„Hahaha, tapi soedalah goea engga maoe koetet-koetetan sama loe, segala toewa bangka gila! sekarang loe boleh poelang sadja doeloe, dan pergi tjari boedjang; kaloe itoe boedjang soeda dapet, goea nanti lantas kasi itoe doeit“.
„Baek, tapi sekarang kasi toh tambahnja sadja jang baba maoe kasi presen sama saia.“
„Koerang adjar, siapa jang kata maoe kasi presen sama loe?“
„Hala," kata Emot sembari menjengir.
Kek-soen, jang baroe habis kantongin oewang doewa riboe lebi di medja djoedi, lantas djadi tertawa meliat klakoeannja itoe prampoean toewa. Laloe ia rogo sakoe, dan kaloearken satoe lembar oewang kertas dari sapoeloe roepiah.
Emot lantas samboetin itoe dengen girang dan dengen membilang banjak trima kasi, kamoedian toewa bangka itoe lantas maoe berlaloe, tapi Kek-soen sigra tahan padanja, seraja berkata :
„Besok dapet boedjang atawa kaga loe misti dateng ka mari temanin nona Soan, sebab loe taoe : goea toh misti pergi kerdja.“
Habis bitjara begitoe, laki-laki itoe lantas masoek ka dalem roemah dan mengoentji pintoe. Kamoedian dengen indap-indap ia masoek ka kamar, dimana dengen napsoe berkobar betoel sadja ia dapetken nona Soan jang masi teroes kamoeroep diatas pembaringan dengen menggeros.
Dalem sakedjep itoe Kek-soen rasaken dirinja seperti tida ada di doenia lagi. Itoe waktoe antero doenia, antero alam, boleh dibilang ada berkoempoel mendjadi satoe dalem toeboe dan anggotanja. Sabagi kakoewatannja alam bisa bikin segala benda di doenia mendjadi hidoep, begitoe djoega haroes dioepamaken gerakannja laki-laki itoe poenja dara di itoe masa.
Ia belon dapet liat roepanja gadis itoe jang tjantik, tapi toeboenja Soan-nio, jang koetika itoe ada meloso di pembaringan dengen poeles, itoe sadja soeda sampe tjoekoep boeat rampas pikirannia Kek-soen jang sedar, dan oleh kerna merasa tida sanggoep boeat kendaliken lagi ia poenja napsoe jang mengamoek di dalem dengen amat heibat, lantas ia mengamperi itoe randjang, dimana ia poenja kamanten ada rebah dengen soemanget melajang. Laloe ia peloek dengen tjara begitoe poewas-poewasan, hingga membikin Soan-nio djadi mendoesin dengen sanget terkedjoet. Gadis itoe merontak dengen boeta-toeli sampe ia poenja sikoet achirnja kenah membikin djontor Kek-soen poenja bibir.
Lantaran merasa kawalahan, laki-laki itoe kapaksa lepasken djoega rampasannja, dan berdiri didepan pembaringan dengen sengal-sengal. Soan-nio lantas berdoedoek diatas randjang, seraja mengawasken pada itoe orang jang tadi berlakoe boewas padanja. Koetika plahan-plahan hatinja gadis itoe telah djadi samingkin sabar dan brenti berderedekan, lantas ia kenalken Kek-soen, pada siapa soeda sering kali ia djoewalken roti baso pada waktoe masi berdjalan koeliling seperti anak ketjil.
Tatkala niatnja jang pertama soeda djadi siasia, Kek-soen poen lantas mendjadi sabar kombali. Daranja mengalir samingkin plahan dalem oerat-oeratnja, dan achirnja soeda membikin ia dapet poelah pikirannja jang sedar. Laloe ia oeroet-oeroet badjoenja jang letjak dan poengoeti segala barang-barang jang soeda djadi berarakan diatas pembaringan dari kantongnja. Kamoedian ia boekah badjoenja dan sampirken di krosi jang pernahnja dalem kamar. Satelah itoe laloe ia berdoedoek di tepi randjang, seraja berkata dengen soeara lemah-lemboet sembari tjengar-tjengir :
„Nona, kanapa begitoe katakoetan sama entjek? Kapan nona soeda kenal lama dari masi ketjil, apa sekarang soeda tida inget lagi ?“
Soan-nio tida menjaoet, dan lantas mengisar samingkin ka tengah.
„Mari toeroen kita doedoek omong-omong," kata poelah Kek-soen. „Sekarang djangan maloe-maloe sama entjek.“
Sambil kata begitoe ia madjoe ka tengah dan maoe pegang tangannja Soan-nio, tapi gadis itoe lantas mengemposken salakoe orang jang merasa takoet.
„Nona baekan djoega, di sini sama entjek. Di roemah entjim, apa ? — tida laen nona misti berkerdja tjapeh. Tapi di sini entjek nanti piarain boedjang boeat rawatin nona. Di roemah entjim, apa ? — siapa jang nanti sajang sama nona ? — nona soeda kaga poenja mah kaga poenja bapa. Di sini entjek nanti bikin apa jang bisa boeat bikin nona djadi senang. Entjek engga nanti bengis-bengisin sama nona dan nanti toeroetin apa jang nona poenja maoe“
Habis kata begitoe Kek-soen laloe toeroen dari randjang, mengamperi badjoenja, dan kaloearken dari la poenja sakoe, satjekal oewang kertas bersama satoe roepa barang, jang tatkalah kenah sinarnja lampoe, lantas mengkredep gilang-goemilang. Kamoedian laloe ia mendekati lagi pada Soan-nio, seraja berkata :
„Ini oewang entjek boleh dapet menang maen; nona boleh simpan sadja di lemari; nanti saban-saban entjek menang maen, entjek kasi lagi. Ini tjintjin entjek sengadja beli'in boeat nona: nona sekarang djoega boleh lantas pakeh. Nantinja gampang : besok atawa noesa entjek nanti beli'in segala apa sadja jang nona maoe. Ini si dalem bebrapa hari entjek engga sempat dowang.“
Dan laloe ia taroh samoea barang itoe di pangkoeannja Soan-nio.
Gadis itoe merasa tida taoe bagimana ia misti berlakoe. Ka'adahannja di itoe saät ada mirip sekali sabagi ikan masoek di boeboe, jang sedikit poen tida berdaja lagi. la mengarti sekarang, jang entjimnja soeda serahken dirinja pada Kek-soen, tapi samantara tadi ia merasa amat sakit hati lantaran tida ada poenja tenaga tjoekoep boeat melawan orang poenja poetoesan, di itoe masa, salagi ia ada di dampingnja Kek-soen, gadis itoe poenja napsoe amara sama sekali soeda djadi terganti dengen pengrasahan maloe. la tida taoe apatah misti trima itoe pembrian atawa menampik.
Meliat lelagaännja Soan-nio begitoe, Kek-soen, jang soeda banjak makan garemnja doenia, lantas mengarti, jang itoe samoea tida lebi dari apa jang orang biasa namaken: tingkanja anak prawan. Laloe ia ambil itoe tjintjin dari pangkoeannja si gadis dan masoeki pada djari-manisnja jang kiri, kamoedian salesepken itoe satjekal oewang kertas dalem tangannja jang kanan, seraja berkata dengen soeara plahan:
„Simpan, apa jang entjek kasi samoea nona jang poenja. Sekarang djangan maloe-maloe. Di sini nona poenja roemah dan kita tjoema ada berdoewa.“
Oewang kertas itoe ada bebrapa poeloe lembar dari harga ketjil-ketjil, jang sama sekali ada sadjoemblah lima ratoes lebi. Itoelah ada sabagian dari Kek-soen poenja kaoentoengan di medja djoedi.
Bagi Soan-nio, jang sadari ingetnja djadi manoesia belon pernah dapet liat oewang begitoe banjak, adalah amat gandjil aken tida hargaken itoe. Oleh kerna itoe djoega, sekali poen ia tida lantas toeroen dari randjang boeat simpan oewang itoe dalem lemari, traoeroeng ia soeda taroh itoe di kapala bantal, satoe hal jang membikin Kek-soen lantas menganggap, pembrian itoe telah ditrima olehnja.
Djoega itoe tjintjin, jang Kek-soen sangadja belihken dengen mendoega-doega gedeh-ketjilnja, soeda tida ditjaboet kombali oleh Soan-nio.
„Mari kita toeroen dan doedoek omong-omong, nona,“ kata Kek-soen kamoedian, koetika dapet kanjatahan jang pantjingnja moelahi dimakan.
Soan-nio sekarang kaliatannja seperti maoe boekah soeara, tapi tida satoe perkatahan bisa kaloear dari moeloetnja, dan dari tingkanja gadis itoe bisa dinjataken, jang ia ada merasa amat kikoek boeat tinggal diatas pembaringan, dimana itoe laki-laki satengah toewa ada doedoek bersama-sama, tapi djoega ada merasa amat berat boeat loeloesken orang poenja permintahan, toeroen dari sitoe.
Meliat nonanja moendoer-madjoe begitoe, Kek-soen laloe pegang lagi orang poenja tangan dan maoe memimpin, tapi kombali Soan-nio emposken itoe. Tjoema sakali ini ia tida tinggal membatoe seperti doeloean. Laloe ia toeroen sendiri, tapi lebi djaoe tinggal berdiri didepan lemari dengen klakoean amat kikoek.
Kek-soen lantas ambil tempat di salah-satoe krosi, kamoedian laloe tarik Soan-nio boeat berdoedoek di krosi jang laen.
Lantaran kapoetoesan daja dan lantaran maloe, gadis itoe djadi menoeroet sadja sabagimana adanja orang poenja maoe.
Sasoeda berdiam samantara lamanja, Kek-soen laloe berkata:
„Nona tentoe taoe apa sebab nona dibawa kamari. Entjim tentoe soeda tjerita sampe terang, dari itoe boeat apa nona maloe-maloe dan doesoen-doesoenan begitoe seperti laganja orang jang belon taoe ketemoe manoesia.“
„Orang sama sekali engga kasi taoe lagi sama saia,“ kata Soan-nio sekarang dengen toendoek dan dengen soeara ampir tida kadengeran.
„Itoe engga boleh djadi,“ kata Kek-soen dengen bersenjoem.
„Entjim akalin saia. Dateng-dateng ia bawa kamari, habis lantas tinggal poelang. Saia sama sekali engga taoe satoe apa."
„Kaloe begitoe, soedalah! Tapi sekarang nona toh soeda taoe samoea. Moelahin sekarang, di sini nona poenja roemah. Entjim soeda kawalahan boeat piara sama nona, dari itoe ia soeda kasi nona sama entjek. Kanapa dari tadi nona masi maoe maloe-maloe ? Itoe toh koerang bagoes.“
Moekanja Soan-nio lantas berobah djadi semoe-semoe mera, tatkalah denger Kek-soen kata begitoe. Ia tida berkata soeatoe apa, dan dari matanja jang melirik sadja ka tanah, bisa dinjataken, jang nona moeda itoe sedeng ada dalem kaädahan sarebah salah.
Dalem itoe waktoe jang baek Kek-soen kisarken krosinja lebi dekat pada Soan-nio, dan dengen koenjoeng-koenjoeng ia peloek-tjioem pada gadis itoe.
Itoe samoea telah terdjadi dalem sasaät sadja, hingga Soan-nio sama sekali tida mendapet tempo aken berboeat soeatoe apa.
Tatkalah melakoeken itoe pembrian selamat jang pertama, sakoenjoeng-koenjoeng Kek-soen poenja napsoe birahi berkobar kombali, dan sakali ini ada banjak lebi besar dari jang doeloean. Ia sekarang soeda saksiken sendiri, bagimana Soan-nio dalem segala hal, boekan sadja tida kalah barang sedikit pada Kim-nio, malah barangkali djoega ada lebi menang, dan kanjatahan itoe dalem sakedjap soeda merobah Kek-soen dari manoesia sampe djadi binatang. Laloe ia pondong gadis itoe seperti lakoenja singa jang amat boewas, dan dengen itoe rampasan jang masi soetji, Kek-soen, jang soeda tida mempoenja hati, lantas bertindak naek ka pembaringan.
Di sitoe achirnja soeda terdjadi satoe perkara gandjil, jang bagi alam ada soeatoe nama, tapi doenia melarang boeat seboetken itoe dengen teroes terang.
Ka'adahannja Soan-nio di itoe waktoe boleh sekali dioepamaken sabagi satoe prahoe amat ketjil jang teroembang-ambing diantara beloembang besar. Biar bagimana keras djoega hatinja si djoeroe moedi boeat dapet pinggiran, traoeroeng achirnja ia misti djadi kalelap tersapoe ombak. Dan kaloe hatinja nona Soan maoe dioepamaken seperti itoe djoeroe moedi, djoestroe djoeroe moedi itoe sekarang ada merasa bimbang, bahoewa mati di antara ojot-ojot merdjan di dasarnja laoet, dengen sasoenggoenja boleh dibilang boekan ada satoe nasib jang broentoeng.
Malem mengoetaraken kasoenjiannja, dan itoe sekarang dapet dirasaken betoel-betoel oleh itoe doewa menoesia jang baroe mendjadi pasangan.