Pembalesan Kedji/Bab 3
III.
MANOESIA JANG MASI SOETJI.
Dalem waktoe jang telah ditjeritaken dalem fatsal di sabelah atasan ini, di Angkee ada terdiri satoe roemah besar bersama satoe roemah jang lebi ketjil di sampingnja sabelah kiri.
Samoea orang di itoe kampoeng taoe, jang itoe ada tempat tinggal dari Souw Hoay-wan, satoe soedagar hasil boemi jang hartawan.
Itoe roemah ketjil tadinja digoenaken boeat samboet tetamoe, tapi oleh kerna kamoedian Hoay-wan merasa jang ia tida perloe pakeh tempat begitoe banjak, djadi ia sewaken itoe pada orang. Tapi kebon jang pernahnja di blakang roemah itoe masi tinggal tetap mendjadi satoe. Njonja Souw meliat, tetangga jang menjewa roemahnja ada saorang pantes-pantes, lantaran itoe ia merasa tida perloe bikin begini-begitoe jang lebi tjerewet.
Pada 15 Phegwee, baroe sadja lontjeng mengoetaraken poekoel toedjoe, di bawa poehoen mangga jang pernahnja di tengah-tengah kebon, soeda ada doedoek doewa anak prampoean dengen mengglèpok. Satoe antaranja ada pangkoe satoe piring nasi, dan sasoeda makan doewa-tiga soewap, laloe ia berkata:
„Hajolah kita makan sama-sama, entji Bong-loan. Tida ada apa-apanja, si Mili baroe poelang dari pasar, tapi biarlah kita makan sedikit sadja. Bantoeinlah, Nioe kapingin makan koewe phia, tapi ’mboe paksa Nioe makan nasi doeloe.“
„Goea tida boleh lama-lama di sini; sekarang soeda kaloear matahari, kaloe sampe entjim bangoen goea nanti di poekoel,“ kata Bong-loan, tapi ia djoempoet djoega sedikit-sedikit itoe nasi dari piring temannja.
„Ja, tji poenja entjim ada kliwat bengis. Gi dah poelang doeloe, sabentar dateng lagi; ini hari enko Hoei-djin tida taktjee.“
„Ja, ini hari tjapgoh, tapi sekarang baek goea poelang doeloe, Sioe-kioe, kaloe kaga nanti tjilaka, sekarang soeda kaloear matahari.“
Habis kata begitoe Bong-loan lantas berbangkit, dan djalan menoedjoe ka pintoe blakang dari itoe roemah samping jang Hoay-wan soeda sewahken orang, tapi belon sampe ia bertindak masoek, lebi doeloe soeda kaloear satoe prampoean moeda dari dalem, jang tida tempo lagi lantas bisbis anak prampoean itoe poenja moeka, seraja berkata dengen gregetan:
„Kerdja apa pagi-pagi pergi ka roemah orang, anak tida boleh diadjar?! Oeda dibilang bangoen lantas beresken roemah tangga, ini lagi-lagi pergi ngelanglang, lagi-lagi pergi ngelanglang! Tida maoe makan adjaran maoe djadi apa ? Maoe djadi djoget soeda besarnja, biar karoewan!“ „Baroe saia pergi, entjim, si Sioe-kioe si adjakin sadja!“ kata Bong-loan dengen sasenggoekan.
„Ja, kaloe moeloet orang laen didengerin, apa orang laen jang kasi makan ?“ treak poelah itoe prampoean moeda, kamoedian lantas kasi satoe tempiling dan iloetin Bong-loan poenja paha-moeda.
Sioe-kioe, jang meliat itoe klakoean dari djaoe, lantas taroh ia poenja piring nasi di tanah, dan berlari-lari mengamperi. Laloe ia berdiri diantara Bong-loan dan entjimnja, seraja berkata:
„Soeda, tjim, dari tadi djoega tji Bong-loan tida maoe, Nioe jang paksain sadja sama dia, gitoe djoega ia soeda habis njapoe.“
Bitjaranja itoe anak prampoean jang masi ketjil, roepanja ada djoega berpengaroe atas itoe njonja moeda jang sedeng meloewap napsoe amaranja, kerna koetika itoe djoega ia lantas djadi sedikit lebi sabar, dan laloe berkata lagi:
„Entjim si kaga maoe salahin laen orang; dasaran ini anak jang engga boleh diadjar. Taoeh ia maoe djadi apa soeda gedenja.“
Sambil kata begitoe laloe ia berdjalan masoek.
Sioe-kioe lantas pegang tangannja Bong-loan, dan dengen moeka berkasian ia berkata poelah:
„Masoek da, nanti Nioe anterin; kaloe sampe dipoekoel lagi tentoe Nioe tida nanti tinggal.“
„Apa goea kata ? Entjim memang tida boleh sekali.“ Sambil kata begitoe Bong-loan toeroetin pada Sioe-kioe, jang toentoen ia poenja tangan, adjak masoek ka dalem.
„Soeda tjim, djangan poekoel lagi sama tji Bong-loan“ kata lagi kamoedian anak prampoean itoe, seraja mengamperi pada itoe njonja moeda, jang sekarang ada sedeng bersisir. „Samoeanja ada Nioe jang poenja salah; laen kali Nioe tida nanti begitoe lagi. Ampoenin da boeat sakali ini.“
„Emtjim memangnja boekan mara sama Nioe.“
„Kaloe begitoe djangan poekoel lagi toh sama entji Bong-loan.“
Njonja moeda itoe kaloearken tertawa tengal sabentaran, meliat klakoeannja Sioe-kioe jang maoe bri perlindoengan pada temannja.
Merasa senang jang boedjoekannja ada memakan, anak prampoean itoe laloe dekatin lagi pada Bong-loan, seraja berkata dengen bisik-bisik:
„Kaga nanti dipoekoel lagi; entjim tadi soeda tertawa. Sabentar djangan kaga dateng ka roemah, ja ? Sekarang Nioe maoe poelang.“
Bong-loan malaenkan manggoetin sadja kapalanja, kamoedian Sioe-kioe lantas berlari-lari kaloear, ambil piringnja di bawa poehoen mangga, dan masoek ka roemahnja, dimana ia dapetken iboenja sedeng doedoek bersantap.
„Ini ada banjak masakan jang baroe mateng, Sioe-kioe, apa loe soeda habis makan ? Ni ada loe poenja kadojanan babi masak oebi landa.“
„Nioe djadi kenjang, boe. Masa pagi-pagi hari entji Bong-loan soeda dipoekoel lagi! Nioe pergi toeloengin sama dia.“
„Ai, bisa-bisahan ini anak; nanti loe sendiri dilabrak baroe taoe. Liat to e kaloe orang soeda kaga ada poenja mah; oemoer sabelas soeda misti bantoe di dapoer. Loe soeda oemoer sapoeloe masi enak-enakan sadja mendjerit-djerit prenta boedjang, begini melawan, begitoe melawan; nanti kaloe goea soeda mati dan loe tida ada poenja mah lagi, baroe nanti loe taoe rasa.“
„Kaga laen kata gitoe sadja, nanti Nioe nangis baroe taoe.“
„Ja gedehin sadja sekarang loe poenja nangis.“
„Mboe si kaga laen kata begitoe.“
„Tjoba liat mah gi, soeda bangoen belon, sakalian panggil enko makan nasi.“
Sioe-kioe boekan pergi liat doeloe pada mahnja, tapi lantas berlari-lari kaloear, dan teroes ka pertengahan, dimana ia dapetken Hoei-djin sedeng membentoek hadepken medja. Sigra ia mengamperi, dan berkata satjara sengal-sengal:
„Ko, ko, masa entji Bong-loan dipoekoel lagi !“
„Kapan ?" tanja Hoei-djin seraja angkat kapala
„Baroesan.“
„Lantaran apa ?“
„Begini: la lagi njapoe, Nioe paksain seret-seret adjik ka poehoen mangga, bantoein bikin habis Nioe poenja nasi: orang Nioe masi kenjang si. Habis barang dia maoe poelang dipoekoel sama entjimnja, jang baroe bangoen mengkali. Habis Nioe pergi toeloengin sama dia.
„Hm, loe poenja bisa. Makan nasi lah bolehnja adjakin orang bantoein, bikin orang djadi dipoekoel!“
„Hala daser entjimnja jang garang tida kaoeroesan! Enko lagi bikin apa ni, 'mboe soeroe makan doeloe.“
„Tadinja ini gambar goea maoe bikinin boeat loe, tapi sebab sekarang loe soeda bikin Bong-loan sampe kenah -dipoekoel, djadi goea maoe kasi dia sadja.“
„Tapi bikinin toh Nioe lagi satoe, ja?“
„Belon bisa taoe, sebab bentar goea maoe pergi matjing.“
„Hala traoesa pergi mantjing da. Kita memaen di roemah enakan, entji Bong-loan mentar maoe dateng ka mari.“
Dengen tida berkata soeatoe apa lagi Hoei-djin lantas berbangkit, dan lantas pergi santap bersama-sama iboenja.
Samantara itoe Bong-loan dateng dengen membawa satoe mangkok.
„Apa si lagi?“ tanja njonja Hoaij-wan.
„Sajoer lodee baroe mateng, tjim, saia disoeroe anterin ka mari.“
„Ha, goea poenja kadojanan,“ kata Hoei-djin,„tinggal sadja di sini sama mangkok-mangkoknja, Bong-loan, bentar nanti soeroe boedjang anterin. Apa betoel tadi loe dipoekoel ?“
Bong-loan tida menjaoet. Sasoeda taroh itoe mangkok sama sajoer lodee di medja, laloe ia sendiri pergi kombali
„Itoe tjim Tjit-leng laganja memang bengis tida karoean," kata poelah Hoei-djin kamoedian. „Tjoba goea jang djadi si Bong-loan, tentoe goea tida nanti maoe tinggal diam kaloe dipoekoel boeat segala perkara jang tida patoet.“
„Djangan kalemessan djadi anak-anak. Samoea orang toewa misti dihormat, baroe nanti orang tida katain koerang adjar.“
„Barang sabetoelnja ini, boe. Si Sioe-kioe sadja goblok-goblokan, tjoba owee traoesa sampe si Bong-loan trima poekoelan. Hala orang prampoean masa sabrapa tenaganja si !“
„Goblok-goblokkan ? Itoe djoega Nioe toeloengin. Kaloe kaga Nioe, tentoe entji Bong-loan kenah dipoekoel lebi paja lagi.“
„Bolehnja heran,“ kata njonja Hoay-wan dengen soeara menggoda,“ saban-saban si Bong-loan dipoekoel, tida karoean-roean loe jang sengit-sengitan. Tentoe ada hatinja, ini anak. Lekas-lekas da taktjee jang bisa-bisa, biar lekas-lekas bisa tjari oentoeng. Sekarang loe poenja oemoer soeda lima belas; nanti lagi sedikit sadja lagi goea lantas pergi mintain si Bong-loan. Kaloe soeda djadi loe poenja bini, misti inget, djangan nanti bengis-bengis lagi sama dia.“
Sioe-kioe tertawa, tapi Hoei-djin lantas tekoek ia poenja moeka, jang koetika itoe ada djadi sedikit mera lantaran kamaloean. Ia makan boeroe-boeroe, habis tjoetji tangan, kamoedian lantas pergi kaloear kombali.
Sasampenja di pertengahan kombali Hoei-djin doedoek menggotot hadepken medja, teroesken ia poenja teekenan jang baroe habis saparoh.
Plahan-plahan lontjeng soeda mengoetaraken poekoel sabelas tengahari. Koetika itoe Hoei-djin soeda selesi menggambar. Laloe ia masoek ka dalem sembari seroe-seroeken pada adehnja, dan oleh kerna Sioe-kioe tida ada di sitoe, laloe ia teroes pergi ka blakang.
Samatara itoe Bong-loan dan Sioe-kioe sedeng asik memaen di bawa poehoen mangga. Hoeidjin laloe mengamperi dengen lekasin ia poenja tindakan, seraja berseroe dari djaoe:
„Loe lagi kerdja apa di sitoe ?“
„Apa soeda habis itoe gambar ?“ tanja Sioe-kioe. „Nioe betoel lagi adjakin entji Bong-loan boeat pergi liat.“
Bong-loan jang sedeng asik toempoekin tanah bikin romannja seperti satoe koeboeran, laloe angkat kapala, dan dengen moeka lesoe laloe berkata :
„Bagoes, enko Hoei-djin? Soeda habis mari saia liat.“
„Baroe habis, tapi apa loe bikin di sitoe ? Romannja betoel sama seperti bong jang ada di tandjoeng, tapi lebi baek lekas roesakin; kaloe sampe loe poenja entjim dapet liat, ia nanti poekoel lagi; tentoe ia kata loe soempain biar ia lekas mati.“
Bong-loan lantas indjak toempoekan tanah itoe dengen kakinja, seraja berkata :
„Ada sadja, siapa jang soempain sama dia ?“
„Goea tida kata loe soempain, tapi ia nanti kata begitoe. Loe taoein lebi baek; loe poenja entjim keh gitoean. Nah, goea kasi loe ini gambar; simpan, bikinnja tjapeh sekali, loe taoe ? Goea mara betoel, kaloe goea dapet liat loe boewang-boewang."
„Masa diboewang,“ kata Bong-loan, seraja samboetin gambar itoe dari tangannja Hoei-djin.
„Tapi bikinin toh lagi satoe boeat Nioe, Nioe maoe taroh di katja dalemtoe pakean. Djangan bikin jang bengis-bengis, Nioe tida soeka.“
“Nanti sadja lagi, sekarang goea soeda tjapeh,“ kata Hoci-djin. “Lagi goea soeda djandjiken teman maoe pergi mantjing mentar.“
„Troesa pergi da," kata poelah Sioe-kioe, „baekan kita memaen di roemah sama entji Bong-loan.“ „Maoe pergi mantjing ka mana, enko Hoei-djin ?“ tanja Bong-loan sekarang.
„Di mana sadja di rawa-rawa. Eh, djangan nanti lagi loe bilangin sama 'mboe, Sioe-kioe. Kaloe ia taoe tentoe ia tida kasi goea pergi.“
„Sekarang memang Nioe lagi maoe bilang sama 'mboe. Belaga sadja, mantjing lah, nanti kaloe soeda njemploeng baroe taoe.“
„Kaloe loe bilang, salama-lamanja goea tida nanti bikinin gambar lagi boeat loe, salamanja goea nanti kasi si Bong-loan sadja.“
„Tapi orang apa ini, enko Hoei-djin ?“ tanja Bong-loan, sasoeda meliat sabentaran itoe gambar jang dikasi padanja. „Pakeh boeloe ajam begini pandjang, lagi pakeannja begini matjem.“
„Itoe ada Owan Lee-hoa,“ djawab Hoei-djin. „Goea sekarang lagi batja tjeritanja, boleh dapet pindjam dari teman. Biar dia ada satoe prampoean, tapi bisa sekali perang, sampe tida ada jang bisa menangin sama dia.“
Samantara itoe satoe boedjang prampoean, dateng mengamperi, dan berkata dengen soeara plahan: „Ba Wi-djin, di loear ada teman baba. Ia pesan djangan kasi taoeh sama nona, taoe ia maoe apa.“
Mendenger itoe Hoei-djin lantas berlari-lari kaloear, dimana ia dapetken temannja lagi sedeng menoenggoe. Tatkalah ia ini meliat pada Hoei-djin, lantas ia berkata : „“Loe poenja djandji betoel tida boleh dipertjaja lagi sakali, Katanja maoe dateng samperi goea poekoel delapan, tapi sekarang soeda poekoel doewa belas.“
„Tadi goea kaenakan teeken gambar, tapi sekarang soeda tanggoeng; nanti goea makan doeloe da, habis kita boleh lantas pergi. Loe soeda makan belon ?“
„Soeda, gi da lekasan, goea toenggoein sadja di sini.“
Hoei-djin berlari-lari lagi masoek ka dalem, dimana ia dapetken Sioe-kioe sedeng bersantap sama Bong-loan.
„Inget, Sioe-kioe, djangan loe bilang 'mboe jang goea pergi mantjing,“ kata ia. „Memaen sadja sama Bong-loan; kaloe ditanja, kata goea pergi sama sinshe; nanti kaloe dapet ikannja, goea kasi loe berdoewa boeat piara.“
Sambil kata begitoe Hoei-djin sendok nasi. makan satjepat-tjepatnja, kamoedian lantas pergi kaloear.
„Ka mana baek kita pergi ?“ tanja temannja.
„Poenja soeka, asal sadja djangan poelang terlaloe soreh,“ kata Hoei-djin, dan sigra djoega doewa sobat itoe brangkat pergi dengen membawah pantjing.