Pembalesan Kedji/Bab 2
II.
GADIS! GADIS!! GADIS!!!
Dalem tahon 2424 di tepi djalan dari Kampoeng Baroe jang berhampiran dengen tikoengan ka Djembatan Doewa, ada terdiri satoe roemah, dikiteri oleh kebon jang boleh terbilang ada besar djoega. Di natarannja jang depan ada toemboe satoe poehoen asam jang besar, di kebonnja bagian blakang ada banjak pot kembang jang diatoer berbaris.
Diliat dari djalan besar, roemah itoe kaliatannja ada sederhana sadja, tapi oleh orang-orang jang mendjadi toewan di sitoe, tempat kadiaman itoe ada diagoengken dengen seboetan Sorga-doenia.
Perkarangannja ada dikoeroeng dengen pager hidoep dari poehoen toelang-toelang.
Sasoeatoe orang jang pernah liwat di itoe djalanan dan dapet liat kaädahannja roemah itoe dengen kebonnja, nistjaja sampe saoemoer hidoep ia tida nanti bisa meloepahken lagi pada romannja itoe tempat kadiaman, kerna pada pertama kali memandang sadja, roepanja itoe poehoen toelang-toelang misti lantas menantjep di pikirannja dan meninggalken satoe peringetan jang seram.
Ampat kamar ada tersediah di itoe roemah. Pada 13 Phegwee di waktoe lohor, satoe antara kamar-kamar jang pernahnja di sabelah Wetan ada terboekah djendelanja, dan satoe laki-laki jang beroesia antara tiga poeloe dan ampat poeloe tahon apa rebah di sitoe, di atas pembaringan jang terales dengen kaen poeti haloes.
Ia itoe adalah Kek-soen, jang baroe sadja poelang kondangan dari „roemahnja Tek-kian.
„Ha, sekarang Kim-nio terlepas betoel-betoel dari tangangoea,“ kata ia dengen mengelah napas. „Si Emot poenja pengliatan ada sama betoel dengen goea. Memang djoega soesa terdapet satoe anak prawan jang sama bagoesnja !“
Kamoedian ia tinggal tjelentang dengen meramken matanja salakoe orang jang melajangken pikiran. Tjara begitoe plahan-plahan ia djato poeles.
Lontjeng mengoetaraken poekoel ampat, Kek-soen belon djoega djadi mendoesin dari tidoernja. Tida lama kamoedian, satoe prampoean toewa dengen gendong boengkoesan laloe masoek ka dalem itoe roemah, dan koetika ia liat pintoenja terboekah, sigra djoega ia masoek ka itoe kamar, dimana ia dapetken Kek-soen masi ada rebah dengen mengorok.
„Hm, ia tidoer,“ kata ia. „Goea djoega doega ia misti ada mengeram di sini, tapi tida njana sekali ia bisa ada poenja itoe kasenangan boeat ngorok.“
Soeara itoe, sekali poen ada dioetjapken dengen menggrendeng, traoeroeng ada sampe tjoekoep boeat mendjadi satoe besi brani jang menarik poelang samangetnja Kek-soen. Laloe ia ini melekin matanja, sabelon itoe prampoean toewa kaloear kombali dari itoe kamar.
„Eh, getap amat tidoernja ! Saia malaenken bitjara dengen soeara plahan sekali, ampir seperti berbisik.“
„Goea tida poeles; tjoema badan rasanja lesoe sekali. Sadari tadi goea malaenken lajap-lajap sadja.“
„Ada-ada sadja, tida poeles lah boleh mengorok.
O, barangkali begitoelah jang orang namaken tidoer ditoenggoeken samanget. Saia taoe, baba poenja hati tida bisa lepas pikirin soeatoe perkara.“
„Loe ini toewa bangka tida goenanja. Dari boelanan jang liwat goea soeda kasi taoe, tapi loe ini tida bisa atoer, sampe kasi ini hari ia kawin sama laen orang. Kaloe goea taoe lebi doeloe jang loe begitoe tida goenanja, tentoe djoega goea soeda soeroe orang laen."
„Ai, lagi-lagi baba maoe tempoeken pada saia. Apa saia teledor, boleh djoega, tapi ini tida tempo lagi saia lantas moelahi pasang koeda-koeda. Saia pergi serep-serepin di sana-sini, tapi koetika itoe djoega ia soeda dilamar. Begitoe djoega saia bengalin pergi ka roemahnja njonja Seng-tjin boeat liat glagatnja. Saia pasang-pasang perkatahan, tapi saia poenja pantjing tida dimakan, sebab njonja Seng-tjin tida kerdjaken laen dari tergirang-girang jang anaknja bakal bisa dapet laki saorang mampoe. Soeda tentoe saia tida madjoe lebi djaoe. Baba pikir sadja, apa baeknja kaloe sampe misti poelang bawa tjilaka dengen tangan kosong? Saia djoega taoe jang baba tentoe merasa koerang senang pada saia, lantaran baba poenja prenta djadi gagal. Dari itoe saia soeda ngider sampe kaki rasanja otek, boeat tjari gantinja. Sekarang saia maoe masoek bitjara. Kan baba tjoema maoe taoe anak prawan jang bagoes ? Perdoeli apa jang ini atawa jang itoe.“
„Soedalah toewa bangka, djangan kabanjakan omong! Lebi baek sekarang loe tjari satoe akal jang bagoes boeat toentoen Kim-nio sampe di sini. Perkara presen loe traoesa kwatir.“
„Boeat apa baba sekarang pikirin lagi sama nona Kim ? la soeda ada jang poenja, dan taroh lagi baba bisa dapetin padanja, toch tida lebi dari orang poenja bekas. Maoe boeat apa begitoe ?" Kamoedian Emot laloe bisik-bisik : „Eh, di Kampoeng Opak ada satoe, di Gang Toko ada satoe. Doewa-doewa ada sama sadja bagoesnja; kaloe saia poenja pengliatan tida kalah sama nona Kim.“
„Ah, siapatah jang tida kenal loe ini memang bisa ngobrol ? Kaloe denger loe poenja bitjara tida ada jang tida gampang, tida ada jang tida bagoes, tapi kaloe disoeroe ini atawa itoe, loe sama sekali tida ada goenanja.“
„Eh, pendeknja begini, baba. Kaloe boeat ini saia tida bisa dapetin djoega, biar dikemplangin djoega masa saia tida trima ?"
„Apa loe soeda liat sendiri atawa malaenken denger orang poenja bitjara ?“ tanja Kek-soen seraja bangoen berdoedoek.
Saia liat sendiri, baba. Kaloe saia poenja pengliatan adalah lebi bagoes sedikit jang di Gang Toko. Orangnja koelit langsat, pengawakannja denok, matanja djeli, idoengnja bangir, soedalah pendeknja tida katjelahnja. Jang di Kampoeng Opak ada sedikit lebi itam, tapi boto sekali. Doewa-doewanja saia brani tanggoeng, kaloe sampe baba tida penoedjoe, saia nanti ganti baba poenja karoegian, koerang bagimana lagi ?"
„Apatah loe soeda taoe djoega siapa namanja ?“
„Jang di Gang Toko Soan-nio, jang di Kampoeng Opak Bok-hiang. Oemoernja toedjoe belas tahon, jang laen delapan belas.“
„Apa loe brani tentoein bisa dapetin bawa kamari ?“
„Saia liat nona Soan ada lebi bagoes, dari itoe moela-moela saia soeda boewang-boewang perkatahan padanja lebi doeloe. la malaenken tinggal sama entjimnja. Ma-bapanja soeda tida ada. Boeat baba si tentoe bisa dapet.“
„Jang di Kampoeng Opak bagimana ?
„Ia ada sedikit kalah, tapi kaloe baba maoe sama dia, djoega saia rasa tida soesa. Betoel saia belon boewang pantjing, tapi saia kira gampang. la soeda tida poenja bapa, ia sekarang tinggal sama mahnja.
„Siapatah itoe entjimnja Soan-nio ?“
„Bekas njonja Tek-kin. Doeloe lakinja ada ber soedara sama bapanja nona Soan. Lakinja mati doewa tahon, ia ikoet orang lagi. Nona Soan tida poenja sanak-soedara lagi, dari itoe menoempang sama dia.“
„O, goea sering liat itoe anak tempo ia masi ketjilan. la ada anaknja Tek-liang, jang blakangan djadi djato soesa dan mati gantoeng diri."
„Betoel begitoe. Bagimana, masa ja orang sagitoe boleh dibilang koerang bagoes ? Saia lebi senang lagi kaloe baba sendiri soeda taoe liat.“
„Tapi tempo ia masi ketjil, kira-kira oemoer doewa-tiga belas tahon, koetika ia masi soeka mendjoewalan koewe.“
„Masi ketjil djoega soeda bisa diliat kaloe orang bakalan mendjadi bagoes.“
„Goea maoe pertjaja loe poenja bitjara, toewa bangka, tapi loe brani tentoein jang Soan-nio itoe ada lebi bagoes dari Bok-hiang ?“
„Brani betoel.“
„Dalem samoea dandannja ?“
„Ja, djoega djari tangannja dan potongan kakinja ada lebi bagoes nona Soan.“
„Apa tentoe loe bisa dapetin padanja ? Goea tida maoe lama-lama, dan lagi loe misti bawa ia ka mari; goea tjoema taoe sedianja sadja.“
„Brapa lama baba kasi tempo pada saia ?“
„Satoe minggoe. Kaloe ini sakali loe bikin gagal lagi, pendeknja goea tjompreng dan tida maoe ladenin lagi loe bitjara.“
„Traoesa salempang. Brapa baba brani bajar boeat dapetin nona Soan itoe ?“
„Koerang adjar, belon apa-apanja soeda maoe bitjarain perkara doeit!“
„Eh, eh, apa saia poenja barang sendiri ? Masa entjimnja maoe kasi gampang-gampang sadja kaloe tida diganti ia poenja onkost piara? Laen dari begitoe saia tok misti dapet djoega sedikit.“
„Brapa loe poenja maoe. Goea maoe maen borongan sadja. Goea trima orangnja di sini, dan loe lantas trima doeitnja.“
„Soeda baba borongin sadja sama saia tiga ratoes; pendeknja taoe beresnja sadja. Tapi masa saia bawah ia ka mari? Ini tok boekan baba poenja roemah.“
„Mana goea begitoe lekas bisa tjari roemah ? Tapi itoe boekan loe poenja taoe, asal sadja loe bawah Soan-nio ka mari, goea nanti toenggoein.“
„Begitoe djadi koerang enak boeat dia! Mana lebi baek baba kasi saia tempo satengah boelan, dan serahken samoea oeroesan sama saia. Saia jang nanti tjarihin roemah, saia nanti perabotin : baba nanti tinggal sedianja sadja.“
„Begitoe djoega baek. Tapi loe misti mengarti : roemah itoe tida boleh adanja di tempat rameh.“
„Ah, itoe saia sampe mengarti; jang boeat mengoeroes itoe djoega saia ada poenja orang. Tapi baba tok misti mengarti djoega. Boeat perabotin satoe roemah, biar bagimana ketjil djoega misti pakeh onkost. Lagi sama jang poenja roemah djoega saia misti kasi pandjer, tandanja soeda tetep menjewa. Soeda baba kasi saia tiga ratoes, dan lantas boleh trima sediah pada waktoenja.“
„Ah, loe ini si kaga laen maen doeit sadja. Soeda goea borongin lima ratoes, tapi samoea misti beres dan soeda sediah.“
„Baeklah soepaja djangan djadi kabanjakan tjerewet. Tapi baba misti kasi pandjer pada saia. Dengen tida pegang oewang orang tida nanti bisa boekah djalan.“
Kek-soen mengamperi badjoenja, kaloearken dompetnja, dan kasi lima poeloe roepia pada Emot, seraja katanja:
„Djangan nanti loe perlos tida kabar tjeritanja.“
„Masa ja, apa si tida taoe oewang saia ? Tapi masa sagini! Kasi sadja barang doewa ratoes. Kan saia misti perabotin roemah djoega dengen itoe oewang ?“
Kek-soen kasi prampoean toewa itoe lagi saratoes lima poeloe.
„Inget djangan lebi lama dari satengah boelan !“ kata ia poelah, seraja masoekin kombali dompetnja dalem kantong badjoe.
„Saia boental itoe didalem hati, ba. Sekarang soeda poetoes kita bitjara, dan saia maoe poelang. Baba traoesa kwatir, ini perkara soeda boleh ditentoeken. Ibarat makan nasi, nasinja soeda ada di piring.“
Sambil kata begitoe Emot gendong kombali boengkoesannja dan laloe berdjalan kaloear.
Kek-soen rebah kombali di pembaringan, tapi sekarang ini dengen hati berdebar-debar. Ia merasa itoe tempo satengah boelan ada terlaloe lama, kerna ja poenja napsoe birahi, jang memang soeda berkoempoel djadi satoe sadari ia tergila-gila pada Kim-nio, sekarang oleh kerna itoe nona jang diharepin soeda menikah dan bertambah lagi dapet mendenger bitjaranja Emot, lantas djadi mengamoek samingkin keras dalem ia poenja toeboe.
Pada poekoel anam ia berpakeh-pakeh dan berdjalan poelang.
Koetika hari soeda djadi gelap, laloe dengen diam-diam ia berdjalan sendirian masoek ka Gang Toko. Seperti gila ia berdjalan teroes sampe ka oedjoeng, sembari menoleh pada satoe-satoe roemah, tapi pengabisannja tida djoega ia dapet meliat pada Soan-nio.
Ia tida taoe betoel di roemah jang mana nona itoe tinggal, dan oleh kerna gang itoe ada boentoeng, mendjadi sasoeda berdjalan sampe di boentoetnja, kapaksa Kek-soen misti balik kombail.
Kaloe ia bengalin moendar-mandir di sitoe, ia kwatir klakoeannja nanti menarik orang poenja mata, dari itoe djadi ia berdjalan poelang sadja dengen tida dapetken niatnja.
Sembari bertindak ia berkata dalem hati:
„Soan-nio memang ada satoe anak jang tjakap. Kaloe sadja roepanja tida djadi berobah, tida ia kalah barang sedikit djika dibandingken sama Kim-nio. Goea soeda djadi loepah padanja lantaran soeda sakean lama tida meliat. Apa maoe si toewa bangka ngomong-ngomong begitoe!“