Pembalesan Kedji/Bab 1
I.
HARI NIKAHNJA NONA KIM.
Hari moelahi fadjar. Roemah-roemah dalem kota Betawi kaliatan seperti bagoen dari tidoer. Soeara ajam kadengeran berboenji berganti-ganti di koeliling kampoeng.
Terangnja matahari, jang koetika itoe masi ada remeng-remeng, membikin samoea djalanan kaliatannja djadi indah sekali, dan kendati poen di sana-sini malaenkan ada bebrapa roemah jang soeda memboekah pintoe, traoeroeng soeda ada banjak djoega orang jang berdjalan moendar-mandir, taroetama di djalanan-djalanan jang meneroes ka pasar Pintoe-Ketjil.
Roemah dari soedagar-soedagar ketjil di sapandjangnja pasar itoe, sedari poekoel ampat soeda terboekah pintoe dan djendelanja, satoe klakoean jang biasa diseboetken orang, ada boeat menjamboet datengnja redjeki di waktoe pagi.
Di sitoe kaädahan ada laen sekali dengen di laen-laen tempat. Sadari gelap boeta orang-orang jang dagang memikoel soeda pada berbaris di sapandjang djalanan dengen memasang pelita ketjil. Antaranja ada djoega jang dari malem soeda tidoer di oedara terboekah boeat menoenggoeken datengnja waktoe pagi.
Pasar itoe boleh dibilang ada poesatnja dari penghidoepan kota Betawi. Dari sitoe samoea roemah-tangga dapetken ia poenja kaperloean sahari-hari. Dan sabagi aken saingin karamean di itoe pasar, soeatoe roemah jang pernahnja di Gang Pasar-Ajam poen sadari moelahi fadjar soeda ada dalem kaädahan jang amat ripoe. Salagi orang dari laen-laen roemah masi ada rebah dalem kasoenjian pagi, di sitoe soeda terdenger soeara trompet jang sanget berisik.
Sapotong kaen mera ada disalawirken pada pintoenja roemah itoe. Satoe medja sembajang, jang terpasang tinggi diatas ampat krosi, pedengken sasoeatoe orang boeat meliat kadalem pertengahan. Oleh kerna itoe, bebrapa orang Boemipoetra jang maoe pergi ka pasar dan merasa penasaran dengen itoe kaädahan jang loear biasa, laloe mendesak berdiri dihadepan pintoe.
Koetika itoe satoe orang lelaki laloe masoek ka dalem itoe gang dari tepi djalan besar, Sasoeatoe orang jang meliat padanja nanti lantas bisa mendoega, jang ia itoe ada beroesia diantara tiga poeloe dan ampat poeloe tahon.
Ia berdjalan dengen plahan sembari toendoek, dan tatkalah ia meliwat didepan itoe roemah, dimana ada sedeng berisik. dengen soearanja trompet, sakoenjoeng-koenjoeng satoe prampoean toewa kaloear dari antara orang jang menonton, dan mengamperi padanja, seraja berkata dengen senjoem jang loear biasa
„Tida salah barang sedikit saia poenja doegahan. Betoel-betoel sadja baba meliwat di sini! Apatah maoe teroes ka pasar?
Laki-laki itoe tida lantas menjaoet. Ia brenti di tengah djalan.
„Goea tida njana sekali loe boleh ada di sini, toewa kangka“ kata ia. „Loe ini betoel ada satoe setan jang bisa nimbroeng di mana-mana!“
„Dari malem saia belon berlaloe dari sini,“ kata lagi itoe prampoean toewa dengen senjoemnja jang aneh. Kamoedian ia bisik-bisik: .,Betoel kaga salah baba poenja pengliatan. Banjak saia soeda liat kamanten, tapi baroe ini jang ada begitoe boto! Broentoeng betoelah anaknja itoe toekang tembako!“
„O, ja! ini hari ada Phegwee tjapsha. Ampir sadja goea loepa! Goea ada dapet oendangan.“
„Hala masa ja baba boleh loepa ini hari jang paling. . . . .“
„Koerang adjar! bagimana loe brani bilang begitoe?“
„Tida sari-sarinja saja liat baba pergi ka pasar! Ini hari boleh sangadja liwat di sini. Masa ada laen lagi sebabnja?“
„Koerang adjar! tida nanti akoe pergi ladenin kaoe bitjara gila-gila di sini!“
Sambil kata begitoe laki-laki itoe lantas landjoetken perdjalanannja, seraja berkata dalem hati: „Sabenarnja kanapa goea misti sangadja liwat disini? Toch tida goena.“
Itoe prampoean toewa berdiri sabentaran, meliati laki-laki itoe berdjalan pergi, kamoedian lantas ia masoek kombali kadalem roemah, dimana sekarang soearanja trompet soeda brenti. Laloe ia mengamperi njonja roemah, dan berkata:
„Kapan nona kamanten nanti dibawa, njonja Seng-tjin?“
„Ai ini bi Emot lagi bolehnja gretjokin orang,“ kata itoe njonja roemah, „dari tadi boleh soeda doewa-tiga kali ia menanja, kapan kamanten dibawa pergi. Dari tadi goea soeda bilang: tida taoe! tida taoe! Itoe samoea ada di sana poenja oeroesan. Sabentar nanti orangnja dateng ka mari boeat kasi kabar. Tapi maoe apa sabentar-bentar menanja begitoe, bi Emot ?"
„Kaloe si nona soeda dibawa pergi, saia sendiri djoega maoe pergi mendjoewalan.“
„Hala bolehlah ini hari traoesa mendjoewalan! Apa tida ada laen hari? Kasianinlah saia tida ada kaki tangan jang membantoe! Tida mendjoewalan satoe hari masa boleh djadi kanapa si ?“
„Ai koerang bagimana lagi? Dari samalem saia soeda ngedjontrot di sini boeat ngebantoein! Tapi saia toch misti tjari doeit! Kaloe tida, siapa jang nanti kasi makan pada saia ?“
„Bolehlah saharian ini, bi Emot!" kata mah tjomblang jang tjampoer bitjara. „Biar bagimana djoega masi ada laen hari. Ada besok, ada noesa!“
„Ini, njonja tjomblang bisa betoel ia poenja bitjara! Njonja si enak, tinggal di sini sampe kapan djoega ada dapet doeit, tapi saia siapa jang nanti kasi makan ?“
„Nah ja, maoe pergi la pergi! Memang djoega roemah saia ada seperti kandang ajam,“ kata poelah njonja Seng-tjin, „tapi sekarang bantoein tok apa jang boleh!“
„Ai boekan kata begitoe . . . . .“ kata Emot, tapi bitjaranja, itoe soeda misti djadi terpoetoes lantaran datengnja satoe oetoesan dari roemahnja kamanten lelaki, jang membri kabar, pada poekoel sabelas kamanten prampoean nanti diambil dari roemahnja. Tatkalah itoe oetoesan soeda pergi kombali, njonja Seng-tjin, jang sadari kamaren ada amat tida sempat berdjalan kasana kamari, laloe mengamperi pada anaknja, dan berkata: „Kim, moelai ini hari loe soeda djadi mantoe orang. Sabentar malem loe soeda tida tidoer di sini. Biarlah loe bisa-bisa bawa diri, soepaja nama orang toewa djangan dioengkat—oengkat tida bisa adjar anak. Djangan bawa adat seperti di roemah sendiri. Ini tahon loe poenja oemoer soeda toedjoe belas; tentoe djoega loe taoe bagimana jang boleh bikin orang tida senang. Biarlah loe poenja bapa jang soeda ada dalem tanah bisa merasa senang liat loe disajang sama mertoewa dan laki sendiri! Goea djoega tentoe toeroet senang!“
„Nona Kim apanja disalempangin boeat sekarang ini, njonja Seng-tjin,“ kata Emot. „Mertoewanja orang jang mampoe, dan lagi orang jang seperti nona Kim tentoe djoega lakinja misti sajang. Dimana lagi maoe tjari orang jang lebi tjakap ?“
Tapi bitjaranja prampoean toewa itoe roepanja tida ada jang perhatiken. Nona kamanten, jang pada waktoe sembajang memang soeda menangis, sekarang mengoetjoerken lebi deres ia poenja aer mata, lantaran merasa amat piloe mendenger iboenja poenja bitjara, hingga sabentar-bentar mah tjomblang misti goenaken sapoetangan boeat bikin kering itoe emboen kasedihan jang meleleh di kadoewa pipinja, dan lantaran merasa amat djengkel, orang toewa itoe laloe berkata:
„Soedalah diam, nona!“ djangan menangis sekarangnja sadja, habis nantinja meloepahken orang toewa jang branakin soesa-soesa.“
Njonja Seng-tjin jang masi mengembeng aer di matanja, djadi tertawa mendenger itoe bitjara, tapi sigra djoega ia berlaloe boeat oeroesin segala apa jang perloe dipakeh.
Samantara di sitoe orang sedeng ripoe retjokin perkara kemanten lelaki jang bakal mengambil pasangannja, dalem satoe roemah di Toko-Tiga orang asik riboetin berbagi-bagi hal, seperti tentang oepatjara boeat menjamboet kadatengannja kamanten prampoean, tentang segala kaperloean jang misti dipakeh boeat trima tetamoe dan sabaginja.
Sabagimana orang bisa liat dari tetarep pandjang jang dipasang di moeka roemah teroes sampe pada tetangga-tetangga, njatalah di itoe roemah dari kamanten lelaki, pesta kawin itoe ada dirajaken tjara lebi sampoerna. Samantara di roemahnja nona Kim segala apa ada dibikin sadja sadjadi-djadinja, di sitoe ada dibikin persediahan boeat samboet kadatengannja tetamoe lelaki dan prampoean.
Besannja njonja Seng-tjin itoe ada satoe soedagar tembako jang mampoe, saorang she Bhe nama Tek-kian. Dengen tida membawa soeatoe apa ia dateng dari Pekalongan bersama istrinja, jang koetika itoe ada kandoet boentingan.
Dalem djalanken penghidoepan di Betawi, Tek-kian soeda mendapet doewa anak lelaki. Jang pertama dibri nama Han-jang, jang kadoewa Han-leng.
Sekarang, pada waktoe menikaken ia poenja anak jang pertama, Tek-kian itoe soeda broentoeng bisa koempoelken satoe harta ketjil dari bebrapa, poeloe riboe roepiah. Oleh kerna itoe djadi ia bisa rajaken pesta kawin itoe menoeroet sabagimana mistinja: ia bikin oendangan di sana-sini pada sobat-sobat dan kenalannja, begitoe poen istrinja soeda tida maoe katinggalan dalem itoe perkara.
Sadari poekoel delapan soeda banjak tetamoe prampoean jang dateng kondangan, tapi sabaliknja sampe liwat poekoel sapoeloe baroe ada satoe tetamoe lelaki. Ia itoe adalah itoe laki-laki djoega jang tadi bitjara sama Emot di Gang Pasar Ajam.
Dari klakoeannja Tek-kian jang menjamboet kadatengannja, bisa ternjata jang doewa orang itoe ada kenal baek satoe sama laen.
„Hei, pergi ka mana samalem tida dateng ka mari, enko Kek-Soen ?“ tanja toewan roemah itoe dengen moeka girang. „Enko Ek-tjong, enko Kek-hoay, enko Kim-jan dan banjak jang laen-laen samoea tinggal di sini sampe djaoe malem. Tjoba enko Kek-soen dan enko Dian-hoei djoega dateng, tentoe djadi berhantem besar, tapi ini djadi tjoema maen, tjetjel-tjetjel sadja.“
„Owee samalem tida pergi kaloear, tapi taroh owee dateng, tentoe owee tida nanti dateng boeat maen. Sedari owee kalah doewa riboe lebi, sampe sekarang hati-owee masi merasa takoet. Sakit rasanja enko Tek-kian oewang banjak-banjak dikalahken maen !“
„Hala sabrapa si oewang doewa riboe boeat orang seperti enko Kek-soen !“
Kek-soen tida menjaoet. la pasang satoe tjeroetoe jang toewan roemah soegoeken padanja, dan doedoek ngoedoet sampe sakean lama dengen tida kaloearken satoe perkatahan.
Tida sabrapa lama lagi lontjeng soeda mengoetaraken poekoel sabelas. Han-jang teranter dengen mah tjomblang, lantas pergi ambil pasangannja, dan koetika kreta balik kombali dengen membawa doewa kamanten, Kek-soen lantas bangoen berdiri, dari korsi.
Broentoeng itoe waktoe samoea orang poenja pikiran ada katarik oleh datengnja kamanten, hingga tida satoe ada jang perhatikan padanja. Djika ada jang mempoenja sempat boeat lirik ia saliwatan mata, nistjaja orang lantas nanti djadi tjoeriga, meliat Kek-soen poenja intjeran pada Kim nio.
Tatkalah kamanten soeda masoek ka dalem, lelaki itoe laloe mengelah napas plahan, seraja berkata dalem hati: „Apalah maoe dikata !“.
Plahan-plahan ada dateng djoega laen-laen tetamoe, tapi toch djoemblanja sama sekali tjoema ada tiba tjoekoep boeat memenoeken doewa medja perdjamoean. Marika itoe samoeanja ada orang-orang mampoe, jang boleh sangadja boewang tempo dateng di itoe pesta, boeat adoeh oentoengnja di medja djoedi.
Sabagimana ia soeda bilang lebi doeloe, betoel-betoel sadja Kek-soen tida toeroet maentop. Sasoeda habis bersantap laloe ia berdjalang poelang.
Di waktoe menggerip samoea tetamoe prampoean pada poelang ka masing-masing poenja roemah, tapi sabaliknja mingkin malem ada samingkin banjak tetamoe lelaki jang dateng kondangan. Lantaran itoe, wajang tjokek, jang sadari siang soeda sowek soearanja njanjiken matjem-matjem lagoe dengen disertaken swaranja gambang, sekarang ini djadi bisa dapet bebrapa orang jang perhatiken.
Di sana-sini ada banjak medja tertoetoep dengen laken item, dimana orang asik tapaken hatinja dalem kaboesoekan dengen pertoeloengannja kartoe. Antaranja ada djoega bebrapa medja jang terales dengen taplak poeti, dan di sitoelah ada tempatnja orang beratem minoem, sembari bersenang-senang mendengeri wajang menjanji.
Koetika lontjeng mengoetaraken poekoel sabelas diatoer lagi barang-barang santapan di medja, soepaja tetamoe-tetamoe tida poelang dengen peroet kosong.
Waktoe soeda djadi poekoel satoe malem, roemahnja Tek-kian berbalik djadi sepi kombali. Salaennja itoe bebrapa tetamoe jang berdjoedi dari siang, samoea soeda pada poelang ka masing- masing poenja roemah.
Tapi teroes sampe di itoe saät Kek-soen tida kaliatan mata-idoengnja.