Landru/Bagian 9
BAGIAN IX.
Landru sebagi Papa Lulu.
———
Goegoepnja Landru melinken sabentaran sadja, sabelonnja laen-laen politic madjoe ka depan atawa laen-laen tetamoe bersiap bantoein politie, Landru soeda lompat dan lepasken poendaknja dari tangannja itoe detectief. Landru, maski poen tida menengok ka pintoe depan, tapi ia soeda taoe lebih doeloe bahoea disitoe moesti ditaro orang-orang politie, maka dengen kasebatan sebagi bajangan iblis, Landru soeda lompat ka atas medja makan, lari dengen lompatin itoe medja makan jang berdjedjer dengen penoeh makanan, menoedjoe ka djoeroesan pintoe blakang dari itoe restaurant, dimana Landru taoe ada satoe djalanan ketjil sabelah oedjoeng dari Rue Dupere.
Samoea orang jang doedoek dahar pada sapandjang medja-medja itoe, bangoen dengen riboet dari korsinja dan balikin badannja soepaja tida kena barang makanan jang terpental kalang kaboet kerna petjahnja piring-piring, mentalnja garpoe dan roeboehnja vas-vas kembang oleh kerna kakinja Landru jang mengindjek itoe dengen tida pandang kiri dan kanan.
Inspecteur politie Gaffiot jang tadi dengen gaga pegang poendaknja itoe badjingan Landru dengan tjepet tjaboet revolverrja dan oedak ka djoeroesan tempat larinja itoe bangsat sambil tioep fluitnja aken minta pertoeloengannja publik, tapi tida saorang jang brani toebroek pada Landru, sebab I andru dengen tjerdik ada ambil djalan lompat-lompatan di atas medja. Inspecteur politie tida brani lepasken tembakan di itoe tenpat rame, maka itoelah menggampangken Landru boeat linjapken dirinja.
Koetika Landru sampe di djalanan ketjil Rue Duperre, ia tida dapet denger lagi soeara fluitnja politie, maka ia tida perloe aken lari, hanja dengen hati santausa ia teroesken perdjalanannja ka wijk Batignolles, masoek di satoe straat ketjil Rue Caroline, kamoedian ketok pintoenja satoe roemah boetoet. Paul Lejeune, satoe bangsat dalem hotel-hotel jang ada djadi kontjonja Landru, bockaken pintoe. Landru masoek dan toetoerken apa jang telali terdjadi pada dirinja, Landru bermalem dalem itoe roemah boeroek, besokan paginja dengen satoe auto taxi jang tertoetoep rapet, ia berangkat ka roemah istrinja dengen slamat.
Laen-laen orang politie soeda karoeboengi itoe tiga kontjo jang Landru tinggalken. Caillard ada orang jang paling pande kasih penjaoetan atas pertanjaän-pertanjaännja politie.
Koetika politie tanjaken pada tiga orang itoe, apa marika kenal back pada itoe Raymond Diard, samoeanja menjaoet tida kenal. iaorang djadi bergaoelan satoe sama laen lantaran Raymond Diard sering dateng di itoe cafe, dan sembari doedoek minoem marika seringkali bertjakapan, maka itoelah iaorang djadi berkenalan. laorang sangkal dan bilang tida taoe siapa nama betoelnja itoe Diard, djoega iaorang njataken herannja jang itoe Diard bisa ditoedoeh djadi pemboenoeh, kerna sabagitoe lama iaorang bergaoel, ternjata Diard ada saorang beradat aloes, soeka dami dan tida soeka temaha.
„Akoe kwatir kaoe soeda toedoeh saorang jang tida berdosa, toean," kata Caillard pada itoe inspecteur politie. . . . . . ."
„Tida! akoe soeda kenalken betoel dia itoe Raymond Diard" djawabuja itoe inspecteur-politie.
,,Sebab akoe kenal itoe toean ada saorang baek-baek dan berkasihan pada sasamanja manoesia. Akoe kira nama betoelnja ada Lucien Guillet. Kaoe seboetken namanja Raymond Diard. Itoe berlaenan, toean. la ada poenja satoe istri tjantik jang sering seboet nama soeaminja Lucien.
„Tentoelah itoe ada prampoean jang kamoedian ia boenoeh," kata itoe inspecteur.
„Itoe prampoean masih moeda sekali, boleh djadi baroe doea poeloe doea tahon," kata lagi Caillard. „Dari parasnja orang bisa kenalken jang ia ada prampoean Inggris.
Sengadja Caillard berkata bagitoe boeat simpangken pikirannja itoe inspecteur pada Landru.
„ltoe kliroe! Njonja Cuchet ada satoe prampoean Fransch sedjati, oemoernja banjak lebih toewa dari sebagimana kaoe bilang, jaitoe tiga poeloe sembilan tahon," kata kombali Inspecteur Gaffiot. „ Aken tetapi apakah tida ada satoe antara kaoeorang jang bisa toetoerken tentang hal Diard? Siapa namanja jang betoel? Dimana ia tinggal? Brikenlah laen-laen katerangan djoega".
Ampir berbareng itoe tiga badjingan djawab jang marika tida taoe siapa itoe sabetoelnja Diard, sebab ia itoe boekan marika poenja kontjo.
Boeat Caillard tida ada kakwatiran satoe apa, sekali poen Landru kena ditangkep, sebab di antara barang-barang jang Landru djoeal pada Caillard, jaitoe barang-barang bekas prampoean korbannja Landru jang ia boenoeh, samoea ada soerat katerangannja maski poen antaranja ada soerat katerangan palsoe jang Landru bikin dengen minta pertoeloengannja Papa Jean Boas.
Boleh dibilang beroentoeng djoega jang itoe tiga hadjingan soeda kasih djawaban jang sama pada politie tentang halnja Landru, tjoba satoe antaranja kasih djawaban jang bertentangan, tentoe djoega iaorang didorong ka dalem pendjara, sebab iaorang poen terkenal di matanja politie.
Sasoedanja tida bisa dapet katerangan dari itoe tiga badjingan, dan djoega dari eigenaar cafe terseboet, lantas inspecteur Gaffiot berlaloe dari cafe terseboet bersama sakalian kawanannja, bertaoeken pada chetnja tentang itoe penangkepan jang gagal.
Di hadepannja Chef dari Inspecteur politie, Gaffiot terangken bagimana roepanja Landru jang mana lantas dipetaken dan disiarken pada laen-laen kantoor politie.
Gaffiot disesalken soeda bikin gagal itoe penangkepan jang berharga, tapi Gaffiot lantas kata. „Penoedoehan atas dirinja Diard sabetoelnja tida ada boektinja jang koeat. Toean Freidmann tida bisa briken boekti-boekti atas kadjahatannja itoe Diard, djoega tida bisa briken katerangan jang betoel siapa namanja jang sedjati. Iboe dan anak jang linjap, soeda dikasih katerangan oleh Diard bahoea doea orang itoe telah berangkat ka London. Siapa taoe kaloe sasoenggoenja doea orang itoe ada disana, maski poen politie di London soeda njataken dalem papreksaän bahoea itoe doea orang tida ada dateng di London. Soeda ternjata pakerdjaännja politie di Schotland Yard tida boleh dipertjaja sama sekali, itoe soeda berboekti dengen perkaranja Alphonse Robert, Sasoedanja pendjahat Alphonse Robert melariken diri dari London, baroe politie di Schotland Yard dapet taoe jang itoe pendjahat ada ambil tempat tinggal di Walworth Road, kamoedian sasoedanja ampat hari pendjahat itoe berdiam di Parijs, kitaorang djoega jang dapet tangkep padanja di Rue de Madrid. Hal ini ternjata bagimana politie di London koerang dikasih merdikaäu, kerna iaorang tida dikasih hak jang loewas aken bikin gledahan di satoe-satoe roemah jang ada tersangka djelek."
„Akoe satoedjoe dengen kateranganmoc itoe," kata. Chef Inspecteur, aken tetapi dalem halnja Diard ini, kitaorang tida boleh anggep seperti laen-laen perkara. Akoe telah dapet kanjataän dari terdjadinja banjak pemboenoehan jang gelap, ada bersemboeni tangannja satoe orang. Dan ini orang seperti akoe dapet firasat adalah Diard sendiri".
Besokan paginja dengen berkandaraän satoe taxi Landru dateng ka villanja di Rue de Maubeuge, dimana ia dapetken nona Marie de Layons soeda menoenggoeken. Ini nona jang barəe beroesia sembilan belas tahon soeda djadi lengket dan aleman sama Landru jang ia pandang sebagi saorang hartawan jang berboedi dan hati moelia.
Moelai dari itoe hari nona de Layons ada tinggal dalem itoe villa, dan salama ia menoempang disitoe, roemahnja Landru djadi terawat bersih, tapi lemari makanannja semingkin kosong didahar oleh ini nona, jang roepanja lantaran lama tida dalar makanan ledzat, soeda djadi sanget bernapsoe dahar di roemalunja Landru.
Koetika Landru balik ka itoe villa sasoedanja bebrapa hari ia tinggalken itoe nona sendirian, ia berkata :
„Ah! ma petite! Kaoe tida mara, nona tjantik, jang akoe soeda tinggalken kaoe sendirian disini sampe bebrapa hari. Oeroesan dagang soeda bikin akoe tertahan lama di laen tempat, tapi soekoer djoega sekarang soeda beres, dan bisa temenin lagi pada kaoe disini."
Landru njataken girangnja hati koctika dapet liat samoea perabotan, pekarangan dan lampoe-lampoe samoea bersih dan mengkilap. la tjioem bibirnja itoe nona jang seger seperti boeah delima aken njataken ia poenja trima kasih boeat itoe keradjinan.
Njonja Faucher, Landru poenja boedjang prampoean, soeda dikasih taoe oleh ini badjingan bahoea nona moeda itoe ada Landru poenja kaponakan jang dateng dari oedik dan hendak tjari pakerdjaän di Parijs.
Sabetoelnja Marie ada anak prampoeannja satoe iboe bangsa Roemenie. Ajahnja Marie soeda meninggal doenia, iboenja lantas menikah kombali sama satoe toean nama Collin de Layons. Marie kamoedian berkerdja sama satoe prampoean nama Vidal, doekoen branak jang tinggal di djalanan Belleville, dan Landru laloe kasih nasehat pada Marie soepaja ia balik sadja berkerdja kombali pada njonja Vidal. Nasehat itoe laloe ditoeroet oleli Marie, sebab Landru ada djandjiken hendak ambil kombali itoe nona kapan ia soeda poelang dari satoe perdjalanan jang lama.
Namanja Marie soeda ditjatet dalem Landru poenja BOEKOE ITEM, tapi sebab ini badjingan hendak selsehken laen oeroesan jang lebih penting, maka oeroesan sama nona Marie ia toenda lebih doeloe. Sasoeda ja Marie berlaloe dari itoe villa, Landru laloe berangkat ka roemah istrinja, tinggal disitoe bebrapa hari.
Satoe minggoe kamoedian sebagi mana Landru soeda djandjiken, nona Marie katemoeken poela Landru di villanja pada djalanan Rue de Maubeuge. Itoe malem nona Marie tida menginep, hanja ia pindjem satoe koffer koelit dari Landru, laloe pergi ka roemabnja njonja Vidal pada siapa ia minta masoek berkerdja poela. Marie toetoerken ia poenja hikajat, dan tjeritaken djoega tentang pertemoeannja pada satoe lelaki jang baek sekali dan jang telah djandjiken hendak menikah padanja. Roepanja njonja Vidal tida perloe pake pembantoe lagi. maka nona Marie jang tida djadi masoek kerdja disitoe, berangkat poelang ka roemahinja Landru. Besokan paginja di loear taoenja Landru, Marie pergi ka roemah iboenja, minta portret ajah dan iboenja jang dibikin di Bucarest koetika Marie masih anak-anak.
Koetika iboenja tanja ia maoe bikin apa sama itoe portret, Marie djawab:
„Akoe maoe oendjoekin sama toean Guillet. la ada satoe orang hartawan jang baek dan telah berdjandji hendak menikah padakoe."
ou Iboe itoe djadi terkedjoet koetika nama itoe diseboetken oleh Marie dan minta Marie kasih keterangan lebih lengkap tentang itoe toean, tapi Marie tida maoe kasih djawaban satoe apa lagi, hanja teroes berangkat dengen kasih djandjian hendak balik kombali lagi doea hari. Itoe koetika ada tanggal 11 Maart 1917, tapi sedari itoe waktoe orang tida dapet katemoeken lagi pada Marie de Layons.
Apa jang telah terdjadi dengen ini nona, di bawah ini kita aken toetoerken.
Nona Marie de Layons jang oesianja ada amat moeda sama sekali belon kenal apa namanja kadjahatan, soeda djadi katarik hati dengen kamoerahannja Landru jang maski poen baroe sadja kenal, soeda soeka oendang ia tinggal dalem roemahnja jang bagoes di Rue de Maubeuge. Bebrapa hari sedari ia tinggal disitoe, ia soeda diserang oleh penjakit influenza, Landru dengen radjin dan oendjoek hati kasian, ada rawatken Marie satiap hari.
Di ini roemah Landru djarang sekali pergi ka loear, sebab kwatir politie nanti kenalken padanja, melinken di waktoe malem sadja djikaloe ada perloe bertemoe dengen njonja Buisson, baroe Landru pergi ka loear.
Pada soeatoe malem koetika Marie soeda moelai semboeh, Landru ada berkata begini:
„Kaoe sekarang djadi koeroes dan poetjat sekali, djantoeng hatikoe. Akoe pikir besok lebih baek kita pinda ka akoe poenja villa jang berada di loear kota. Betoel ini waktoe hawanja ada dingin, aken tetapi hawa di loear kota ada lebih baek dari pada disini."
„Dimana adanja itoe villa?" tanja nona Marie dengen girang.
„Di Gambais, deket oetan Rambouillet. Disana kita aken tinggal teroes. . . . . ."
Esokannja tanggal 9 Maart, dengen berkandaran taxi Landru adjak itoe nona pergi ka station. Landru ada bawa ia poenja jas oedjan, samentara nona Marie ada bawa ia poenja koffer koelit warna mera toewa, dalem mana ia ada isi barang-barang dan pakeannja. Koetika soeda berada di perron aken menoenggoeken datengnja kreta api, Landru senantiasa lengosken moeka pada saban kali katemoe orang jang ia kwatirken ada orang politie atawa mata-mata, sebab maski poen itoe waktoe djenggotnja ia soeda potong pendek, toch bisa djadi djoega roepanja masih bisa dikenalken.
Di lokket Landru beli satoe kaartjis poelang pergi boeat ia sendiri, dan satoe kaartjis lagi boeat perginja sadja, jaitoe boeat nona Marie. Onkost beli kaartjis samoea ada ditoelisken dalem ia poenja BOEKOE ITEM. Koetika belakangan Landru ditangkep, dan hakim tanja kenapa ia beli itoe doea matjem kaartjis, Landru ada kasih alesan bahoea ia sengadja beli satoe kaartjis boeat perginja sadja, sebab nona Marie tida aken lekas balik lagi ka Parijs, sebab itoe nona perloe moesti tetira lama boeat semboehken penjakitnja, samentara ia sendiri moesti sabentar-bentar balik ka Parijs.
Sekarang marilah kita kombali ikoetin perdjalanannja itoe doea orang.
Pada waktoe lohor iaorang soeda sampe di villa Hermitage. Samoea djendela dan pintoe diboeka soepaja hawa oedara jang seger bisa masoek ka dalem.
Tatkala dapet liat keadaännja itoe roemah, nona Marie lantas sadja njataken girangnja dan betahnja tinggal disitoe.
„Kaoe ini bisa sekali pilih roemah jang enak, Papa Lulu," kata nona Marie pada Landru dengen bahasaken Papa Lulu. „Tentoe sekali siapa djoega nanti bilang betah tinggal disini."
„Akoe girang denger katamoe, anak," sahoet Landru jang selaloe panggil nona Marie „anak" atawa ,djantoeng hatikoe," tapi sabetoelnja Landru boekan berlakoe sebagi Papa, hanja sebagi pemogor prampoean jang tida kenal poewas. Nona Marie jang moeda, pantes djadi anaknja Landru, oleh ini badjingan hendak dibikin sebagi selir.
Tiada brapa lama lagi iaorang soeda doedoek hadepken hidangan di kamar makan, dimana doeloe njonja Collomb soeda poetoes djiwanja.
Boeat oendjoek tjintanja, saban-saban Landru peloek itoe nona dan tjioemin bibirnja Marie.
„Marie jang manis," kata Landru sahabisnja bersantap. „Akoe harep kaoe bisa dapet banjak kasenangan di ini tempat. Akoe nanti merasa beroentoeng sekali djikaloe di dalem bebrapa hari lagi kaoe bisa djadi semboeh betoel dari sakitmoe".
„Djangan kwatir, Papa Lulu," sahoetnja Marie dengen senjoem jang manis. „Di damping kaoe, Papa, tida ada satoe nona jang nanti djadi kesel. Dan boeat bikin lekas seger badankoe, apakah kaoe soeka loeloesken akoe poenja satoe permintaän?"
„Tentoe sekali, bilanglah apa jang kaoe ingin?" „Akoe ingin ada poenja satoe fiets, soepaja akoe boleh djalan-djalan boeat bikin seger badankoe."
„Kaoe poenja kainginan nanti diloeloesken."
Esokannja Landru soeda bawa poelang satoe speda prampoean jang ia boleh dapet sewa dari satoe toko speda. Sedari itoe hari pendoedoek itoe kampoeng sering sekali dapet liat nona Marie berkandaran speda djalan moendar-mandir di sepandjang djalanan depan villa Hermitage.
Bahoea nona Marie lekas djato tjinta pada Papa Lulu jang bagitoe baek boedi, inilah orang traoesah heran. Tapi orang di loearan tida taoe adanja itoe perhoeboengan, banjak orang kira nona Marie ada anak atawa tjoetjoenja Landru.
Landru djoega sewa satoe speda, hingga seringkali orang liat nona Marie dan Landru berkandaran itoe roda angin djalan-djalan ka Houdan, Dannemarie, Malulette dan laen-laen desa lagi jang ada di sapoeternja itoe tempat. Kadang-kadang iaorang naek auto poeterin itoe tempat.
Bahoea Marie tida taoe kaloe itoe roemah dimana sekarang ia ada tinggali, mempoenjai banjak resia ngeri, itoelah tentoe sekali, sebab ini nona poen belon kenal apa namanja kadjahatan. Pernanja itoe roemah di tempat sepi, sama sekali tida diperdoeliken oleh Marie.
Saban kali omong Landru selaloe tjerita jang sasoedanja menikah iaorang nanti bikin perdjalanan ka laen-laen negri. Marie njataken girangnja dan kata, bahoea dengen bagitoe orang-orang jang ia bentji tida nanti dapet taoe dimana ia soeda pergi.
Landru lantas kata:
„Sasoenggoenja kaoe ada satoe nona manis jang bisa pegang djandji dengen betoel. Djadi sabagitoe lama kaoe tinggal disini kaoe tida menoelis seerat pada siapa djoega? Dan kaoe toch tida ada tjerita pada soeatoe orang poen jang akoe ada poenja roemah di djalanan Rue de Maubeuge?"
„Tida, Papa jang manis," djawab Marie, „Akoe tida ada poenja sobat-sobat jang perloe dapet taoe dimana akoe berada, dan djoega akoe tida ada poenja familie jang perloe taoe dimana akoe soeda hidoep beroentoeng."
Itoe omongan girangken pada Landru, sebab ini bangsat jang lagi dijari oleh politie, kwatir sekali Marie menoelis soerat pada sobat atawa familie aken toetoerken dimana ia sekarang ada hidoep beroentoeng, sebagimana soeda terdjadi dengen laen-laen prampoean jang apabila dapet sedikit kasenangan, soeda lantas banggaken kasenangannja itoe pada laen-laen prampoean.
Hawa oedara di Gambais sasoenggoenja ada bagoes sekali. Dalem bebrapa minggoe sadja Marie soeda djadi sehat betoel. Moekanja jang poetjat djadi merah dan bertjahia sebagi satoe gadis jang baroe akil-balek, badannja jang koeroes, dengen pesat djadi denok, samentara ia poenja napsoe makan semingkin hari djadi bertambah semingkin banjak. Dengen sedikit perkataän bisa dibilang bahoea nona Marie jang tadinja bagitoe bedjat, sekarang djadi satoe nona jang tjantik sekali.
Perlahan-perlahan katjantikannja ini nona meresep dalem hatinja Landru, hingga ini bandot toewa moelai merasa tjinta pada Marie. Boekan sadja Landru soeka katjantikannja, tapi djoega Landru sajang sebab ini nona bisa sekali ambil hat, radjin berkerdja, hingga dengen tangannja sendiri segala apa dalem itoe villa soeda djadi rapi, bersih dan teratoer beres.
Salaennja bagitoe, Marie ada satoe anak jang hormat pada orang toewa, denger kata dan hatir ja djoedjoer. Maka dari itoe Landru gampang sekali pertjajaken ia poenja oeroesan roemah tangga. Apa sadja jang dikerdjaken oleh ini nona, selamanja ada senangken hatinja Landru. Oleh kerna demikian, Landru soeda ambil poetoesan dalem hatinja aken kasih ini prampoean tinggal hidoep sebagi selirnja. Tentoe sekali Landru, jang maski poen mempoenjai hati kedjem sebagi binatang, tida nanti boenoch satoe prampoean jang tida mempoenjai harta, tapi bisa senangken hatinja djikaloe ia dikasih tinggal hidoep. Hal itoe tentoe kadjadian dengen nona Marie djikaloe tida ada terdjadi soeatoe hal jang tida terdoega, dan jang di itoe hari djoega membawa binasa pada dirinja nona Marie.
Hal itoe kita hendak toetoerken di bawah ini:
Pada soeatoe hari, kira-kira doea minggoe berselang sedari sampenja Marie di itoe villa, Landru ada adjak Marie berkandaran auto pergi ka Dreux, dimana iaorang beli bebrapa roepa barang makanan dan barang-barang.
Tatkala Landru sedeng beli tembako, Marie masoek ka dalem satoe toko boekoe dan beli satoe tijdschrift bersama satoe lembar soerat kabar Bon Soir.
Itoe malem sahabisnja dahar sore, Landru doedoek menoelis soerat-soerat pada adresnja Caillard, samentara Marie doedoek di hadepan medja toelisnja Landru sembari batja soerat kabar jang baroesan ia beli.
Roepanja dalem itoe soerat kabar ada dimoeat toelisan apa-apa jang menarik pikirannja Marie, kerna alisnja ada kaliatan ditekoek. Sakoenjoeng-koenjoeng ia taro itoe soerat kabar di pangkoeannja dan ia pandang roepanja Landru beroelang-oelang. Landru jang sedeng doedoek menoelis tida liat Marie awasken. ia. Marie padoe roepanja Landru dengen roepanja satoe pendjahat jang lagi ditjari oleh politie di Parijs dan ada dipetaken roepanja pendjahat itoe dalem soerat kabar terseboet.
„Sama betoel," kata Marie dalem hati sendiri.
Soepaja bisa batja kadoea kali dengen tida dikatahoei oleh Landru, maka Marie laloe naek ka loteng, masoek ka kamarnja, di mana ia laloe batja lagi sekali itoe toelisan. „Siapa itoe Raymond Diard, pemboenoehnja njonja Cuchet dan André ?" menanja Marie pada diri sendiri. Siapa ini Papa Lulu jang roepanja sama betoel dengen Raymond Diard jang ditoetoerken ?"
Marie de Layons merasa serba soesah. Ia menjesel sekali soeda beli itoe soerat kabar jang memboeka resianja itoe lelaki pada siapa sekarang dirinja soeda teriket oleh satoe pertjintään. Marie rasaken dadahnja sesek, ia lepas dirinja di atas pembaringan, dari badannja ada kaloear. karinget dingin.
„Tida! Tida boleh djadi!" kata Marie achir-achir pada diri sendiri. la sangkal dan bantah pikirannja sendiri. „Tida boleh djadi. Lucien jang roepanja bagitoe pendiam, bagitoe alim dan bagitoe baek hati, tida bisa djadi soeda lakoeken itoe pemboenoehan atas dirinja saorang prampoean."
Tapi perlahan-perlahan Marie moelai inget kombali pada segala perboeatannja Landru sedari ia bersama-sama tinggal di Gambais. Semingkin ia pikirken hal itoe, semingkin hatinja merasa sangsi. Achir-achir ia ambil poetoesan aken tanja sendiri pada Landru tentang itoe kabaran jang membikin pikirannja pepat dan dadahnja sesak. Di kamar salon ia dapetken Landru masih doedoek menoelis dengen asik.
Marie toenggoe sampe Landru soeda abis menoelis, kamoedian dengen soeara perlahan ia moelai menanja pada itoe bantjingan :
„Papa Lulu, apa kaoe soeda perna tinggal di Vernouillet?"
Landru kaget, sebab ia tida sangka jang Marie aken bikin itoe pertanjaän.
Vernouillet?" mengoelangi Landru seperti orang jang baroe perna denger itoe nama. ,,Dimana itoe Vernouillet? Dan kenapa kaoe tanjaken itoe?"
Landru poenja roepa jang mendadak djadi berobah boeat sabentaran, ia poenja djawaban jang sedikit lama, menerbitken tjoerigaän dalem hatinja Marie.
Landru poenja kwatir dan kaget dengen itoe pertanjaän melinken sabentaran sadja. Tida lama kamoedian ia soeda bisa kaloearken pertanjaän jang lemah lemboet pada Marie:
„Apakah jang mendjadi sebab maka kaoe tanja akoe soeda perna tinggal di Vernouillet? Apa kaoe ada poenja kenalan disana?"
„Tida," djawabnja Marie. „Tapi, Papa Lulu, kaoe poenja roepa ada mirip sekali dengen apa jang ditoelis dalem soerat kabar Bon Soir jang akoe baroesan ada batja. Soerat kabar itoe ada tjeritaken tentang saorang lelaki jang berdjenggot nama Raymond Diard, ditoedoe soeda melakoeken pemboenoehan di Vernouillet atas dirinja satoe prampoean djanda dan anaknja lelaki."
„Raymond Diard?" menanja Landru dengen soeara perlahan. aken tetapi dari roepanja ada ternjata jang ia ada sedikit kaget denger pertanjaän itoe.
„Ja," djawabnja Marie dengen ketoes, kerna dari gerakan dan omongannja Landru ia dapet kanjatahan sasoenggoenja ini Papa Lulu ada itoe orang djahat jang sedeng ditjari oleh politie di Parijs. „Kaoe soeda djoestaken akoe, Papa Lulu," kata lagi Marie dengen roepa mendongkol dan menjesel. ,,Kaoe tida maoe bilang teroes terang jang kaoe soeda perna tinggal di Vernouillet dan kaoe soeda pake nama jang aneh, tida brani pake kaoe poenja nama Raymond Diard!"
„Anak edan!" kata Landru sembari dorong Marie ka belakang „Apa kaoe taoe apa jang kaoe kata?" „Akoe soeda bitjara perkara jang betoel! Akoe soeda dapet kanjatahan bahoea sasoenggoenja kaoe ini ada orang jang soeda lolosken diri dari tangkepannja politie. Sekarang akoe soeda mengarti kenapa kaoe sabentar-bentar mengilang kapan ada di station, kenapa kaoe salaloe pake katja mata itam, sedeng kaoe tida sakit mata, dan kenapa kaoe sabentar-bentar toekar pakean kaloe kaoe pergi ka loear. Djoega sekarang akoe baroe taoe kenapa itoe malem, sahabisnja kita bertemoe di gedong Maubeuge, dan kaoe djandjiken esokannja hendak samper lagi padakoe, kaoe tida dateng. Itoe hari kaoe soeda dioeber-oeber oleh politie di Montmartre. Kaoe liat, toean Diard, akoe sekarang tida maoe didjoestaken lagi oleh kaoe. dan akoe sekarang maoe.. . . ."
„Apa kaoe maoe sekarang, anak tjilaka?" kata Landru dengen soeara perlahan, aken tetapi pada bidji matanja orang bisa taoe jang ia ada menggenggem satoe niatan jang kedjem dan boewas.
„Akoe maoe pergi ka kantoor politie boeat tjeritaken jang di ini roemah ada berdiam Papa Lulu alias Raymond Diard atawa alias Lucien Guillet, pemboenoeh njonja Cuchet dan anaknja."
Sahabisnja kata bagitoe Marie tjepet-tjepet maoe pergi ka kamarnja aken ambil ia poenja mantel dan topi, Landru treakin.
„Mari sini, anak tjilaka!" Aken tetapi itoe waktoe Marie soeda sampe di loteng, maka Landru melinken toenggoeken sadja itoe nona toeroen lagi. Sembari menoenggoe, Landru berpikir bahoea djikaloe ia bisa boedjoek Marie hingga ini nona maoe bersariket padanja atawa sedikitnja djangan sampe itoe nona boeka ia poenja resia, adalah lebih baek ia kasih tinggal hidoep ini nona jang ia tjintaken, aken tetapi djikaloe ia tida maoe menaloek, fentoelah ia aken binasaken. Sembari berpikir bagitoe Landru raba-raba ia poenja browning.
Tida lama lagi Marie toeroen dari loteng dan Landrut hampirken padanja, tjekel batang lehernja dengen kasar dan tanja dengen soeara mara :
„Apa kaoe kira akoe nanti biarken kaoe pergi dari sini, bangsat ketjil? Apa kaoe kira bisa lepasken diri zonder dapet rasaken akoe poenja tangan? Apa kaoe kira akoe bisa soeda zonder kaoe bermoefakatan doeloe? Heh! kaoe ini tentoe soeda edan, soeda karongsokan iblis. Apa sasoeatoe orang jang mempoenjai djenggot itam dan matanja tjelong moesti ditangkep lantaran orang sangka ia bernama Raymond Diard? Djadi kaoe poenja kalakoean jang begini ada pembalesanmoe bagi akoe poenja tjinta dan boedi soeda toeloeng dirimoe selagi berada dalem soesa? Inilah ada djawabanmoe atas akoe poenja pertanjaän apa mkaoe soeka djadi istrikoe? Astaga, anak. . . . ."
„Perkara nikah kaoe soeda tanjaken djoega pada njonja Cuchet, dan pengabisannja, maski poen njonja Cuchet ada tjinta pada kaoe, tida oeroeng kaoe binasaken djoega djiwanja. Boeat sekarang akoe soeda kenal betoel jang kaoe ini tida laen dari pada Raymond Diard jang ditjari oleh politie dan ada sanget berbahaja aken sasoeatoe prampoean dekatken padamoe."
„Diam! anak tjilaka!" membentak Landru dengen soeara keras. „Tjerita doeloe apa boektinja maka kaoe brani toedoeh dirikoe ada Raymond Diard dan pemboenoeh!"
„Boektinja," kata lagi nona Marie dengen tida sekali merasa kwatir pada itoe pemboenoeh. Pada satoe minggoe jang laloe, koetika kita pergi ka Houdan dengen auto, akoe soeda tjoba boeka kaoe poenja koffer. Disitoe akoe dapetken satoe toempoek soerat-soerat. Antaranja ada bebrapa soerat jang tertoelis oleh satoe djedjaka dengen pake nama André de Cuchet!"
„Djoesta. Kaoe ini njata ada satoe djahanam jang pande sekali berdjoesta!" kata lagi Landru sembari bentak, lehernja Marie, hingga ia ini sempojongan dan mengempet ka tembok.
Landru tinggal itoe nona bersender di tembok sembari oesap-oesap lehernja jang djadi letjet dan sabelah tangan lagi oesap-oesap matanja jang moelai melele aer mata.
Landru awasken Marie dengen mata tida berkesip. la sajang sekali pada Marie jang eilok kapan ia abisken djiwanja jang masih bagitoe moeda. la pandang lagi badannja Marie jang montok, seger dan enak sekali boeat dipelok-pelok. Maka sasoedanja memandang sakoetika lamanja denges tida kaloearken satoe perkataän, perlahan-perlahan Landru hampirken Marie dan sembari pegang kapalanja nona ini Landru moelai memboedjoek:
„Pikir toch lagi sekali, Marie jang manis. Tidakah kaoe taoe jang akoe ada tjintaken kaoe sagenap hati dan sagenap djiwa, segala apa poen jang kaoe inginken, akoe salaloe toeroetin. mKenapa sekarang kaoe bisa kaloearken itoe perkataän-perkataän jang bisa timboelken kaoe poenja rasa menjesel saoemoer hidoep, kerna kaoe nanti dapet taoe jang kaoe poenja Papa Lulu belon perna berboeat soeatoe apa jang melanggar pada wet atawa titahnja Allah!"
Marie berontak dan lepasken dirinja dari pelokannja Landru.
„Djangan pegang lagi dirikoe," kata Marie sembari menjingkir djaoe ,,Akoe sekarang boekan kaoe poenja Marie. Kaoe tida bisa bersihken dirimoe dari satoe pemboenoeh!"
„Djahanam!" treak lagi Landru dengen goesar. „Djadi kaoc tetap maoe pergi sama politie?"
„Betoel. Itoelah ada akoe poenja kwadjiban!"
„Djadi kaoe veroeng aken nikah padakoe?"
„Ja, sebab akoe tida maoe dapet soeami bekas pemboenoch!"
„Soenggoe soenggoe kaoe berniat bikin soesah padakoe? Nalı! rasaken ini. . . . ."
Sabelonnja Marie dapet tave apa jang Landru hendak bikin, ini badjingan soeda kaloearken ia poenja browning, lepasken satoe tembakan jang mengenaken pada dadanja itoe nona tjantik.
„Sekarang kaoe rasaken hoekoeman bagi kaoe poenja lantjang tjampoer perkaranja laen orang."
Nona Marie de Layons mengglisahan dengen tida bisa boeka msocara, dan bebrapa saat ia soeda poetoes djiwa.
„Hah! samoea orang prampoean njata ada berbahaja, berbahaja lantaran ia poenja aleman, lantaran taoe dirinja ditjinta. Besok atawa noesa poen ada sama sadja boeat ia poenja kamatian."
Sasoedanja boewang patroon kosong jang bekas dipake ka dalem kebon, Landru laloe masoek ka kamar makan, toewang cognac satoe glas, ia minoem kering soepaja hatinja djadi tetap dan bisa loepaken apa jang baroesan ia soeda berboeat. Itoe patroon kosong belakangan, jaitoe sasoedanja Landru ditangkep, politie telah dapetken dalem itoe kebon.
Sahabisuja berpakean, dengen tida ambil perdoeli lagi pada itoe mait, ia laloe berangkat dengen lekas ka Parijs dan apa jang ia bakal berboeat di ini kota, poen ia sendiri belon bisa bilang.