Landru/Bagian 10
BAGIAN X.
Resia di Gambais.
———
Landru djalanken autonja dengen kentjeng dan djam sabelas malem ia soeda sampe di Parijs.
Kraag leher dari ia poenja djoeba pandjang, sengadja ia naekin ka atas, soepaja saparo moekanja tida kaliatan, samentara matanja ia toetoep dengen katja mata besar jang biasa dipake oleh Chauffeur. Dengen berpakean bagitoe roepanja Landru tida aken bisa dikenalken, apa lagi djalanan ada sepi dan penerangan moelai koerang lantaran itoe waktoe soeda djaoe malem.
Landru djalanken autonja sapandjang Avenue des Champs Elysee, dari djalanan mana ia laloe sampe di roemahnja Caillard. „Ha Jules, sobatkoe. Apa ada kabar boeat akoe?" tanja Landru koetika itoe sobat boeka pintoe.
„Kaoe . . . . . . astaga!" kata Caillard dengen roepa heran. Kaloe bagitoe kaoe masih ada disini, boekan pergi ka laen negri boeat loepoetken dirimoe dari tangkepannja politie. Soenggoe kaoe terlaloe brani. Akoe kasih nasehat padamoe, lebili baek sekarang kaoe singkirken diri dari Parijs, kerna disini kaoe ada dalem bahaja.
„Sedari itoe hari akoc melinken berdiam dalem akoe poenja villa sadja, dan baroe ini malem akoe berdjalan kaloear," saboet Landru.
„Kaloe begitoe kaoe djangan tjoba-tjoba berdiam lama di Parijs. Sekarang djoega lebih baek kaoe berangkat," kata lagi Caillard jang njata ada lebih berkwatir dari pada Landru. „Kaoc taoe, itoe inspecteur Gaffiot sampe sekarang masih sadja tjari pada kaoe. Kamaren ia soeda dateng padakoe disini boeat tjari katerangan tentang hal kaoe, kerna ia ada taro sangkahan jang akoe ada taoe banjak perkara kaoe. Dari itoe lagi sekali akoe nasehatken, lebih baek kaoc lantas berangkat, kerna akoe kwatir tida djaoe dari sini ada politie pasang mata." „Apa kaoe ada pikir bagitoe?" tanja Landru-dengen tertawa.
„Itoe akoe tida taoe pasti. Aken tetapi apa kaoe sendiri tida kwatir, dan apa kaoe sendiri tida merasa betoel pada toedoehan itoe ?"
Sakoetika lamanja Landru diam, ia sangsi, tapi achir-achir ia berkata:
„Ja sobatkoe. Sasoenggoenja ada bagitoe. Itoc prampoean soeda bikin akoe djengkel, hingga lantaran goesar akoe soeda boenoeh padanja."
„Kaoe soeda berbocat perkara jang loemrah," kata Caillard. „Prampoean jang soeka bikin djengkel hati lelaki, seringkali dapet bagiannja, heibat atawa enteng. Akoe sendiri sering berboeat bagitoe."
Boeat Caillard ada kapentingan apa aken tjela perbocatamnja Landru jang kedjem, samentara Landru ada kasih ia kaoentoengan bagoes dalem ocroesan pendjoealan barang-barang jang mendjadi miliknja prampocan-prampoean, korbannja Landru.
„Apatah jang Gaffiot soeda tjerita?" tanja Landru.
„la bilang kaoe soeda boenoeh satoe prampoean di Vernouillet, njonja Cuchet namanja, dan ia poenja anak nama Andre poen katanja kaoe soeda boenoeh. Toean Freidmann jang soeda tjeritaken itoe samoea pada politie. Apa kaoe kenal siapa itoe Freidmann?"
Landru gigit bibirnja.
„Apa lagi ia kata," kombaii Landru menanja.
„Gaffiot soeda dapet taoe djoega jang njonja Labord Linie, bekas kaoe poenja goela-goela, poen soeda ilang tida katahocan. Kaoe ditoedoch soeda lakoeken djoega pemboenoehan atas dirinja ini prampoean."
Landru moelai kwatir. la mengarti politie sakarang ada berkerdja soenggoe-soenggoe boeat tangkep dirinja dan tjari katerangan dengen giat. Maka ia merasa betoel kaloe ia lebih baek lekas-lekas berlaloe dari Parijs.
„Bagimana Gaffiot bisa taoe jang kita ada bersobat satoe sama laen?" tanja lagi Landru.
„Bagimana akoe bisa taoe?" djawab Caillard dengen angkat poendaknja. „Akoe melinken bilang jang akoe kenal kaoe lantaran sering bertemoe di cafe. Tapi akoe poenja katerangan itoe marika tida maoe pertjaja." „Kita poenja doea kontjo ?"
„Marika poen soeda tjerita sebagimana akoe socda berboeat. Ach! sobat, kaoe soeda berdiam disini terlaloe lama, baeklah sekarang kaoe lekas-lekas berlaloe dari Parijs. Bajangan politie senantiasa ada kaliatan di depan roemahikoe ini."
Akoe rasa djoega lebih baek toeroet kaoe poenja nasehat."
„Satoe perkataän lagi," kata Caillard sabelonnja Landru berlaloe. „Djangan toelis lagi soerat-soerat pada adreskoe. Doea boelan kamoedian kaloe keadaan soeda berobaly, dateng lagi ka Parijs."
Marika laloe kasih tangan satoe sama laen, Kamoedian Landru berlaloe dari itoe roemah dengen tida brani tengok ka kiri atawa kanan, ia teroes djalan dengen tjepet menoedjoe ka autonja jang ia taro di oedjoeng djalanan, samentara tangannja ia tida lepas pada brouwningnja.
Sasoedanja - naek dalem auto dan hendak kasih djalan itoe kandaran, ia dapet kanjatahan itoe auto telah roesak. Kerna Landru mengarti perkara auto, maka ia dapet katahoei bahoea roesaknja auto itoe orang soeda sengadja bikin.
Satoe detectief jang biasa djaga roemanja Caillard, soeda sengadja roesakin itoe auto, kamoedian detectief ini pergi ka kantoor politie boeat minta bantoean. Bersama satoe rombongan politie iaorang dateng kombali ka tempat dimana autonja Landru ada berdiri, dengen pengharepan bisa tangkep kaloe Landru hendak naek ka dalem autonja itoe.
Landru jang tjerdik, lantas mengarti ia tida perloe pikir lama-lama lagi atawa bikin betoel auto itoe, sebab keadaan ada dalem bahaja, maka ia lantas sadja tinggalken autonja, landjoetken perdjalanannja dengen kaki. Belon brapa djaoe ia djalan, dari kadjaoehan ia denger soearanja satoe auto jang mendatengi. Dengen jepet Landru mengempet di samping tembok roemah jang gelap. la liat auto itoe ada moeat orang-orang politie dan brenti di depan ia poenja auto jang soeda roesak. Landru tertawaken marika, dan teroesken perdjalanannja masoek ka dalem satoe gang. Dalem ini gang Landru boeka ia poenja jas pandjang, lemparken jas itoe ka dalem satoe pekarangan, sebab jas itoe ada bikin soesah ia djalan, dan tambahan lagi bisa bikin orang heran saorang jang djalan kaki ada pake jas pandjang biasanja dipake oleh chauffeur. Di dalem gang ia biloek lagi ka satoe gang ketjil. la poenja pengatahoean tentang selak-seloeknja kota Parijs jang lebar, bikin ia gampang sampe dalem garagenja di Neuilly. Itoe waktoe soeda djam tiga malem, dan satengah djam kamoedian ia soeda kaloear lagi dari itoe garage dengen laen auto, kapoenjaännja ia poenja satoe langganan. Auto ini ada berwarna aboe-aboe, jang poenja masih ada di medan paprangan.
Dengen itoe kandaran ia berlaloe dari Parijs, ambil djalanan di Montreuge, menoedjoe ka sabelah Selatan, achirnja ia sampe di Etampes. la masockin autonja dalem pekarangan hotel Grand Courrier, minta kamar dan seboetken dirinja nama Henri Robert. Beroentoeng sekali Landru lekas berangkat, maski ia moesti tinggalken autonja jang berharga djoega. Lima minuut sadja kaloe ia masih berdiam di roemalinja Caillard, nistjaja dirinja socda kena ditangkep.
Dalem hotel Landru tidoer dengen njenjak, esokannja ia pergi ka satoe toko, beli jas pandjang jang moerah dan satue stel pakean. Landru berdiam di itoe hotel sampe esokan malemnja, siang-siang ia soeda bersantap, kamoedian dengen ambil djalan dari oetan Rambouillet, dengen girang Landru soeda bisa poelang lagi ka villanja di Gambais, dimana masih ada katinggalan satoe bangke jang ia belon bikin seleseh.
Maski poen ia sendiri liat jang dirinja samalem ampir-ampir sadja tida terloepoet dari tjekelannja politie, maski poen Jules Caillard soeda tjeritaken jang Landru poenja kadjahatan-kadjahatan laen politie di Parijs soeda dapet taoe, toch sasoedanja sampe di villanja Landru soeda bisa loepaken sama sekali apa jang telah terdjadi samalem. Apa jang ia sedeng pikirken sekarang, adalah fatsal maitnja njonja Marie de Layons jang sekarang ada terletak di hadepannja. Bagimana ini Landru poenja kakedjeman dan kabranian, ada ternjata dari ia poenja daja menjungkirken maitnja Marie.
Soepaja badannja djadi anget, Landru minoem satoe gelas anggoer, kamoedian ia pondong maitnja nona Marie, bawa ka pondok belakang. Bermoela ia boekaken samoea pakeannja, melinken ambil Marie poenja satoe pantoffel dari koelit, bersama nona itoe poenja soerat-soerat jang terdapet dari dalem koffer koelit. Samoea pakean dan laen-laen barangnja itoe nona Landru lantas bakar. Sascedanja itoe lantas Landru kaloearken lagi itoe sendjata tadjem jang doeloe soeda pisahken badan dan kapalanja njonja Collomb. Dengen itoe sendjata Landru moelai koetoeng-koetoengin badan dan kapalanja Marie, sabagian badan itoe jang bisa dikenalken, Landru kasih masoek dalem satoe kwali besar, dimana ada aer dimasak bergolak-golak. Itoe kapala, tangan dan kaki seperti djoega daging babi jang dimasak. Dalem tempo tida brapa lama itoe anggota-anggota jang dimasak djadi empoek. Landru lantas keset koelitnja, hingga katinggalan daging-dagingnja sadja.
Sasoedanja bagitoe Landru laloe ambil satoe karoeng, masoekin itoe badan jang terpotong-potong ka dalem karoeng terseboet. la naekin itoe karoeng ka dalem autonja, dan koetika lotjeng soeda mengoetaraken djam poekoel 3 malem, Landru laloe kandarken sendiri autonja, menoedjoe ka Maulette. Landru sengadja tida maoe ambil djalan di Gambais, kerna di itoe kampoeng ia kwatir ada orang jang kenalken padanja. Maulette melinken ada satoe tempat sepi jang di waktoe bagitoe pendoedoeknja samoea soeda menggeros di tempat tidoer. Sasoedanja menikoeng di satoe djalanan ketjil, achir-achir Landru sampe di Vierzy.
Dari sitoe Landru landjoetken perdjalanannja sampe toedjoe-poeloe kilometer djaoenja, ia sampe di satoe belokan jang masoek ka satoe djalanan ketjil, dan ini djalanan ada boeat ka satoe fabriek jang pada semprongnja ada kaloearken banjak asep.
Landru soeda dapet taoe doedoeknja ini fabriek, lantaran pada soeatoe hari, koetika ia djalan-djalan, ia soeda menjasar ka ini fabriek. Sebab soeda katelandjoeran, ia masoek teroes ka fabriek itoe sampe ka dapoer machine. Disini Landru dapet liat doea dapoer besar, laloe minta katerangan tentang api dan brapa lamanja dapoer itoe dibakar. Dari satoe machinist Landru dapet taoe kaloe itoe dapoer melinken dipake waktoe siang sadja, samentara di waktoe malem samoea penggawe pada poelang, tinggalken itoe fabriek kosong, aken tetapi itoe dapoer dikasih menjala teroes, soepaja pagi-pagi bisa digoenaken lagi. Kerna dapoer itoe boekan pake areng besi atawa kajoe, maka tida perloe orang toenggoeken.
Koetika Landru sampe di itoe gang ketjil ia laloe brentiken autonja dan angkat itoe karoeng jang berisi mait, lantas ia djalan kaki sampe di belakangnja itoe fabriek. Disitoe Landru laloe bertreak sakoeat-koeatnja dan ia poekoel djoega satoe kaleng kosong jang bersoeara keras boeat dapet kanjataän apakah betoel di itoe fabriek tida ada jang djaga. Limabelas minuut lamanja ia toenggoe, dan kerna dapet kanjataän betoel itoe fabriek ada dalem soenji, maka Landru laloe masoek ka dalem kamar machine, kamoedian ia lemparken itoe karoeng jang berisi potongan mait ka dalem dapoer jang sedeng disemprot oleh api jang sanget panasnja. la boeroe-boeloe kombali, ka dalem autonja dan teroes berdjalan poelang.
Bahoea esokannja machinist dari itoe fabriek djadi kaget dapet liat toelang manoesia dan baoe sangit dari mait jang dibakar, itoelah pembatja tentoe bisa doega, tapi tida ada satoe orang jang taoe mait siapa adanja itoe dan siapa pemboenoehnja jang bagitoe kedjem.
Samentara Landru di roemahnja tinggal senang. Oleh kerna ia tida bisa dateng lagi di Parijs, maka ia toelis soerat pada istrinja aken kabarken jang lantaran ada oeroesan dagang, maka boeat satoe boelan lamanja ia tida poelang, hanja berdiam di Bayonne. Tapi sabetoelnja Landru ada pergi ka Beauvais, satoe tempat djaoenja limapoeloe mijl dari Parijs. Disini ia menginep di Hotel de France et d'Angleterre. Dari ini tempat ia sering kirim soerat pada njonja Buisson, ia poenja katjintaän jang di sabelah atasan ini kita soeda tjeritaken.
Oewang jang ada dalem sakoenja melinken bisa tahan bocat satoe minggoe sadja, maka Landru mengarti jang ia perloe moesti tjari oewang lagi. Djalan jang paling dekat bocat ia dapet oewang, adalah melinken eret harta bandanja njonja Buison. Aken tetapi djoestroe ini njonja jang membikin Landru djadi tjilaka. Itoe njonja djanda jang seringkali trima soerat-soerat pertjintään dari Landru ada satoe prampoean jang tjerdik, pinter dan djoedjoer. Aken tetapi kakajaännja melinken sedikit sadja. Oemoernja kira-kira ampatpoeloe ampat tahon. la soeda berkenalan dengen Landru lantaran dapet liat advertentienja itoe badjingan jang seboetken dirinja satoe fabrikant.
Sasoedanja bertoendangan, dengen melawan pada kahendakannja Landru, njonja Buisson ada kenalken ini lelaki djahanam pada soedara prampoean dari itoe njonja djanda, jaitoe njonja Paulette dan nona Lacoste. Djoega dengen teroes terang njonja Buisson ada bilang pada Landru jang ia soeda ada poenja anak lelaki jang sekarang ada tinggal di Bayonne.
Pada ini njonja Landru ada pake nama André Charcroix, mengakoe ada poenja satoe fabriek jang mengaloearken hasil satoe tahon kira-kira 2 millioen frank.
Doea soedara prampoeannja njonja Buisson itoe telah trima koendjoengannja toean Charcroix alias Landru si pemboenoeh, dengen pengrasaän koerang senang, dan besokan paginja poen iaorang ada doedoek bersantap sama-sama. Landru sendiri sabetoelnja tida merasa senang bergaoel dengen bagitoe banjak familie dari prampoean jang ia hendak djadiken korban. Tapi sebab ia ada bagitoe aoes dengen oewang, dari sebab itoe waktoe kantongnja soeda sanget kempes, maka ia terpaksa trima voorstelnja njonja Buisson aken adjar kenal dengen doea soedara prampoeannja itoe.
Dalem ia poenja BOEKOE ITEM Landru tjatet namanja njonja Buisson dengen angka no. 7. Apa ini angka ada berarti jang itoe badjingan socda boenoeh prampoean toedjoe djiwa, atawakah laen tanda, inilah orang tida bisa dapet kapastian, sebab sampe itoe waktoe sabetoelnja Landru soeda boenoeh lebih toedjoe djiwa.
Njonja Buisson sasoedanja tinggal dalem roemahnja jang baroe abis dibikin, jaitoe di Boulevard Ney, ada trima satoe soerat dari Charcroix, dalem soerat mana ada diminta njonja Buisson soeka dateng di Hotel di Beauvais. Alesannja kenapa ia minta itoe njonja dateng, jalah lantaran ia baroe back sakit, dan menoeroet nasehatnja tabib, ia dilarang dateng ka Parijs.
Besokannja njonja Buisson lantas dateng dan koetika bertemoe, Landru sengadja bikin dirinja sebagi saorang jang baroe baek sakit.
„Ah! achir-achir kaoe dateng djoega, djantoeng hatikoe." kata Landru dengen roepa lesoe dan tindakan lemas. „Akoe tadinja kira kaoe tida soedi dateng dan akoe rasa jang akoe tida bakal katemoeken lagi pada kaoe."
„Apa soeda djadi dengen kaoe, André ?" tanja njonja Buisson dengen manis dan penoeh hati kasian, sebab kira sasoenggoenja Landru baroe baek sakit.
„Ach! tjilaka ampir menimpah. Akoe dapet sakit panas jang keras, hingga satoe minggoe lamanja akoe moesti berdiam di dalem kamar. Sasoedanja djadi sedikit semboeh, akoe ada ingetan aken moelai lagi berkoeliling oeroes dagangankoe, aken tetapi doktor larang akoe berboeat bagitoe, hanja kasih nasehat aken ambil tempat jang njaman dan djangan dateng ka Parijs doeloe jang hawanja tida sehat. Dari itoe akoe lantas dateng kasini dan ada ingetan aken ambil lagi tempat tetira di pedoesoenan lebih djaoe, tapi dari sebab tida mempoenjai temen, maka akoe oendang kaoe dateng disini, dengen pengharepan kaoe nanti soeka toeroet sama-sama."
Njonja Buisson jang tida pikir lebih djaoe, soeda lantas trima itoe oendangan dan itoe malem ia lantas balik ka Parijs, beresken ia poenja koffer berisi pakean dan sadiaken apa jang perloe dibawa boeat itoe perdjalanan.
Koetika ia dateng kombali di Beauvais, marika tinggal lagi disitoe doea hari lamanja, kamoedian iaorang berangkat dengen auto mampir di Bayonne, kerna menoeroet kainginannja njonja Buisson, sabelonnja ia berangkat lebih djaoe bikin itoe perdjalanan, ia ingin bertemoe pada ia poenja anak lelaki.
Sasoedanja itoe iaorang teroesken perdjalanannja dengen auto meliwati Arcachon teroes ka Biarritz, di tempat mana iaorang menginep di satoe pension ketjil jang letaknja di Avenue Edouard VII dekat kaap St. Martin.
Kamar salonnja pension ini ada mempoenjai satoe pintoe jang menemboes pada kebon belakang dari gedong terseboet, dan di belakang ini kebon ada pinggiran laoet.
„Keadaan disini soenggoe sebagi di Paradijs," kata njonja Buisson dengen girang.
„Ja, sasoenggoenja akoe poen ada rasa bagitoe dan akoe harep dalem sedikit hari lagi akoe nanti djadi semboeh. Laen minggoe kita nanti berangkat dan mampir pada kaoe poenja anak, kamoedian kita balik lagi ka Parijs, pilih hari jang baek boeat kita poenja nikah."
laorang ada hidoep dengen senang di ini tempat, sering-sering iaorang djalan-djalan ka St. Jean de Luz, ka Combo dan laen-laen tempat poela.
Kira-kira ampatblas hari lamanja iaorang berdiam dalem itoe pension, tatkala mana Landru soeda tida bisa tahan sabar aken tida lantas selsehken pakerdjaännja jang kedjem, kerna ia taoe kantong oewangnja tida bisa tahan brapa hari lagi.
Keadaan dari fihaknja politie boeat ini pendjahat sekarang soeda moelai ringan. Politie tida mempoenjai boekti tjoekoep dalem penoedoehan atas dirinja Landru, djoega tida ada satoe orang jang bisa oendjoek siapa itoe jang nama Raymond Diard. Inspecteur Gaffiot poen soeda moelai kendor oesoet itoe perkara dan kasih masoek raportan pada chefnja dengen bilang jang linjapnja njonja Cuchet bersama anaknja, ada satoe perkara gelap. Soerat-soerat kabar soeda moelai brenti toelis prihalnja Raymond Diard, djoega publiek soeda moelai loepa pada roepanja itoe orang berdjonggot itam dan mata tjelong sebagimana ada diloekisken dalem soerat pembrian tahoenja politie. Hal itoe ada mengoentoengken pada Landru jang moelai brani lakoeken poela kadjahatan-kadjahatan baroe.
Sedari ia tinggal di itoe pension Landru tida brentinja-poeter otak aken tjari djalan boeat poenjaken hartanja njoñja Buisson. la poenja pantjingan boeat nikah njata telah berdjalan baek. Itoe waktoe oewangnja njonja Buisson soeda abis saparo goena onkost- onkost perdjalanan, jang masih katinggalan koerang lebih melinken saratoes frank.
Sakoenjoeng-koenjoeng Landru djadi girang, kerna dapet inget satoe daja. Dalem ia poenja kantong ada tersimpen bebrapa soeratnja njonja Buisson jang terboeboeh oleh tanda tangannja itoe njonja. Dengen itoe tanda tangan, djikaloe ia bawa pada Jean Boas, tentoe sekali Landru bisa bikin segala matjem soerat pengakoean jang menjataken Landru boleh trima samoea hartanja njonja itoe, dan soerat itoe orang tida nanti bisa bilang palsoe, sebab toelisan dan tanda tangannja mirip seperti jang biasa ditoelis oleh tangannja njonja Buisson sendiri.
Hari jang iaorang soeda tetapken hendak berangkat ka Parijs, telah dioeroengken, kerna njonja Buisson ada dapet sakit pilek. Brapa kali Landru djalan sendirian dengen auto ka sapoeternja itoe tempat. Satoe-satoe tempat ia pahamken letaknja. Landru semingkin merasa penting boeat abisken djiwanja njonja Buisson, sebab ini njonja sabentar-bentar ingin bertemoe anaknja di Bayonne jang sedeng dirawat dalem roemah sakit boeta. Landru pikir sering sering dateng di itoe roemah sakit, ada satoe djalan boeat ia dapet bahaja, demikian poen sering-sering bertemoe dengen doea soedara prampoeannja njonja Buisson poen ada perkara jang tida baek boeat dirinja.
Pada soeatoe hari koetika njonja Buisson soeda semboeh dari pileknja, sembari peloeki dan tjioemin njonja itoe Landru laloe berkata:
„Akoe ada pikir, djantoeng hatikoe, jang kitaorang soeda berdiam disini terlaloe lama. Kita poenja tempo berangkat poelang ka Parijs kita soeda oendoerken satoe minggoe. Kabetoelan sedari bebrapa malem ini oedara ada terang. Boelan poernama sabentar malem aken mentjarken sinarnja jang gilang goemilang. Kaloe kita berangkat ka Parijs sabentar malem nistjaja kita aken dapet satoe pemandangan jang menghiboerken hati. Dari djalanan besar kita bisa liat laoetan jang lebar dalem terangnja boelan, aer ombak aken kaliatan berkilat-kilat seperti riboean ratna-manikam jang tersebar di beloedroe biroe. Djalanan-djalanan dalent rimba ada diterangken oleh sorotnja boelan jang sabentar-bentar bisa kaliatan dari selanja daon-daon poehoen. Kita nanti ada berdoeaän dalem auto, tida satoe manoesia jang nanti liat kita berpeloekan dalem auto. Ach!. . . . djantoeng hatikoe, brapa senang kaloe kita berangkat di ini malem. Kita nanti sampe di Bayonne pada pagi-pagi dengen badan seger, kamoedian dari sitoe kita boleh teroesken perdjalanan ka Parijs."
Njonja Buisson dengerken itoe omongan jang sedep seperti orang mengimpi. Kasenangan jang ditjeritaken itoe lantas berbajang-bajang di matanja. Seperti terdjadi pada kabanjakan orang prampoean, bagitoelah djoega njonja Buisson djadi kapingin sanget rasaken itoe kasedepan, maka dengen tida banjak pikir lagi, lantas sadja ia toeroet kainginannja Landru.
Siang-siang iaorang soeda bikin sadia-sadia dan djam sembilan malem iaorang laloe berangkat. Sapandjang djalan Landru tida brentinja oendjoek ini atawa itoe jang bisa girangken hati. Njonja Buisson sabentar-bentar ada kadengeran tertawa. Sampe djam sabelas Landru masih teroes adjak omong pada njonja Buisson jang ada dalem peloekannja, tapi njonja Buisson soeda poeles dengen njenjak.
Landru dapet kanjatahan jang ratjoennja soeda berdjalan dengen baek.
Tadi siang selagi orang beresin koffer-koffer, djongos bawa koffienja njonja Buisson ka dalem kamar, Landru goenaken itoe koetika dengen toewang bebrapa ketes ratjoen jang ia boleh dapet dari itoe student moeda. Itoe ratjoen sekarang mengamoek dalem peroetnja njonja Buisson, hingga dengen tida berasa lagi njonja Buisson sakoenjoeng-koenjoeng soeda djadi pangsan. Di satoe tempat jang sepi Landru brentiken autonja, lepasken itoe njonja dari ia poenja peloekan, la toeroen dari itoe kandaraän, ambil lampoe auto dan sorotken pada moekanja itoe korban.
„Adoeh! André," treak njonja Buisson dengen soeara jang tertahan di tenggorokan. Akoe rasaken badankoe amat sakit. Kapalakoe mabok dan . . . . . . . . napaskoe sesek. . . . . akoe tida bisa tarik napas. . . . . . . . . ."
Landru tida sahoeti, ia teroes awasken moekanja itoe korkan dengen moeka beringas dan mata tida berkesip.
Njonja Buisson melawan dengen keras pada kamatian jang sedeng menjerang pada dirinja, tapi maski bagimana djoega ia tida bisa terloepoet dari kamatian, sebab itoe ratjoen djahat soeda bikin angoes ia poenja oetjoes-oetjoes dan diantoeng.
Landru tida pikir laen dari pada harep itoe korban lekas melajang djiwanja, soepaja ia boleh trima oewangnja kira-kira doea riboe frank.
„André, oh! André, dimana kaoe ada," kata lagi njonja Buisson sambil tjoba bangoenken badannja dan tjari I andru dengen kadoea tangannja, samentara matanja soeda tida bisa liat apa-apa lagi. „Toeloeng akoe! Toeloeng . . . . adoeh!" la lepas badannja dan moelai glisahan. Tida lama lagi badannja moelai kakoe dan napasnja abis.
———