Kabesarannja Khong Hoe Tjoe/Bab 4

by Kwee Tek Hoay

APA JANG ALMARHOEM LIE KIM HOK

TOELIS DALEM IAPOENJA „HIKAJAT

KHONG HOE TJOE."

Dalem almarhoem Lie Kim Hok poenja Hikajat Khong Hoe Tjoe, di bagiaa permoela'an kata," ada ditoetoerken pikiran dari beberapa Sinoloog Barat jang memberi poedjian dan pengharga'an tinggi pada Khong Tjoe dan peladjarannja. Tjoemah sajang sekalih, salaennja dari De Lanessan, tida ada diseboet nama-nama dari itoe orang-orang Europa, siapa poenja oetjapan oleh Toean Lie Kim Hok telah dikamoekaken. Kita tida taoe apa sebabnja itoe nama-nama telah dioempetken, dan inilah kita anggep ada kakliroean besar, kerna membikin gampang sekalih orang menoedoeh jang itoe samoea ada dari bisanja Toean Lie Kim Hok sendiri aken tondjolken apa jang tida ada atawa sengadja lebihin dan tambah-tambahin boeat sedikit poedjian jang diberiken oleh beberapa Sinoloog sampe berobah djadi begitoe moeloek.

Maski begitoe, lantaran menimbang apa jang ditoetoerken disitoe ada sampe berharga, maka maskipoen tida diseboet namanja itoe orang-orang Europa, kita merasa ada baek kapan dikoetip dalem ini halaman soepaja tida mendjadi linjap dan terloepa. Lantaran edja'an jang dipake oleh Toean Lie Kim Hok di taon 1897 ada berbeda dari sekarang, maka kita tida koetip sàbagimana adanja, hanja ambil over sadja sarinja dan kita atoer lagi satjara merdika.

Di bawah ini ada ringkesan dari apa jang Toean almarhoem Lie Kim Hok telah toelis :

Maskipoen Europa ada bagian boemi jang paling ketjil dari lima banoea, bangsa koelit poetih ada di­ pandang lebih madjoe dari samoea bangsa di ini doenia. Sagala apa jang diampoenjai oleh bangsa laen djikaloe tida tjotjok dengen pendapetan bangsa Europa seringkalih ditjelah. Aken tetapi orang nanti merasa heran kapan mendenger pandapetan jang dioetaraken oleh satoe Sinoloog, bahoea sadari orang dapetkèn ilmoe menjitak soerat brangkalih tida ada satoe kitab jang begitoe bagoes isinja sabagi kitab-kitab peladjaran Khong Tjoe, jang mengasih liat dengen njata itoe nabi poenja hati moelja, adat aloes, pikiran dalem, pengartian besar dan ingetan terang dan tadjem.

„Djikaloe kita," kata itoe Sinoloog, „menginget pada perboeatannja beberapa radja radja agama, jang boleh dikataken sedeng tangannja jang kiri ada memegang kitab agama, tangannja jang kanan ada memegang pedang, dan hatinja tida merasa kaberatan toempahken darah manoesia aken gemoekin itoe tanah dimana ia hendak siarken pengadjarannja. — haroeslah kita berkata bahoea Khong Tjoe ada laen sekalih. la tida kaliatan mengandoeng kainginan aken agoengken diri sendiri antara sasama manoesia ; djoega ia tida pernah tambahin pengaroeh dari kitab-kitabnja dengen membilang itoe kitab ada beratsal dari Toehan jang telah didatengken ka doenia oleh tangan malaikat dan laen-laen omongan samatjem itoe. Khong Tjoe telah tjari dan dapetken pengaroeh aken iapoenja kitab-kitab dengen lantaran iapoenja hati jang moelja, pikiran dalem, me­ngenal baek hati manoesia dan kapentingannja orang banjak jang ia dapetken dari pengalaman dalem tempo lama, salagi ia bekerdja aken siarken pengataoeannja oentoek sasama manoesia, sambil ia sendiri tida berentinja mentjari pengartian aken tambahin apa jang ia soedah ada póenja.

„Sedeng ia memberi pengadjarannja dengen amat terang, manis dan sabar, ia tida pernah tjari kabesaran apa-apa katjoeali kabesarannja akal-boedi, jaitoe ma­noesia poenja satoe sifat berätsal dari Toehan jang, maskipoen bagimana ketjil adanja, soedah tjoekoep aken angkat manoesia mendjadi radjanja sekalian machloek jang laen.

„Khong Tjoe siarken peladjarannja dengen satjara merendah : ia boekan beriken itoe seperti sinarnja akal boedi sendjri, hanja seperti barang pendapatan jang ia dapet koempoel dengen djalan fahamken pengadjarannja goeroe-goeroe di djeman koeno. Itoe pengadjaran boekan sadja moelja, tapi berärti dalem dan soetji, hingga beberapa pendita Kristen jang pada doea ratoes taon ka belakang telah dateng di Tiongkok, merasa terpaksa aken beri poedjian.

„Djikaloe sampe di ini djeman, sasoedahnja melaloei lebih dari 2400 taon, kitab-kitab dan nemanja Khong Tjoe ada didjoengdjoeng tinggi oleh bangsa Tionghoa, itoelah ada dari lantaran boenji dari iapoenja toelisan ada bener dan bahasanja terang dan aloes.

„Kapan kita memandang pada kalakoeannja satoe pengarang jang djadi termashoer oleh kerna bagoesnja iapoenja karangan, dan kita lantes merasa kagoemilangannja itoe karangan mendjadi goerem lantaran kalakoean si pengarang tida satimpal sama apa jang ia telah toelis, hanja ada sama sadja dengen kabanjakan orang jang maoe mengadjar tapi sendirinja tida soeka toeroet adjaran itoe, — ini matjem perasa'an tida aken moentjoel terhadep pada Khong Tjoe. lapoenja sikep dan segala perboeatan seperti pendoedoek dan seperti ponggawa negri, kita selaloe dapetken samoeanja ada tjotjok dengen apa jang ia adjar. Sikepnja sabagi anak, soeami dan ajah, membikin ia ternama baek. Sedeng ia soeka mentjari pengartian goena diri sendiri, ia sedia aken bagiken itoe pada laen-laen orang jang ingin bergoeroe padanja. Kagiatannja mengadjar ada sabanding dengen itoe kahormatan dan katjinta'an jang ia terbitken goena dirinja sendiri dan dalem hati moerid-moeridnja jang berdjoemblah riboean dan terdiri dari roepa-roepa oemoer dan deradjat. Dengen hati jang rendah dan bernafsoe sadja aken sampoernaken kabedjikan diri sendiri, boekan sekalih ia soedah maoe trima pangkat lantaran inginkan kahormatan dan kabesaran, hanja terdjoeroeng oleh perasa'an kewadjiban aken perbäeki adat-istiadat dari rahajat dengen djalan merobah oendang-oendang negri dan atoeran adat-lembaga. Begitoe lekas mendapet kanjata'an bahoea pengadjaraanja tida memberi hatsil, atawa merasa ia telah lakoeken kawadjibannja, lantes sadja ia lepasken itoe djabatan dan hidoep sabagi orang preman aken landjoetken pakerdja'annja boeat mentjari pengataoan sambil mengadjar moerid-moerid. Saban kalih letakken djabatan ia tida mambawa kakaja'an hanja dapet sadja nama jang bertambah besar dan haroem. Sedeng begtoe lebih dari satoe kalih ia telah tampik koernia dari radja-radja jang hendak memberi tanah-tanah atawa kota-kota padanja.

„Dalem hal perbaeki istiadat rahajat, Khong Tjoe telah madjoe banjak sekalih hingga namanja tinggal terdjoengdjoeng sampe di ini masa. Inilah sebabnja maka boekan sadja radja-radja dan poedjonggo-poedjonggo ada menghormati Khong Tjoe lebih dari hormati nama manoesia, hanja sekalian rahajat jang moelja atawa hina soeka toelis iapoenja oedjar-oedjar aken ditaro dalem roemah, dalem kapal dan sabaginja, malah dioekir djoega di mana perabot atawa pekakas soepaja bisa kaliatan sahari-hari : laen dari begitoe, segala goerde-goeroe dan orang-orang bangsawan besar di Tiongkok kapan liwat di depan klentengnja ada diwadjibken aken toeroen dari kretanja, bongkokin badan sendiri dan berdjalan kaki berapa lèngkah aken tanda menghormat pada Khong Tjoe, jang digelar Goeroe Besar, Radja Poedjonggo.

Khong Tjoe poenja oedjar-oedjar jang senantiasa ada amat beres dan terang, nanti bikin kita bisa dapet mandoesin dari katoeloesan hatinja maski tjóemah sakedar menginget sadja pada iapoenja adjaran jang demikian boenjinja : „Berlakoelah senantiasa aken mendjaga tjelahan orang dan djalanken pri jang sopan seperti djoega djikaloé kaoe sedeng berada di hadepan orang banjak jang mengintjer dengan mata atawa menoendjoek dengen tangan pada dirimoe. Djagalah, soepaja kaoe tida berboeat pada orang sa'atasanmoe apa jang kaoe sendiri tjelah di antara orang-orang sabawahanmoe. Haramkanlah segala perboeatan jang kaoe rasq koerang pantes adanja dan telah diperboeat oleh orang jang diganti-in olehmoe, jaitoe soepaja kaoe sendiri tida lakoeken itoe perboeatan aken djadi toeladan bagi orang jang nanti djadi penggantimoe."

Toean de Lanessan, saorang Fransch jang kenal baek adat lémbaga bangsa Annam dan Tionghoa, ada mengarang satoe kitab dimana ia menjataken, bahoea atoeran adat dari itoe doea bangsa ada saimbang deagen atoeran-atoeran adat dari bangsa Europa jang telah ternama bangsa sopan ; maka barang siapa menoeroet betoel pada pengadjarannja Khong Tjoe dan Beng Tjoe, boekan sadja ia nanti di-endahi di Shanghai atawa di laen-laen tempat di Tiongkok, hanja nanti di-endahi dan dihormati djoega di London dan di Parijs.

Itoe perätoeran adat jang diberiken oleh doea goeroè jang terseboet, dari doeloe sampe sekarang ada di adjar di seloeroeh Tiongkok pada sekalian moerid dari sekola di kota-kota dan malah sampe pada sekola di desa-desa jang paling ketjil. Itoe doea goeroe besar poenja poko peladjaran ada begini :

Segala perkara baek senantiasa ada genggem gandjaran dalem diri sendiri, sedeng segala kadjahatan ada genggem siksa'an. Hati toeloes ada biangnja kaselametan di doenia ini.

Dengan iaponja pengadjaran Khong Tjoe ada oendang sekalian orang soepaja menjinta satoe sama laen, berhati sabar, soeka berboeat baek, beradat sopan dan berkalakoean jang pantes.

Toean de Lanessan ada seboet djoega beberapa adjarannja Khong Tjoe seperti di bawah ini :

„Djaga baek soepaja maskipoen di tempat jang tersemboeni kaoe tida nanti berboeat soeatoe apa jang boleh menerbitken rasa maloe di dalem hatimoe séndiri.

„Hormati iboe-bapa dan oendjoek kasabaran pada soedara-soedara, apatah itoe boekan perkara jang teroetama di dalem hal hidoep tjara manoesia dan di dalem hal tjinta satoe sama laen ? „Siapa ada rhengenal satoe hal baek tapi tida berani djalanken, ialah ada berlakoe rendah."

Khong Tjoe ada wadjibken dirinja aken mengoesoet-oesoet satiap hari pada rasa hati sendiri atas tiga perkara : a. Apakah kaoe telah berlakoe pada laen orang dengen hati djoedjoer seperti jang kaoe ingin laen orang berlakoe padamoe satjara begitoe djoega — b. Kapan kaoe berboeat apa-apa aken goena sobatmoe, apatah kaoe lakoeken itoe lantaran ingin ternama so­bat atawa oleh kerna adanja sebab jang pantes ? — c. Apatah kaoe telah berpikir-pikir atas hal peladjaranmoe dan telah tjoba melakoeken itoe ?

Seperti pokonja segala kasenangen dan kamoelja'an hati manoesia, dan seperti perhoeboengan antara orang-orang manoesia satoe sama laen di dalem kahidoepan di doenia ini, adalah dioetamaken oleh Khong Tjoe ini adjaran : „Berboeatlah pada laen orang apa jang kaoe ingin orang berboeat padamoe; dan djanganlah berboeat pada laen orang apa jang kaoe tida maoe orang berboeat kapadamoe."

Maskipoen Khong Tjoe ada hidoep di djeman poerbakala jang sekarang telah berlaloe lebih dari 2400 taon lamanja, dan djeman sekarang ini ada ternama „djeman terang", — orang-orang boediman di masa ini ada oepamaken boeah pikirannja Khong Tjoe dengan soeatoe taman indah di mana segala orang boleh petik kembang-kembang jang disoekai oleh hati sendiri.

„Boekan sadja di atas hal pri sopan." kata satoe toean boediman, „karangannja Khong Tjoe ada berisi banjak boeah pikiran jang dihargai tinggi oleh kaoem sastrawan di segala djeman dan segala negri, hanja iapoenja pikiran tentang pamerentahan poen ada ba­njak oendjoek iapoenja ilmoe pengataoean jang tinggi. Dalem Khong Tjoe poenja rentjana atas hal ini poen ada terdapet djoega beberapa atoeran sabagimana jang doeloe hari ada terpandang oleh bangsa-bangsa Europa seperti perkara djelek dan berdosa, tapi sekarang di ini djeman terang dianggep patoet dan wadjib digoenaken."

Seperti di atas telah terseboet djoega, Khong Tjoe tida sekalih pandang peladjarannja seperti boeah dari akal boedi sendiri, hanja ia terangkan jang itoe tjoemah satoe perolehan jang ia dapet dengen fahamken pengadjarannja keizer keizer Giauw dan Soen jang bertachta beberapa belas abad dimoeka Khong Tjoe terlahir. Inilah menoendjoekken sedeng Khong Tjoe ada berboedi besar, hatinja ada toeloes dan rendah.

Demikianlah ada apa jang ditoelis oleh Almarhoem Toean Lie Kim Hok dalem iapoenja boekoe Hikajat Khong Hoe Tjoe jang diterbitken dalem taon 1897, jaitoe boekoe paling pertama tentang riwajat itoe Nabi jang perna diterbitken dalem bahasa Melajoe.

Maski djoega Almarhoem Lie Kim Hok poénja boekoe itoe ada berâtsal dari boekoe bahasa Blanda jang penoelisnja boleh djadi tida menjalin dengen tjotjok betoel beberapa bagian dari itoe Nabi poenja peladjaran, hingga waktoe disalin poelah ka dalem bahasa Melajoe artianja djadi semingkin berbeda djaoe, tetapi tida bisa disangsiken bahoea di dalem itoe boekoe Toean Lie Kim Hok telah tjoba aken oendjoek segala kabagoesan dan kebaekannja apa jang Khong Tjoe adjar, hingga membikin sasoeatoe orang jang batja djadi ketarik dan terpaksa menaro hormat pada itoe Seng-djin seperti satoe Goeroe jang terbesar dari bangsa Tionghoa. Maka haroeslah dibilang Toean Lie Kim Hok ada penoelis Melajoe jang paling doeloe memboeka djalan aken toentoen Hoakiauw pranakan boeat masoek dalem pintoenja Khong Tjoe, goena maksoed mana iapoenja koetipan atas boeah pikirannja achli-achli Europa tentang kabesarannja Khong Tjoe ada memberi pengaroeh besar pada pembatjanja boeat menghormat dan hargaken tinggi pada itöe Nabi dan peladjarannja.

Tamat.