Kabesarannja Khong Hoe Tjoe/Bab 2
KHONG TJOE DALEM PEMANDANGANNJA TOEAN C. JINARAJADASA, PEMIMPIN THEOSOFIE.
(Terkoetip dari „The Herald of the Star").
Itoe abad, dalem mana Buddha Gautama siarken
iapoenja agama pada doenia, telah menjaksiken djoega kadatengannja di Tiongkok satoe goeroe jang peladjarannja, maski sampe sekarang, tjoemah baroe dimengarti sedikit sadja oleh orang-orang di loear Tiongkok. Pada kabanjakan orang asing Khong Tjoe tida lebih dari satoe nama, tapi toch iapoenja peladjaran bagi kita-orang tinggal djadi satoe kabar jang
sanget berharga.
Kapentingannja peladjaran Khong Tjoe ada terletak pada itoe boekti bahoea ia bisa bikin ketarik pada pikirannja golongan orang jang tida begitoe perdoeliken pada ilmoe mijstiek, tapi taro perhatian penoeh pada segala peladjaran moraal dan ethiek jang oetamaken oeroesan dalem doenia, dan boekan di sabelah sananja koeboer. Toedjoean dari Kkong Tjoe adalah boeat mengatoer kalakoean manoesia begitoe roepa hingga, djikaloe betoel manoesia bisa sampe di satoe firdaus, itoe firdaus haroes didapetken di dalem ini doenia sekarang djoega, dan boekan di sorga pada hari nanti kapan soedah meninggal. Khong Tjoe tida pertjaja sama sekalih atas kafaedahannja perboeatan jang berdasar atas harepan boeat mendapet gandjaran di sorga. Satoe kalih saorang moeridnja menanja tentang kamatian, dan Khong Tjoe mendjawab : „Sedeng kaoe tida taoe tentang hidoep, bagimanatah kaoe
maoe selidiki dari hal mati ?" Demikian poen tjaranja ia mendjawab koetika ditanja soeal roh dari orang jang mati : „Orang-orang aloes haroes dihormat, tapi moesti didjaoeken."
Poko peladjaran dari Khong Tjoe adalah saling mengasih dan menerima. „Djangan berboeat pada laen orang apa jang kaoe tida ingin orang berboeat pada-
Salaennja dari ini angen-angen aken saling berlakoe baek dalem perhoeboengan antara sasama manoesia, Khong Tjoe kasih oendjoek tjonto-tjonto jang sanget menarik dari kasampoerna'annja iapoenja angen-angen tentang satoe Koen-tjoe („superior man") Sesoeatoe manoesia bisa mendjadi Koen-tjoe, tida perdoeli tingkatan kalahiran atawa sifat milik doenia jang djadi kapoenja'annja. Biar poen begimana rendah kadoedoekannja dalem penghidoepan waktoe dilahir, bagimana hina dan miskin ka'ada'annja, ia bisa bikin dirinja mendjadi satoe Koen-tjoe dengen djalan perbaeki ia poenja moraal dan pikiran soepaja djadi aloes dan sopan. Khong Tjoe poenja anggepan tentang kafaedahannja kasopanan dan peradaban membikin dalem beberapa hal ia selaloe ada di moeka dari laen-laen pemimpin sekalihpoen jang keloearan dari abad kadoeapoeloeh.
Menoeroet Khong Tjoe, kasopanan tjoemah bisa didapet dengen satoe katjotjokan deri tiga dasar onderwijs: jang paling pertama ada ilmoe memahamken hikajat, dalem mana ada termasoek djoega pemahaman oedjar-oedjar dan perboeatannja orang-orang boediman di djeman koeno. Komoedian orang moesti peladjarin ilmoe mensjair; dan jang katiga, dengen toedjoean aken perbäeki tabeat, ada ilmoe muziek. Dengen peladjarin ini tiga matjem ilmoe orang bisa mendjadi Koen-tjoe, jang kawadjibannja aken bikin diri sendiri mendjadi tjonto atawa toeladan pada samoea orang jang berada di sapoeternja.
Satoe sifat jang berbeda dan paling berharga sendiri dari Khong Tjoe adalah iapoenja penentangan keras pada peperangan. Begitoe dalem masoeknja itoe pengaroeh dari Khong Tjoe poenja peladjaran atas ini soeal hingga, sasoedahnja berselang doeapoeloeh lima abad lamanja, dalem anggepan Tionghoa pakerdja'an mendjadi soldadoe ada dipandang sänget hina dan tjoemah djadi sabagi pentjarian jang paling pengabisan (kaloe soedah tida bisa dapet jang lebih baek) dari golongan orang-orang jang bertabeat rendah. Tjoemah dalem
tempo belakangan, sadjak berhoeboeng dengen bangsa-bangsa Barat, Tiongkok soedah kasampingken ini angen-angen dari Khong Hoe Tjoe jang menentangin
peperangan. Tiongkok poenja tida mengarti boeat perhatiken itoe peladjaran moraal, atawa kagemerannja mengikoetin haloean dari bangsa-bangsa Kristen, soedah bikin ia meniroe aken berdiriken tentara darat dan laoet jang disertakan pekakas modern ; tapi toch ada begitoe tegoeh Khong Tjoe poenja pengaroeh hingga, kapan bangsa-bangsa Kristen di satoe waktoe merobah marika poenja tjara jang kasar, pastilah Tiongkok aken djadi satoe dari negri-negri jang paling pertama aken berdiri di fihak perdamian.
- *
Demikian ada boeah pikirannja Nr. C. Jinarajadasa tentang Khong Tjoe.
Dalem ini pemandangan jang pendek dan ringkes soedah tentoe moesti dikasih liwat banjak begian dari peladjaran Khong Tjoe jang penting, hingga tida kataoean bagimana pikiran Toean C. Jinarajadasa tentang Confucianisme saoemöemnja, kapan sa'ande ia soedah pernah preksa dan jakinken dengen sasoenggoe hati. Anggepannja tentang Khong Tjoe poenja haloean antipeperangan ada sabagian jang perloe ditambahin. Tiongkok boekan tida mengarti kapentingan peladjaran Khong Tjoe jang tida soeka pada militarisme, hanja telah terpaksa tegoehken angkatan perangnja lantaran selama ini satoe äbad telah moesti telen banjak kagetiran dari negri-negri asing jang mempoenjai angkatan darat dan laoet djaoe lebih sampoerna. Tapi ada betoèl anngepannja Toean Jinarajadasa koetika ia membilang, kapan negri-negri Kristen dan laen-laen negri lagi jang gemer goenaken kakerasan soeka berichtiar aken menjegah peperangan, pastilah Tiongkok aken memberi toendjangan sapenoehnja di fihak perdamian, kerna maskipoen sekarang mempoenjai banjak soldedoe, Tiongkok boekan hendak timboelken onar dangen negri asing, hanja hendak lindoengken diri sendiri, jang tida bertentangan dengen soemanget dari peladjarannja Khong Tjoe.