32
174. (14) Masing bisa ngumbah awak, saupama saperti nu ngumbah peujit, kudu bisa miceun caduk, mun ngumbah saluarna, ti jerona dikosokan meureun bau, ngumbah kudu ti jerona, eta teh kudu dibalik.
175. (15) Kumaha malikeunana, moal temen bet bisa malikkeun peujit, ulah seubeuh teuing nyatu, cegah sare jeung dahar, sawatara cegah sahwat reujeung napsu, sarta jeung elmuna pisan, kitu anu ngumbah diri.
176. (16) Lamun teu kitu petana, kalak bongkok awakna moal beresih, anu lumrah eta sepuh, sapedah sok sembahyang, sahadat solat netepan unggal waktu, eta ngan bersih di luar, sapedah sok reman mandi.
177. (17) Unggal waktu teuteuleuman, gura-giru sieuneun kaburu ahir, dikir Satarian ngunggut, kaliwat tuluy kala, rasa hutang gura-giru tuluy naur, geus kalampah tumaninah, rasana anggeus beresih.
178. (18) Ari sore pupujian, Rasulullah Muhammad anu dipuji, dumukna mah hanteu puguh, nyebut Allah Pangeran, eta oge jongokna mah hanteu puguh, ngan nurutan kana beja, nu sepuh nu anom deui.
X. PUPUH SINOM ( 17 pada )
179. (01) Geus lumrah nu mamatahan, nu baheula nu kiwari, ngan sakitu panghadena, enyana mah kudu sidik, kajeun hanteu bisa ngaji, supaya hade panemu, hade nya panarima, ka sasama ulah julig, kudu asih eta ka pada kaula.
180. (02) Geus puguh nya ka sasama, ka budak ge ulah wani, ulah sapedah ka anak, ulah sok nyaluntang teuing, pangeranana mah sami, kabeh oge meureun kitu, lampah jalma utama, kudu waspada ka diri, mun geus kitu entong susah ngaji.
