56
LIAUW TJAY.
sakit hoeloe hati, djikaloe Kong Tjoe poenja sakit misti pake satoe barang baroe bisa hilangken Kong Tjoe poenja sakit.
Lantas Tian Sie menanja sama itoe boedak toewa: Barang apa jang misti di pake boeat obatin Kong Tjoe poenja sakit. Lantas Lauw Tjong berkata: Tempo senseh Taij Ie Soe bikin obat orang poenja otak, itoe otak orang mati jang belon sampe ampat poeloe hari, sebab itoe orang poenja otak belon kering, di ambil dia poenja otak toewangin arak panas, sasoedahnja di kasi makan sama Kong Tjoe, maka itoe Kong Tjoe boleh djadi baek.
Serta Tian Sie dengar begitoe, lantas ia berkata: Saja poenja laki baroe mati kira-kira doea poeloe hari lamanja, djikaloe itoe saja poenja laki poenja peti di boeka boleh ambil dia poenja otak kepala, sebab saja sama Kong Tjoe soedah djadi belaki bini badan doea djadi satoe, atsal Kong Tjoe boleh mendjadi baek dari sakitnja.
Serta Lauw Tjong dengar, lantas ia ambil kampak dan ia pergi bersama-sama Tian Sie kakoeboerannja Tjeng Tjoe Sian Seng, serta dia orang berdoea sampe di itoe koeboeran, begitoe djoega Lauw Tjong lantas bongkar itoe koeboeran, sasoedahnja itoe koeboeran di bongkar, lantas Lauw Tjong kampak Tjeng Tjoe Sian Seng poenja peti dan lantas ia kloearken maitnja Tjeng Tjoe Sian Seng dari dalem peti itoe, tempo mait itoe soedah di kloearken dan maoe di bela kepalanja, terkoenjoeng-koenjoeng maitnja Tjeng Tjoe Sian Seng itoe djadi hidoep koembali, begitoe djoega Tian Sie lantas angkat Tjeng Tjoe Sian Seng adjak poelang ka roemahnja. Serta Tian Sie soedah sampe di roemahinja bersama-sama soewaminja (Tjeng Tjoe Sian Seng), lantas Tian Sie lihat di dalem kamar penganten itoe Kong Tjoe sama dia poenja boedak soedah tiada klihatan tiada tahoe dia pergi di mana
Lantas Tjeng Tjoe Sian Seng menanja: Sio Tjiah boekan pake poeti di waktoe saja meninggal doenia, kenapa ini hari Sio Tjiah pake sereba mera serta haroem baoenja? Maka saja maoe menanja sama Sio Tjiah saja tiada tahoe sebab apa.
Setelah Tian Sie dengar pertanjahannja Tjeng Tjoe Sian Seng itoe, ia poen tiada bisa bitjara satoe apa, melainkan ia tinggal diam sadja.
Samentara itoe Tjeng Tjoe Sian Seng prenta Tian Sie kloearin makanan, lantas Tian Sie tjepet kloearin itoe makanan di taro di medja, sasoedahnja sedia itoe makanan di atas medja, lantas Tjeng Tjoe Sian Seng doedoek makan dan minoem sembari berkata sama Tian Sie: Orang belaki bini ada di doenia seratoes malem jang mendjadi kabaekannja orang jang bertjintaän? Lelaki ataoe prampoean djikaloe lihat barang jang baroe tentoe loepa sama jang lama. Djikaloe doeloe hari tiada beroetang djodo dengan boedi tentoe ada di doenia tiada boleh djadi laki bini, sebab doeloe kaloe ada beroetang boedi maka ini hari mendjadi laki bini, kenapa Sio Tjiah tega hati sekali bawa kampak membela soewami poenja peti, lantaran Sio Tjiah pandang jang baroe loepain jang lama, ingetan Sio Tjiah maoe mendjadi senang.
