LIAUW TJAY.
55
Soedjoet di depan gambarnja Tjeng Tjoe Sian Seng sembari menangis. Serta Tian Sie lihat itoe anak moeda poenja roepa begitoe tjakap, maka Tian Sie djadi timboel birahi dia poenja hati maoe soeka sama itoe anak moeda. Sekoetika itoe djoega Tian Sie tjepet-tjepet atoer barang makanan dan minoeman di atas medja, sasoedahnja lantas Tian Sie adjak itoe Kong Tjoe bersama-sama doedoek makan. Di waktoe lagi makan, Tian Sie poenja mata memandang pada itoe Kong Tjoe dengan tiada bisa soedah, tetapi Kong Tjoe poera-poera tiada tahoe. Tian Sie jang soedah memandang roepanja itoe Kong Tjoe jang begitoe amat tjakap, maka Tian Sie djadi sangat birahi, lagi poen Tian Sie terlaloe amat soeka hatinja sebab di dalem itoe goenoeng tiada ada orang jang dapet tahoe, dari itoe Tian Sie poenja hati tiada boleh tahan maka ia lantas tarik badjoenja itoe Kong Tjoe, sembari berkata: Saja saorang prampoean moeda soeka sama Kong Tjoe, saja tiada bisa bitjara, ini hari saja sedia makanan adjak Kong Tjoe doedoek makan, ingetan saja maoe ambil boeat laki sama Kong Tjoe.
Lantas itoe Kong Tjoe berkata: Tjeng Tjoe Sian Seng saja poenja goeroe, di mana ada itoe atoeran goeroe mati istrinja saja ambil bakal bini.
Setelah Tian Sie dengar perkatahan itoe, lantas ia bangoen dari krosi dan ia troes masoek di dalem dia poenja kamar di mana ia lantas toekar pakeannja dengan pakean jang baroe serta pake bahoe- bahoean jang amat haroem, sasoedahnja Tian Sie abis berias lantas ia kloear dari itoe kamar dan ia lantas doedoek koembali di depan medja makan, sembari berkata sama Kong Tjoe: Kendatinja Tjeng Tjoe Sian Seng Kong Tjoe poenja goeroe, tetapi sekarang sama saja Kong Tjoe belon kenal, dari itoe Kong Tjoe djangan mara boeat tolak saja poenja permintahan, sebab saja pandang Kong Tjoe anak saorang jang berpangkat, soepaja dapet laki lagi seperti Kong Tjoe saorang tentoelah saja boleh mendjadi senang.
Serta Kong Tjoe dengar mendjadi soeka hatinja, maka koetika itoe djoga si Kong Tjoe kloearin doea poeloe tail oewang perak soeroe boeat sedia barang-barang pakean kawin, serta Tian Sie trima itoe oewang perak doea poeloe tail, mendjadi amat soeka hatinja, sigra djoega ia lantas bikin sedia itoe barang-barang jang misti di pake bceat pakean penganten.
Pada satoe hari kebetoelan hari baek, maka Tian Sie lantas berpake-pakean badjoe penganten dan itoe Kong Tjoe djoega berpake-pakean badjoe penganten itoe, sasoedahnja dia orang berdoea sembahjang djadi penganten baroe lantas Tian Sie bersama itoe Kong Tjoe masoek di dalem kamar dengan segala soeka hatinja, tiba-tiba sampe stengah malem itoe Kong Tjoe belaga sakit hoeloe hati tiada bisa tahan dengan berkaok-kaok sadja, lantas Tian Sie panggil itoe Kong Tjoe poenja boedak toewa Lauw Tjong, sasoedahnja Lauw Tjong dateng, lantas Tian Sie menanja Kong Tjoe poenja sakit, lantas itoe boedak toewa Lauw Tjong berkata: Memang Kong Tjoe ada poenja penjakit
