LIAUW TJAY.
7
ketahanan napsoenja ia maoe liat pada itoe prampoean tjakap dengen memandang tiada bisa soedah. Tjoba Kho Seng tiada membalik pake hati jang baek dengen membatja kitab Kong Beng Keng itoe serta bersoedjoet pagi dan sore pada Toehan jang Maha Koewasa, tentoe sekali dia poenja doewa mata tiada bole mendjadi baek koembali, maka itoe melekat-melekat saban hari djalan koeliling memereksa di doenia poenja orang jang berhati djahat dan jang berhati baek.
III
TJERITA TJOE HAUW LIAM KENA DI GODA
SAMA SETAN DI DALEM GREDJA
LAM DJIOK TIAN.
Di kota Kang Saij ada sa-orang bernama Beng Liong Tam bersama sobatnja bernama Tjoe Hauw Liam, itoe waktoe dia orang berdoea berdjalan pergi di gredja Lam Djiok Tian, di dalem itoe gredja ada satoe wesio toewa serta itoe wesio toewa liat ada doewa tetamoe dateng, lantas itoe wesio pake badjoenja boeat kloear samboet dan adjak masoek itoe doea tetamoe di dalem itoe gredja.
Di dalem itoe gredja poenja tembok jang di sebelah wetan ada tersoengging beroepa-roepa kembang, dan di dalem itoe kembang poenja soengingan ada tersoenging satoe bidadari kliatannja itoe bidadari dia poenja moeloet seperti orang tertawa serta dia poenja mata bergojang gojang, saking Tjoe Hauw Liam liat begitoe lama itoe bidadari, lantas ia mendeketin itoe tembok, kaget itoe tembok poenja soengingan kliatan seperti mega bersoesoen-soesoen, tetapi ini soengingan boekannja orang di doenia poenja kepinteran tentoe satoe melekat poenja soengingan. Begitoe djoega Tjoe Hauw Liam lantas menanja pada itoe wesio toewa: Ini soengingan di atas tembok terlaloe amat heran seperti barang jang hidoep ada dia poenja napas.
Lantas itoe wesio toewa berkata : Djikaloe Tjoe Siang Kong maoe taoe ini soengingan terpake ilmoe waktoe menjoenging boeat menerangin sama orang banjak jang bikin plesiran di dalem ini gredja.
Di waktoe Tjoe Hauw Liam denger itoe wesio toewa poenja perkatahan, sentara lamanja seperti ada orang tarik dia poenja badjoe lantas Tjoe Hauw Liam balik blakang dapet liat ada satoe kamar ketjil, begitoe djoega Tjoe Hauw Liam troes masoek deketin itoe kamar serta Tjoe Hauw Liam liat disitoe ada sa-orang prampoean moeda jang amat elok parasnja dan dia poenja tangan ada pegang kembang serta gapein Tjoe Hauw Liam, tempo Tjoe Hauw Liam liat jang di gapein sama itoe prampoean, maka Tjoe Hauw Liam
