— 1186 —
kenal baek, tiada soeka beroesoehan seperti orang-orang di laen tempat."
Selagi di bitjaraken tentang oeroesan pembrontakan di fihaknja Pak An Ong, itoe tempo pengawal astana dateng mengasi taoe, di loear astana ada poetranja Tjio Lin, Tjong Tin di Gan Boen Koan, Tjio Hoaij Giok, jang membawa oeroesan penting minta berdjoempa sama Baginda Keizer.
Itoe lantas di panggil masoek, dari siapa Baginda di trimaken soeratnja Tjio Tjong Tin, jang mengabarken tentang terkoeroengnja kota Gan Boen Koan oleh tentara moesoe. Lebi doeloe Baginda titaken Tjio Kongtjoe manoenggoe sampe kamodian di ambil poetoesan begimana haroes berboeat dalem itoe perkara.
Satelah Hoaij Giok moendoer dari roewangan astana, Baginda lantas prenta orang panggil Dji Lam Ong, Po Kok Kong dan Si Long Boen Kim, jang koetika soeda berkoempoel Baginda lantas bitjaraken oeroesan jang berhoeboeng dengen pembrontakannja Pak An Ong.
„Boeat bisa menjega madjoenja moesoe, paling perloe alat sendjata dan orang jang gaga," kata Lu Kok Tjaij. „Dalem peprangan jang laloe soeda ternjata di fihak moesoe ada terdapet banjak orang gaga dan antaranja ada jang mempoenjai ilmoe gaib, maka kaloe tiada kirim orang-orang jang pande soeker bisa di ambil kamenangan."
