— 1187 —
„Ja, itoelah memang ada djalan jang paling betoel, tapi kami rasa terlaloe soeker," kata Baginda. „Sinsiang taoe sendiri, ini tempo dalem negri ada kakoerangan panglima prang, maka di mana kita bisa dapet orang jang gaga boeat tadoekin moesoe?"
„Di dalem negri hamba taoe ada kakoerangan orang gaga, tapi di loearan sanget banjak djoemblanja," kata poela itoe dorna, hamba rasa baek Baginda siarken soerat salebaran dan hoendjoek bertaoe, bahoea negri ada perloe pake orang-orang gaga dan berilmoe, dengen berlakoe begini tentoe aken kaliatan asilnja."
Pikirannja si dorna di njataken moefakat oleh Dji Lam Ong, Po Kok Kong dan Kok Kioe. Lebi djaoe Dji Lam Ong oetaraken pikirannja seraja berkata: „Djoega menoeroet hamba poenja pikiran, ini tempo baek sekali boeat Baginda oendjoek boedi dermawan pada orang-orang jang terhoekoem sebab berdosa pada negri; hamba ingin biarlah marika itoe dapet kamerdika'an boeat toeroet membantoe dalem perkara negri dan kamodian di bebasken hoekoemannja, bila marika bisa diriken pahala jang berharga. Dengen berlakoe begini, boekan sadja Baginda oendjoek perkara amal, poen orang-orang gaga jang bidjaksana tentoe merasa soeka dan membantoe dengen setjara soen goe hati pada Baginda poenja sasoeatoe kahendak.”
